31ಕ್ಕೆ ಬೆಳಗಾವಿಯಲ್ಲಿ ಅಹಿಂಸಾ ರನ್ ಮ್ಯಾರಥಾನ್‌

ಕನ್ನಡಪ್ರಭ ವಾರ್ತೆ ಬೆಳಗಾವಿ

ಜೈನ ಇಂಟರ್ ನ್ಯಾಷನಲ್ ಟ್ರೇಡ್ ಆರ್ಗನೈಜೇಶನ್‌ ಜಿತೋ ಲೇಡೀಜ್‌ ವಿಂಗ್‌ ವತಿಯಿಂದ ಮಾ.31ರಂದು ಬೆಳಗಾವಿಯಲ್ಲಿ ಅಹಿಂಸಾ ರನ್ ಮ್ಯಾರಥಾನ್‌ ಓಟ ಆಯೋಜಿಸಲಾಗಿದೆ ಎಂದು ಜಿತೋ ಲೇಡೀಜ್‌ ವಿಂಗ್‌ ಅಧ್ಯಕ್ಷೆ ಮಾಯಾ ಜೈನ ಹೇಳಿದರು.

ನಗರದಲ್ಲಿ ಗುರುವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಜಿತೋ ಸಂಸ್ಥೆ ಅಂತಾರಾಷ್ಟ್ರೀಯ ಮಟ್ಟದ ಸಂಸ್ಥೆಯಾಗಿದ್ದು, ವಿಶ್ವದ 28 ದೇಶಗಳಲ್ಲಿ ಹಾಗೂ ಭಾರತದಲ್ಲಿ 69 ವಿಭಾಗಗಳನ್ನು ಹೊಂದಿದೆ. ಈ ಎಲ್ಲ ವಿಭಾಗಗಳಲ್ಲಿ ಈ ಅಹಿಂಸಾ ರನ್ನ ನಡೆಸಲಾಗುವುದೆಂದು ಹೇಳಿದರು.

2023ರಲ್ಲಿ ಆಯೋಜಿಸಿದ್ದ ಅಹಿಂಸಾ ರನ್‌ ಓಟದಲ್ಲಿ ಸಾವಿರಾರು ಜನರು ಭಾಗವಹಿಸಿ ಯಶಸ್ವಿಗೊಳಿಸಿದ್ದರು. ಈ ವರ್ಷವೂ ಸಹ ಜನರು ಸಹಭಾಗಿತ್ವ ಹೆಚ್ಚಾಗುವ ನಿರೀಕ್ಷೆ ಹೊಂದಲಾಗಿದೆ. ಈ ಮ್ಯಾರಥಾನ್‌ ಓಟದ ನಿಮಿತ್ತ ವಿಶ್ವದಲ್ಲೆಡೆ ಅಹಿಂಸೆ ಪ್ರತಿಪಾದಿಸುವ ಉದ್ದೇಶವಾಗಿದೆ ಎಂದು ಅವರು ತಿಳಿಸಿದರು.

ಇದೇ ಸಂದರ್ಭದಲ್ಲಿ ಮ್ಯಾರಥಾನ್‌ ಓಟದ ಸಂಚಾಲಕಿ ಕೀರ್ತಿ ದೊಡ್ಡಣ್ಣವರ ಮಾತನಾಡಿ, ಏ.3ರಂದು ಬೆಳಗ್ಗೆ 5.30 ಗಂಟೆಗೆ ಬೆಳಗಾವಿಯ ಕ್ಯಾಂಪ್‌ ಮರಾಠಿ ವಿದ್ಯಾನಿಕೇತನ ಶಾಲಾ ಮೈದಾನದಿಂದ ಈ ಓಟ ಆರಂಭವಾಗಲಿದೆ. ಈ ಓಟದಲ್ಲಿ 3 ಕಿಮಿ, 5 ಕಿಮೀ, ಹಾಗೂ 10 ಕಿಮೀ ಅಂತರದ ಅಹಿಂಸಾ ರನ್ ಮ್ಯಾರಥಾನ್‌ ಓಟ ನಡೆಯಲಿದೆ. ಈ ಓಟದಲ್ಲಿ ಭಾಗವಹಿಸುವ ಪ್ರತಿಯೊಬ್ಬರಿಗೂ ಟೀ ಶರ್ಟ್‌, ಪದಕ, ಪ್ರಮಾಣ ಪತ್ರ, ಹಾಗೂ ಉಪಹಾರದ ವ್ಯವಸ್ಥೆ ಮಾಡಲಾಗಿದೆ ಎಂದು ಅವರು ತಿಳಿಸಿದರು.

ಈ ಓಟದಲ್ಲಿ ಭಾಗವಹಿಸುವವರು ತಮ್ಮ ಹೆಸರು ನೊಂದಾಯಿಸುವುದು ಕಡ್ಡಾಯವಾಗಿದೆ. ಈ ಮ್ಯಾರಥಾನ್‌ ಓಟದಿಂದ ಬಂದಂತಹ ಹಣದಲ್ಲಿ ಬೆಳಗಾವಿಯ ಸದಾಶಿವ ನಗರದಲ್ಲಿನ ಸರ್ಕಾರಿ ಕನ್ನಡ ಶಾಲೆ ನಂ.26 ಈ ಶಾಲೆಯ ಕಟ್ಟಡ ನಿರ್ಮಾಣಮತ್ತು ಮೂಲಭೂತ ಸೌಕರ್ಯ ಒದಗಿಸಲು ಬಳಿಸಿಕೊಳ್ಳಲಾಗುವುದೆಂದು ಅವರು ತಿಳಿಸಿದರು.

ಸುದ್ದಿಗೋಷ್ಠಿಯಲ್ಲಿ ಜಿತೋ ಲೇಡೀಲ್‌ ವಿಂಗ್‌ ಕಾರ್ಯದರ್ಶಿ ಮಮತಾ ಜೈನ, ಜಿತೋ ಅಧ್ಯಕ್ಷ ವೀರಧವಲ ಉಪಾಧ್ಯೆ, ಜಿತೋ ಯುವ ಘಟಕದ ಅಧ್ಯಕ್ಷ ದೀಪಕ ಸುಬೇದಾರ, ಲೇಡೀಜ್‌ ವಿಂಗ್‌ ಸಮನ್ವಯಕ ಅಭಯ ಆದಿಮನಿ ಇತರರು ಉಪಸ್ಥಿತರಿದ್ದರು.