ಭಾವೈಕ್ಯತೆ ಬೆಸೆಯುವ ಮೊಹರಂ ಹಬ್ಬಕ್ಕೆ ತೆರೆ

ಮುಂಡಗೋಡ: ಹಿಂದೂ-ಮುಸ್ಲಿಂ ಭಾವೈಕ್ಯತೆ ಬೆಸೆಯುವ ಹಬ್ಬವೆಂದೇ ಹೇಳಲಾಗುವ ಮೊಹರಂ ಹಬ್ಬಕ್ಕೆ ಕಡೆಯ ದಿನವಾದ ಭಾನುವಾರ ಬಹುತೇಕ ಕಡೆಗೆ ದೇವರು ಹೊಳೆಗೆ ಹೋಗುವ ಸಂಪ್ರದಾಯದೊಂದಿಗೆ ತೆರೆ ಬಿದ್ದಿದೆ.

ಐದು ದಿನಗಳ ಹಿಂದೆ ತಾಲೂಕಿನ ಬಹುತೇಕ ಎಲ್ಲ ಗ್ರಾಮಗಳಲ್ಲಿಯೂ ಪಂಜಾಗಳನ್ನು ಪ್ರತಿಷ್ಠಾಪಿಸಲಾಗಿತ್ತು. ಮುಂಡಗೋಡ ಪಟ್ಟಣ ಮತ್ತು ತಾಲೂಕಿನ ಪಾಳಾ, ಮಳಗಿ, ಕಾತೂರ, ಚವಡಳ್ಳಿ, ಅಂದಲಗಿ, ಚಿಗಳ್ಳಿ, ಹುನಗುಂದ ಹಾಗೂ ಇಂದೂರ ಕೊಪ್ಪ ಸೇರಿದಂತೆ ವಿವಿಧ ಗ್ರಾಮಗಳಲ್ಲಿ ಹಬ್ಬವನ್ನು ವಿಶೇಷವಾಗಿ ಆಚರಿಸಲಾಗುತ್ತದೆ.

ಹುಲಿ ವೇಷಧಾರಿಗಳ ಗರ್ಜನೆ: ಹುಲಿ ವೇಷಧಾರಿಗಳ ಆಕರ್ಷಕ ಕುಣಿತ ಹಾಗೂ ಗರ್ಜನೆ ನೋಡುಗರ ಕಣ್ಣುಕುಕ್ಕುತ್ತದೆ. ಮೇಲ್ನೋಟಕ್ಕೆ ಇದೊಂದು ಮೋಜಿನ ಮಜಲು ಎನ್ನುವಂತೆ ಕಂಡರೂ ಇಂತಹ ಹುಲಿ ವೇಷಧಾರಿಗಳ ಕುಣಿತಗಳ ಹಿಂದೆ ಕುತೂಹಲಕಾರಿ ಕಥಾನಕಗಳಿವೆ ಎನ್ನುವುದು ತಿಳಿದು ಬರುತ್ತದೆ. ಆಶ್ಚರ್ಯವೆಂದರೆ, ಹೀಗೆ ಮೊಹರಂನಲ್ಲಿ ಹುಲಿವೇಷ ಹಾಕಿ ನರ್ತಿಸುವ ವೇಷಧಾರಿಗಳು ಬಹುತೇಕ ಹಿಂದೂಗಳೇ ಆಗಿರುತ್ತಾರೆ.

ಹುಲಿ ವೇಷ ಹಾಕಿಕೊಳ್ಳುವವರು ಮೊಹರಂ ಮೊದಲ ದಿನದಂದೇ ಪಂಜಾಗಳ ಪ್ರತಿಷ್ಠಾಪನೆಯ ಸಮಯಕ್ಕೆ ಚಿತ್ರಕಲಾವಿದರ ಬಳಿ ಹೋಗಿ ಬಣ್ಣದಿಂದ ಮೈಗೆಲ್ಲ ಹುಲಿಯ ಚಿತ್ತಾರಗಳನ್ನು ಬರೆಸಿಕೊಳ್ಳುತ್ತಾರೆ. ಹಳದಿ, ಕೆಂಪು, ಬಿಳಿ ಹಾಗೂ ಕಪ್ಪು ಬಣ್ಣಗಳಿಂದ ಹುಲಿಯ ಯಥಾವತ್‌ ವೇಷವನ್ನು ಕಲಾವಿದ ಹರಕೆಕಾರನ ಮೈಯಲ್ಲಿ ಚಿತ್ರಿಸುತ್ತಾನೆ. ಹೀಗೆ ಮೈಗೆ ಹುಲಿ ವೇಷ ಬರೆಸಿಕೊಂಡ ವೇಷಧಾರಿ ಸುಮಾರು ೬ ದಿನಗಳ ಕಾಲ ಅರೆಬೆತ್ತಲೆಯಾಗಿಯೇ ಸೇವೆ ಸಲ್ಲಿಸುತ್ತಾನೆ. ಈ ಆಚರಣೆ ಇವತ್ತಿಗೂ ಗ್ರಾಮೀಣ ಮಟ್ಟದಲ್ಲಿ ಪೂಜ್ಯ ಸ್ಥಾನ ಉಳಿಸಿಕೊಂಡಿದೆ.