ಆಕಾಶವಾಣಿಯ ಕೇಳುವ ಪರಂಪರೆಯಿಂದ ಸಂಸ್ಕೃತಿ ಗಟ್ಟಿ

ಕನ್ನಡಪ್ರಭ ವಾರ್ತೆ ಚಾಮರಾಜನಗರಕೇಳುವ ಪರಂಪರೆಯನ್ನು ಉಳಿಸಿ ಆ ಮೂಲಕ ನಮ್ಮ ಸಂಸ್ಕೃತಿ ಮತ್ತು ಪರಂಪರೆಯನ್ನು ಗಟ್ಟಿಯಾಗಿಸುತ್ತಿರುವುದು ಮೈಸೂರು ಆಕಾಶವಾಣಿ ಎಂದು ಹಿರಿಯ ಸಾಹಿತಿ ಹನೂರು ಕೃಷ್ಣಮೂರ್ತಿ ಹೇಳಿದರು.ಪ್ರಸಾರ ಭಾರತಿ ಹಾಗೂ ಆಕಾಶವಾಣಿ ಮೈಸೂರು ಎಫ್.ಎಂ ೧೦೦.೬ ಸಹಯೋಗದಲ್ಲಿ ಮೈಸೂರು ಆಕಾಶವಾಣಿ-೯೦ರ ಅಂಗವಾಗಿ ನಗರದ ಜೆಎಸ್ಎಸ್ ಶಿಕ್ಷಣ ಸಂಸ್ಥೆ ಸಭಾಂಗಣದಲ್ಲಿ ಹಮ್ಮಿಕೊಂಡಿದ್ದ ನಮ್ಮ ಜಾನಪದ ಚಾಮರಾಜನಗರದ ಜನಪದ ಸಂಸ್ಕೃತಿ ಮಾತು-ಹಾಡು-ಕುಣಿತ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.ಮಾತು-ಆಡು-ಕುಣಿತ ಅರ್ಥಪೂರ್ಣ ಕಾರ್ಯಕ್ರಮವಾಗಿದೆ, ಆಕಾಶವಾಣಿಯಲ್ಲಿ ಕೇಳುವುದು ಮತ್ತು ಎಲ್ಲವನ್ನೂ ಕೇಳಿಸಿಕೊಂಡು ಜನರು ಕೇಳುವ ಹಾಗೆ ಕಾರ್ಯಕ್ರಮವನ್ನು ಮಾಡಿಕೊಂಡು ಬಂದು ಪಟ್ಟಣ, ಹಳ್ಳಿ ಎಲ್ಲರಿಗೂ ಬೇಕಾದ ಸಂಸ್ಥೆಯಾಗಿದೆ ಎಂದರು. ಕೇಳುವ ಪರಂಪರೆ ದೊಡ್ಡದು. ಪಂಪ ಕಾವ್ಯ ಬರೆಯುತ್ತಿದ್ದೇನೆ ಎನ್ನಲಿಲ್ಲ ಕೇಳುತ್ತಿದ್ದೇನೆ ಎಂದ, ಕುಮಾರವ್ಯಾಸನು ಸಹ ಇದೇ ಮಾತನ್ನು ಹೇಳಿದನು, ಕೇಳುವ ಜನ ಪ್ರಸಿದ್ಧರು ಹಾಗೆ ಹಾಡುತ್ತಾ ಕೇಳುವ ಹಾಗೆ ಮಾಡಿದವರು ಸಾಮಾನ್ಯ ಜನ. ಇದು ಒಂದು ದೊಡ್ಡ ಪರಂಪರೆ ಎಂದರು.

ಅಧ್ಯಕ್ಷತೆ ವಹಿಸಿದ್ದ ಆಕಾಶವಾಣಿ ಉಪ ನಿರ್ದೇಶಕ ಉಮೇಶ್ ಮಾತನಾಡಿ, ಆಕಾಶವಾಣಿ ಕೇಂದ್ರ ಸ್ಥಾಪಿಸಿದ ಡಾ.ಎಂ.ವಿ ಗೋಪಾಲಸ್ವಾಮಿ, ನಾಲ್ವಡಿ ಕೃಷ್ಣರಾಜ ಒಡೆಯರ್ ಅವರು ಸ್ಮರಣೀಯರು, ನಮ್ಮ ಆಕಾಶವಾಣಿ ವಿಶಿಷ್ಟವಾದ ವಿನ್ಯಾಸದ ಕಟ್ಟಡವನ್ನು ಹೊಂದಿದೆ ಎಂದರು. ಜಾನಪದ ಸಂಸ್ಕೃತಿ ಉಳಿದಿರುವುದು ಆಕಾಶವಾಣಿಯಿಂದ. ಆಕಾಶವಾಣಿ ಮತ್ತು ಜಾನಪದಕ್ಕೂ ನಂಟಿದೆ. ಮುಂದಿನ ಪೀಳಿಗೆಗೆ ಕಲೆಯನ್ನು ಉಳಿಸುವ ಜವಾಬ್ದಾರಿ ಜಾನಪದ ಕಲಾವಿದರ ಮೇಲಿದೆ ಎಂದರು.

ನಗರದ ಜೆಎಸ್‌ಎಸ್ ಪದವಿ ಕಾಲೇಜು ಪ್ರಾಂಶುಪಾಲ ಮಹದೇವಸ್ವಾಮಿ ಮಾತನಾಡಿ, ಆಕಾಶವಾಣಿ ಶೇ.೯೨ ಭೂಭಾಗ ಸಂಪರ್ಕ ಮಾಡುತ್ತಿದೆ. ಮೈಸೂರು ಆಕಾಶವಾಣಿ ಇಡೀ ವಿಶೇಷವಾದದ್ದು ಸಂಸ್ಕೃತಿ ಮತ್ತು ಪರಂಪರೆಯನ್ನು ಗಟ್ಟಿಗೊಳಿಸುವ ಕೆಲಸ ಮಾಡುತ್ತಾ ಜನ ಸಾಮಾನ್ಯರಿಗೆ ಬೇಕಾದುದನ್ನು ನೀಡುತ್ತಾ ಬಂದಿದೆ ಎಂದರು. ಸಹಾಯಕ ನಿರ್ದೇಶಕ ಅಬ್ದುಲ್ ರಶೀದ್ ಮಾತನಾಡಿ, ಹನೂರು ಕೃಷ್ಣಮೂರ್ತಿ ಈ ಭಾಗದ ಸಾಹಿತ್ಯಕ್ಕೆ ಸಾಕಷ್ಟು ಕೊಡುಗೆ ನೀಡಿದ್ದಾರೆ. ಆಕಾಶವಾಣಿ ಮೂಲಕ ಒಳ್ಳೆಯದನ್ನು ಕೇಳಿಸುವ ಕೆಲಸ ನಿರಂತರವಾಗಿ ಮಾಡುತ್ತಿದ್ದೇವೆ ಎಂದರು.

ಜಿಲ್ಲಾ ಪದವಿ ಕಾಲೇಜುಗಳ ಉಪ ನಿರ್ದೇಶಕ ಮಂಜುನಾಥ ಪ್ರಸನ್ನ ಉಪಸ್ಥಿತರಿದ್ದರು. ಆಕಾಶವಾಣಿ ಕಾರ್ಯಕ್ರಮ ನಿರ್ವಾಹಕ ಎನ್.ಕೇಶವಮೂರ್ತಿ ಸ್ವಾಗತಿಸಿದರು, ಜಾಂಪಣ್ಣ ಆಶೀಹಾಳ್ ವಂದಿಸಿದರು, ಪ್ರಭುಸ್ವಾಮಿ ಮಳಿಮಠ ನಿರೂಪಿಸಿದರು.