Kannada Prabha

ಅನಂತನಾಗ್‌ಗೆ ಫಾಲ್ಕೆ ಗೌರವ - 5 ದಶಕಗಳ ಕನ್ನಡ ಚಿತ್ರರಂಗದ ಸೇವೆಗಾಗಿ ಸಂದ ಮನ್ನಣೆ

Sujatha NR — Thu, 17 Sep 2026 05:30:27 +0530

ನವದೆಹಲಿ: ಕನ್ನಡ ಚಿತ್ರರಂಗ ಕಂಡ ಶ್ರೇಷ್ಠ ನಟರಲ್ಲಿ ಒಬ್ಬರಾದ ಅನಂತ್ ನಾಗ್ (78) ಅವರಿಗೆ 2024ರ ಸಾಲಿನ ಪ್ರತಿಷ್ಠಿತ ದಾದಾಸಾಹೇಬ್ ಫಾಲ್ಕೆ ಪ್ರಶಸ್ತಿ ಘೋಷಿಸಲಾಗಿದೆ.

ಚಿತ್ರರಂಗದಲ್ಲಿ ಅವರ ಅನುಪಮ ಸೇವೆ ಗಮನಿಸಿ ಕಳೆದ ವರ್ಷವಷ್ಟೇ ಕೇಂದ್ರ ಸರ್ಕಾರ ಅವರಿಗೆ ಪದ್ಮಭೂಷಣ ನೀಡಿ ಗೌರವಿಸಿತ್ತು. ಅದರ ಬೆನ್ನಲ್ಲೇ ಭಾರತೀಯ ಚಿತ್ರರಂಗಕ್ಕೆ ನೀಡಿದ ಅತ್ಯುತ್ತಮ ಸೇವೆಗಾಗಿ ನೀಡುವ ಅತ್ಯುನ್ನತ ಗೌರವವೂ ಹಿರಿಯ ನಟನನ್ನು ಹುಡುಕಿಕೊಂಡು ಬಂದಿದೆ. ಸೆ.22ರಂದು ಗುಜರಾತ್‌ನ ಕೇವಾಡಿಯದಲ್ಲಿ ನಡೆಯಲಿರುವ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಅವರಿಗೆ ಈ ಪ್ರಶಸ್ತಿಯನ್ನು ನೀಡಿ ಗೌರವಿಸಲಾಗುವುದು.

5 ದಶಕಗಳಿಗೂ ಹೆಚ್ಚಿನ ತಮ್ಮ ಸುದೀರ್ಘ ಅಭಿನಯ ಪಯಣದಲ್ಲಿ ಅನಂತ್ ನಾಗ್ 7 ಭಾಷೆಗಳಲ್ಲಿ 300ಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿದ್ದಾರೆ. ರಂಗಭೂಮಿ ಕ್ಷೇತ್ರದಲ್ಲೂ ಸಕ್ರಿಯರಾಗಿದ್ದ ಅವರು, ‘ಮಿಂಚಿನ ಓಟ’, ‘ಹಂಸಗೀತೆ’, ‘ಅಂಕುರ್’ ಮತ್ತು ‘ಮಂಥನ್’ ಮುಂತಾದ ಸಾರ್ವಕಾಲಿಕ ಯಶಸ್ವಿ ಹಾಗೂ ಕಲಾತ್ಮಕ ಸಿನಿಮಾಗಳ ಮೂಲಕ ಪ್ರೇಕ್ಷಕರ ಮನ ಗೆದ್ದಿದ್ದಾರೆ.

ದಾದಾಸಾಹೇಬ್ ಫಾಲ್ಕೆ ಆಯ್ಕೆ ಸಮಿತಿಯ ಶಿಫಾರಸಿನ ಮೇರೆಗೆ ಕೇಂದ್ರ ಸರ್ಕಾರ ಈ ನಿರ್ಧಾರ ಕೈಗೊಂಡಿದೆ. ಅನಂತ್ ನಾಗ್ ಅವರ ವೈವಿಧ್ಯಮಯ ಅಭಿನಯ ಪ್ರತಿಯೊಂದು ತಲೆಮಾರಿನ ನಟರಿಗೂ ಸ್ಫೂರ್ತಿಯಾಗಿದೆ ಎಂದು ಪತ್ರಿಕಾ ಮಾಹಿತಿ ಕಾರ್ಯಾಲಯ (ಪಿಐಬಿ) ತಿಳಿಸಿದೆ.

ಕಲಾಪ್ರತಿಭೆಗೆ ಮನ್ನಣೆ

ಕಳೆದ ಹಲವು ದಶಕಗಳಿಂದ, ಅನಂತ್ ನಾಗ್ ಅವರ ಸಹಜ ಅಭಿನಯ, ಗಮನಾರ್ಹ ವೈವಿಧ್ಯ ಹಾಗೂ ಶ್ರೇಷ್ಠ ಕಲಾಪ್ರತಿಭೆಯು ಭಾರತೀಯ ಚಿತ್ರರಂಗದಲ್ಲಿ, ವಿಶೇಷವಾಗಿ ಕನ್ನಡ ಚಿತ್ರರಂಗದಲ್ಲಿ, ಅವಿಸ್ಮರಣೀಯ ಛಾಪನ್ನು ಮೂಡಿಸಿದೆ.

ನರೇಂದ್ರ ಮೋದಿ, ಪ್ರಧಾನಿ

ಮಹಾನ್‌ ಮನ್ನಣೆ

ಅನಂತನಾಗ್‌ರಿಗೆ ಫಾಲ್ಕೆ ಪ್ರಶಸ್ತಿ ಬಂದಿದ್ದು ಸಮಸ್ತ ಕನ್ನಡಿಗರಿಗೆ ಹೆಮ್ಮೆ, ಸಂತಸದ ಕ್ಷಣ. ಅವರು ತಮ್ಮ ನೈಜ ನಟನೆ, ಸಂಯಮದ ಮೂಲಕ ದಶಕಗಳ ಕಾಲ ಕಲಾರಂಗವನ್ನು ಶ್ರೀಮಂತಗೊಳಿಸಿದ್ದಾರೆ. ಈ ಗೌರವ ಕನ್ನಡ ಕಲಾಜಗತ್ತಿಗೆ ಸಂದ ಮಹಾನ್ ಮನ್ನಣೆ.

- ಡಿ.ಕೆ. ಶಿವಕುಮಾರ್‌, ಮುಖ್ಯಮಂತ್ರಿ

ಕಿರೀಟಕ್ಕೆ ಗರಿ

ಅನಂತ್ ನಾಗ್ ಚಿತ್ರರಂಗದಲ್ಲಿ ಅಪರೂಪದ ಪ್ರತಿಭೆ. ಅವರಿಗೆ ಫಾಲ್ಕೆ ಗೌರವ ಸಂದಿರುವುದು ಕನ್ನಡಿಗರಿಗೆ ಹೆಮ್ಮೆಯ ಸಂಗತಿ. ಡಾ.ರಾಜ್‌ಕುಮಾರ್ ಅವರ ನಂತರ ಕನ್ನಡ ಭುವನೇಶ್ವರಿಯ ಕೀರ್ತಿ ಕಿರೀಟಕ್ಕೆ ಮತ್ತೊಂದು ಗರಿ ಮುಡಿಸಿದ ಹೆಗ್ಗಳಿಕೆ ಅವರದ್ದಾಗಿದೆ.

- ಎಚ್‌.ಡಿ. ಕುಮಾರಸ್ವಾಮಿ, ಕೇಂದ್ರ ಸಚಿವ

ಕನ್ನಡದ ಇಬ್ಬರು ನಟರಿಗೆ ಗೌರವ

ಅನಂತ್‌ ನಾಗ್‌ ಅವರು ಫಾಲ್ಕೆಗೆ ಭಾಜನರಾಗುವ ಮೂಲಕ ಕನ್ನಡದ 2 ನಟರಿಗೆ ಹಾಗೂ ಒಟ್ಟಾರೆ ಐವರು ಕನ್ನಡಿಗರು ಈ ಪ್ರತಿಷ್ಠಿತ ಪ್ರಶಸ್ತಿಗೆ ಪಾತ್ರರಾದಂತಾಗಿದೆ. ಈ ಮೊದಲು ವರನಟ ಡಾ. ರಾಜ್‌ಕುಮಾರ್‌ (1995) ಅವರು ಈ ಪ್ರಶಸ್ತಿ ಮುಡಿಗೇರಿಸಿಕೊಂಡಿದ್ದರು. ಆ ಬಳಿಕ ಕನ್ನಡದ ಸೇವೆಗಾಗಿ ಈ ಗೌರವ ಪಡೆಯುತ್ತಿರುವ 2ನೇ ನಟ ನಾಗ್‌ ಆಗಿದ್ದಾರೆ. ಇನ್ನು ಬಹುಭಾಷಾ ನಟ, ಕನ್ನಡಿಗರಾದ ರಜನೀಕಾಂತ್‌ (2019), ಹಿಂದಿ ಚಿತ್ರರಂಗ ಸೇವೆಗೆ ಖ್ಯಾತ ಛಾಯಾಗ್ರಾಹಕ ವಿ.ಕೆ. ಮೂರ್ತಿ (2008) ಹಾಗೂ ಹಿಂದಿ ಚಿತ್ರರಂಗದಲ್ಲಿ ಸಲ್ಲಿಸಿದ ಸೇವೆಗೆ ಶ್ಯಾಮ್‌ ಬೆನಗಲ್‌ (2005) ಫಾಲ್ಕೆ ಪ್ರಶಸ್ತಿ ಪಡೆದಿದ್ದರು.

ರಾಮಕೃಷ್ಣ ಹೆಗಡೆ ರೀತಿ ಸಿನಿಮಾದಲ್ಲಿ ನಟಿಸಲು ಸಿದ್ದು ಈಗ ತಯಾರಿ

Sujatha NR — Sat, 26 Sep 2026 07:05:56 +0530

ಬೆಂಗಳೂರು : ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಬೆಳ್ಳಿತೆರೆಯಲ್ಲಿ ಕಾಣಿಸಿಕೊಳ್ಳಲು ಅಣಿಯಾಗುತ್ತಿದ್ದು, ಸಿನಿಮಾವೊಂದರಲ್ಲಿ ಮುಖ್ಯಮಂತ್ರಿ ಪಾತ್ರಕ್ಕೆ ಬಣ್ಣಹಚ್ಚಲಿದ್ದಾರೆ ಎಂದು ತಿಳಿದು ಬಂದಿದೆ.

ಸಿದ್ದರಾಮಯ್ಯ ಅವರಿಗೆ ಮುಖ್ಯಮಂತ್ರಿ ಪಾತ್ರದಲ್ಲಿ ನಟಿಸುವಂತೆ ಮನವಿ

ಚಿತ್ರತಂಡವು ಸಿದ್ದರಾಮಯ್ಯ ಅವರಿಗೆ ಮುಖ್ಯಮಂತ್ರಿ ಪಾತ್ರದಲ್ಲಿ ನಟಿಸುವಂತೆ ಮನವಿ ಮಾಡಿದೆ. ಕಥೆ ಮತ್ತು ಪಾತ್ರದ ಬಗ್ಗೆ ಮಾಹಿತಿ ಪಡೆದ ಬಳಿಕ ಅವರು ಸಿನಿಮಾದಲ್ಲಿ ಕಾಣಿಸಿಕೊಳ್ಳಲು ಸಕಾರಾತ್ಮಕವಾಗಿ ಸ್ಪಂದಿಸಿದ್ದಾರೆ ಎನ್ನಲಾಗಿದೆ.

ಇನ್ನೂ ಸಿನಿಮಾಗೆ ಹೆಸರು ಇಟ್ಟಿಲ್ಲ

ಇನ್ನೂ ಸಿನಿಮಾಗೆ ಹೆಸರು ಇಟ್ಟಿಲ್ಲ. ಉಳಿದಂತೆ ಸಿನಿಮಾದ ಕತೆ, ಸಿದ್ದರಾಮಯ್ಯ ಪಾತ್ರದ ಬಗ್ಗೆ ಹೆಚ್ಚಿನ ವಿವರಗಳು ಬಹಿರಂಗವಾಗಿಲ್ಲ. ನಿರ್ದೇಶಕ ರಾಜೇಶ್ ನಿರ್ದೇಶನದ ಈ ಸಿನಿಮಾವನ್ನು ಆರ್.ಎ.ಫಿಲ್ಮ್ ಫ್ಯಾಕ್ಟರಿ ಸಂಸ್ಥೆ ನಿರ್ಮಿಸುತ್ತಿದೆ. ಸಿನಿಮಾವನ್ನು ವಿಶೇಷ ರೀತಿಯಲ್ಲಿ ನಿರ್ಮಿಸಲು ಚಿತ್ರತಂಡ ಸಿದ್ಧತೆ ನಡೆಸುತ್ತಿದೆ ಎಂದು ಮೂಲಗಳು ತಿಳಿಸಿವೆ. ಈ ಹಿಂದೆ ಮಾಜಿ ಮುಖ್ಯಮಂತ್ರಿ ರಾಮಕೃಷ್ಣ ಹೆಗಡೆ ಅವರು ಐದು ಕನ್ನಡ ಸಿನಿಮಾಗಳಲ್ಲಿ ನಟಿಸಿದ್ದರು.

ಸುದೀಪ್‌ ಸಿನಿಮಾ ನಿರ್ಮಿಸೋದು ಕಷ್ಟ ಎಂದು ಹೆದರಿಸಿದ್ದರು!

Sujatha NR — Thu, 01 Oct 2026 11:52:39 +0530

ಸಿನಿವಾರ್ತೆ

‘ನೀನೇ ದೊಡ್ಡ ಆಟಿಟ್ಯೂಡ್‌ ಇರುವ ವ್ಯಕ್ತಿ. ಅವರು ದೊಡ್ಡ ಸೂಪರ್‌ ಸ್ಟಾರ್‌. ನೀವಿಬ್ಬರು ಜೊತೆಗೆ ಸಿನಿಮಾ ಮಾಡಕ್ಕೆ ಸಾಧ್ಯನಾ ಅಂತ ಹೆದರಿಸಿದ್ದರು.’

- ಹೀಗೆ ಹೇಳಿದ್ದು ನಿರ್ಮಾಪಕಿ ಚೈತನ್ಯ ರೆಡ್ಡಿ. ಅವರ ಈ ಮಾತುಗಳು ‘ಬಿಲ್ಲಾ ರಂಗಾ ಬಾಷ’ ಚಿತ್ರದ ಕುರಿತು. ತೆಲುಗು ಮಾಧ್ಯಮಗಳಿಗೆ ನೀಡಿರುವ ವಿಶೇಷ ಸಂದರ್ಶನದಲ್ಲಿ ಚೈತನ್ಯ ರೆಡ್ಡಿ ಅವರಿಗೆ ‘ಕನ್ನಡಕ್ಕೆ ನೀವು ಹೋಗಿದ್ದು ಹೇಗೆ, ಸುದೀಪ್‌ ಚಿತ್ರದ ನಿರ್ಮಾಪಕರಾಗಿದ್ದು ಹೇಗೆ, ಬಿಆರ್‌ಪಿ ಯಾವ ರೀತಿಯ ಸಿನಿಮಾ’ ಎಂಬಿತ್ಯಾದಿ ಪ್ರಶ್ನೆಗಳಿಗೆ ಉತ್ತರಿಸುತ್ತಾ ಚೈತನ್ಯಾ ರೆಡ್ಡಿ ಹೇಳಿದ ಮಾತುಗಳಿವು.

ಮೊದಲೇ ಬಿಆರ್‌ಬಿ ಸಿನಿಮಾ ಶುರುವಾಗಿತ್ತು

- ನಾನು ಈ ಚಿತ್ರಕ್ಕೆ ನಿರ್ಮಾಪಕಿಯಾಗಿ ಬರುವುದಕ್ಕೂ ಮೊದಲೇ ಬಿಆರ್‌ಬಿ ಸಿನಿಮಾ ಶುರುವಾಗಿತ್ತು. ನಾಲ್ಕೈದು ಮಂದಿ ನಿರ್ಮಾಪಕರಿಗೆ ಅಪ್ರೋಚ್‌ ಆಗಿದ್ದರು. ಕೊನೆಗೆ ಅದು ನನ್ನ ಬಳಿಗೆ ಬಂತು. ನನಗೆ ಚಿತ್ರದ ಕತೆ ಮತ್ತು ಚಿತ್ರದ ಯೋಜನೆ ಕೇಳಿ ಖುಷಿಯಾಯಿತು. ನನಗೆ ಫ್ಯಾಂಟಸಿ, ಫ್ಯೂಚರ್‌ ಹಾಗೂ ಮೈಥಾಲಾಜಿಕಲ್‌ ಸಿನಿಮಾಗಳೆಂದರೆ ಹೆಚ್ಚು ಇಷ್ಟ. ಇದು ಅಡ್ವೆಂಚರ್‌ ಫ್ಯಾಂಟಸಿ ಸಿನಿಮಾ ಆಗಿದ್ದರಿಂದಲೇ ನಾನು ಈ ಚಿತ್ರದ ನಿರ್ಮಾಪಕಿ ಆದೆ.

- ಸುದೀಪ್‌ ಚಿತ್ರವನ್ನು ನಿರ್ಮಿಸುತ್ತಿದ್ದೇವೆ ಎಂದಾಗ ದೊಡ್ಡ ಸ್ಟಾರ್‌ ನಟನನ್ನು ನೀವು ಹ್ಯಾಂಡಲ್‌ ಮಾಡಕ್ಕೆ ಆಗುತ್ತಾ ಎಂದು ಹೆದರಿಸಿದ್ದರು. ನಾನು ಚಿತ್ರದ ಪೂಜೆಗೆ ಹೋಗಿದ್ದಾಗ ಸುದೀಪ್‌ ಅವರನ್ನು ಭೇಟಿ ಮಾಡಿದ ಮೇಲೆ ಅವರ ಬಗ್ಗೆ ಇರುವ ಮಾತುಗಳು ಸುಳ್ಳು ಎನಿಸಿತು. ತುಂಬಾ ಒಳ್ಳೆಯ ವ್ಯಕ್ತಿ. ತುಂಬಾ ಕೇರ್‌ ಮಾಡುತ್ತಾರೆ. ನಟರಾಗಿ ಮಾತ್ರವಲ್ಲ ಸುದೀಪ್‌ ಅವರಿಗೆ ಬಿಸಿನೆಸ್‌ ಐಡಿಗಳೂ ಸಹ ಇವೆ. ಪ್ರತಿಯೊಂದಕ್ಕೆ ಸಪೋರ್ಟ್‌ ಆಗಿ ನಿಂತಿದ್ದಾರೆ. - ಬೆಂಗಳೂರು ಬಳಿ 11 ಎಕರೆಯಲ್ಲಿ ಶೂಟಿಂಗ್‌ ಸೆಟ್‌ ಹಾಕಿದ್ದೇವೆ. ಬೇರೆ ಬೇರೆ ಭಾಷೆಯ ಕಲಾವಿದರ ಜೊತೆಗೆ ಮಾತುಕತೆ ಮಾಡುತ್ತಿದ್ದಾರೆ. ಅವರನ್ನು ಈ ಚಿತ್ರದಲ್ಲಿ ತೊಡಗಿಸಿಕೊಳ್ಳುವ ಪ್ಲಾನ್‌ ಮಾಡುತ್ತಿದ್ದಾರೆ. ದೊಡ್ಡ ಸ್ಟಾರ್‌ ನಟ ಸಿನಿಮಾ ಬಗ್ಗೆ ಈ ರೀತಿ ಯೋಚಿಸೋದು, ಕೆಲಸ ಮಾಡೋದು ನೋಡಿ ನನಗೆ ಹೆಮ್ಮೆ ಅನಿಸುತ್ತಿದೆ.

ಈ ಗೌರವ ಸಮಸ್ತ ಕನ್ನಡಿಗರಿಗೆ ಅರ್ಪಣೆ: ಅನಂತನಾಗ್

Sujatha NR — Thu, 17 Sep 2026 12:38:06 +0530

ಭಾರತೀಯ ಚಿತ್ರರಂಗದ ಪರಮೋಚ್ಛ ಗೌರವ ‘ದಾದಾಸಾಹೇಬ್ ಫಾಲ್ಕೆ ಪ್ರಶಸ್ತಿ’ ಒಲಿದಿದೆ. ಈ ಕ್ಷಣದಲ್ಲಿ ನಿಮ್ಮ ಭಾವನೆಗಳೇನು?

ಕನ್ನಡಿಗರಿಗೆ ನಾನು ಮೊದಲು ನಮಿಸುತ್ತೇನೆ. ಅವರಿಂದಲೇ ಈ ಎಲ್ಲಾ ಮನ್ನಣೆ ನನಗೆ ದೊರಕುತ್ತಿದೆ. ಸಾಮಾನ್ಯವಾಗಿ ಪ್ರಶಸ್ತಿ ಆಯ್ಕೆ ಸಮಿತಿಯಲ್ಲಿ ಐದಾರು ಜನ ತಜ್ಞರು ಇರುತ್ತಾರೆ. ಅಷ್ಟು ಜನರ ಮಧ್ಯೆ ಚರ್ಚೆಯಾಗಿ ನನ್ನ ಹೆಸರು ಅಂತಿಮಗೊಂಡಿದೆ ಎಂಬುದೇ ದೊಡ್ಡ ಹೆಮ್ಮೆ. ಇದು ನನ್ನೊಬ್ಬನದಲ್ಲ, ಜನರಿಗೆ ಸಂದ ಪ್ರಶಸ್ತಿ. ಸಮಸ್ತ ಕನ್ನಡಿಗರಿಗೆ ಬಂದ ಪ್ರಶಸ್ತಿ. ನಾನು ಯಾವತ್ತೂ ಪ್ರಶಸ್ತಿ ಬಯಸಿದವನಲ್ಲ. ಕನ್ನಡಿಗರ ಅಪಾರ ಪ್ರೀತಿಯೇ ನನಗೆ ಪ್ರಶಸ್ತಿ. ಕಳೆದ ವರ್ಷ ಅವರೇ ಪದ್ಮಭೂಷಣ ಪ್ರಶಸ್ತಿ ಬರುವಂತೆ ನೋಡಿಕೊಂಡರು. ಈಗ ಈ ಮನ್ನಣೆ ದೊರಕಿದೆ. ಈ ಗೌರವದ ಘೋಷಣೆಯನ್ನು ನರೇಂದ್ರ ಮೋದಿಯವರು ಟ್ವೀಟ್ ಮಾಡಿ ಅಭಿನಂದಿಸಿರುವುದು ಮತ್ತಷ್ಟು ಸಂತೋಷ ಮತ್ತು ಹೆಮ್ಮೆ ತಂದಿದೆ.

ರಂಗಭೂಮಿಯಿಂದ ಆರಂಭವಾದ ನಿಮ್ಮ ಈ ಸುದೀರ್ಘ ಪಯಣದ ನೆನಪುಗಳನ್ನು ಮೆಲುಕು ಹಾಕುವುದಾದರೆ?

ನಾನು ಶಾಲಾ ದಿನಗಳಲ್ಲಿದ್ದಾಗಲೇ ನಾಟಕಗಳಲ್ಲಿ ಅಭಿನಯಿಸಲು ಶುರುಮಾಡಿದ್ದೆ. ನಂತರ ನಟನೆ ಕಲಿಯಲೆಂದೇ ಮುಂಬೈಗೆ ಹೋದೆ. ಅಲ್ಲಿನ ರಂಗಭೂಮಿ ನನಗೆ ಅಭಿನಯದ ಅಡಿಪಾಯ ಹಾಕಿಕೊಟ್ಟಿತು. ಅದಾದ ಮೇಲೆ ಚಿತ್ರರಂಗದ ಪಯಣ ಶುರುವಾಯಿತು. ಇಲ್ಲಿಯವರೆಗೆ 300ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ಅಭಿನಯಿಸಿದ್ದೇನೆ. ನಾನು ನಟಿಸಿದ ಎಲ್ಲಾ ಸಿನಿಮಾಗಳೂ ನನಗೆ ತೃಪ್ತಿ ನೀಡಿವೆ.

ಈ ಸಂದರ್ಭದಲ್ಲಿ ಯಾವ ನಿರ್ದೇಶಕರನ್ನು ನೆನೆಯುತ್ತೀರಿ?

ನನ್ನ ಜೊತೆ ಕೆಲಸ ಮಾಡಿದ ಪ್ರತಿಯೊಬ್ಬ ನಿರ್ದೇಶಕರ ಬಗ್ಗೆಯೂ ನನಗೆ ಅಪಾರ ಮೆಚ್ಚುಗೆ ಹಾಗೂ ಗೌರವವಿದೆ.

ಬೆಂಗಳೂರಿಗೆ ಬಂದ ಆರಂಭಿಕ ದಿನಗಳು ಮತ್ತು ಇಲ್ಲಿ ನಿಮ್ಮ ಸಿನಿವಲಯ ಹೇಗಿತ್ತು?

ನಾನು ಆರಂಭದಲ್ಲಿ ಮುಂಬೈನಿಂದ ಬೆಂಗಳೂರಿಗೆ ಬಂದಾಗ ಇಲ್ಲಿ ನನಗೆ ಯಾರೂ ಸ್ನೇಹಿತರು ಇರಲಿಲ್ಲ. ಆ ಸಮಯದಲ್ಲಿ ನನಗೆ ಆಪ್ತರಾಗಿದ್ದು ಪತ್ರಕರ್ತರು. ಪತ್ರಕರ್ತರೇ ನನ್ನ ನಿಜವಾದ ಸ್ನೇಹಿತರಾದರು. ನನ್ನ ಪ್ರತಿಭೆಯನ್ನು ಗುರುತಿಸಿ ಬೆಳೆಸಿದ್ದರಲ್ಲಿ ಮಾಧ್ಯಮಗಳ ಪಾತ್ರ ದೊಡ್ಡದಿದೆ. ಒಂದು ರೀತಿಯಲ್ಲಿ ಪತ್ರಕರ್ತರಿಂದಲೇ ನನಗೆ ಈ ಪ್ರಶಸ್ತಿ ಬಂದಿದೆ ಎಂದರೂ ತಪ್ಪಾಗಲಾರದು.

ರಾಜಕೀಯ ಅಧಿಕಾರ, ಚಿತ್ರರಂಗದ ವೈಭವ ಎರಡನ್ನೂ ಬಹಳ ಹತ್ತಿರದಿಂದ ನೋಡಿ, ಈಗ ಎರಡರಿಂದಲೂ ಅಂತರ ಕಾಯ್ದುಕೊಂಡಿದ್ದೀರಿ. ಈ ಪ್ರಶಸ್ತಿಯನ್ನು ಹೇಗೆ ನೋಡುತ್ತೀರಿ?

ಹೌದು, ನಾನು ರಾಜಕೀಯದಲ್ಲೂ ಇದ್ದೆ, ಸಚಿವನಾಗಿಯೂ ಜವಾಬ್ದಾರಿ ನಿರ್ವಹಿಸಿದ್ದೆ. ಚಿತ್ರರಂಗದಿಂದ ಈಗಿನ ಪರಿಸ್ಥಿತಿ ನೋಡಿ ಕೊಂಚ ದೂರ ಉಳಿದಿದ್ದೇನೆ. ಇದೀಗ ನನ್ನ ನಟನೆಯನ್ನು ಪರಿಗಣಿಸಿ ಈ ಅತ್ಯುನ್ನತ ಪ್ರಶಸ್ತಿ ನೀಡಿರುವುದು ಖುಷಿ ತಂದಿದೆ.

ಆಗ ಥಿಯೇಟರ್‌ ಟಾರ್ಚ್‌ ಬಾಯ್‌, ಈಗ ಸ್ಯಾಂಡಲ್‌ವುಡ್‌ನ ಯಶಸ್ವಿ ನಿರ್ದೇಶಕ

Sujatha NR — Thu, 08 Oct 2026 12:08:23 +0530

ಸಿನಿವಾರ್ತೆ

ಇದು ಎರಡು ದಿನಗಳ ಹಿಂದಿನ ಸನ್ನಿವೇಶ. ಅದು ನರ್ತಕಿ ಚಿತ್ರಮಂದಿರ. ಥಿಯೇಟರ್‌ ಮುಂದೆ ಹೌಸ್‌ಫುಲ್‌ ಬೋರ್ಡ್‌. ಥಿಯೇಟರ್‌ನ ಬಾಗಿಲು ಮುಂದೆ ಕೂತಿದ್ದ ವ್ಯಕ್ತಿಯಿಂದ ಯುವಕನೊಬ್ಬ ಟಾರ್ಚ್‌ ತೆಗೆದುಕೊಂಡು ಬೆಳಕು ಹರಿಸುತ್ತಾ ತುಂಬಿದ ಥಿಯೇಟರ್‌ಗೆ ಪ್ರವೇಶಿಸುತ್ತಾನೆ. ಹೀಗೆ ಪ್ರವೇಶಿಸುತ್ತಲೇ ಆತ ಭಾವುಕನಾಗುತ್ತಾನೆ. ಇದು ಸೋಷಿಯಲ್‌ ಮೀಡಿಯಾಗಳಲ್ಲಿ ಈಗ ಎಲ್ಲರ ಗಮನ ಸೆಳೆಯುತ್ತಿದೆ.

ಹೀಗೆ ತುಂಬಿದ ಚಿತ್ರಮಂದಿರದ ಕತ್ತಲಲ್ಲಿ ಟಾರ್ಚ್‌ ಬಿಟ್ಟುಕೊಂಡು ಥಿಯೇಟರ್‌ ಪ್ರವೇಶಿಸಿದ್ದು ‘ಪ್ರೇಮದ ಊರಲಿ’ ಚಿತ್ರದ ನಿರ್ದೇಶಕ ಮನೋಜ್‌ ಕುಮಾರ್‌. ಈ ಬ್ಯಾಟರಿ ಸನ್ನಿವೇಶ ವೈರಲ್‌ ಆಗಲು ‘ಪ್ರೇಮದ ಊರಲಿ’ ಚಿತ್ರದ ಸಕ್ಸಸ್‌ ಕಾರಣ ಎನ್ನುವುದಕ್ಕಿಂತ ನಿರ್ದೇಶಕ ಹಿನ್ನೆಲೆಯೇ ಕಾರಣ ಎಂಬುದು ಬಹುತೇಕರಿಗೆ ಗೊತ್ತಿಲ್ಲ ಅನಿಸುತ್ತದೆ. ಹೌದು, ತಾನು ನಿರ್ದೇಶಿಸಿ ಚಿತ್ರವು ತುಂಬಿದ ಥಿಯೇಟರ್‌ನಲ್ಲಿ ಪ್ರದರ್ಶನಗೊಳ್ಳುತ್ತಿದ್ದಾಗ ಟಾರ್ಚ್‌ ಬಾಯ್‌ನಂತೆ ಎಂಟ್ರಿ ಕೊಟ್ಟ ಮನೋಜ್‌ ಕುಮಾರ್‌ ಅವರಿಗೆ ಚಿತ್ರರಂಗದಲ್ಲಿ ಸಿಕ್ಕ ಮೊದಲ ವೃತ್ತಿ ಅದೇ ಥಿಯೇಟರ್‌ ಟಾರ್ಚ್‌ ಬಾಯ್‌.

ಡಾ ರಾಜ್‌ಕುಮಾರ್‌ ಅವರ ಸ್ಫೂರ್ತಿಯಿಂದ ಹುಟ್ಟಿಕೊಂಡ ಕತೆಯನ್ನುಪ ಒಳಗೊಂಡ ‘ಅಕ್ಷಿ’ ಚಿತ್ರ ನಿರ್ದೇಶಿಸಿ ರಾಷ್ಟ್ರ ಪ್ರಶಸ್ತಿಗೆ ಪಾತ್ರರಾದವರು, ದರ್ಶನ್‌, ಮಾಲಾಶ್ರೀ ಅವರ ಚಿತ್ರಗಳಿಗೆ ಅಸಿಸ್ಟೆಂಟ್‌ ಡೈರೆಕ್ಟರ್‌ ಆಗಿ ಕೆಲಸ ಮಾಡಿದವರು, ನಿರ್ದೇಶಕ ಓಂ ಪ್ರಕಾಶ್‌ ರಾವ್‌ ಜೊತೆಗೆ ಸಹಾಯಕರಾಗಿದ್ದವರು...ಇದು ಮನೋಜ್‌ ಕುಮಾರ್‌ ಅವರ ಬಗ್ಗೆ ಗೊತ್ತಿರುವ ಮಾಹಿತಿ. ಆದರೆ, ಇದೆಲ್ಲದಕ್ಕೂ ಮೊದಲು ಅವರು ಟಾರ್ಚ್‌ ಬಾಯ್‌ ಆಗಿದ್ದರು ಎಂಬುದು ಕುತೂಹಲ. ಆ ಬಗ್ಗೆ ಅವರ ಮಾತುಗಳಲ್ಲೇ ಕೇಳಿ.

‘ನಾನು ನಿರ್ದೇಶಕನಾಲು ಗಾಂಧಿನಗರಕ್ಕೆ ಬಂದೆ. ಆದರೆ, ಅಷ್ಟು ಬೇಗ ನಿರ್ದೇಶಕನಾಗುವ ಅವಕಾಶ ಸಿಗಲಿಲ್ಲ. ಜೀವನ ನಡೆಯೋದು ಕಷ್ಟ ಆಗಿತ್ತು. ಅಂಥ ಸಮಯದಲ್ಲಿ ನನಗೆ ಚಿತ್ರರಂಗದಲ್ಲಿ ಮೊದಲು ಸಿಕ್ಕ ಕೆಲವೇ ಸಂತೋಷ್‌ ಚಿತ್ರಮಂದಿರದಲ್ಲಿ ಟಾರ್ಚ್‌ ಬಾಯ್‌ ಕೆಲಸ. ನಾನು ಬಹಳಷ್ಟು ಚಿತ್ರಗಳಿಗೆ ಟಾರ್ಚ್‌ ಬಾಯ್‌ ಆಗಿ ಕೆಲಸ ಮಾಡಿದ್ದೇನೆ. ಈ ಪೈಕಿ ನಾನು ಮರೆಯಲಾಗದ ಸಿನಿಮಾ ಎಂದರೆ ಪುನೀತ್‌ ರಾಜ್‌ಕುಮಾರ್‌ ನಟನೆಯ ‘ಅರಸು’. ನಾನು ಟಾರ್ಚ್‌ ಬಾಯ್‌ ಆಗಿ ಕೆಲಸ ಮಾಡಿದ್ದ ಸಂತೋಷ್‌ ಥಿಯೇಟರ್‌ ಪಕ್ಕದಲ್ಲೇ ಇರುವ ನರ್ತಕಿ ಚಿತ್ರಮಂದಿರದಲ್ಲಿ ಈಗ ನನ್ನ ನಿರ್ದೇಶನದ ‘ಪ್ರೇಮದ ಊರಲಿ’ ಸಿನಿಮಾ ಹೌಸ್‌ಫುಲ್‌ ಪ್ರದರ್ಶನ ಕಾಣುತ್ತಿದೆ. ರಾತ್ರಿ ಹೊತ್ತು ಹೌಸ್‌ಫುಲ್‌ ಆದಾಗ ನಮ್ಮನ್ನು ಥಿಯೇಟರ್‌ ಒ‍ಳ‍ಗೆ ಬಿಡುತ್ತಿರಲಿಲ್ಲ. ಪ್ರದರ್ಶನಗಳು ಮುಗಿದ ಮೇಲೆ ಅಲ್ಲೇ ಹಾಸಿಗೆ ಹಾಕಿಕೊಂಡು ಥಿಯೇರ್‌ ಮುಂದೆ ಮಲಗುತಿದ್ವಿ. ಇವತ್ತು ಅದೇ ಥಿಯೇಟರ್‌ ಮುಂದೆ ನನ್ನ ಸಿನಿಮಾ ನೋಡಲು ಜನ ಕಾಯುತ್ತಿದ್ದಾರೆ. ಇದು ನನ್ನ 18 ವರ್ಷಗಳ‍ ಕನಸು. ‘ಪ್ರೇಮದ ಊರಲಿ’ ಚಿತ್ರಕ್ಕೆ ಹಾಗೂ ಈ ಚಿತ್ರವನ್ನು ಗೆಲ್ಲಿಸುತ್ತಿರುವ ಇಡೀ ಕರ್ನಾಟಕಕ್ಕೇ ನಾನು ಋಣಿ’ ಎಂದು ಭಾವುಕರಾಗುತ್ತಾರೆ ಮನೋಜ್‌ ಕುಮಾರ್‌.

ಟಾರ್ಚ್‌ ಬಾಯ್‌ ಆಗಿ ಕೆಲಸ

ಟಾರ್ಚ್‌ ಬಾಯ್‌ ಆಗಿ ಕೆಲಸ ಮಾಡುತ್ತಾ, ಸಿನಿಮಾ ಕನಸುಗಳನ್ನು ಕಾಣುವ ಜೊತೆಗೆ ಜೀವನಕ್ಕಾಗಿ ದಿನದ ಕೂಲಿಗಾಗಿ ಪರದಾಡುತ್ತಿದ್ದ ಮನೋಜ್‌ ಕುಮಾರ್‌ ನಿರ್ದೇಶನದಲ್ಲಿ ಮೂಡಿ ಬಂದಿರುವ ‘ಪ್ರೇಮದ ಊರಲಿ’ ಚಿತ್ರವು ಈವರೆಗೂ 17 ಕೋಟಿಗೂ ಹೆಚ್ಚು ಕೆಲೆಕ್ಷನ್‌ ಮಾಡಿದೆ. ಇದೇ ಕಲೆಕ್ಷನ್‌ ಮುಂದುವರೆದರೆ 50 ಕೋಟಿಯ ಗಳಿಕೆಯ ಗಡಿ ಮುಟ್ಟೋದು ಪಕ್ಕಾ ಎನ್ನುತ್ತಿದೆ ಚಿತ್ರರಂಗ. ಹಾಗೇನಾದರು ಆದರೆ ಕನ್ನಡ ಚಿತ್ರವೊಂದರ ಬಹುದೊಡ್ಡ ದಾಖಲೆ ಆಗಿ ನಿಲ್ಲುವುದರಲ್ಲಿ ಅನುಮಾನ ಇಲ್ಲ. ಜೊತೆಗೆ ‘50 ಕೋಟಿ ಮುಟ್ಟಿದ ಟಾರ್ಚ್‌ ಬಾಯ್‌ ನಿರ್ದೇಶನದ ಚಿತ್ರ’ ಎನ್ನುವ ಹೆಗ್ಗಳಿಕೆಗೂ ಪಾತ್ರವಾಗಲಿದೆ.

ಮದ್ಯಪಾನ, ಮದ್ಯವರ್ತಿ ಎರಡರಿಂದಲೂ ದೂರ : ಶಿವಣ್ಣ

Sujatha NR — Fri, 02 Oct 2026 13:34:56 +0530

‘ಬೇಲ್’ ಬಿಡುಗಡೆ ಪ್ರಯುಕ್ತ ಶಿವರಾಜ್ ಕುಮಾರ್ ಮುಕ್ತ ಮಾತುಕತೆಗೆ ಸಿಕ್ಕಿದ್ದರು. ಈ ಸಂದರ್ಭದಲ್ಲಿ ತಮ್ಮ ಜೀವನದ ಕುರಿತು, ಪಾತ್ರಗಳು, ಸಿನಿಮಾ, ಜೀವನಶೈಲಿ ಕುರಿತು ಅತ್ಯಂತ ಲವಲವಿಕೆಯಿಂದ, ಮುಕ್ತವಾಗಿ ಮಾತನಾಡಿದರು. ಆ ಮಾತುಗಳು ಇಲ್ಲಿವೆ.

ಅದು ನನ್ನ ಬದುಕಿನ ಅತ್ಯಂತ ಕಠಿಣ ಘಟ್ಟ

- ಅದು ನನ್ನ ಬದುಕಿನ ಅತ್ಯಂತ ಕಠಿಣ ಘಟ್ಟ. ಬ್ಲಾಡರ್ ಕ್ಯಾನ್ಸರ್ ಪತ್ತೆಯಾಗಿದ್ದ ದಿನಗಳವು. ಅಂತಹ ಕತ್ತಲೆಯ ಹೊತ್ತಿನಲ್ಲಿ ನಿರ್ದೇಶಕ ಪವನ್ ಒಡೆಯರ್ ಕಥೆ ಹೇಳಲು ಬಂದರು. ನಾನೀಗ ಅಮೆರಿಕಕ್ಕೆ ಸರ್ಜರಿಗೆ ಹೋಗಬೇಕು, ಸಿನಿಮಾ ಮಾಡಲು ಶಕ್ತಿ ಉಳಿಯುತ್ತೋ ಇಲ್ಲವೋ ಗೊತ್ತಿಲ್ಲ ಎಂದೆ. ಆದರೆ ನಾನು ವಿಮಾನವೇರಲು ಕೇವಲ ಎರಡು ದಿನಗಳಿರುವಾಗ ಪವನ್ ಹಾಗೂ ಅವರ ಪತ್ನಿ ಅಪೇಕ್ಷಾ ಮನೆಗೆ ಬಂದು ನಾನು ಎಷ್ಟೇ ನಿರಾಕರಿಸಿದರೂ ಕೇಳದೆ, ‘ಶಿವಣ್ಣ, ನೀವೇ ಈ ಸಿನಿಮಾ ಮಾಡಬೇಕು, ನೀವು ಸಂಪೂರ್ಣ ಗುಣಮುಖರಾಗಿ ಬರುವವರೆಗೂ ಕಾಯುತ್ತೇವೆ’ ಎಂದು ಒತ್ತಾಯಪೂರ್ವಕವಾಗಿ ಕೈಗೆ ಅಡ್ವಾನ್ಸ್ ಇಟ್ಟು ಹೋದರು. ಆ ದಂಪತಿ ನನ್ನ ಮೇಲಿಟ್ಟ ವಿಶ್ವಾಸವೇ ನನ್ನಲ್ಲಿ ಸಾವನ್ನು ಗೆಲ್ಲುವ ಧೈರ್ಯ ತುಂಬಿತು. ಅಮೆರಿಕದಲ್ಲಿ ಮೇಜರ್ ಸರ್ಜರಿ ಮುಗಿದು ಪ್ರಜ್ಞೆ ಬಂದ ಕೇವಲ ಎರಡೇ ಗಂಟೆಯಲ್ಲಿ ನಾನು ಮೊದಲು ಕರೆ ಮಾಡಿದ್ದೇ ಪವನ್‌ಗೆ.

- ‘ಬೇಲ್’ ಚಿತ್ರದ ಒನ್‌ಲೈನ್ ಕೇಳಿದ ತಕ್ಷಣವೇ ನನಗೆ ಗಾಢವಾಗಿ ತಟ್ಟಿತು

- ‘ಬೇಲ್’ ಚಿತ್ರದ ಒನ್‌ಲೈನ್ ಕೇಳಿದ ತಕ್ಷಣವೇ ನನಗೆ ಗಾಢವಾಗಿ ತಟ್ಟಿತು. ಇಂತಹ ಕಥೆಗಳು ಬಂದೇ ಇಲ್ಲ ಎಂದಲ್ಲ, ಆದರೆ ಪವನ್ ಈ ಕಥೆಯನ್ನು ತೆರೆಗೆ ತಂದಿರುವ ನಿರೂಪಣೆ ಇಡೀ ಚಿತ್ರಕ್ಕೆ ಹೊಸ ಕಳೆ ತಂದಿದೆ. ಇದು ಕೇವಲ ಒಂದು ಜಾನರ್‌ಗೆ ಸೀಮಿತವಾದ ಚಿತ್ರವಲ್ಲ. ಥ್ರಿಲ್ಲರ್, ಕಾಮಿಡಿ, ಫ್ಯಾಮಿಲಿ ಡ್ರಾಮಾ, ಕ್ರೈಮ್ ಹಾಗೂ ಸಮಾಜಕ್ಕೆ ಅಗತ್ಯವಿರುವ ಗಟ್ಟಿ ಸಂದೇಶ ಎಲ್ಲವೂ ಒಂದೇ ಕಡೆ ಇದೆ. ತೆಲುಗಿನ ‘ಪೆದ್ದಿ’ ಚಿತ್ರೀಕರಣದ ವೇಳೆ ನನ್ನ ಈ ಗೆಟಪ್ ನೋಡಿ ನಟ ರಾಮ್‌ಚರಣ್ ಕೂಡ ಮೆಚ್ಚಿದ್ದರು.

- ಚಿತ್ರದಲ್ಲಿ ಜಯರಾಮ್, ಸಾಯಿಕುಮಾರ್, ಸಂಗೀತಾ, ಸಂಜನಾ, ಲೂಸ್ ಮಾದ ಯೋಗಿ ಮತ್ತು ದೀಕ್ಷಿತ್ ಶೆಟ್ಟಿ ಸೇರಿದಂತೆ ಎಲ್ಲರ ಪಾತ್ರಗಳೂ ಕಥೆಯ ಜೀವಾಳವಾಗಿವೆ. ವೈದಿ ಅವರ ದೃಶ್ಯವೈಭವ ಮತ್ತು ಅಜನೀಶ್ ಲೋಕನಾಥ್ ಸಂಗೀತ ಚಿತ್ರದ ಬಲ.

- ಹಳೆಯ ಅಬ್ಬರದ ಮಾಸ್ ಇಮೇಜ್ ಮಾಡಿ ಮಾಡಿ ಸಾಕಾಗಿಹೋಗಿದೆ. ಕೇವಲ ಉದ್ದುದ್ದ ಡೈಲಾಗ್ ಹೊಡೆದು ಕಿರುಚುವುದಷ್ಟೇ ನಟನೆಯಲ್ಲ. ಪಾತ್ರದ ಕಣ್ಣುಗಳಲ್ಲೇ ನೋವು, ಹತಾಶೆ ಮತ್ತು ಆಕ್ರೋಶ ಹೊಮ್ಮಬೇಕು. ಆ ನೈಜ ಅಭಿನಯಕ್ಕೆ ‘ಬೇಲ್’ನಲ್ಲಿ ಅಪಾರ ಜಾಗವಿದೆ. ಶೂಟಿಂಗ್ ವೇಳೆ ಅಪಾಯಕಾರಿ ಸಾಹಸ ದೃಶ್ಯಗಳಿಗೆ ಡ್ಯೂಪ್ ತರಲು ನಿರ್ಧರಿಸಿದ್ದರು. ಅವರು ಅದ್ಭುತವಾಗಿ ಸಾಹಸ ಮಾಡಬಹುದು, ಆದರೆ ನನ್ನದೇ ಆದ ಬಾಡಿ ಲಾಂಗ್ವೇಜ್ ಮತ್ತು ಆ ಸ್ವಾಗ್ ನನ್ನಿಂದ ಮಾತ್ರ ಸಾಧ್ಯ ಎಂದು ನಾನೇ ರಿಸ್ಕ್ ತೆಗೆದುಕೊಂಡು ಆ್ಯಕ್ಷನ್ ಮಾಡಿದೆ.- ಕೆಲವು ತಂಡಗಳು ಆರಂಭದಲ್ಲಿ ಬೆಟ್ಟದಷ್ಟು ಜೋಶ್‌ನಲ್ಲಿ ಬಂದು ನಂತರ ತಣ್ಣಗಾಗಿಬಿಡುತ್ತವೆ. ಚಿತ್ರರಂಗದ ತೆರೆಮರೆಯಲ್ಲಿ ಮಧ್ಯವರ್ತಿಗಳು ಕೆಲವರು ನನ್ನ ಹೆಸರನ್ನೇ ದಾಳವಾಗಿಟ್ಟುಕೊಂಡು ಆಟವಾಡುತ್ತಿದ್ದರು. ಅವರ ಹೆಸರನ್ನು ಪ್ರಸ್ತಾಪಿಸಿ ಹೊಸ ವಿವಾದ ಹುಟ್ಟುಹಾಕಲು ನಾನು ಬಯಸುವುದಿಲ್ಲ. ಆದರೆ ಅಂತಹ ಮಧ್ಯವರ್ತಿಗಳ ಜಾಲದಿಂದ ನಾನು ಸಂಪೂರ್ಣವಾಗಿ ಹೊರಬಂದಿದ್ದೇನೆ. ಈಗೇನಿದ್ದರೂ ನಿರ್ಮಾಪಕರು ಮತ್ತು ನಿರ್ದೇಶಕರೊಂದಿಗೆ ನಾನೇ ನೇರವಾಗಿ ಮುಖಾಮುಖಿ ಮಾತನಾಡುತ್ತೇನೆ.

- ಆಪರೇಷನ್ ನಂತರ ಬದುಕಿನ ಲಯವೇ ಬದಲಾಗಿದೆ. ಕಳೆದ ಎರಡು ವರ್ಷಗಳಿಂದ ಧೂಮಪಾನ ಮತ್ತು ಮದ್ಯಪಾನವನ್ನು ಸಂಪೂರ್ಣವಾಗಿ ತ್ಯಜಿಸಿದ್ದೇನೆ. ದಿನವೂ ನಿಗದಿತ ಸಮಯಕ್ಕೆ ವಾಕಿಂಗ್, ಲಘು ವ್ಯಾಯಾಮ ಮತ್ತು ಕಟ್ಟುನಿಟ್ಟಿನ ಆಹಾರ ಪದ್ಧತಿ ಪಾಲಿಸುತ್ತಿದ್ದೇನೆ. 2015ರಲ್ಲಿ ಎದುರಾಗಿದ್ದ ಹೃದಯ ಸಮಸ್ಯೆಗೆ ಸಂಬಂಧಿಸಿದ ಕೆಲವು ನಿಯಮಿತ ಔಷಧಿಗಳನ್ನು ಹೊರತುಪಡಿಸಿದರೆ, ನಾನೀಗ ನೂರಕ್ಕೆ ನೂರು ಫಿಟ್ ಆಗಿದ್ದೇನೆ. ವೈದ್ಯರಾದ ಡಾ. ಮನೋಹರನ್ ಹದಿನೈದು ದಿನಕ್ಕೊಮ್ಮೆ ಕಾಲ್ ಮಾಡಿ ನನ್ನ ಆರೋಗ್ಯದ ನಿಗಾ ವಹಿಸುತ್ತಾರೆ.

ಅನಂತ್ ನಾಗ್ ಅವರಿಗೆ ಫಾಲ್ಕೆ ಸಂದಿದ್ದು ನಮ್ಮ ಹೆಮ್ಮೆ

‘ಅನಂತ್ ನಾಗ್ ಸರ್ ಸರ್ ನನ್ನ ಸದಾಕಾಲದ ಅಚ್ಚುಮೆಚ್ಚಿನ ನಟ. ಅವರ ಮೊದಲ ಸಿನಿಮಾ ‘ಅಂಕುರ್’ ದಿನಗಳಿಂದಲೂ ಅವರ ಅಭಿನಯವನ್ನು ಕಣ್ತುಂಬಿಕೊಂಡಿದ್ದೇನೆ. ಭಾರತೀಯ ಚಿತ್ರರಂಗದ ಅತ್ಯಂತ ಸ್ಫುರದ್ರೂಪಿ ಹಾಗೂ ಸಿನಿಮಾದ ನಾಡಿಮಿಡಿತವನ್ನು ಆಳವಾಗಿ ಬಲ್ಲ ಅಪರೂಪದ ಮೇರು ಕಲಾವಿದ ಅವರು. ಅವರ ಕಂಠ, ಸ್ಪಷ್ಟ ಕನ್ನಡ ಉಚ್ಚಾರಣೆ ಎಲ್ಲವೂ ಅನನ್ಯ. ಸಿಕ್ಕಾಗಲೆಲ್ಲ ಶಂಕರ್ ನಾಗ್ ಮತ್ತು ಅಪ್ಪಾಜಿಯವರ ಒಡನಾಟದ ದಿನಗಳನ್ನು ಮೆಲಕು ಹಾಕುತ್ತಾರೆ. ಅವರ ಜತೆ ಮಾತನಾಡುತ್ತಿದ್ದರೆ ಸಮಯ ಹೋಗುವುದೇ ತಿಳಿಯುವುದಿಲ್ಲ. ಅವರಿಗೆ ಫಾಲ್ಕೆ ಪ್ರಶಸ್ತಿ ಸಂದಿರುವುದು ನಿಜಕ್ಕೂ ಅರ್ಥಪೂರ್ಣ.’

ಯೋಗಿಗೆ ಭವಿಷ್ಯವಿದೆ

‘ಸಿನಿಮಾದಲ್ಲಿ ಕಾಸ್ಟಿಂಗ್ ತುಂಬಾ ಪರ್ಫೆಕ್ಟ್ ಆಗಿದೆ. ಯೋಗಿ ತುಂಬಾ ವಂಡರ್‌‌ಫುಲ್ ಆಕ್ಟರ್. ಆತ ನೋಡೋಕೆ ತುಂಬಾ ರಸ್ಟಿಕ್ ಆಗಿ ಕಾಣಿಸ್ತಾನೆ, ಈಗಂತೂ ಆ ಪಾತ್ರಕ್ಕೆ ಇನ್ನಷ್ಟು ರಫ್ & ರಸ್ಟಿಕ್ ಆಗಿ ಕಾಣಿಸ್ತಿದ್ದಾನೆ. ಆ ಹುಡುಗನಿಗೆ ತುಂಬಾ ಒಳ್ಳೆ ಭವಿಷ್ಯವಿದೆ.

ಕಾರ್ಟೂನ್‌ ನೆಟ್‌ವರ್ಕ್‌ ನೋಡಿಕೊಂಡಿದ್ದವಳು, ಹೀರೋಯಿನ್‌ ಆಗ್ಬಿಟ್ಟೆ: ತಪಸ್ವಿನಿ ಪೂಣಚ್ಚ

Sujatha NR — Fri, 16 Oct 2026 13:58:28 +0530

ಪ್ರೇಮದ ಊರಲಿ ಚಿತ್ರದ ರುಕ್ಮಿಣಿ ಪಾತ್ರದ ಮಾತುಗಳು

- ಆರ್‌.ಕೇಶವಮೂರ್ತಿ

ಅದ್ದೂರಿ ಪ್ರತಿಕ್ರಿಯೆ ಯಾವ ರೀತಿಯ ಸಂತೋಷ, ಆತ್ಮವಿಶ್ವಾಸವನ್ನು ಮೂಡಿಸಿದೆ?

ಇದು ಜನರ ಪ್ರೀತಿಯಿಂದ ಸಿಕ್ಕ ಜಯ. ಎಂಥ ಸಂದರ್ಭದಲ್ಲೂ ಒಳ್ಳೆಯ ಸಿನಿಮಾ ಗೆದ್ದೇ ಗೆಲ್ಲುತ್ತದೆ ಎಂಬ ವಿಶ್ವಾಸ ಮೂಡಿಸಿದೆ. ಈ ಯಶಸ್ಸಿನ ಶ್ರೇಯ ಇಡೀ ತಂಡಕ್ಕೆ ಸಲ್ಲಬೇಕು.

ಈ ಪಾತ್ರವನ್ನು ಒಪ್ಪಿಕೊಳ್ಳಲು ಪ್ರೇರೇಪಿಸಿದ ಅಂಶ ಯಾವುದು? ಸಿದ್ಧತೆಗಳೇನು?

ಮೊದಲ ಕಾರಣ ನಿರ್ದೇಶಕ ಮನೋಜ್ ಕುಮಾರ್. ನಂತರ ಅವರು ಹೇಳಿದ ಕತೆ ಮತ್ತು ಪಾತ್ರದ ತೂಕ. ಹೆಚ್ಚು ಸಂಭಾಷಣೆ ಇಲ್ಲದೆ ಕಣ್ಣೋಟದಲ್ಲೇ ಭಾವನೆಗಳನ್ನು ಕಟ್ಟಿಕೊಡುವ ಸವಾಲಿತ್ತು. ಚಿತ್ರೀಕರಣಕ್ಕೂ ಮುನ್ನ ನಡೆದ ವರ್ಕ್‌ಶಾಪ್ ಈ ಪಾತ್ರದ ಪೋಷಣೆಗೆ ಸಾಕಷ್ಟು ನೆರವಾಯಿತು.

ಪ್ರೇಕ್ಷಕರು ರುಕ್ಮಿಣಿ ಪಾತ್ರವನ್ನು ಇಷ್ಟಪಡುತ್ತಿರುವುದಕ್ಕೆ ಕಾರಣ ಏನಿರಬಹುದು?

ನನ್ನ ಪಾತ್ರಕ್ಕೆ ಇದ್ದ ಸರಳತೆ ಮತ್ತು ಸಹಜತೆ. ದೊಡ್ಡ ಫ್ಯಾಮಿಲಿ, ಶ್ರೀಮಂತರು, ವಿದೇಶದಿಂದ ಬಂದವಳು, ಓದಿದ್ದಾಳೆ... ಇಷ್ಟೆಲ್ಲಾ ಇದ್ದಾಗಲೂ ಯಾವುದೇ ಆಡಂಬರ, ಇಗೋ ಇಲ್ಲದೆ ಡೌನ್ ಟು ಅರ್ತ್‌ ಎನ್ನುವಂತೆ ಮೂಡಿ ಬಂದಿರುವುದಕ್ಕೇ ಪ್ರೇಕ್ಷಕರಿಗೆ ನನ್ನ ಪಾತ್ರ ಇಷ್ಟವಾಗಿದೆ.

ಈ ಚಿತ್ರದಲ್ಲಿ ನಟಿಸುವಾಗ ನಿಮಗೆ ವೈಯಕ್ತಿಕವಾಗಿ ಹೆಚ್ಚು ಆಪ್ತವೆನಿಸಿದ ಸನ್ನಿವೇಶ ಯಾವುದು, ಯಾಕೆ?

ರಂಗಾಯಣ ರಘು ಅವರ ಜೊತೆಗೆ ನಟಿಸಿದ ದೃಶ್ಯಗಳು. ಇವು ಆಪ್ತವಾಗಿರುವುದು ಮಾತ್ರವಲ್ಲ, ಈಗಲೂ ನಾನು ಮರೆಯಲಾಗದ ಸನ್ನಿವೇಶಗಳು. ಅದರಲ್ಲೂ ಮಳೆಯಲ್ಲಿ ರಾತ್ರಿ ಹೊತ್ತಿನಲ್ಲಿ ಶೂಟ್‌ ಮಾಡಿದ ಕ್ಲೈಮ್ಯಾಕ್ಸ್‌, ರಂಗಾಯಣ ರಘು ಅವರ ಕಾಲು ಮುಟ್ಟಿ ನಮಸ್ಕರಿಸುವ ಸನ್ನಿವೇಶಗಳನ್ನು ನೆನಪಿಸಿಕೊಂಡರೆ ಮಾತೇ ಹೊರಡಲ್ಲ. ಯಾಕೆಂದರೆ ಅವರಿಂದ ನಾನು ತುಂಬಾ ಕಲಿತಿದ್ದೇನೆ.

ನಿಮ್ಮ ಪಾತ್ರಕ್ಕೆ ತನ್ನದೇ ಆದ ಭಾವನಾತ್ಮಕ ನೆಲೆ ಹಾಗೂ ಸ್ವತಂತ್ರ ವ್ಯಕ್ತಿತ್ವವಿದೆ ಎಂದು ನಿಮಗೆ ಅನಿಸಿದೆಯೇ?

ಖಂಡಿತ ಇದೆ. ಹಾಗೆ ಇದ್ದಿದ್ದಕ್ಕೆನೇ ರುಕ್ಮಿಣಿ ಎನ್ನುವ ಪಾತ್ರ ಪ್ರತಿಯೊಬ್ಬರಿಗೂ ಕನೆಕ್ಟ್‌ ಆಗಿರುವುದು. ನಾನು ಕತೆ ಕೇಳುವಾಗಲೇ ಇಲ್ಲಿ ಪ್ರತಿ ಪಾತ್ರಕ್ಕೂ ಅದರದ್ದೇ ಆದ ತೂಕ ಇದೆ. ಆ ತೂಕದ ತಕ್ಕಡಿಯಲ್ಲಿ ಪಾತ್ರಗಳು ಸಾಗುತ್ತವೆ ಎನ್ನುವ ಚಿತ್ರಣ ಇತ್ತು. ಇದು ತಾಯಿ ಇಲ್ಲದೆ ಬೆಳೆದ ಮಗನ ತಂದೆಯ ಕತೆ. ರಂಗಾಯಣ ರಘು ಪಾತ್ರದ ಲೈಫಿನ ಕತೆ. ಆ ಲೈಫಿನ ಸುತ್ತಾ ನನ್ನ ಪಾತ್ರವೂ ಸೇರಿದಂತೆ ಎಲ್ಲರೂ ಬರುತ್ತಾರೆ.

ನಾಯಕಿಯಾಗಿ ಗುರುತಿಸಿಕೊಳ್ಳುವ ನಿಮ್ಮ ಪ್ರಯಾಣದಲ್ಲಿ ‘ಪ್ರೇಮದ ಊರಲಿ’ ಚಿತ್ರ ಯಾವ ರೀತಿಯ ತಿರುವು ನೀಡಲಿದೆ?

ಗೆಲುವನ್ನು ಅತಿಯಾದ ಸಂಭ್ರಮವಿಲ್ಲದೆ ಸಹಜವಾಗಿಯೇ ಸ್ವೀಕರಿಸಿದ್ದೇನೆ. ಮುಂದೆ ಏನಾಗಲಿದೆ ಎಂದು ಲೆಕ್ಕಾಚಾರ ಹಾಕುತ್ತಿಲ್ಲ. ಉತ್ತಮ ಪಾತ್ರಗಳು ಬರಬಹುದೆಂಬ ನಿರೀಕ್ಷೆಯಷ್ಟೇ ಇದೆ.

ಈಗ ಪ್ರೇಕ್ಷಕರು ಪ್ರೇಮಕತೆಗಳಲ್ಲಿ ಯಾವ ರೀತಿಯ ಭಾವನೆಗಳನ್ನು ಹಾಗೂ ಹೊಸತನವನ್ನು ನಿರೀಕ್ಷಿಸುತ್ತಿದ್ದಾರೆ?

ಟ್ರೂ ಲವ್‌ ಎಲ್ಲರಿಗೂ ಬೇಕಿದೆ. ಅದು ಸಿನಿಮಾಗಳಲ್ಲೂ ಕೂಡ. ಈಗ ಜೆನ್‌ ಜೀ ಜಮಾನ ಅಂತೀವಿ. ಅವರು ಕೂಡ ಹುಡುಕುತ್ತಿರುವುದು ಅಥವಾ ನಿರೀಕ್ಷೆ ಮಾಡುತ್ತಿರುವುದು ನೈಜ ಮತ್ತು ನಿಜವಾದ ಪ್ರೀತಿ, ಫ್ಯಾಮಿಲಿ ಬಾಂಡಿಂಗ್‌, ಹೆಣ್ಣ ಮಕ್ಕಳನ್ನು ಗೌರವಿಸುವಂತಹ ವಿಷಯಗಳಿಗೆ ತುಂಬಾ ಮಹತ್ವ ಕೊಡುತ್ತಿದ್ದಾರೆ. ಅಂಥ ಅಂಶಗಳು ಚಿತ್ರಗಳಿದ್ದರೆ ಎಲ್ಲರಿಗೂ ಮೆಚ್ಚುಗೆ ಆಗುತ್ತದೆ.

ನಿಮಗೆ ಎದುರಾದ ಅಂಥ ಸವಾಲುಗಳು ಯಾವುವು, ಅದರಿಂದ ಕಲಿತ ಪಾಠಗಳೇನು?

ಸವಾಲುಗಳು ನನಗೆ ಖುಷಿ ಕೊಡುತ್ತದೆ. ಅವುಗಳನ್ನು ದಾಟಿದಾಗಲೇ ಸಕ್ಸಸ್‌ ಸಿಗೋದು ಅನ್ನೋ ಸತ್ಯ ಗೊತ್ತಿದೆ. ಪಾಠಗಳು ಕಲಿತಿದ್ದು ಅವಮಾನಗಳಿಂದ. ಯಶಸ್ಸು ಇಲ್ಲದಿದ್ದಾಗ ನಮ್ಮ ನೋಡುವ ರೀತಿ, ಮಾತನಾಡಿಸುವ ಸಂದರ್ಭಗಳು, ನಡೆಸಿಕೊಳ್ಳುವ ರೀತಿಯೇ ಬೇರೆ. ಅದನ್ನು ಹೇಳಕ್ಕಾಗಲ್ಲ. ಆದರೆ, ಅಂಥವನ್ನು ನೋಡಿ ಜೋರಾಗಿ ಮಾತನಾಡುವುದಕ್ಕಿಂತ ಸೈಲೆಂಟಾಗಿದ್ದರೆ ಒಂದು ದಿನ ನಮ್ಮ ಕೆಲಸವೇ ಉತ್ತರಿಸುತ್ತದೆ. ನಾವು ಶೋ ಮಾಡಬೇಕಿರೋದು ನಮ್ಮ ಯಶಸ್ಸನ್ನೇ.

ಮುಂದೆ ನಿಮ್ಮಿಂದ ಪ್ರೇಕ್ಷಕರು ಯಾವ ರೀತಿಯ ಪಾತ್ರಗಳನ್ನು ನಿರೀಕ್ಷಿಸಬಹುದು? ನಿಮ್ಮ ಕನಸಿನ ಪಾತ್ರ ಯಾವುದು?

ನನಗೆ ಎಲ್ಲಾ ರೀತಿಯ ಪಾತ್ರಗಳನ್ನು ಮಾಡುವಾಸೆ. ಎಕ್ಸ್‌ಪ್ಲೋರ್‌ ಮಾಡುವ ಮನಸ್ಥಿತಿಯವಳು ನಾನು. ಅಂಥ ಎಕ್ಸ್‌ಪ್ಲೋರ್‌ ಆಗುವಂತಹ ಪಾತ್ರಗಳಿಗೆ ಕಾಯುತ್ತಿದ್ದೇನೆ. ಮೈಥಾಲಾಜಿಕಲ್‌ ಹಾಗೂ ಹಿಸ್ಟಾರಿಕಲ್‌ ಕತೆಗಳಲ್ಲಿ ಪಾತ್ರ ಮಾಡುವ ಕನಸು ಇದೆ.

ನೀವು ‘ಹರಿಕಥೆ ಅಲ್ಲ ಗಿರಿಕಥ’ ಚಿತ್ರದ ಮೂಲಕ ಕನ್ನಡ ಚಿತ್ರರಂಗಕ್ಕೆ ಬಂದವರು ಅಂತ ಗೊತ್ತು. ಈ ಚಿತ್ರಕ್ಕೆ ನೀವು ಕನೆಕ್ಟ್‌ ಆಗಿದ್ದು ಹೇಗೆ?

ಇದಕ್ಕೆ ನಟ, ನಿರ್ದೇಶಕ ರಿಷಬ್‌ ಶೆಟ್ಟಿ ಅವರಿಗೆ ಥಾಂಕ್ಸ್‌ ಹೇಳಬೇಕು. ಯಾಕೆಂದರೆ 2500 ಮಂದಿ ಹುಡುಗಿಯರಲ್ಲಿ ನನ್ನ ಒಂದು ಕ್ಯಾಂಡಿಡ್‌ ಫೋಟೋ ನೋಡಿ ಚಿತ್ರಕ್ಕೆ ಸೆಲೆಕ್ಟ್‌ ಮಾಡಿಕೊಂಡರು. ಮೂರು ತಿಂಗಳು ಅಭಿನಯ ತರಬೇತಿ ಕೊಟ್ಟರು. ಈ ಎಲ್ಲಾ ಕ್ರೆಡಿಟ್ಟು ರಿಷಬ್‌ ಶೆಟ್ಟಿ ಅವರಿಗೆ ಸೇರಬೇಕು.

ನೀವು ಚಿತ್ರರಂಗಕ್ಕೆ ಬರಬೇಕೆಂದು ತಯಾರಿ ಮಾಡಿಕೊಳ್ಳುತ್ತಿದ್ರಾ?

ಖಂಡಿತ ಇಲ್ಲ. ಯಾಕೆಂದರೆ ಆಕಸ್ಮಿಕವಾಗಿ ನಾನು ಆಡಿಷನ್‌ಗೆ ಫೋಟೋ ಕಳುಹಿಸಿದೆ. ಅದನ್ನು ನೋಡಿ ರಿಷಬ್‌ ಆಯ್ಕೆ ಮಾಡಿದರು ಅಂತ ಗೊತ್ತಾಗಿ ನನಗೇ ಶಾಕ್‌ ಆಯಿತು. ಮಾಡೆಲಿಂಗ್‌ ಇಲ್ಲ, ಸೀರಿಯಲ್‌ ಇಲ್ಲ. ರಂಗಭೂಮಿಯ ನಂಟು ಇಲ್ಲ. ಕಾರ್ಟೂನ್‌ ನೆಟ್ವರ್ಕ್‌ ಚಾನಲ್‌ ನೋಡಿಕೊಂಡಿದ್ದವಳು ನಾನು... ಹ್ಹಹ್ಹಹ್ಹ. ಹೀಗೆ ನಟಿಯಾಗಿ ಬಂದಿದ್ದೇ ಆಕಸ್ಮಿಕ.

ನಿಮ್ಮ ಮುಂದಿನ ಸಿನಿಮಾ ಯಾವಾಗ?

ಡಿ.4ಕ್ಕೆ ಮಿಸ್ಟರ್ ಜಾಕ್‌ ಎನ್ನುವ ಸಿನಿಮಾ ತೆರೆಗೆ ಬರಲಿದೆ. ಈ ಚಿತ್ರದಲ್ಲಿ ನಾನು ಟೀಚರ್‌ ಪಾತ್ರ ಮಾಡಿದ್ದೇನೆ. ಬೇರೆ ಹೊಸ ಚಿತ್ರಗಳು ಒಪ್ಪಿಕೊಂಡಿಲ್ಲ.

ಪ್ರೇಮದ ಊರಲಿ ಯಶಸ್ಸಿನ ಹಿಂದಿನ 10 ಮುಖ್ಯ ಅಂಶಗ‍ಳು

Sujatha NR — Fri, 09 Oct 2026 12:11:14 +0530

‘ಪ್ರೇಮದ ಊರಲಿ’ ಚಿತ್ರದ ಯಶಸ್ಸಿನ ಹಿಂದಿನ ಹತ್ತು ಅಂಶಗಳ ಬಗ್ಗೆ ಹಾಸನ ಜಿಲ್ಲೆಯ ಬೇಲೂರು ಮೂಲದ ನಿರ್ದೇಶಕ ಮನೋಜ್‌ ಕುಮಾರ್‌ ಹೇಳಿಕೊಂಡಿದ್ದಾರೆ.

1. ಚಿತ್ರದ ಆರಂಭ

ಅಕ್ಷಿ ಸಿನಿಮಾ ಮಾಡಿದ ನಂತರ ನನಗೆ ಅದೇ ರೀತಿಯ ಕತೆಗಳನ್ನು ಮಾಡುವಂತೆ ಅವಕಾಶಗಳು ಬರುತ್ತಿದ್ದವು. ನಾನೂ ಕೂಡ ಬೇರೆ ರೀತಿಯ ಸಿನಿಮಾಗಳನ್ನು ಮಾಡುವುದರಲ್ಲಿ ಫೈಲ್ಯೂರ್‌ ಆಗುತ್ತಿದ್ದೇನಾ ಅನಿಸಿತು. ಜನರಿಗೆ ತಲುಪುವಂತಹ ಸಿನಿಮಾ ಮಾಡೋಣ ಅಂದುಕೊಳ್ಳುತ್ತಿದ್ದಾಗ ಒಂದು ಊರು, ಅಲ್ಲಿ ಯಜಮಾನ ರೀತಿಯ ಮನೆ. ತಾಯಿ ಇಲ್ಲ. ಅಪ್ಪ-ಮಗ. ಮಗನಿಗೆ ಮದುವೆ ಆಗಿಲ್ಲ. ಶ್ರೀಮಂತನಾಗಿದ್ದರು ಆತನಿಗೆ ಹೆಣ್ಣು ಸಿಗುತ್ತಿಲ್ಲ ಅನ್ನೋದು ಕತೆಯಾಗಿತ್ತು. ಹಳ್ಳಿ ಕತೆಗಳೆಂದಾಗ ಬರೀ ಕಾಮಿಡಿ ಸಿನಿಮಾಗಳೇ ಬರುತ್ತಿವೆ. ನಿಜವಾದ ಹಳ್ಳಿ ಬೇಕು ಎಂದುಕೊಂಡಾಗ ಹುಟ್ಟಿಕೊಂಡ ಕತೆ ಇದು.

2. ನಿರ್ಮಾಪಕರ ಹುಡುಕಾಟ

ಒಂದು ವರ್ಷ ಸಮಯ ತೆಗೆದುಕೊಂಡು ಕತೆ ಮಾಡಿಕೊಂಡೆ. ಆದರೆ, ನಿರ್ಮಾಪಕರು ಅಂತ ಬಂದಾಗ ಅದೇ ಒಂದು ಅಲೆದಾಟವೇ ಆಗಿತ್ತು. ಒಂದು ಹಂತದಲ್ಲಿ ನಾನು ಡಿಪ್ರೆಶನ್‌ಗೆ ಹೋಗಿಬಿಟ್ಟೆ. ನನ್ನ ಈ ಸಂಕಷ್ಟಗಳನ್ನು ನೋಡಕ್ಕೆ ಆಗದೆ ‘ಅಕ್ಷಿ’ ಚಿತ್ರದ ಸಹ ನಿರ್ಮಾಪಕ ದೇವೇಂದ್ರ ಅವರು ನನ್ನ ಕಷ್ಟ ನೋಡಲಿಕ್ಕಾದೆ ‘ಆಯ್ತು ನಿನಗೊಂದು ಸಿನಿಮಾ ಮಾಡುತ್ತೇನೆ’ ಅಂತ ಬಂದರು.

3. ಕಥೆಯ ಒಪ್ಪಿಗೆ

ಈ ಕತೆಯನ್ನು ನಿರ್ಮಾಪಕರು ಕೇಳಿದ ಕೂಡಲೇ ಒಪ್ಪಿಕೊಂಡರು. ಇದು ರೂಟೆಡ್ ಸ್ಟೋರಿ. ಇದರಲ್ಲಿ ಭಾವನೆಗಳು ತುಂಬಾ ಚೆನ್ನಾಗಿವೆ. ಪ್ರತಿಯೊಬ್ಬರು ಯಾವುದೋ ಒಂದು ಹಂತದಲ್ಲಿ ಫೇಸ್‌ ಮಾಡುತ್ತಿರುವ ಪಾತ್ರಗಳು, ಭಾವನೆಗಳೇ ಚಿತ್ರದಲ್ಲಿವೆ ಎಂದರು.

4. ಕಲಾವಿದರ ಸಮ್ಮತಿ

ನನಗೆ ನಾಯಕ, ನಾಯಕಿಯರನ್ನು ಒಪ್ಪಿಸೋದು ಕಷ್ಟ ಅನಿಸಲಿಲ್ಲ. ಹೊಸಬರೇ ಹಾಕಿಕೊಳ್ಳಬೇಕು, ಲಿಮಿಟೆಡ್‌ ಬಜೆಟ್‌ನಲ್ಲಿ ಸಿನಿಮಾ ಮಾಡಬೇಕು ಅಂದುಕೊಂಡಿದ್ದು. ಲಿಮಿಟೆಡ್‌ ಅಂದರೆ ತುಂಬಾ ಕಡಿಮೆ ಅಲ್ಲ. ಆದರೆ, ರಂಗಾಯಣ ರಘು ಅವರನ್ನು ಒಪ್ಪಿಸೋದು ಹೇಗೆ ಎನ್ನುವ ಸವಾಲು, ಭಯ ಎದುರಾಯಿತು. ಯಾಕೆಂದರೆ ಕತೆ ಮತ್ತು 25 ದಿನ ಒಂದೇ ಹಂತದಲ್ಲಿ ಕಾಲ್‌ ಶೀಟ್‌ಬೇಕಿತ್ತು. ಇದು ಸಾಧ್ಯವಾ ಎಂದು ಯೋಚನೆಯಲ್ಲೇ ರಂಗಾಯಣ ರಘು ಅವರಿಗೆ ಕತೆ ಹೇಳಿದಾಗ ಸಾಧ್ಯವಾಯಿತು.

5. ಶೂಟಿಂಗ್ ಸಮಯ

ನಾವು ಹೊಸ ಪ್ರೊಡಕ್ಷನ್‌. ನಾನೂ ಕೂಡ ಹೊಸ ನಿರ್ದೇಶಕ. ಇಡೀ ನಮ್ಮ ತಂಡವೇ ಹೊಸದು. ಹೀಗಾಗಿ ಕೆಲವು ಸಮಸ್ಯೆಗಳು ಎದುರಾಗುತ್ತಿದ್ದವು. ಆದರೆ, ಎಲ್ಲಕ್ಕಿಂತ ಮೀರಿದ ಸಮಸ್ಯೆ ಎಂದರೆ ಮಳೆ. ಪ್ರತಿ ದಿನ ಮಳೆ ಆಗುತ್ತಿತ್ತು. ಸೀನ್‌ ಶೂಟಿಂಗ್‌ ಅಂತ ಹೋಗುವಾಗಲೇ ಮಳೆ. ಬೆಳಗ್ಗೆ ಲೊಕೇಶನ್‌ ನೋಡಿಕೊಂಡು ಬಂದರೆ ರಾತ್ರಿ ಪೂರ್ತಿ ಮಳೆ. ಕಲಾವಿದರ ಡೇಟ್ಸ್‌ ಹೊಂದಿಸೋದೇ ದೊಡ್ಡ ಕೆಲಸ ಆಗಿತ್ತು.

6. ನಿರೀಕ್ಷೆಯಂತೆ ಸಿನಿಮಾ ಬರುತ್ತೋ, ಇಲ್ಲವೋ ಎನ್ನುವ ಭಯ, ಸಂಕಟ, ತಲ್ಲಣ

ಅದು ಇರಲಿಲ್ಲ. ನಾನು ನಮ್ಮ ಗುರುಗಳು ಓಂ ಪ್ರಕಾಶ್‌ ರಾವ್‌ ಜೊತೆಗೆ ಕೆಲಸ ಮಾಡಿದ್ದರಿಂದ ನನಗೆ ಸಿನಿಮಾ, ಕೆಲಸದ ಮೇಲೆ ನಂಬಿಕೆ ಇತ್ತು. ನಾನು ಮೊಲೇ ಸಾಂಗ್ಸ್‌ ರೆಕಾರ್ಡ್‌ ಮಾಡಿಕೊಂಡಿದ್ದೆ. ಸಂಗೀತ ರೆಡಿ ಇತ್ತು. ಹಾಡುಗಳನ್ನು ಕೇಳುತ್ತಿದ್ದಾಗಲೇ ನಂಬಿಕೆ ಬಲವಾಗುತ್ತಿತ್ತು. ಜೊತೆಗೆ ಸಿನಿಮಾ ಹೀಗೆ ಬರುತ್ತದೆ, ಮ್ಯೂಸಿಕಲ್ಲಾಗಿ ಬರಬೇಕು ಅನ್ನೋ ಕ್ಲಾರಿಟಿ ಇತ್ತು. ಆದರೆ, ಸಿನಿಮಾನ ಜತೆ ಹೇಗೆ ತೆಗೆದುಕೊಳ್ಳುತ್ತಾರೆ, ಹೇಗೆ ರೀಚ್‌ ಮಾಡಿಸಬೇಕು ಅನ್ನೋ ಭಯ ಇತ್ತು.

7. ಬಿಡುಗಡೆಯ ಸಂದಿಗ್ಧಗಳು

ಸಂದಿಗ್ಧಗಳು ಅನ್ನೋದಕ್ಕಿಂತ ದೊಡ್ಡ ಸಮಸ್ಯೆಗಳೇ ಎದುರಾಗುತ್ತವೆ. ಯಾಕೆಂದರೆ ನಾವು ಹೊಸಬರು. ಹೀಗಾಗಿ ಕೇಳಿದಷ್ಟು ಥಿಯೇಟರ್‌ಗಳು ಸಿಗಬೇಕು ಅಂತ ನಿರೀಕ್ಷೆ ಮಾಡಕ್ಕಾಗಲ್ಲ. ಅವತ್ತೇ ಕನ್ನಡದ ಆರೇಳು ಸಿನಿಮಾಗಳಿದ್ದವು. ತೆಲುಗಿನ ದೊಡ್ಡ ಸಿನಿಮಾ ‘ಪ್ಯಾರಡೈಸ್‌’ ಇತ್ತು. ಹೀಗಾಗಿ ನಾವು ಕೇಳಿದಷ್ಟು ಚಿತ್ರಮಂದಿರಗಳು ಸಿಗಲಿಲ್ಲ. ಅದೇ ನಮಗೆ ಒಳ್ಳೆಯದಾಗಿತ್ತು. ಕಡಿಮೆ ಶೋಗಳಿದ್ದರಿಂದ ಒಂದೇ ಕಡೆ ಜನ ಬಂದರು. 10 ಜನ ಹತ್ತು ಕಡೆ ಕೂಗಕ್ಕೂ 100 ಜನ ಒಂದೇ ಕಡೆ ಕೂಗಕ್ಕೂ ಒಂದು ವೈಬ್ರೇಷನ್‌ ಇರುತ್ತಲ್ಲ, ಅದೇ ಇಡೀ ಕರ್ನಾಟಕಕ್ಕೆ ತಲುಪಿತು. ಆ ಹತ್ತು ಜನರ ಮಾತು ಇವತ್ತು 700 ಶೋಗಳನ್ನು ಪೂರೈಸುವಂತಾಗಿದೆ.

8. ಕೊನೆಗೂ ಬಿಡುಗಡೆಯಾದ ದಿನದ ಅನುಭವ

ನಾನು ಬೆಳಗ್ಗೆ ಎದ್ದು ಪ್ರಸನ್ನ ಚಿತ್ರಮಂದಿರಕ್ಕೆ ಹೋದೆ. ನಮ್ಮ ತಂಡವರನ್ನೂ ಕರೆದಿದ್ದೆ. ಥಿಯೇಟರ್‌ ಬಳಿ ಹೋದಾಗ ಒಬ್ಬರೇ ಒಬ್ಬರು ಕಾಣಲಿಲ್ಲ. ಪ್ರೊಜೆಕ್ಟರ್‌ಗೆ ಪೂಜೆ ಮಾಡಿಕೊಂಡು ಕೆಳಗೆ ಇಳಿಯುತ್ತಿದ್ದಾಗ 10, 20, 30, 50 ಅಂತ ಜನ ಬರುತ್ತಿದ್ದರು. ಟಿಕೆಟ್‌ ಕೊಡುವವರು ಏನ್‌ ಸಾರ್‌ ಇವರು ನಿಮ್‌ ಕಡೆಯವರಾ ಅಂದ್ರು ಇಲ್ಲಾ ಅಂದೆ. ನಾನೇ ಅಚ್ಚರಿಯಿಂದ ನೋಡುತ್ತಾ ನಿಂತು ಬಿಟ್ಟೆ. ನೋಡ ನೋಡುತ್ತಿದ್ದಂತೆಯೇ ಟಿಕೆಟ್‌ ಕೌಂಟರ್‌ ಮುಂದೆ ಜನರ ಸಾಲು ಕಾಣಿಸಿಕೊಂಡಿತು. ಹೇಗೆ ಬಂದರು ಇವರೆಲ್ಲ ಅಂತ ನನಗೆ ಪ್ರಶ್ನೆ. ಅವರನ್ನು ಕೇಳಿದಾ, ಚಿತ್ರದ ಹಾಡು ಕೇಳಿ ಬಂದ್ವಿ ಅಂದರು. ಪ್ರೀಮಿಯರ್‌ ಶೋಗಳ ರಿವ್ಯೂ ನೋಡಿ ಬಂದ್ವಿ ಅಂದ್ರು. ‘ನನ್ನ ಇಷ್ಟು ವರ್ಷಗಳಲ್ಲಿ ಹೊಸಬರ ಸಿನಿಮಾಗೆ ಮೊದಲದಿನ ಮೊದಲ ಶೋಗೆ ಇಷ್ಟು ಜನ ಬಂದಿದ್ದು ನೋಡಿದ್ದು ಇದೇ ಮೊದಲು’ ಅಂದರು ಥಿಯೇಟರ್‌ನವರು. ನಾನು ನಿಟ್ಟುಸಿರುಬಿಟ್ಟೆ.

9. ಗೆಲುವಿನ ಆರಂಭ

ಬಿಡುಗಡೆಯ ದಿನವೇ ಜನ ಬರುತ್ತಿದ್ಗರು. ಶನಿವಾರದ ಹೊತ್ತಿಗೆ ಕೆಲವು ಕಡೆ ಹೌಸ್‌ಫುಲ್‌ ಆಗುತ್ತಿತ್ತು. ಭಾನುವಾರ ದೊಡ್ಡ ಮಟ್ಟದಲ್ಲಿ ಸಿನಿಮಾ ಪ್ರದರ್ಶನಗೊಳ್ಳುತ್ತಿದ್ದರೂ ನಾನು ಸೋಮವಾರ ಏನಾಗುತ್ತದೆ ಎನ್ನುವ ಯೋಚನೆಯಲ್ಲಿದ್ದೆ. ಯಾವಾಗ ಸೋಮವಾರವೂ ಹೌಸ್‌ಫುಲ್‌ ಅಂತ ಗೊತ್ತಾಯಿತೋ ಆಗ ನನಗೆ ಗೆಲುವಿನ ಖಾತರಿ ಸಿಕ್ಕಿತು. ಅಂದರೆ ಸಿನಿಮಾ ಬಿಡುಗಡೆ ಆಗಿ ನಾಲ್ಕನೇ ದಿನಕ್ಕೆ ನನಗೆ ಗೆಲುವಿನ ಸಂಭ್ರಮ ಆರಂಭವಾಯಿತು.

10. ಮುಂದಿನ ಗುರಿ

ಪ್ರೇಮದ ಊರಲಿ ಚಿತ್ರದ ಸಕ್ಸಸ್‌ನಲ್ಲಿ ಇದ್ದಕ್ಕಿದಂತೆ ಮತ್ತೊಂದು ಸಿನಿಮಾ ಒಪ್ಪಿಕೊಳ್ಳುವುದು ತಪ್ಪಾಗುತ್ತದೆ. ಹೀಗಾಗಿ ನನ್ನ ಮುಂದಿನ ಯೋಜನೆಗಳೇನು ಎಂಬುದನ್ನು ನೋಡಿ ನಿರ್ಧರಿಸುತ್ತೇನೆ.

ಬದುಕಿನ ವಾಸ್ತವ ಹೇಳುವ ಬೆಳಕು ಸಿಟಿ ಲೈಟ್ಸ್: ದುನಿಯಾ ವಿಜಯ್‌

Sujatha NR — Fri, 18 Sep 2026 12:02:14 +0530

ಆರ್. ಕೇಶವಮೂರ್ತಿ

ಎರಡು ಚಿತ್ರಗಳಲ್ಲಿ ನಿರ್ದೇಶಕರಾಗಿ ಗೆದ್ದವರು. ಈಗ ಹ್ಯಾಟ್ರಿಕ್‌ ಡೈರೆಕ್ಟರ್‌ ಆಗಲು ಹೊರಟಿದ್ದೀರಿ?

ಅದು ಪ್ರೇಕ್ಷಕರಿಗೆ ಬಿಟ್ಟ ವಿಚಾರ. ಸಿನಿಮಾ ನೋಡಿ ಪ್ರೇಕ್ಷಕರು ಏನು ಹೇಳಿದರೂ ಸ್ವೀಕರಿಸುತ್ತೇನೆ. ‘ಸಲಗ’ ಹಾಗೂ ‘ಭೀಮ’ ಚಿತ್ರಗಳನ್ನೂ ಇದೇ ನಂಬಿಕೆಯಲ್ಲಿ ನಿರ್ದೇಶಿಸಿದ್ದೆ. ಪ್ರೇಕ್ಷಕರು ಕೈ ಹಿಡಿದರು. ‘ಸಿಟಿ ಲೈಟ್ಸ್‌’ ಕೈ ಹಿಡಿದು ಹ್ಯಾಟ್ರಿಕ್‌ ಡೈರೆಕ್ಟರ್‌ ಮಾಡೋದು ಕೂಡ ಈಗ ಪ್ರೇಕ್ಷಕರಿಗೆ ಬಿಟ್ಟಿದ್ದೇನೆ.

ಪ್ರೇಕ್ಷಕರು ನಿಮ್ಮ ಕೈ ಹಿಡಿಯುತ್ತಾರೆಂಬ ಗ್ಯಾರಂಟಿಗಳು ‘ಸಿಟಿ ಲೈಟ್ಸ್‌’ ಚಿತ್ರದಲ್ಲಿ ಏನಿವೆ?

ಗ್ಯಾರಂಟಿ ಎನ್ನುವುದಕ್ಕಿಂತ ನಾನು ವಾಸ್ತವಗಳನ್ನು ಈ ಚಿತ್ರದ ಮೂಲಕ ಹೇಳಿದ್ದೇನೆ. ಅಂದರೆ ಸೂಕ್ಷ್ಮವಾದ ಎರಡು ವಿಚಾರಗಳು ಈ ಚಿತ್ರದಲ್ಲಿವೆ. ಅದು ಹೆಣ್ಣು ಮಕ್ಕಳ ಪರವಾಗಿರುವ ವಿಚಾರಗಳು. ಹೀಗಾಗಿ ‘ಸಿಟಿ ಲೈಟ್ಸ್‌’ ಅನ್ನೋದು ಬದುಕಿನ ವಾಸ್ತವಗಳನ್ನು ಹೇಳುವ ಬೆಳಕು.

ಈ ಚಿತ್ರ ನೋಡಿದ ಮೇಲೆ ಪ್ರೇಕ್ಷಕರಲ್ಲಿ ಹುಟ್ಟಿಕೊಳ್ಳುವ ಯೋಚನೆ ಏನು?

ಬದುಕಿನ ಪಯಣದಲ್ಲಿ ಹುಷಾರಾಗಿ ಇರಬೇಕು ಎನ್ನುವ ಎಚ್ಚರಿಕೆಯ ಆಲೋಚನೆ ಹುಟ್ಟಿಸುತ್ತದೆ. ಅದರಲ್ಲೂ ಗುರುತು, ಪರಿಚಯ ಇಲ್ಲದ ಬೆಂಗಳೂರಿನಂತಹ ಮಹಾನಗರಗಳಿಗೆ ಬಂದ ಮೇಲೆ ಲೈಫು ಹೇಗಿರುತ್ತದೆ ಎಂಬುದನ್ನು ತೋರಿಸಿದ್ದೇನೆ. ಆದರೆ, ಹೇಗೆ ನಡೆದುಕೊಳ್ಳಬೇಕು ಅಂತ ಹೇಳುವಷ್ಟು ದೊಡ್ಡವನಲ್ಲ.

ಈ ಚಿತ್ರದ ಕತೆ ಹೊಳೆದಿದ್ದೇಗೆ?

ನನಗೆ ಒಂದು ರಿಯಲ್‌ ಘಟನೆ ಗೊತ್ತಾಯಿತು. ಅದರ ಬಗ್ಗೆ ವಿಚಾರ ಮಾಡುತ್ತಾ, ಯೋಚನೆ ಮಾಡುತ್ತಾ, ಮಾಹಿತಿ ಸಂಗ್ರಹಿಸಲು ಹೊರಟಾಗ ‘ಸಿಟಿ ಲೈಟ್ಸ್‌’ ಕತೆ ಹುಟ್ಟಿಕೊಂಡಿತು. ಆ ಘಟನೆಯನ್ನು ಚಿತ್ರದಲ್ಲಿ ತೋರಿಸಿದ್ದೇನೆ. ಅದೇನು ಎಂಬುದನ್ನು ನೀವು ಸಿನಿಮಾ ನೋಡಿ ತಿಳಿಯಬೇಕು.

ಕ್ರೈಮು, ಅಪರಾಧ, ರಕ್ತದ ಚಿತ್ರಣಗಳ ಮೂಲಕ ಸಂದೇಶ ಕೊಟ್ಟ ಬದಲಾವಣೆ ತರಲು ಸಾಧ್ಯವೆ?

ಗೊತ್ತಿಲ್ಲ. ಆದರೆ, ನನ್ನ ಹಿಂದಿನ ಎರಡು ಚಿತ್ರಗಳಾದ ‘ಸಲಗ’ ಹಾಗೂ ‘ಭೀಮ’ ಚಿತ್ರಗಳಲ್ಲಿ ಇದು ವರ್ಕ್‌ ಆಗಿತ್ತು. ಅದನ್ನೇ ಇಲ್ಲಿ ಟ್ರೈ ಮಾಡಿದ್ದೇನೆ. ಸಿನಿಮಾ ನೋಡಿದ ಮೇಲೆ ಜನರು ‘ಚಿತ್ರದಲ್ಲಿ ಹೇಳಿರುವುದು ಸತ್ಯ’ ಅಂತ ಅಂದುಕೊಂಡರೆ ಅದೇ ದೊಡ್ಡ ಬದಲಾವಣೆ.

‘ಸಿಟಿ ಲೈಟ್ಸ್‌’ ಕತೆ ಮಾಡುವಾಗಲೇ ಚಿತ್ರಕ್ಕೆ ಮೋನಿಷಾ, ವಿನಯ್‌ ರಾಜ್‌ಕುಮಾರ್‌ ಜೋಡಿ ಅಂದುಕೊಂಡಿದ್ರಾ?

ಇಲ್ಲ. ಮೊದಲು ಕತೆ ಬರೆದುಕೊಂಡಿದ್ದೆ. ಈ ಕತೆಗೆ ವಿನಯ್‌ ಹೀರೋ ಆಗಿ ಬಂದ ಮೇಲೆ ಕತೆಯನ್ನು ಮತ್ತೊಂದು ಹಂತಕ್ಕೆ ತೆಗೆದುಕೊಂಡು ಹೋದೆ. ಅದರ ಗ್ರಾಫ್‌ ಚೇಂಜ್‌ ಆಯಿತು. ವಿನಯ್‌ಗೆ ನಾಯಕಿಯಾಗಿ ಮೋನಿಷಾ ಸೂಕ್ತ ಅನಿಸಿತು. ಹೀಗಾಗಿ ಕತೆಯ ನಂತರವೇ ನಾಯಕ, ನಾಯಕಿ ಆಯ್ಕೆ ಆಗಿದ್ದು.

ಚಿತ್ರದ ನಾಯಕಿ ಮೋನಿಷಾ ಪಾಲಿಗೆ ನೀವು ತಂದೆ ಮತ್ತು ನಿರ್ದೇಶಕ. ಸೆಟ್‌ನಲ್ಲಿ ಹೆಚ್ಚು ಕೆಲಸ ಮಾಡಿದ್ದು ತಂದೆಯ ಮನಸ್ಸಾ, ನಿರ್ದೇಶಕನ ಮನಸ್ಸಾ?

ನಿರ್ದೇಶಕನ ಮನಸ್ಸು. ಯಾಕೆಂದರೆ ನಾನು ಬರೆದುಕೊಂಡಿರುವ ಕತೆ ತೆರೆ ಮೇಲೆ ಅಚ್ಚುಕಟ್ಟಾಗಿ ಮೂಡಿಬರಬೇಕು ಎಂದರೆ ತಂದೆಯಾಗಿ ಯೋಚನೆ ಮಾಡಿದರೆ ಆಗಲ್ಲ. ನಿರ್ದೇಶಕನಾಗಿರಬೇಕು. ಸಿಟ್ಟು, ಕೋಪ, ಬೈದಿದ್ದು ಎಲ್ಲವೂ ಆಗಾಗ ನಡೆಯುತ್ತಿತ್ತು. ಅದು ಪ್ರೀತಿಯಿಂದ.

ತಂದೆಯಾಗಿ ನಿಮ್ಮ ಮಗಳ ಪಾತ್ರ ಪೋಷನೆ, ನಟನೆ ನೋಡಿದಾಗ ಏನಿಸಿತು?

ನಾನೇ ಭಾವಕನಾಗುತ್ತಿದ್ದೆ. ಕಣ್ಣಲ್ಲಿ ನೀರು ತುಂಬಿಕೊಂಡಿದ್ದೆ. ಯಾಕೆಂದರೆ ಆ ಪಾತ್ರವನ್ನು ನಾನು ಆ ರೀತಿ ರೂಪಿಸಿದ್ದೆ. ‘ನನ್ನ ಮಗಳಂತೆಯೇ ಎಷ್ಟೊಂದು ನೊಂದ ಹೆಣ್ಣು ಮಕ್ಕಳು ಇರಬಹುದಲ್ಲಾ’ ಅಂತ ನೆನಪಿಸಿಕೊಂಡು ಭಾವುಕನಾಗಿದ್ದೇನೆ. ಇದರ ಜೊತೆಗೆ ಶ್ರದ್ಧೆ, ಪ್ರಾಮಾಣಿಕತೆ, ಸತ್ಯದ ದಾರಿಯಲ್ಲಿದ್ದರೆ ನನ್ನ ಮಗಳು ನಟಿಯಾಗಿ ಎಲ್ಲಿ ಬೇಕಾದರೂ ಯಶಸ್ಸು ಕಾಣುತ್ತಾಳೆ ಅನಿಸಿತು.

ತೆರೆ ಮೇಲೆ ವಿನಯ್‌ ರಾಜ್‌ಕುಮಾರ್‌ ಹಾಗೂ ಮೋನಿಷಾ ಜೋಡಿ ಹೇಗಿದೆ?

ತುಂಬಾ ಮುದ್ದಾಗಿ ಕಾಣುತ್ತಾರೆ. ಸಿನಿಮಾ ನೋಡುವವರಿಗೆ ಈ ಇಬ್ಬರು ಹೀರೋ, ಹೀರೋಯಿನ್‌ ಎನ್ನುವುದಕ್ಕಿಂತ ಅವರ ಮನೆ ಮಕ್ಕಳಂತೆ ಕಾಣುತ್ತಾರೆ.

ನಿಮ್ಮಿಂದ ಒಂದು ಸ್ವಚ್ಚವಾದ ಪ್ರೀತಿ- ಪ್ರೇಮ, ಸಾಂಸರಿಕ ಕತೆಯ ಚಿತ್ರ ನಿರೀಕ್ಷೆ ಮಾಡಬಹುದೇ?

‘ಸಿಟಿ ಲೈಟ್ಸ್‌’ ಪಾರ್ಟ್‌ 2ನಲ್ಲಿ ಮಾಡಬಹುದು. ಯುವ ಪ್ರೇಮಿಗಳ ಸಂಸಾರ, ಅವರ ಒದ್ದಾಟಗಳು, ಆಮಾಯಕತನಗಳನ್ನ ಸುತ್ತಾ ಕತೆ ರೂಪಿಸಬಹುದು.

ನನ್ನ ವಯಸ್ಸಿಗೆ ತಕ್ಕ ಪಾತ್ರ ಸಿಗುವುದು ಕಷ್ಟ - ರಜನೀಕಾಂತ್

Sujatha NR — Wed, 14 Oct 2026 12:31:56 +0530

ರಜನಿಕಾಂತ್ ಯಾವುದೇ ವೇದಿಕೆಯಲ್ಲಾದರೂ ಸೊಗಸಾಗಿ ಮಾತನಾಡುತ್ತಾರೆ. ತನ್ನನ್ನು ತಾನು ಗೇಲಿ ಮಾಡಿಕೊಳ್ಳುತ್ತ, ಕೊಂಚ ಫಿಲಾಸಫಿ ಬೆರೆಸುವ ಅವರ ಮಾತುಗಳಿಗೇ ಲಕ್ಷಾಂತರ ಅಭಿಮಾನಿಗಳಿದ್ದಾರೆ. ಅ.15ರಂದು ಬಿಡುಗಡೆಯಾಗುತ್ತಿರುವ ‘ಜೈಲರ್ 2’ ಚಿತ್ರದ ವೇದಿಕೆಯಲ್ಲಿ ಅವರು ಆಡಿದ ಮಾತಿನ ತುಣುಕುಗಳು ಹೀಗಿವೆ:

-ನಾನು ಸೀಕ್ವೆಲ್‌ಗಳನ್ನು ಅಷ್ಟಾಗಿ ಪ್ರೋತ್ಸಾಹಿಸುವುದಿಲ್ಲ. ಸೀಕ್ವೆಲ್ ಅಂದಕೂಡಲೇ ಕ್ರಿಯೇಟಿವಿಟಿ ಕಡಿಮೆಯಾಗಿದೆ, ಹಳೆಯ ಸರಕಿಗೇ ಉಪ್ಪು-ಖಾರ ಹಾಕಿ ಮತ್ತೆ ಮಾಡುತ್ತಾರೆ ಎಂಬ ಭಾವನೆ ನನಗಿತ್ತು.

-ಈ ಹಿಂದೆ ‘ಬಾಷಾ’, ‘ಪೆಟ್ಟಾ’ ಸೀಕ್ವೆಲ್ ಐಡಿಯಾ ಹೇಳಿದಾಗ ಆಸಕ್ತಿ ಬರಲಿಲ್ಲ. ಆದರೆ ‘ಜೈಲರ್’ ಓಟಿಟಿಯಲ್ಲಿ ಮತ್ತೊಮ್ಮೆ ನೋಡುವಾಗ ನೆಲ್ಸನ್ ಕಥೆಯಲ್ಲಿ ಹಲವು ದಾರಿಗಳನ್ನು ಉಳಿಸಿರುವುದು ಗಮನಕ್ಕೆ ಬಂತು. ವರ್ಮನ್ ಹೇಳುವ ‘ನಮ್ಮ ಹಿಂದೆ ಒಂದು ದೊಡ್ಡ ಗುಂಪಿದೆ’ ಎಂಬ ಮಾತು, ಜೈಲರ್ ಬಳಿಯ ಕಂಟೇನರ್‌ಗಳು ಕತೆಗೆ ಅಡಿಪಾಯ ಹಾಕಿದ್ದವು.

-ಈ ಐಡಿಯಾ ಹೊಳೆದು ನೆಲ್ಸನ್‌ಗೆ ಫೋನ್ ಮಾಡಿದಾಗ, ಅವರು ಮತ್ತೊಬ್ಬ ದೊಡ್ಡ ಹೀರೋ ಜೊತೆ ಸಿನಿಮಾ ಮಾಡಲು ಮಾತುಕತೆ ನಡೆಸಿದ್ದರು. ಐಡಿಯಾ ಹೇಳಿದಾಗ, ‘ಬೇಡ ಸರ್, ಮತ್ತೆ ಅದೇ ಮಾಡಿ ಹಿಂಡಿ ಹಿಪ್ಪೆ ಮಾಡುವುದು ಬೇಡ’ ಎಂದರು. ಒಂದು ತಿಂಗಳ ಬಳಿಕ ಅವರೇ, ‘ಸರ್, ಯೋಚಿಸಿದೆ. ‘ಜೈಲರ್ 2’ ಮಾಡಿದರೆ ಚೆನ್ನಾಗಿರುತ್ತದೆ’ ಎಂದರು.

-ಈ ಐಡಿಯಾಕ್ಕೆ ಮುಖ್ಯ ಕಾರಣ ಜೈಲರ್ ಪಾತ್ರ. ನನಗೆ ಈಗ 75 ವರ್ಷ. ವಯಸ್ಸಿಗೆ ತಕ್ಕ ಪಾತ್ರ ಸಿಗುವುದು ಕಷ್ಟ. ಈ ವಯಸ್ಸಿನಲ್ಲಿ ಒಳ್ಳೆಯ ಪಾತ್ರದೊಂದಿಗೆ ಕೆರಿಯರ್ ಮುಂದುವರಿಸುವುದೂ ಸುಲಭವಲ್ಲ. ದೊಡ್ಡ ನಟರಿಗೆ ಸರಿಯಾದ ಕಥೆ, ಪಾತ್ರ, ನೆಲ್ಸನ್‌ರಂತಹ ನಿರ್ದೇಶಕ, ಸನ್ ಪಿಕ್ಚರ್ಸ್‌ನಂತಹ ನಿರ್ಮಾಣ ಸಂಸ್ಥೆ ಸಿಗದಿದ್ದರೆ ನಟನೆ ಮುಂದುವರಿಸುವುದು ಕಷ್ಟ.

-ಸೀಕ್ವೆಲ್‌ನ ಕಷ್ಟ ಕಣಕ್ಕಿಳಿದ ಮೇಲೆಯೇ ಗೊತ್ತಾಗುತ್ತದೆ. ಮೊದಲ ಭಾಗದ ಬಳಿಕ ಎರಡನೇ ಭಾಗಕ್ಕೆ ಬಂದಾಗ ಹಿಂದಿನ ಚಿತ್ರವೇ ಬೃಹತ್ ಭೂತದಂತೆ ಎದುರು ನಿಲ್ಲುತ್ತದೆ. ಅದಕ್ಕೆ ಸರಿಸಮಾನವಾಗಿ ಅಥವಾ ಮಿಗಿಲಾಗಿ ಕೊಡಬೇಕು. ಜೀವನದಲ್ಲಿ ಚಾಲೆಂಜ್ ಇರಬೇಕು. ಸುಮ್ಮನೆ ಓಡಿದರೆ ಪ್ರಯೋಜನವಿಲ್ಲ.

ರಜನಿ ಎದುರು ವಿಲನ್ ಆಗಿ ನಟಿಸಬೇಕಾ?

-ಮಿಥುನ್ ಚಕ್ರವರ್ತಿ ಅವರನ್ನು ವಿಲನ್ ಪಾತ್ರಕ್ಕೆ ಕೇಳಿದಾಗ, ‘ರಜನಿ ಎದುರು ವಿಲನ್ ಆಗಿ ನಟಿಸಬೇಕಾ? ಅವನು ನನ್ನ ಆಪ್ತ ಗೆಳೆಯ. ಅವನ ಕೈಯಲ್ಲಿ ಹೊಡೆತ ತಿನ್ನಬೇಕಾ? ಹೋಗ್ರಯ್ಯ!’ ಎಂದು ಕಳುಹಿಸಿಬಿಟ್ಟಿದ್ದರಂತೆ. ಬಾಂಬೆಯಲ್ಲಿ ಸಿಕ್ಕಾಗ ನನ್ನನ್ನು ಕೇಳಿದರು. ‘ನೀವು ಮಾಡಿದರೆ ಚೆನ್ನಾಗಿರುತ್ತದೆ’ ಎಂದೆ. ‘ಒಂದು ಷರತ್ತು, ನೀನು ನನಗೆ ಹೊಡೆಯಬಾರದು, ನನ್ನ ಮೇಲೆ ಶೂಟ್ ಮಾಡಬಾರದು’ ಎಂದರು. ಡೈರೆಕ್ಟರ್ ಬಳಿ ಹೇಳುತ್ತೇನೆ ಎಂದೆ. ಹಾಗೆ ಅವರೂ ಬಂದರು.

-ಎಸ್.ಜೆ. ಸೂರ್ಯ ನಟ ರಾಕ್ಷಸ. ನೆಲ್ಸನ್ ಓಕೆ ಎಂದರೂ ಅವರು ಬಿಡುತ್ತಿರಲಿಲ್ಲ. ‘ಸರ್, ಒನ್ ಮೋರ್ ಸರ್, ಇನ್ನೊಂದು ಟೇಕ್ ಸರ್’ ಎಂದು 8, 10, 12 ಟೇಕ್ ತೆಗೆಯುತ್ತಿದ್ದರು. ನಾವೂ, ರಮ್ಯಾ ಕೃಷ್ಣನ್ ಅವರೂ ನಿಂತಿರಬೇಕು. ಕೊನೆಗೆ, ‘ನನಗೆ 75 ವರ್ಷವಾಯಿತು, ಸ್ವಲ್ಪ ಕೂತ್ಕೋತೀನಿ ಬಿಡಿ’ ಎಂದರೂ ಬಿಡುತ್ತಿರಲಿಲ್ಲ. ಅವರ ಡೆಡಿಕೇಷನ್ ನೋಡಿ ದಂಗಾದೆ.

-‘ಜೈಲರ್ 2’ರಲ್ಲಿ ಮಿಸ್ಸಿಂಗ್ ಎಂದರೆ ತಮನ್ನಾ

-‘ಜೈಲರ್ 2’ರಲ್ಲಿ ಮಿಸ್ಸಿಂಗ್ ಎಂದರೆ ತಮನ್ನಾ. ಅವರ ಒಂದು ಹಾಡು ಇಡೋಣ ಎಂದು ನೆಲ್ಸನ್‌ಗೆ ಹೇಳಿದೆ. ‘ನಿಮಗೆ ಇಷ್ಟ ಎಂದು ಇಡಲು ಸಾಧ್ಯವಿಲ್ಲ ಸರ್’ ಎಂದರು. ‘ನನಗೆ ಇಷ್ಟ ಎಂದು ಮಾಡಿದ್ದರೆ 40 ವರ್ಷಗಳ ಹಿಂದೆಯೇ ಬೆಂಗಳೂರಿಗೆ ಹೋಗಿಬಿಡುತ್ತಿದ್ದೆ. ಜನರಿಗೆ ಏನು ಇಷ್ಟವೋ ಅದನ್ನು ಮಾಡಿದ ಕಾರಣಕ್ಕೇ ಇಲ್ಲಿಯವರೆಗೆ ಬಂದಿದ್ದೇನೆ’ ಎಂದೆ.

-ನನಗೆ 75-76 ವರ್ಷವಾಗುತ್ತಿದೆ. ಇನ್ನೂ ಹೇಗೆ ಹೀರೋ ಆಗಿ ನಟಿಸುತ್ತಿದ್ದೀರಿ ಎಂದು ಹಲವರು ಕೇಳುತ್ತಾರೆ. ನನ್ನನ್ನು ಬದುಕಿಸುತ್ತಿರುವುದು ಅಭಿಮಾನಿಗಳು. ನೀವಿಲ್ಲದಿದ್ದರೆ ನಾನೇನೂ ಅಲ್ಲ, ಒಂದು ಹುಲ್ಲಿನ ಕಡ್ಡಿಯಷ್ಟೇ. ನಿಮ್ಮ ಪ್ರೀತಿ, ಬೆಂಬಲದಿಂದಲೇ ಸಿನಿಮಾ ಸಾಧ್ಯವಾಗುತ್ತಿದೆ.

ಬೆಡ್‌ರೂಮ್‌ ವಿಚಾರ ಲಿವಿಂಗ್‌ ರೂಮ್‌ಗೆ ಬರಬಾರದು: ನೀವಿನ್ನೂ ವರ್ಜಿನ್ನಾ? ಸಲ್ಮಾನ್‌ ಹೇಳಿದ್ದೇನು ?

Sujatha NR — Fri, 16 Oct 2026 14:02:05 +0530

ನೀವಿನ್ನೂ ವರ್ಜಿನ್ನಾ?

ಕರಣ್ ಈ ಬಾರಿಯೂ ‌ನೀವು ಇಂದಿಗೂ ವರ್ಜಿನ್ ಆಗಿದ್ದೀರಾ? ಎಂದು ಕೇಳಿದಾಗ ಸಲ್ಮಾನ್ ಉತ್ತರಿಸಲು ನಿರಾಕರಿಸಿದರು. ಆ ವಿಷಯ ಈಗ ತಮಗೆ ಮುಜುಗರ ತರಿಸುತ್ತದೆ ಎಂದ ಅವರು, ತಂದೆ ಸಲೀಂ ಖಾನ್ ಅವರ ಪಾಠವನ್ನು ಉಲ್ಲೇಖಿಸಿದರು.

‘ವೈಯಕ್ತಿಕ ಬದುಕು ಬೆಡ್‌ರೂಂ ಇದ್ದಂತೆ, ಲಿವಿಂಗ್ ರೂಂ ಇಡೀ ದೇಶವಿದ್ದಂತೆ. ಲಿವಿಂಗ್ ರೂಂನಲ್ಲಿ ಕುಳಿತು ಮುಕ್ತವಾಗಿ ಮಾತನಾಡಬಹುದಾದ ವಿಷಯವನ್ನು ಇಡೀ ದೇಶದ ಮುಂದೆಯೂ ಹೇಳಬಹುದು. ಆದರೆ ಬೆಡ್‌ರೂಂಗೆ ಸೀಮಿತವಾದ ಖಾಸಗಿ ವಿಚಾರಗಳು ಎಂದಿಗೂ ಲಿವಿಂಗ್ ರೂಂಗೆ ಬರಬಾರದು ಎಂದು ಅಪ್ಪ ಹೇಳಿದ್ದಾರೆ. ಅದನ್ನು ನಾನು ನಂಬುತ್ತೇನೆ’ ಎಂದರು.

ಜೊತೆಗೆ ತಮ್ಮ ಪ್ರೇಮ ಜೀವನದ ಬಗ್ಗೆ ಸಾರ್ವಜನಿಕವಾಗಿ ಮಾತನಾಡದಿರುವ ಬಗ್ಗೆ ಕಾರಣ ನೀಡುತ್ತಾ, ‘ಯಾರಾದರೂ ಇಡೀ ಜೀವನ ನಮ್ಮೊಂದಿಗೆ ಇರುತ್ತಾರೋ ಇಲ್ಲವೋ ಅಥವಾ ಅವರು ಮುಂದೆ ಹೋಗಿ ಮತ್ತೊಬ್ಬರನ್ನು ಮದುವೆಯಾಗುತ್ತಾರೋ ನಮಗೆ ಮೊದಲೇ ತಿಳಿಯುವುದಿಲ್ಲ. ಹೀಗಿರುವಾಗ ಅವರ ಬಗ್ಗೆ ಬಹಿರಂಗವಾಗಿ ಮಾತನಾಡುವುದು ಯಾರಿಗೂ ಶೋಭೆ ತರುವುದಿಲ್ಲ’ ಎಂದರು.

ನನ್ನ ನಿರ್ಧಾರ ನನ್ನದು

ತಮ್ಮ ಹಳೆಯ ಸಂದರ್ಶನವೊಂದನ್ನು ನೆನಪಿಸಿದ ಕರಣ್, ‘ಅಮೀರ್ ಖಾನ್ ಅವರು ಸಲ್ಮಾನ್ ಕೈಕಾಲು ಕಟ್ಟಿ ನಾನೇ ಮದುವೆ ಮಾಡಿಸುತ್ತೇನೆ ಎಂದು ಹೇಳಿದ್ದರು’ ಎಂದಾಗ, ಅದಕ್ಕೆ ತಕ್ಷಣ ಪ್ರತಿಕ್ರಿಯಿಸಿದ ಸಲ್ಮಾನ್, ‘ನಾನು ಅವರ ಕೈಕಾಲು ಕಟ್ಟಿ ಇನ್ನೆಂದಿಗೂ ಮದುವೆಯಾಗದಂತೆ ಮಾಡುತ್ತೇನೆ ಎಂದು ಮತ್ತೊಂದು ಸಂದರ್ಶನದಲ್ಲಿ ಹೇಳಿದ್ದೆ’ ಎಂದು ತಮಾಷೆ ಮಾಡಿದರು. ಅಮೀರ್ ಮೂರನೇ ಬಾರಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿರುವ ವಿಷಯ ಪ್ರಸ್ತಾಪಿಸಿದ ಕರಣ್‌ಗೆ, ‘ಸ್ನೇಹಿತನ ಖುಷಿಯಲ್ಲಿ ನಾನೂ ಖುಷಿಯಾಗಿದ್ದೇನೆ, ನಾನಂತೂ ಆರಾಮವಾಗಿದ್ದೇನೆ’ ಎಂದರು.

ಜೀವನ ಸಂಗಾತಿ ಇಲ್ಲದಿರುವುದು ಒಂಟಿತನಕ್ಕೆ ಕಾರಣವಾಗುತ್ತದೆಯೇ ಎಂದು ಕರಣ್ ಕೇಳಿದಾಗ, ಸಲ್ಮಾನ್, ‘ನಿನಗೆ ಇಬ್ಬರು ಮುದ್ದಾದ ಮಕ್ಕಳಿದ್ದಾರೆ, ಜೊತೆಗೆ ತಾಯಿಯ ವಾತ್ಸಲ್ಯವಿದೆ. ಇಷ್ಟೆಲ್ಲಾ ಇರುವಾಗ ನೀನು ಆ ರೀತಿ ಎಂದಿಗೂ ಭಾವಿಸಬಾರದು, ಕೃತಜ್ಞನಾಗಿರಬೇಕು. ನನ್ನ ಬದುಕಿನಲ್ಲೂ ಮುಂದೊಂದು ದಿನ ಮಕ್ಕಳು ಬರಬಹುದು’ ಎಂದರು.

ಮುಂದುವರಿದು ಮಾತನಾಡಿದ ಸಲ್ಮಾನ್, ‘ನಿನ್ನನ್ನು ಯಾರೂ ತಡೆಯಲಿಲ್ಲ, ನನ್ನನ್ನೂ ಯಾರೂ ತಡೆಯಲಿಲ್ಲ. ನೀನು ನಿನ್ನನ್ನು ತಡೆದುಕೊಂಡೆ, ನನ್ನನ್ನು ನಾನೇ ತಡೆದುಕೊಂಡೆ. ಆದ್ದರಿಂದ ಇಡೀ ಜಗತ್ತು ನನ್ನ ವಿರುದ್ಧ ತಿರುಗಿಬಿದ್ದಿದ್ದರಿಂದ ನಾನು ಒಂಟಿಯಾಗುಳಿಯಬೇಕಾಯಿತು ಎಂದು ದೂರುವುದು ಸರಿಯಲ್ಲ. ಮದುವೆಯಾಗದೆ ಒಂಟಿಯಾಗಿ ಉಳಿಯುವುದು ಸಂಪೂರ್ಣವಾಗಿ ನನ್ನದೇ ಸ್ವಯಂ ನಿರ್ಧಾರ. ಇದಕ್ಕೆ ನಾನು ಯಾರನ್ನೂ ದೂಷಿಸುವುದಿಲ್ಲ, ನನ್ನ ಈ ನಿರ್ಧಾರದಲ್ಲಿ ನಾನು ಪೂರ್ಣವಾಗಿ ಸಂತೋಷವಾಗಿದ್ದೇನೆ’ ಎಂದರು.

ನನ್ನ ಬದುಕಿನ ಕತೆ ನನ್ನಲ್ಲೇ ಉಳಿಯಲಿದೆ

‘ನಿಮ್ಮ ಬಯೋಪಿಕ್ ಯಾರು ನಿರ್ದೇಶಿಸಬೇಕು?’ ಎಂದು ಕೇಳಿದಾಗ ಸಲ್ಮಾನ್, ‘ನನ್ನ ಬಯೋಪಿಕ್ ಎಂದಿಗೂ ತೆರೆಗೆ ಬರಲು ಸಾಧ್ಯವಿಲ್ಲ. ನನ್ನ ಜೀವನದ ಕತೆ ನನ್ನ ಸಮಾಧಿಯವರೆಗೂ ನನ್ನ ಜೊತೆಯೇ ಇರಲಿದೆ’ ಎಂದರು.

ವ್ಯಕ್ತಿತ್ವಗಳು ಮಾಗುವುದನ್ನು ನೋಡುವುದು ಮತ್ತು ಅದರಿಂದ ಕಲಿಯುವುದು ಬಹಳ ಇರುತ್ತದೆ.

ರೈತನ ಪಾತ್ರಕ್ಕಾಗಿ ಹಳ್ಳಿಗೆ ಹೋಗಿ ಒಂದು ತಿಂಗಳು ರೈತನಾಗಿದ್ದೆ: ಶ್ರೀ ರಾಮ್

Sujatha NR — Fri, 09 Oct 2026 12:14:28 +0530

ಆರ್. ಕೇಶವಮೂರ್ತಿ

‘ಪ್ರೇಮದ ಊರಲಿ’ ಯಶಸ್ಸು ನಿಮ್ಮ ಮನಸ್ಸಿನಲ್ಲಿ ಹುಟ್ಟಿಸಿದ ಮೊದಲ ಯೋಚನೆ ಏನು?

ನಟನಾಗಿ ನನಗೆ ಚಿತ್ರರಂಗದಲ್ಲಿ ಯಾವ ಸ್ಥಾನ, ಯಾವ ಜವಾಬ್ದಾರಿ ನಾನು ತಗೋಬೇಕಿತ್ತೋ ಅಂದುಕೊಳ್ಳುತ್ತಿದ್ನೋ ಕೊನೆಗೂ ಅದನ್ನು ‘ಪ್ರೇಮದ ಊರಲಿ’ ಸಿನಿಮಾ ಸಕ್ಸಸ್‌ ಕೊಟ್ಟಿತು.

‘ಪ್ರೇಮದ ಊರಲಿ’ ಬ್ರೇಕ್ ಕೊಟ್ಟ ಚಿತ್ರವೋ, ನಿಮ್ಮೊಳಗಿನ ನಟನನ್ನು ಪರಿಚಯಿಸಿದ ಸಿನಿಮಾನಾ?

ಎರಡೂ ಈ ಚಿತ್ರದಿಂದ ಆಗಿದೆ. ನಾನು ಈ ಹಿಂದೆ ನಾಲ್ಕೈದು ಚಿತ್ರಗಳಲ್ಲಿ ನಟಿಸಿದ್ದೇನೆ. ಆ ಸಿನಿಮಾಗಳಲ್ಲಿ ಜನ ನನ್ನ ನೋಡಿ ಹಾರೈಸುತ್ತಾ ಬಂದಿದ್ದಾರೆ. ಹಾಗೆ ಪ್ರೇಕ್ಷಕರ ಹಾರೈಕೆ ಪಡೆದುಕೊಳ್ಳುತ್ತಾ ‘ಪ್ರೇಮದ ಊರಲಿ’ ಚಿತ್ರದವರೆಗೂ ಬಂದಿರುವೆ.

‘ಹೊಸ ನಟ’ ಎಂದೇ ನೋಡುತ್ತಿದ್ದಾರಾ, ಅಥವಾ ‘ನಾಯಕ’ ಎಂದು ಗುರುತಿಸುವ ಹಂತಕ್ಕೆ ಬಂದಿದ್ದೀರಾ?

ನಾನು ಹೊಸ ನಟನೋ, ನಾಯಕನೋ ಅನ್ನೋದು ಪ್ರೇಕ್ಷಕರು ಹೇಳಬೇಕು. ಆದರೆ, ನನಗೆ ಪ್ರತಿ ಚಿತ್ರವೂ ಹೊಸದೆ. ಆದರೆ, ‘ಕನ್ನಡಕ್ಕೆ ಹೊಸ ಹೀರೋ ಬೇಕು ಗುರು’ ಎನ್ನುವವರಿಗೆ ನಾನು ನಾಯಕನೇ.

ಯಶಸ್ಸನ್ನು ನೀವು ನಿರೀಕ್ಷಿಸಿದ್ದೀರಾ? ಅಥವಾ ಪ್ರೇಕ್ಷಕರ ಪ್ರತಿಕ್ರಿಯೆ ಅಚ್ಚರಿಗೊಳಿಸಿದೆಯಾ?

ಪ್ರತಿ ಚಿತ್ರದಲ್ಲಿ ನಾನು ಯಶಸ್ಸು ನಿರೀಕ್ಷೆ ಮಾಡುತ್ತಿದ್ದೆ. ಆದರೆ, ಈ ಚಿತ್ರದ ಬಿಡುಗಡೆ ದಿನ ಸಿಂಗಲ್‌ ಸ್ಕ್ರೀನ್‌ ಥಿಯೇಟರ್‌ನ ಮೆಟ್ಟಿಲುಗಳ ಮೇಲೆ ನಿಂತು, ನನ್ನ ಸಿನಿಮಾ ನೋಡಲು ಜನ ಇಲ್ಲಿ ನಿಲ್ಲುವಂತಾಗಲಿ ಎಂದು ಪ್ರಾರ್ಥಿಸಿದ್ದೆ. ನನ್ನ ಪ್ರಾರ್ಥನೆಯನ್ನು ಪ್ರೇಕ್ಷಕರು ದೊಡ್ಡದಾಗಿ ನಿಜವಾಗಿಸಿದ್ದಾರೆ. ಇಷ್ಟು ದೊಡ್ಡ ಸಕ್ಸಸ್‌ ನಾನು ನಿರೀಕ್ಷೆ ಮಾಡಿರಲಿಲ್ಲ.

ಚಿತ್ರ ನೋಡಿದ ನಂತರ ಪ್ರೇಕ್ಷಕರು, ಆಪ್ತರು, ಅಭಿಮಾನಿಗಳು ನಿಮಗೆ ಹೇಳಿದ್ದೇನು?

ಕೆಲವರು ಅವರ ಮೊಬೈಲ್‌ಗಳಲ್ಲಿ ನನ್ನ ಹೆಸರನ್ನು ‘ಹೀರೋ’ ಅಂತ ಸೇವ್‌ ಮಾಡಿಕೊಂಡಿದ್ದೇವೆಂದು ತೋರಿಸುತ್ತಿದ್ದಾರೆ. ಈ ಹಿಂದೆ ಜಸ್ಟ್‌ ‘ಶ್ರೀ’ ಅಂತ ಸೇವ್‌ ಮಾಡಿಕೊಂಡಿದ್ದವರು, ‘ನಮ್ಮ ನಮಸ್ಸಿನಲ್ಲಿ ನಿಮಗೆ ಜಾಗ ಕೊಟ್ಟಿದ್ದೇವೆ’ ಎಂದು ತೋರಿಸುತ್ತಿದ್ದಾರೆ.

ನಿಮ್ಮ ವೃತ್ತಿ ಜೀವನದಲ್ಲಿ ‘ಪ್ರೇಮದ ಊರಲಿ’ ಚಿತ್ರಕ್ಕೆ ಯಾವ ಸ್ಥಾನವಿದೆ?

ಅಗ್ರ ಸ್ಥಾನವಿದೆ. ಯಾವತ್ತಿಗೂ ಈ ಸಿನಿಮಾ ನಂಬರ್‌ 1 ಆಗಿರುತ್ತದೆ. ಯಾಕೆಂದರೆ ಈ ಸಿನಿಮಾ ನಂತರ ಶ್ರೀ, ಶ್ರೀ ಮಹದೇವ್‌, ಶ್ರೀ ರಾಮ್‌ ಯಾರು ಅಂತ ಹುಡುಕುತ್ತಿದ್ದಾರೆ.

ಈ ಚಿತ್ರದ ಸಂತೋಷ್‌ ಪಾತ್ರದಲ್ಲಿ ನಿಮ್ಮನ್ನು ಹೆಚ್ಚು ಆಕರ್ಷಿಸಿದ ಅಂಶ ಯಾವುದು?

ಸ್ಕ್ರೀನ್‌ ಮೇಲೆ ಬಿಲ್ಡಪ್‌, ಫೈಟ್‌ಗಳು ಇಲ್ಲದೆ ಪ್ರೇಕ್ಷಕರ ಮನಸ್ಸಿನಲ್ಲಿ ಹೀರೋ ಆಗುವ ಎಲ್ಲ ಲಕ್ಷಗಳು ಸಂತೋಷ್‌ ಪಾತ್ರಕ್ಕಿತ್ತು. ಅದೇ ನನ್ನ ಆಕರ್ಷಿಸಿದ್ದು.

ಈ ಪಾತ್ರಕ್ಕಾಗಿ ನಿಮ್ಮಲ್ಲಿ ನೀವು ಮಾಡಿಕೊಂಡ ವಿಶೇಷ ಬದಲಾವಣೆ ಏನು?

ನಾನು ರೈತನಾಗಲು ಹೊರಟಿದ್ದು. ಯಾಕೆಂದರೆ ನಾನು ಯಾವ ಆ್ಯಂಗಲ್‌ನಲ್ಲೂ ರೈತನ ರೀತಿ ಕಾಣಲ್ಲ. ಆದರೆ, ತೆರೆ ಮೇಲೆ ರೈತನ ಪಾತ್ರ ಮಾಡಬೇಕಿತ್ತು. ಅದಕ್ಕೆ ಪೂರ್ವ ತಯಾರಿ ಬೇಕಿತ್ತು. ಯಾಕೆಂದರೆ ಬೇರೆ ಪಾತ್ರಗಳಂತೆ ರೈತನ ಪಾತ್ರವನ್ನು ಇಮಿಟೇಟ್ ಮಾಡಕ್ಕಾಗಲ್ಲ. ಹಾಗೆ ಮಾಡಿದರೆ ರೈತ ಎನ್ನುವ ಹೆಸರಿಗೆ ಮೋಸ ಮಾಡಿದಂತೆ. ಹೀಗಾಗಿ ನಾನು ಹಳ್ಳಿಗೆ ಹೋಗಿ ಒಂದು ತಿಂಗಳು ವ್ಯವಸಾಯ ಮಾಡುತ್ತಾ, ಹಸು- ಎತ್ತುಗಳನ್ನು ಮೇಯಿಸುತ್ತಾ, ಉಳಿಮೆ ಮಾಡುತ್ತಾ ಪಕ್ಕಾ ರೈತನಾಗಿದ್ದೆ. ಅದಕ್ಕೆ ಸಂತೋಷ್‌ ಪಾತ್ರವು ತೆರೆ ಮೇಲೆ ಅಷ್ಟು ಆಪ್ತವಾಗಿ, ಮುಗ್ಧತೆಯಿಂದ ಮೂಡಿ ಬಂದಿರುವುದು.

‘ಈ ಒಂದು ದೃಶ್ಯ ಚೆನ್ನಾಗಿ ಬಂದರೆ ಸಾಕು, ಪ್ರೇಕ್ಷಕರು ನನ್ನ ಪಾತ್ರ ಒಪ್ಪಿಕೊಳ್ಳುತ್ತಾರೆ’ ಎಂದು ನಿಮಗೆ ಅನಿಸಿದ ದೃಶ್ಯ ಯಾವುದಾದರೂ ಇದೆಯೇ?

ಕತೆ ಕೇಳಿದಾಗ ಎಲ್ಲಾ ಸೀನ್‌, ಲೈನ್‌ ಮಹತ್ವ ಅನಿಸಿತು. ಸಂತೋಷ್‌ ಪಾತ್ರ ಹೋಗ್ತಾ ಹೋಗ್ತಾ ಜನರೇ ಅಪ್ಪಿಕೊಳ್ಳುತ್ತಾರೆ ಎನ್ನುವ ಅಂದಾಜು ಇತ್ತು. ಒಂದು ರೀತಿ ಎ.ಆರ್‌.ರೆಹಮಾನ್‌ ಹಾಡುಗಳನ್ನು ಕೇಳ್ತಾ ಕೇಳ್ತಾ ಮನಸೋಲುವಂತೆ.

ಪ್ರೇಮಕಥೆಗಳು ಅಪರಿಚಿತವಲ್ಲ. ‘ಪ್ರೇಮದ ಊರಲಿ’ ಕನೆಕ್ಟ್ ಆಗಲು ಕಾರಣವೇನೆಂದು ನೀವು ಭಾವಿಸುತ್ತೀರಿ?

ಇದು ಪ್ರೂರ್‌ ಡೈರೆಕ್ಟ್‌ ಪ್ರೆಸೆಂಟ್‌ ಕತೆ. ನಮ್ಮೆಲ್ಲರ ಬಹುದೊಡ್ಡ ಎಮೋಷನ್‌ ಎಂದರೆ ಲವ್‌. ಏನೇ ಜಗಳ ಆಡಿದರೂ ಮನಸ್ಸಿನ ಮೂಲೆಯಲ್ಲಿ ಪ್ರೀತಿ ಅನ್ನೋದು ಇರುತ್ತದೆ. ಈ ಚಿತ್ರದ ಹೃದಯ ಕೂಡ ಅದೇ. ಈ ಹಾರ್ಟ್‌ ಆಫ್‌ ಸೋಲ್‌ ಕಾರಣಕ್ಕೆ ಸಿನಿಮಾ ಪ್ರೇಕ್ಷಕರಿಗೆ ಕನೆಕ್ಟ್‌ ಆಗುತ್ತಿದೆ.

ಆರಂಭದ ದಿನಗಳಲ್ಲಿ ನೀವು ಎದುರಿಸಿದ ದೊಡ್ಡ ಸವಾಲು, ಸಂಕಷ್ಟಗಳೇನು?

ಆರಂಭದ ದಿನಗಳ ನನ್ನ ಹೋರಾಟ ಸವಾಲು, ಸಂಕಷ್ಟಗಳು ಅಂತ ನಾನು ಭಾವಿಸಲ್ಲ. ಬಹುಶಃ ಆ ಸವಾಲುಗಳನ್ನು ನೋಡದಿದ್ದರೆ ಇವತ್ತಿನ ಸಕ್ಸಸ್‌ ಬೆಲೆ ಗೊತ್ತಾಗುತ್ತಿರಲಿಲ್ಲ. ನಾನು ಏನೂ ಅಲ್ಲ. ನಾನು ಗ್ರೇಟ್‌ ಅಲ್ಲ ಅಂದುಕೊಂಡೇ ಚಿತ್ರರಂಗಕ್ಕೆ ಬಂದವನು. ಹೀಗಾಗಿ ಯಾವ ಹಿನ್ನೆಲೆ ಇಲ್ಲದಿರುವವನಿಗೆ ಯಾವುದು ಸವಾಲು, ಕಷ್ಟ ಅನಿಸಲ್ಲ.

ಕನ್ನಡದ ಯಾವ ನಟನ ಸಿನಿಮಾಗಳನ್ನು ನೋಡಿ ‘ನಾನೂ ಹೀಗೆ ಮಾಡಬೇಕು’ ಎಂದುಕೊಳ್ಳುತ್ತೀರಿ?

ಡಾ ರಾಜ್‌ಕುಮಾರ್‌. ಹಾಗಂತ ನಾನು ಅವರಂತೆ ಆಗಲು ಸಾಧ್ಯವಿಲ್ಲ. ಆದರೆ ಅವರೆಂದರೆ ಪ್ರೀತಿ, ಅಭಿಮಾನ, ಪ್ರೇರಣೆ- ಸ್ಫೂರ್ತಿ ಎಲ್ಲವೂ ಹೌದು.

ಈ ಯಶಸ್ಸಿನ ಜೊತೆಗೆ ಟೀಕೆಗಳೂ ಬಂದಿದ್ದರೆ ಅವುಗಳನ್ನು ನೀವು ಹೇಗೆ ಸ್ವೀಕರಿಸುತ್ತೀರಿ?

ನನ್ನ ಬಗ್ಗೆ ನಾನೇ ಟೀಕೆ ಮಾಡಿಕೊಂಡು ನಾನೇ ನಗುತ್ತಿರುತ್ತೇನೆ. ಹೀಗಾಗಿ ಬೇರೆ ಟೀಕೆಗಳು ನನಗೆ ದೊಡ್ಡದು ಅನಿಸಲ್ಲ. ಯಾಕೆಂದರೆ ನಾನು ಗ್ರೇಟ್‌ ಅಲ್ಲ. ಪರ್‌ಫೆಕ್ಟು ಅಲ್ಲ. ಕಲಿಯುತ್ತಾ ಹೆಜ್ಜೆಗಳನ್ನು ಹಾಕುತ್ತಿದ್ದೇನೆ.

ಚಿತ್ರವನ್ನು ನೀವು ಮತ್ತೆ ನೋಡಿದಾಗ ‘ಈ ದೃಶ್ಯವನ್ನು ಇನ್ನೂ ಚೆನ್ನಾಗಿ ಮಾಡಬಹುದಿತ್ತು’ ಎಂದು ಅನಿಸಿದೆಯೇ?

ಕ್ಲೈಮ್ಯಾಕ್ಸ್‌ ಸೀನ್‌.

ಮುಂದಿನ ಕಥೆ ಆಯ್ಕೆ ಮಾಡುವಾಗ ಯಾವ ಅಂಶಗಳಿಗೆ ಹೆಚ್ಚು ಆದ್ಯತೆ ನೀಡುತ್ತೀರಿ?

ಎಲ್ಲಾ ಅಂಶಗಳ ಮೇಲೆ ಗಮನ ಹರಿಸಬೇಕು. ಎಲ್ಲಕ್ಕಿಂತ ಮುಖ್ಯವಾಗಿ ನನಗೆ ಈಗ ನಿಜವಾಗಲೂ ಗೈಡ್‌ ಲೈನ್ಸ್‌.

ಸಿನಿಮಾ ಕ್ಷೇತ್ರಕ್ಕೆ ಬರದೇ ಇದ್ದಿದ್ದರೆ ಇಂದು ಏನಾಗಿರುತ್ತಿದ್ದಿರಿ?

ಬಹುಶಃ ಪತ್ರಕರ್ತನಾಗಿರುತ್ತಿದ್ದೆ. ಯಾಕೆಂದರೆ ಪತ್ರಿಕೆಗಳಲ್ಲಿ ಬರುತ್ತಿದ್ದ ಲೇಖನಗಳನ್ನು ಹೆಚ್ಚು ಓದುತ್ತಿದ್ದೆ. ಈ ಓದಿನ ಆಸಕ್ತಿ ನನ್ನ ಪತ್ರಕರ್ತನನ್ನಾಗಿ ಮಾಡುವ ಸಾಧ್ಯತೆಗಳಿದ್ದವು.

ನಿಮ್ಮ ಯಶಸ್ಸಿನಲ್ಲಿ ಕುಟುಂಬದ ಪಾತ್ರ ಎಷ್ಟು?

ನನ್ನ ತಂದೆ, ತಾಯಿ, ತಂಗಿ ಹೀಗೆ ನನ್ನ ಕುಟುಂಬದ ಪ್ರತಿಯೊಬ್ಬರು ನನ್ನ ಸಾಕಿದ್ದಾರೆ. ಮನೆಯ ಗಂಡು ಮಗನಾಗಿ ಏನನ್ನೂ ನಾನು ಮನೆಗೆ ಕೊಡುವ ಸ್ಥಿತಿಯಲ್ಲಿ ಇಲ್ಲವಲ್ಲ ಎನ್ನುವ ಗಿಲ್ಟ್‌ನಲ್ಲಿದ್ದಾಗಲೂ ಅವರು ನನಗೆ ಬೆನ್ನೆಲುಬಾಗಿದ್ದಾರೆ. ಮನೆಯವರ ಪ್ರೋತ್ಸಾಹ ಇಲ್ಲದೆ ಹೋಗಿದ್ದರೆ ಶ್ರೀ, ಶ್ರೀ ರಾಮ್‌, ಶ್ರೀ ಮಹದೇವ್‌... ಈ ಯಾವ ಹೆಸರು ಯಾರಿಗೂ ಗೊತ್ತಾಗುತ್ತಿರಲಿಲ್ಲ.

ಕಣ್ಣಿನಲ್ಲೇ ಮೌನವನ್ನೂ ದಾಟಿಸಬಲ್ಲ ಆಕಾಶ ಪ್ರತಿಭೆ ಅನಂತನಾಗ್

Sujatha NR — Thu, 17 Sep 2026 12:41:29 +0530

ಸಂಭಾಷಣೆಯ ಅತಿಯಿಲ್ಲದೆ, ನಟನೆಯ ಅಬ್ಬರವಿಲ್ಲದೆ, ಕೇವಲ ಕಣ್ಣಮಿಂಚು ಮತ್ತು ಮಂದಹಾಸದಲ್ಲೇ ಭಾವ ಪ್ರಪಂಚವನ್ನೇ ಕಟ್ಟಿಕೊಡಬಲ್ಲ ಅಗಾಧ ಪ್ರತಿಭೆ ಅನಂತನಾಗ್. ಗಾಂಭೀರ್ಯವಿರಲಿ, ರೊಮ್ಯಾಂಟಿಕ್ ಪಾತ್ರವಾಗಿರಲಿ, ಇಲ್ಲವೇ ಹೊಟ್ಟೆ ಹುಣ್ಣಾಗಿಸುವ ತಮಾಷೆ ಪಾತ್ರಗಳಿರಲಿ ಪ್ರತೀ ಪಾತ್ರಕ್ಕೂ ಘನತೆ ತಂದುಕೊಟ್ಟ ಕನ್ನಡದ ಮೇರು ಪ್ರತಿಭೆ.

ರಂಗಭೂಮಿಯ ಗರಡಿಯಲ್ಲಿ ಅರಳಿದ ಪ್ರತಿಭೆ

ಉತ್ತರ ಕನ್ನಡ ಜಿಲ್ಲೆಯ ಭಟ್ಕಳ ತಾಲೂಕಿನ ಶಿರಾಲಿಯ ಕೊಂಕಣಿ ಕುಟುಂಬದಲ್ಲಿ 1948ರ ಸೆಪ್ಟೆಂಬರ್ 4ರಂದು ಜನಿಸಿದ ಅನಂತ್ ನಾಗರಕಟ್ಟೆ, ಮುಂಬೈನಲ್ಲಿ ಶಿಕ್ಷಣ ಮುಗಿಸಿ ರಂಗಭೂಮಿಯತ್ತ ಆಕರ್ಷಿತರಾದರು. ಖ್ಯಾತ ರಂಗಕರ್ಮಿ ಸತ್ಯದೇವ್ ದುಬೆ ಗರಡಿಯಲ್ಲಿ ಪಳಗಿದ ಅನಂತ್, ಕೊಂಕಣಿ, ಮರಾಠಿ ಹಾಗೂ ಹಿಂದಿ ನಾಟಕಗಳಲ್ಲಿ ಮಿಂಚಿದರು. 1974ರಲ್ಲಿ ಶ್ಯಾಮ್ ಬೆನೆಗಲ್ ಅವರ ಪ್ರಸಿದ್ಧ ‘ಅಂಕುರ್’ ಚಿತ್ರದ ಮೂಲಕ ಚಿತ್ರರಂಗ ಪ್ರವೇಶಿಸಿದ ಅವರು, ‘ನಿಶಾಂತ್’, ‘ಮಂಥನ್’, ‘ಭೂಮಿಕಾ’ ಮತ್ತು ‘ಕಲಿಯುಗ್’ ಮುಂತಾದ ಮೇರು ಕೃತಿಗಳಲ್ಲಿ ಅಮೋಘ ಅಭಿನಯ ನೀಡಿ ರಾಷ್ಟ್ರಮಟ್ಟದಲ್ಲಿ ಗುರುತಿಸಿಕೊಂಡರು.

ಕನ್ನಡ ಬೆಳ್ಳಿಪರದೆಯ ‘ಕ್ಲಾಸ್’ ನಾಯಕ

ಪಿ.ವಿ. ನಂಜರಾಜ ಅರಸ್ ಅವರ ‘ಸಂಕಲ್ಪ’ (1973) ಮೂಲಕ ಕನ್ನಡ ಪ್ರವೇಶಿಸಿದ ಅನಂತನಾಗ್, ನಂತರ ‘ಬಯಲು ದಾರಿ’, ‘ಹಂಸಗೀತೆ’ ಸಿನಿಮಾ ಮೂಲಕ ಕನ್ನಡಿಗರ ಮನಗೆದ್ದರು. ‘ಚಂದನದ ಗೊಂಬೆ’, ‘ಬೆಂಕಿಯ ಬಲೆ’, ‘ನಾ ನಿನ್ನ ಬಿಡಲಾರೆ’ ಮುಂತಾದ ವಿಭಿನ್ನ ಜಾನರ್‌ನ ಚಿತ್ರಗಳ ಮೂಲಕ . ‘ಚಾಕೋಲೇಟ್ ಹೀರೋ’ ಪಟ್ಟವನ್ನು ಕಳಚಿಹಾಕಿ ‘ಮಿಂಚಿನ ಓಟ’, ‘ಆಕ್ಸಿಡೆಂಟ್’, ‘ಬರ’ ಚಿತ್ರಗಳಲ್ಲಿ ಗಂಭೀರ ಪಾತ್ರಗಳನ್ನು ನಿರ್ವಹಿಸಿ ತಮ್ಮ ನಟನಾ ಸಾಮರ್ಥ್ಯವನ್ನು ಪರಿಚಯಿಸಿದರು. ‘ಬೆಳದಿಂಗಳ ಬಾಲೆ’ ಚಿತ್ರದ ರೇವಂತ್ ಪಾತ್ರವಂತೂ ಇಂದಿಗೂ ಕ್ಲಾಸಿಕ್.

ಹಾಸ್ಯ ಮತ್ತು ವಿಡಂಬನೆಯ ರಾಜಕುಮಾರ

ಅನಂತನಾಗ್ ಅವರ ಕಾಮಿಡಿ ಟೈಮಿಂಗ್ ಭಾರತೀಯ ಚಿತ್ರರಂಗದಲ್ಲೇ ವಿಶಿಷ್ಟ. ಮುಖದಲ್ಲಿ ಗಂಭೀರತೆ ಕಾಪಾಡಿಕೊಂಡೇ ಪ್ರೇಕ್ಷಕರನ್ನು ನಗೆಗಡಲಿನಲ್ಲಿ ತೇಲಿಸುವ ಅವರ ಶೈಲಿ ಅನನ್ಯ. ‘ಗೌರಿ ಗಣೇಶ’, ‘ಗಣೇಶನ ಮದುವೆ’, ‘ಉಂಡೂಹೋದ ಕೊಂಡೂಹೋದ’ ‘ಉದ್ಭವ’, ‘ಯಾರಿಗೂ ಹೇಳ್ಬೇಡಿ’, ‘ಗೋಲ್‌ಮಾಲ್ ರಾಧಾಕೃಷ್ಣ’ ಚಿತ್ರಗಳು ಸಾರ್ವಕಾಲಿಕ ಜನಪ್ರಿಯ. ರಾಜಕೀಯ ಹಾಗೂ ಸಾಮಾಜಿಕ ಬೂಟಾಟಿಕೆಯನ್ನು ವಿಡಂಬಿಸುವ ಪಾತ್ರಗಳಿಗೆ ಅವರಷ್ಟು ಜೀವ ತುಂಬಿದವರು ವಿರಳ.

ಶಂಕರ್ - ಅನಂತ್‌ ಜೋಡಿಯ ಬೆರಗು

ಸಹೋದರ ಶಂಕರ್ ನಾಗ್ ಅವರೊಂದಿಗೆ ಅನಂತನಾಗ್ ಕಟ್ಟಿದ ಸಿನಿಕನಸುಗಳು ಕನ್ನಡ ಚಿತ್ರರಂಗದ ಸ್ವರ್ಣಯುಗ. ಆರ್.ಕೆ. ನಾರಾಯಣ್ ಅವರ ಕಥೆಗಳನ್ನು ಆಧರಿಸಿ ಶಂಕರ್ ನಾಗ್ ನಿರ್ದೇಶಿಸಿದ ರಾಷ್ಟ್ರಮಟ್ಟದ ಪ್ರಸಿದ್ಧ ಧಾರಾವಾಹಿ ‘ಮಾಲ್ಗುಡಿ ಡೇಸ್’ನಲ್ಲಿ ಅನಂತ್ ಅವರ ಪಾತ್ರಗಳು ಇಂದಿಗೂ ಹಸಿರಾಗಿವೆ.

ಹೊಸ ತಲೆಮಾರಿನಲ್ಲೂ ಅಚ್ಚಳಿಯದ ಛಾಪು

ಹೊಸಬರ ಸಿನಿಮಾಗಳಲ್ಲಿಯೂ ಮಿಂಚಿದ ಅಪರೂಪದ ನಟ ಅವರು. ‘ಗೋಧಿ ಬಣ್ಣ ಸಾಧಾರಣ ಮೈಕಟ್ಟು’ ಚಿತ್ರದ ವೆಂಕೋಬರಾವ್ ಪಾತ್ರದ ಮೂಲಕ ಮರೆವಿನ ಕಾಯಿಲೆಗೆ ತುತ್ತಾದ ತಂದೆಯಾಗಿ ಜೀವಿಸಿ ಮೆಚ್ಚುಗೆ ಗಳಿಸಿದರು. ‘ಸರ್ಕಾರಿ ಹಿ.ಪ್ರಾ. ಶಾಲೆ ಕಾಸರಗೋಡು’, ‘ಕೆಜಿಎಫ್’ ಚಿತ್ರಗಳಲ್ಲಿ ಅವರ ಉಪಸ್ಥಿತಿಯೇ ಚಿತ್ರದ ಮೌಲ್ಯವನ್ನು ಹೆಚ್ಚಿಸಿತು.

ಸರಳತೆ ಮತ್ತು ಸೈದ್ಧಾಂತಿಕ ಸ್ಪಷ್ಟತೆ

ಸಿನಿಮಾದ ಜೊತೆಗೆ ಸಾಹಿತ್ಯ, ರಾಜಕೀಯ ಮತ್ತು ಸಾಮಾಜಿಕ ವಿಚಾರಗಳಲ್ಲಿ ಮುಕ್ತವಾಗಿ ಧ್ವನಿ ಎತ್ತುವ ಅನಂತನಾಗ್, ಜೆ.ಎಚ್. ಪಟೇಲ್ ಸಂಪುಟದಲ್ಲಿ ಸಚಿವರಾಗಿಯೂ ಕೆಲಸ ಮಾಡಿದವರು. ಪ್ರಶಸ್ತಿ-ಪ್ರಚಾರಗಳ ಹಂಗಿಲ್ಲದೆ, ಆರ್ಭಟವಿಲ್ಲದ ಜೀವನ ನಡೆಸುವ ಅನಂತನಾಗ್, ಕನ್ನಡ ಸಂಸ್ಕೃತಿ ಮತ್ತು ಭಾರತೀಯ ಚಿತ್ರರಂಗದ ಅತ್ಯಂತ ಗೌರವಾನ್ವಿತ ಸಾಂಸ್ಕೃತಿಕ ರಾಯಭಾರಿ.

ದಾದಾ ಸಾಹೇಬ್ ಪ್ರಶಸ್ತಿಯತ್ತ ಅನಂತ ನಾಗ್ ನಡೆದು ಬಂದ ದಾರಿ

Sujatha NR — Thu, 17 Sep 2026 12:33:09 +0530

ಕೆಲವು ನಟರು ಸಿನಿಮಾದಲ್ಲಿ ಕಾಣಿಸಿಕೊಳ್ಳುತ್ತಾರೆ. ಕೆಲವೇ ಕೆಲವರು ಸಿನಿಮಾ ಮುಗಿದ ಮೇಲೂ ನಮ್ಮೊಳಗೆ ಉಳಿದುಕೊಳ್ಳುತ್ತಾರೆ. ಅನಂತನಾಗ್ ಎರಡನೆಯ ಸಾಲಿಗೆ ಸೇರಿದವರು. ಅವರ ಅಭಿನಯವನ್ನು ನೆನಪಿಸಿಕೊಳ್ಳುವಾಗ ನಮಗೆ ಯಾವುದೋ ಒಂದು ಪಾತ್ರ ನೆನಪಾಗುವುದಿಲ್ಲ; ನಮ್ಮ ಜೀವನದ ಹಲವು ಹಂತಗಳು ನೆನಪಾಗುತ್ತವೆ. ಪ್ರೇಮಿಸಿದ ಯುವಕ, ಸೋತ ಗಂಡ, ಅಸಹಾಯಕ ತಂದೆ, ಹಠದ ರಾಜಕಾರಣಿ, ಶ್ರೀಸಾಮಾನ್ಯ ಗೃಹಸ್ಥ, ಮಧ್ಯಮವರ್ಗದ ಬಡಪಾಯಿ, ತುಂಟ ತರಲೆ, ಒಳಗೊಳಗೇ ತೊಳಲಾಡುವ ಮನುಷ್ಯ- ಹೀಗೆ ನಮ್ಮ ಸುತ್ತಲಿನ ಮನುಷ್ಯರನ್ನೇ ಅವರು ತೆರೆಯ ಮೇಲೆ ನಮಗೆ ತೋರಿಸುತ್ತಾ ಬಂದಿದ್ದಾರೆ. ಐದು ದಶಕಗಳಿಗೂ ಹೆಚ್ಚು ಕಾಲದ ಅವರ ಈ ಪಯಣವೇ ಅವರನ್ನು ಈಗ ದಾದಾ ಸಾಹೇಬ್ ಫಾಲ್ಕೆ ಪ್ರಶಸ್ತಿಯ ಬಾಗಿಲಿನ ಎದುರು ತಂದು ನಿಲ್ಲಿಸಿದೆ. 2023ರಲ್ಲಿ ಅವರು ಚಿತ್ರರಂಗದಲ್ಲಿ ಐವತ್ತು ವರ್ಷಗಳನ್ನು ಪೂರೈಸಿದ್ದರು. ಐವತ್ತು ವರ್ಷಗಳ ಕಾಲ ಕನ್ನಡಿಗರ ಕಣ್ಮಣಿಯಾಗಿ ಮೆರೆದವರು.

ಅನಂತ ನಾಗ್ ಅವರ ಕಥೆ ರಂಗಭೂಮಿಯಿಂದ ಆರಂಭವಾಗುತ್ತದೆ. ಹದಿನೆಂಟರ ಹರೆಯದಲ್ಲಿ ರಜೆ ದಿನಗಳ ಪಾರ್ಟ್ ಟೈಮ್ ಕೆಲಸವಾಗಿ ಸಿಕ್ಕ ಅವಕಾಶವೊಂದು ಅವರನ್ನು ನಾಟಕದ ಕಡೆಗೆ ಕರೆದುಕೊಂಡು ಹೋಯಿತು. ನಾಟಕದ ಪಾತ್ರಗಳು ಅವರೊಳಗಿನ ನಟನಿಗೆ ಬಾಗಿಲು ತೆರೆದವು. ನಂತರದ ಐದು ವರ್ಷಗಳಲ್ಲಿ ಐವತ್ತಕ್ಕೂ ಹೆಚ್ಚು ನಾಟಕಗಳಲ್ಲಿ ಬೇರೆ ಬೇರೆ ಪಾತ್ರಗಳನ್ನು ನಿರ್ವಹಿಸಿದರು. ನಟನಿಗೆ ರಂಗಭೂಮಿ ಕೊಡುವ ಒಂದು ದೊಡ್ಡ ಪಾಠವೆಂದರೆ, ಮಾತಿನಿಂತ, ಮುಖಭಾವದಿಂದ ಮಾತ್ರವಲ್ಲ, ಮೌನದಿಂದಲೂ ಅಭಿನಯಿಸಬಹುದು ಎನ್ನುವುದು. ಅನಂತ ನಾಗ್ ಅವರ ನಂತರದ ಸಿನಿಮಾಗಳನ್ನು ನೋಡಿದಾಗ ಈ ರಂಗಭೂಮಿಯ ತರಬೇತಿ ಎಷ್ಟು ಗಾಢವಾಗಿ ಅವರೊಳಗೆ ನೆಲೆಸಿದೆ ಎನ್ನುವುದು ಅರ್ಥವಾಗುತ್ತದೆ.

ಕನ್ನಡ ಸಿನಿಮಾಕ್ಕೆ ಬಂದಾಗಲೂ ಅವರು ಸಿದ್ಧವಾಗಿ ಬಂದ ನಟರಲ್ಲ. ವೈ.ಎನ್. ಕೃಷ್ಣಮೂರ್ತಿ, ಗಿರೀಶ್ ಕಾರ್ನಾಡ್ ಮತ್ತು ಜಿ.ವಿ. ಅಯ್ಯರ್ ಅವರ ಪ್ರೋತ್ಸಾಹದಿಂದ ಸಂಕಲ್ಪ ಚಿತ್ರದ ಮೂಲಕ ನಾಯಕನಾಗಿ ಪರಿಚಯವಾದರು. ನಂತರ ಶ್ಯಾಮ್ ಬೆನಗಲ್ ಅವರ ಅಂಕುರ್ ಮೂಲಕ ಹಿಂದಿ ಚಿತ್ರರಂಗಕ್ಕೂ ಹೋದರು. ಅಲ್ಲಿಂದ ಮುಂದೆ ಭಾಷೆಗಳ ಗಡಿ ಅವರಿಗೆ ಅಡ್ಡಿಯಾಗಲಿಲ್ಲ. ಕನ್ನಡ, ಹಿಂದಿ, ತೆಲುಗು, ಮಲಯಾಳಂ, ತಮಿಳು, ಮರಾಠಿ -ಹಲವು ಭಾಷೆಗಳ ಮುನ್ನೂರಕ್ಕೂ ಹೆಚ್ಚು ಚಿತ್ರಗಳಲ್ಲಿ ಅವರು ಅಭಿನಯಿಸಿದ್ದಾರೆ. ಮಾಲ್ಗುಡಿ ಡೇಸ್ ಕೂಡ ಅವರ ಅಭಿನಯ ಪಯಣದ ಒಂದು ಮುಖ್ಯ ಗುರುತು.

ಅನಂತ ನಾಗ್ ಅವರನ್ನು ಇಷ್ಟು ವರ್ಷಗಳ ಕಾಲ ಪ್ರೇಕ್ಷಕರಿಗೆ ಹತ್ತಿರವಾಗಿಟ್ಟಿದ್ದು ಅವರ ಅಭಿನಯದ ಸಹಜತೆ. ನಡುಗಿಸುವ ಸಂಭಾಷಣೆ ಇಲ್ಲದೆ, ಕಣ್ಣಿನ ಒಂದು ನೋಟದಿಂದಲೇ ಒಂದು ಪಾತ್ರದ ಅಂತರಾಳದ ಮಾತನ್ನು ಧ್ವನಿಸಬಲ್ಲ ನಟ ಅವರು. ನಾಯಕನಾಗಿದ್ದಾಗಲೂ ಹೀರೋಯಿಸಮ್ ತೋರಿಸಲಿಲ್ಲ; ಪೋಷಕ ಪಾತ್ರಕ್ಕೆ ಬಂದಾಗಲೂ ತನ್ನ ಘನತೆಯನ್ನು ಕುಗ್ಗಿಸಿಕೊಳ್ಳಲಿಲ್ಲ. ಪಾತ್ರ ದೊಡ್ಡದೋ ಚಿಕ್ಕದೋ ಎನ್ನುವುದಕ್ಕಿಂತ ಅದು ಮನುಷ್ಯನೋ ಇಲ್ಲವೋ ಎನ್ನುವುದೇ ಅವರಿಗೆ ಮುಖ್ಯವಾಗಿದ್ದಂತೆ ಕಾಣುತ್ತದೆ. ಅದಕ್ಕಾಗಿಯೇ ಹಲವು ತಲೆಮಾರುಗಳು ಅವರನ್ನು ತಮ್ಮದೇ ನಟನಂತೆ ಸ್ವೀಕರಿಸಿವೆ.

ಐದು ಕರ್ನಾಟಕ ರಾಜ್ಯ ಅತ್ಯುತ್ತಮ ನಟ ಪ್ರಶಸ್ತಿಗಳು, ಐದು ಫಿಲ್ಮ್‌ಫೇರ್ ಪ್ರಶಸ್ತಿಗಳು, ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಸೇರಿದಂತೆ ಅನೇಕ ಗೌರವಗಳು ಅವರ ದಾರಿಯಲ್ಲಿ ಬಂದಿವೆ. 2025ರಲ್ಲಿ ಅವರಿಗೆ ಪದ್ಮಭೂಷಣವೂ ದೊರೆಯಿತು. ಆದರೆ ಪ್ರಶಸ್ತಿಗಳ ಪಟ್ಟಿಯನ್ನು ಓದುವುದರಿಂದ ಅನಂತ ನಾಗ್ ಅವರ ಪಯಣದ ಪೂರ್ಣ ಅರ್ಥ ಸಿಗುವುದಿಲ್ಲ. ಒಂದು ನಟನಿಗೆ ಸಿಗಬಹುದಾದ ದೊಡ್ಡ ಪ್ರಶಸ್ತಿ ಬಹುಶಃ ಜನರ ನೆನಪು, ಪ್ರೀತಿ. ಅನಂತ ನಾಗ್ ಅವರಿಗೆ ಅದು ಬಹಳ ಹಿಂದೆಯೇ ಸಿಕ್ಕಿದೆ.

ದಾದಾ ಸಾಹೇಬ್ ಫಾಲ್ಕೆ ಪ್ರಶಸ್ತಿ ಭಾರತೀಯ ಚಿತ್ರರಂಗದ ಅತ್ಯುನ್ನತ ಗೌರವ

ದಾದಾ ಸಾಹೇಬ್ ಫಾಲ್ಕೆ ಪ್ರಶಸ್ತಿ ಭಾರತೀಯ ಚಿತ್ರರಂಗದ ಅತ್ಯುನ್ನತ ಗೌರವಗಳಲ್ಲಿ ಒಂದಾಗಿದೆ; ಚಿತ್ರರಂಗದ ಬೆಳವಣಿಗೆ ಮತ್ತು ಅಭಿವೃದ್ಧಿಗೆ ಅತ್ಯುತ್ತಮ ಕೊಡುಗೆ ನೀಡಿದವರನ್ನು ಈ ಪ್ರಶಸ್ತಿ ಗುರುತಿಸುತ್ತದೆ. ಅನಂತ ನಾಗ್ ಅವರ ದಾರಿಯನ್ನು ನೋಡಿದಾಗ, ಈ ಗೌರವದ ಅರ್ಥ ಕೇವಲ ಒಬ್ಬ ನಟನಿಗೆ ದೊರೆಯುವ ಪ್ರಶಸ್ತಿ ಎನ್ನುವುದಕ್ಕಿಂತ ಮಹತ್ವದ್ದಾಗಿ ಕಾಣುತ್ತದೆ. ಇದು ಕನ್ನಡದ ಒಬ್ಬ ನಟ ತನ್ನ ಸಹಜ ಅಭಿನಯದಿಂದ ಭಾಷೆಯ ಗಡಿಗಳನ್ನು ದಾಟಿ, ಹಲವು ತಲೆಮಾರುಗಳ ನೆನಪಿನಲ್ಲಿ ಉಳಿದುಕೊಂಡ ಕಥೆಯ ಕುರುಹಾಗಿ ಉಳಿದುಕೊಂಡ ಗುರುತು. ಅವರು ಇನ್ನೂ ಅಭಿನಯಿಸಬೇಕಾದ ಪಾತ್ರಗಳು ಮುಂದೆ ಬರಬಹುದು. ಆದರೆ ಹಿಂದಿರುಗಿ ನೋಡಿದರೆ, ಅನಂತ ನಾಗ್ ನಡೆದು ಬಂದ ದಾರಿ ಈಗಾಗಲೇ ಕನ್ನಡ ಸಿನಿಮಾದ ಸುವರ್ಣ ಅಧ್ಯಾಯದಂತೆ ಕಾಣುತ್ತದೆ.

ಮೊನ್ನೆ ಮೊನ್ನೆ ತಾನೇ ತನ್ನ 78ನೇ ಹುಟ್ಟುಹಬ್ಬವನ್ನು ಆಚರಿಸಿಕೊಂಡ ಅನಂತನಾಗ್ ಅವರಿಗೆ ಹುಟ್ಟುಹಬ್ಬದ ಉಡುಗೊರೆಯಾಗಿ ದಾದಾಸಾಹೇಬ್ ಫಾಲ್ಕೆ ಸಂದಿದೆ.

ಅನಂತ್ ಸರ್ ನನಗೆ ತುಂಬಾ ಸ್ಪೆಷಲ್: ರಿಷಬ್ ಶೆಟ್ಟಿ

- ರಿಷಬ್ ಶೆಟ್ಟಿ

ಅನಂತ್ ಸರ್ ಅವರಿಗೆ ಅತ್ಯುನ್ನತ ಗೌರವ ಸಂದಿರುವುದು ಅತೀವ ಸಂತೋಷ ತಂದಿದೆ. ಅವರು ಭಾರತೀಯ ಚಿತ್ರರಂಗಕ್ಕೆ ನೀಡಿದ ಕೊಡುಗೆ ಅಪಾರ. ನಿಜಕ್ಕೂ ಅವರು ನಮ್ಮ ಚಿತ್ರರಂಗದ ಲಿವಿಂಗ್ ಲೆಜೆಂಡ್. ಇಡೀ ಚಿತ್ರರಂಗವೇ ಅವರಿಂದ ಸ್ಫೂರ್ತಿ ಪಡೆದುಕೊಂಡು ಬೆಳೆದಿದೆ. ಅವರಿಗೆ ಈ ಪ್ರಶಸ್ತಿ ಸಿಕ್ಕಿರುವುದು ಇಡೀ ಕನ್ನಡ ನಾಡಿಗೆ ಮತ್ತು ಕನ್ನಡ ಚಿತ್ರರಂಗಕ್ಕೆ ಸಂದ ಗೌರವ.

ಅಣ್ಣಾವ್ರು, ವಿಷ್ಣು ಸರ್, ಅಂಬರೀಶಣ್ಣ ಅವರಂತಹ ದಿಗ್ಗಜರನ್ನು ಕಳೆದುಕೊಂಡ ಮೇಲೆ, ಚಿತ್ರರಂಗ ಯಾವ ದಾರಿಯಲ್ಲಿ ಸಾಗಬೇಕು, ಯಾವ ದಾರಿಯಲ್ಲಿ ಬಂದಿದ್ದೇವೆ ಎಂಬುದನ್ನು ನೆನಪಿಸಲು ನಮ್ಮ ನಡುವೆ ಇರುವ ದೊಡ್ಡ ಶಕ್ತಿ ಅನಂತ್ ಸರ್. ಕುಟುಂಬದಲ್ಲಿ ಒಬ್ಬ ಹಿರಿಯ ವ್ಯಕ್ತಿ ಇದ್ದರೆ ಸಿಗುವ ನೆಮ್ಮದಿ, ಧೈರ್ಯ ಅವರ ಉಪಸ್ಥಿತಿಯಿಂದ ನಮಗೆ ಸಿಗುತ್ತದೆ. ‘ನಾವೂ ಕನ್ನಡ ಚಿತ್ರರಂಗದವರು’ ಎಂದು ಹೆಮ್ಮೆಯಿಂದ ಹೇಳಿಕೊಳ್ಳಲು ಅವರೇ ನಮಗೆ ದೊಡ್ಡ ಪ್ರೇರಣೆ.

‘ಸ.ಹಿ.ಪ್ರಾ ಶಾಲೆ ಕಾಸರಗೋಡು’ ಚಿತ್ರದ ಕ್ಲೈಮ್ಯಾಕ್ಸ್ ಕೋರ್ಟ್‌ರೂಮ್ ದೃಶ್ಯ ನನಗೆ ಸದಾ ವಿಶೇಷ. ಆ ದೃಶ್ಯ ಸುಮಾರು 15 ನಿಮಿಷ 20 ಸೆಕೆಂಡ್‌ಗಳ ಕಾಲ ನಿರಂತರವಾಗಿ ಸಾಗುವ ಸಿಂಗಲ್ ಶಾಟ್. ಅದಕ್ಕಾಗಿ ಸಾಕಷ್ಟು ಪೂರ್ವ ತಯಾರಿ ಮಾಡಿಕೊಂಡಿದ್ದೆವು. ಸರ್ಕಾರದ ಗಮನ ಸೆಳೆಯುವ ಗಂಭೀರ ವಿಚಾರವನ್ನು ಪ್ರಸ್ತುತಪಡಿಸಬೇಕಿತ್ತು. ವೃತ್ತಿಪರ ವಕೀಲನಲ್ಲದಿದ್ದರೂ ಕಾನೂನು ತಿಳಿದಿರುವ, ತರ್ಲೆ ಮಾಡುತ್ತಲೇ ಅಲ್ಲಲ್ಲಿ ಧೈರ್ಯ ತೋರುವ ಅನಂತಪದ್ಮನಾಭ ಪಿ. (ಪಿ ಫಾರ್ ಪೀಕಾಕ್) ಪಾತ್ರವನ್ನು ಆ ಸಣ್ಣ ಕೋರ್ಟ್ ಹಾಲ್‌ನಲ್ಲಿ ಕಟ್ಟಿಕೊಡುವುದು ಸುಲಭವಾಗಿರಲಿಲ್ಲ.

ಭಾಷೆಯ ಸೂಕ್ಷ್ಮತೆ, ಕಾಸರಗೋಡಿನ ಸಂಕೀರ್ಣತೆ, ಸರ್ಕಾರಿ ಶಾಲೆಗಳ ಕಷ್ಟ ಮುಂತಾದ ಗಂಭೀರ ವಿಚಾರಗಳನ್ನು ಕೇವಲ ಒಂದೇ ಶಾಟ್‌ನಲ್ಲಿ ದಾಟಿಸುವುದು ಸಾಮಾನ್ಯ ನಟನಿಗೆ ಸಾಧ್ಯವಿಲ್ಲ. ಆ ಎಲ್ಲಾ ವಿಚಾರ ಗ್ರಹಿಸುವುದೂ ಆಗಲ್ಲ. ಆದರೆ ಈ ಸವಾಲನ್ನು ಕೇಳಿದ ತಕ್ಷಣ ಅನಂತ್ ಸರ್ ಎಕ್ಸೈಟ್ ಆದರು. ಒಬ್ಬ ಮಹಾನ್ ಕಲಾವಿದನಲ್ಲಿ ನಟನೆಯ ಹಸಿವು ಯಾವತ್ತೂ ಇರುತ್ತದೆ ಎಂಬುದಕ್ಕೆ ಅವರೇ ಸಾಕ್ಷಿ. ಈ ಹಿಂದೆ ಶಂಕರ್ ನಾಗ್ ಅವರ ಜೊತೆ ನಾಟಕಗಳಲ್ಲಿ 18, 26, 28 ಪುಟಗಳ ಏಕಪಾತ್ರಾಭಿನಯ ಮಾಡಿದ್ದ ಅನುಭವವನ್ನು ನೆನಪಿಸಿಕೊಂಡು ಈ ಸಿಂಗಲ್ ಶಾಟ್‌ಗೆ ಸಂಪೂರ್ಣ ಜೀವ ತುಂಬಿದರು.

ಆ ಶಾಟ್ ಮುಗಿದ ತಕ್ಷಣ ಸೆಟ್‌ನಲ್ಲಿದ್ದವರೆಲ್ಲರೂ ಎದ್ದು ನಿಂತು ಚಪ್ಪಾಳೆ ತಟ್ಟಿದ ಆ ಕ್ಷಣ ಅವಿಸ್ಮರಣೀಯ. ಚಿತ್ರಮಂದಿರಗಳಲ್ಲೂ ಆ ದೃಶ್ಯಕ್ಕೆ ಬೆಚ್ಚಗಿನ ಅಪ್ಪುಗೆ ಸಿಕ್ಕಿತು. ಒಬ್ಬ ಸಿನಿಮಾ ಮೇಕರ್ ಆಗಿ ನನ್ನ ವೃತ್ತಿಜೀವನದ ಅತಿಮುಖ್ಯ ಸಿನಿಮಾ ಸಹಿಪ್ರಾ ಶಾಲೆ ಕಾಸರಗೋಡು. ಆ ಸಿನಿಮಾ ಹಾಗೆ ರೂಪುಗೊಳ್ಳಲು ಅನಂತ್ ಸರ್ ಅವರ ಆ ಅಭಿನಯವೇ ಮುಖ್ಯ ಕಾರಣ. ಹಾಗಾಗಿ ಅನಂತ್ ಸರ್ ನನ್ನ ಪಾಲಿಗೆ ಎಂದಿಗೂ ಅತ್ಯಂತ ಸ್ಪೆಷಲ್.

ಪ್ರೇಮದ ಊರಲಿ ಪ್ರತಿ ಗಂಟೆಗೆ 15 ಸಾವಿರ ಟಿಕೆಟ್‌ ಮಾರಾಟ

Sujatha NR — Mon, 12 Oct 2026 11:52:47 +0530

ಸಿನಿವಾರ್ತೆ

ಈ ವರ್ಷದ ಸೂಪರ್‌ ಬ್ಲಾಕ್‌ ಬಾಸ್ಟರ್‌ ಚಿತ್ರವಾಗಿ ಯಶಸ್ವಿಯಾಗಿ ಪ್ರದರ್ಶನಗೊಳ್ಳುತ್ತಿರುವ ‘ಪ್ರೇಮದ ಊರಲಿ’ ಚಿತ್ರವು ಮತ್ತೊಂದು ದಾಖಲೆ ಮಾಡುತ್ತಿದೆ. ಪ್ರತಿಷ್ಠಿತ ಆನ್‌ಲೈನ್‌ ಟಿಕೆಟ್‌ ಮಾರಾಟದ ಪ್ಲಾಟ್‌ಫಾರಂ ಆಗಿರುವ ಬುಕ್‌ ಮೈ ಶೋವೊಂದರಲ್ಲೇ ಪ್ರತಿ ಗಂಟೆಗೆ 15 ಸಾವಿರ ಟಿಕೆಟ್‌ಗಳ ಮಾರಾಟ ಆಗುತ್ತಿವೆ. ಆ ಮೂಲಕ ಈ ಚಿತ್ರವು ಆನ್‌ಲೈನ್‌ ಬುಕ್ಕಿಂಗ್‌ ಮಾರಾಟದಲ್ಲಿ ಹೊಸ ದಾಖಲೆ ನಿರ್ಮಿಸುತ್ತಿದೆ.

ಈ ಚಿತ್ರ ನೋಡಿದ್ದೇ ಹೆಮ್ಮೆ

ಈ ನಡುವೆ ‘ಪ್ರೇಮದ ಊರಲಿ’ ತೆಲುಗು ವರ್ಷನ್‌ ನೋಡಿರುವ ಟಾಲಿವುಡ್‌ನ ಖ್ಯಾತ ನಿರ್ದೇಶಕ ಬೋಯಪತಿ ಶ್ರೀನು ಮಾತನಾಡಿ, ‘ನಾನು ಈಗಷ್ಟೆ ‘ಪ್ರೇಮದ ಊರಲಿ’ ಸಿನಿಮಾ ನೋಡಿದ್ದೇನೆ. ಈ ಚಿತ್ರವನ್ನು ನೋಡಿದ್ದೇನೆ ಎಂದು ಹೇಳಿಕೊಳ್ಳುವುದಕ್ಕೇ ನನಗೆ ಹೆಮ್ಮೆ ಆಗುತ್ತದೆ. ಅಷ್ಟು ಒಳ್ಳೆಯ ಸಿನಿಮಾ ಇದು. ಪ್ರತಿಯೊಬ್ಬರ ಮನಸ್ಸನ್ನು ಅಪ್ಪಿಕೊಳ್ಳುವ ಸಿನಿಮಾ ಇದು’ ಎಂದಿದ್ದಾರೆ. ‘ಅಖಂಡ’, ‘ಲೆಜೆಂಡ್‌’, ‘ಸರೈನೋಡು’, ‘ಸಿಂಹ’ ಮುಂತಾದ ಸೂಪರ್‌ ಹಿಟ್‌ ಚಿತ್ರಗಳನ್ನು ಕೊಟ್ಟ ನಿರ್ದೇಶಕ ಬೋಯಪತಿ ಶ್ರೀನು.

ನಿರ್ದೇಶಕನನ್ನು ಮೆಚ್ಚಿದ ರಮೇಶ್‌ ಅರವಿಂದ್‌

ರಮೇಶ್‌ ಅರವಿಂದ್‌ ಈ ಚಿತ್ರವನ್ನು ನೋಡಿ ನಿರ್ದೇಶಕ ಮನೋಜ್‌ ಕುಮಾರ್‌ ಅವರ ಕೆಲಸವನ್ನು ಮೆಚ್ಚಿಕೊಂಡಿದ್ದಾರೆ. ‘ತುಂಬಾ ಚೆನ್ನಾಗಿ ಸಿನಿಮಾ ಮಾಡಿದ್ದೀರಿ. ನಿರ್ದೇಶನವಂತೂ ಸೂಪರ್‌ ಆಗಿದೆ. ಎಲ್ಲರು ಚೆನ್ನಾಗಿ ನಟಿಸಿದ್ದಾರೆ’ ಎಂದು ಸಂದೇಶ ಕಳುಹಿಸಿದ್ದಾರೆ.

ಮನೆಗೆ ಕರೆದು ಅಭಿನಂದಿಸಿದ ನಿಖಿಲ್‌

ನಿಖಿಲ್‌ ಕುಮಾರ್‌ ಸ್ವಾಮಿ ‘ಪ್ರೇಮದ ಊರಲಿ’ ನಿರ್ದೇಶಕ, ನಿರ್ಮಾಪಕ ಸೇರಿದಂತೆ ಚಿತ್ರತಂಡವನ್ನು ತಮ್ಮ ಮನೆಗೆ ಆಹ್ವಾನಿಸಿ ಅಭಿನಂದಿಸಿದ್ದಾರೆ. ನಿರ್ದೇಶಕ ಮನೋಜ್‌ ಕುಮಾರ್‌ ಹಾಗೂ ನಿರ್ಮಾಪಕ ದೇವೇಂದ್ರ ಅವರಿಗೆ ಕೃಷ್ಣನ ಕಂಚಿನ ಪ್ರತಿಮೆ ನೀಡಿ ಸನ್ಮಾನಿಸಿದ್ದಾರೆ.

ಬಾಲಿವುಡ್ ದಿಗ್ಗಜ ನಾನಾ ಪಾಟೇಕರ್‌ ವಿಧಿವಶ

KannadaprabhaNewsNetwork — Fri, 09 Oct 2026 05:09:03 +0530

ಪಣಜಿ : ಭಾರತೀಯ ಚಿತ್ರರಂಗದ ದೈತ್ಯ ಪ್ರತಿಭೆ, ತಮ್ಮ ಗಂಭೀರ ಅಭಿನಯ ಹಾಗೂ ವಿಶಿಷ್ಟ ಸಂಭಾಷಣಾ ಶೈಲಿಯಿಂದ ಲಕ್ಷಾಂತರ ಅಭಿಮಾನಿಗಳನ್ನು ಗಳಿಸಿದ್ದ ಹಿರಿಯ ನಟ ನಾನಾ ಪಾಟೇಕರ್‌ ಗುರುವಾರ ಮುಂಜಾನೆ ಗೋವಾದ ತಮ್ಮ ನಿವಾಸದಲ್ಲಿ ಹೃದಯಾಘಾತದಿಂದ ಕೊನೆಯುಸಿರೆಳೆದರು.

ಚಿತ್ರರಂಗ ಹಾಗೂ ಸಾಮಾಜಿಕ ಕ್ಷೇತ್ರದಲ್ಲಿ ಸುದೀರ್ಘ ಸೇವೆ ಸಲ್ಲಿಸಿದ್ದ ಅವರ ಅಗಲಿಕೆಗೆ ಇಡೀ ದೇಶದ ಕಂಬನಿ ಮಿಡಿದಿದೆ. ನಾನಾ ಅವರಿಗೆ 76 ವರ್ಷ ವಯಸ್ಸಾಗಿತ್ತು. ಗೋವಾದ ದೊನಾ ಪೌಲಾ ಬಳಿಯಿರುವ ತಮ್ಮ ಅಪಾರ್ಟ್‌ಮೆಂಟ್‌ನಲ್ಲಿ ತಂಗಿದ್ದ ಅವರಿಗೆ ಮುಂಜಾನೆ ಸುಮಾರು 3:30ರ ಸುಮಾರಿಗೆ ತೀವ್ರ ಅಸ್ವಸ್ಥತೆ ಕಾಣಿಸಿಕೊಂಡಿತು.

ತಕ್ಷಣವೇ ಖಾಸಗಿ ಆಸ್ಪತ್ರೆಗೆ ಸಾಗಿಸಲಾಯಿತಾದರೂ, ಚಿಕಿತ್ಸೆ ಫಲಿಸದೆ ಬೆಳಿಗ್ಗೆ 5:10ಕ್ಕೆ ಕೊನೆಯುಸಿರೆಳೆದರು. ಗೋವಾದ ಬಾಂಬೋಲಿಮ್‌ನ ಆಸ್ಪತ್ರೆಯಲ್ಲಿ ಮರಣೋತ್ತರ ಪರೀಕ್ಷೆ ಮುಗಿದ ಬಳಿಕ, ಸಂಜೆ ಅವರ ಪಾರ್ಥಿವ ಶರೀರವನ್ನು ಪುಣೆಗೆ ಕರೆತರಲಾಯಿತು.

ಪುಣೆಯಲ್ಲಿ ಅಂತಿಮ ಸಂಸ್ಕಾರ:

ಗುರುವಾರ ಸಂಜೆ 5 ಗಂಟೆ ಸುಮಾರಿಗೆ ನಾನಾ ಅವರ ಮೃತದೇಹವನ್ನು ಮಹಾರಾಷ್ಟ್ರದ ಪುಣೆಯ ಹೊರವಲಯದಲ್ಲಿರುವ ದೋಂಜೆಯ ಅವರ ಫಾರ್ಮ್‌ಹೌಸ್‌ಗೆ ತರಲಾಯಿತು. ನಂತರ ಸಾರ್ವಜನಿಕರ ದರ್ಶನಕ್ಕೆ ಇಡಲಾಯಿತು. ಈ ವೇಳೆ ಸಾವಿರಾರು ಅಭಿಮಾನಿಗಳು, ಗಣ್ಯರು, ಚಿತ್ರರಂಗದ ಕಲಾವಿದರು ಆಗಮಿಸಿ ನಟನ ಅಂತಿಮ ದರ್ಶನ ಪಡೆದುಕೊಂಡರು. ನಂತರ ಸಕಲ ಸರ್ಕಾರಿ ಗೌರವಗಳೊಂದಿಗೆ ಪಾರ್ಮ್‌ಹೌಸ್‌ ಆವರಣದಲ್ಲಿಯೇ ಅಂತಿಮ ಸಂಸ್ಕಾರ ನೆರವೇರಿಸಲಾಯಿತು.

ಹಿಂದಿ, ಮರಾಠಿ ಚಿತ್ರಗಳಲ್ಲಿ ಛಾಪು:

ನಾನಾ ಅವರು ಮಹಾರಾಷ್ಟ್ರದ ರಾಯಗಡ ಜಿಲ್ಲೆಯ ಮುರುದ್-ಜಂಜಿರಾದ ಮರಾಠಿ ಕುಟುಂಬದಲ್ಲಿ ವಿಶ್ವನಾಥ್ ಪಾಟೇಕರ್ ಆಗಿ ಜನಿಸಿದರು. ನಂತರ ಚಿತ್ರರಂಗ ಪ್ರವೇಶಿಸಿದ ಅವರು ಹಿಂದಿ ಹಾಗೂ ಮರಾಠಿ ಚಿತ್ರಗಳಲ್ಲಿ ತಮ್ಮದೇ ಆದ ಛಾಪು ಮೂಡಿಸಿದರು. ‘ಪರಿಂದಾ’, ‘ಕ್ರಾಂತಿವೀರ್’, ‘ತಿರಂಗಾ’, ‘ಪ್ರಹಾರ್’ ಹಾಗೂ ‘ಖಾಮೋಶಿ’ ಮುಂತಾದ ಚಿತ್ರಗಳ ಮೂಲಕ ಅಮೋಘ ನಟನೆಯನ್ನು ಪ್ರದರ್ಶಿಸಿದ ಅವರಿಗೆ 3 ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿ ಹಾಗೂ ದೇಶದ 4ನೇ ಅತ್ಯುನ್ನತ ನಾಗರಿಕ ಗೌರವವಾದ ‘ಪದ್ಮಶ್ರೀ’ ಸೇರಿದಂತೆ ಅನೇಕ ಪ್ರಶಸ್ತಿ ಪುರಸ್ಕಾರಗಳು ಒಲಿದುಬಂದವು. ನಾನಾ ನಟನೆಯ ಜೊತೆಗೆ ಜಲಸಂರಕ್ಷಣೆ ಮತ್ತು ರೈತರ ಕಲ್ಯಾಣಕ್ಕಾಗಿ ‘ನಾಮ್ ಫೌಂಡೇಶನ್’ ಸ್ಥಾಪಿಸಿ ಸಾಮಾಜಿಕ ರಂಗದಲ್ಲೂ ಸಕ್ರಿಯರಾಗಿದ್ದರು.

3 ದಿನ ಮುನ್ನವೇ ಸಾವಿನ ಮುನ್ಸೂಚನೆ ನೀಡಿದ್ದ ನಾನಾ!

ತಮ್ಮ ಸಾವಿಗೂ ಕೇವಲ 3 ದಿನ ಮುನ್ನ ನಾನಾ ಪಾಟೇಕರ್‌ ಕಾರ್ಯಕ್ರಮವೊಂದರಲ್ಲಿ, ‘ಒಂದಲ್ಲ ಒಂದು ದಿನ ನಾವೆಲ್ಲರೂ ಹೋಗಲೇಬೇಕು. ನಾಳೆ ನಾನು ಇಲ್ಲೇ ಇರುತ್ತೇನೆಯೋ ಇಲ್ಲವೋ ಗೊತ್ತಿಲ್ಲ’ ಎಂದಿದ್ದರು ಎಂದು ತಿಳಿದುಬಂದಿದೆ. ಇದು ಸಾವು ಅವರಿಗೆ ಅಂದೇ ಮುನ್ಸೂಚನೆ ನೀಡಿತ್ತೇ ಎಂಬ ಪ್ರಶ್ನೆಯನ್ನು ಮೂಡಿಸಿದೆ.

ಆ.4ರಂದು ಪಣಜಿ ಬಳಿ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ್ದ ಪಾಟೇಕರ್, ತಮ್ಮ ಆಪ್ತ ಸ್ನೇಹಿತ ಹಾಗೂ ಗೋವಾದ ಮಾಜಿ ಮುಖ್ಯಮಂತ್ರಿ ದಿ. ಮನೋಹರ್ ಪರಿಕ್ಕರ್ ಅವರನ್ನು ಸ್ಮರಿಸಿಕೊಂಡಿದ್ದರು.ಆ ವೇಳೆ, ‘ನಾವೆಲ್ಲರೂ ಎಂದಾದರೂ ಒಂದು ದಿನ ಈ ಲೋಕದಿಂದ ನಿರ್ಗಮಿಸಲೇಬೇಕು. ನಾಳೆ ನಾನು ಇಲ್ಲಿರುತ್ತೇನೆಯೋ ಇಲ್ಲವೋ ನನಗೆ ತಿಳಿದಿಲ್ಲ. ಪ್ರತಿಯೊಬ್ಬರ ಜೀವನದಲ್ಲೂ ಆ ಸಮಯ ಬಂದೇ ಬರುತ್ತದೆ. ಆದರೆ ಆ ಸಮಯ ಬರುವ ಮೊದಲು, ನಾನು ಮಾಡಲು ಬಯಸಿದ್ದನ್ನು ಮಾಡಲು ಸಾಧ್ಯವಾಯಿತೇ? ನಾನು ಅದಕ್ಕಾಗಿ ಪ್ರಾಮಾಣಿಕ ಪ್ರಯತ್ನ ಮಾಡಿದ್ದೇನೆಯೇ? ಎಂದು ನಾವೆಲ್ಲರೂ ಆಲೋಚಿಸಬೇಕು’ ಎಂದಿದ್ದರು.

ಸಾವಿಗೂ ಮುನ್ನ ಗೆಳೆಯಗೆ ಸಂದೇಶ ಕಳಿಸಿದ್ದ ನಾನಾ

ಪಣಜಿ: ‘ಸಾವಿಗೆ ಕೆಲವೇ ಗಂಟೆಗಳ ಮೊದಲು, ಅಂದರೆ ಗುರುವಾರ ನಸುಕಿನ ಜಾವ 2.30ರ ಸುಮಾರಿಗೆ ನಾನಾ ಪಾಟೇಕರ್ ತಮ್ಮ ಸ್ನೇಹಿತನಿಗೆ ಸಂದೇಶ ಕಳಿಸಿ, ತಮ್ಮ ಆರೋಗ್ಯ ಸರಿಯಿಲ್ಲ ಎಂದು ತಿಳಿಸಿದ್ದರು. ಆದರೆ ವೈದ್ಯರು ನಾನಾ ಮನೆಗೆ ಗುವಷ್ಟರಲ್ಲಿ ನಾನಾ ಸ್ಥಿತಿ ವಿಷಮಿಸಿತ್ತು‘ ಎಂದು ವೈದ್ಯರೊಬ್ಬರು ಹೇಳಿದ್ದಾರೆ.

ಸುದ್ದಿಗಾರರ ಜತೆ ಮಾತನಾಡಿ ನಾನಾ ಅವರ ಕೊನೆಯ ಕ್ಷಣಗಳನ್ನುವಿವರಿಸಿದ ಮಣಿಪಾಲ್ ಆಸ್ಪತ್ರೆಯ ವೈದ್ಯ ಡಾ. ಶೇಖರ್ ಸಾಲ್ಕರ್, ‘ನಾನಾ ತಮಗೆ ಹುಷಾರಿಲ್ಲ ಎಂದು ಸ್ನೇಹಿತರಿಗೆ ನಸುಕಿನ 2.20ಕ್ಕೆ ಸಂದೇಶ ಕಳಿಸಿದ್ದರು. ಆದರೆ ಗೆಳೆಯ ನಿದ್ರೆಯಲ್ಲಿದ್ದುದರಿಂದ ಮೆಸೇಜ್‌ ನೋಡಿರಲಿಲ್ಲ. ನಂತರ ನಾನಾ ಸ್ವತಃ ಕರೆ ಮಾಡಿ ವಿಷಯ ತಿಳಿಸಿದರು.

ಬಳಿಕ 4 ಗಂಟೆಗೆ ಸ್ನೇಹಿತ ನಾನಾ ಅವರ ಅಪಾರ್ಟ್‌ಮೆಂಟ್‌ಗೆ ಧಾವಿಸಿದರು. ಆಗ ನಾನಾ ತೀವ್ರವಾಗಿ ಬೆವರುತ್ತಿದ್ದು, ಇನ್ನೇನು ಪ್ರಜ್ಞಾಹೀನ ಸ್ಥಿತಿಗೆ ತಲುಪಲಿದ್ದರು. ಆ ವೇಳೆ ಅವರ ಸಹಾಯಕ ಜತೆಗಿದ್ದ. ನಂತರ ಅವರನ್ನುಸನಿಹದ ಡೋನಾಪೌಲಾದಲ್ಲಿರುವ ಮಣಿಪಾಲ್‌ ಆಸ್ಪತ್ರೆಗೆ ಕರೆತರಲಾಯಿತು’ ಎಂದು ಹೇಳಿದರು.‘

ಆಸ್ಪತ್ರೆಯಲ್ಲಿ ನಾನಾ ಪ್ರತಿಕ್ರಿಯೆ ನೀಡಲಿಲ್ಲ. ಅವರ ಆರೋಗ್ಯ ಅಷ್ಟು ಹದಗೆಟ್ಟಿತ್ತು. ಪ್ರತಿಕ್ರಿಯಿಸದ ಕಾರಣ ವೈದ್ಯರು ಹೃದಯ ಮಸಾಜ್ ಅನ್ನು ಪ್ರಾರಂಭಿಸಿದರು. ನಾವು ನಮ್ಮ ಕೈಲಾದಷ್ಟು ಪ್ರಯತ್ನಿಸಿದೆವು, ಆದರೆ ಅವರ ಪ್ರಾಣಪಕ್ಷಿ ಹಾರಿಹೋಗಿತ್ತು’ ಎಂದು ಸಾಲ್ಕರ್‌ ಹೇಳಿದರು.

‘ಟಾಸ್’ ಎಲ್ಲರಿಗೂ ಕನೆಕ್ಟ್ ಆಗಬಲ್ಲ ಸಿನಿಮಾ: ಅರ್ಜುನ್ ಕಾಪಿಕಾಡ್

Sujatha NR — Fri, 18 Sep 2026 12:14:14 +0530

ತುಳು ಚಿತ್ರರಂಗದ ದೊಡ್ಡ ಹೆಸರಾದ ಅರ್ಜುನ್ ಕಾಪಿಕಾಡ್ ಇದೀಗ ತಾವು ನಿರ್ದೇಶಿಸಿ, ನಾಯಕನಾಗಿ ನಟಿಸಿರುವ ‘ಟಾಸ್’ ಸಿನಿಮಾ ಮೂಲಕ ಕನ್ನಡ ಚಿತ್ರರಂಗಕ್ಕೆ ಅದ್ದೂರಿಯಾಗಿ ಪ್ರವೇಶಿಸುತ್ತಿದ್ದಾರೆ. ಇಂದು (ಸೆ.18) ಈ ಸಿನಿಮಾ ಕನ್ನಡ ಮತ್ತು ತುಳುವಿನಲ್ಲಿ ಬಿಡುಗಡೆಯಾಗುತ್ತಿದೆ. ಸುತೇಜ್ ಶೆಟ್ಟಿ, ಗರುಡರಾಮ್, ಬಾಲಾಜಿ ಮನೋಹರ್, ದೇವದಾಸ್ ಕಾಪಿಕಾಡ್ ನಟಿಸಿದ್ದಾರೆ.

ರಾಜೇಶ್ ಶೆಟ್ಟಿ

‘ಟಾಸ್’ ಕಥೆಯ ಎಳೆ ಹೊಳೆದದ್ದು ಹೇಗೆ ಮತ್ತು ಇದು ನಿಮಗೆ ಯಾಕೆ ಆಪ್ತವೆನಿಸಿತು?

ಈ ಕಥೆಯ ಮೂಲ ನಮ್ಮ ಮನೆಯಲ್ಲೇ ಇದೆ. ನಮ್ಮ ತಂದೆಯವರು ರಂಗಭೂಮಿ ಕಲಾವಿದರಾಗಿ ಸುದೀರ್ಘ ವರ್ಷಗಳಿಂದ ಬದುಕನ್ನು ಕಟ್ಟಿಕೊಂಡು ಬಂದವರು. ಅವರ ಬದುಕಿನ ಅನುಭವಗಳನ್ನು ಮತ್ತು ನಾನು ನೋಡಿದ, ಒಡನಾಡಿದ ಜೀವನವನ್ನು ಆಧಾರವಾಗಿಟ್ಟುಕೊಂಡು, ಅದಕ್ಕೆ ಸಿನಿಮಾ ವ್ಯಾಕರಣಕ್ಕೆ ತಕ್ಕಂತೆ ಕಾಮಿಡಿ, ಎಮೋಷನ್ಸ್ ಮತ್ತು ಬದುಕಿನ ಮೌಲ್ಯಗಳನ್ನು ಹದವಾಗಿ ಬೆರೆಸಿ ಈ ಕಥೆ ಸಿದ್ಧಪಡಿಸಿದ್ದೇವೆ. ಮುಖ್ಯವಾಗಿ ಅಪ್ಪ-ಮಗನ ನಡುವಿನ ಸಂಬಂಧ ಹಾಗೂ ಕಲಾವಿದರ ಬದುಕಿನ ಹಿನ್ನೆಲೆಯನ್ನು ಪರಿಚಯಿಸಲಾಗಿದೆ. ರಂಗಭೂಮಿಯ ಹಿನ್ನೆಲೆ ನನಗೂ ರಕ್ತಗತವಾಗಿ ಬಂದಿರುವುದರಿಂದ ಈ ಕಥೆಯನ್ನು ಹೇಳುವುದು ತುಂಬಾ ಸುಲಭ ಮತ್ತು ಆಪ್ತವಾಯಿತು.

ಕನ್ನಡಕ್ಕೆ ದೊಡ್ಡದಾಗಿ ಹೆಜ್ಜೆ ಇಡುತ್ತಿದ್ದೀರಿ. ದೊಡ್ಡ ಮಟ್ಟದ ಮಾರುಕಟ್ಟೆಗೆ ಬರುವಾಗ ಭಯ ಅಥವಾ ಆತಂಕ ಇತ್ತಾ?

ಒಳ್ಳೆಯ ಕಥೆಯನ್ನು ಪ್ರಾಮಾಣಿಕವಾಗಿ ಕಟ್ಟಿ ಜನರಿಗೆ ತಲುಪಿಸಿದರೆ, ಕೊನೆಗೆ ಪ್ರೇಕ್ಷಕರು ಅದ್ಭುತ ಸಿನಿಮಾವನ್ನೇ ನೋಡಲು ಬಯಸುತ್ತಾರೆ ಎಂಬ ಧೈರ್ಯ ನನಗಿತ್ತು. ಆದರೆ ಕನ್ನಡದಂತಹ ದೊಡ್ಡ ಮಾರುಕಟ್ಟೆಗೆ ರೀಚ್ ಆಗಲು ಒಂದು ಬಲಿಷ್ಠ ಬ್ಯಾನರ್ ಅಗತ್ಯವಿತ್ತು. ಆ ಸಮಯದಲ್ಲಿ ದೇವರ ದಯೆಯಿಂದ ಗೋಲ್ಡನ್ ಸ್ಟಾರ್ ಗಣೇಶ್ ಸರ್ ನಮ್ಮ ಬೆಂಬಲಕ್ಕೆ ನಿಂತು, ತಮ್ಮ ಬ್ಯಾನರ್ ಮೂಲಕ ನಮ್ಮ ಬೆನ್ನಿಗೆ ನಿಂತರು. ಗಣೇಶ್ ಸರ್ ಅವರಂತಹ ದೊಡ್ಡ ಸೆಲೆಬ್ರಿಟಿಯ ಬೆಂಬಲ ಸಿಕ್ಕಿದ್ದು ನಮಗೆ ಆನೆಬಲ ತಂದುಕೊಟ್ಟಿತು. ಮಂಗಳೂರು ಪ್ರೀಮಿಯರ್ ಮತ್ತು ಶಿವಮೊಗ್ಗದ ಶೋಗಳಲ್ಲಿ ಜನ ನೀಡಿದ ಭರ್ಜರಿ ರೆಸ್ಪಾನ್ಸ್, ಶಿಳ್ಳೆ-ಚಪ್ಪಾಳೆಗಳು ನಮ್ಮ ಧೈರ್ಯವನ್ನು ಇನ್ನಷ್ಟು ಹೆಚ್ಚಿಸಿವೆ.

ದೊಡ್ಡ ಸ್ಕೇಲ್, ನಿರ್ದೇಶನ ಮತ್ತು ನಟನೆ ಎಲ್ಲವನ್ನೂ ಒಟ್ಟಿಗೆ ನಿಭಾಯಿಸುವುದು ಸುಲಭವಾಗಿತ್ತೇ?

ಖಂಡಿತವಾಗಿಯೂ ಇದು ಸುಲಭದ ಕೆಲಸವಲ್ಲ. ಆದರೆ ಚಿತ್ರತಂಡದ ಶ್ರಮ ಮತ್ತು ವ್ಯವಸ್ಥಿತ ಪ್ಲಾನಿಂಗ್ ಇದನ್ನು ಸುಲಭವಾಗಿಸಿತು. ಶೂಟಿಂಗ್ ಆರಂಭಕ್ಕೂ ಮುನ್ನವೇ ನಾವು ಇಡೀ ಸಿನಿಮಾವನ್ನು ‘ಮಾಕ್ ಶೂಟ್’ ಮಾಡಿಕೊಂಡಿದ್ದೆವು. ಪ್ರತಿ ಶಾಟ್ ಹೇಗಿರಬೇಕು, ಆರ್ಟಿಸ್ಟ್‌ಗಳ ಪರ್ಫಾರ್ಮೆನ್ಸ್ ಹೇಗಿರಬೇಕು, ಎಡಿಟ್ ಪ್ಯಾಟರ್ನ್ ಹೇಗಿರಬೇಕು ಎಂಬುದು ಮೊದಲೇ ನಿಖರವಾಗಿ ಗೊತ್ತಿತ್ತು. ಹಾಗಾಗಿ ಸೆಟ್‌ಗೆ ಹೋದಾಗ ಕೇವಲ ನಟನೆಯ ಕಡೆಗೆ ಹೆಚ್ಚು ಗಮನಹರಿಸಲು ಸಾಧ್ಯವಾಯಿತು. ಪೂರ್ವಸಿದ್ಧತೆ ಚೆನ್ನಾಗಿದ್ದ ಕಾರಣ ಯಾವುದೇ ಗೊಂದಲವಿಲ್ಲದೆ ಶೆಡ್ಯೂಲ್ ಪ್ರಕಾರ ಶೂಟಿಂಗ್ ಮುಗಿಯಿತು.

ನಿಮ್ಮ ತಂದೆ ದೇವದಾಸ್ ಕಾಪಿಕಾಡ್ ಅವರೊಂದಿಗೆ ಸ್ಕ್ರಿಪ್ಟ್ ಚರ್ಚೆ ಹೇಗಿತ್ತು?

ಅವರೊಂದಿಗೆ ಬ್ರೈನ್‌ಸ್ಟಾರ್ಮಿಂಗ್ ಮತ್ತು ಡಿಸ್ಕಷನ್ ಮಾಡುವುದು ಯಾವಾಗಲೂ ಉತ್ತಮ ಅನುಭವ. ಒಂದು ಸೀನ್ ಅನ್ನು ಹೇಗೆ ಎಲಿವೇಟ್ ಮಾಡಬೇಕು, ಸ್ಕ್ರೀನ್‌ಪ್ಲೇಯಲ್ಲಿ ಭಾವನೆಗಳನ್ನು ಹೇಗೆ ಕಟ್ಟಿಕೊಡಬೇಕು ಎಂಬುದನ್ನು ಸದಾ ಚರ್ಚಿಸುತ್ತಿದ್ದೆವು. ಅಪ್ಪ-ಮಗನ ಸಂಬಂಧದ ಜತೆಗೆ ಕ್ರಿಯೇಟಿವ್ ಆಗಿ ಇಬ್ಬರ ನಡುವೆ ಅದ್ಭುತ ಹೊಂದಾಣಿಕೆ ಇತ್ತು.

ನಿಮ್ಮ ಚಿತ್ರರಂಗದ ಪಯಣವನ್ನು ಹಿಂತಿರುಗಿ ನೋಡಿದಾಗ ಏನನ್ನಿಸುತ್ತದೆ?

ಚಿತ್ರರಂಗ ಅಂದಮೇಲೆ ಏಳುಬೀಳುಗಳು ಸಹಜ. ಕ್ರಿಯೇಟಿವ್ ಫೀಲ್ಡ್‌ನಲ್ಲಿ ಕೆಲವೊಮ್ಮೆ ನಾವು ಅಂದುಕೊಂಡ ಐಡಿಯಾಗಳು ವರ್ಕ್ ಆಗುತ್ತವೆ, ಕೆಲವೊಮ್ಮೆ ಆಗಲ್ಲ. ಆದರೆ ಪ್ರತಿಯೊಂದು ಹೆಜ್ಜೆಯಲ್ಲೂ ಕಲಿಕೆ ನಿರಂತರವಾಗಿರುತ್ತದೆ. ನಾವು ಪ್ರಾಮಾಣಿಕವಾಗಿ ಶ್ರಮಪಟ್ಟು ಸಿನಿಮಾ ಮಾಡಿದ್ದೇವೆ. ಮಾನವೀಯ ಭಾವನೆಗಳು ಎಲ್ಲರಿಗೂ ಒಂದೇ. ಹಾಗಾಗಿ ಇಡೀ ಕರ್ನಾಟಕದ ಪ್ರೇಕ್ಷಕರಿಗೆ ಈ ಸಿನಿಮಾ ಕನೆಕ್ಟ್ ಆಗುತ್ತದೆ ಎಂಬ ಭರವಸೆಯಿದೆ.

ಈ ಸಿನಿಮಾ ಯಾಕೆ ನೋಡಬೇಕು?

ಅಪ್ಪ, ಮಗನ ಬಾಂಧವ್ಯ ಈ ಚಿತ್ರದ ಹೈಲೈಟ್. ಈ ಸಿನಿಮಾ ನೋಡಲು ಬಂದವರು ಹೊಟ್ಟೆ ತುಂಬಾ ನಗಬಹುದು, ಕೆಲವೊಮ್ಮೆ ಅಳಬಹುದು, ಕೌಟುಂಬಿಕ ಭಾವನಾತ್ಮಕ ದೃಶ್ಯಗಳನ್ನು ನೋಡಬಹುದು, ಜೊತೆಗೆ ಆ್ಯಕ್ಷನ್ ಕೂಡ ಎಂಜಾಯ್ ಮಾಡಬಹುದು. ಕನ್ನಡಕ್ಕೆ ಬರಲು ಒಂದು ಅವಕಾಶಕ್ಕಾಗಿ ಕಾಯುತ್ತಿದ್ದೆ. ಇದೇ ಸರಿಯಾದ ಅವಕಾಶ ಅನ್ನಿಸಿತು. ಪ್ರೇಕ್ಷಕರು ಬಂದು ಒಮ್ಮೆ ಈ ಸಿನಿಮಾ ನೋಡಿ ಆಶೀರ್ವದಿಸುತ್ತಾರೆ ಎಂಬ ನಂಬಿಕೆ ಇದೆ.

ಮಂಜು ವಾರಿಯರ್ ಜೊತೆ ಜೆ.ಪಿ. ತೂಮಿನಾಡ್ ನಟನೆ

Sujatha NR — Mon, 12 Oct 2026 11:01:09 +0530

ಸಿನಿವಾರ್ತೆ

‘ಸು ಫ್ರಂ ಸೋ’ ನಟ, ನಿರ್ದೇಶಕ ಜೆ.ಪಿ. ತೂಮಿನಾಡ್ ಇದೀಗ ಮಲಯಾಳಂ ಚಿತ್ರರಂಗಕ್ಕೆ ಭರ್ಜರಿಯಾಗಿ ಪದಾರ್ಪಣೆ ಮಾಡಿದ್ದಾರೆ. ಮಲಯಾಳಂನ ಖ್ಯಾತ ನಟಿ ಮಂಜು ವಾರಿಯರ್ ಹಾಗೂ ಮುಕೇಶ್ ಮುಖ್ಯಭೂಮಿಕೆಯಲ್ಲಿ ನಟಿಸುತ್ತಿರುವ, ‘ವಾಳ 1’ ಖ್ಯಾತಿಯ ಆನಂದ್ ಮೆನನ್ ನಿರ್ದೇಶನದ ‘ಹ್ಯಾಪಿ ಲೂಪ್’ ಚಿತ್ರದಲ್ಲಿ ಮಹತ್ವದ ಪಾತ್ರವೊಂದರಲ್ಲಿ ಕಾಣಿಸಿಕೊಂಡಿದ್ದಾರೆ.

‘ಸು ಫ್ರಮ್ ಸೋ’ ಚಿತ್ರ ಮಲಯಾಳಂನಲ್ಲೂ ತೆರೆಕಂಡು ಪ್ರೇಕ್ಷಕರ ಮೆಚ್ಚುಗೆ

ಈ ಬಗ್ಗೆ ಮಾತನಾಡಿದ ನಟ ಜೆ.ಪಿ. ತೂಮಿನಾಡ್, ‘ನಾನು ನಟಿಸಿದ ‘ಸು ಫ್ರಮ್ ಸೋ’ ಚಿತ್ರ ಮಲಯಾಳಂನಲ್ಲೂ ತೆರೆಕಂಡು ಪ್ರೇಕ್ಷಕರ ಮೆಚ್ಚುಗೆ ಪಡೆದಿತ್ತು. ನನಗೆ ಮಲಯಾಳಂ ಭಾಷೆ ಚೆನ್ನಾಗಿ ಅರ್ಥವಾಗುತ್ತದೆ, ಮಾತನಾಡಲೂ ಬರುತ್ತದೆ. ಆ ಚಿತ್ರದ ನಂತರ ಮಲಯಾಳಂ ಚಿತ್ರರಂಗದಿಂದ ಸಾಕಷ್ಟು ಅವಕಾಶಗಳು ಬಂದಿದ್ದವು. ಆದರೆ ಆನಂದ್ ಮೆನನ್ ಅವರ ನಿರ್ದೇಶನ, ಮಂಜು ವಾರಿಯರ್ ಅವರಂತಹ ಅದ್ಭುತ ಕಲಾವಿದರ ಉಪಸ್ಥಿತಿ ಮತ್ತು ಫೀಲ್-ಗುಡ್, ಕಾಮಿಡಿ ಹಾಗೂ ರೊಮ್ಯಾನ್ಸ್ ಅಂಶಗಳನ್ನೊಳಗೊಂಡ ಸೊಗಸಾದ ಕಥೆ ಇಷ್ಟವಾಗಿ ‘ಹ್ಯಾಪಿ ಲೂಪ್’ ಒಪ್ಪಿಕೊಂಡೆ. ಚಿತ್ರದುದ್ದಕ್ಕೂ ಸಾಗುವ ಒಂದು ಪ್ರಮುಖ ಮತ್ತು ಇಂಪಾರ್ಟೆಂಟ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದೇನೆ’ ಎಂದು ಹೇಳಿದ್ದಾರೆ.‘ಮಲಯಾಳಂ ಚಿತ್ರರಂಗದ ಕೆಲಸದ ವೇಗ ಮತ್ತು ಬದ್ಧತೆ ಅದ್ಭುತವಾಗಿದೆ. ಎಲ್ಲಕ್ಕಿಂತ ಹೆಚ್ಚಾಗಿ ಅವರಿಗೆ ಕನ್ನಡ ಚಿತ್ರರಂಗದ ಬಗ್ಗೆ ಅಪಾರವಾದ ಗೌರವ ಮತ್ತು ಪ್ರೀತಿಯಿದೆ. ‘ಕೆಜಿಎಫ್’, ‘ಕಾಂತಾರ’ದಂತಹ ಚಿತ್ರಗಳನ್ನು ಕೊಂಡಾಡುವ ಅವರು, ಕನ್ನಡದ ಹಳೆಯ ಕ್ಲಾಸಿಕ್ ಚಿತ್ರಗಳನ್ನೂ ಅಪಾರವಾಗಿ ಪ್ರೀತಿಸುತ್ತಾರೆ. ಪರಭಾಷೆಯ ಚಿತ್ರರಂಗದಲ್ಲೂ ನಮ್ಮ ಕನ್ನಡದ ಕಲಾವಿದರಿಗೆ ಸಿಗುತ್ತಿರುವ ಈ ಮನ್ನಣೆ ಖುಷಿ ತಂದಿದೆ’ ಎನ್ನುತ್ತಾರೆ ಜೆ.ಪಿ.

ಕನ್ನಡದಲ್ಲೂ ಜೆ.ಪಿ. ತೂಮಿನಾಡ್ ಬತ್ತಳಿಕೆಯಲ್ಲಿ 4 ಚಿತ್ರಗಳಿವೆ. ‘ನಾನು ನಟನೆಯ ಜೊತೆಗೆ ಕಥೆ-ಚಿತ್ರಕಥೆ ಕೆಲಸಗಳಲ್ಲೂ ತೊಡಗಿಸಿಕೊಂಡಿದ್ದೇನೆ. ಸದ್ಯ ಕನ್ನಡದಲ್ಲಿ ನಾಯಕನಾಗಿ ನಾಲ್ಕು ಸಿನಿಮಾಗಳು ಲೈನ್‌ಅಪ್‌ನಲ್ಲಿದ್ದು, ಎಲ್ಲವೂ ವಿಭಿನ್ನ ಹಾಗೂ ಫ್ಯಾಮಿಲಿ ಎಂಟರ್‌ಟೈನರ್ ಕಥಾಹಂದರ ಹೊಂದಿವೆ. ಶೀಘ್ರದಲ್ಲೇ ಅವುಗಳ ಅಧಿಕೃತ ಘೋಷಣೆಯಾಗಲಿದೆ’ ಎಂದು ಮಾಹಿತಿ ನೀಡಿದ್ದಾರೆ.

ನಾನು ಕಾಯುತ್ತಿರುವ ಯಶಸ್ಸು ಕಾಮನ್‌ ಮ್ಯಾನ್‌ನಿಂದ ಸಿಗಲಿದೆ: ಗೌರಿಶಂಕರ್

Sujatha NR — Fri, 18 Sep 2026 12:07:19 +0530

‘ಕೆರೆಬೇಟೆ’ ನಂತರ ಬಹಳ ಸಮಯದ ಬಳಿಕ ‘ಕಾಮನ್ ಮ್ಯಾನ್’ ಸಿನಿಮಾ ಒಪ್ಪಿಕೊಳ್ಳಲು ಮುಖ್ಯ ಕಾರಣವೇನು?

ಒಬ್ಬ ಕಲಾವಿದನಿಗೆ ಕಥೆಯ ಜೊತೆಗೆ ನಿರ್ಮಾಣ ಸಂಸ್ಥೆ, ನಿರ್ದೇಶಕರು ಮತ್ತು ಇಡೀ ತಂಡದ ವಿಷನ್ ಬಹಳ ಮುಖ್ಯವಾಗುತ್ತದೆ. ನಿರ್ಮಾಪಕ ಎನ್. ನರಸಿಂಹಮೂರ್ತಿಯವರು ಕಥೆಯ ಒಂದು ಮುಖ್ಯ ಎಳೆ ಹೇಳಿದ ನಂತರ, ದೊಡ್ಡ ರೈಟಿಂಗ್ ಟೀಮ್ ಮತ್ತು ನಿರ್ದೇಶಕರು ಸೇರಿ ಅತ್ಯುತ್ತಮ ಚಿತ್ರಕಥೆ ಸಿದ್ಧಪಡಿಸಿದ್ದರು. ಎಲ್ಲಕ್ಕಿಂತ ಹೆಚ್ಚಾಗಿ ಕಥೆ ಕೇಳುತ್ತಿದ್ದಂತೆ ನನಗೆ ತುಂಬಾ ಕನೆಕ್ಟ್ ಆಯ್ತು. ನನ್ನ ಕುಟುಂಬದಲ್ಲಿ ಎಲ್ಲರೂ ವಕೀಲರು. ರೈತಾಪಿ ಕುಟುಂಬದಿಂದ ಬಂದವರು ಸುಲಭವಾಗಿ ಓದಲು ಆಯ್ಕೆ ಮಾಡಿಕೊಳ್ಳುವುದು ಎಲ್‌ಎಲ್‌ಬಿ. ಈ ಚಿತ್ರದ ನಾಯಕ ಕೂಡ ಅಡ್ವೊಕೇಟ್. ಆಮೇಲೆ ಮುಖ್ಯಮಂತ್ರಿ. ಹಾಗಾಗಿ ಈ ಕಥೆ, ಪಾತ್ರ ನನ್ನ ಮನಸ್ಸಿಗೆ ತೀರ ಹತ್ತಿರವಾಯಿತು.

‘ಕಾಮನ್ ಮ್ಯಾನ್’ ಚಿತ್ರ ಯಾವ ಜಾನರ್‌ಗೆ ಸೇರುತ್ತದೆ? ಪ್ರೇಕ್ಷಕರಿಗೆ ಇದು ಎಂಥ ಅನುಭವ ನೀಡಲಿದೆ?

ಇದು ಸಂಪೂರ್ಣವಾಗಿ 2 ಗಂಟೆ 20 ನಿಮಿಷಗಳ ಪಕ್ಕಾ ಎಂಟರ್‌ಟೈನ್‌ಮೆಂಟ್ ಸಿನಿಮಾ. ಎಲ್ಲೂ ಬೋರ್ ಹೊಡೆಸಲ್ಲ. ಇದೊಂದು ಮೃಷ್ಟಾನ್ನ ಭೋಜನ ಅಲ್ಲದಿರಬಹುದು, ಆದರೆ ದೇಹಕ್ಕೆ ಹಿತ ನೀಡುವ ಆರೋಗ್ಯಕರ ‘ಮಜ್ಜಿಗೆ ಅನ್ನ’ದಂತಹ ಸಿನಿಮಾ. ಸಾಯಿಪ್ರಕಾಶ್ ಅವರಂತಹ ಅನುಭವಿ ನಿರ್ದೇಶಕರು ತುಂಬಾ ಅಚ್ಚುಕಟ್ಟಾಗಿ ಈ ಚಿತ್ರವನ್ನು ಕಟ್ಟಿಕೊಟ್ಟಿದ್ದಾರೆ. ಅವರದ್ದು ಅಪ್ರತಿಮ ಅನುಭವ ಮತ್ತು ಅದ್ಭುತ ಜಡ್ಜ್‌ಮೆಂಟ್. ಅದೇ ರೀತಿ ನಿರ್ಮಾಪಕರು ಉತ್ತಮ ರೀತಿಯಲ್ಲಿ ಸಿನಿಮಾ ಮಾಡಿದ್ದಾರೆ.

ಒಬ್ಬ ಕಾಮನ್ ಮ್ಯಾನ್ ಮುಖ್ಯಮಂತ್ರಿಯಾಗುವ ಪಾತ್ರ ಇದೆಯಂತೆ. ಈ ಪಾತ್ರಕ್ಕೆ ಸಿದ್ಧತೆ ಹೇಗಿತ್ತು?

ಹೌದು, ಆರಂಭದಲ್ಲಿ ‘ನಾನೇ ಸಿಎಂ’ ಅಂತೆಲ್ಲ ಟೈಟಲ್ ಯೋಚನೆ ಇತ್ತು. ಆದರೆ ಒಬ್ಬ ಸಾಮಾನ್ಯ ವ್ಯಕ್ತಿ ಸಿಎಂ ಆಗ್ತಾನೆ ಅಂದಾಗ ಸಾರ್ವಜನಿಕರಿಗೆ ತಕ್ಷಣ ರಿಲೇಟ್ ಆಗಬೇಕು ಎಂಬ ಕಾರಣಕ್ಕೆ ‘ಕಾಮನ್ ಮ್ಯಾನ್’ ಅಂತ ಇಟ್ಟೆವು. ಈ ಪಾತ್ರದಲ್ಲಿ ನಟನೆ ಬಹಳ ಸವಾಲಾಗಿತ್ತು. ಒಬ್ಬ ವಕೀಲನಾಗಿ ಹುಮ್ಮಸ್ಸು ತೋರಬೇಕು. ಅದೇ ವ್ಯಕ್ತಿ ಸಿಎಂ ಆದಾಗ ಗಾಂಭೀರ್ಯ ಇರಬೇಕು. ಗತ್ತು ಇರಬೇಕು, ದೌಲತ್ತು ಇರಬಾರದು. ಅದೆಲ್ಲಾ ಯೋಚಿಸಿ ಯಾವುದೇ ವರ್ಕ್‌ಶಾಪ್ ಮಾಡದೆ ನಾನೇ ಸ್ವತಃ ಬಾಡಿ ಲ್ಯಾಂಗ್ವೇಜ್ ಮತ್ತು ಲುಕ್ ಮೇಲೆ ಸಾಕಷ್ಟು ಅಭ್ಯಾಸ ಮಾಡಿ ಈ ಪಾತ್ರ ಮಾಡಿದ್ದೇನೆ.

‘ಕೆರೆಬೇಟೆ’ ನಿಮಗೆ ವಿಮರ್ಶಾತ್ಮಕವಾಗಿ ದೊಡ್ಡ ಹೆಸರು ತಂದುಕೊಟ್ಟಿತು. ಆದರೆ ಈ ಸಿನಿಮಾದಿಂದ ನಿಮ್ಮ ನಿರೀಕ್ಷೆಯೇನು?

‘ಕೆರೆಬೇಟೆ’ ನನಗೆ ಹೆಸರು ತಂದುಕೊಟ್ಟಿದ್ದು ನಿಜ, ಆದರೆ ಕಮರ್ಷಿಯಲ್ ಆಗಿ ದೊಡ್ಡ ಹಣ ಮಾಡಲಿಲ್ಲ. ಚಿತ್ರರಂಗದಲ್ಲಿ ಕಮರ್ಷಿಯಲ್ ಸಕ್ಸಸ್ ಬಹಳ ಮುಖ್ಯ. ಈ ಚಿತ್ರದಲ್ಲಿ ಆ ಎಲ್ಲಾ ಕಮರ್ಷಿಯಲ್ ಅಂಶಗಳೂ ಇವೆ. ಆಕರ್ಷಕ ಹಾಡುಗಳು, ಮಾಸ್ ಎಲಿಮೆಂಟ್ಸ್ ಇವೆ. ಈ ಸಿನಿಮಾ ಗೆದ್ದರೆ ನಾನು ಒಬ್ಬ ಮಾಸ್ ಮತ್ತು ಕಮರ್ಷಿಯಲ್ ಹೀರೋ ಆಗಿ ಇಂಡಸ್ಟ್ರಿಯಲ್ಲಿ ಗುರುತಿಸಿಕೊಳ್ಳಬಲ್ಲೆ ಎಂಬ ನಂಬಿಕೆಯಿದೆ.

ಈ ಸಿನಿಮಾದ ಮೂಲಕ ಪ್ರೇಕ್ಷಕರಿಗೆ ಟೇಕ್ಅವೇ ಏನು?

ಇವತ್ತಿನ ಸಮಾಜದಲ್ಲಿ ಜನಸಾಮಾನ್ಯರ ದಿನನಿತ್ಯದ ಬದುಕಿನ ಪ್ರತಿ ಹಂತದಲ್ಲೂ ರಾಜಕೀಯ ಬೆರೆತುಹೋಗಿದೆ. ಆಡಳಿತ, ಕಾನೂನು, ವ್ಯವಸ್ಥೆಯಲ್ಲಿನ ಸಮಸ್ಯೆಗಳನ್ನು ಒಬ್ಬ ಸಾಮಾನ್ಯ ಮನುಷ್ಯನಿಗೆ ಅರ್ಥವಾಗುವ ಭಾಷೆಯಲ್ಲೇ ಸಿನಿಮಾದಲ್ಲಿ ಹೇಳಲಾಗಿದೆ. ಭ್ರಷ್ಟಾಚಾರವನ್ನು ಹೇಗೆ ಕಿತ್ತೊಗೆಯಬಹುದು ಎಂಬುದನ್ನು ಮನರಂಜನೆಯ ಜೊತೆಗೆ ಅರ್ಥಪೂರ್ಣವಾಗಿ ಚರ್ಚಿಸಲಾಗಿದೆ.

ಈ ಪಯಣ ಹೇಗಿದೆ?

‘ಜೋಕಾಲಿ’, ‘ರಾಜಹಂಸ’, ‘ಕೆರೆಬೇಟೆ’ ಹೀಗೆ ಏಳುಬೀಳುಗಳನ್ನು ಕಂಡಿದ್ದೇನೆ. ಈ ಸೋಲುಗಳೇ ನನಗೆ ಬದುಕನ್ನು ಮತ್ತು ಧೈರ್ಯವನ್ನು ಕಲಿಸಿವೆ. ಚಿತ್ರರಂಗದಲ್ಲಿ ಯಾರೂ ಸುಲಭವಾಗಿ ಅವಕಾಶ ಕೊಡಲ್ಲ, ಅವಕಾಶ ಸಿಕ್ಕಾಗ ಪೂರ್ತಿಯಾಗಿ ಕೊಟ್ಟುಕೊಳ್ಳಬೇಕು. ನನ್ನದು ಎರಡು ದಶಕಗಳ ಹೋರಾಟ. ಕನ್ನಡಿಗರು ನನ್ನನ್ನು ಚಿತ್ರರಂಗದಲ್ಲಿ ಶಾಶ್ವತವಾಗಿ ಉಳಿಸಿಕೊಳ್ಳುವ ಸಂದರ್ಭ ಈ ಸಿನಿಮಾದಲ್ಲಿ ಒದಗಲಿ ಎಂಬುದೇ ನನ್ನ ಆಶಯ. ಪ್ರಾಮಾಣಿಕವಾಗಿ ಪ್ರಯತ್ನ ಮಾಡಿದ್ದೇವೆ. ಈ ಸಿನಿಮಾ ಜನರಿಗೆ ಖಂಡಿತ ಇಷ್ಟವಾಗುತ್ತದೆ ಎಂಬ ಸಂಪೂರ್ಣ ವಿಶ್ವಾಸ ನನಗಿದೆ.

ಪ್ರಖ್ಯಾತ ‘ಡ್ರಮ್ಮರ್’ ದೇವ ಅಸ್ತಂಗತ

Sujatha NR — Sun, 27 Sep 2026 10:28:07 +0530

ಬೆಂಗಳೂರು : ಕನ್ನಡ ಚಿತ್ರರಂಗ ಸೇರಿದಂತೆ ದಕ್ಷಿಣ ಭಾರತದ ಸಂಗೀತ ಲೋಕದಲ್ಲಿ ತಮ್ಮ ಡ್ರಮ್ಸ್ ವಾದನದ ಮೂಲಕ ಜನಪ್ರಿಯರಾಗಿದ್ದ ಹಿರಿಯ ವಾದ್ಯ ಕಲಾವಿದ ಡ್ರಮ್ಮರ್ ದೇವ (63) ನಿಧನರಾಗಿದ್ದಾರೆ.

ಕಳೆದ ಕೆಲವು ದಿನಗಳಿಂದ ಅನಾರೋಗ್ಯದಿಂದ ಬಳಲುತ್ತಿದ್ದ ಅವರು ರಾಜರಾಜೇಶ್ವರಿ ನಗರ ಗೇಟ್ ಎದುರಿನ ಸ್ವಗೃಹದಲ್ಲಿ ಕೊನೆಯುಸಿರೆಳೆದಿದ್ದಾರೆ. ಮೃತರಿಗೆ ಕುಟುಂಬಸ್ಥರು, ಅಪಾರ ಶಿಷ್ಯವೃಂದ ಹಾಗೂ ಸಂಗೀತ ಪ್ರೇಮಿಗಳಿದ್ದಾರೆ.

4 ದಶಕಗಳ ಸೇವೆ:

ಕಳೆದ ನಾಲ್ಕು ದಶಕಗಳಿಗೂ ಹೆಚ್ಚು ಕಾಲ ಚಿತ್ರರಂಗದಲ್ಲಿ ಸಕ್ರಿಯರಾಗಿದ್ದ ದೇವ ಅವರು, ಕನ್ನಡದ ಹೆಸರಾಂತ ಸಂಗೀತ ನಿರ್ದೇಶಕರಾದ ಹಂಸಲೇಖ, ರಾಜನ್-ನಾಗೇಂದ್ರ, ಉಪೇಂದ್ರ ಕುಮಾರ್, ಸತ್ಯಂ, ಟಿ ಜಿ ಲಿಂಗಪ್ಪ, ವಿ. ಮನೋಹರ್, ಗುರುಕಿರಣ್ ಸೇರಿದಂತೆ ಅನೇಕರ ಜೊತೆ ಕಾರ್ಯನಿರ್ವಹಿಸಿದ್ದರು.

ನೂರಾರು ಜನಪ್ರಿಯ ಹಾಡುಗಳ ಧ್ವನಿಮುದ್ರಣದಲ್ಲಿ ಅವರ ಡ್ರಮ್ಸ್ ವಾದನ ಪ್ರಮುಖ ಆಕರ್ಷಣೆಯಾಗಿತ್ತು. ಕೇವಲ ರೆಕಾರ್ಡಿಂಗ್ ಅಷ್ಟೇ ಅಲ್ಲದೆ, ರಾಜ್ಯ ಮತ್ತು ರಾಷ್ಟ್ರಮಟ್ಟದ ಪ್ರಮುಖ ಆರ್ಕೆಸ್ಟ್ರಾ ಹಾಗೂ ಲೈವ್ ಶೋಗಳಲ್ಲಿ ತಮ್ಮ ಲಯಬದ್ಧ ರಿದಮ್ ಮೂಲಕ ಸಂಗೀತಾಸಕ್ತರನ್ನು ತಲೆದೂಗಿಸಿದ್ದರು.

ಅನೇಕ ಯುವ ಡ್ರಮ್ಮರ್‌ಗಳಿಗೆ ಮಾರ್ಗದರ್ಶಕರಾಗಿದ್ದ ಅವರ ನಿಧನಕ್ಕೆ ಕನ್ನಡ ಚಿತ್ರರಂಗದ ಗಣ್ಯರು, ಸಂಗೀತ ನಿರ್ದೇಶಕರು, ಗಾಯಕರು, ವಾದ್ಯ ಕಲಾವಿದರು, ಅವರ ನಿವಾಸ ಇರುವ ಸ್ಕಂದಶ್ರೀ-5 ಅಪಾರ್ಟ್‌ಮೆಂಟ್‌ ನಿವಾಸಿಗಳು, ಎಸ್‌ಎಲ್‌ವಿ ಲೇಔಟ್‌ ನಿವಾಸಿಗಳು ತೀವ್ರ ಸಂತಾಪ ವ್ಯಕ್ತಪಡಿಸಿದ್ದಾರೆ.

ಇಂದು ಅಂತ್ಯಕ್ರಿಯೆ:

ರಾಜರಾಜೇಶ್ವರಿ ನಗರದ ಗೇಟ್‌ ಎದುರಿನ ‘ದಿ ಕ್ಲಬ್’ ಹಿಂಭಾಗದ ರಸ್ತೆಯಲ್ಲಿರುವ ಅವರ ಮನೆಯಲ್ಲಿ ಇಂದು ಅಂತಿಮ ದರ್ಶನ ವ್ಯವಸ್ಥೆ ಮಾಡಲಾಗುತ್ತದೆ ಮತ್ತು ಮೃತರ ಅಂತಿಮ ಸಂಸ್ಕಾರವು ಕ್ರಿಶ್ಚಿಯನ್ ವಿಧಿ ವಿಧಾನದ ಮೂಲಕ ನೆರವೇರಲಿದೆ ಎಂದು ಆಪ್ತ ಮೂಲಗಳು ತಿಳಿಸಿವೆ.