Kannada Prabha

ತಂದೆಯ ಹಣ ಸುಲಿಗೆಗೆ ಕಿಡ್ನಾಪ್ ನಾಟಕವಾಡಿದ ಮಗ : ಅಂದರ್‌

KannadaprabhaNewsNetwork — Sat, 03 Oct 2026 04:53:54 +0530

ಬೆಂಗಳೂರು : ತನ್ನ ತಂದೆಯಿಂದ 90 ಲಕ್ಷ ರು ಹಣ ವಸೂಲಿಗೆ ಸ್ನೇಹಿತರ ಜತೆ ಸೇರಿ ಉದ್ಯಮಿ ಪುತ್ರನೊಬ್ಬ ರೂಪಿಸಿದ್ದ ಸುಳ್ಳು ಅಪಹರಣ ನಾಟಕವನ್ನು ರಾಜರಾಜೇಶ್ವರಿ ನಗರ ಠಾಣೆ ಪೊಲೀಸರು ಬಯಲುಗೊಳಿಸಿದ್ದಾರೆ.

ಮನೋಹರ್ ಪಾಟೀಲ್ ಪುತ್ರ ಮನೀಷ್

ಆರ್‌.ಆರ್‌.ನಗರದ ನಿವಾಸಿ ಉದ್ಯಮಿ ಮನೋಹರ್ ಪಾಟೀಲ್ ಪುತ್ರ ಮನೀಷ್ ನಾಟಕದ ಸೂತ್ರಧಾರಿ ಆಗಿದ್ದು, ಈಗ ಆತನ ಸ್ನೇಹಿತರು ಪೊಲೀಸರ ಬಲೆಗೆ ಬಿದ್ದಿದ್ದಾರೆ. ಇತ್ತೀಚಿಗೆ ಕೆಲಸದ ನಿಮಿತ್ತ ಗದಗಕ್ಕೆ ತೆರಳಿದ್ದ ಮನೀಷ್‌ ನಿಗೂಢವಾಗಿ ನಾಪತ್ತೆಯಾಗಿದ್ದ. ಆಗ ಆತನ ತಂದೆಗೆ ಪುತ್ರನ ಅಪಹರಿಸಿ ಹಾಸನದಲ್ಲಿ ಒತ್ತೆಯಿಟ್ಟಿರುವುದಾಗಿ ಅಪರಿಚಿತ ಕರೆ ಬಂದಿತ್ತು. ಈ ಬಗ್ಗೆ ಮಾಹಿತಿ ಪಡೆದ ಪೊಲೀಸರು, ಹಾಸನ ಜಿಲ್ಲೆ ಬೇಲೂರ ತಾಲೂಕಿನಲ್ಲಿದ್ದ ಮನೀಷ್‌ನನ್ನು ರಕ್ಷಿಸಿ ಇಬ್ಬರು ಆರೋಪಿಗಳನ್ನು ಸೆರೆ ಹಿಡಿದಿದ್ದರು. ತರುವಾಯ ಆರೋಪಿಗಳ ವಿಚಾರಣೆ ವೇಳೆ ಅಪಹರಣದ ನಾಟಕ ಬಯಲಾಗಿದೆ.

ಆರ್‌.ಆರ್‌.ನಗರದ ಬಳಿ ತಮ್ಮ ಕುಟುಂಬದ ಜತೆ ಮನೋಹರ್ ಪಾಟೀಲ್ ನೆಲೆಸಿದ್ದಾರೆ

ಆರ್‌.ಆರ್‌.ನಗರದ ಬಳಿ ತಮ್ಮ ಕುಟುಂಬದ ಜತೆ ಮನೋಹರ್ ಪಾಟೀಲ್ ನೆಲೆಸಿದ್ದಾರೆ. ಸೆ.28 ರಂದು ಕೆಲಸದ ನಿಮಿತ್ತ ಗದಗ ಜಿಲ್ಲೆಗೆ ತೆರಳುತ್ತಿರುವುದಾಗಿ ತಂದೆಗೆ ಹೇಳಿ ಮನೀಷ್ ಹೋಗಿದ್ದರು. ಆದರೆ ಮರುದಿನ ಬರಬೇಕಿದ್ದ ಪುತ್ರ ಮನೆಗೆ ಬಾರದೆ ಅವರು ಆತಂಕಕ್ಕೀಡಾಗಿದ್ದರು. ಆದರೆ ಅವರಿಗೆ ವಾಟ್ಸಪ್ ಕರೆ ಮಾಡಿದ ಕಿಡಿಗೇಡಿಯೊಬ್ಬ, ನಿಮ್ಮ ಪುತ್ರನನ್ನು ಅಪಹರಿಸಿದ್ದೇವೆ. ನಮಗೆ 90 ಲಕ್ಷ ರು ನೀಡಿದರೆ ಜೀವಂತ ಬಿಡುವುದಾಗಿ ಹೇಳಿ ಕರೆ ಸ್ಥಗಿತಗೊಳಿಸಿದ್ದ. ಕೂಡಲೇ ಪೊಲೀಸರಿಗೆ ಮನೋಹರ್ ಪಾಟೀಲ್ ದೂರು ನೀಡಿದ್ದರು. ಈ ದೂರನ್ನು ಗಂಭೀರವಾಗಿ ಪರಿಗಣಿಸಿದ ಪೊಲೀಸರು, ತಕ್ಷಣವೇ ಸಂತ್ರಸ್ತನ ರಕ್ಷಣೆಗೆ ಕಾರ್ಯಾಚರಣೆಗಿಳಿದಿದ್ದಾರೆ. ಕೊನೆಗೆ ಟವರ್ ಲೋಕೇಷನ್ ಆಧಾರದ ಮೇರೆಗೆ ಬೇಲೂರು ತಾಲೂಕಿನಲ್ಲಿದ್ದ ಮನೀಷ್‌ನನ್ನು ಪೊಲೀಸರು ಪತ್ತೆ ಹಚ್ಚಿ ರಕ್ಷಿಸಿದ್ದಾರೆ. ಅದೇ ವೇಳೆ ಆತನೊಂದಿಗೆ ಇದ್ದ ಇಬ್ಬರು ಆರೋಪಿಗಳನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ. ನಂತರ ನಗರಕ್ಕೆ ಕರೆತಂದು ವಿಚಾರಣೆಗೊಳಪಡಿಸಿದಾಗ ಆರೋಪಿಗಳು ಸತ್ಯ ಬಾಯ್ಬಿಟ್ಟಿದ್ದಾರೆ ಎಂದು ತಿಳಿದು ಬಂದಿದೆ.

ಮದ್ದೂರು: ಟಿಎಪಿಸಿಎಂಎಸ್ ಅಧ್ಯಕ್ಷರು- ಉಪಾಧ್ಯಕ್ಷ ಸ್ಥಾನದ ಚುನಾವಣೆಗೆ ಹೈಕೋರ್ಟ್ ತಡೆಯಾಜ್ಞೆ

KannadaprabhaNewsNetwork — Fri, 09 Oct 2026 01:45:00 +0530

ಕನ್ನಡಪ್ರಭ ವಾರ್ತೆ ಮದ್ದೂರು

ತಾಲೂಕು ವ್ಯವಸಾಯೋತ್ಪನ್ನ ಮಾರಾಟ ಸಹಕಾರ ಸಂಘದ ಅಧ್ಯಕ್ಷ, ಉಪಾಧ್ಯಕ್ಷ ಸ್ಥಾನಕ್ಕೆ ಅ.9ರಂದು ನಡೆಯಬೇಕಿದ್ದ ಚುನಾವಣೆಗೆ ಹೈಕೋರ್ಟ್ ತಡೆಯಾಜ್ಞೆ ನೀಡಿದೆ.

ಸಂಘದ ನಿರ್ದೇಶಕರ ಸ್ಥಾನಕ್ಕೆ ಕಳೆದ ಸೆ. 27ರಂದು ನಡೆದ ಚುನಾವಣೆಯಲ್ಲಿ ನ್ಯಾಯಾಲಯದ ಆದೇಶದಂತೆ ಮತದಾನದ ಹಕ್ಕು ಪಡೆದ 515 ಮತದಾರರ ಎಣಿಕೆ ಫಲಿತಾಂಶದ ಜೊತೆಗೆ ನಿರ್ದೇಶಕರ ಸ್ಥಾನಕ್ಕೆ ಬಿ.ತರಗತಿಯಿಂದ ಗೆಲುವು ಸಾಧಿಸಿದ ಅಭ್ಯರ್ಥಿಗಳ ಫಲಿತಾಂಶ ಪ್ರಕಟಿಸಬೇಕು ಎಂದು ಹೈಕೋರ್ಟ್ ಆದೇಶ ನೀಡಿತ್ತು.

ಚುನಾವಣಾಧಿಕಾರಿಯಾದ ತಹಸೀಲ್ದಾರ್ ಡಾ.ಶಿವಕುಮಾರ ಬಿರಾದಾರ ಅವರು ಬಿ.ತರಗತಿಯಿಂದ ಗೆಲುವು ಸಾಧಿಸಿದ ಅಭ್ಯರ್ಥಿಗಳ ಫಲಿತಾಂಶವನ್ನು ಪ್ರಕಟಿಸುವ ಮೂಲಕ ನ್ಯಾಯಾಲಯದ ಆದೇಶವನ್ನು ಉಲ್ಲಂಘಿಸಿದ್ದರು.

ಚುನಾವಣೆ ಅಧಿಕಾರಿಗಳ ಈ ಕ್ರಮ ಪ್ರಶ್ನಿಸಿ ಜೆಡಿಎಸ್ ಮುಖಂಡರಾದ ಪಿ.ಕಲಾವತಿ ಪ್ರಸನ್ನ ತಮ್ಮ ಪರ ವಕೀಲರಾದ ವೈಶಾಲಿ ಹೆಗಡೆ ಮೂಲಕ ಹೈಕೋರ್ಟ್ ನಲ್ಲಿ ರಿಟ್ ಅರ್ಜಿ ಸಲ್ಲಿಸಿದ್ದರು. ನಂತರ ಅರ್ಜಿ ವಿಚಾರಣೆ ನಡೆಸಿದ ಹೈಕೋರ್ಟ್ ಏಕ ಸದಸ್ಯ ಪೀಠದ ನ್ಯಾಯಮೂರ್ತಿ ಎಂ.ಜ್ಯೋತಿ ಅವರು ಚುನಾವಣಾ ಅಧಿಕಾರಿ ಡಾ.ಶಿವಕುಮಾರ ಬಿರಾದಾರ ಕ್ರಮಕ್ಕೆ ಆಕ್ಷೇಪಣೆ ವ್ಯಕ್ತಪಡಿಸಿ 515 ಹೊಸ ಮತದಾರರ ಎಣಿಕೆ ನಂತರ ಟಿಎಪಿಸಿಎಂಎಸ್ ಅಧ್ಯಕ್ಷ ಉಪಾಧ್ಯಕ್ಷರ ಚುನಾವಣೆ ನಡೆಸುವಂತೆ ಆದೇಶ ಹೊರಡಿಸಿದ್ದಾರೆ. ಹೈಕೋರ್ಟ್ ಅ.27ರಂದು ಅಧ್ಯಕ್ಷರು- ಉಪಾಧ್ಯಕ್ಷರ ಚುನಾವಣೆ ವಿವಾದದ ಅರ್ಜಿ ಮತ್ತೊಮ್ಮೆ ವಿಚಾರಣೆ ನಡೆಸಿದ ನಂತರವೇ ಚುನಾವಣೆ ನಡೆಯುವ ಸಾಧ್ಯತೆ ಇದೆ. ಕಳೆದ ಸೆ.27 ರಂದು 12 ನಿರ್ದೇಶಕರ ಸ್ಥಾನಕ್ಕೆ ಚುನಾವಣೆ ನಡೆದಿತ್ತು. ಚುನಾವಣೆ ವೇಳೆ ಭಾರಿ ಹೈಡ್ರಾಮಾ, ಗೊಂದಲದಿಂದ ಜೆಡಿಎಸ್ ಮತ್ತು ಬಿಜೆಪಿ ಮೈತ್ರಿ ನಾಯಕರು ತಡರಾತ್ರಿವರೆಗೂ ರಸ್ತೆ ತಡೆ ಮಾಡಿ ಪ್ರತಿಭಟನೆ ನಡೆಸಿದ್ದರು.

ಚುನಾವಣೆಯಲ್ಲಿ ‘ಬಿ’ ತರಗತಿಯಿಂದ 4 ಮೈತ್ರಿ ಅಭ್ಯರ್ಥಿಗಳು, ಕಾಂಗ್ರೆಸ್‌ನಿಂದ 3 ಅಭ್ಯರ್ಥಿಗಳ ಗೆಲುವು ಸಾಧಿಸಿದ್ದರು. ‘ಎ’ ತರಗತಿಯಿಂದ 5 ಸ್ಥಾನಗಳಲ್ಲಿ ಕಾಂಗ್ರೆಸ್ ಗೆಲುವು ಸಾಧಿಸಿ ಅಧಿಕಾರಿಗಳು, ನಾಮ ನಿರ್ದೇಶನ ಮತಗಳಿಂದ ಕಾಂಗ್ರೆಸ್ ಬೆಂಬಲಿತರು ಬಹುಮತೊಂದಿಗೆ ಅಧಿಕಾರದ ಚುಕ್ಕಾಣಿ ಹಿಡಿಯಲು ಮುಂದಾಗಿದ್ದರು.

ಜೈಲಿನಲ್ಲೇ ಜಾಧವ್, ಬಾಯಿ ಬಿಡದ ಮಾಜಿ ಅಧ್ಯಕ್ಷ ಶಿವಕುಮಾರ್..!

KannadaprabhaNewsNetwork — Fri, 02 Oct 2026 01:30:01 +0530

ಮಂಡ್ಯ : ಮನ್‌ಮುಲ್‌ನಲ್ಲಿ ನಡೆದಿರುವ ಹಾಲಿನ ಪುಡಿ ನಾಪತ್ತೆ ಹಾಗೂ ಹಾಲಿನ ಪುಡಿ ಕಲಬೆರಕೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಒಕ್ಕೂಟದ ಎಫ್‌ಜಿಎಸ್ ಶಾಖೆಯ ಮುಖ್ಯಸ್ಥ ಪ್ರದೀಪ್‌ಕುಮಾರ್ ಜಾಧವ್ ಜೈಲಿನಲ್ಲೇ ಉಳಿದಿದ್ದರೆ, ಮತ್ತೊಂದೆಡೆ ಹಗರಣದ ಬಗ್ಗೆ ಮಾಜಿ ಅಧ್ಯಕ್ಷ ಯು.ಸಿ.ಶಿವಕುಮಾರ್ ಬಾಯಿ ಬಿಡುತ್ತಿಲ್ಲ. ಹೀಗಾಗಿ ವಿಚಾರಣೆ ನೆಪದಲ್ಲಿ ಪೊಲೀಸರು ಕಾಲ ದೂಡುತ್ತಿದ್ದಾರೆ. ಪೊಲೀಸರ ಈ ನಡೆ ಸಾರ್ವಜನಿಕ ವಲಯದಲ್ಲಿ ಸಾಕಷ್ಟು ಅನುಮಾನಗಳನ್ನು ಮೂಡಿಸಿದೆ.

ಬಂಧನದಿಂದ ರಕ್ಷಣೆ ಮಾಡುವ ತಂತ್ರದ ಭಾಗವೇ?

ವಿಚಾರಣೆಗೆ ಜಾಧವ್ ಅವಶ್ಯಕತೆ ಇರುವ ಕುರಿತು ನ್ಯಾಯಾಲಯಕ್ಕೆ ಪೊಲೀಸರು ಮನವರಿಕೆ ಮಾಡಿಕೊಡುವಲ್ಲಿ ವಿಫಲರಾಗುತ್ತಿದ್ದಾರೋ, ನ್ಯಾಯಾಲಯದ ದಿಕ್ಕು ತಪ್ಪಿಸುತ್ತಿರುವರೋ, ಇದು ಮಾಜಿ ಅಧ್ಯಕ್ಷರನ್ನು ಬಂಧನದಿಂದ ರಕ್ಷಣೆ ಮಾಡುವ ತಂತ್ರದ ಭಾಗವೇ?. ರಾಜಕೀಯ ಪ್ರಭಾವಕ್ಕೊಳಗಾಗಿ ಕಳೆದ ಮೂರು ದಿನಗಳಿಂದ ವಿಚಾರಣೆ ನೆಪದಲ್ಲಿ ಬಂಧನವನ್ನು ಮುಂದೂಡುತ್ತಿದ್ದಾರೆಯೇ ಎಂಬ ಮಾತುಗಳು ಎಲ್ಲೆಡೆ ಕೇಳಿಬರಲಾರಂಭಿಸಿವೆ.

ಪೊಲೀಸರಿಗೆ ಇಡೀ ಪ್ರಕರಣದ ಪೂರ್ಣ ಮಾಹಿತಿ ಇದೆ. ಅಲ್ಲದೇ, ನಿನ್ನೆ ಸಾಮಾಜಿಕ ಜಾಲ ತಾಣದಲ್ಲಿ ಪ್ರದೀಪ್‌ಕುಮಾರ್ ಜಾಧವ್ ಮತ್ತು ನಿರ್ದೇಶಕ ಡಾಲು ರವಿ ನಡುವಿನ ದೂರವಾಣಿ ಸಂಭಾಷಣೆಯ ಆಡಿಯೋದಲ್ಲೂ ಜಾಧವ್ ಹಲವು ಮಾಹಿತಿಗಳನ್ನು ಹೊರಹಾಕಿದ್ದಾರೆ. ಎಲ್ಲವನ್ನು ಸಾಕ್ಷಿ ಸಹಿತ ನೀಡುವುದಾಗಿ ಜಾಧವ್ ಹೇಳಿದ್ದಾರೆ. ಆದರೂ ರಾಜಕೀಯ ಪ್ರಭಾವ, ಒತ್ತಡಕ್ಕೆ ಮಣಿದು ಪೊಲೀಸರು ಯು.ಸಿ.ಶಿವಕುಮಾರ್ ಬಂಧನವನ್ನು ಮುಂದೂಡುತ್ತಲೇ ಇದ್ದಾರೆ ಎಂದು ಹೇಳಲಾಗುತ್ತಿದೆ.

ಯು.ಸಿ.ಶಿವಕುಮಾರ್ ಹಗರಣದ ಬಗ್ಗೆ ಏನನ್ನೂ ಹೇಳುತ್ತಿಲ್ಲ. ತನಿಖೆಗೆ ಸಮರ್ಪಕವಾಗಿ ಸ್ಪಂದಿಸುತ್ತಿಲ್ಲವೆಂದು ತಿಳಿದುಬಂದಿದ್ದು, ಪ್ರದೀಪ್‌ಕುಮಾರ್ ಜಾಧವ್ ಹಾಗೂ ಯು.ಸಿ.ಶಿವಕುಮಾರ್ ಅವರನ್ನು ಎದುರಾಗಿ ಕೂರಿಸಿ ಹೇಳಿಕೆ ಪಡೆದುಕೊಂಡು ನಂತರದಲ್ಲಿ ಶಿವಕುಮಾರ್ ಅವರನ್ನು ಬಂಧಿಸುವುದು ಪೊಲೀಸರ ಯೋಜನೆ. ಆದರೆ, ಅದನ್ನು ಕಾರ್ಯರೂಪಕ್ಕೆ ತರುವಲ್ಲಿ ಎಡವುತ್ತಿದ್ದಾರೆ ಎನ್ನುವುದು ಪ್ರಬಲವಾಗಿ ಕೇಳಿಬರುತ್ತಿರುವ ಆರೋಪ.

ಹಾಲಿನಪುಡಿ ಕಲಬೆರಕೆ ಪ್ರಕರಣದಲ್ಲಿ ಪ್ರಮುಖ ಆರೋಪಿಯ ವಿಚಾರಣೆ ಅಗತ್ಯವಿರುವಾಗ ಜಾಧವ್ ಅವರನ್ನು ಪೊಲೀಸ್ ವಶಕ್ಕೆ ಪಡೆಯುವುದು ಅಗತ್ಯವಾಗಿದೆ. ಆದರೆ, ಜಾಧವ್ ಅವರನ್ನು ವಶಕ್ಕೆ ನೀಡದಂತೆ ಪೊಲೀಸರೇ ನ್ಯಾಯಾಲಯದ ದಿಕ್ಕು ತಪ್ಪಿಸುತ್ತಿದ್ದಾರೆಯೇ, ಇದಕ್ಕೆ ರಾಜಕೀಯ ಪ್ರಭಾವಿಗಳ ಕೈವಾಡವಿರುವಂತೆ ಕಂಡುಬರುತ್ತಿದೆ.

ಕಳೆದ ಮೂರು ದಿನಗಳಿಂದ ಯು.ಸಿ.ಶಿವಕುಮಾರ್ ಅವರನ್ನು ವಿಚಾರಣೆ ನೆಪದಲ್ಲಿ ಠಾಣೆಗೆ ಕರೆತರುವುದು, ಸಂಜೆ ವಾಪಸ್ ಕಳುಹಿಸುವುದು ನಿರಂತರವಾಗಿ ನಡೆಯುತ್ತಿದೆ. ಮೂರು ದಿನಗಳಿಂದ ನಡೆಸುತ್ತಿರುವ ವಿಚಾರಣೆಯಾದರೂ ಏನು? ಬಂಧನವನ್ನು ತೋರಿಸುವುದಕ್ಕೆ ಪೊಲೀಸರು ಹಿಂಜರಿಯುತ್ತಿರುವುದೇಕೆ?. ಈ ಹಗರಣದ ಹಿಂದೆ ಇನ್ನೂ ಪ್ರಭಾವಿಗಳು ಇದ್ದಾರೆಯೇ? ಎಂಬ ಅನುಮಾನಗಳು ದಟ್ಟವಾಗಿ ಜನಮಾನಸದಲ್ಲಿ ಮೂಡಿವೆ.

ಪ್ರಕರಣದ ಪ್ರಾಥಮಿಕ ವರದಿಯಿಂದ ಹಿಡಿದು ಪ್ರಮುಖ ಆರೋಪಿಗಳನ್ನು ವಿಚಾರಣೆಗೆ ಒಳಪಡಿಸುವವರೆಗೆ ಇಲಾಖೆ ಅನುಸರಿಸಿದ ನಡೆ ಸಾರ್ವಜನಿಕ ಟೀಕೆಗೆ ಗುರಿಯಾಗಿದೆ. ಜಾಧವ್ ಮತ್ತು ಡಾಲು ರವಿ ಸಂಭಾಷಣೆಯ ಆಡಿಯೋ ಬಾಂಬ್ ಮನ್‌ಮುಲ್ ಆಡಳಿತ ಮಂಡಳಿ ಹಾಗೂ ರಾಜಕೀಯ ವಲಯದಲ್ಲಿ ತೀವ್ರ ಸಂಚಲನ ಮೂಡಿಸಿದೆ. ಹಲವು ಪ್ರಭಾವಿಗಳ ಹೆಸರು ಈ ಸಂಭಾಷಣೆಯಲ್ಲಿ ಪ್ರಸ್ತಾಪವಾಗಿರುವುದರಿಂದ ಜಾಧವ್‌ರನ್ನು ಪೊಲೀಸ್ ವಶಕ್ಕೆ ಪಡೆದರೆ ಮುಂಬರುವ ದಿನಗಳಲಿ ಇನ್ನಷ್ಟು ದೊಡ್ಡ ನಾಯಕರ ಕುತ್ತಿಗೆಗೆ ಪ್ರಕರಣ ಸುತ್ತಿಕೊಳ್ಳುವ ಸಾಧ್ಯತೆಗಳನ್ನು ಅರಿತು ಪೊಲೀಸರು ತನಿಖೆಯನ್ನು ವಿಳಂಬ ಮಾಡುತ್ತಿದ್ದಾರೆ ಎನ್ನುವುದು ಪ್ರಮುಖವಾಗಿ ಕೇಳಿಬರುತ್ತಿರುವ ಆರೋಪವಾಗಿದೆ.

ಮಾಜಿ ಎಂಡಿ ಡಾ.ಮಂಜೇಶ್ ವಿಚಾರಣೆ

ಹಾಲಿನಪುಡಿ ನಾಪತ್ತೆ, ಕಲಬೆರಕೆ ಹಗರಣ ಸಂಬಂಧ ಮನ್‌ಮುಲ್ ಮಾಜಿ ವ್ಯವಸ್ಥಾಪಕ ನಿರ್ದೇಶಕ ಡಾ.ಮಂಜೇಶ್ ಅವರನ್ನು ಮದ್ದೂರು ಪೊಲೀಸರು ವಿಚಾರಣೆಗೆ ಒಳಪಡಿಸಿದ್ದಾರೆ. ಬುಧವಾರ ಡಾ.ಮಂಜೇಶ್ ಅವರನ್ನು ಸುದೀರ್ಘ ವಿಚಾರಣೆಗೆ ಒಳಪಡಿಸಿದ ಪೊಲೀಸರು ಹಾಲಿನ ಪುಡಿ ನಾಪತ್ತೆ, ಕಲಬೆರಕೆ ಪ್ರಕರಣದಲ್ಲಿ ಅವರ ಪಾತ್ರವಿರುವ ಬಗ್ಗೆ ಲಭ್ಯವಿರುವ ಅಂಶಗಳನ್ನು ಮುಂದಿಟ್ಟುಕೊಂಡು ಪೊಲೀಸರು ಪ್ರಶ್ನೆಗಳ ಸುರಿಮಳೆಗರೆದಿದ್ದಾರೆ. ತನಿಖೆಯ ಸೂಕ್ಷ್ಮತೆಯನ್ನು ಪರಿಗಣಿಸಿ ವಿವರ ಬಹಿರಂಗಪಡಿಸಲು ಪೊಲೀಸರು ನಿರಾಕರಿಸಿದ್ದಾರೆ. ಜಾಧವ್-ಡಾಲು ರವಿ ನಡುವಿನ ಸಂಭಾಷಣೆ ಆಡಿಯೋದಲ್ಲೂ ಡಾ.ಮಂಜೇಶ್ ಹೆಸರು ಕೇಳಿಬಂದಿದ್ದನ್ನು ಇಲ್ಲಿ ಸ್ಮರಿಸಬಹುದು.

ಕಲ್ಲಿನಿಂದ ತಲೆ ಜಜ್ಜಿ 13 ವರ್ಷದ ಬಾಲಕನ ಹತ್ಯೆ

KannadaprabhaNewsNetwork — Tue, 13 Oct 2026 04:23:12 +0530

ಬೆಂಗಳೂರು : ಹದಿಮೂರು ವರ್ಷದ ಬಾಲಕನ ತಲೆಗೆ ಕಲ್ಲಿನಿಂದ ಹಲ್ಲೆ ನಡೆಸಿ ದುಷ್ಕರ್ಮಿಗಳು ಹತ್ಯೆಗೈದು ಪರಾರಿಯಾಗಿರುವ ಘಟನೆ ಎಚ್‌ಎಎಲ್ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದೆ.

ರಮೇಶ್‌ ನಗರದ ಆಟೋ ಚಾಲಕ ಅತಾವುಲ್ಲಾ ದಂಪತಿ ಪುತ್ರ ಮೊ

ರಮೇಶ್‌ ನಗರದ ಆಟೋ ಚಾಲಕ ಅತಾವುಲ್ಲಾ ದಂಪತಿ ಪುತ್ರ ಮೊಹಮ್ಮದ್ ಅರಾಫತ್‌ (13) ಕೊಲೆಯಾದ ದುರ್ದೈವಿ. ಈ ಹತ್ಯೆಯಲ್ಲಿ ಮೃತನ ಪರಿಚಿತರ ಕೈವಾಡ ಬಗ್ಗೆ ಪೊಲೀಸರು ಶಂಕೆ ವ್ಯಕ್ತಪಡಿಸಿದ್ದಾರೆ.

ವಿಭೂತಿಕೆರೆ ಏರಿ ಸಮೀಪ ನಿಗೂಢವಾಗಿ ಹತ್ಯೆ

ವಿಭೂತಿಕೆರೆ ಏರಿ ಸಮೀಪ ಭಾನುವಾರ ಅರಾಫತ್ ನಿಗೂಢವಾಗಿ ಹತ್ಯೆಗೀಡಾಗಿದ್ದಾನೆ. ಏರಿ ಬಳಿ ಅಪರಿಚಿತ ಮೃತದೇಹ ಕಂಡು ಪೊಲೀಸ್ ನಿಯಂತ್ರಣ ಕೊಠಡಿಗೆ ಸಾರ್ವಜನಿಕರು ಕರೆ ಮಾಡಿ ತಿಳಿಸಿದ್ದಾರೆ. ಘಟನಾ ಸ್ಥಳಕ್ಕೆ ತೆರಳಿದ ಪೊಲೀಸರು, ಮೃತನ ಭಾವಚಿತ್ರ ತೆಗೆದು ಸುತ್ತಮುತ್ತಲು ಹಂಚಿದಾಗ ಕೊನೆಗೆ ಹತ್ಯೆಗೀಡಾದ ಬಾಲಕನ ಗುರುತು ಪತ್ತೆಯಾಗಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ರಮೇಶ್‌ ನಗರದಲ್ಲಿ ತನ್ನ ಪತ್ನಿ ಹಾಗೂ ಮಕ್ಕಳ ಜತೆ ಅತಾವುಲ್ಲಾ ನೆಲೆಸಿದ್ದು, ಆಟೋ ಓಡಿಸಿಕೊಂಡು ಅವರು ಜೀವನ ಸಾಗಿಸುತ್ತಿದ್ದಾರೆ. ಮನೆ ಸಮೀಪದ ಶಾಲೆಯಲ್ಲಿ 7ನೇ ತರಗತಿಯಲ್ಲಿ ಅರಾಫತ್ ಓದುತ್ತಿದ್ದ. ಹತ್ಯೆಗೆ ನಿಖರ ಕಾರಣ ಗೊತ್ತಾಗಿಲ್ಲ. ಮನೆ ಹತ್ತಿರದ ಕೆರೆ ಬಳಿ ಭಾನುವಾರ ಆತ ಹೋಗಿದ್ದಾಗ ಕೊಲೆ ನಡೆದಿದೆ. ಈ ಘಟನಾ ಸ್ಥಳದ ಸುತ್ತಮುತ್ತಲ ಸಿಸಿಟಿವಿ ಕ್ಯಾಮೆರಾಗಳನ್ನು ಪರಿಶೀಲಿಸಲಾಗುತ್ತಿದೆ. ಆರೋಪಿಗಳ ಪತ್ತೆಗೆ ವಿಶೇಷ ತಂಡಗಳನ್ನು ರಚಿಸಿ ಹುಡುಕಾಟ ನಡೆಸಲಾಗುತ್ತಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ಹಾಲಿನ ಪುಡಿ ಕಲಬೆರಕೆ ಪ್ರಕರಣ: ಮದ್ದೂರು ಪೊಲೀಸ್ ಠಾಣೆಯಲ್ಲಿ ಹೈಡ್ರಾಮಾ

KannadaprabhaNewsNetwork — Mon, 05 Oct 2026 05:56:21 +0530

ಮಂಡ್ಯ : ಹಾಲಿನ ಪುಡಿ ಕಲಬೆರಕೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಭಾನುವಾರ ಮದ್ದೂರು ಪೊಲೀಸ್ ಠಾಣೆಯಲ್ಲಿ ಹೈಡ್ರಾಮಾ ನಡೆದಿರುವುದಾಗಿ ತಿಳಿದು ಬಂದಿದೆ.

ಪ್ರಕರಣ ಸಂಬಂಧ ವಿಚಾರಣೆಗೆ ಒಳಪಡಿಸಿರುವ ಅಧಿಕಾರಿ ಪ್ರದೀಪ್ ಕುಮಾರ್ ಜಾದವ್ ಮತ್ತು ಮಾಜಿ ಅಧ್ಯಕ್ಷ ಯು.ಸಿ.ಶಿವಕುಮಾರ್ ನಡುವೆ ವಿಚಾರಣೆ ವೇಳೆ ತೀವ್ರ ವಾಗ್ವಾದ ನಡೆದಿದ್ದು, ಇಬ್ಬರ ನಡುವಿನ ಮಾತಿನ ಕದನಕ್ಕೆ ಪೊಲೀಸರೇ ಬೆಚ್ಚಿ ಬಿದ್ದಿದ್ದಾರೆ ಎಂದು ಹೇಳಲಾಗಿದೆ.

ವಿಚಾರಣೆ ವೇಳೆ ಇಬ್ಬರ ಮಾತಿನ ಭರಾಟೆ ಜೋರಾಗಿ ನಡೆಯುತ್ತಿರುವುದನ್ನು ಕೇಳಿಸಿಕೊಂಡ ಜನರು ಠಾಣೆ ಎದುರು ಜಮಾಯಿಸಿದ್ದು, ತಕ್ಷಣವೇ ಎಚ್ಚೆತ್ತ ಪೊಲೀಸರು ಠಾಣೆ ಕಿಟಕಿ ಬಾಗಿಲುಗಳನ್ನು ಹಾಕಿಕೊಂಡು ವಿಚಾರಣೆ ಮುಂದುವರೆಸಿದರು ಎಂದು ಹೇಳಲಾಗಿದೆ.

ಪ್ರದೀಪ್ ಕುಮಾರ್ ಜಾದವ್ ಅವರು ಹಾಲಿನ ಪುಡಿ ಕಲಬೆರೆಕೆ ಪ್ರಕರಣದಲ್ಲಿ ಯು.ಸಿ.ಶಿವಕುಮಾರ್ ಪಾತ್ರವನ್ನು ವಿವರಿಸುವ ವೇಳೆ ರೊಚ್ಚಿಗೆದ್ದ ಶಿವಕುಮಾರ್ ನನ್ನ ವಿರುದ್ಧ ಸುಳ್ಳು ಆರೋಪಗಳನ್ನು ಮಾಡಬೇಡ. ಪ್ರಕರಣದ ಬಗ್ಗೆ ನನಗೇನು ಗೊತ್ತಿಲ್ಲ. ಎಲ್ಲವನ್ನು ನೀನೆ ಮಾಡಿ ಈಗ ನನ್ನ ತಲೆಗೆ ಕಟ್ಟುವ ಪ್ರಯತ್ನ ಮಾಡುತ್ತಿದ್ದೀಯಾ. ಫೋನ್ ಆಡಿಯೋದಲ್ಲಿ ಬಾಯಿಗೆ ಬಂದಂತೆಲ್ಲ ಮಾತನಾಡಿದ್ದೀಯಾ ಎಂದು ಏಕವಚನದಲ್ಲೇ ಜಾದವ್ ಅವರನ್ನು ನಿಂದಿಸಲು ಆರಂಭಿಸಿದ್ದರು ಎಂದು ಹೇಳಲಾಗಿದೆ.

ಇದಕ್ಕೆ ಜಾಧವ್, ನಾನೇಕೆ ಸುಳ್ಳು ಹೇಳಲಿ. ಪ್ರತಿಯೊಂದಕ್ಕೂ ನನ್ನ ಬಳಿ ಸಾಕ್ಷಿ ಇದೆ. ಎಲ್ಲವನ್ನು ಬಿಚ್ಚಿಡಲ್ಲೂ ನಾನು ಸಿದ್ದನಿದ್ದೇನೆ. ನೀವು ಮಾಡಿರುವ ಕೆಲಸಕ್ಕೆ ಇಂದು ನಾನು ಸಿಕ್ಕಿ ಹಾಕಿಕೊಂಡಿದ್ದೇನೆ. ಕೆಲಸದಿಂದ ಸಸ್ಪೆಂಡ್ ಆಗಿದ್ದೇನೆ. ನನ್ನ ಹೆಂಡತಿ ಮಕ್ಕಳು ಗೋಲಿಡುತ್ತಿದ್ದಾರೆ. ಕೆಲಸ ಕಳೆದುಕೊಂಡು ಜೈಲು ಸೇರುವಂತಾಗಿದೆ ಎಂದು ಏರು ಧ್ವನಿಯಲ್ಲಿ ಅಳಲು ತೋಡಿಕೊಂಡರು ಎನ್ನಲಾಗಿದೆ.

ಇಷ್ಟೆಲ್ಲಾ ಆದ ಮೇಲೆ ನಾನೇಕೆ ಸುಳ್ಳು ಹೇಳಲಿ. ಈಗ ಸತ್ಯವನ್ನು ಹೇಳದಿದ್ದರೆ ನಾನು ತಪ್ಪಿತಸ್ಥ ಸ್ಥಾನದಲ್ಲಿ ನಿಲ್ಲಬೇಕಾಗುತ್ತದೆ. ಅದರಿಂದ ನನ್ನ ಜೀವನ ಹಾಳಾಗಲಿದೆ. ಅದಕ್ಕಾಗಿ ಎಲ್ಲವನ್ನೂ ಪೊಲೀಸರ ಎದುರು ಮುಚ್ಚುಮರೆ ಇಲ್ಲದೆ ಹೇಳುತ್ತಿದ್ದೇನೆ ಎಂದು ಜಾದವ್ ತಿಳಿಸಿದ್ದಾಗಿ ಗೊತ್ತಾಗಿದೆ.

ನನ್ನನ್ನು ಪ್ರಕರಣದಲ್ಲಿ ಸಿಕ್ಕಿ ಹಾಕಿಸುವ ಪ್ರಯತ್ನ

ಇದರಿಂದ ಕೋಪಗೊಂಡ ಶಿವಕುಮಾರ್, ನನ್ನನ್ನು ಪ್ರಕರಣದಲ್ಲಿ ಸಿಕ್ಕಿ ಹಾಕಿಸುವ ಪ್ರಯತ್ನ ಮಾಡುತ್ತಿದ್ದೀಯಾ. ಗೋದಾಮು ಉಸ್ತುವಾರಿ ವಹಿಸಿಕೊಂಡಿದ್ದವನು ನೀನು. ಹಾಲಿನ ಪುಡಿ ಕಲಬೆರಕೆಯಾಗುವುದಕ್ಕೆ ಮತ್ತು ನಾಪತ್ತೆಯಾಗುವುದಕ್ಕೂ ನೀನೇ ಕಾರಣ. ಸುಮ್ಮನೆ ನಿಜ ಒಪ್ಪಿಕೋ. ಇದರಲ್ಲಿ ನನ್ನನ್ನೇಕೆ ಎಳೆದು ತರುತ್ತೀಯಾ ಎಂದು ಹೇಳಿದ ಧ್ವನಿಯಲ್ಲಿ ಪ್ರಶ್ನಿಸಿದರು ಎಂದು ಹೇಳಲಾಗಿದೆ.

ಇದೇ ರೀತಿ ಒಬ್ಬರಿಗೊಬ್ಬರ ನಡುವೆ ಬಿರುಸಿನ ಮಾತುಕತೆ ಪೊಲೀಸರ ಎದುರಿನಲ್ಲಿ ಹಲವು ಸಮಯಗಳ ಕಾಲ ನಡೆಯಿತು. ಇಬ್ಬರನ್ನು ಸಮಾಧಾನ ಪಡಿಸಲು ಪೊಲೀಸರು ನಡೆಸಿದ ಪ್ರಯತ್ನ ವಿಫಲವಾಯಿತು. ಠಾಣೆಯೊಳಗೆ ಇವರಿಬ್ಬರ ನಡುವೆ ನಡೆಯುತ್ತಿದ್ದ ಮಾತಿನ ಕದನ ಹಾದಿ ಬೀದಿಯಲ್ಲಿ ಹೋಗುವವರಿಗೆಲ್ಲ ಕೇಳಿಸಲಾರಂಬಿಸಿತು. ಕುತೂಹಲದಿಂದ ಜನರು ಠಾಣೆ ಎದುರು ಸೇರಲಾರಂಭಿಸಿದರು.

ಠಾಣೆ ಕಿಟಕಿ ಬಾಗಿಲುಗಳನ್ನು ಮುಚ್ಚಿ ಒಳಗೆ ವಿಚಾರಣೆ

ಜನ ಸೇರುವುದನ್ನು ಕಂಡ ಪೊಲೀಸರು ಕೂಡಲೇ ಎಚ್ಚೆತ್ತು ಠಾಣೆ ಕಿಟಕಿ ಬಾಗಿಲುಗಳನ್ನು ಮುಚ್ಚಿ ಒಳಗೆ ವಿಚಾರಣೆ ಮುಂದುವರಿಸಿದ್ದರು. ಆದರೂ ಬಹಳ ಹೊತ್ತಿನವರೆಗೆ ಇಬ್ಬರ ನಡುವೆ ಮಾತಿನ ಚಕಮಕಿ ಮುಂದುವರೆದಿತ್ತು ಎಂದು ಗೊತ್ತಾಗಿದೆ.

ಜಾದವ್ ಮತ್ತು ನಿರ್ದೇಶಕ ದಾಲು ರವಿ ನಡುವೆ ನಡೆದ ಫೋನ್ ಸಂಭಾಷಣೆ ವಿಚಾರವೂ ವಿಚಾರಣೆ ವೇಳೆ ಪ್ರಸ್ತಾಪಗೊಂಡಿದ್ದು, ತಮ್ಮ ವಿರುದ್ಧ ಏಕವಚನದಲ್ಲಿ ಮತ್ತು ಆವಾಚ್ಯ ಶಬ್ದಗಳಿಂದ ನಿಂದಿಸಿರುವ ಬಗ್ಗೆಯೂ ಯು ಸಿ ಶಿವಕುಮಾರ್ ಅಧಿಕಾರಿ ಜಾದವ್ ವಿರುದ್ಧ ಹರಿಹಾಯ್ದಿದ್ದಾಗಿ ತಿಳಿದು ಬಂದಿದೆ.

ಪ್ರಕರಣದಲ್ಲಿ ಆರೋಪಿಯಾಗಿ ಹಲವು ದಿನಗಳ ಹಿಂದೆ ಜೈಲು ಪಾಲಾಗಿದ್ದ ಪ್ರದೀಪ್ ಕುಮಾರ್ ಜಾದವ್ ಅವರನ್ನು ಮೂರು ದಿನಗಳ ಕಾಲ ಪೊಲೀಸ್ ವಶಕ್ಕೆ ಪಡೆಯಲಾಗಿದ್ದು, ಈ ಪ್ರಕರಣದಲ್ಲಿ ಮಾಜಿ ಅಧ್ಯಕ್ಷ ಯು ಸಿ ಶಿವಕುಮಾರ್ ಪಾತ್ರವಿರುವ ಬಗ್ಗೆ ಕಂಡುಬಂದ ಹಿನ್ನೆಲೆಯಲ್ಲಿ ಇಬ್ಬರನ್ನೂ ಮುಖಾಮುಖಿ ಕೂರಿಸಿ ವಿಚಾರಣೆ ನಡೆಸಲಾಗುತ್ತಿದೆ.

ಸಾಲಬಾಧೆ: ನೇಣು ಬಿಗಿದು ಯುವ ರೈತ ಆತ್ಮಹತ್ಯೆ

KannadaprabhaNewsNetwork — Wed, 07 Oct 2026 02:00:00 +0530

ಪಾಂಡವಪುರ:

ಸಾಲಬಾಧೆ ತಾಳಲಾರದೆ ಯುವ ರೈತ ನೇಣು ಬಿಗಿದು ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ತಾಲೂಕಿನ ನೀಲನಹಳ್ಳಿಯಲ್ಲಿ ಸೋಮವಾರ ರಾತ್ರಿ ನಡೆದಿದೆ.

ಗ್ರಾಮದ ಲೇ.ಗಣೇಶಯ್ಯ ಅವರ ಪುತ್ರ ಎಚ್.ಕೆ.ನವೀನ್ ಕುಮಾರ್ (39)ಮೃತ ರೈತ. ತಮ್ಮ ಮೂರು ಎಕರೆ ಜಮೀನಿನಲ್ಲಿ ತರಕಾರಿ, ತೆಂಗು ಬೆಳೆದಿದ್ದ ರೈತ ಬೆಳೆ ಬೆಳೆಯಲು ಕಾವೇರಿ ಗ್ರಾಮೀಣಾವೃದ್ಧಿ ಬ್ಯಾಂಕ್‌ನಲ್ಲಿ 5 ಲಕ್ಷ ರು., ಹೈನುಗಾರಿಕೆಗಾಗಿ 1 ಲಕ್ಷ ರು., ಚಿನ್ನಾಭರಣದ ಮೇಲೆ 2.5 ಲಕ್ಷ ರು. ಸೇರಿದಂತೆ ಖಾಸಗಿ ಲೇವಾದೇವಿದಾರರಿಂದ 3 ಲಕ್ಷ ರು. ಪಡೆದುಕೊಂಡಿದ್ದರು.

ಸಾಲ ಮರು ಪಾವತಿಗಾಗಿ ಒತ್ತಡ ಹೆಚ್ಚಾದ ಹಿನ್ನೆಲೆಯಲ್ಲಿ ಮನೆಯ ದನದ ಕೊಟ್ಟಿಯಲ್ಲಿ ನೇಣು ಬಿಗಿದು ಆತ್ಮಹತ್ಯೆಗೆ ಶರಣಾಗಿದ್ದಾರೆ.

ಕಳೆದ ಐದಾರು ವರ್ಷಗಳಿಂದ ಬೆಳೆದ ಬೆಳೆಯಲ್ಲಿ ಯಾವುದೇ ಲಾಭ ಕಂಡಿರಲಿಲ್ಲ. ಹೀಗಾಗಿ ಮನನೊಂದು ನಮ್ಮ ಅಣ್ಣನ ಮಗ ಆತ್ಮಹತ್ಯೆಗೆ ಶರಣಾಗಿದ್ದಾನೆ. ನಷ್ಟದ ಬಗ್ಗೆ ಆಗಾಗ್ಗೆ ಮಾತನಾಡುತ್ತಿದ್ದ ನವೀನ್ ಕುಮಾರ್ ಜೀವನದಲ್ಲಿ ಜಿಗುಪ್ಸೆ ಬಗ್ಗೆ ಮಾತನಾಡುತ್ತಿದ್ದನು. ಸಾಲದ ಸುಳಿಯಲ್ಲಿ ಸಿಲುಕಿದ್ದ ಆತ ಸೋಮವಾರ ರಾತ್ರಿ 10.30ರ ಸಮಯದಲ್ಲಿ ನೇಣು ಬಿಗಿದುಕೊಂಡು ಸಾವನ್ನಪ್ಪಿದ್ದಾನೆ ಎಂದು ಮೃತ ರೈತನ ಚಿಕ್ಕಪ್ಪ ನಡುಕೇರಯ್ಯ ಪೋಲಿಸರಿಗೆ ನೀಡಿರುವ ದೂರಿನಲ್ಲಿ ವಿವರಿಸಿದ್ದಾರೆ.

ಮೃತರಿಗೆ ಪತ್ನಿ ಲಕ್ಷ್ಮೀ ಹಾಗೂ ಇಬ್ಬರು ಹೆಣ್ಣು ಮಕ್ಕಳಿದ್ದಾರೆ. ಈ ಸಂಬಂಧ ಮೇಲುಕೋಟೆ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ. ಪಾಂಡವಪುರ ಪಟ್ಟಣದ ಉಪವಿಭಾಗೀಯ ಆಸ್ಪತ್ರೆಯಲ್ಲಿ ಮರಣೋತ್ತರ ಪರೀಕ್ಷೆ ನಡೆಸಲಾಗಿದ್ದು, ಶವವನ್ನು ವಾರಸುದಾರರಿಗೆ ಒಪ್ಪಿಸಲಾಗಿದೆ.ಕಾರು ಡಿಕ್ಕಿ: ಬೈಕ್‌ ಸವಾರ ಸಾವು

ಮಳವಳ್ಳಿ:ತಾಲೂಕಿನ ನೆಲಮಾಕನಹಳ್ಳಿ ಗೇಟ್ ಬಳಿಯ ಮಳವಳ್ಳಿ-ಮದ್ದೂರು ರಸ್ತೆಯಲ್ಲಿ ಮಂಗಳವಾರ ಮಧ್ಯಾಹ್ನ ಬೈಕ್‌ಗೆ ಕಾರು ಡಿಕ್ಕಿಯಾಗಿ ಬೈಕ್ ಸವಾರ ನೆಲಮಾಕನಹಳ್ಳಿ ಗ್ರಾಮದ ಶಿವಲಿಂಗಯ್ಯ (50) ಸ್ಥಳದಲ್ಲಿಯೇ ಮೃತಪಟ್ಟರು. ಮಳವಳ್ಳಿ ಕಡೆಯಿಂದ ತಮ್ಮ ಬೈಕ್‌ನಲ್ಲಿ ಶಿವಲಿಂಗಯ್ಯ ನೆಲಮಾಕನಹಳ್ಳಿ ಗ್ರಾಮಕ್ಕೆ ತೆರಳುತ್ತಿದ್ದ ವೇಳೆ ತಿರುವಿನಲ್ಲಿ ಮಳವಳ್ಳಿಯಿಂದ ಬೆಂಗಳೂರಿಗೆ ಹೋಗುತ್ತಿದ್ದ ಕಾರು ಡಿಕ್ಕಿ ಹೊಡೆದಿದೆ. ಡಿಕ್ಕಿಯ ರಭಸಕ್ಕೆ ಗಂಭೀರವಾಗಿ ಗಾಯಗೊಂಡಿದ್ದ ಬೈಕ್ ನ ಸವಾರ ಶಿವಲಿಂಗಯ್ಯ ಸ್ಥಳದಲ್ಲಿಯೇ ಸಾವನ್ನಪ್ಪಿದ್ದಾರೆ. ಮೃತರಿಗೆ ಪತ್ನಿ, ಇಬ್ಬರು ಪುತ್ರರು ಇದ್ದಾರೆ. ಸ್ಥಳಕ್ಕೆ ಗ್ರಾಮಾಂತರ ಸಿಪಿಐ ಬಸವರಾಜು ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ರೇಣುಕಾ ಹತ್ಯೆ ಪ್ರಕರಣ: ಸಾಕ್ಷ್ಯ ನುಡಿವಾಗ ಗಾಬರಿ ಆದ ಚಿಕ್ಕಣ್ಣ

Sujatha NR — Wed, 14 Oct 2026 11:04:00 +0530

ಬೆಂಗಳೂರು : ನಟ ದರ್ಶನ್‌ ಪ್ರಮುಖ ಆರೋಪಿ ಆಗಿರುವ ಚಿತ್ರದರ್ಗದ ರೇಣುಕಾಸ್ವಾಮಿ ಕೊಲೆ ಪ್ರಕರಣ ಸಂಬಂಧ ನ್ಯಾಯಾಲಯದಲ್ಲಿ ಸಾಕ್ಷ್ಯ ನುಡಿಯುವ ಸಂದರ್ಭದಲ್ಲಿ ನಟ ಚಿಕ್ಕಣ್ಣ ಅವರು ಗಾಬರಿ ಆಗಿ ಸಮರ್ಪಕವಾಗಿ ಹೇಳಿಕೆ ದಾಖಲಿಸದ ಪ್ರಸಂಗ ಮಂಗಳವಾರ ನಡೆಯಿತು.

ರೇಣುಕಾಸ್ವಾಮಿ ಕೊಲೆ ಪ್ರಕರಣದ ವಿಚಾರಣೆ ನಗರದ 59ನೇ ಹೆಚ್ಚುವರಿ ಸಿಟಿ ಸಿವಿಲ್‌ ಮತ್ತು ಸೆಷನ್ಸ್‌ ನ್ಯಾಯಾಲಯ ಮಂಗಳವಾರ ಮುಂದುವರಿಸಿತು. ಪ್ರಕರಣ ಸಂಬಂಧ ಅ.98ರಂದು ನ್ಯಾಯಾಲಯದ ನೀಡಿದ್ದ ನಿರ್ದೇಶದದಂತೆ ನಟರಾದ ಚಿಕ್ಕಣ್ಣ ಮತ್ತು ಯಶಸ್‌ ಸೂರ್ಯ (ಆರ್.ನವೀನ್‌) ಸಾಕ್ಷ್ಯ ನುಡಿಯಲು (ಹೇಳಿಕೆ ದಾಖಲಿಸಲು) ಮಂಗಳವಾರ ವಿಚಾರಣೆಗೆ ಹಾಜರಾಗಿದ್ದರು.

15 ನಿಮಿಷ ಮುಂದೂಡಿಕೆ:

ಮೊದಲಿಗೆ ಚಿಕ್ಕಣ್ಣ ಅವರ ಸಾಕ್ಷ್ಯ ದಾಖಲಿಸಿಕೊಳ್ಳಲು ನ್ಯಾಯಾಲಯ ಮುಂದಾಯಿತು. ಆದರೆ, ಈ ವೇಳೆ ಚಿಕ್ಕಣ್ಣ ಗಾಬರಿಗೆ ಒಳಗಾದರು. ಸರಿಯಾಗಿ ಹೇಳಿಕೆ ದಾಖಲಿಸಲು ಅವರಿಗೆ ಸಾಧ್ಯವಾಗಲಿಲ್ಲ. ಇದರಿಂದ ನ್ಯಾಯಾಧೀಶರಾದ ಸುಜಾತಾ ಎಂ.ಸಾಂಬ್ರಾಣಿ ಅವರು, ಸ್ವಲ್ಪ ಸಮಯ ವಿಶ್ರಾಂತಿ ಪಡೆಯುವಂತೆ ಚಿಕ್ಕಣ್ಣಗೆ ಸೂಚಿಸಿ ಅವರ ಸಾಕ್ಷ್ಯ ದಾಖಲು ಪ್ರಕ್ರಿಯೆಯನ್ನು 15 ನಿಮಿಷ ಕಾಲ ಮುಂದೂಡಿದರು.

ಅದಾದ 15 ನಿಮಿಷ ನಂತರ ಸಾಕ್ಷ್ಯ ದಾಖಲಿಸಲು ಮತ್ತೆ ಚಿಕ್ಕಣ್ಣ ಅವರನ್ನು ಕರೆಯಲಾಯಿತು. ಆಗಲೂ ಸಹ ಅವರು ಗಾಬರಿಗೆ ಒಳಗಾದರು. ಅದನ್ನು ಪರಿಗಣಿಸಿದ ವಿಶೇಷ ಸರ್ಕಾರಿ ಅಭಿಯೋಜಕರಾದ (ಎಸ್‌ಪಿಪಿ) ಪಿ.ಪ್ರಸನ್ನ ಕುಮಾರ್‌ ಅವರು, ಚಿಕ್ಕಣ್ಣ ಅವರ ಸಾಕ್ಷ್ಯ ದಾಖಲು ಪ್ರಕ್ರಿಯೆ ಮುಂದೂಡುವಂತೆ ಕೋರಿದರು. ಆ ಮನವಿ ಮನ್ನಿಸಿದ ನ್ಯಾಯಾಧೀಶರು, ಚಿಕ್ಕಣ್ಣ ಅವರ ಸಾಕ್ಷ್ಯ ದಾಖಲು ಪ್ರಕ್ರಿಯೆ ಮುಂದೂಡಿದರು.

ಪವನ್‌ ಬಂದು ಹೋದ ಬಗ್ಗೆ ಗೊತ್ತಿಲ್ಲ:

ನಂತರ ನಟ ಯಶಸ್‌ ಸೂರ್ಯ ಅವರನ್ನು ಸಾಕ್ಷ್ಯ ದಾಖಲಾತಿಗೆ ಕರೆಯಲಾಯಿತು. ಅವರು ದರ್ಶನ್‌ ಜತೆಗಿನ ಪರಿಚಯ, ನಟನೆ ಮಾಡಿದ ಚಿತ್ರಗಳ ಬಗ್ಗೆ ಮಾಹಿತಿ ನೀಡಿದರು. ನಂತರ ರೇಣುಕಾಸ್ವಾಮಿ ಕೊಲೆ ನಡೆದ ದಿನವಾದ 2024ರ ಜೂ.8ರಂದು ಮಧ್ಯಾಹ್ನ 1 ಗಂಟೆಗೆ ದರ್ಶನ್‌ ಸೂಚನೆ ಮೇರೆಗೆ ಊಟ ಮಾಡಲು ರಾಜೇಶ್ವರಿ ನಗರದ ಸ್ಟೋನಿಬ್ರೂಕ್ಸ್‌ ಪಬ್‌ಗೆ ಹೋಗಿದ್ದೆ. ಅಲ್ಲಿಗೆ ದರ್ಶನ್‌ ಬಂದಿದ್ದು, ಊಟ ಮಾಡಿದ ಬಳಿಕ ನಾನು ನನ್ನ ಪಾಡಿಗೆ ಮನೆಗೆ ಬಂದೆ. ಆದರೆ, ಈ ವೇಳೆ ಪಬ್‌ಗೆ ದರ್ಶನ್‌ ಮನೆಯಲ್ಲಿ ಕೆಲಸ ಮಾಡುವ ಪವನ್‌ ಬಂದು ಹೋದ ಬಗ್ಗೆ ನನಗೆ ಗೊತ್ತಿಲ್ಲ. ಪವನ್‌ ಬಂದು ಹೋದ ಎಂದು ಪೊಲೀಸರು ಹೇಳಿದ್ದಕ್ಕೆ ನಾನು ಹೇಳಿದೆ ಎಂದು ನುಡಿದರು.

ಅದಕ್ಕೆ ಆಕ್ಷೇಪಿಸಿದ ಎಸ್‌ಪಿಪಿ, ಯಶಸ್‌ ಸೂರ್ಯನನ್ನು ಭಾಗಶಃ ಪ್ರತಿಕೂಲ ಸಾಕ್ಷಿಯಾಗಿ ಪರಿಗಣಿಸಿ ಪಾಟಿ ಸವಾಲು ನಡೆಸಲು ತಮಗೆ ಅನುಮತಿ ನೀಡಬೇಕು ಎಂದು ಕೋರಿದರು. ಆ ಮನವಿ ಪುರಸ್ಕರಿಸಿದ ನ್ಯಾಯಾಲಯ, ಯಶಸ್‌ ಸೂರ್ಯ ಅನ್ನು ಪಾಟಿ ಸವಾಲಿಗೆ ಒಳಪಡಿಸಲು ಎಸ್‌ಪಿಪಿಗೆ ಅನುಮತಿ ನೀಡಿತು. ಇನ್ನು ನ್ಯಾಯಾಲಯ ಆದೇಶದಂತೆ ಪರಪ್ಪನ ಅಗ್ರಹಾರ ಕೇಂದ್ರ ಕಾರಾಗೃಹದಲ್ಲಿ ತಮಗೆ ಮೂಲ ಸೌಕರ್ಯ ಕಲ್ಪಿಸುತ್ತಿಲ್ಲ. ಈ ಕುರಿತು ನ್ಯಾಯಾಂಗ ಪರಿಶೀಲನೆಗೆ ಆದೇಶಿಸಬೇಕು ಎಂದು ನ್ಯಾಯಾಧೀಶರನ್ನು ಪ್ರಕರಣದ ಮೊದಲನೆ ಆರೋಪಿ ಪವಿತ್ರಾ ಗೌಡ ಕೋರಿದರು.

ಅದಕ್ಕೆ ಎಸ್‌ಪಿಪಿ, ಈ ಕುರಿತು ಪರಿಶೀಲನೆ ನಡೆಸಿ ಬುಧವಾರ ನ್ಯಾಯಾಲಯಕ್ಕೆ ಮಾಹಿತಿ ನೀಡುವುದಾಗಿ ಭರವಸೆ ನೀಡಿದರು. ಅಂತಿಮವಾಗಿ ನ್ಯಾಯಾಯವು ಪ್ರಕರಣದ ವಿಚಾರಣೆಯನ್ನು ಬುಧವಾರಕ್ಕೆ ಮುಂದೂಡಿತು.

ನಾಗಮಂಗಲ: ಗ್ರಾಮ ಆಡಳಿತಾಧಿಕಾರಿ ಮರಿಸ್ವಾಮಿ ಅಮಾನತು

KannadaprabhaNewsNetwork — Fri, 02 Oct 2026 02:00:00 +0530

ನಾಗಮಂಗಲ:

ತಾಲೂಕಿನ ಗೊಂಡೇನಹಳ್ಳಿ ವೃತ್ತದ ಗ್ರಾಮ ಆಡಳಿತಾಧಿಕಾರಿ ಮರಿಸ್ವಾಮಿ ಅವರನ್ನು ಸೇವೆಯಿಂದ ಅಮಾನತ್ತುಗೊಳಿಸಿ ಜಿಲ್ಲಾಧಿಕಾರಿ ಡಾ.ಕುಮಾರ ಗುರುವಾರ ಆದೇಶ ಹೊರಡಿಸಿದ್ದಾರೆ.

ಜಮೀನಿನ ವಿಷಯಕ್ಕೆ ಸಂಬಂಧಿಸಿದಂತೆ ಸಹಾಯ ಕೇಳಿದ ಮಹಿಳೆಯನ್ನು ಮನೆಗೆ ಕರೆಸಿಕೊಂಡು ಹಣ್ಣಿನ ರಸಕ್ಕೆ ಅಮಲೇರುವ ಔಷಧ ಮಿಶ್ರಣ ಮಾಡಿ ಕುಡಿಸಿ ಆಕೆ ಪ್ರಜ್ಞೆ ತಪ್ಪಿದ ಬಳಿಕ ಅತ್ಯಾಚಾರವೆಸಗಿದ್ದಲ್ಲದೆ ವೀಡಿಯೋ ಮಾಡಿಟ್ಟುಕೊಂಡು ಲೈಂಗಿಕ ಕ್ರಿಯೆಗೆ ಸಹಕರಿಸುವಂತೆ ಬ್ಲಾಕ್‌ಮೇಲ್ ಮಾಡುತ್ತಿದ್ದರು.

ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಂತ್ರಸ್ತೆ ಮಹಿಳೆ ನೀಡಿದ ದೂರಿನನ್ವಯ ಪ್ರಕರಣ ದಾಖಲಿಸಿಕೊಂಡಿದ್ದ ಬೆಳ್ಳೂರು ಠಾಣೆ ಪೊಲೀಸರು ಸೆ.19ರಂದು ಗೊಂಡೇನಹಳ್ಳಿ ವೃತ್ತದ ಗ್ರಾಮ ಆಡಳಿತಾಧಿಕಾರಿ ಮರಿಸ್ವಾಮಿಯನ್ನು ಬಂಧಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದರು.

ಘಟನೆ ಕುರಿತು ತಹಸೀಲ್ದಾರ್ ಹಾಗೂ ನಾಗಮಂಗಲ ವೃತ್ತ ನಿರೀಕ್ಷಕರು ಜಿಲ್ಲಾಧಿಕಾರಿಗೆ ವರದಿ ಸಲ್ಲಿಸಿದ್ದರು. ಈ ವರದಿಯನ್ನಾಧರಿಸಿ ಕ್ರಿಮಿನಲ್ ಪ್ರಕರಣದಲ್ಲಿ ಬಂಧನಕ್ಕೊಳಗಾಗಿ ನ್ಯಾಯಾಂಗ ಬಂಧನದಲ್ಲಿರುವ ಮರಿಸ್ವಾಮಿಗೆ ಈವರೆಗೂ ಜಾಮೀನು ಸಿಗದಿರುವುದನ್ನು ಉಲ್ಲೇಖಿಸಿ ಸೆ.30ರಂದು ಅಮಾನತ್ತುಗೊಳಿಸಿ ಜಿಲ್ಲಾಧಿಕಾರಿ ಆದೇಶಿಸಿದ್ದಾರೆ.

ಅಮಾನತ್ತುಗೊಂಡ ಗ್ರಾಮ ಆಡಳಿತಾಧಿಕಾರಿಯನ್ನು ಮಳವಳ್ಳಿ ತಾಲೂಕಿನ ದ್ಯಾವಪಟ್ಟಣ ವೃತ್ತಕ್ಕೆ ಸ್ಥಳಾಂತರಿಸಿದ್ದು, ಈ ಸಂದರ್ಭ ಸಕ್ಷಮದ ಅನುಮತಿ ಇಲ್ಲದೆ ಕೇಂದ್ರ ಸ್ಥಾನವನ್ನು ಬಿಡುವಂತಿಲ್ಲವೆಂದು ಜಿಲ್ಲಾಧಿಕಾರಿಗಳು ತಮ್ಮ ಆದೇಶದಲ್ಲಿ ತಿಳಿಸಿದ್ದಾರೆ.ಅನಾರೋಗ್ಯಕ್ಕೆ ಬೇಸತ್ತು ವಿದ್ಯಾರ್ಥಿನಿ ನೇಣು ಬಿಗಿದು ಆತ್ಮಹತ್ಯೆ

ಮದ್ದೂರು:ಅನಾರೋಗ್ಯದಿಂದ ಬಳಲುತ್ತಿದ್ದ ವಿದ್ಯಾರ್ಥಿನಿ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ಪಟ್ಟಣದ ಶಿವಪುರದಲ್ಲಿ ಬುಧವಾರ ಸಂಜೆ ಜರುಗಿದೆ.

ಶಿವಪುರದ ಧ್ವಜ ಸತ್ಯಾಗ್ರಹ ಸೌಧದ ಹಿಂಭಾಗದ ಮನೆಯಲ್ಲಿ ವಾಸಿಸುತ್ತಿದ್ದ ಪ್ರಕಾಶ್ ಮತ್ತು ಸುಮಾ ದಂಪತಿ ಪುತ್ರಿ ಸುಚಿತ್ರ (14) ಆತ್ಮಹತ್ಯೆ ಮಾಡಿಕೊಂಡ ವಿದ್ಯಾರ್ಥಿನಿ.ಮದ್ದೂರಿನ ಲೀಲಾವತಿ ಬಡಾವಣೆಯ ಮರಿಯಪ್ಪ ಕಾನ್ವೆಂಟ್‌ನಲ್ಲಿ ಎಸ್ಸೆಸ್ಸೆಲ್ಸಿ ವ್ಯಾಸಂಗ ಮಾಡುತ್ತಿದ್ದ ಸುಚಿತ್ರ ಬಹಳ ದಿನಗಳಿಂದ ಹೊಟ್ಟೆ ನೋವಿನಿಂದ ನರಲಾಡುತ್ತಿದ್ದಳು. ತಂದೆ ಪ್ರಕಾಶ್ ಗಾರೆ ಕೆಲಸಕ್ಕೆ ಹಾಗೂ ತಾಯಿ ಸುಮಾ ಗಾರ್ಮೆಂಟ್ಸ್ ಕೆಲಸಕ್ಕೆ ಹೋದ ಸಂದರ್ಭದಲ್ಲಿ ತನ್ನ ಎರಡು ಕೈಗಳನ್ನು ಚಾಕುವಿನಿಂದ ಗಾಯ ಮಾಡಿಕೊಂಡು ತೀವ್ರ ರಕ್ತಸ್ರಾವದಿಂದ ನರಳುತ್ತಿದ್ದ ಸುಚಿತ್ರ ನೋವು ತಡೆಯಲಾರದೆ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಈ ಸಂಬಂಧ ಮದ್ದೂರು ಪೊಲೀಸರು ಪ್ರಕರಣ ದಾಖಲು ಮಾಡಿಕೊಂಡ ಬಳಿಕ ಮಂಡ್ಯ ಜಿಲ್ಲಾ ಆಸ್ಪತ್ರೆಯಲ್ಲಿ ಮರಣೋತ್ತರ ಪರೀಕ್ಷೆಯ ನಂತರ ಶವವನ್ನು ವಾರಸುದಾರರ ವಶಕ್ಕೆ ಒಪ್ಪಿಸಿದ್ದಾರೆ.

ಆಸ್ತಿಗಾಗಿ ಮಲಗಿದ್ದ ಅಣ್ಣನ ಮಗನ ಕೊಂದು ಠಾಣೆಗೆ ಹೋಗಿ ಶರಣಾದ ಚಿಕ್ಕಪ್ಪ

Sujatha NR — Wed, 14 Oct 2026 08:23:54 +0530

ಬೆಂಗಳೂರು : ಆಸ್ತಿ ವಿವಾದದಿಂದಾಗಿ ಮಲಗಿದ್ದ ಬಾಲಕನ ಮೇಲೆ ಮಾರಕಾಸ್ತ್ರದಿಂದ ಹೊಡೆದು ಕೊಲೆ ಮಾಡಿದ ಆರೋಪದ ಮೇಲೆ ಬಾಲಕನ ಚಿಕ್ಕಪ್ಪನನ್ನು ಸೋಲದೇವನಹಳ್ಳಿ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಮೋಹನ್‌ ಬಂಧಿತ ಆರೋಪಿ. ಕೃಷ್ಣ (15) ಮೃತ ಬಾಲಕ. ಬಾಲಕನ ಸಂಬಂಧಿ ನೀಡಿದ ದೂರಿನನ್ವಯ ಪ್ರಕರಣ ದಾಖಲಿಸಿ ಆರೋಪಿಯನ್ನು ಬಂಧಿಸಲಾಗಿದೆ. ಆತನನ್ನು ಪೊಲೀಸ್‌ ಕಸ್ಟಡಿಗೆ ಪಡೆದು ಹೆಚ್ಚಿನ ವಿಚಾರಣೆ ನಡೆಸಲಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಕೃಷ್ಣ ಅವರ ತಾಯಿ 14 ವರ್ಷಗಳ ಹಿಂದೆಯೇ ಮಕ್ಕಳು ಮತ್ತು ಗಂಡನನ್ನು ಬಿಟ್ಟು ಹೋಗಿದ್ದರು. ಅದೇ ಕೊರಗಿನಲ್ಲಿ ಕೃಷ್ಣ ಅವರ ತಂದೆ ಮುನಿರಾಜು ಮೃತಪಟ್ಟಿದ್ದರು. ಕೃಷ್ಣ ಮತ್ತು ಆತನ ಅಣ್ಣ ಯಶವಂತ ಇಬ್ಬರೂ ಮನೆಯೊಂದರಲ್ಲಿ ವಾಸ ಮಾಡುತ್ತಿದ್ದರು. ಯಶವಂತ ಕೂಲಿ ಕೆಲಸ ಮಾಡಿಕೊಂಡಿದ್ದ. ಕೃಷ್ಣ ಐವರ ಕಂಡಪುರದ ಶಾಲೆಯೊಂದರಲ್ಲಿ 10ನೇ ತರಗತಿ ಓದುತ್ತಿದ್ದ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಆಸ್ತಿಗಾಗಿ ಹತ್ಯೆ

ಕೃಷ್ಣ ಅವರ ತಂದೆ ಮುನಿರಾಜುವಿಗೆ ದೇವನಹಳ್ಳಿ ಕುಂದಾಣ ಹತ್ತಿರ ಸುಮಾರು 1 ಎಕರೆ ಪಿತ್ರಾರ್ಜಿತ ಜಮೀನು ಇದೆ. ಕಳೆದ ವರ್ಷ ಆ ಜಮೀನನ್ನು ಆರೋಪಿ ಮೋಹನ್‌, ತನ್ನ ಅಕ್ಕ ಪುಪ್ಪ ಹಾಗೂ ಅಣ್ಣನ ಮಕ್ಕಳಾದ ಯಶವಂತ್ ಹಾಗೂ ಕೃಷ್ಣನಿಗೆ ಗೊತ್ತಾಗದ ಹಾಗೇ ಸಹಿಗಳನ್ನು ನಕಲು ಮಾಡಿ ಜಮೀನನ್ನು ಯಲಹಂಕ ಜಿ.ಕೆ.ಬಿಲ್ಡರ್ಸ್‌ರ್‌ಗೆ ಮಾರಾಟ ಮಾಡಿದ್ದ.

ಈ ಸಂಬಂಧ ಪುಪ್ಪ ಅವರು ವಿಶ್ವನಾಥಪುರ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದರು. ಈ ನಡುವೆ ನಕಲು ವಿಚಾರ ಬಿಲ್ಡರ್ಸ್‌ರಿಗೆ ಗೊತ್ತಾಗಿ ಪುಷ್ಪ ಹಾಗೂ ಮುನಿರಾಜು ಅವರ ಮಕ್ಕಳಾದ ಯಶವಂತ ಹಾಗೂ ಕೃಷ್ಣ ಅವರ ಅಕೌಂಟ್‌ಗೆ ಹಣ ಹಾಕಿದ್ದರು. ಇದರಿಂದ ಕೋಪಗೊಂಡ ಆರೋಪಿ ಮೋಹನ್ ಆಗಾಗ್ಗೆ ಬಂದು ಯಶವಂತ ಮತ್ತು ಕೃಷ್ಣನ ಮೇಲೆ ಗಲಾಟೆ ಮಾಡುತ್ತಿದ್ದ. ಆರೋಪಿ ಮೋಹನ್ ಸೋಮವಾರ ರಾತ್ರಿ 10ರ ಸುಮಾರಿಗೆ ಕೃಷ್ಣನ ಮನೆಗೆ ಬಂದು ಮಚ್ಚಿನಿಂದ ಆತನನ್ನು ಕೊಚ್ಚಿ ಕೊಲೆ ಮಾಡಿದ್ದ. ಕೃತ್ಯ ನಡೆದಾಗ ಕೃಷ್ಣನ ಅಣ್ಣ ಯಶವಂತ ಸಿನಿಮಾ ನೋಡಲು ಹೋಗಿದ್ದ ಎನ್ನಲಾಗಿದೆ.

ಠಾಣೆಗೆ ಹೋಗಿ ಶರಣಾದ ಆರೋಪಿ:

ಆರೋಪಿ ಮೋಹನ್ ಕೃತ್ಯ ಎಸಗಿದ ಬಳಿಕ ತಾನು ಕೃಷ್ಣ ಎಂಬಾತನನ್ನು ಕೊಲೆ ಮಾಡಿರುವುದಾಗಿ ಮಂಗಳವಾರ ಬೆಳಗ್ಗೆ ವಿಶ್ವನಾಥಪುರ ಪೊಲೀಸ್ ಠಾಣೆಗೆ ಹೋಗಿ ಶರಣಾಗಿದ್ದಾನೆ. ವಿಶ್ವನಾಥಪುರ ಪೊಲೀಸರು, ಕೂಡಲೇ ಸೋಲದೇವನಹಳ್ಳಿ ಪೊಲೀಸರಿಗೆ ಮಾಹಿತಿ ನೀಡಿದ್ದು, ಪೊಲೀಸರು ದೌಡಾಯಿಸಿ ಕೃಷ್ಣನ ಮನೆಗೆ ಹೋಗಿ ನೋಡಿದ್ದಾಗ ಆತ ಮನೆಯ ರೂಮಿನಲ್ಲಿ ಬೋರಲಾಗಿ ಸತ್ತು ಬಿದಿದ್ದ, ಆತನ ತಲೆಯಿಂದ ರಕ್ತಸ್ರಾವವಾಗಿತ್ತು ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ರೌಡಿಗಳ ಮನೆ ಮೇಲೆ ಸಿಸಿಬಿ ದಾಳಿ: ನಾಲ್ವರ ಸೆರೆ

KannadaprabhaNewsNetwork — Sat, 10 Oct 2026 05:54:41 +0530

ಬೆಂಗಳೂರು : ಸಿಸಿಬಿ ಪೊಲೀಸರು ವಿಶೇಷ ಕಾರ್ಯಾಚರಣೆ ನಡೆಸಿ ರೌಡಿಗಳ ಮನೆಗಳ ಮೇಲೆ, ಹಳೇ ಪ್ರಕರಣದ ಆರೋಪಿಗಳ ನಿವಾಸ ಮೇಲೆ ಹಾಗೂ ಪಿಕ್‌ ಪಾಕೆಟ್‌ ಮಾಡುತ್ತಿದ್ದವರ ಮೇಲೆ ದಾಳಿ ನಡೆಸಿ ನಾಲ್ವರು ಆರೋಪಿಗಳನ್ನು ವಶಕ್ಕೆ ಪಡೆದಿದ್ದಾರೆ.

ನಗರದಲ್ಲಿ ಸಮಾಜಘಾತುಕ ಶಕ್ತಿಗಳು ಹಾಗೂ ಅಪರಾಧ ಕೃತ್ಯಗಳ ಮೇಲೆ ನಿಯಂತ್ರಣ ಸಾಧಿಸುವ ನಿಟ್ಟಿನಲ್ಲಿ ಸಿಸಿಬಿ ಅಧಿಕಾರಿ ಹಾಗೂ ಸಿಬ್ಬಂದಿಯ ತಂಡವು ಪಶ್ಚಿಮ ವಿಭಾಗದ ಜೆ.ಜೆ.ನಗರ ಪೊಲೀಸ್ ಠಾಣಾ ವ್ಯಾಪ್ತಿಯ ಹಾಗೂ ಸುತ್ತಲಿನ ಪ್ರದೇಶಗಳಲ್ಲಿ ಗುರುವಾರ ವಿಶೇಷ ಕಾರ್ಯಾಚರಣೆಯನ್ನು ನಡೆಸಿದೆ.

ಈ ವೇಳೆ ರೌಡಿಶೀಟರ್‌ಗಳು, ಡ್ರಗ್ ಪೆಡ್ಲರ್‌ಗಳು, ನ್ಯಾಯಾಲಯದಿಂದ ವಾರೆಂಟ್ ಜಾರಿಯಾಗಿ ತಲೆಮರೆಸಿಕೊಂಡಿರುವವರ ಮನೆ ಮತ್ತು ಕಚೇರಿಗಳನ್ನು ಪರಿಶೀಲಿಸಲಾಯಿತು. ಅಲ್ಲದೇ ಅನುಮಾನಾಸ್ಪದವಾಗಿ ಓಡಾಡುವವರು, ದೋಷಪೂರಿತ ನಂಬರ್ ಪ್ಲೇಟ್ ವಾಹನಗಳನ್ನು ಬಳಸುವವರು, ಅಪ್ರಾಪ್ತ ವಾಹನ ಚಾಲಕರು ಹಾಗೂ ಈ ಪ್ರದೇಶದಲ್ಲಿ ಹೆಚ್ಚು ಅಪರಾಧ ಕೃತ್ಯಗಳು ಜರುಗುವ ಪ್ರದೇಶಗಳು, ಬಾರ್ ಆ್ಯಂಡ್‌ ರೆಸ್ಟೋರೆಂಟ್‌, ಪಾರ್ಕ್‌ಗಳನ್ನು ಪರಿಶೀಲನೆ ನಡೆಸಲಾಯಿತು. ವಿಶೇಷ ಕಾರ್ಯಾಚರಣೆ ವೇಳೆಯಲ್ಲಿ ರೌಡಿಶೀಟರ್‌ಗಳಿಗೆ ಸೇರಿದ 72 ಸ್ಥಳಗಳ ಮೇಲೆ ದಾಳಿ ನಡೆಸಿ ಪರಿಶೀಲಿಸಲಾಗಿದೆ. ಎಂಒ ವ್ಯಕ್ತಿಗಳಿಗೆ ಸೇರಿದ 65, ಡ್ರಗ್‌ ಪೆಡ್ಲರ್‌ಗಳು ಮತ್ತು ಬಳಕೆದಾರರಿಗೆ ಸೇರಿದ 23 ಸ್ಥಳಗಳು, 270 ವಾಹನಗಳ ಪರಿಶೀಲನೆ, ವಾರೆಂಟ್‌ ಅಥವಾ ಪ್ರೊಕ್ಲಮೇಷನ್‌ ಜಾರಿ ಆಗಿದ್ದ 4 ಆರೋಪಿಗಳು, ಹೆಚ್ಚು ಅಪರಾಧ ನಡೆಯುವ 72 ಸ್ಥಳಗಳು ಮತ್ತು ಬಾರ್‌ ಆ್ಯಂಡ್‌ ರೆಸ್ಟೋರೆಂಟ್‌ ಪಾರ್ಕ್‌ಗಳು, ಇತರೆ 29 ಸ್ಥಳಗಳ ಮೇಲೆ ಸೇರಿ ಒಟ್ಟು 535 ಸ್ಥಳಗಳ ಮೇಲೆ ದಾಳಿ ನಡೆಸಿ ಪರಿಶೀಲನೆ ನಡೆಸಲಾಯಿತು.

ಆರೋಪಿಗಳ ಬಂಧನ:

ವಿಶೇಷ ಕಾರ್ಯಾಚರಣೆಯ ವೇಳೆ ಕೊಲೆ ಪ್ರಕರಣದಲ್ಲಿ ಭಾಗಿಯಾಗಿದ್ದ ಜಿತೇಂದ್ರ ರತನ್‌, ಗಲಾಟೆ, ಹಲ್ಲೆ ಮತ್ತು ದೊಂಬಿ ಪ್ರಕರಣದಲ್ಲಿ ಭಾಗಿಯಾಗಿದ್ದ ಮೋಸಿನ್‌ ಪಾಷ(40), ಮಾದಕವಸ್ತು ಬಳಕೆ ಪ್ರಕರಣದಲ್ಲಿ ಭಾಗಿಯಾಗಿದ್ದ ಸಯ್ಯದ್‌ ಜಮಾಲ್‌(27), ಇಮಾತ್‌ (23), ಸಾರ್ವಜನಿಕ ಸ್ಥಳಗಳಲ್ಲಿ ಕಾನೂನು ಉಲ್ಲಂಘಿಸಿದ 10 ಜನರ ವಿರುದ್ಧ ಕೆ.ಪಿ ಆಕ್ಟ್‌ ಅಡಿಯಲ್ಲಿ ಲಘು ಪ್ರಕರಣಗಳನ್ನು ದಾಖಲಿಸಲಾಗಿದೆ. ಸಂಚಾರ ನಿಯಮಗಳನ್ನು ಉಲ್ಲಂಘಿಸಿದ ಇಬ್ಬರ ವಿರುದ್ಧ 2 ಪ್ರಕರಣ ದಾಖಲಿಸಿ 11 ವಾಹನ ಸವಾರರಿಗೆ 23,500 ದಂಡ ವಿಧಿಸಲಾಗಿದೆ. ಅಪ್ರಾಪ್ತರಿಗೆ ವಾಹನ ನೀಡಿದ ಇಬ್ಬರು ಪಾಲಕರ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ. ದೋಷಪೂರಿತ ನಂಬರ್‌ ಪ್ಲೇಟ್‌ ಮತ್ತು ಹಳೆಯ ಬಾಕಿ ಪ್ರಕರಣದಲ್ಲಿ 11,500 ರು.ದಂಡ ಸಂಗ್ರಹಿಸಲಾಗಿದೆ.

ಪುಂಡಾಟ ಮೆರೆದ ಆರೋಪಿ!:

ಸಿಸಿಬಿ ದಾಳಿಯ ವೇಳೆ ಕಾಂಗ್ರೆಸ್ ಮುಖಂಡನ ತಮ್ಮ ಮೌಸೀನ್ ಪಾಷಾ ಎಂಬಾತ ಪೊಲೀಸರಿಗೆ ಅವಾಜ್‌ ಹಾಕಿ ಪುಂಡಾಟ ಮರೆದಿದ್ದಾನೆ ಎನ್ನಲಾಗಿದೆ. ಗಲಭೆ, ದೊಂಬಿ ಹಾಗೂ ಹಲ್ಲೆ ಪ್ರಕರಣಗಳಲ್ಲಿ ಭಾಗಿಯಾಗಿ ತಲೆ ಮರೆಸಿಕೊಂಡಿದ್ದ. ಮೌಸೀನ್ ಪಾಷಾ, ಚಾಮರಾಜಪೇಟೆಯ ಮಾಜಿ ಕಾರ್ಪೊರೇಟರ್ ಇಮ್ರಾನ್ ಪಾಷಾ ಸಹೋದರನಾಗಿದ್ದು, ಈತನ ಮೇಲೆ ಎರಡೆರಡೂ ವಾರೆಂಟ್ ಜಾರಿಯಾಗಿದ್ದರೂ ಕೂಡ ನ್ಯಾಯಾಲಯಕ್ಕೆ ಹಾಜರಾಗದೆ ಉದ್ಧಟತನ ತೋರಿದ್ದ.

ತಾಯಿಯ ಕೊಲೆ ಮಾಡಿ ಕಥೆ ಕಟ್ಟಿ ಸಿಕ್ಕಿಬಿದ್ದ ಮಗ

KannadaprabhaNewsNetwork — Fri, 09 Oct 2026 05:18:33 +0530

ಬೆಂಗಳೂರು : ಮದ್ಯಕ್ಕೆ ದಾಸಳಾಗಿದ್ದಳು ಎಂದು ತನ್ನ ತಾಯಿಯನ್ನು ಕೊಂದು ಬಳಿಕ ಅಂತ್ಯಸಂಸ್ಕಾರಕ್ಕೆ ಮುಂದಾಗಿದ್ದಾಗ ಮಗನೊಬ್ಬ ‘ಅನಾಮಧೇಯ ಕರೆ’ಯ ಪರಿಣಾಮ ಜೈಲು ಪಾಲಾಗಿರುವ ಕುತೂಹಲಕಾರಿ ಘಟನೆ ನಗರದಲ್ಲಿ ನಡೆದಿದೆ.

ಬೇವಿನಮರದ ಕಾಲೋನಿ ನಿವಾಸಿ ಭಾಗ್ಯಮ್ಮ (60) ಕೊಲೆಯಾದ ದುರ್ದೈವಿ. ಈ ಹತ್ಯೆ ಸಂಬಂಧ ಮೃತಳ ಪುತ್ರ ಬಾಲಾಜಿಯನ್ನು ಕಾಡುಗೋಡಿ ಠಾಣೆ ಪೊಲೀಸರು ಬಂಧಿಸಿದ್ದಾರೆ. 3 ದಿನಗಳ ಹಿಂದೆ ಮನೆಯಲ್ಲಿ ತನ್ನ ತಾಯಿ ಮೇಲೆ ಮನಬಂಬದಂತೆ ಹಲ್ಲೆ ನಡೆಸಿ ಆರೋಪಿ ಹತ್ಯೆಗೈದಿದ್ದಾನೆ. ಬಳಿಕ ಮೃತಳ ಅಂತ್ಯಕ್ರಿಯೆಗೆ ತನ್ನ ಸೋದರರು ಜತೆ ಸೇರಿ ಆರೋಪಿ ಯತ್ನಿಸಿದ್ದಾಗ ಪೊಲೀಸರಿಗೆ ಸ್ಥಳೀಯ ವ್ಯಕ್ತಿಯೊಬ್ಬರು ಕರೆ ಮಾಡಿದ್ದರು. ಕೂಡಲೇ ಘಟನಾ ಸ್ಥಳಕ್ಕೆ ತೆರಳಿದ ಪೊಲೀಸರು, ಅಂತ್ಯಕ್ರಿಯೆ ತಡೆದು ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೊಳಪಡಿಸಿದಾಗ ಸತ್ಯ ಬಯಲಾಗಿದೆ.

ಮಂಚದಿಂದ ಬಿದ್ದು ಸಾವು ಸುಳ್ಳಿನ ಕತೆ:

ಗಾರೆ ಕೆಲಸ ಮಾಡಿಕೊಂಡು ಜೀವನ ಸಾಗಿಸುತ್ತಿದ್ದ ಬಾಲಾಜಿ, ತನ್ನ ಕುಟುಂಬದ ಜತೆ ಬೇವಿನಮರದ ಕಾಲೋನಿಯಲ್ಲಿ ನೆಲೆಸಿದ್ದಾನೆ. ತಮ್ಮ ಪತಿ ಸಾವನ್ನಪ್ಪಿದ ಬಳಿಕ ಮಕ್ಕಳಿಂದ ಪ್ರತ್ಯೇಕವಾಗಿ ಮೃತ ಭಾಗ್ಯಮ್ಮ ನೆಲೆಸಿದ್ದರು. ವಿಪರೀತ ಮದ್ಯ ವ್ಯಸನಿಯಾಗಿದ್ದ ಅವರು ಪ್ರತಿ ದಿನ ಪಾನಮತ್ತಳಾಗಿ ಗಲಾಟೆ ಮಾಡುತ್ತಿದ್ದರು. ಇತ್ತ ಕೌಟುಂಬಿಕ ವಿಚಾರವಾಗಿ ಪುತ್ರ ಬಾಲಾಜಿ ಹಾಗೂ ತಾಯಿ ಮಧ್ಯೆ ಮನಸ್ತಾಪ ಬೆಳೆದಿತ್ತು. ತನ್ನ ಚಿನ್ನದ ಸರವನ್ನು ಪಡೆದು ಅಡಮಾನವಿಟ್ಟಿದ್ದಾನೆ ಎಂದು ಪುತ್ರನ ಮೇಲೆ ಭಾಗ್ಯಮ್ಮ ಅಸಮಾಧಾನ ವ್ಯಕ್ತಪಡಿಸಿದ್ದರು. ತನ್ನ ಚಿನ್ನ ಮರಳಿಸುವಂತೆ ಮಗನಿಗೆ ಅವರು ತಾಕೀತು ಮಾಡಿದ್ದರು. ಇದೇ ವಿಷಯವಾಗಿ ಆಗಾಗ್ಗೆ ಪರಸ್ಪರ ಜಗಳವಾಡುತ್ತಿದ್ದರು.

ಅಂತೆಯೇ ಸೆ.25 ರಂದು ರಾತ್ರಿ ತಾಯಿ-ಮಗನ ಮಧ್ಯೆ ಜಗಳವಾಗಿದೆ. ಆಗ ಸಿಟ್ಟಿಗೆದ್ದು ಬಾಲಾಜಿ, ತನ್ನ ತಾಯಿ ಮೇಲೆ ಮನಸೋ ಇಚ್ಛೆ ಹಲ್ಲೆ ನಡೆಸಿದ್ದಾನೆ. ಈ ಹಲ್ಲೆಯಿಂದ ಗಂಭೀರವಾಗಿ ಗಾಯಗೊಂಡು ಅವರು ಮೃತಪಟ್ಟಿದ್ದಾರೆ. ತಕ್ಷಣವೇ ತನ್ನ ಇಬ್ಬರು ಸೋದರರು ಹಾಗೂ ಸಂಬಂಧಿಕರಿಗೆ ಕರೆ ಮಾಡಿ ಮಂಚದಿಂದ ಬಿದ್ದು ತಾಯಿ ಸಾವ್ನಪ್ಪಿದ್ದಾಳೆ ಎಂದು ಬಾಲಾಜಿ ಸುಳ್ಳು ಹೇಳಿದ್ದ. ಈ ಮಾತು ನಂಬಿದ ಆತನ ಸೋದರರು ಹಾಗೂ ಸಂಬಂಧಿಕರು, ಮರುದಿನ ಮೃತಳ ಅಂತ್ಯಕ್ರಿಯೆಗೆ ಸಿದ್ಧತೆ ನಡೆಸಿದ್ದರು ಎಂದು ತಿಳಿದು ಬಂದಿದೆ.

ಅನಾಮಧೇಯನ ಕರೆ:

ತನ್ನ ಸೋದರರ ಜತೆ ಸೇರಿ ಆತ ಸಿದ್ದನಾಗಿದ್ದ. ಇನ್ನೇನು ಮಣ್ಣು ಮಾಡಬೇಕು ಎನ್ನುವ ಹೊತ್ತಿಗೆ ಪೊಲೀಸರಿಗೆ ಕರೆ ಮಾಡಿ ಕೊಲೆ ಬಗ್ಗೆ ಅನಾಮಧೇಯ ಮಾಹಿತಿ ನೀಡಿದ್ದಾನೆ. ಮನೆಯಲ್ಲಿ ಜೋರು ಗಲಾಟೆ ನಡೆದ ಸದ್ದು ಕೇಳಿ ಬರುತ್ತಿತ್ತು. ಬೆಳಗ್ಗೆ ನೋಡಿದರೆ ಅಜ್ಜಿ ಸಾವನ್ನಪ್ಪಿದ್ದಾಳೆ. ಹೀಗಾಗಿ ನಮಗೆ ಅಜ್ಜಿಯನ್ನು ಮಗನೇ ಕೊಲೆ ಮಾಡಿರುವ ಶಂಕೆ ಇದೆ. ಆದರೆ ನನ್ನ ಹೆಸರನ್ನು ಪ್ರಾಣಭೀತಿಯಿಂದ ಹೇಳುತ್ತಿಲ್ಲ ಎಂದು ಪೊಲೀಸ್ ನಿಯಂತ್ರಣ ಕೊಠಡಿ (ನಮ್ಮ-112)ಗೆ ಕರೆ ಮಾಡಿ ಸ್ಥಳೀಯ ವ್ಯಕ್ತಿ ತಿಳಿಸಿದ್ದ.

ಈ ಮಾಹಿತಿ ಲಭ್ಯವಾದ ತಕ್ಷಣವೇ ಘಟನಾ ಸ್ಥಳಕ್ಕೆ ತೆರಳಿದ ಪೊಲೀಸರು, ಅಂತ್ಯಕ್ರಿಯೆಯನ್ನು ತಡೆದು ಮೃತದೇಹವನ್ನು ಆಸ್ಪತ್ರೆಗೆ ಮರಣೋತ್ತರ ಪರೀಕ್ಷೆಗೆ ಕಳುಹಿಸಿದ್ದಾರೆ. ಆಗ ಮರಣೋತ್ತರ ವರದಿಯಲ್ಲಿ ಕೊಲೆ ನಡೆದಿರುವುದು ಖಚಿತವಾಗಿದೆ. ಬಳಿಕ ಬಾಲಾಜಿಯನ್ನು ವಶಕ್ಕೆ ಪಡೆದು ವಿಚಾರಣೆಗೊಳಪಡಿಸಿದಾಗ ತಪ್ಪೊಪ್ಪಿಕೊಂಡಿದ್ದಾನೆ.

ನಮಗೆ ತಾಯಿ ನಡವಳಿಕೆ ಕಿರಿಕಿರಿ:

ನನ್ನ ತಾಯಿ ನಡವಳಿಕೆ ಸಿಟ್ಟು ತರಿಸಿತ್ತು. ಮದ್ಯ ವ್ಯಸನಿ ಮಾತ್ರವಲ್ಲದೆ ಅಪರಿಚಿತ ವ್ಯಕ್ತಿ ಜತೆ ಸ್ನೇಹವಿತ್ತು. ತಂದೆ ಮೃತಪಟ್ಟ ಬಳಿಕ ಪ್ರತಿದಿನ ಆತ ಮನೆ ಬಳಿ ಬರುತ್ತಿದ್ದ. ಇದರಿಂದ ನೆರೆಹೊರೆಯವರಲ್ಲಿ ಕುಹುಕಗಳು ಕೇಳಿ ಬರುತ್ತಿದ್ದವು. ಈ ನಡವಳಿಕೆಯಿಂದ ಬೇಸತ್ತು ತನ್ನ ತಾಯಿಯನ್ನು ಹತ್ಯೆ ಮಾಡಿದ್ದಾಗಿ ಆರೋಪಿ ಬಾಲಾಜಿ ಹೇಳಿದ್ದಾನೆ ಎನ್ನಲಾಗಿದೆ.

ಮಗಳ ಮೇಲೆ ತಂದೆಯೇ ರೇ*, ತಾಯಿಯಿಂದ ವಿಡಿಯೂ ಶೂಟ್‌!

KannadaprabhaNewsNetwork — Tue, 06 Oct 2026 02:45:00 +0530

ಕಛ್‌: 14 ವರ್ಷದ ಮಗಳು ಗೆಳೆಯನೊಂದಿಗೆ ಮಾತನಾಡುತ್ತಿದ್ದಳು ಎಂಬ ಕಾರಣಕ್ಕೆ ತಂದೆಯೇ ಆಕೆಯ ಮೇಲೆ ಅತ್ಯಾ*ರ ನಡೆಸಿದ ಹಾಗೂ ಹೆತ್ತ ತಾಯಿ ಅದನ್ನು ಚಿತ್ರೀಕರಿಸಿದ ಘಟನೆ ಗುಜರಾತ್‌ನ ಕಛ್‌ ಜಿಲ್ಲೆಯ ಅಂಜರ್‌ ಎಂಬಲ್ಲಿ ನಡೆದಿದೆ. ಬಾಲಕಿ ನೀಡಿದ ದೂರಿನ ಆಧಾರದಲ್ಲಿ ಪೋಕ್ಸೋ ಕಾಯ್ದೆಯಡಿ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಆಗಿದ್ದೇನು?:

ಬಾಲಕಿ ನೀಡಿರುವ ದೂರಿನ ಪ್ರಕಾರ, ಸೆ.14ರಂದು ಆಕೆ ಫೋನ್‌ನಲ್ಲಿ ಆಗ್ರಾದ ಗೆಳೆಯನೊಂದಿಗೆ ಮಾತನಾಡುತ್ತಿದ್ದುದನ್ನು ಗಮನಿಸಿದ ತಾಯಿ ಅದನ್ನು ಪ್ರಶ್ನಿಸಿದ್ದಳು ಹಾಗೂ ಬಳಿಕ ತಂದೆಗೆ ತಿಳಿಸಿದ್ದಳು. ಇದರಿಂದ ಕೋಪಗೊಂಡ ತಂದೆ, ಮಗಳನ್ನು ಕೋಣೆಯೊಂದರಲ್ಲಿ ಕೂಡಿ ಹಾಕಿ ಅನ್ನ, ನೀರು ಕೊಡದೆ ಹಿಂಸಿಸಿದ್ದ.

ತಾಯಿಯ ಉಪಸ್ಥಿತಿಯಲ್ಲೇ ಹಲವು ದಿನ ಲೈಂಗಿಕವಾಗಿ ಶೋಷಿಸಿದ್ದ

ಬಳಿಕ ತಾಯಿಯ ಉಪಸ್ಥಿತಿಯಲ್ಲೇ ಹಲವು ದಿನ ಲೈಂಗಿಕವಾಗಿ ಶೋಷಿಸಿದ್ದ. ಸೆ.29ರಂದು ಬಾಲಕಿ ತನ್ನ ಚಿಕ್ಕಮ್ಮನ ಮನೆಗೆ ಹೋಗಿ 112ಗೆ ಕರೆ ಮಾಡಲು ಯತ್ನಿಸಿದಾಗ ಬೆನ್ನಟ್ಟಿ ಬಂದ ಪೋಷಕರು ಮತ್ತೆ ಆಕೆಯನ್ನು ಕೂಡಿಹಾಕಿದ್ದಾರೆ. ಅ.1ರಂದು ತಂದೆ ಶೋಷಿಸತೊಡಗಿದಾಗ ತಾಯಿ ಅದನ್ನು ಚಿತ್ರೀಕರಿಸಿಕೊಂಡಿದ್ದಾಳೆ. ಆ ದಿನ ಮತ್ತೆ ಚಿಕ್ಕಮ್ಮನ ಮನೆಗೆ ಹೋದ ಬಾಲಕಿ, ಆಕೆಯೆದುರು ಎಲ್ಲವನ್ನೂ ಹೇಳಿದ್ದಾಳೆ. ಚಿಕ್ಕಮ್ಮ ಕೂಡಲೇ ಪೊಲೀಸರನ್ನು ಸಂಪರ್ಕಿಸಿ ದೂರು ನೀಡಿದ್ದಾರೆ. ಸದ್ಯ ಪೋಷಕರನ್ನು ವಶಕ್ಕೆ ಪಡೆಯಲಾಗಿದ್ದು, ತನಿಖೆ ನಡೆಯುತ್ತಿದೆ.

ಈಜಾಡುತ್ತಿದ್ದ ಬಾಲಕನ ಮೇಲೆ ಮೊಸಳೆ ದಾಳಿ: ಕಲ್ಲುಗಳಿಂದ ಹೊಡೆದು ಸ್ನೇಹಿತರಿಂದ ರಕ್ಷಣೆ

KannadaprabhaNewsNetwork — Wed, 07 Oct 2026 02:00:00 +0530

ಶ್ರೀರಂಗಪಟ್ಟಣ : ಈಜುತ್ತಿದ್ದ ಬಾಲಕನ ಮೇಲೆ ಮೊಸಳೆ ದಾಳಿ ನಡೆಸಿದ್ದು ಆತ ಗಂಭೀರವಾಗಿ ಗಾಯಗೊಂಡಿರುವ ಘಟನೆ ತಾಲೂಕಿನ ಪಾಲಹಳ್ಳಿಯ ವಿರಿಜಾ ನಾಲೆಯಲ್ಲಿ ನಡೆದಿದೆ.

ಮಹಾರಾಷ್ಟ್ರ ಮೂಲದ ಬೋರ್ಗಾವ್ ಗ್ರಾಮದ ರತಿರಾಂ ರಾವತ್ ಅವರ ಪುತ್ರ ವಿಶಾಲ್ ರಾವತ್ (13) ಮೊಸಳೆ ದಾಳಿಯಿಂದ ತೀವ್ರವಾಗಿ ಗಾಯಗೊಂಡಿದ್ದು, ಬಾಲಕನ ಕುತ್ತಿಗೆ ಹಾಗೂ ಎದೆ, ಕೈ ಕಾಲು ಗಂಭೀರವಾಗಿ ಗಾಯವಾಗಿದೆ ಎಂದು ತಿಳಿದು ಬಂದಿದೆ.

ಕಬ್ಬು ಕಡಿಯುವ ಕೂಲಿ ಕಾರ್ಮಿಕರಾಗಿರುವ ವಿಶಾಲ್‌ನ ಪೋಷಕರು

ಕಬ್ಬು ಕಡಿಯುವ ಕೂಲಿ ಕಾರ್ಮಿಕರಾಗಿರುವ ವಿಶಾಲ್‌ನ ಪೋಷಕರು ಕೆಲಸಕ್ಕಾಗಿ ಆಗಮಿಸಿ ಕೆಲದಿನಗಳಿಂದ ರಂಗನತಿಟ್ಟು ಪಕ್ಷಿಧಾಮದ ಸಮೀಪ ಜೋಪಡಿ ನಿರ್ಮಿಸಿಕೊಂಡು ಬೀಡು ಬಿಟ್ಟಿದ್ದರು. ವಿಶಾಲ್ ರಾವತ್ ತನ್ನ ನಾಲ್ವರು ಸ್ನೇಹಿತರೊಂದಿಗೆ ಸೋಮವಾರ ವಿರಿಜಾ ನಾಲೆಯಲ್ಲಿ ಈಜಲು ತೆರಳಿದ್ದ ವೇಳೆ ಈ ಘಟನೆ ನಡೆದಿದೆ.

ಸಿಕ್ಕ ಕಲ್ಲುಗಳಿಂದ ನಿರಂತರವಾಗಿ ಹೊಡೆದು ರಕ್ಷಿಸಿದ್ದಾರೆ

ಬಾಲಕನ ಜತೆಗಿದ್ದ ಸ್ನೇಹಿತರು ವಿಶಾಲ್ ಮೇಲೆ ಮೊಸಳೆ ದಾಳಿ ನಡೆಸಿದ ವೇಳೆ ಎದೆಗುಂದದೆ ಕೈಗೆ ಸಿಕ್ಕ ಕಲ್ಲುಗಳಿಂದ ನಿರಂತರವಾಗಿ ಹೊಡೆದು ಮೊಸಳೆಯಿಂದ ವಿಶಾಲ್‌ನನ್ನು ರಕ್ಷಿಸಿದ್ದಾರೆ.

ಬಳಿಕ ಪಟ್ಟಣದ ತಾಲೂಕು ಸಾರ್ವಜನಿಕ ಆಸ್ಪತ್ರೆಯಲ್ಲಿ ವಿಶಾಲ್‌ಗೆ ಪ್ರಾಥಮಿಕ ಚಿಕಿತ್ಸೆ ಕೊಡಿಸಿ ನಂತರ ಮೈಸೂರಿನ ಕೆ.ಆರ್.ಆಸ್ಪತ್ರೆಗೆ ದಾಖಲಿಸಿದ್ದಾರೆ.

ವಿಷಯ ತಿಳಿದು ಬಾಲಕನ ಆರೋಗ್ಯ ವಿಚಾರಿಸಿರುವ ಶ್ರೀರಂಗಪಟ್ಟಣ ವಲಯ ಅರಣ್ಯಾಧಿಕಾರಿಗಳು, ರಂಗನತಿಟ್ಟು ವನ್ಯಜೀವಿ ಅರಣ್ಯ ಸಿಬ್ಬಂದಿಯೊಂದಿಗೆ ವಿರಿಜಾ ನಾಲೆಯಲ್ಲಿ ಬಾಲಕನ ಮೇಲೆ ದಾಳಿ ನಡೆಸಿರುವ ಮೊಸಳೆ ಸೆರೆಗಾಗಿ ಕೂಂಬಿಂಗ್ ಕಾರ್ಯಾಚಣೆ ನಡೆಸಿದ್ದಾರೆ.

ದೆಹಲಿ ಮೂಲದ ವರ್ತಕನಿಂದ ೨೫ ಲಕ್ಷ ರು. ವಂಚನೆ

KannadaprabhaNewsNetwork — Wed, 14 Oct 2026 01:30:00 +0530

ಕನ್ನಡಪ್ರಭ ವಾರ್ತೆ ಮಂಡ್ಯ

ಸ್ಥಳೀಯ ಎಳನೀರು ವರ್ತಕನಿಂದ ಎಳನೀರು ಖರೀದಿಸಿದ ದೆಹಲಿ ಮೂಲದ ವರ್ತಕನೊಬ್ಬ ಹಣ ನೀಡದೆ ೨೫ ಲಕ್ಷಕ್ಕೂ ಹೆಚ್ಚು ಹಣ ವಂಚಿಸಿರುವ ಘಟನೆ ನಡೆದಿದೆ.

ಹಣ ಕೇಳಲು ವರ್ತಕನನ್ನು ಹುಡುಕಿಕೊಂಡು ದೆಹಲಿಗೆ ಹೋದವರಿಗೆ ಗನ್ ತೋರಿಸಿ ಬೆದರಿಕೆ ಹಾಕಿದ್ದಾನೆ. ರೈತರಿಂದ ಎಳನೀರು ಖರೀದಿಸಿರುವ ಸ್ಥಳೀಯ ವರ್ತಕ ಹಣ ನೀಡಲಾಗದೆ ಸಂಕಷ್ಟಕ್ಕೆ ಸಿಲುಕಿದ್ದರೆ, ಇದು ದೆಹಲಿ ಮೂಲದ ವರ್ತಕನೊಂದಿಗೆ ಆಗಿರುವ ಅನಧಿಕೃತ ಒಪ್ಪಂದ. ಇದಕ್ಕೆ ನಾವು ಜವಾಬ್ದಾರರಲ್ಲ ಎಂದು ಎಪಿಎಂಸಿ ಅಧಿಕಾರಿಗಳು ಕೈತೊಳೆದುಕೊಂಡಿದ್ದಾರೆ.

ತಾಲೂಕಿನ ದುದ್ದ ಗ್ರಾಮದ ಎಳನೀರು ವರ್ತಕ ಶರತ್ ಎಂಬುವರೇ ವಂಚನೆಗೊಳಗಾದವರು. ದೆಹಲಿ ಮೂಲದ ಅನಾಮ್ ಹಣ ನೀಡದೆ ವಂಚಿಸಿದವನಾಗಿದ್ದಾನೆ. ಅನಾಮ್ ಕಳೆದ ಎರಡು-ಮೂರು ವರ್ಷಗಳಿಂದ ಶರತ್ ಅವರೊಂದಿಗೆ ಎಳನೀರು ವ್ಯವಹಾರ ನಡೆಸುತ್ತಿದ್ದನು. ಹಲವಾರು ಬಾರಿ ಒಂದೆರಡು ಲೋಡ್ ಎಳನೀರು ಖರೀದಿಸಿ ಸಕಾಲದಲ್ಲಿ ಹಣ ಕೊಟ್ಟು ನಂಬಿಕೆ ಹುಟ್ಟುವಂತೆ ಮಾಡಿದ್ದನು ಎನ್ನಲಾಗಿದೆ.

ಕಳೆದ ವಾರ ಮಂಡ್ಯಕ್ಕೆ ಬಂದಿದ್ದ ಅನಾಮ್ ನಗರದ ಖಾಸಗಿ ಹೋಟೆಲ್‌ನಲ್ಲಿ ವಾಸ್ತವ್ಯ ಹೂಡಿದ್ದನು. ಈ ವೇಳೆ ಶರತ್‌ನನ್ನು ಭೇಟಿ ಮಾಡಿದ ಅನಾಮ್ ಈಗ ಎಳನೀರಿಗೆ ಒಳ್ಳೆಯ ಬೇಡಿಕೆ ಇದೆ. ನನಗೆ ಆರೇಳು ಲೋಡ್ ಎಳನೀರು ಬೇಕೆಂದು ಬೇಡಿಕೆ ಇಟ್ಟನು. ಹಿಂದೆ ಅನಾಮ್ ಹಣ ಕೊಟ್ಟು ನಂಬಿಕೆ ಉಳಿಸಿಕೊಂಡಿದ್ದರಿಂದ ಅವನ ಎಳನೀರು ಬೇಡಿಕೆಯನ್ನು ಶರತ್ ಸುಲಭವಾಗಿ ಒಪ್ಪಿಕೊಂಡರು. ನಾನು ಕಳುಹಿಸುವ ಲಾರಿಗಳಲ್ಲಿ ಎಳನೀರು ಲೋಡ್ ಕಳುಹಿಸಿದರೆ ಹಣ ಪಾವತಿಸುವುದಾಗಿ ಹೇಳಿ ದೆಹಲಿಗೆ ಅನಾಮ್ ತೆರಳಿದ್ದನು.

ಅನಾಮ್ ನೀಡಿದ ಮಾತಿನಂತೆ ಶರತ್ ರೈತರಿಂದ ಸಾಲದ ಮೇಲೆ, ನಗದು ರೂಪದಲ್ಲೂ ಎಳನೀರು ಖರೀದಿಸಿ ದೆಹಲಿಗೆ ಸುಮಾರು ೩೩ ಲಕ್ಷ ರು. ಮೌಲ್ಯದ ಎಳನೀರನ್ನು ಸರಬರಾಜು ಮಾಡಿದ್ದರು. ಅದರಲ್ಲಿ ಸುಮಾರು ಏಳೆಂಟು ಲಕ್ಷ ರು. ಹಣವನ್ನೂ ಅನಾಮ್ ಪಾವತಿ ಮಾಡಿದ್ದನು. ಕೊನೆಯ ಲಾರಿಗೆ ಎಳನೀರು ಲೋಡ್ ಮಾಡುವ ಸಮಯಕ್ಕೆ ಬಾಕಿ ಹಣಕ್ಕೆ ಶರತ್ ಬೇಡಿಕೆ ಇಟ್ಟಾಗ ಅನಾಮ್ ನಾನು ಕಷ್ಟದಲ್ಲಿದ್ದೇನೆ. ಸದ್ಯಕ್ಕೆ ಹಣ ಪಾವತಿಸುವುದಕ್ಕೆ ಸಾಧ್ಯವಿಲ್ಲವೆಂದು ಹಿಂದೇಟು ಹಾಕಿದ್ದಾನೆ. ಶರತ್ ಅವರ ಫೋನ್ ಕರೆಗಳನ್ನು ಸ್ವೀಕರಿಸದೆ ನಿರ್ಲಕ್ಷ್ಯ ವಹಿಸಿದನು.

ಗನ್ ತೋರಿಸಿ ಬೆದರಿಕೆ:

ಶರತ್ ತಮ್ಮ ಪರಿಚಿತರನ್ನು ದೆಹಲಿಗೆ ಕಳುಹಿಸಿ ಅನಾಮ್‌ನನ್ನು ಭೇಟಿ ಮಾಡಿದಾಗ ಮಾರುಕಟ್ಟೆಯಲ್ಲಿ ಬೇಡಿಕೆ ಕಡಿಮೆ ಇದೆ ಎಂದು ಸಬೂಬು ಹೇಳಿದನು. ಅಷ್ಟೇ ಅಲ್ಲದೇ, ನಾನೊಬ್ಬನೇ ಮೋಸ ಮಾಡಿಲ್ಲ, ಎಲ್ಲರೂ ಮಾಡಿದ್ದಾರೆ, ನಾನ್ಯಾಕೆ ಹಣ ಕೊಡಲಿ. ಏನು ಬೇಕಾದರೂ ಮಾಡಿಕೊಳ್ಳಿ ಎಂದಿದ್ದಾನೆ. ಹಣಕ್ಕೆ ತೀವ್ರವಾಗಿ ಬೇಡಿಕೆ ಇಟ್ಟಾಗ ದೆಹಲಿಗೆ ತೆರಳಿದ್ದವರಿಗೆ ಅನಾಮ್ ಗನ್ ತೋರಿಸಿ ಬೆದರಿಕೆ ಹಾಕಿದ್ದಾನೆ ಎಂದು ಆರೋಪಿಸಲಾಗಿದೆ.

ಇದರಿಂದ ಎಚ್ಚೆತ್ತ ಶರತ್ ಮತ್ತು ಇತರರು ಎಳನೀರು ತುಂಬಿದ್ದ ಕೊನೆಯ ಲೋಡ್ ಲಾರಿಯನ್ನು ಬಿಡದೆ ಅಡ್ಡಗಟ್ಟಿ ನಿಲ್ಲಿಸಿದರು. ಅತ್ತ ಮಾರಿದ ಎಳನೀರಿಗೆ ಹಣವೂ ಸಿಗದೆ, ಇತ್ತ ರೈತರಿಗೆ ಬಟವಾಡೆ ಮಾಡಲಾಗದೆ ಶರತ್ ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಸರಣಿ ಹಬ್ಬಗಳ ಹಿನ್ನೆಲೆಯಲ್ಲಿ ರೈತರು ಬಾಕಿ ಹಣಕ್ಕಾಗಿ ನಿರಂತರ ಒತ್ತಡ ಹೇರುತ್ತಿದ್ದು, ದಿಕ್ಕು ತೋಚದ ವರ್ತಕ ಶರತ್ ರೈತ ಸಂಘಟನೆಗಳ ಬೆಂಬಲದೊಂದಿಗೆ ಮೊದಲು ಸುಂಡಹಳ್ಳಿ ಮಾರುಕಟ್ಟೆ ಎದುರು ಮತ್ತು ನಂತರ ೨೦ಕ್ಕೂ ಹೆಚ್ಚು ಎಳನೀರು ವಾಹನಗಳೊಂದಿಗೆ ಬಂದು ಮಂಡ್ಯ ಎಸ್ಪಿ ಕಚೇರಿ ಎದುರು ಪ್ರತಿಭಟನೆ ನಡೆಸಿದರು.

ಪ್ರತಿಭಟನೆಯಲ್ಲಿ ರೈತ ಸಂಘದ ಮುಖಂಡರಾದ ಶಿವಳ್ಳಿ ಚಂದ್ರಶೇಖರ್, ಗೋಪಾಲಪುರ ಸುರೇಶ್, ಶ್ರೀರಂಗಪಟ್ಟಣ ರೈತ ಸಂಘದ ಜವರೇಗೌಡ ಹಾಗೂ ಇತರರು ಭಾಗವಹಿಸಿದ್ದರು. ಸ್ಥಳಕ್ಕೆ ಆಗಮಿಸಿದ ಗ್ರಾಮಾಂತರ ಠಾಣೆ ಸಿಪಿಐ ಪ್ರಕಾಶ್ ಅವರು ದೂರು ಪಡೆದು, ಆರೋಪಿ ಪತ್ತೆಗೆ ಸೂಕ್ತ ಕ್ರಮ ಕೈಗೊಳ್ಳುವ ಭರವಸೆ ನೀಡಿದ್ದಾರೆ.

ಅನಾಮ್ ನನಗೆ ಎರಡು ವರ್ಷಗಳಿಂದ ಪರಿಚಯವಿದ್ದ. ಹಲವು ಬಾರಿ ಎರಡು-ಮೂರು ಲೋಡ್ ಎಳನೀರು ಪಡೆದು ಹಣವನ್ನೂ ಕೊಟ್ಟಿದ್ದ. ಅದೇ ನಂಬಿಕೆಯೊಂದಿಗೆ ಈ ಬಾರಿಯೂ ಏಳೆಂಟು ಲೋಡ್ ಎಳನೀರು ಕಳುಹಿಸಿದ್ದೆ. ಒಟ್ಟು ೩೩ ಲಕ್ಷ ರು. ಹಣದಲ್ಲಿ ೭ ರಿಂದ ೮ ಲಕ್ಷ ರು. ಕೊಟ್ಟಿದ್ದಾನೆ. ಉಳಿಕೆ ಹಣ ನೀಡದೆ ಸತಾಯಿಸುತ್ತಿದ್ದು, ಕೊನೆಯ ಲೋಡ್ ಲಾರಿ ಕಳುಹಿಸದೆ ಹಿಡಿದಿಟ್ಟುಕೊಂಡಿದ್ದೇನೆ. ಹಣ ಕೊಡುವವರೆಗೆ ಲಾರಿಯನ್ನು ಬಿಡುವುದಿಲ್ಲ.

- ಶರತ್, ಸ್ಥಳೀಯ ಎಳನೀರು ವರ್ತಕಶರತ್ ಎಪಿಎಂಸಿ ಪರವಾನಗಿ ಪಡೆದಿರುವ ವರ್ತಕ. ಅನಾಮ್ ಯಾರೋ ನಮಗೆ ಗೊತ್ತಿಲ್ಲ. ಶರತ್ ಮತ್ತು ಅನಾಮ್ ನಡುವೆ ನಡೆದಿರುವುದು ಅನಧಿಕೃತ ವ್ಯವಹಾರ. ನಾವು ಹೊರರಾಜ್ಯದ ಯಾವುದೇ ವರ್ತಕರಿಗೆ ಪರವಾನಗಿ ಕೊಟ್ಟಿಲ್ಲ. ವ್ಯವಹಾರವನ್ನೂ ನಡೆಸುತ್ತಿಲ್ಲ. ಸ್ಥಳೀಯ ನೋಂದಾಯಿತ ವರ್ತಕರು ಮಾತ್ರ ವ್ಯವಹಾರ ನಡೆಸುತ್ತಿದ್ದಾರೆ. ಹಾಗಾಗಿ ಈ ವ್ಯವಹಾರಕ್ಕೂ ನಮಗೂ ಯಾವುದೇ ಸಂಬಂಧವಿಲ್ಲ

-ಶ್ರೀಹರಿ, ಕಾರ್ಯದರ್ಶಿ, ಎಪಿಎಂಸಿ

ಸಾಲಬಾಧೆ: ನಾಲೆಗೆ ಹಾರಿ ರೈತ ಆತ್ಮಹತ್ಯೆ

KannadaprabhaNewsNetwork — Fri, 09 Oct 2026 01:45:00 +0530

ಶ್ರೀರಂಗಪಟ್ಟಣ:

ಸಾಲ ಬಾಧೆ ತಾಳಲಾರದೆ ರೈತ ವಿಶ್ವೇಶ್ವರಯ್ಯ ನಾಲೆಗೆ ಹಾರಿ ಆತ್ಮಹತ್ಯೆಗೆ ಶರಣಾಗಿರುವ ಘಟನೆ ನಡೆದಿದ್ದು, ಮಂಡ್ಯ ತಾಲೂಕು ಶಿವಳ್ಳಿ ಸಮೀಪದ ತಿಬ್ಬನಹಳ್ಳಿ ಬಳಿ ಶವ ಪತ್ತೆಯಾಗಿದೆ.

ತಾಲೂಕಿನ ಚಿಹ್ನೇನಹಳ್ಳಿಯ ನೇರಳಯ್ಯ ಸಣ್ಣಪ್ಪನವರ ಪುತ್ರ ನಾಗರಾಜು (51) ಮೃತ ರೈತ. ಮೃತ ನಾಗರಾಜುವಿಗೆ ಪತ್ನಿ, ಓರ್ವ ಪುತ್ರ ಮತ್ತು ಪುತ್ರಿ ಇದ್ದಾರೆ.

ನಾಗರಾಜು ಸ್ವಗ್ರಾಮದ ತಮ್ಮ 2 ಎಕರೆ ಜಮೀನಿನಲ್ಲಿ ಕೃಷಿ ಮಾಡಿಕೊಂಡಿದ್ದರು. ಕಬ್ಬು ಬೆಳೆಯಲು ತಾಲೂಕಿನ ಬಲ್ಲೇನಹಳ್ಳಿಯ ಎಂಡಿಸಿಸಿ ಬ್ಯಾಂಕ್, ಕೆ.ಶೆಟ್ಟಹಳ್ಳಿ ಕೆನರಾ ಬ್ಯಾಂಕ್‌ನಲ್ಲಿ ಚಿನ್ನದ ಮೇಲೆ ಸಾಲ ಹಾಗೂ ಎಂ.ಶೆಟ್ಟಹಳ್ಳಿ ವ್ಯವಸಾಯ ಸೇವಾ ಸಹಕಾರ ಬ್ಯಾಂಕ್, ಸ್ತ್ರೀ ಶಕ್ತಿ ಸ್ವ-ಸಹಾಯ ಸಂಘಗಳು ಸೇರಿದಂತೆ ವಿವಿಧೆಡೆ ಕೈಸಾಲ ಸೇರಿ ಸುಮಾರು 8 ಲಕ್ಷ ರು ವರೆಗೂ ಸಾಲ ಮಾಡಿಕೊಂಡಿದ್ದರು ಎಂದು ತಿಳಿದುಬಂದಿದೆ.

ತೀವ್ರ ಕಷ್ಟ ಅನುಭವಿಸಿದ್ದ ಇವರು ಬಡ್ಡಿ ಹಣ ಕಟ್ಟುವ ಸಲುವಾಗಿ ಕೆಲ ತಿಂಗಳುಗಳಿಂದ ತಮ್ಮ ಸುತ್ತಮುತ್ತಲ ವಿವಿಧ ಹಳ್ಳಿಗಳ ಸಂಚರಿಸಿ ಕಾಫಿ-ಚಹಾ ಪುಡಿ ಮಾರುತ್ತಿದ್ದರು ಎನ್ನಲಾಗಿದೆ.

ಕಳೆದ ಅ.6ರಂದು ಪಾಂಡವಪುರ ತಾಲೂಕಿನ ಗಾಣದ ಹೊಸೂರು ಸಮೀಪದ ವಿ.ಸಿ.ನಾಲೆ ಬಳಿ ತಮ್ಮ ದ್ವಿಚಕ್ರ ವಾಹನ ನಿಲ್ಲಿಸಿ ಈತ ನಾಪತ್ತೆಯಾಗಿದ್ದರು. ತೀವ್ರ ಹುಡುಕಾಟದ ಬಳಿಕ ಶಿವಳ್ಳಿ ಸಮೀಪದ ತಿಬ್ಬನಹಳ್ಳಿ ಗ್ರಾಮ ಸಮೀಪ ನಾಲೆಯಲ್ಲಿ ಗುರುವಾರ ರೈತನ ಶವ ದೊರೆತಿದೆ. ಈ ಸಂಬಂಧ ಶಿವಳ್ಳಿ ಗ್ರಾಮೀಣ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಮರಣೋತ್ತರ ಪರೀಕ್ಷೆ ಬಳಿಕ ವಾರಸುದಾರರಿಗೆ ಶವ ಹಸ್ತಾಂತರಿಸಲಾಗಿದೆ.

ಕೆ.ಆರ್.ಪೇಟೆ: ಪ್ರಿಯಕರನ ಜೊತೆ ಸೇರಿ ಮೊಮ್ಮಗಳಿಂದ ಅಜ್ಜಿ ಕೊಲೆ

KannadaprabhaNewsNetwork — Tue, 13 Oct 2026 01:45:00 +0530

ಕನ್ನಡಪ್ರಭ ವಾರ್ತೆ ಕೆ.ಆರ್.ಪೇಟೆ

ಪ್ರೀತಿಗೆ ಅಡ್ಡಿಯಾದ ಹಿನ್ನೆಲೆಯಲ್ಲಿ ಪ್ರಿಯಕರನ ಜೊತೆ ಸೇರಿ ಅಪ್ರಾಪ್ತೆ ಮೊಮ್ಮಗಳು ತನ್ನ ಅಜ್ಜಿಯನ್ನು ಕೊಲೆ ಮಾಡಿರುವ ಘಟನೆ ತಾಲೂಕಿನ ಬೂಕನಕೆರೆ ಗ್ರಾಮದಲ್ಲಿ ಬೆಳಕಿಗೆ ಬಂದಿದೆ.

ಗ್ರಾಮದ ದಿ.ನಾಗೇಗೌಡರ ಪತಿ ಮಹದೇವಮ್ಮ(50) ತನ್ನ ಮೊಮ್ಮಗಳಿಂದಲೇ ಹತ್ಯೆಯಾದ ದುರ್ದೈವಿ. ಪ್ರಥಮ ಪಿಯುಸಿ ಓದುತ್ತಿರುವ ವಿದ್ಯಾರ್ಥಿನಿ (16), ಆಕೆಯ ಪ್ರಿಯಕರ ಆಕಾಶ್ (28) ಕೊಲೆ ಆರೋಪಿಗಳು.

ಗ್ರಾಮದ ಬಾಲಕಿ ಮತ್ತು ತಾಲೂಕಿನ ಬೆಳತೂರು ಗ್ರಾಮದ ಆಕಾಶ್ ಪರಸ್ಪರ ಪ್ರೀತಿಸುತ್ತಿದ್ದರು. ಇದಕ್ಕೆ ಅಜ್ಜಿ ಮಹದೇವಮ್ಮ ಅವರ ವಿರೋಧವಿತ್ತು. ಈ ಹಿಂದೆ ಆಕಾಶ್ ಮತ್ತು ಮಹದೇವಮ್ಮ ಅವರ ನಡುವೆ ಗಲಾಟೆಯಾಗಿತ್ತು ಎಂದು ತಿಳಿದು ಬಂದಿದೆ.

ಅಜ್ಜಿ ಮಹದೇವಮ್ಮ ಆಕಾಶನ ಜೊತೆಗಿನ ಸಂಬಂಧ ಬಿಡಿಸಲು ಮೊಮ್ಮಳಿಗೆ ಬೇರೊಂದು ಕಡೆ ಸಂಬಂಧ ಹುಡುಕುವ ಸಿದ್ಧತೆಯಲ್ಲಿದ್ದರು ಎಂದು ಹೇಳಲಾಗಿದೆ. ಇದರಿಂದ ಅಸಮಾಧಾನಗೊಂಡು ಬಾಲಕಿ ಪ್ರಿಯಕರನ ಜೊತೆ ಸೇರಿ ಅಜ್ಜಿ ಮಹದೇವಮ್ಮ ಅವರನ್ನು ಮುಗಿಸಲು ಸ್ಕೆಚ್ ಹಾಕಿದ್ದಾರೆ.

ಶನಿವಾರ ಮಹಾಲಯ ಅಮಾವಾಸ್ಯೆ ದಿನ ಮೊಮ್ಮಗಳು ಪಾಂಡವಪುರ ತಾಲೂಕಿನ ಡಿಂಕಾ ಗ್ರಾಮದ ತನ್ನ ತಾಯಿ ತವರು ಮನೆಗೆ ಹಬ್ಬಕ್ಕೆ ಹೋಗಿದ್ದಾರೆ. ಅದೇ ದಿನ ರಾತ್ರಿ ಬೂಕನಕೆರೆಯ ಅಜ್ಜಿ ಮನೆಗೆ ಹಿಂತಿರುಗಿದ್ದಾಳೆ. ರಾತ್ರಿ ಫೋನ್ ಮಾಡಿ ತನ್ನ ಪ್ರಿಯಕರ ಆಕಾಶನನ್ನು ಮನೆಗೆ ಕರೆಯಿಸಿಕೊಂಡು ಆತನ ಜೊತೆ ಸೇರಿ ಅಜ್ಜಿಯನ್ನು ಹೊಡೆದು ಸಾಯಿಸಿದ್ದಾರೆ.

ಅಜ್ಜಿ ಕೊಲೆ ಮಾಡಿದ ನಂತರ ಪ್ರಿಯಕರ ಆಕಾಶ್ ಸ್ಥಳದಿಂದ ಪರಾರಿಯಾಗಿದ್ದಾನೆ. ಮೊಮ್ಮಗಳು ಏನೂ ಗೊತ್ತಿಲ್ಲದಂತೆ ಮನೆಯಲ್ಲಿದ್ದಾಳೆ. ಭಾನುವಾರ ಬೆಳಗ್ಗೆ ಮತ್ತೊಬ್ಬ ಅಜ್ಜಿ ಮನೆಗೆ ಬಂದು ಮಹದೇವಮ್ಮರನ್ನು ನೋಡಿದಾಗ ಮಲಗಿದ್ದ ಸ್ಥಿತಿಯಲ್ಲಿಯೇ ಸತ್ತಿರುವುದು ಬೆಳಕಿಗೆ ಬಂದಿದೆ.

ಮಹದೇವಮ್ಮ ಕೊಲೆ ವಿಚಾರ ತಿಳಿಯುತ್ತಿದ್ದಂತೆಯೇ ಸ್ಥಳಕ್ಕೆ ಆಗಮಿಸಿದ ಕೆ.ಆರ್.ಪೇಟೆ ಗ್ರಾಮಾಂತರ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಆರಂಭಿಸಿದ್ದಾರೆ. ಬಾಲಕಿಯನ್ನು ವಶಕ್ಕೆ ಪಡೆದಿರುವ ಪೊಲೀಸರು ಪರಾರಿಯಾಗಿರುವ ಮತ್ತೊಬ್ಬ ಆರೋಪಿ ಆಕಾಶ್ ಪತ್ತೆಗೆ ಬಲೆ ಬೀಸಿದ್ದಾರೆ. ಶವವನ್ನು ಮರಣೋತ್ತರ ಪರೀಕ್ಷೆಗಾಗಿ ಮಂಡ್ಯದ ವಿಮ್ಸ್ ಆಸ್ಪತ್ರಗೆ ಕಳುಹಿಸಲಾಗಿದೆ.ಕೇರಳದಲ್ಲಿ ಮಂಡ್ಯ ವಿವಿ ವಿದ್ಯಾರ್ಥಿಗಳಿಬ್ಬರು ಸಾವು

ಕನ್ನಡಪ್ರಭ ವಾರ್ತೆ ಮಂಡ್ಯಕೇರಳದಲ್ಲಿ ಸಂಭವಿಸಿದ ವಾಹನ ಅಪಘಾತದಲ್ಲಿ ಮಂಡ್ಯ ವಿಶ್ವವಿದ್ಯಾನಿಲಯದ ಇಬ್ಬರು ವಿದ್ಯಾರ್ಥಿಗಳು ಮೃತಪಟ್ಟಿರುವ ಘಟನೆ ನಡೆದಿದೆ. ವಯನಾಡ್‌ನ ಸುಲ್ತಾನ್ ಬತ್ತೇರಿಯಲ್ಲಿ ಪ್ರವಾಸಕ್ಕೆ ತೆರಳಿದ್ದ ವಾಹನ ಚಾಲಕನ ನಿಯಂತ್ರಣ ತಪ್ಪಿ ಉರುಳಿಬಿದ್ದಿದ್ದರಿಂದ ಈ ದುರ್ಘಟನೆ ಸಂಭವಿಸಿದೆ.

ಮಂಡ್ಯ ವಿಶ್ವವಿದ್ಯಾನಿಲಯದ ಭರತ್ ಮತ್ತು ರಂಜಿತ್ ಮೃತಪಟ್ಟವರು. ೧೫ ಮಂದಿ ಕೇರಳದ ವಿವಿಧೆಡೆಗೆ ಪ್ರವಾಸ ತೆರಳಿ ವಾಪಸಾಗುತ್ತಿದ್ದರು. ವಾಹನವು ಸುಲ್ತಾನ್ ಬತ್ತೇರಿಯ ೫೪ನೇ ಮೈಲಿಯಲ್ಲಿ ತಡರಾತ್ರಿ ೧.೩೦ರ ವೇಳೆಗೆ ಉರುಳಿಬಿದ್ದಿದೆ. ಸ್ಥಳೀಯರು ಕೂಡಲೇ ವಾಹನದಲ್ಲಿದ್ದವರ ರಕ್ಷಣೆಗೆ ಧಾವಿಸಿ ಕಾರ್ಯಾಚರಣೆ ನಡೆಸಿದರು. ವಾಹನವು ನಜ್ಜುಗಜ್ಜಾಗಿದ್ದು ಎಲ್ಲರನ್ನೂ ರಕ್ಷಿಸಲು ಸಾಧ್ಯವಾಗಿಲ್ಲ. ಬಳಿಕ ಅಗ್ನಿಶಾಮಕದಳದವರು ಸ್ಥಳಕ್ಕೆ ಆಗಮಿಸಿ ವಾಹನದ ಭಾಗಗಳನ್ನು ತುಂಡರಿಸಿ ಒಳಗೆ ಸಿಲುಕಿದ್ದವರನ್ನು ಸಮೀಪದ ಆಸ್ಪತ್ರೆಗೆ ದಾಖಲಿಸಿದರು. ರಕ್ಷಣೆ ಮಾಡಲಾದವರ ಪೈಕಿ ಮೂವರ ಸ್ಥಿತಿ ಗಂಭೀರವಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಹಳೇದ್ವೇಷ: ಮಾಲೀಕನ ಮೇಲೆ ಗುಂಡು ಹಾರಿಸಿದ ಕಾರು ಚಾಲಕ

KannadaprabhaNewsNetwork — Thu, 15 Oct 2026 03:45:00 +0530

ಕನ್ನಡಪ್ರಭ ವಾರ್ತೆ ಬೆಂಗಳೂರು

ಹಳೇ ದ್ವೇಷದ ಹಿನ್ನೆಲೆಯಲ್ಲಿ ಕಾರು ಚಾಲಕನ ಮೇಲೆ ಮಾಲೀಕ ಪಿಸ್ತೂಲ್‌ನಿಂದ ಕಾಲಿಗೆ ಗುಂಡು ಹಾರಿಸಿರುವ ಘಟನೆ ಕೋಣನಕುಂಟೆ ಪೊಲೀಸ್‌ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದೆ.

ವೀವರ್ಸ್ ಕಾಲೋನಿ ನಿವಾಸಿ ಶ್ರೀನಿವಾಸ್‌ ಅಲಿಯಾಸ್‌ ಮೆಂಟಲ್ ಸೀನ ಗಾಯಗೊಂಡವರು. ಗೊಟ್ಟಿಗೆರೆ ನಿವಾಸಿ ಸಂಪಂಗಿ (54) ಗುಂಡು ಹಾರಿಸಿದವನು.

ಈ ಘಟನೆಯ ಸಂಬಂಧ ಪ್ರಕರಣ ದಾಖಲಿಸಿಕೊಂಡು ಕ್ಷಿಪ್ರ ಕಾರ್ಯಾಚರಣೆ ನಡೆಸಿದ ಪೊಲೀಸರು ಸಂಪಂಗಿ ಎಂಬಾತನನ್ನು ಬಂಧಿಸಿ ವಿಚಾರಣೆ ನಡೆಸಿದ್ದಾರೆ.

ಸಂಪಗಿ ಅವರ ಬಳಿ ಕಳೆದ ಕೆಲವು ವರ್ಷಗಳಿಂದ ಕಾರು ಚಾಲಕನಾಗಿ ಶ್ರೀನಿವಾಸ್ ಕಾರ್ಯನಿರ್ವಹಿಸುತ್ತಿದ್ದು, ಕಳೆದ ಒಂದು ವರ್ಷದಿಂದ ಇಬ್ಬರ ಮಧ್ಯೆ ಯಾವುದೋ ವಿಚಾರಕ್ಕೆ ಮನಸ್ತಾಪವಾಗಿದ್ದು, ಶ್ರೀನಿವಾಸ್ ಮೇಲೆ ಸಂಪಗಿ ಪ್ರಕರಣವೊಂದನ್ನು ದಾಖಲಿಸಿದ್ದ. ಅದು ತನಿಖೆಯ ಹಂತದಲ್ಲಿದೆ. ಈ ಮಧ್ಯೆ ಆರು ತಿಂಗಳ ಹಿಂದೆ ಕಾರು ಚಾಲಕ ಶ್ರೀನಿವಾಸ್‌ನನ್ನು ಕೆಲಸದಿಂದ ತೆಗೆದು ಹಾಕಲಾಗಿತ್ತು. ಇದರಿಂದ ಆತ ಆಕ್ರೋಶಗೊಂಡಿದ್ದ.

ಬುಧವಾರ ಸಂಜೆ 7 ಗಂಟೆಯ ಸುಮಾರಿಗೆ ಪಿಳ್ಳಗಾನಹಳ್ಳಿ ನೈಸ್ ಬ್ರಿಡ್ಜ್ ಬಳಿ ತನ್ನ ಮೂವರು ಸಹಚರರೊಂದಿಗೆ ಆಗಮಿಸಿ ಶ್ರೀನಿವಾಸ್‌ನೊಂದಿಗೆ ಮಾತುಕತೆಯಲ್ಲಿ ತೊಡಗಿದ್ದ. ಈ ವೇಳೆ ಮಾತಿಗೆ ಮಾತು ಬೆಳೆದು ಗಲಾಟೆ ವಿಕೋಪಕ್ಕೆ ಹೋಗಿದೆ. ಈ ವೇಳೆ ಪರವಾನಗಿ ಇದ್ದ ಪಿಸ್ತೂಲ್‌ನಿಂದ ಸಂಪಗಿ ಶ್ರೀನಿವಾಸ್‌ ಮೇಲೆ ಮೂರು ಬಾರಿ ಫೈರಿಂಗ್‌ ಮಾಡಿದ್ದು, ಅದರಲ್ಲಿ ಒಂದು ಗುಂಡು ಶ್ರೀನಿವಾಸ್ ಕಾಲಿಗೆ ತಗುಲಿದೆ. ಗಾಯಗೊಂಡಿದ್ದ ಶ್ರೀನಿವಾಸ್‌ ರಕ್ತದ ಮಡುವಿನಲ್ಲಿ ಬಿದ್ದು ಒದ್ದಾಡುತ್ತಿರುವುದನ್ನು ಕಂಡ ಸ್ಥಳೀಯರು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ವಿಷಯ ತಿಳಿದು ಸ್ಥಳಕ್ಕೆ ದೌಡಾಯಿಸಿದ ಕೋಣನಕುಂಟೆ ಠಾಣೆ ಪೊಲೀಸರು ಪರಿಶೀಲನೆ ನಡೆಸಿ ಗಾಯಗೊಂಡವರನ್ನು ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಪ್ರಕರಣ ದಾಖಲಿಸಿ ಆರೋಪಿ ಸಂಪಗಿಯನ್ನು ಬಂಧಿಸಿ ವಿಚಾರಣೆ ನಡೆಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಫೋಟೊ))) ಸಿಟಿ))) ಫೈರ್-1,2)))

ಜನ್ಮದಿನಾಂಕ ಮರೆಮಾಚಿ ಅಕ್ರಮ ಗುತ್ತಿಗೆ ನೇಮಕಾತಿ..!

KannadaprabhaNewsNetwork — Sun, 18 Oct 2026 02:30:00 +0530

ಕನ್ನಡಪ್ರಭ ವಾರ್ತೆ ಮಂಡ್ಯ

ನೈಜ ಜನ್ಮದಿನಾಂಕ ದೃಢಪಡಿಸಲು ಎಸ್ಸೆಸ್ಸೆಲ್ಸಿ ಅಂಕಪಟ್ಟಿ ಸಲ್ಲಿಸುವಂತೆ ಮಿಮ್ಸ್ ನಿರ್ದೇಶಕರು ಸಾರ್ವಜನಿಕ ಸಂಪರ್ಕಾಧಿಕಾರಿ ಕೆ.ಡಿ.ಮಾದೇಗೌಡ ಅವರಿಗೆ ಅಂತಿಮ ನೋಟಿಸ್ ಜಾರಿಗೊಳಿಸಿದ್ದು, ಇದೇ ವಿಚಾರಕ್ಕೆ ಸಂಬಂಧಿಸಿದಂತೆ ಆರೋಗ್ಯ ಇಲಾಖೆಯಲ್ಲಿ ಎಚ್‌ಐವಿ ಮೇಲ್ವಿಚಾರಕರಾಗಿದ್ದ ಸಮಯದಲ್ಲೂ ಕೆ.ಡಿ.ಮಾದೇಗೌಡರು ಜನ್ಮದಿನಾಂಕದ ನೈಜ ದಾಖಲೆ ಸಲ್ಲಿಸದಿರುವ ಸಂಗತಿ ಇದೀಗ ಬೆಳಕಿಗೆ ಬಂದಿದೆ.

ಭೂತನಹೊಸೂರು ಗ್ರಾಮದ ರಾಜೇಗೌಡ ಅವರು ೨೦೨೨ರಲ್ಲಿ ಆರೋಗ್ಯ ಇಲಾಖೆಗೆ ದೂರು ಸಲ್ಲಿಸಿ ಕೆ.ಡಿ.ಮಾದೇಗೌಡ ಅವರು ತಮ್ಮ ಜನ್ಮದಿನಾಂಕದಲ್ಲಿ ೪ ವರ್ಷ ೧೦ ತಿಂಗಳು ಕಡಿತಗೊಳಿಸಿ ಗುತ್ತಿಗೆ ಆಧಾರದ ಮೇಲೆ ನೇಮಕಾತಿ ಹೊಂದಿ ವೇತನ ಪಡೆಯುತ್ತಿದ್ದಾರೆ ಎಂದು ಆರೋಪಿಸಿದ್ದರು.

ಈ ದೂರಿನ ಬಗ್ಗೆ ಅಂದಿನ ಜಿಪಂ ಸಿಇಒ ಅವರು ತಾಲೂಕು ಪಂಚಾಯ್ತಿ ಕಾರ್ಯನಿರ್ವಾಹಕ ಅಧಿಕಾರಿ ಮತ್ತು ದಕ್ಷಿಣ ವಲಯ ಕ್ಷೇತ್ರ ಶಿಕ್ಷಣಾಧಿಕಾರಿಗಳ ನೇತೃತ್ವದಲ್ಲಿ ಜಂಟಿ ತಪಾಸಣೆಗೆ ಸೂಚಿಸಿದ್ದರು. ಆನಂತರ ನಡೆಸಿದ ತಪಾಸಣೆಯಲ್ಲಿ ಕೆ.ಡಿ.ಮಾದೇಗೌಡ ಅವರು ತಗ್ಗಹಳ್ಳಿ ಸರ್ಕಾರಿ ಪ್ರೌಢಶಾಲೆಯಲ್ಲಿ ೧೨.೬.೧೯೮೨ರಂದು ಎಂಟನೇ ತರಗತಿಗೆ ದಾಖಲಾಗಿದ್ದು, ಆ ದಾಖಲಾತಿಯಲ್ಲಿ ಮೂಲ ಜನ್ಮದಿನಾಂಕ ೪.೨.೧೯೬೮ ಎಂದು ನಮೂದಾಗಿರುವುದು ಕಂಡುಬಂದಿದೆ. ಆದರೆ, ಶಾಲಾ ದಾಖಲಾತಿಯಲ್ಲಿರುವ ಜನ್ಮದಿನಾಂಕವನ್ನು ೪.೨.೧೯೬೮ ಎಂಬುದಕ್ಕೆ ಬದಲಾಗಿ ೪.೧೨.೧೯೭೨ ಎಂದು ಕೆಂಪುಶಾಹಿಯಲ್ಲಿ ತಿದ್ದುಪಡಿ ಮಾಡಿರುವುದು ಕಂಡುಬಂದಿತ್ತು.

೨೩.೭.೨೦೦೮ರಲ್ಲಿ ಕಡ್ಡಾಯ ಪ್ರಾಥಮಿಕ ಶಿಕ್ಷಣದನ್ವಯ ೫ ವರ್ಷ ೧೦ ತಿಂಗಳಿಗೆ ೧ನೇ ತರಗತಿ ಪ್ರವೇಶ ಪಡೆಯಲು ಅವಕಾಶವಿದ್ದು, ನ್ಯಾಯಾಲಯದ ತೀರ್ಪಿನ ಆದೇಶನ್ವಯ ತಿದ್ದುಪಡಿ ಮಾಡಿದ್ದಲ್ಲಿ ೨ ವರ್ಷ ೭ ತಿಂಗಳಿಗೆ ಒಂದನೇ ತರಗತಿ ಪ್ರವೇಶ ಪಡೆದಂತಾಗುತ್ತದೆ. ಇದು ಕಡ್ಡಾಯ ಪ್ರಾಥಮಿಕ ಶಿಕ್ಷಣ ನಿಯಮಕ್ಕೆ ವಿರುದ್ಧವಾಗಿರುತ್ತದೆ ಎಂದು ತಿಳಿಸಿ ತಿದ್ದುಪಡಿಗೆ ನೀಡಿದ್ದ ಆದೇಶವನ್ನು ರದ್ದುಪಡಿಸಿ ಈ ಹಿಂದೆ ಶಾಲಾ ದಾಖಲಾತಿಯಲ್ಲಿ ನಮೂದಿಸಿದ್ದ ೪.೨.೧೯೬೮ ಜನ್ಮ ದಿನಾಂಕವನ್ನೇ ಮುಂದುವರೆಸಲು ಸಾರ್ವಜನಿಕ ಶಿಕ್ಷಣ ಇಲಾಖೆ ನಿರ್ದೇಶಕರು ಆದೇಶಿಸಿದ್ದರು.

ಅಲ್ಲದೇ, ಶಾಲಾ ದಾಖಲಾತಿಯಲ್ಲಿ ಕೆಂಪು ಶಾಹಿಯಲ್ಲಿ ತಿದ್ದುಪಡಿ ಮಾಡಿ ನಮೂದಿಸಿರುವುದನ್ನು ರದ್ದುಪಡಿಸಿ, ಹಸಿರು ಶಾಹಿಯಲ್ಲಿ ನಮೂದಿಸಿ ಸಹಿ ಮಾಡಿರುವುದು ಕಂಡುಬಂದಿರುವುದರಿಂದ ಕೆ.ಡಿ.ಮಾದೇಗೌಡರ ಜನ್ಮದಿನಾಂಕ ದಾಖಲಾತಿಗಳನ್ವಯ ೪.೨.೧೯೬೮ ಆಗಿದ್ದು, ಆರೋಗ್ಯ ಇಲಾಖೆಗೆ ನೇಮಕಗೊಳ್ಳುವ ಸಂದರ್ಭದಲ್ಲಿ ಮೂಲ ಜನ್ಮದಿನಾಂಕವನ್ನು ಮರೆಮಾಚಿ ಶಾಲಾ ದಾಖಲಾತಿಯನ್ವಯ ತಪ್ಪು ಜನ್ಮದಿನಾಂಕ ತಿಳಿಸಿರುವುದು ಕಂಡುಬಂದಿರುತ್ತದೆ ಎಂದು ವರದಿ ಸಲ್ಲಿಸಿದ್ದರು.

ಕೆ.ಡಿ.ಮಾದೇಗೌಡರು ನಕಲಿ ಪದವಿ ಪ್ರಮಾಣಪತ್ರವನ್ನು ಸಲ್ಲಿಸಿ ಕೆಲಸಕ್ಕೆ ಸೇರಿರುವ ಹಿನ್ನೆಲೆಯನ್ನು ಕ್ರಿಮಿನಲ್ ಪ್ರಕರಣವೆಂದು ಪರಿಗಣಿಸಿ ಇವರನ್ನು ಕರ್ತವ್ಯದಿಂದ ಬಿಡುಗಡೆಗೊಳಿಸಲು ಮತ್ತು ಅವರ ವಿರುದ್ಧ ಎಫ್‌ಐಆರ್ ದಾಖಲಿಸುವಂತೆ ಅಂದಿನ ಜಿಪಂ ಸಿಇಒ ಅವರು ಡಿಎಚ್‌ಓ ಅವರಿಗೆ ಆದೇಶ ಹೊರಡಿಸಿದ್ದರು.

ಆ ನಂತರದಲ್ಲಿ ಆರೋಗ್ಯ ಇಲಾಖೆಯಿಂದ ಹೊರಬಿದ್ದ ಕೆ.ಡಿ.ಮಾದೇಗೌಡ ಅವರು ಮಿಮ್ಸ್‌ನಲ್ಲಿ ಸಾರ್ವಜನಿಕ ಸಂಪರ್ಕಾಧಿಕಾರಿ ಹುದ್ದೆ ಮಂಜೂರಾಗದಿದ್ದರೂ ತಮ್ಮ ರಾಜಕೀಯ ಪ್ರಭಾವ ಬಳಸಿ ಗುತ್ತಿಗೆ ಆಧಾರದ ಮೇಲೆ ಸೇರಿಕೊಂಡು ಕಾರ್ಯನಿರ್ವಹಿಸುತ್ತಿರುವುದು ಕಂಡುಬಂದಿದೆ.

ಹಾಲಿನಪುಡಿ ಕಲಬೆರಕೆ: ಮನ್ಮುಲ್ ಮಾಜಿ ಅಧ್ಯಕ್ಷ ಯು.ಸಿ.ಶಿವಕುಮಾರ್ ಬಂಧನ

KannadaprabhaNewsNetwork — Tue, 06 Oct 2026 01:45:00 +0530

ಮದ್ದೂರು : ಮನ್ಮುಲ್‌ನಲ್ಲಿ ನಡೆದಿರುವ ಕೋಟ್ಯಂತರ ರು. ಮೌಲ್ಯದ ಹಾಲಿನ ಪುಡಿ ಕಲಬೆರಕೆ ಪ್ರಕರಣ ಸಂಬಂಧ ಮಾಜಿ ಅಧ್ಯಕ್ಷ ಯು.ಸಿ.ಶಿವಕುಮಾರ್, ಆತನ ಸ್ನೇಹಿತ ಸುರೇಶ್‌ರನ್ನು ಪೊಲೀಸರು ಬಂಧಿಸಿ ಸೋಮವಾರ ಮದ್ದೂರು ಜೆಎಂಎಫ್‌ಸಿ ನ್ಯಾಯಾಲಯದ ಎರಡನೇ ಅಪರ ಸಿವಿಲ್ ನ್ಯಾಯಾಲಯದ ಮುಂದೆ ಹಾಜರು ಪಡಿಸಿದರು‌.

ಹಾಲಿನ ಪುಡಿ ಕಲಬೆರಕೆ ಹಗರಣ

ಹಾಲಿನ ಪುಡಿ ಕಲಬೆರಕೆ ಹಗರಣ ಪ್ರಕರಣದ 9ನೇ ಆರೋಪಿ ಯು.ಸಿ.ಶಿವಕುಮಾರ್ ಮತ್ತು 10ನೇ ಆರೋಪಿಯಾದ ಸುರೇಶ್ ಅವರನ್ನು ಸಂಜೆ 4 ಗಂಟೆ ಸುಮಾರಿಗೆ ನ್ಯಾಯಾಲಯಕ್ಕೆ ಹಾಜರು ಪಡಿಸಲಾಯಿತು‌. ಆರೋಪಿಗಳ ಪರ ಹಿರಿಯ ವಕೀಲ ವಿಶಾಲ್ ರಘು ಹಾಗೂ ಸಹ ವಕೀಲ ಎಂ.ಜೆ.ಸುಮಂತ್ ಅವರ ಪರ ವಕಾಲತ್ತು ವಹಿಸಿ ಜಾಮೀನು ಅರ್ಜಿ ಸಲ್ಲಿಸಲು ನ್ಯಾಯಲಯವನ್ನು ಕೋರಿದರು.

ಕಳೆದ 5 ದಿನಗಳ ಹಿಂದೆ ನೋಟಿಸ್

ಈಗಾಗಲೇ ವಿಚಾರಣೆ ನೆಪದಲ್ಲಿ ಪೊಲೀಸರು ಕಳೆದ 5 ದಿನಗಳ ಹಿಂದೆ ನೋಟಿಸ್ ನೀಡಿ ವಿಚಾರಣೆ ನಡೆಸಿದ್ದರು. ಆ ನಂತರ ಖರೀದಿ ಅಧಿಕಾರಿ ಪ್ರದೀಪ್ ಕುಮಾರ್ ಜಾಧವ್ ಅವರನ್ನು ಭಾನುವಾರ ವಶಕ್ಕೆ ಪಡೆದು ಜಾಧವ್ ಹಾಗೂ ಮಾಜಿ ಅಧ್ಯಕ್ಷ ಶಿವಪ್ಪ ಅವರುಗಳನ್ನು ವಿಚಾರಣೆ ನಡೆಸಿದ್ದರು.

ಆ ನಂತರ ಸೋಮವಾರ 11 ಗಂಟೆ ವೇಳೆಗೆ ಪ್ರದೀಪ್ ಕುಮಾರ್ ಜಾಧವ್ ಅವರನ್ನು 2 ನೇ ಅಪರ ಸಿವಿಲ್ ನ್ಯಾಯಾಲಯಕ್ಕೆ ಹಾಜರು ಪಡಿಸಲಾಗಿತ್ತು. ವಿಚಾರಣೆ ನಡೆಸಿದ ಎಸ್‌.ಆರ್.ನಂದಿನಿ ಅವರು ಜಾಧವ್ ಅವರನ್ನು ಅ.16 ವರೆಗೆ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲು ಆದೇಶ ನೀಡಿದರು‌.

ಪ್ರಕರಣದಲ್ಲಿ ಶಿವಪ್ಪ ಇರುವ ಬಗ್ಗೆ ಮೇಲ್ನೋಟಕ್ಕೆ ಕಂಡು ಬಂದ ಹಿನ್ನೆಲೆಯಲ್ಲಿ ಭಾನುವಾರ ರಾತ್ರಿ ಶಿವಕುಮಾರ್ ರನ್ನು ಪೊಲೀಸರು ಬಂಧಿಸಿದ್ದರು. ಬಳಿಕ ಸೋಮವಾರ ಸಂಜೆ ಪ್ರಕರಣದ ತನಿಖಾಧಿಕಾರಿ ಮಳವಳ್ಳಿ ಉಪ ವಿಭಾಗದ ಡಿವೈಎಸ್ಪಿ ಯಶವಂತ್ ಕುಮಾರ್, ಸಿಪಿಐ ನವೀನ್ ಹಾಗೂ ಸಿಬ್ಬಂದಿ ಬಿಗಿ ಪೊಲೀಸ್ ಬಂದೋಬಸ್ತ್ ನಲ್ಲಿ 2 ನೇ ಅಪರ ಸಿವಿಲ್ ನ್ಯಾಯಾಲಯಕ್ಕೆ ಹಾಜರು ಪಡಿಸಿದರು‌‌.

ಈ ಮಧ್ಯೆ ಸಹಾಯಕ ಸರ್ಕಾರಿ ಅಭಿಯೋಜಕ ಪ್ರೀತಮ್ ಡೇವಿಡ್ ಅವರು ಆರೋಪಿಯನ್ನು ಪೊಲೀಸ್ ವಶಕ್ಕೆ ನೀಡುವಂತೆ ಅರ್ಜಿ ಸಲ್ಲಿಸಿದರು‌‌. ಹೀಗಾಗಿ ಪೊಲೀಸರ ಅರ್ಜಿಯನ್ನು ಪುರಸ್ಕರಿಸಿದ ನ್ಯಾಯಾಲಯ ಹೆಚ್ಚಿನ ವಿಚಾರಣೆಗಾಗಿ ಮೂರು ದಿನಗಳ ಕಾಲ ಪೊಲೀಸ್ ವಶಕ್ಕೆ ನೀಡಿ ಆದೇಶಿಸಿದೆ‌.

ಈ ಮಧ್ಯೆ ಹಾಲಿನ ಪುಡಿಯನ್ನು ಖರೀದಿ ಮಾಡಿದ ಕೇರಳ ಮೂಲದ ಇಬ್ಬರು ವ್ಯಕ್ತಿಗಳ ಪೈಕಿ ಸುರೇಶ್ ಅವರನ್ನು ಪೊಲೀಸರು ಬಂಧಿಸಿ ನ್ಯಾಯಾಲಯಕ್ಕೆ ಹಾಜರು ಪಡಿಸಿದರು. ಪ್ರಕರಣದ ಪ್ರಮುಖ ಆರೋಪಿ ನಿಧೀಶ್ ಕಳೆದ ಸೆ.7 ರಂದು ಹೃದಯಾಘಾತದಿಂದ ಸಾವನ್ನಪ್ಪಿದ್ದರು. ಈ ಪ್ರಕರಣದ ಬಗ್ಗೆಯೂ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.

ಮನ್ಮುಲ್‌ ಮಾಜಿ ಅಧ್ಯಕ್ಷ ಶಿವಕುಮಾರ್‌ಗೆ 75 ಲಕ್ಷ ರು. ಕೊಟ್ಟಿದ್ದ ಜಾಧವ್..!

KannadaprabhaNewsNetwork — Tue, 06 Oct 2026 05:11:46 +0530

ಮಂಡ್ಯ : ಮನ್‌ಮುಲ್‌ನ ಎಫ್‌ಜಿಎಸ್ ಶಾಖೆಯ ಮುಖ್ಯಸ್ಥರಾಗಿದ್ದ ಜಾಧವ್ ೧೧೦.೪ ಟನ್ ಹಾಲಿನ ಪುಡಿ ಅಕ್ರಮ ಮಾರಾಟದಿಂದ ಬಂದ ಹಣದಲ್ಲಿ ೭೫ ಲಕ್ಷ ರು. ಹಣವನ್ನು ಅಧ್ಯಕ್ಷರಾಗಿದ್ದ ಯು.ಸಿ.ಶಿವಕುಮಾರ್ ಅವರಿಗೆ ನೀಡಿದ್ದರು ಎಂಬ ಅಂಶ ತನಿಖೆಯಿಂದ ಬೆಳಕಿಗೆ ಬಂದಿದೆ ಎಂದು ಜಿಲ್ಲಾ ಪೊಲೀಸ್ ಅಧೀಕ್ಷಕಿ ಡಾ.ವಿ.ಜೆ.ಶೋಭಾರಾಣಿ ಹೇಳಿದರು.

ಮನ್‌ಮುಲ್ ಒಕ್ಕೂಟದ ಉತ್ಪಾದನಾ ಘಟಕದಲ್ಲಿ ಉತ್ಪಾದನೆಯಾಗುವ ಕೆನೆರಹಿತ ಹಾಲಿನಪುಡಿ ಬ್ಯಾಗ್‌ಗಳನ್ನು ಕದ್ದು ಮುಚ್ಚಿ ಹಾಲಿನಪುಡಿ ಸಾಗಾಣಿಕೆ ಮಾಡುವ ವಾಹನಗಳಲ್ಲಿ ಲೋಡ್ ಮಾಡಿ ಗೆಜ್ಜಲಗೆರೆ ಕೈಗಾರಿಕಾ ಪ್ರದೇಶದಲ್ಲಿರುವ ಅನಂತ ಅವರಿಗೆ ಸೇರಿದ ಗೋದಾಮಿಗೆ ಸಾಗಿಸಿ ಅಲ್ಲಿಂದ ಖಾಸಗಿಯವರಿಗೆ ಮಾರಾಟ ಮಾಡುವ ಪ್ರಕ್ರಿಯೆ ೨೦೨೫ರ ಜೂನ್‌ನಿಂದಲೂ ನಿರಂತರವಾಗಿ ನಡೆದುಕೊಂಡು ಬಂದಿತ್ತು ಎಂದು ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.

ಒಕ್ಕೂಟದವರಿಗೆ ಹಾಲಿನಪುಡಿ ಕಳ್ಳ ಸಾಗಾಣಿಕೆ ಮಾಡುತ್ತಿದ್ದ ವಿಚಾರ ಗೊತ್ತಾಗಿ ಆಂತರಿಕ ಪರಿಶೋಧನೆಗೆ ಒಳಪಡಿಸಿದಾಗ ೧೧೦.೪ ಟನ್ ದಾಸ್ತಾನು ಕೊರತೆ ಕಂಡುಬಂದಿದೆ. ಈ ದಾಸ್ತಾನನ್ನು ಸರಿಪಡಿಸಲು ೫೪.೯ ಟನ್ ಗ್ರೈನ್ ಸ್ಟಾರ್ಚ್ ಹಾಲಿನ ಪುಡಿಯ ಬ್ಯಾಗ್‌ಗಳನ್ನು ಗೋದಾಮು ೧ಕ್ಕೆ ತಂದು ಹಾಕಿ ರೀ-ಬ್ಯಾಗ್ ಮಾಡಿಸಿದ್ದು ಉಳಿಕೆ ೫೫.೫ ಟನ್ ಹಾಲಿನಪುಡಿ ದಾಸ್ತಾನು ಕೊರತೆ ಕಂಡುಬಂದಿದ್ದು ಇದರಿಂ ಒಕ್ಕೂಟಕ್ಕೆ ೨.೮೮ ಕೋಟಿ ರು. ನಷ್ಟವಾಗಿದೆ ಎಂದರು.

ಗೋದಾಮಿನಲ್ಲಿ ಕಂಡುಬಂದ ಹಾಲಿನ ಪುಡಿ ಕೊರತೆಯನ್ನು ಸರಿದೂಗಿಸಲು ಬೆಂಗಳೂರಿನ ಪೀಣ್ಯದಿಂದ ೫೪.೯ ಟನ್ ಕಲಬೆರಕೆ ಹಾಲಿನ ಪುಡಿಯ ಬ್ಯಾಗ್‌ಗಳನ್ನು ಗೋದಾಮು-೧ಕ್ಕೆ ತಂದು ರೀ-ಬ್ಯಾಗ್ ಮಾಡಿಸಿದ್ದರು. ಈ ಕಲಬೆರಕೆ ಹಾಲಿನ ಪುಡಿಯ ಬ್ಯಾಗ್‌ಗಳನ್ನು ಒಂದು ಕೆಜಿಗೆ ೧೬೦ ರು.ನಂತೆ ೫೪ ಟನ್ ಖರೀದಿಸಿದ್ದರು. ಆದರೂ ಉಳಿಕೆ ೫೫.೫ ಟನ್ ಹಾಲಿನ ಪುಡಿ ಕೊರತೆಯನ್ನು ತುಂಬಿಸಲು ಸಾಧ್ಯವಾಗಿರಲಿಲ್ಲ ಎಂದು ತನಿಖೆಯಿಂದ ಗೊತ್ತಾಗಿರುವುದಾಗಿ ಹೇಳಿದರು.

ಬಂಧಿತರ ಸಂಖ್ಯೆ ಎಂಟಕ್ಕೆ ಏರಿಕೆ:

ಹಾಲಿನಪುಡಿ ಕಲಬೆರಕೆ ಪ್ರಕರಣದಲ್ಲಿ ಇದುವರೆಗೆ ಪೊಲೀಸರು ಎಂಟು ಮಂದಿ ಆರೋಪಿಗಳನ್ನು ಬಂಧಿಸಿದ್ದಾರೆ. ಎಫ್‌ಜಿಎಸ್ ಶಾಖೆ ಮುಖ್ಯಸ್ಥ ಪ್ರದೀಪ್‌ಕುಮಾರ್ ಜಾಧವ್ (೪೫), ಕಂಪ್ಯೂಟರ್ ಆಪರೇಟರ್ ಎಂ.ಸಿ.ಶೃತಿ (೩೨), ಮಾಸ್ಟರ್ ಇನ್ಸುಲೇಷನ್ ಗೋದಾಮು ಮೇಲ್ವಿಚಾರಕ ರವಿ (೩೭), ಲೋಡಿಂಗ್-ಅನ್‌ಲೋಡಿಂಗ್ ವಿಭಾಗದ ಶ್ರೀನಿವಾಸ್ (೪೪), ಹಾಲಿನಪುಡಿ ಉತ್ಪಾದನಾ ಘಟಕದ ಹಿಂದಿನ ಮುಖ್ಯಾಧಿಕಾರಿ ಶ್ರೀನಿವಾಸಮೂರ್ತಿ (೪೯), ಕೇರಳದ ಕ್ಯಾಲಿಕಟ್‌ನ ವಿಕೆಎಸ್ ಮಾರ್ಕೆಟಿಂಗ್ ಮಾಲೀಕ ಸುರೇಶ್ (೫೧), ಮನ್‌ಮುಲ್ ಮಾಜಿ ಅಧ್ಯಕ್ಷ ಯು.ಸಿ.ಶಿವಕುಮಾರ್ (೫೦), ಒಕ್ಕೂಟದ ಗುತ್ತಿಗೆದಾರ ಯು.ಜಿ.ಸುರೇಶ್ (೩೭) ಬಂಧಿತರು.

ವರ್ಗಾವಣೆಗಾಗಿ ಶಿವಕುಮಾರ್‌ಗೆ 30 ಲಕ್ಷ ರು. ಲಂಚ:

ಎಫ್‌ಜಿಎಸ್ ವಿಭಾಗದಲ್ಲಿ ಜಾಧವ್ ಕೆಲಸ ಮಾಡುತ್ತಿದ್ದ ಸಮಯದಲ್ಲಿ ಅವರ ವಿರುದ್ಧ ಹಲವಾರು ಆರೋಪಗಳು ಕೇಳಿಬಂದ ಹಿನ್ನೆಲೆಯಲ್ಲಿ ಅವರನ್ನು ಬೇರೆ ವಿಭಾಗಕ್ಕೆ ವರ್ಗಾವಣೆ ಮಾಡಲಾಗಿತ್ತು. ಯು.ಸಿ.ಶಿವಕುಮಾರ್ ಅಧ್ಯಕ್ಷರಾಗಿ ಬಂದ ನಂತರದಲ್ಲಿ ಪ್ರದೀಪ್‌ಕುಮಾರ್ ಜಾಧವ್ ಮತ್ತೆ ಎಫ್‌ಜಿಎಸ್ ವಿಭಾಗಕ್ಕೆ ವರ್ಗಾವಣೆ ಮಾಡಿಸಿಕೊಳ್ಳಲು ೩೦ ಲಕ್ಷ ರು. ಹಣವನ್ನು ಲಂಚದ ರೂಪದಲ್ಲಿ ನೀಡಿದ್ದರು. ಆನಂತರದಲ್ಲಿ ಹಾಲಿನಪುಡಿ ಅಕ್ರಮ ಮಾರಾಟವನ್ನು ಜೊತೆ ಸೇರಿಯೇ ಮಾಡಿಕೊಂಡು ಬಂದಿದ್ದರು ಎಂದು ತಿಳಿಸಿದರು.

ಕೇರಳದಿಂದ ಗ್ರೈನ್ ಸ್ಟಾರ್ಚ್ ಖರೀದಿ:

ಹಾಲಿನ ಪುಡಿ ಅಕ್ರಮ ಮಾರಾಟದಿಂದ ಗೋದಾಮಿನಲ್ಲಿ ಉಂಟಾಗುತ್ತಿದ್ದ ವ್ಯತ್ಯಾಸವನ್ನು ಸರಿದೂಗಿಸಲು ಕೇರಳದಿಂದ ಗ್ರೈನ್ ಸ್ಟಾರ್ಚ್ ಖರೀದಿಸುತ್ತಿದ್ದ ಸಂಗತಿ ಇದೀಗ ಬೆಳಕಿಗೆ ಬಂದಿದೆ. ಈ ಗ್ರೈನ್ ಸ್ಟಾರ್ಚ್‌ನ್ನು ಕೇರಳದ ಕ್ಯಾಲಿಕಟ್‌ನ ಕೊಯಿಲ್ ಆಂಡಿಯ ನಿದೀಶ್‌ಕುಮಾರ್ ಎಂಬಾತನಿಂದ ಅದೇ ಕೇರಳದ ವಿಕೆಎಸ್ ಮಾರ್ಕೆಟಿಂಗ್ ಮಾಲೀಕ ವಿ.ಕೆ.ಸುರೇಶ್ ಎಂಬಾತ ಖರೀದಿಸಿ ಅದನ್ನು ಒಕ್ಕೂಟದ ಗುತ್ತಿಗೆದಾರ ಯು.ಜಿ.ಸುರೇಶ್ ಮೂಲಕ ತಂದು ಹಾಲಿನ ಪುಡಿಗೆ ಮಿಶ್ರಣ ಮಾಡುತ್ತಿದ್ದರು ಎಂಬುದು ತನಿಖೆ ವೇಳೆ ಬೆಳಕಿಗೆ ಬಂದಿರುವುದಾಗಿ ಹೇಳಿದರು.

ನಿದೀಶ್‌ಕುಮಾರ್ ಸಾವು:

ಗ್ರೈನ್ ಸ್ಟಾರ್ಚ್‌ನ್ನು ಮಾರಾಟ ಮಾಡುತ್ತಿದ್ದ ನಿದೀಶ್‌ಕುಮಾರ್ ಎಂಬ ವ್ಯಕ್ತಿ ಸೆಪ್ಟೆಂಬರ್ ೯ ರಂದು ಹೃದಯಾಘಾತದಿಂದ ಸಾವನ್ನಪ್ಪಿದ್ದಾನೆ. ಮರಣ ಪ್ರಮಾಣಪತ್ರದಲ್ಲಿ ಹೃದಯಾಘಾತ ಎಂದು ದಾಖಲಿಸಲಾಗಿದೆ. ಕಲಬೆರಕೆ ಹಾಲಿನಪುಡಿ ಪ್ರಕರಣ ದಾಖಲಾದ ನಂತರದಲ್ಲಿ ಸಾವನ್ನಪ್ಪಿದ್ದು, ಅದರ ಬಗ್ಗೆಯೂ ತನಿಖೆ ನಡೆಸಲಾಗುತ್ತಿದೆ ಎಂದರು.

ಮದ್ದೂರು ಇನ್ಸ್‌ಪೆಕ್ಟರ್ ನವೀನ್ ಅವರು ಪ್ರಕರಣದ ತನಿಖೆ ನಡೆಸುತ್ತಿದ್ದರು. ರೈತರ ಸಂಸ್ಥೆಯಾಗಿರುವ ಕಾರಣ ಉನ್ನತ ಅಧಿಕಾರಿಯಿಂದ ತನಿಖೆ ನಡೆಸಬೇಕೆಂಬ ಕಾರಣದಿಂದ ಮಳವಳ್ಳಿ ಉಪ ವಿಭಾಗದ ಡಿವೈಎಸ್ಪಿ ಯಶವಂತ್ ಕುಮಾರ್ ಅವರನ್ನು ತನಿಖಾಧಿಕಾರಿಯನ್ನಾಗಿ ನೇಮಕ ಮಾಡಲಾಗಿದೆ. ಇದರಲ್ಲಿ ಯಾವುದೇ ಬೇರೆ ಉದ್ದೇಶ ಇಲ್ಲ ಎಂದು ಅವರು ಸ್ಪಷ್ಟಪಡಿಸಿದರು.

ಹೆಚ್ಚುವರಿ ಪೊಲೀಸ್ ವರಿಷ್ಠಾಧಿಕಾರಿ ನಾಗೇಶ್, ಡಿವೈಎಸ್ಪಿ ಯಶವಂತ್‌ಕುಮಾರ್ ಅವರು ಗೋಷ್ಠಿಯಲ್ಲಿದ್ದರು.

ಗ್ರೈನ್ ಸ್ಟಾರ್ಚ್ ಎಂದರೇನು?

ಗ್ರೈನ್ ಸ್ಟಾರ್ಚ್‌ನ್ನು ಹಾಲಿಗೆ ಮಿಶ್ರಣ ಮಾಡುವುದಿಲ್ಲ. ಇದನ್ನು ಬಿಸ್ಕತ್ತು ಸೇರಿದಂತೆ ಅನೇಕ ಸಿಹಿ ತಿನಿಸುಗಳಿಗೆ ಉಪಯೋಗಿಸುತ್ತಾರೆ. ಇದು ರಕ್ತದಲ್ಲಿರುವ ಸಕ್ಕರೆ ಅಂಶವನ್ನು ಹೆಚ್ಚಿಸುವ ಗುಣವನ್ನು ಹೊಂದಿದೆ. ಇದನ್ನು ಮಿಶ್ರಣ ಮಾಡುವ ತಿನಿಸುಗಳಲ್ಲಿ ಪ್ರೋಟೀನ್ ಅಂಶ ತೀರಾ ಕಡಿಮೆ ಪ್ರಮಾಣದಲ್ಲಿರುತ್ತದೆ ಎಂದು ಜಿಲ್ಲಾ ಪೊಲೀಸ್ ಅಧೀಕ್ಷಕಿ ಡಾ.ವಿ.ಜೆ.ಶೋಭಾರಾಣಿ ಹೇಳಿದರು.

ಹಸಿರು ಪ್ಯಾಕೆಟ್ ಹಾಲಿಗೆ ಹಾಲಿನಪುಡಿ ಮಿಶ್ರಣ

ಮನ್‌ಮುಲ್‌ನಿಂದ ಹೊರತರಲಾಗುತ್ತಿರುವ ಹಸಿರು ಪ್ಯಾಕೆಟ್ ಹಾಲಿಗೆ ಹಾಲಿನಪುಡಿಯನ್ನು ಮಿಶ್ರಣ ಮಾಡುವ ಸಂಗತಿ ಇದೀಗ ಬೆಳಕಿಗೆ ಬಂದಿದೆ. ಹಾಲಿನ ಗುಣಮಟ್ಟವನ್ನು ಹೆಚ್ಚಿಸುವ ದೃಷ್ಟಿಯಿಂದ ಕಾನೂನುಬದ್ಧವಾಗಿಯೇ ಹಾಲಿನಪುಡಿಯನ್ನು ಹಾಲಿಗೆ ಮಿಶ್ರಣ ಮಾಡಲಾಗುತ್ತಿದೆ ಎಂದು ಹೇಳಲಾಗಿದೆ. ಹಾಗಾಗಿ ಹಸಿರು ಪ್ಯಾಕೆಟ್ ಹಾಲು ಎಷ್ಟು ಸುರಕ್ಷಿತ ಎಂಬ ಅನುಮಾನ ಮೂಡಿದೆ.

ಕಲಬೆರಕೆ ಹಾಲಿನಪುಡಿ ಮಾರಾಟ

ಮನ್‌ಮುಲ್‌ನಲ್ಲಿ ಕಲಬೆರಕೆಯಾಗಿರುವ ಹಾಲಿನಪುಡಿಯಲ್ಲಿ ಒಂದಷ್ಟು ಪ್ರಮಾಣವನ್ನು ಮಾರಾಟ ಮಾಡಲಾಗಿದೆ. ಸಾಮಾನ್ಯವಾಗಿ ಐಸ್ ಕ್ರೀಂ, ಸಿಹಿ ಉತ್ಪನ್ನಗಳು, ಹೋಟೆಲ್‌ನವರು ಇದನ್ನು ಬಳಸಿರುವ ಸಾಧ್ಯತೆ ಹೆಚ್ಚಿರುತ್ತದೆ ಎಂದು ಹೇಳಲಾಗಿದೆ.

ಟನ್‌ಗಟ್ಟಲೆ ಹಾಲಿನಪುಡಿ ಮಾರಾಟದಿಂದ ಸಿಕ್ಕಿಬಿದ್ದರು..!

ಮನ್‌ಮುಲ್‌ನಲ್ಲಿ ಹಾಲಿನಪುಡಿ ಅಕ್ರಮ ಮಾರಾಟ ಹೊಸತೇನಾಗಿರಲಿಲ್ಲ. ಹಿಂದಿನಿಂದಲೂ ಈ ಅಕ್ರಮ ಮಾರಾಟ ನಿರಂತರವಾಗಿ ನಡೆದುಕೊಂಡು ಬಂದಿದೆ. ಮೊದಲೆಲ್ಲಾ ಕೆಜಿಗಟ್ಟಲೆ ಹಾಲಿನಪುಡಿಯನ್ನು ಮಾತ್ರ ಅಕ್ರಮವಾಗಿ ಮಾರಾಟ ಮಾಡಿ ಕೊರತೆಯನ್ನು ಸುಲಭವಾಗಿ ಹೊಂದಾಣಿಕೆ ಮಾಡಿ ಅದರಿಂದ ಬಂದ ಹಣವನ್ನು ಜೇಬಿಗಿಳಿಸಿಕೊಳ್ಳುತ್ತಿದ್ದರು. ಯಾವಾಗ ಟನ್‌ಗಟ್ಟಲೆ ಹಾಲಿನ ಪುಡಿಯನ್ನು ಅಕ್ರಮ ಮಾರಾಟಕ್ಕೆ ಇಳಿದರೋ ಆಗ ಕೊರತೆಯನ್ನು ನೀಗಿಸಲು ಸಾಧ್ಯವಾಗಲಿಲ್ಲ. ಲೆಕ್ಕ ಪರಿಶೋಧನಾ ವರದಿಯಲ್ಲಿ ಎದುರಾದ ಕೋಟ್ಯಂತರ ರು. ವ್ಯತ್ಯಾಸವನ್ನು ಸರಿಪಡಿಸುವುದಕ್ಕೆ ತಿಣುಕಾಡುವಂತಾಯಿತು. ಟನ್‌ಗಟ್ಟಲೆ ಹಾಲಿನಪುಡಿಯನ್ನು ಕಲಬೆರಕೆ ಮಾಡುವುದೂ ಸುಲಭದ ಕೆಲಸವಾಗಿರಲಿಲ್ಲವಾದ್ದರಿಂದ ಹಗರಣ ದೊಡ್ಡ ಮಟ್ಟದಲ್ಲಿ ಬೆಳಕಿಗೆ ಬರಲು ಕಾರಣವಾಯಿತು ಎಂದು ತಿಳಿದುಬಂದಿದೆ.