Kannada Prabha

ಪ್ರಶ್ನೆಪತ್ರಿಕೆ ಲೀಕ್‌ ತಡೆಗೆ ಕ್ವಶ್ಚನ್‌ ಬ್ಯಾಂಕ್‌: ನಿಲೇಕಣಿ ಟೆಕ್‌ ಐಡಿಯಾ

Sujatha NR — Wed, 14 Oct 2026 05:54:39 +0530

ನವದೆಹಲಿ: ಪರೀಕ್ಷೆಗೆಂದು ಮೊದಲೇ ಪ್ರಶ್ನೆಪತ್ರಿಕೆ ಸಿದ್ಧಪಡಿಸಿ ಮುದ್ರಿಸುವ ಬದಲು, ಪ್ರಶ್ನೆಗಳನ್ನು ಒಳಗೊಂಡ ಬೃಹತ್‌ ಕ್ವಶ್ಚನ್‌ ಬ್ಯಾಂಕ್‌ ಸಿದ್ಧಪಡಿಸಿ ಇಡುವುದು. ಪರೀಕ್ಷೆಯ ದಿನ ಈ ಬ್ಯಾಂಕ್‌ನಿಂದ ಎಐ ಬಳಸಿ ವಿದ್ಯಾರ್ಥಿಗಳಿಗೆ ಪ್ರಶ್ನೆಪತ್ರಿಕೆ ಸಿದ್ಧಪಡಿಸುವ ನೀಡುವ ವಿನೂತನ ಪ್ರಸ್ತಾಪವೊಂದನ್ನು ರಾಷ್ಟ್ರೀಯ ಪರೀಕ್ಷಾ ವ್ಯವಸ್ಥೆ ಸುಧಾರಣೆಗೆ ರಚಿಸಿರುವ ಕಾರ್ಯಪಡೆಯ ಮುಖ್ಯಸ್ಥರಾಗಿರುವ ಕನ್ನಡಿಗ, ಇನ್ಫೋಸಿಸ್‌ನ ಸಹ-ಸ್ಥಾಪಕ ನಂದನ್‌ ನಿಲೇಕಣಿ ಮುಂದಿಟ್ಟಿದ್ದಾರೆ.

ಬ್ಲೂಮ್‌ಬರ್ಗ್ ಎಕಾನಮಿ ಫೋರಂನಲ್ಲಿ ಮಾತನಾಡಿದ ಅವರು, ಪ್ರಶ್ನೆಪತ್ರಿಕೆ ಸೋರಿಕೆಯಂತಹ ಸಮಸ್ಯೆಗಳಿಗೆ ತಂತ್ರಜ್ಞಾನದ ಮೂಲಕ ಪರಿಹಾರ ಕಂಡುಕೊಳ್ಳಬಹುದು ಎಂದು ಪ್ರತಿಪಾದಿಸಿದ್ದಾರೆ.

‘ಒಂದು ಪ್ರಶ್ನೆಪತ್ರಿಕೆ ಎಂಬಂತಹದ್ದು ನಮಗೆ ಏಕೆ ಬೇಕು?

‘ಒಂದು ಪ್ರಶ್ನೆಪತ್ರಿಕೆ ಎಂಬಂತಹದ್ದು ನಮಗೆ ಏಕೆ ಬೇಕು? ಪ್ರಶ್ನೆ ಪತ್ರಿಕೆ ಇದ್ದರಷ್ಟೇ ಅಲ್ಲವೇ ಅದು ಸೋರಿಕೆ ಆಗುವುದು. ಅದು ಇಲ್ಲದಿದ್ದರೆ ಸೋರಿಕೆ ಮಾಡುವ, ದುಡ್ಡು ಕೊಟ್ಟು ಖರೀದಿಸುವ ಪ್ರಮೇಯವೇ ಬರದು. ಆದ್ದರಿಂದ ಪ್ರಶ್ನೆಗಳ ಬೃಹತ್‌ ಭಂಡಾರ (ಕ್ವಶ್ಚನ್‌ ಬ್ಯಾಂಕ್‌) ಇಟ್ಟುಕೊಂಡು, ಪರೀಕ್ಷೆ ಆರಂಭವಾಗುವ ಸ್ವಲ್ಪ ಹೊತ್ತಿನ ಮುನ್ನ ಪ್ರಶ್ನೆಪತ್ರಿಕೆಯನ್ನು ತಯಾರಿಸಬೇಕು. ಇದಕ್ಕೆ ಎಐ ಬಳಸುವುದು ಸೂಕ್ತ’ ಎಂದು ನಿಲೇಕಣಿ ಸಲಹೆ ನೀಡಿದರು. ಜತೆಗೆ, ಪ್ರಧಾನಿ ನರೇಂದ್ರ ಮೋದಿ ಅವರು ನಮ್ಮ ಸಲಹೆಯನ್ನು ಜಾರಿಗೆ ತರುವ ಬಗ್ಗೆ ಗಂಭೀರವಾಗಿ ಯೋಚಿಸುವ ಭರವಸೆ ಇದೆ ಎಂದರು.

ಇದೇ ವೇಳೆ ನಿಲೇಕಣಿ, ಎಐ ಟೆಕಿಗಳ ಕೆಲಸ ಕಸಿಯುತ್ತದೆ ಎಂಬ ಆರೋಪವನ್ನು ಅಲ್ಲಗಳೆದಿದ್ದಾರೆ.

ಏನಿದು ಟೆಕ್‌ ಐಡಿಯಾ?

- - ಪ್ರಶ್ನೆಪತ್ರಿಕೆ ಎಂಬುದು ಮೊದಲೇ ನಿಗದಿಯಾದರೆ ದುಡ್ಡಿನ ಆಸೆಗೆ ಸೋರಿಕೆಯಾಗುತ್ತದೆ

- ಅದರ ಬದಲು ಪ್ರಶ್ನೆಗಳ ಬೃಹತ್‌ ಭಂಡಾರ (ಕ್ವಶ್ಚನ್‌ ಬ್ಯಾಂಕ್‌)ವನ್ನು ತಯಾರಿಸುವುದು

- ಪರೀಕ್ಷೆ ಆರಂಭವಾಗುವ ಸ್ವಲ್ಪ ಹೊತ್ತಿನ ಮುಂಚೆ ಎಐ ಬಳಸಿ ಪ್ರಶ್ನೆ ಪತ್ರಿಕೆ ತಯಾರಿಸುವುದು

- ನಮ್ಮ ಈ ಸಲಹೆಯನ್ನು ಪ್ರಧಾನಿ ಮೋದಿ ಅವರು ಗಂಭೀರವಾಗಿ ಯೋಚಿಸುವ ಭರವಸೆ ಇದೆ

- ರಾಷ್ಟ್ರೀಯ ಪರೀಕ್ಷಾ ವ್ಯವಸ್ಥೆ ಸುಧಾರಣೆ ಕಾರ್ಯಪಡೆಯ ಮುಖ್ಯಸ್ಥ, ಕನ್ನಡಿಗ ನಿಲೇಕಣಿ ಸಲಹೆ

ಇಸ್ಲಾಂಗೆ ಮತಾಂತರ ಆದವರಿಗೆ ಮೀಸಲಾತಿ ಇಲ್ಲ: ಸುಪ್ರೀಂಕೋರ್ಟ್‌

Sujatha NR — Fri, 16 Oct 2026 06:41:31 +0530

ನವದೆಹಲಿ : ‘ಹಿಂದುಳಿದ ವರ್ಗಗಳಿಗೆ ಸೇರಿದ ಹಿಂದೂಗಳು ಇಸ್ಲಾಂಗೆ ಮತಾಂತರಗೊಂಡ ನಂತರ, ತಾವು ಸೇರಿದ ಹಿಂದಿನ ವರ್ಗದ ಮೀಸಲಾತಿ ಸೌಲಭ್ಯಗಳನ್ನು ಪಡೆಯಲು ಅರ್ಹರಲ್ಲ’ ಎಂದು ಸುಪ್ರೀಂ ಕೋರ್ಟ್ ಗುರುವಾರ ಮಹತ್ವದ ತೀರ್ಪು ನೀಡಿದೆ. ಈ ಹಿಂದೆ ಕೂಡ ಹಲವು ಪ್ರಕರಣಗಳಲ್ಲಿ ಕೋರ್ಟ್‌ ಈ ಅಭಿಪ್ರಾಯ ಹೇಳಿತ್ತು. ಇದೀಗ ತೀರ್ಪಿನ ಮೂಲಕವೇ ಅದನ್ನು ಎತ್ತಿ ಹಿಡಿದಿದೆ,

‘ಹಿಂದಿನ ಸಾಮಾಜಿಕ ವ್ಯವಸ್ಥೆಯಲ್ಲಿ ಅನುಭವಿಸಿದ ಹಿಂದುಳಿದಿರುವಿಕೆಯನ್ನು ಮತಾಂತರದ ನಂತರವೂ ಮುಂದುವರಿಸಿಕೊಂಡು ಹೋಗಲು ಸಾಧ್ಯವಿಲ್ಲ. ಹಿಂದು, ಸಿಖ್ ಅಥವಾ ಬೌದ್ಧ ಧರ್ಮವನ್ನು ಹೊರತುಪಡಿಸಿ ಬೇರೆ ಧರ್ಮವನ್ನು ಅನುಸರಿಸುವ ವ್ಯಕ್ತಿಯನ್ನು ಪರಿಶಿಷ್ಟ ಜಾತಿಯ ಸದಸ್ಯರೆಂದು ಪರಿಗಣಿಸಲು ಸಾಧ್ಯವಿಲ್ಲ’ ಎಂದು ಕೋರ್ಟ್ ಸ್ಪಷ್ಟಪಡಿಸಿದೆ.

‘ಹಿಂದುಳಿದ ವರ್ಗಕ್ಕೆ ಸೇರಿದ ವ್ಯಕ್ತಿಯೊಬ್ಬ ಇಸ್ಲಾಂಗೆ ಮತಾಂತರಗೊಂಡ ನಂತರ ಮೀಸಲಾತಿ ಪಡೆಯುವಂತಿಲ್ಲ’ ಎಂದು ಮದ್ರಾಸ್‌ ಹೈಕೋರ್ಟ್‌ ತೀರ್ಪು ನೀಡಿತ್ತು. ಇದನ್ನು ಪ್ರಶ್ನಿಸಿ ತಮಿಳುನಾಡು ಸರ್ಕಾರ ಸುಪ್ರೀಂಗೆ ಅರ್ಜಿ ಸಲ್ಲಿಸಿತ್ತು. ಇದರ ವಿಚಾರಣೆ ನಡೆಸಿದ ನ್ಯಾ. ಪ್ರಶಾಂತ್‌ ಕುಮಾರ್‌ ಮಿಶ್ರಾ ಹಾಗೂ ನ್ಯಾ. ಚಂದ್ರಶೇಖರ್‌ ಅವರ ಪೀಠ ಅರ್ಜಿಯನ್ನು ವಜಾಗೊಳಿಸಿದೆ ಹಾಗೂ ಹೈಕೋರ್ಟ್‌ ಆದೇಶವನ್ನು ಎತ್ತಿ ಹಿಡಿದಿದೆ.

ಸಂವಿಧಾನದ 16(4)ನೇ ವಿಧಿ ಉಲ್ಲೇಖ:

‘ಹಿಂದು, ಸಿಖ್ ಅಥವಾ ಬೌದ್ಧ ಧರ್ಮವನ್ನು ಹೊರತುಪಡಿಸಿ ಬೇರೆ ಧರ್ಮವನ್ನು ಅನುಸರಿಸುವ ವ್ಯಕ್ತಿಯನ್ನು ಪರಿಶಿಷ್ಟ ಜಾತಿಯ ಸದಸ್ಯನೆಂದು ಪರಿಗಣಿಸಲು ಸಾಧ್ಯವಿಲ್ಲ. ಬೇರೆ ಧರ್ಮಕ್ಕೆ ಮತಾಂತರಗೊಂಡಾಗ, ಅಂತಹ ವ್ಯಕ್ತಿಯು ತನ್ನ ಹಿಂದಿನ ಜಾತಿಯೊಂದಿಗೆ ಸಂಬಂಧ ಹೊಂದಿದ್ದ ‘ಪರಿಶಿಷ್ಟ ಜಾತಿ’ಯ ಸ್ಥಾನಮಾನವನ್ನು ಕಳೆದುಕೊಳ್ಳುತ್ತಾನೆ. ಅಲ್ಲದೆ, ಸಂವಿಧಾನದ 16(4)ನೇ ವಿಧಿಯ ಅಡಿಯಲ್ಲಿ ಹಿಂದುಳಿದ ವರ್ಗಗಳಿಗೆ ದೊರೆಯುವ ಯಾವುದೇ ವಿಶೇಷ ಸೌಲಭ್ಯಗಳನ್ನು ಪಡೆಯಲು ಆತ ಅರ್ಹನಾಗುವುದಿಲ್ಲ. ಏಕೆಂದರೆ, ಈ ಸೌಲಭ್ಯಗಳು ಆ ವ್ಯಕ್ತಿಯು ಪರಿಶಿಷ್ಟ ಜಾತಿಗೆ ಸೇರಿದವನಾಗಿರುವುದರ ಮೇಲೆ ಆಧರಿತವಾಗಿರುತ್ತವೆ’ ಎಂದು ಪೀಠ ಸ್ಪಷ್ಟಪಡಿಸಿದೆ.

‘ಒಬ್ಬ ವ್ಯಕ್ತಿಯು ಮತಾಂತರಗೊಳ್ಳುವ ಮೊದಲು ಹೊಂದಿದ್ದ ಜಾತಿ ಅಥವಾ ಸಮುದಾಯದ ಸ್ಥಾನಮಾನವನ್ನು, ಕೇವಲ ಮತಾಂತರಗೊಂಡ ಕಾರಣದಿಂದಾಗಿ, ಮತಾಂತರದ ನಂತರದ ಸಾಮಾಜಿಕ ವ್ಯವಸ್ಥೆಯಲ್ಲಿ ಒಂದು ನಿರ್ದಿಷ್ಟ ಅಧಿಸೂಚಿತ ಹಿಂದುಳಿದ ವರ್ಗದ ಸಮುದಾಯದ ಸದಸ್ಯತ್ವವನ್ನಾಗಿ ಪರಿವರ್ತಿಸಲು ಸಾಧ್ಯವಿಲ್ಲ. ಮತಾಂತರಗೊಳ್ಳುವ ಮೊದಲು ಹೊಂದಿದ್ದ ಹಿಂದುಳಿದಿರುವಿಕೆಯು, ಮತಾಂತರದ ನಂತರ ಆತನಿಗೆ ಬೇರೊಂದು ಅಧಿಸೂಚಿತ ಹಿಂದುಳಿದ ವರ್ಗದ ಸಮುದಾಯದ ಸದಸ್ಯತ್ವವನ್ನು ನೀಡಲು ಏಕೈಕ ಕಾನೂನು ಆಧಾರವಾಗಲಾರದು’ ಎಂದು ತಿಳಿಸಿದೆ.

ಘರ್‌ ವಾಪ್ಸಿ ಬಗ್ಗೆ ಸ್ಪಷ್ಟನೆ:

‘ಒಬ್ಬ ವ್ಯಕ್ತಿಯು ಹಿಂದೂ ಸಾಮಾಜಿಕ ವ್ಯವಸ್ಥೆಯಿಂದ ಹಿಂದೂಯೇತರ ಸಾಮಾಜಿಕ ವ್ಯವಸ್ಥೆಗೆ ಮತಾಂತರಗೊಂಡ ನಂತರ, ಪುನಃ ಹಿಂದೂ ಸಾಮಾಜಿಕ ವ್ಯವಸ್ಥೆಗೆ ಮರಳಿದ ಸಂದರ್ಭದಲ್ಲಿ (ಘರ್‌ ವಾಪ್ಸಿ), ಸಂವಿಧಾನದ 16(4)ನೇ ವಿಧಿಯ ಅಡಿಯಲ್ಲಿ ಆ ವ್ಯಕ್ತಿಗೆ ವಿಶೇಷ ಸೌಲಭ್ಯಗಳನ್ನು ಪಡೆಯುವ ಹಕ್ಕಿದೆಯೇ ಎಂಬುದನ್ನು, ಕೇವಲ ಆತನ ಹಿಂದಿನ ಸ್ಥಿತಿಯನ್ನು ಆಧರಿಸಿ ನಿರ್ಧರಿಸಲು ಸಾಧ್ಯವಿಲ್ಲ. ಅಂತಹ ಅರ್ಹತೆಗೆ, ಘರ್‌ ವಾಪ್ಸಿ ಆದ ನಂತರ ಆತ ತನ್ನ ಮೂಲ ಜಾತಿಯನ್ನು ಒಪ್ಪಿಕೊಂಡಿದ್ದಾನೋ ಇಲ್ಲವೋ ಎಂಬುದರ ಕುರಿತು ಸಕ್ಷಮ ಪ್ರಾಧಿಕಾರದಿಂದ ದೃಢೀಕರಣದ ಅಗತ್ಯವಿರುತ್ತದೆ’ ಎಂದು ತಿಳಿಸಿದೆ.

ಹೈಕೋರ್ಟ್‌ ತೀರ್ಪಿಗೆ ಅನುಮೋದನೆ:

‘ಆದ್ದರಿಂದ, ನಾವು ಹೈಕೋರ್ಟ್‌ನ ತೀರ್ಮಾನವನ್ನು ಅನುಮೋದಿಸುತ್ತೇವೆ. ಇಸ್ಲಾಂಗೆ ಮತಾಂತರಗೊಳ್ಳುವ ವ್ಯಕ್ತಿಯೊಬ್ಬ, ಕೇವಲ ಆ ಕಾರಣದಿಂದಲೇ ರಾಜ್ಯದಲ್ಲಿ ಗುರುತಿಸಲಾದ 7 ಹಿಂದುಳಿದ ಸಮುದಾಯಗಳ ಪೈಕಿ ಒಂದರ ಸದಸ್ಯನಾಗಲು ಸಾಧ್ಯವಿಲ್ಲ. ಒಬ್ಬ ವ್ಯಕ್ತಿಯ ಹಿಂದಿನ ಜಾತಿ ಅಥವಾ ಸಮುದಾಯದ ಸ್ಥಿತಿಯನ್ನು ಸ್ವಯಂಚಾಲಿತವಾಗಿ ಮುಸ್ಲಿಂ ಹಿಂದುಳಿದ ವರ್ಗಗಳ ವರ್ಗಕ್ಕೆ ವರ್ಗಾಯಿಸಲು ಬರುವುದಿಲ್ಲ. ಅಲ್ಲದೆ, ಯಾವುದೇ ಖಾಸಗಿ ಧಾರ್ಮಿಕ ಸಂಸ್ಥೆಯು ಇಂತಹ ಶಾಸನಬದ್ಧ ಹಕ್ಕನ್ನು ನಿರ್ಣಾಯಕವಾಗಿ ನಿರ್ಧರಿಸಲು ಸಾಧ್ಯವಿಲ್ಲ’ ಎಂದು ಅಂತಿಮ ಸುಪ್ರೀಂ ಅಂತಿಮ ತೀರ್ಪು ನೀಡಿದೆ.

ಬಿಜೆಪಿ ಸ್ವಾಗತ:

ತೀರ್ಪನ್ನು ‘ಐತಿಹಾಸಿಕ’ ಎಂದು ಬಿಜೆಪಿ ಗುರುವಾರ ಶ್ಲಾಘಿಸಿದೆ ಮತ್ತು ಈ ತೀರ್ಪು ಕಾಂಗ್ರೆಸ್ ಮತ್ತು ಇತರ ವಿರೋಧ ಪಕ್ಷಗಳ ‘ತುಷ್ಟೀಕರಣ ರಾಜಕೀಯಕ್ಕೆ ಭಾರಿ ಹೊಡೆತ’ ಎಂದು ಪ್ರತಿಪಾದಿಸಿದೆ.

ಕಾಂಗ್ರೆಸ್‌ ಸೋಲಿಗೆ SIR ಅಲ್ಲ, ರಾಹುಲ್‌ ಕಾರಣ: ಅಮಿತ್‌ ಶಾ

Sujatha NR — Wed, 14 Oct 2026 05:50:44 +0530

ನವದೆಹಲಿ : ಚುನಾವಣಾ ಆಯೋಗ, ಎಸ್‌ಐಆರ್‌ ಮತ್ತು ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್‌ ಕುಮಾರ್‌ ವಿರುದ್ಧ ಸಮರ ಸಾರಿರುವ ವಿಪಕ್ಷ ನಾಯಕ ರಾಹುಲ್ ಗಾಂಧಿ ಬಗ್ಗೆ ಮೌನ ಮುರಿದು ತೀವ್ರ ವಾಗ್ದಾಳಿ ನಡೆಸಿರುವ ಕೇಂದ್ರ ಗೃಹ ಸಚಿವ ಅಮಿತ್‌ ಶಾ, ‘ಕಾಂಗ್ರೆಸ್‌ನ ಚುನಾವಣಾ ಸೋಲಿಗೆ ಸ್ವತಃ ರಾಹುಲ್‌ ಗಾಂಧಿ ಕಾರಣರೇ ಹೊರತು ಎಸ್‌ಐಆರ್‌ ಅಲ್ಲ’ ಎಂದು ತಿರುಗೇಟು ನೀಡಿದ್ದಾರೆ.

ಮಂಗಳವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅಮಿತ್‌ ಶಾ, ‘ಇತ್ತೀಚಿನ ವರ್ಷಗಳಲ್ಲಿ ಕಾಂಗ್ರೆಸ್‌ ಅನುಭವಿಸಿದ ಸೋಲಿಗೆ ಮತಪಟ್ಟಿಯ ವಿಶೇಷ ಪರಿಷ್ಕರಣೆ ಕಾರಣ ಅಲ್ಲ, ಬದಲಾಗಿ ಅದಕ್ಕೆ ರಾಹುಲ್ ಗಾಂಧಿ ಅವರೇ ಕಾರಣ. ಕಾಂಗ್ರೆಸ್‌ ಅನುಸರಿಸುತ್ತಿರುವ ನಕಾರಾತ್ಮಕ ರಾಜಕೀಯ ಎಂದಿಗೂ ಲಾಭ ಮಾಡಿಕೊಡುವುದಿಲ್ಲ. ಅದರ ಬದಲಾಗಿ ಜನರನ್ನು ಅರ್ಥ ಮಾಡಿಕೊಳ್ಳುವ ಮತ್ತು ಸಾರ್ವಜನಿಕರೊಂದಿಗೆ ಬೆರೆಯುವ ಕೆಲಸ ಮಾಡಬೇಕು. ಈ ಬಗ್ಗೆ ಕಾಂಗ್ರೆಸ್‌ ಆತ್ಮಾವಲೋಕನ ಮಾಡಿಕೊಳ್ಳಬೇಕಾದ ಅಗತ್ಯವಿದೆ’ ಎಂದು ಹೇಳಿದರು.

ಎಸ್‌ಐಆರ್‌ ಆರಂಭವಾಗಿದ್ದೇ 2024ರ ಲೋಕಸಭಾ ಚುನಾವಣೆ ಬಳಿಕ

ಜೊತೆಗೆ, ‘ನೀವು ಸೋಲಿಗೆ ಎಸ್‌ಐಆರ್‌ ಅನ್ನು ದೂಷಿಸುತ್ತೀರಿ. ಆದರೆ ಎಸ್‌ಐಆರ್‌ ಆರಂಭವಾಗಿದ್ದೇ 2024ರ ಲೋಕಸಭಾ ಚುನಾವಣೆ ಬಳಿಕ. 1985ರ ಬಳಿಕ ನೀವು ಗುಜರಾತ್‌ನಲ್ಲಿ ಗೆದ್ದಿದ್ದೇ ಇಲ್ಲ. 41 ವರ್ಷಗಳಿಂದ ನಿರಂತರವಾಗಿ ಸೋಲುತ್ತಲೇ ಇದ್ದೀರಿ. ಇದಕ್ಕೂ ಎಸ್‌ಐಆರ್‌ ಕಾರಣವೇ? ನೀವು ಪಕ್ಷದ ಪ್ರಮುಖ ನಾಯಕನಾದ ಬಳಿಕ, ಬಳಿಕ ಅಧ್ಯಕ್ಷರಾದ ಬಳಿಕ ಹಾಗೂ ಇದೀಗ ಲೋಕಸಭೆಯ ವಿಪಕ್ಷ ನಾಯಕನಾದ ಬಳಿಕ ಕಾಂಗ್ರೆಸ್‌ ಪಕ್ಷ ಸತತವಾಗಿ ಸೋಲು ಕಾಣುತ್ತಲೇ ಇದೆ. ಈ ಬಗ್ಗೆ ನೀವು ಆತ್ಮಾವಲೋಕನ ಮಾಡಿಕೊಳ್ಳಬೇಕಿದೆ. ತಿರುಚಿದ ಮಾದ್ಯಮ ಕಾರ್ಯಕ್ರಮಗಳ ಮೂಲಕ ನೀವು ಜನರ ವಿಶ್ವಾಸ ಪಡೆಯುವುದು ಸಾಧ್ಯವಿಲ್ಲ’ ಎಂದು ರಾಹುಲ್‌ಗೆ ಅಮಿತ್‌ ಶಾ ಕುಟುಕಿದರು.

2029ರಲ್ಲೂ ಸೋಲು:

‘ದೇಶದ ಜನರು ಬಿಜೆಪಿ, ಎನ್‌ಡಿಎ ಮತ್ತು ಪ್ರಧಾನಿ ನರೇಂದ್ರ ಮೋದಿ ಅವರೊಂದಿಗಿದ್ದಾರೆ’ ಎಂಬ ಭರವಸೆ ವ್ಯಕ್ತಪಡಿಸಿದ ಗೃಹ ಸಚಿವರು, ‘2029ರಲ್ಲಿ ನಡೆಯಲಿರುವ ಲೋಕಸಭೆ ಚುನಾವಣೆಯಲ್ಲೂ ನಿರಂತರ 4ನೇ ಬಾರಿ ಹೀನಾಯವಾಗಿ ಪರಾಜಿತರಾಗಲು ತಯಾರಾಗಿರಿ’ ಎಂದು ಸವಾಲು ಹಾಕಿದರು.

ಅನುದಾನರಹಿತ ಖಾಸಗಿ ಶಿಕ್ಷಕರೂ ಇನ್ನು ಗಣತಿಗೆ - ಇದಕ್ಕಾಗಿ ನಿಯಮಗಳಿಗೆ ಕೇಂದ್ರ ತಿದ್ದುಪಡಿ

Sujatha NR — Sat, 17 Oct 2026 10:58:54 +0530

ನವದೆಹಲಿ: ರಾಜ್ಯ, ಕೇಂದ್ರಾಡಳಿತ ಪ್ರದೇಶಗಳಲ್ಲಿ ನಡೆಯುವ ಜನಗಣತಿ ಸಮಯದಲ್ಲಿ ಅನುದಾನಿತ, ಅನುದಾನರಹಿತ ಖಾಸಗಿ ಶಾಲೆಗಳ ಶಿಕ್ಷಕರನ್ನು ಗಣತಿದಾರರನ್ನಾಗಿ ಬಳಸಬಹುದು ಎಂದು ಕೇಂದ್ರ ಸರ್ಕಾರ ತಿಳಿಸಿದೆ.

ಕೇಂದ್ರವು 1990 ರ ಜನಗಣತಿ ನಿಯಗಳನ್ನು ತಿದ್ದುಪಡಿ ಮಾಡಿ ಈ ಆದೇಶ ಹೊರಡಿಸಿದೆ. ರಿಜಿಸ್ಟ್ರಾರ್ ಜನರಲ್ ಮತ್ತು ಜನಗಣತಿ ಆಯುಕ್ತರಾದ ಮೃತ್ಯುಂಜಯ ಕುಮಾರ್‌ ನಾರಾಯಣ್‌ ಅವರು ಇದಕ್ಕೆ ಸಂಬಂಧಿಸಿದ ಗೆಜೆಟ್ ನೋಟಿಫಿಕೆಶನ್‌ ಹೊರಡಿಸಿದ್ದಾರೆ.

ಕೇಂದ್ರ ಸರ್ಕಾರವು 1990ರ ನಿಯಮಗಳಿಗೆ ತಿದ್ದುಪಡಿ ತಂದಿದೆ

ಇದರಲ್ಲಿ ‘ ಕೇಂದ್ರ ಸರ್ಕಾರವು 1990ರ ನಿಯಮಗಳಿಗೆ ತಿದ್ದುಪಡಿ ತಂದಿದೆ. ಈ ಪ್ರಕಾರ ರಾಜ್ಯ ಸರ್ಕಾರ ಮತ್ತು ಕೇಂದ್ರಾಡಳಿತ ಪ್ರದೇಶಗಳು ಶಿಕ್ಷಕರು, ಕ್ಲರ್ಕ್ ಅಥವಾ ಯಾವುದೇ ಅಧಿಕಾರಿಯನ್ನು ಜನಗಣತಿಗೆ ನೇಮಕ ಮಾಡಿಕೊಳ್ಳಬಹುದು’ ಎಂದು ಉಲ್ಲೇಖಿಸಲಾಗಿದೆ.

ಖಾಸಗಿ ಅನುದಾನರಹಿತ ಶಾಲೆಗಳ ಬೋಧಕ ಸಿಬ್ಬಂದಿಯನ್ನು ಜನಗಣತಿ ಕಾರ್ಯಕ್ಕಾಗಿ ನಿಯೋಜಿಸಿರುವುದನ್ನು ಪ್ರಶ್ನಿಸಿ, ಹರಿಯಾಣ ಪ್ರೋಗ್ರೆಸಿವ್ ಸ್ಕೂಲ್ಸ್ ಕಾನ್ಫರೆನ್ಸ್ ಪಂಜಾಬ್ ಮತ್ತು ಹರಿಯಾಣ ಹೈಕೋರ್ಟ್‌ನಲ್ಲಿ ಅರ್ಜಿ ಸಲ್ಲಿಸಿತ್ತು. ಹಾಲಿ ನಿಯಮಗಳ ಅನ್ವಯ ಅನುದಾನಿತ ಮತ್ತು ಅನುದಾನ ರಹಿತ ಶಿಕ್ಷಣ ಸಂಸ್ಥೆ ಸಿಬ್ಬಂದಿಗಳನ್ನು ಜನಗಣತಿಗೆ ಬಳಸುವಂತಿಲ್ಲ ಎಂದು ವಾದಿಸಿತ್ತು. ಅದರ ಬೆನ್ನಲ್ಲೇ ಅವರ ಸೇರ್ಪಡೆಗೂ ಅವಕಾಶ ಕಲ್ಪಿಸಿ ಕೇಂದ್ರ ಸರ್ಕಾರ ನಿಯಮಗಳಲ್ಲಿ ತಿದ್ದುಪಡಿ ಮಾಡಿದೆ.

ಈವರೆಗೂ ಸರ್ಕಾರಿ ಶಿಕ್ಷಕರು ಜನಗಣತಿಗೆ ಬಳಕೆ ಆಗುತ್ತಿದ್ದರು

ಇತ್ತೀಚೆಗೆ ಪಂಜಾಬ್‌ ಸರ್ಕಾರ ಖಾಸಗಿ ಶಿಕ್ಷಕರ ಬಳಕೆ ಆರಂಭಿಸಿತ್ತು

ಇದರ ವಿರುದ್ಧ ಅಲ್ಲಿನ ಶಿಕ್ಷಕ ಸಂಘಟನೆ ಕೋರ್ಟ್‌ ಮೆಟ್ಟಿಲೇರಿತ್ತು

ಇದರ ಬೆನ್ನಲ್ಲೇ ಕೇಂದ್ರದಿಂದಲೇ ಗಣತಿ ನಿಯಮಗಳ ತಿದ್ದುಪಡಿ

ಗಣತಿಗೆ ಅನುದಾನಿತ, ಅನುದಾನ ರಹಿತ ಶಿಕ್ಷಕರ ಬಳಕೆಗೆ ಅಸ್ತು

ಅಮೀರ್‌ ಖಾನ್‌ ಅಮೆರಿಕ ಅಳಿಯಗೆ ದೇಶ ಬಿಡಲು ಪೊಲೀಸರಿಂದ ತಾಕೀತು

Sujatha NR — Fri, 16 Oct 2026 07:01:07 +0530

ಮುಂಬೈ : ‘ಬಾಲಿವುಡ್ ನಟ ಇಮ್ರಾನ್ ಖಾನ್ ಅಮೆರಿಕದ ಪ್ರಜೆ. ಅವರು ಮುಂಬೈನಲ್ಲಿ ನಡೆದ ಜಿರಳೆ ಪಕ್ಷದ ಪ್ರತಿಭಟನೆಯಲ್ಲಿ ಭಾಗವಹಿಸಿದ್ದು, ವಲಸೆ ನಿಯಮಗಳ ಉಲ್ಲಂಘನೆ. ಹೀಗಾಗಿ ಅ.28ರೊಳಗೆ ಭಾರತವನ್ನು ತೊರೆಯಬೇಕು’ ಎಂದು ಮುಂಬೈ ಪೊಲೀಸರು ನೋಟಿಸ್ ನೀಡಿದ್ದಾರೆ.

ಅಮೀರ್‌ ಖಾನ್‌ ಅವರ ಅಳಿಯನೂ ಆದ ಇಮ್ರಾನ್ ಖಾನ್

ಇದರ ಬೆನ್ನಲ್ಲೇ ಈ ಸೂಚನೆ ಪ್ರಶ್ನಿಸಿ ಪ್ರಸಿದ್ಧ ನಟ ಅಮೀರ್‌ ಖಾನ್‌ ಅವರ ಅಳಿಯನೂ ಆದ ಇಮ್ರಾನ್ ಖಾನ್ ಬಾಂಬೆ ಹೈಕೋರ್ಟ್‌ಗೆ ಅರ್ಜಿ ಸಲ್ಲಿಸಲು ನಿರ್ಧರಿಸಿದ್ದಾರೆ. ಬಹುಶಃ ಶುಕ್ರವಾರ ಅಥವಾ ಸೋಮವಾರ ಅರ್ಜಿ ಸಲ್ಲಿಕೆ ನಿರೀಕ್ಷೆ ಇದೆ. ಈ ನಡುವೆ, ನೋಟಿಸ್‌ಗೆ ಮಹಾರಾಷ್ಟ್ರ ಪ್ರತಿಪಕ್ಷಗಳು ಕಿಡಿಕಾರಿವೆ.

ನೋಟಿಸ್‌ ಏಕೆ?:

ಮುಖ್ಯ ಚುನಾವಣಾ ಆಯುಕ್ತರ ರಾಜೀನಾಮೆಗೆ ಆಗ್ರಹಿಸಿ ಅ.10ರಂದು ಮುಂಬೈನ ಆಗಸ್ಟ್ ಕ್ರಾಂತಿ ಮೈದಾನದಲ್ಲಿ ನಡೆದ ಪ್ರತಿಭಟನೆಯಲ್ಲಿ ನಟ ಇಮ್ರಾನ್ ಖಾನ್ ಭಾಗವಹಿಸಿದ್ದರು. ಇಮ್ರಾನ್ ಅಮೆರಿಕದ ನಾಗರಿಕರಾಗಿದ್ದು, ಭಾರತದಲ್ಲಿರಲು ‘ಓವರ್‌ಸೀಸ್ ಸಿಟಿಜನ್ ಆಫ್ ಇಂಡಿಯಾ’ (ಒಸಿಐ) ಕಾರ್ಡ್ ಹೊಂದಿದ್ದಾರೆ. ವಿದೇಶಿ ಪ್ರಜೆಗಳು ಭಾರತದಲ್ಲಿ ರಾಜಕೀಯ ಚಟುವಟಿಕೆಗಳಲ್ಲಿ ಅಥವಾ ಪ್ರತಿಭಟನೆಗಳಲ್ಲಿ ಭಾಗವಹಿಸುವಂತಿಲ್ಲ. ಇದು ವಲಸೆ ಮತ್ತು ವಿದೇಶಿಯರ ಕಾಯ್ದೆಯ ನಿಬಂಧನೆಗಳ ಉಲ್ಲಂಘನೆ ಎಂದು ಮುಂಬೈ ಪೊಲೀಸರು ಹೇಳಿದ್ದಾರೆ.

ನ್ಯಾಯಾಂಗವನ್ನು ಯಾರಿಂದಲೂ ಹೆದರಿಸಲು ಆಗದು : ರಾಹುಲ್‌ಗೆ ಸುಪ್ರೀಂ ಪರೋಕ್ಷ ಚಾಟಿ

Sujatha NR — Fri, 16 Oct 2026 05:45:33 +0530

ನವದೆಹಲಿ : ಮತದಾರರ ಪಟ್ಟಿ ವಿಶೇಷ ಪರಿಷ್ಕರಣೆ (ಎಸ್‌ಐಆರ್‌) ವೇಳೆ ಅಕ್ರಮ ನಡೆದಿದೆ ಎಂದು ಆರೋಪಿಸಿ ಲೋಕಸಭೆ ಪ್ರತಿಪಕ್ಷ ನಾಯಕ ರಾಹುಲ್‌ ಗಾಂಧಿ ಹಾಗೂ ಇತರೆ 12 ಪ್ರತಿಪಕ್ಷ ನಾಯಕರು ಸಲ್ಲಿಸಿರುವ ಅರ್ಜಿಗೆ ಸಂಬಂಧಿಸಿ, ಸುಪ್ರೀಂ ಕೋರ್ಟ್‌ ಗುರುವಾರ ಚುನಾವಣಾ ಆಯೋಗ ಮತ್ತು ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್‌ ಕುಮಾರ್‌ ಅ‍ವರಿಗೆ ನೋಟಿಸ್‌ ಜಾರಿ ಮಾಡಿದೆ.

ಇದೇ ವೇಳೆ, ಅ.12ರಂದು ಸುಪ್ರೀಂ ಕೋರ್ಟ್ ಚಲೋ ನಡೆಸಿದ ರಾಹುಲ್‌, ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಹಾಗೂ ಪ್ರತಿಪಕ್ಷಗಳ ನಾಯಕರ ಬಗ್ಗೆ ಪರೋಕ್ಷ ಅಸಮಾಧಾನ ವ್ಯಕ್ತಪಡಿಸಿರುವ ಅದು, ಇವರಿಂದಲೂ ಸ್ಪಷ್ಟನೆ ಬಯಸಿ ನೋಟಿಸ್‌ ಜಾರಿ ಮಾಡಿದೆ. ‘ನ್ಯಾಯಾಂಗವನ್ನು ಯಾರೂ ಹೆದರಿಸಲು ಸಾಧ್ಯವಿಲ್ಲ. ಮುಂದಿನ ವಿಚಾರಣೆ ವೇಳೆ ಒಬ್ಬರ ನಡೆ ಕುರಿತು ಪ್ರಶ್ನಿಸುತ್ತೇವೆ’ ಎಂದು ಪರೋಕ್ಷವಾಗಿ ರಾಹುಲ್‌ಗೆ ತಿವಿದಿದೆ.

ಸುಪ್ರೀಂ ಕೋರ್ಟ್‌ ಚಲೋ ಪ್ರಶ್ನಿಸಿ ಹಲವು ಅರ್ಜಿಗಳು ಪ್ರತ್ಯೇಕವಾಗಿ ಸಲ್ಲಿಕೆ

ಎಸ್ಐಆರ್ ಪ್ರಕ್ರಿಯೆ ಪ್ರಶ್ನಿಸಿ ಹಾಗೂ ರಾಹುಲ್‌ ಗಾಂಧಿ ನೇತೃತ್ವದಲ್ಲಿ ಎಸ್ಐಆರ್‌ ವಿರೋಧಿಸಿ ಇತ್ತೀಚೆಗೆ ನಡೆದ ಸುಪ್ರೀಂ ಕೋರ್ಟ್‌ ಚಲೋ ಪ್ರಶ್ನಿಸಿ ಹಲವು ಅರ್ಜಿಗಳು ಪ್ರತ್ಯೇಕವಾಗಿ ಸಲ್ಲಿಕೆ ಆಗಿದ್ದವು. ಒಟ್ಟಿಗೇ ಇವುಗಳ ವಿಚಾರಣೆ ನಡೆಸಿದ ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್‌ ಹಾಗೂ ನ್ಯಾ. ಜಯಮಾಲ್ಯ ಬಾಗ್ಜಿ ಅವರಿದ್ದ ಪೀಠವು ಮೊದಲು ಸಿಇಸಿ ಜ್ಞಾನೇಶ್‌ ಕುಮಾರ್‌ ಹಾಗೂ ಚುನಾವಣಾ ಆಯೋಗಕ್ಕೆ ನೋಟಿಸ್‌ ಜಾರಿ ಮಾಡಿತು.

ಸಿಜೆಐ ಸೂರ್ಯಕಾಂತ್‌ ಅವರು ಪರೋಕ್ಷ ಅಸಮಾಧಾನ

ಈ ವೇಳೆ ಕೆಲ ವಕೀಲರು ಸುಪ್ರೀಂ ಕೋರ್ಟ್‌ಗೆ ರಾಹುಲ್‌ ಗಾಂಧಿ ಅವರ ಸುಪ್ರೀಂ ಕೋರ್ಟ್‌ ಚಲೋ ಕುರಿತು ಪ್ರಸ್ತಾಪಿಸಿದಾಗ ಪ್ರತಿಪಕ್ಷ ನಾಯಕನ ನಡೆಗೆ ಸಿಜೆಐ ಸೂರ್ಯಕಾಂತ್‌ ಅವರು ಪರೋಕ್ಷ ಅಸಮಾಧಾನ ವ್ಯಕ್ತಪಡಿಸಿದರು. ‘ಯಾರೂ ನ್ಯಾಯಾಂಗವನ್ನು ಬೆದರಿಸಲು ಸಾಧ್ಯವಿಲ್ಲ. ನಾವೇನು ದಂತಗೋಪುರದ ಮೇಲೆ ಕೂತಿಲ್ಲ. ಮುಂದಿನ ವಿಚಾರಣೆ ವೇಳೆ ಪ್ರತಿಪಕ್ಷಗಳ 13 ಮಂದಿ ಅರ್ಜಿದಾರರಲ್ಲಿ ಒಬ್ಬರ ನಡೆಯನ್ನು ಪ್ರಶ್ನೆ ಮಾಡಲಿದ್ದೇವೆ’ ಎಂದು ಹೇಳಿದರು.

ಇದೇ ವೇಳೆ, ‘ಹೊರಗೆ ಅ‍ವರು ನೀಡುತ್ತಿರುವ ಹೇಳಿಕೆಗಳು ಹಾಗೂ ಕೋರ್ಟ್‌ ಒಳಗೆ ನೀಡುತ್ತಿರುವ ಹೇಳಿಕೆಗಳ ಕುರಿತು ನಮಗೆ ಅರಿವಿದೆ. ನಮಗೆ ಎಲ್ಲವೂ ಗೊತ್ತಿದೆ’ ಎಂದರು. ಬಳಿಕ ರ್‍ಯಾಲಿ ಸಂಬಂಧ ರಾಹುಲ್‌ ಗಾಂಧಿ, ಸಮಾಜವಾದಿ ಪಕ್ಷದ ಮುಖಂಡ ಅಖಿಲೇಶ್‌ ಯಾದವ್‌ ಸೇರಿ ಇತರರಿಗೆ ನೋಟಿಸ್‌ ಅನ್ನೂ ಜಾರಿ ಮಾಡಿದರು.

ಇದೇ ವೇಳೆ ಪೀಠವು, ಇಂಡಿಯನ್‌ ಎಕ್ಸ್‌ಪ್ರೆಸ್‌ ವರದಿಯನ್ನು ಮುಂದಿಟ್ಟುಕೊಂಡು ಎಸ್‌ಐಆರ್‌ ಅನ್ನು ರದ್ದುಪಡಿಸುವಂತೆ ಕೋರಿ ಎಐಎಂಐಎಂ ಮುಖ್ಯಸ್ಥ ಅಸಾದುದ್ದೀನ್‌ ಓವೈಸಿ ಸಲ್ಲಿಸಿದ್ದ ಅರ್ಜಿಗೆ ಸಂಬಂಧಿಸಿ ಜ್ಞಾನೇಶ್‌, ಚುನಾವಣಾ ಆಯೋಗ ಮತ್ತು ಇತರರಿಗೆ ನೋಟಿಸ್ ಜಾರಿ ಮಾಡಿತು.

ಹಿರಿಯ ಪೊಲೀಸ್‌ ಅಧಿಕಾರಿಯಿಂದ ಮಹಿಳಾ ಪತ್ರಕರ್ತೆ ಮೇಲೆ ಲೈಂಗಿಕ ಕಿರುಕುಳದ ಆರೋಪಕ್ಕೆ ಸಂಬಂಧಿಸಿ ಆಕೆ ವಿರುದ್ಧ ಯಾವುದೇ ಬಲವಂತದ ಕ್ರಮ ಕೈಗೊಳ್ಳದಂತೆ ಪೊಲೀಸರಿಗೆ ಸೂಚಿಸಿತು. ಈ ಸಂದರ್ಭದಲ್ಲಿ ಬಿಜೆಪಿ ಪರ ವಕೀಲ ಭಾಟಿಯಾ ಅ‍ವರು ಗರ್ಭಿಣಿ ಪತ್ರಕರ್ತೆಯೊಬ್ಬರನ್ನು ಸುಪ್ರೀಂ ಕೋರ್ಟ್‌ ಆವರಣದಲ್ಲಿ ರಾಹುಲ್‌ ಗಾಂಧಿ ತಳ್ಳಿದ ಪ್ರಕರಣದ ವಿಚಾರ ಗಮನಕ್ಕೆ ತಂದಿದ್ದು, ಇದಕ್ಕಾಗಿ ಪ್ರತ್ಯೇಕ ಅರ್ಜಿ ಸಲ್ಲಿಸುವಂತೆ ನಿರ್ದೇಶನ ನೀಡಿತು.

ಜಿರಳೆಗಳಿಂದ ಇಂದು ದೆಹಲಿಯಲ್ಲಿ ‘ತ್ರಿವರ್ಣ ಧ್ವಜ ಹಾರಿಸಿ’ ಧರಣಿ

ನವದೆಹಲಿ: ತಮ್ಮಿಬ್ಬರು ಆಪ್ತರಾದ ಸೌರವ್ ದಾಸ್‌ ಮತ್ತು ಅಶುತೋಷ್‌ ರಾಂಕಾ ಬಂಧನ ವಿರುದ್ಧ ದೆಹಲಿಯ ಕನಾಟ್‌ ಪ್ರದೇಶದಲ್ಲಿರುವ ಸೆಂಟ್ರಲ್‌ ಪಾರ್ಕ್‌ನಲ್ಲಿ ಶುಕ್ರವಾರ ಸಂಜೆ 5 ಗಂಟೆಗೆ ಸಿಜೆಪಿ ಮುಖ್ಯಸ್ಥ ಅಭಿಜೀತ್‌ ದೀಪ್ಕೆ ‘ತ್ರಿವರ್ಣ ಧ್ವಜ ಹಾರಿಸಿ’ ಅಭಿಯಾನಕ್ಕೆ ಕರೆ ನೀಡಿದ್ದಾರೆ. ಪೊಲೀಸರು ಬ್ಯಾರಿಕೇಡ್‌ ಅಳವಡಿಸಿ ಬಂದೋಬಸ್ತ್‌ ಮಾಡಿದ್ದಾರೆ.

ದೀಪ್ಕೆ ಪ್ರತಿಭಟನೆಗೆ ದೆಹಲಿ ಪೊಲೀಸ್‌ 1 ವರ್ಷ ನಿರ್ಬಂಧ?

Sujatha NR — Sun, 18 Oct 2026 06:10:14 +0530

ನವದೆಹಲಿ: ಅನುಮತಿ ನಿರಾಕರಣೆ ಹೊರತಾಗಿಯೂ ಶುಕ್ರವಾರ ದೆಹಲಿಯಲ್ಲಿ ‘ಲೆಹರಾದೋ ತಿರಂಗಾ’ ಹೆಸರಿನಲ್ಲಿ ಪ್ರತಿಭಟನೆಗೆ ಮುಂದಾಗಿದ್ದ ಕಾರಣಕ್ಕೆ ಪೊಲೀಸರು ಬಂಧಿಸಿದ್ದ ಜಿರಳೆ ಪಾರ್ಟಿ ಸಂಸ್ಥಾಪಕ ಅಭಿಜೀತ್ ದೀಪ್ಕೆಯನ್ನು ಶನಿವಾರ ಬಿಡುಗಡೆ ಮಾಡಲಾಗಿದೆ. ಇದೇ ವೇಳೆ, ವಶದಲ್ಲಿದ್ದ ಎಐಎಸ್‌ಎ ಸಂಘಟನೆ ನಾಯಕಿ ನೇಹಾ ಬೋರಾರನ್ನೂ ಪೊಲೀಸರು ಬಿಡುಗಡೆ ಮಾಡಿದ್ದಾರೆ.

ನೇಹಾರನ್ನು ಶನಿವಾರ ಬೆಳಗ್ಗೆಯೇ ಬಿಡುಗಡೆ ಮಾಡಲಾಗಿದ್ದರೆ, ದೀಪ್ಕೆಯನ್ನು ಶನಿವಾರ ಸಂಜೆ ನ್ಯಾಯಾಧೀಶರ ಮುಂದೆ ಹಾಜರುಪಡಿಸಿ, ಮುಂದಿನ 1 ವರ್ಷ ಕಾಲ ಶಾಂತಿ ಕಾಪಾಡುವ ‘ಶಾಂತಿ ಮುಚ್ಚಳಿಕೆ’ ಬರೆದುಕೊಟ್ಟ ಬಳಿಕ ಬಿಡುಗಡೆ ಮಾಡಲಾಗಿದೆ.

ಕೇಂದ್ರ ಸರ್ಕಾರ ಮತ್ತು ದೆಹಲಿ ಪೊಲೀಸರ ವಿರುದ್ಧ ತೀವ್ರ ಹರಿಹಾಯ್ದಿದ್ದಾರೆ

ಪೊಲೀಸರ ವಶದಿಂದ ಬೆಳ್ಳಂಬೆಳಗ್ಗೆ ಬಿಡುಗಡೆಯಾಗುತ್ತಿದ್ದಂತೆ ನೇಹಾ ಬೋರಾ ದೆಹಲಿ ಪೊಲೀಸರು ಮತ್ತು ಕೇಂದ್ರ ಸರ್ಕಾರ ಮತ್ತು ದೆಹಲಿ ಪೊಲೀಸರ ವಿರುದ್ಧ ತೀವ್ರ ಹರಿಹಾಯ್ದಿದ್ದಾರೆ.

ನನ್ನನ್ನು ಮಂಡಿ ಹೌಸ್‌ನಲ್ಲಿ ರಾತ್ರಿಯಿಂದ ಮುಂಜಾನೆ 5 ಗಂಟೆ ವರೆಗೆ ಇರಿಸಲಾಗಿತ್ತು. ನನ್ನನ್ನು ಅಕ್ರಮವಾಗಿ ವಶಕ್ಕೆ ಪಡೆಯಲಾಗಿದೆ. ಅಕ್ರಮವಾಗಿ ವಶಕ್ಕೆ ಪಡೆಯುವ ಇಂಥ ಘಟನೆಗಳು ದೇಶದಲ್ಲಿ ಹಲವು ಸಮಯದಿಂದ ನಡೆಯುತ್ತಿದ್ದು, ನಮ್ಮ ಚಳವಳಿಯಿಂದಾಗಿ ಇವುಗಳು ಈಗ ಬೆಳಕಿಗೆ ಬಂದಿವೆ ಎಂದು ಹೇಳಿದ್ದಾರೆ. ಜತೆಗೆ, ಎಲ್ಲಾ ಪ್ರತಿಭಟನಾಕಾರರನ್ನು ಬಿಡುಗಡೆ ಮಾಡುವಂತೆಯೂ ಆಗ್ರಹಿಸಿದ್ದಾರೆ.

ಇದೇ ವೇಳೆ ಎಐಎಸ್‌ಎಯು ಕೂಡ ಕೇಂದ್ರ ಸರ್ಕಾರದ ವಿರುದ್ಧ ಕಿಡಿಕಾರಿದ್ದು, ಜ್ಞಾನೇಶ್‌ ಕುಮಾರ್‌ ಅವರ ರಾಜೀನಾಮೆ ಮತ್ತು ಎಸ್‌ಐಆರ್‌ ಪ್ರಕ್ರಿಯೆ ಹಿಂಪಡೆಯುವ ವರೆಗೆ ಹೋರಾಟ ಮುಂದುವರಿಯಲಿದೆ ಎಂದು ತಿಳಿಸಿದೆ.

2ನೇ ಬಾಂಡ್‌:

ಈ ನಡುವೆ ದೀಪ್ಕೆಯನ್ನು ಎರಡನೇ ಬಾರಿ ಶಾಂತಿ ಬಾಂಡ್‌ ಬರೆಸಿಕೊಂಡು ಪೊಲೀಸರು ಬಿಡುಗಡೆ ಮಾಡಿದ್ದಾರೆ. ಈ ಶಾಂತಿ ಬಾಂಡ್‌ನಡಿ 50000 ರು. ಶ್ಯೂರಿಟಿಯ ಬಾಂಡ್‌ ಜೊತೆಗೆ ಮುಂದಿನ ಒಂದು ವರ್ಷ ಕಾಲ ಶಾಂತಿ ಕಾಪಾಡುವ ಮತ್ತು ಉತ್ತಮ ನಡವಳಿಕೆ ತೋರುವ ಭರವಸೆಯನ್ನು ದೀಪ್ಕೆ ನೀಡಿದ್ದಾರೆ.

ಗಣತಿಗೆ ಖಾಸಗಿ ವ್ಯಕ್ತಿಗಳಿಗೆ ಅವಕಾಶಕ್ಕೆ ಕಾಂಗ್ರೆಸ್‌ ಕಿಡಿ

Sujatha NR — Sun, 18 Oct 2026 07:10:12 +0530

ನವದೆಹಲಿ : ‘ಖಾಸಗಿ ವ್ಯಕ್ತಿ’ಗಳನ್ನೂ ಗಣತಿದಾರರನ್ನಾಗಿ ನೇಮಿಸಲು ಅವಕಾಶ ಮಾಡಿಕೊಡುವ ಕೇಂದ್ರ ಸರ್ಕಾರದ ತಿದ್ದುಪಡಿಗೆ ಕಾಂಗ್ರೆಸ್‌ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದೆ. ಈ ಮೂಲಕ ಗಣತಿ ಕಾರ್ಯಕ್ಕೆ ಆರೆಸ್ಸೆಸ್‌-ಬಿಜೆಪಿ ಕಾರ್ಯಕರ್ತರನ್ನು ಬಳಸಿಕೊಳ್ಳಲು ಕೇಂದ್ರ ಸರ್ಕಾರ ಅವಕಾಶ ನೀಡಿದೆ. ಈ ಮೂಲಕ ಅವರಿಗೆ ‘ಉದ್ಯೋಗ ಖಾತ್ರಿ ಯೋಜನೆ’ ಜಾರಿಗೆ ಹೊರಟಿದೆ ಎಂದು ಗಂಭೀರ ಆರೋಪ ಮಾಡಿದೆ.

ಈ ನಡುವೆ, ಕಳೆದ ಜುಲೈನಲ್ಲಿ ಬೆಳಗಾವಿಯಲ್ಲಿ ನಡೆದಿದ್ದ ಆರೆಸ್ಸೆಸ್‌ ಕಾರ್ಯಕರ್ತರ ಶಿಬಿರಕ್ಕೂ ಈ ತಿದ್ದುಪಡಿಗೂ ತಳಕು ಹಾಕಿರುವ ಪಕ್ಷ, ಕೇಂದ್ರ ಸರ್ಕಾರ ಮತ್ತೊಂದು ಸಾಂವಿಧಾನಿಕ ಸಂಸ್ಥೆಯನ್ನು ಹಾಳುಗೆಡವಲು ಹೊರಟಿದೆ ಎಂದು ದೂರಿದೆ.

ಕೇಂದ್ರ ಸರ್ಕಾರವು 1990ರ ಜನಗಣತಿಯ ನಿಮಯಾವಳಿಗಳಿಗೆ ತಿದ್ದುಪಡಿ ತಂದಿದ್ದು, ಜನಗಣತಿಗೆ ಗಣತಿದಾರರಾಗಿ ಅನುದಾನಿತ ಹಾಗೂ ಅನುದಾನ ರಹಿತ ಖಾಸಗಿ ಸಂಸ್ಥೆಗಳ ಶಿಕ್ಷಕರು ಅಥವಾ ಇತರೆ ಯಾವುದೇ ಖಾಸಗಿ ವ್ಯಕ್ತಿಗಳನ್ನು ಗಣತಿದಾರರನ್ನಾಗಿ ನೇಮಿಸಲು ಅವಕಾಶ ಮಾಡಿಕೊಟ್ಟಿದೆ.

ಕಿಡಿಗೇಡಿತನ:

ಈ ಕುರಿತು ಸಾಮಾಜಿಕ ಜಾಲತಾಣ ಎಕ್ಸ್‌ನಲ್ಲಿ ತೀವ್ರ ಆಕ್ರೋಶ ವ್ಯಕ್ತಪಡಿಸಿರುವ ಕಾಂಗ್ರೆಸ್‌ ಪ್ರಧಾನ ಕಾರ್ಯದರ್ಶಿ ಜೈರಾಮ್‌ ರಮೇಶ್‌, ‘ಮೋದಿ ಸರ್ಕಾರವು ಅರ್ಹ ಗಣತಿದಾರರ ಪಟ್ಟಿ ವಿಸ್ತರಿಸಿದೆ. ಇದರ ಹಿಂದೆ ಕಿಡಿಗೇಡಿತನ ಅಡಗಿದೆ. ಕರ್ನಾಟಕದ ಬೆಳಗಾವಿಯಲ್ಲಿ ಆರೆಸ್ಸೆಸ್‌ ಕಾರ್ಯಕರ್ತರಿಗಾಗಿ ದೊಡ್ಡ ತರಬೇತಿ ಶಿಬಿರವನ್ನು ಜು.10ರಿಂದ ಜು.12ರ ನಡುವೆ ನಡೆಸಿದೆ. ಇದರ ಏಕೈಕ ಉದ್ದೇಶ 2027ರ ಜನಗಣತಿಯೇ ಆಗಿದೆ ಎಂದು ಆರೋಪಿಸಿದ್ದಾರೆ.

ಕೇಂದ್ರ ಗೃಹ ಸಚಿವಾಲಯವು ಮೇ 26ರಂದು ಸ್ಥಾಪಿಸಿದ ಜನಸಂಖ್ಯಾ ಬದಲಾವಣೆ ಕುರಿತ ಉನ್ನತ ಮಟ್ಟದ ಸಮಿತಿಯು ದೇಶದಲ್ಲಿನ ಜನಸಂಖ್ಯಾ ಬದಲಾವಣೆಗೆ ಸಂಬಂಧಿಸಿ ಸಾರ್ವಜನಿಕರು ಸೇರಿ ಭಾರತ ಮತ್ತು ವಿದೇಶಿ ಸಂಸ್ಥೆಗಳಿಂದ ಮಾಹಿತಿ ಕೇಳಿದೆ. ಈ ಸಮಿತಿಯಲ್ಲಿರುವವರು ಆರೆಸ್ಸೆಸ್‌ ವ್ಯವಸ್ಥೆ ಜತೆಗೆ ಲಿಂಕ್‌ ಹೊಂದಿದವರೇ ಆಗಿದ್ದಾರೆ. ಹೀಗಾಗಿ ಜನಸಂಖ್ಯಾ ಬದಲಾವಣೆ ಕುರಿತ ಮಾಹಿತಿ ಎಲ್ಲಿಂದ ಬರಲಿದೆ ಎಂಬುದು ನಮಗೆ ಗೊತ್ತಿದೆ ಎಂದು ಜೈರಾಮ್‌ ರಮೇಶ್‌ ಹೇಳಿದ್ದಾರೆ.

ಹೀಗಾಗಿ ಅ.16ರಂದು ಕೇಂದ್ರ ಸರ್ಕಾರ ಜನಗಣತಿ ಸಂಬಂಧ ಹೊರಡಿಸಿರುವ ಅಧಿಸೂಚನೆಯನ್ನು ಆರೆಸ್ಸೆಸ್‌ನ ಜು.10-12ರ ತರಬೇತಿ ಶಿಬಿರ ಹಾಗೂ ಜನಸಂಖ್ಯಾ ಬದಲಾವಣೆ ಸಮಿತಿಯು ಅ.14ರಂದು ಮಾಹಿತಿಗಳನ್ನು ಕೇಳಿದ್ದನ್ನು ಹಿನ್ನೆಲೆಯಾಗಿಟ್ಟುಕೊಂಡು ನೋಡಬೇಕಿದೆ ಎಂದು ಅವರು ತಿಳಿಸಿದ್ದಾರೆ.

ಒಂದು ರೀತಿಯಲ್ಲಿ ಇದು ಆರೆಸ್ಸೆಸ್‌ ಮತ್ತು ಬಿಜೆಪಿ ಕಾರ್ಯಕರ್ತರ ಪಾಲಿನ ಉದ್ಯೋಗ ಖಾತ್ರಿ ಯೋಜನೆಯಂತಿದೆ. ಇದು ಈಗಾಗಲೇ ಬಡಮೇಲು ಮಾಡಲಾಗಿರುವ ಜನಗಣತಿ ವ್ಯವಸ್ಥೆಗೆ ಇನ್ನಷ್ಟು ಕಳಂಕ ಹಚ್ಚಲಿದೆ. ಈ ಸರ್ಕಾರದಡಿ ಮತ್ತೊಂದು ಸಂಸ್ಥೆಯನ್ನು ನಾಶ ಮಾಡಲಾಗಿದೆ. ಎಸ್‌ಐಆರ್‌ ರೀತಿ ಜನಗಣತಿಯನ್ನೂ ಅಪಾಯಕಾರಿಯಾಗಿ ಬದಲಾಯಿಸಲಾಗುತ್ತಿದೆ.

ರೋಜಗಾರ್‌ ಯೋಜನೆ

ಆರ್‌ಎಸ್‌ಎಸ್ ತನ್ನ ಕಾರ್ಯಕರ್ತರಿಗೆ ಜು.10ರಿಂದ 12ರವರೆಗೆ ಬೆಳಗಾವಿಯಲ್ಲಿ ದೊಡ್ಡ ತರಬೇತಿ ಶಿಬಿರ ನಡೆಸಿತ್ತು. ಇದರ ಹಿಂದೆ 2027ರ ಜನಗಣತಿ ಅಜೆಂಡಾ ಇತ್ತು. ಗಣತಿಗೆ ಆರೆಸ್ಸೆಸ್‌, ಬಿಜೆಪಿಗರ ಬಳಕೆಯ ದುರುದ್ದೇಶವಿದೆ. ಇದು ಅವರ ಪಾಲಿಗೆ ರೋಜಗಾರ್‌ ಯೋಜನೆ.

- ಜೈರಾಂ ರಮೇಶ್‌, ಕಾಂಗ್ರೆಸ್‌ ಪ್ರಧಾನ ಕಾರ್ಯದರ್ಶಿ

ಫ್ರಾನ್ಸ್‌ನಲ್ಲಿ ಆಹಾರ ಭಯೋತ್ಪಾದನೆ!

Sujatha NR — Wed, 14 Oct 2026 06:12:39 +0530

ಪ್ಯಾರಿಸ್‌: ದುಷ್ಕರ್ಮಿಗಳ ತಂಡವೊಂದು ಮಂಗಳವಾರ ಫ್ರಾನ್ಸ್‌ನಲ್ಲಿ ಸೂಪರ್‌ಮಾರ್ಕೆಟ್‌ ಕಂಪನಿಗಳ ರೆಫ್ರಿಜರೇಷನ್‌ ವ್ಯವಸ್ಥೆ ಮೇಲೆ ಭಾರೀ ಪ್ರಮಾಣದ ಸೈಬರ್ ದಾಳಿ ನಡೆಸಿದೆ. ಪರಿಣಾಮ ಈ ಮಾರ್ಕೆಟ್‌ಗಳಲ್ಲಿನ ರೆಫ್ರಿಜರೇಟರ್‌ಗಳಲ್ಲಿನ ಉಷ್ಣಾಂಶ 50 ಡಿ.ಸೆ.ದಾಟಿದೆ. ಹೀಗಾಗಿ ಹಲವು ಕಡೆ ಬೆಂಕಿ ಕಾಣಿಸಿಕೊಂಡಿದ್ದರೆ, ಉಳಿದ ಬಹುತೇಕ ಕಡೆ ಹವಾನಿಯಂತ್ರಿತ ವ್ಯವಸ್ಥೆಯಲ್ಲಿ ಇಟ್ಟಿದ್ದ ಆಹಾರ ಪದಾರ್ಥ ಹಾಳಾಗಿವೆ.

700ಕ್ಕೂ ಹೆಚ್ಚು ಸೂಪರ್‌ಮಾರ್ಕೆಟ್‌ಗಳ ಬಾಗಿಲು ಹಾಕಿವೆ

ಪರಿಣಾಮ 700ಕ್ಕೂ ಹೆಚ್ಚು ಸೂಪರ್‌ಮಾರ್ಕೆಟ್‌ಗಳು ಮಂಗಳವಾರ ಏಕಾಏಕಿ ಬಾಗಿಲು ಹಾಕಿವೆ. ಅಲ್ಲದೆ ಅಮೆರಿಕ ಮತ್ತು ಯುರೋಪ್‌ಗಳಿಗೆ ಆಹಾರ ಪೂರೈಕೆ ಮಾಡುತ್ತಿದ್ದ ಹಲವು ವೆಬ್‌ಸೈಟ್‌ಗಳು ಕೂಡಾ ಅನಿವಾರ್ಯವಾಗಿ ಸೇವೆ ಸ್ಥಗಿತಗೊಳಿಸಬೇಕಾಗಿ ಬಂದಿದೆ.

ಏನಾಯ್ತು?:

ಹ್ಯಾಕರ್‌ಗಳ ಗುಂಪು ದೊಡ್ಡ ದೊಡ್ಡ ಸೂಪರ್‌ಮಾರ್ಕೆಟ್‌ಗಳಲ್ಲಿ ಇರುವ ಹವಾನಿಯಂತ್ರಿತ ವ್ಯವಸ್ಥೆ ಮೇಲೆ ಸೈಬರ್‌ ದಾಳಿ ನಡೆಸುವ ಮೂಲಕ ಅವುಗಳ ಉಷ್ಣಾಂಶ ಹೆಚ್ಛಾಗುವಂತೆ ಮಾಡಿದೆ. ಹೀಗಾಗಿ ಅವುಗಳ ಉಷ್ಣಾಂಶ 50 ಡಿ.ಸೆ. ದಾಟಿ ಹಲವು ಕಡೆ ಬೆಂಕಿ ಕಾಣಿಸಿಕೊಂಡಿದೆ. ಉಳಿದಂತೆ 700ಕ್ಕೂ ಹೆಚ್ಚು ಮಾರ್ಕೆಟ್‌ಗಳಲ್ಲಿ ಹವಾನಿಯಂತ್ರಿತ ವ್ವವಸ್ಥೆಯಲ್ಲಿ ಇಟ್ಟಿದ್ದ ಆಹಾರ ವಸ್ತುಗಳ ಅಧಿಕ ಉಷ್ಣಾಂಶದಿಂದ ಬಳಸಲಾಗದ ಸ್ಥಿತಿ ತಲುಪಿದೆ. ಹೀಗಾಗಿ ಸೂಪರ್‌ ಮಾರ್ಕೆಟ್‌ಗಳು ಬಂದ್‌ ಆಗಿದೆ.

ದೇಶಾದ್ಯಂತ ಮುಂಗಾರು ಅಂತ್ಯ: ಶೇ.12ರಷ್ಟು ಮಳೆ ಕೊರತೆ

Sujatha NR — Fri, 16 Oct 2026 13:51:56 +0530

ನವದೆಹಲಿ: ಎಲ್‌ನಿನೋ ಪರಿಣಾಮ ಕೈಕೊಟ್ಟು ದೇಶದ ರೈತರನ್ನು ಸಂಕಷ್ಟಕ್ಕೆ ನೂಕಿರುವ ಮುಂಗಾರು ಮಳೆ ದೇಶದಲ್ಲಿ ಸಂಪೂರ್ಣ ಹಿಂತೆಗೆತ ಆಗಿದೆ. ಈ ಬಾರಿ ಮುಂಗಾರು ಮಳೆ ವಾಡಿಕೆಗಿಂತ ಶೇ.12.6ರಷ್ಟು ಕಡಿಮೆ ಸುರಿದಿದೆ. ಒಟ್ಟು 759.4 ಮಿ.ಮೀ.ನಷ್ಟು ಮಳೆ ಸುರಿದಿದ್ದು, ವಾಡಿಕೆಯ ಮಳೆ 868.6 ಮಿ.ಮೀ.ಆಗಿದೆ.

ಹಿಂಗಾರು ಮಾರುತ ಅಧಿಕೃತವಾಗಿ ಪ್ರವೇಶಿಸಿದೆ

ಇದೇ ವೇಳೆ, ಕರ್ನಾಟಕ ಸೇರಿ ದಕ್ಷಿಣ ಭಾರತದ ಕೆಲವೆಡೆ ಹಿಂಗಾರು ಮಾರುತ ಅಧಿಕೃತವಾಗಿ ಪ್ರವೇಶಿಸಿದೆ. ಕರ್ನಾಟಕದ ದಕ್ಷಿಣ ಒಳನಾಡು, ಕೇರಳ, ಮಹಾರಾಷ್ಟ್ರ, ತಮಿಳುನಾಡು, ಪುದುಚೇರಿ, ಕರೈಕಾಲ್‌, ಆಂಧ್ರ ಕರಾವಳಿ, ರಾಯಲ್‌ ಸೀಮಾದಲ್ಲಿ ಹಿಂಗಾರು ಮಳೆ ಸುರಿಯಲಾರಂಭಿಸಿದೆ ಎಂದು ಭಾರತೀಯ ಹವಾಮಾನ ಇಲಾಖೆ ತಿಳಿಸಿದೆ.

ಸಾಮಾನ್ಯವಾಗಿ ಜೂನ್‌ನಿಂದ ಸೆಪ್ಟೆಂಬರ್‌ ವರೆಗೆ ಮುಂಗಾರು

ಸಾಮಾನ್ಯವಾಗಿ ಜೂನ್‌ನಿಂದ ಸೆಪ್ಟೆಂಬರ್‌ ವರೆಗೆ ಮುಂಗಾರು ಮಾರುತ ಹಾಗೂ ಅಕ್ಟೋಬರ್‌ನಿಂದ ಡಿಸೆಂಬರ್‌ ವರೆಗೆ ಹಿಂಗಾರು ಮಾರುತದ ಪ್ರಭಾವ ಇರುತ್ತದೆ. ಈಗಾಗಲೇ ಕರ್ನಾಟಕ ಸೇರಿ ದಕ್ಷಿಣ ಭಾರತದ ಬಹುತೇಕ ಕಡೆ ಮುಂಗಾರು ಮಾರುತ ಕೈಕೊಟ್ಟಿದ್ದು, ಹಿಂಗಾರು ಮಾರುತವಾದರೂ ಕೈಹಿಡಿಯಬಹುದೇ ಎಂಬ ನಿರೀಕ್ಷೆ ಹುಟ್ಟಿಕೊಂಡಿದೆ. ಹಿಂಗಾರು ಮಾರುತವು ದಕ್ಷಿಣ ಭಾರತದ ಎರಡನೇ ಬೆಳೆಗೆ ಅತ್ಯಗತ್ಯವಾಗಿದೆ.

ದೀಪಾವಳಿಗೆ ಸಿಹಿ ಕೇಳಿದವಗೆ ಜೆಸಿಬಿ, ಸೇನಾ ಟ್ಯಾಂಕರ್‌ - ಉಡುಗೊರೆ ನೋಡಿ ಮನೆ ಖಾಲಿ ಮಾಡಿದ!

Sujatha NR — Wed, 14 Oct 2026 07:52:53 +0530

ಮಧುರೈ: ದೀಪಾವಳಿಗೆ ನನ್ನ ಮನೆಗೆ ಸಿಹಿ ತಿನಿಸು ಕಳುಹಿಸಿ ಕೊಡಿ ಎಂಬ ಸಾಮಾಜಿಕ ಜಾಲತಾಣ ಇನ್‌ಫ್ಲುಯೆನ್ಸರ್‌ ಬೇಡಿಕೆಗೆ, ಜನರು ತರಹೇವಾರಿ ಉತ್ಪನ್ನಗಳನ್ನು ಆನ್‌ಲೈನ್‌ ತಾಣಗಳ ಮೂಲಕ ಕ್ಯಾಶ್‌ ಆನ್‌ ಡೆಲಿವರಿ ಮೂಲಕ ಕಳುಹಿಸಿದ ಕಾರಣ ಆತ ಮನೆಯನ್ನೇ ಬಿಟ್ಟು ವಿಚಿತ್ರ ಹೋದ ವಿಚಿತ್ರ ಘಟನೆ ತಮಿಳುನಾಡಿನ ಮಧುರೈನಲ್ಲಿ ನಡೆದಿದೆ.

ಹಾಸ್ಯಭರಿತ ವಿಡಿಯೋಗಳ ಮೂಲಕ ಜನಪ್ರಿಯತೆ ಗಳಿಸಿರುವ ವೀರಮಣಿ

ಹಾಸ್ಯಭರಿತ ವಿಡಿಯೋಗಳ ಮೂಲಕ ಜನಪ್ರಿಯತೆ ಗಳಿಸಿರುವ ಮಧುರೈನ ಕಂಟೆಂಟ್ ಕ್ರಿಯೇಟರ್ ವೀರಮಣಿ, ದೀಪಾವಳಿ ಹಬ್ಬದ ನಿಮಿತ್ತ ಅಭಿಮಾನಿಗಳು ನನಗೆ ಸಿಹಿ ಕಳುಹಿಸಬಹುದು ಎಂದು ಹೇಳಿ ವಿಡಿಯೋ ಪೋಸ್ಟ್‌ ಹಾಕಿ ಅದರಲ್ಲಿ ತನ್ನ ಮನೆಯ ವಿಳಾಸ ಹಂಚಿಕೊಂಡಿದ್ದರು.

ಆದರೆ, ಇದನ್ನು ಗೇಲಿಯಾಗಿ ತೆಗೆದುಕೊಂಡ ಕೆಲ ಕಿಡಿಗೇಡಿಗಳು, ವೀರಮಣಿ ಮನೆಗೆ ನಾನ್-ಸ್ಟಾಪ್ ಆಗಿ ಕ್ಯಾಶ್-ಆನ್-ಡೆಲಿವರಿ ಆರ್ಡರ್‌ಗಳನ್ನು ಕಳುಹಿಸಲು ಶುರು ಮಾಡಿದ್ದಾರೆ. ಪರಿಣಾಮ ಅಮೆಜಾನ್ ಮತ್ತು ಫ್ಲಿಪ್‌ಕಾರ್ಟ್‌ ಸೇರಿದಂತೆ ಹಲವು ಇ-ಕಾಮರ್ಸ್ ಕಂಪನಿಗಳ ಡೆಲಿವರಿ ಬಾಯ್‌ಗಳು ದುಬಾರಿ ಎಲೆಕ್ಟ್ರಾನಿಕ್ಸ್ ವಸ್ತುಗಳೊಂದಿಗೆ ವೀರಮಣಿ ಮನೆಗೆ ಸಾಲುಗಟ್ಟಿ ನಿಂತು ಉತ್ಪನ್ನಗಳ ಡೆಲಿವರಿಗೆ ಮುಂದಾಗಿದ್ದಾರೆ. ಹೀಗೆ ಬಂದ ಉತ್ಪನ್ನಗಳಲ್ಲಿ. ವಾಷಿಂಗ್ ಮೆಷಿನ್, ರೆಫ್ರಿಜರೇಟರ್, ಸ್ಮಾರ್ಟ್‌ಫೋನ್‌ ಮತ್ತು ಟೀವಿ ಸೇರಿದ್ದವು.

ಜೆಸಿಬಿ, 70 ಕೋಟಿ ರು.ಬೆಲೆಯ ಮಿಲಿಟರಿ ಟ್ಯಾಂಕ್‌ಗಳನ್ನು ಆರ್ಡರ್

ಜೊತೆಗೆ ಕೆಲವು ಕಿಡಿಗೇಡಿಗಳು, ಬೃಹತ್ ಜೆಸಿಬಿ, 70 ಕೋಟಿ ರು.ಬೆಲೆಯ ಮಿಲಿಟರಿ ಟ್ಯಾಂಕ್‌ಗಳನ್ನು ಸಹ COD ಮೂಲಕ ಆರ್ಡರ್ ಮಾಡಿರುವುದಾಗಿ ಸಾಮಾಜಿಕ ಜಾಲತಾಣಗಳಲ್ಲಿ ಸ್ಕ್ರೀನ್‌ಶಾಟ್‌ಗಳನ್ನು ವೈರಲ್ ಮಾಡಿದರು. ಎಲೆಕ್ಟ್ರಾನಿಕ್ಸ್ ಮಾತ್ರವಲ್ಲದೆ, ಸ್ವಿಗ್ಗಿ, ಜೊಮ್ಯಾಟೋ ಡೆಲಿವರಿ ಸಿಬ್ಬಂದಿ ಕೂಡ ಆಹಾರದ ಆರ್ಡರ್‌ಗಳೊಂದಿಗೆ ಸಾಲುಗಟ್ಟಿ ಬಂದಿದ್ದಾರೆ.

ಆ ವಸ್ತುಗಳನ್ನು ತಾವು ಆರ್ಡರ್‌ ಮಾಡಿರದ, ಅದನ್ನು ಖರೀದಿಸಲು ಹಣವೂ ಇಲ್ಲದ ಕಾರಣ ಹಾಗೂ ಒಟಿಪಿಯು ಇಲ್ಲದ ಕಾರಣ ಉತ್ಪನ್ನಗಳನ್ನು ಅವರು ಹಾಗೆ ಮರಳಿಸಿದ್ದಾರೆ. ಜೊತೆಗೆ ನಿರಂತರವಾಗಿ ಬಂದ ಈ ಪ್ರ್ಯಾಂಕ್ ಆರ್ಡರ್‌ಗಳಿಂದ ತೀವ್ರ ಮಾನಸಿಕ ಒತ್ತಡಕ್ಕೊಳಗಾದ ವೀರಮಣಿ, ತಮ್ಮ ಮನೆಯಿಂದಲೇ ವೀಡಿಯೊ ಒಂದನ್ನು ಅಪ್‌ಲೋಡ್ ಮಾಡಿ, ‘ನಾನು ಸಿಹಿಯ ಡಬ್ಬಿ ಕೇಳಿದ್ದಕ್ಕೆ ಈಗ ದೊಡ್ಡ ಶಿಕ್ಷೆ ಅನುಭವಿಸುತ್ತಿದ್ದೇನೆ. ದಯವಿಟ್ಟು ಆರ್ಡರ್ ಮಾಡುವುದನ್ನು ನಿಲ್ಲಿಸಿ. ನಿಮ್ಮ ಕಾಲು ಹಿಡಿಯುತ್ತೇನೆ’ ಎಂದು ಕಣ್ಣೀರಿಟ್ಟು ಮನವಿ ಮಾಡಿಕೊಂಡಿದ್ದರು. ಆದರೂ ಕಿಡಿಗೇಡಿಗಳ ಕಿರುಕುಳ ನಿಲ್ಲಲಿಲ್ಲ. ಹೀಗಾಗಿ ಅವರೀಗ ತಮ್ಮ ಮನೆ ಖಾಲಿ ಮಾಡಿಕೊಂಡು ಕುಟುಂಬ ಸಮೇತ ಅಜ್ಞಾತ ಸ್ಥಳಕ್ಕೆ ತೆರಳಿದ್ದಾರೆ,

ಶಿಕ್ಷಕರಷ್ಟೇ ಅಲ್ಲ, ಗಣತಿಗೆ ಖಾಸಗಿ ವ್ಯಕ್ತಿಗೂ ಅವಕಾಶ!

Sujatha NR — Sun, 18 Oct 2026 07:16:47 +0530

ನವದೆಹಲಿ: ಜನಗಣತಿಗೆ ಸರ್ಕಾರಿ ಶಿಕ್ಷಕರಷ್ಟೇ ಅಲ್ಲ, ಅನುದಾನಿತ ಹಾಗೂ ಅನುದಾನ ರಹಿತ ಶಾಲಾ ಶಿಕ್ಷಕರನ್ನೂ ನೇಮಿಸಿಕೊಳ್ಳಬಹುದು ಎಂದು ಆದೇಶ ಹೊರಡಿಸಿದ್ದ ಕೇಂದ್ರ ಸರ್ಕಾರ, ಅದೇ ಆದೇಶದಲ್ಲಿ ಯಾವುದೇ ‘ಖಾಸಗಿ ವ್ಯಕ್ತಿ’ಗಳನ್ನೂ ಗಣತಿಗೆ ಬಳಸಿಕೊಳ್ಳಬಹುದು ಎಂದು ಹೇಳಿರುವುದು ಬಹಿರಂಗವಾಗಿದೆ. ಖಾಸಗಿ ವ್ಯಕ್ತಿಗಳ ಬಳಕೆ ಇದೇ ಮೊದಲ ಬಾರಿ ಎನ್ನಲಾಗಿದೆ.

‘ಯಾವುದೇ ವ್ಯಕ್ತಿ’ಯನ್ನು ಗಣತಿದಾರರನ್ನಾಗಿ ನೇಮಿಸಬಹುದು

ಶುಕ್ರವಾರ ರಿಜಿಸ್ಟ್ರಾರ್‌ ಜನರಲ್‌ ಆಫ್‌ ಇಂಡಿಯಾವು ಹೊರಡಿಸಿದ ನೋಟಿಫಿಕೇಷನ್‌ ಪ್ರಕಾರ ಶಿಕ್ಷಕರು, ಕ್ಲರ್ಕ್‌ಗಳು ಅಥವಾ ಯಾವುದೇ ಅಧಿಕಾರಿಗಳು ಅಥವಾ ‘ಯಾವುದೇ ವ್ಯಕ್ತಿ’ಯನ್ನು ರಾಜ್ಯ ಅಥವಾ ಕೇಂದ್ರಾಡಳಿತ ಪ್ರದೇಶಗಳು ಗಣತಿದಾರರನ್ನಾಗಿ ನೇಮಿಸಬಹುದು.

ಯಾವುದೇ ಸರ್ಕಾರಿ ಸಂಸ್ಥೆಯ ಶಿಕ್ಷಕರು, ಸ್ಥಳೀಯ ಪ್ರಾಧಿಕಾರ, ಅನುದಾನಿತ ಅಥವಾ ಅನುದಾನ ರಹಿತ ಖಾಸಗಿ ಸಂಸ್ಥೆಗಳು, ಸೊಸೈಟಿಗಳು ಅಥವಾ ಟ್ರಸ್ಟ್‌ಗಳು, ಕ್ಲರ್ಕ್‌ಗಳು ಅಥವಾ ಕೇಂದ್ರ ಸರ್ಕಾರ, ರಾಜ್ಯ ಸರ್ಕಾರ, ಸ್ಥಳೀಯ ಪ್ರಾಧಿಕಾರ ಅಥವಾ ಸ್ಥಾಪಿತ (ಸರ್ಕಾರಿ ಸಂಸ್ಥೆಗಳು, ಶಾಸನಬದ್ಧ ಸಂಸ್ಥೆಗಳು, ಬ್ಯಾಂಕ್‌ಗಳು, ಕಂಪನಿಗಳು, ಶಿಕ್ಷಣ ಸಂಸ್ಥೆಗಳು, ಸೊಸೈಟಿಗಳು ಮತ್ತು ಟ್ರಸ್ಟ್‌ಗಳು) ಯಾವುದೇ ವ್ಯಕ್ತಿಗಳು ಗಣತಿದಾರರಾಗಬಹುದಾಗಿದೆ.

ಆದೇಶದಲ್ಲೇನಿದೆ?

- ಗಣತಿಗೆ ಖಾಸಗಿ ಅನುದಾನಿತ, ಅನುದಾನರಹಿತ ಶಿಕ್ಷಕರನ್ನು ಬಳಸಬಹುದು

- ಕ್ಲರ್ಕ್‌ಗಳು ಅಥವಾ ಯಾವುದೇ ಅಧಿಕಾರಿಗಳನ್ನು ಕೂಡ ಬಳಸಿಕೊಳ್ಳಬಹುದು

- ಸೊಸೈಟಿ, ಟ್ರಸ್ಟ್‌ಗಳಲ್ಲಿನ ಯಾವುದೇ ವ್ಯಕ್ತಿಗಳೂ ಗಣತಿದಾರರಾಗಬಹುದು

- ರಾಜ್ಯ ಅಥವಾ ಕೇಂದ್ರಾಡಳಿತ ಪ್ರದೇಶಗಳು ಗಣತಿದಾರನ್ನು ನೇಮಿಸಬಹುದು

- ಕೇಂದ್ರ ಸರ್ಕಾರದಿಂದ ಗಣತಿ ಬಗ್ಗೆ ಪರಿಷ್ಕೃತ ಅಧಿಸೂಚನೆ ಮೊನ್ನೆಪ್ರಕಟ

ಮಕ್ಕಳ ಇಂಟರ್ನೆಟ್‌ ಬಳಕೆ ನಿರ್ಬಂಧಿಸಲಾಗದು: ಸುಪ್ರೀಂ

Sujatha NR — Sun, 18 Oct 2026 07:55:01 +0530

ನವದೆಹಲಿ: ಮಕ್ಕಳಿಗೆ ಸಾಮಾಜಿಕ ಮಾಧ್ಯಮಗಳ ಬಳಕೆಯನ್ನು ನಿಷೇಧಿಸಬೇಕು ಎಂಬ ಕೂಗು ವ್ಯಾಪಕವಾಗುತ್ತಿರುವ ನಡುವೆಯೇ, ‘ಇಂಟರ್ನೆಟ್‌ ಬಳಸುವುದು ಮಕ್ಕಳೂ ಸೇರಿದಂತೆ ಪ್ರತಿಯೊಬ್ಬ ವ್ಯಕ್ತಿಯ ಮೂಲಭೂತ ಹಕ್ಕು. ಮಕ್ಕಳಿಗೆ ಅದನ್ನು ಸಂಪೂರ್ಣವಾಗಿ ನಿಷೇಧಿಸಲು ಸಾಧ್ಯವಿಲ್ಲ’ ಎಂದು ಸುಪ್ರೀಂ ಕೋರ್ಟ್‌ ಮಹತ್ವದ ಅಭಿಪ್ರಾಯ ವ್ಯಕ್ತಪಡಿಸಿದೆ.

ನ್ಯಾ. ಜೆ.ಬಿ. ಪರ್ದಿವಾಲಾ ಮತ್ತು ನ್ಯಾ. ವಿನೋದ್‌ ಚಂದ್ರನ್‌ ಅವರ ಪೀಠ, ‘ಸಂವಿಧಾನದ ವಿಧಿ 21 ಮತ್ತು 19(1)(ಎ) ಅಡಿಯಲ್ಲಿ ಇಂಟರ್ನೆಟ್ ಸಂಪರ್ಕ ಮತ್ತು ಬಳಕೆಯು ಪ್ರತಿಯೊಬ್ಬ ನಾಗರಿಕನ ಹಕ್ಕು. ವಯಸ್ಸಿನ ಭೇದವಿಲ್ಲದೆ ಮಕ್ಕಳು ಸಹ ಈ ಹಕ್ಕನ್ನು ಹೊಂದಿದ್ದಾರೆ. ಸುರಕ್ಷತೆಯ ನೆಪದಲ್ಲಿ ಮಕ್ಕಳ ಮೇಲೆ ಪೂರ್ಣ ಪ್ರಮಾಣದ ನಿಷೇಧ ಹೇರುವುದು ಅಸಂಗತ’ ಎಂದು ಸ್ಪಷ್ಟಪಡಿಸಿದೆ. ದೂರದೂರುಗಳ ಮಕ್ಕಳಿಗೆ ಶಿಕ್ಷಣ ಮತ್ತು ಜ್ಞಾನಾರ್ಜನೆಗೆ ಹಾಗೂ ವಿಶೇಷ ಚೇತನ ಮಕ್ಕಳಿಗೆ ಸಂಪರ್ಕ ಸಾಧಿಸಲು ಇಂಟರ್ನೆಟ್ ಅತ್ಯಂತ ಮುಖ್ಯ ಮಾಧ್ಯಮವಾಗಿದೆ ಎಂದು ಒತ್ತಿ ಹೇಳಿರುವ ಪೀಠ, ಸುರಕ್ಷತೆ ಮತ್ತು ಸ್ವಾತಂತ್ರ್ಯ ಎರಡನ್ನೂ ಸಮ್ಮಿಲನಗೊಳಿಸುವ ಕಾರ್ಯಸಾಧ್ಯ ಚೌಕಟ್ಟನ್ನು ರೂಪಿಸಲು ಸೂಚಿಸಿದೆ.

ದುರ್ಬಳಕೆ ಬಗ್ಗೆ ಕಳವಳ:

‘ಸಾಮಾಜಿಕ ಮಾಧ್ಯಮಗಳು ಮತ್ತು ಇಂಟರ್ನೆಟ್‌ ಸಂಪೂರ್ಣವಾಗಿ ಸುರಕ್ಷಿತವಾಗಿಲ್ಲ. ಆದರೆ ಇವುಗಳ ನಿಷೇಧವೇ ಪೂರ್ಣ ಪರಿಹಾರವಲ್ಲ. ನಿಷೇಧ ಹೇರಿದರೆ ಮಕ್ಕಳು ನಿಯಂತ್ರಣವಿಲ್ಲದ ಮತ್ತು ಹೆಚ್ಚು ಅಪಾಯಕಾರಿ ವೆಬ್‌ಸೈಟ್‌ಗಳತ್ತ ಮುಖ ಮಾಡಬಹುದು ಹಾಗೂ ಆನ್‌ಲೈನ್ ಶೋಷಣೆಗೆ ಒಳಗಾದಾಗ ಪೋಷಕರಿಗೆ ತಿಳಿಸಲು ಭಯಪಡಬಹುದು’ ಎಂದು ಸುಪ್ರೀಂ ಕಳವಳ ವ್ಯಕ್ತಪಡಿಸಿದೆ.

ಕಂಪನಿಗಳ ವಿರುದ್ಧ ಕಿಡಿ:

ಮಕ್ಕಳ ಮೇಲಿನ ಲೈಂಗಿಕ ಶೋಷಣೆ ಮತ್ತು ನಿಂದನೆಗೆ ಸಂಬಂಧಿಸಿದ ವಿಷಯಗಳ ಹರಡುವಿಕೆಯನ್ನು ತಡೆಯುವಂತೆ 2024ರಲ್ಲೇ ನಿರ್ದೇಶನ ನೀಡಿದ್ದರೂ, ಅದನ್ನು ತಡೆಯುವಲ್ಲಿ ಸಾಮಾಜಿಕ ಮಾಧ್ಯಮ ಕಂಪನಿಗಳು ವಿಫಲವಾಗಿರುವುದಕ್ಕೆ ಪೀಠ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದೆ. ಚಂದಾದಾರಿಕೆ ಅಥವಾ ಪೇವಾಲ್‌ಗಳ ಮೂಲಕ ಮಗುವಿಗೆ ಹಾನಿಯುಂಟುಮಾಡುವಂತಹ ಯಾವುದೇ ಲೈಂಗಿಕ ವಿಷಯಗಳನ್ನು ಪ್ರದರ್ಶಿಸುವುದು, ಅಪ್‌ಲೋಡ್ ಮಾಡುವುದು ಅಥವಾ ಪ್ರಚಾರ ಮಾಡುವುದನ್ನು ಮಧ್ಯವರ್ತಿ ಸಂಸ್ಥೆಗಳು ತಕ್ಷಣವೇ ತಡೆಯಬೇಕು ಎಂದು ಕಟ್ಟುನಿಟ್ಟಿನ ನಿರ್ದೇಶನ ನೀಡಿದೆ.

ಪ್ರಮುಖ ನಿರ್ದೇಶನಗಳು:

ಆದಾಯ ಮುಟ್ಟುಗೋಲು:

ಕಾನೂನು ಉಲ್ಲಂಘಿಸುವ ಸಾಮಾಜಿಕ ಮಾಧ್ಯಮ ಸಂಸ್ಥೆಗಳ ಮೇಲೆ ಗರಿಷ್ಠ ದಂಡ ವಿಧಿಸಲು ಕಾನೂನು ಚೌಕಟ್ಟು ರೂಪಿಸುವಂತೆ ಕೇಂದ್ರ ಸರ್ಕಾರಕ್ಕೆ ಸುಪ್ರೀಂ ಸೂಚಿಸಿದೆ. ಅಲ್ಲದೆ, ಇಂತಹ ನಿಷೇಧಿತ ವಿಷಯಗಳಿಂದ ಸಂಸ್ಥೆಗಳು ಗಳಿಸಿದ ಆದಾಯವನ್ನು ಸಂಪೂರ್ಣವಾಗಿ ಮುಟ್ಟುಗೋಲು ಹಾಕಿಕೊಳ್ಳಬೇಕು ಎಂದಿದೆ.

ಪೋಷಕರ ಮೇಲ್ವಿಚಾರಣೆ:

ಸಂಪೂರ್ಣ ನಿಷೇಧದ ಬದಲಿಗೆ ಮಕ್ಕಳ ಸಾಮಾಜಿಕ ಜಾಲತಾಣ ಖಾತೆಗಳಿಗೆ ‘ಚೈಲ್ಡ್ ಮೋಡ್’ ಖಾಸಗಿ ಸೆಟ್ಟಿಂಗ್ಸ್ ಮತ್ತು ಪೋಷಕರ ಅನುಮತಿ ಕಡ್ಡಾಯಗೊಳಿಸುವಂತಹ ಸಕಾರಾತ್ಮಕ ಸುರಕ್ಷತಾ ಕ್ರಮಗಳನ್ನು ಜಾರಿಗೆ ತರಲು ಸಲಹೆ ನೀಡಿದೆ.

ರಾಷ್ಟ್ರೀಯ ಡಾಟಾಬೇಸ್ ರಚನೆ:

ತಂತ್ರಜ್ಞಾನ ಆಧರಿತ ‘ಪರ್ಸೆಪ್ಚುಯಲ್ ಹ್ಯಾಶ್ ಮ್ಯಾಚಿಂಗ್'''' ಮತ್ತು ಯುಆರ್‌ಎಲ್ ಪಟ್ಟಿ ಬಳಸಿ ಸಿಎಸ್ಇಎಎಮ್ ವಿಷಯಗಳನ್ನು ಪತ್ತೆಹಚ್ಚಿ ತಕ್ಷಣವೇ ತೆಗೆದುಹಾಕಲು ರಾಷ್ಟ್ರೀಯ ಹ್ಯಾಶ್ ಮತ್ತು ಯುಆರ್‌ಎಲ್ ಪಟ್ಟಿ ಡಾಟಾಬೇಸ್ ರಚಿಸುವಂತೆ ಕೇಂದ್ರಕ್ಕೆ ಕೋರ್ಟ್‌ ಆದೇಶಿಸಿದೆ.

-ಇಂಟರ್ನೆಟ್‌ ಬಳಕೆ ಪ್ರತಿಯೊಬ್ಬರ ಮೂಲಭೂತ ಹಕ್ಕು

- ವಯಸ್ಸಿನ ಭೇದವಿಲ್ಲದೆ ಮಕ್ಕಳಿಗೂ ಈ ಹಕ್ಕು ಅನ್ವಯ

-ಮಕ್ಕಳಿಗೆ ಜ್ಞಾನಾರ್ಜನೆಗೆ ಇಂಟರ್ನೆಟ್‌ ತೀರಾ ಅಗತ್ಯ

- ಸುರಕ್ಷಿತ ಬಳಕೆಗೆ ಸರ್ಕಾರ ಚೌಕಟ್ಟು ರೂಪಿಸಬೇಕು

- ಆದರೆ ಮಕ್ಕಳ ಲೈಂಗಿಕ ಶೋಷಣೆ ಕಂಟೆಂಟ್‌ ಸಲ್ಲದು

-ಸಾಮಾಜಿಕ ಮಾಧ್ಯಮ ಕಂಪನಿಗಳಿಗೆ ಸುಪ್ರೀಂ ಚಾಟಿ

ಬಾಂಗ್ಲಾ ಜೆನ್‌ಝೀ ಹೋರಾಟ ನಮಗೆ ಸ್ಫೂರ್ತಿ: ನೇಹಾ ಬೋರಾ ವಿವಾದ

Sujatha NR — Fri, 16 Oct 2026 05:57:07 +0530

ನವದೆಹಲಿ: ಎಸ್ಐಆರ್‌ ವಿರೋಧಿ ಹೋರಾಟದ ಮುಂಚೂಣಿಯಲ್ಲಿರುವ ಅಖಿಲ ಭಾರತ ವಿದ್ಯಾರ್ಥಿ ಸಂಸ್ಥೆ (ಎಐಎಸ್ಎ) ರಾಷ್ಟ್ರೀಯ ಅಧ್ಯಕ್ಷೆ ಮತ್ತು ಹೋರಾಟಗಾರ್ತಿ ನೇಹಾ ಬೋರಾ ಅವರು, ‘ಬಾಂಗ್ಲಾದೇಶದ ಹೋರಾಟವೇ ನಮಗೆ ಸ್ಫೂರ್ತಿ’ ಎಂದಿರುವುದು ದೊಡ್ಡ ರಾಜಕೀಯ ವಿವಾದಕ್ಕೆ ಕಾರಣವಾಗಿದೆ.

ಇದೇ ವೇಳೆ, ನೇಹಾ ಹೇಳಿಕೆಯನ್ನು ಜಿರಳೆ ಪಕ್ಷದ ಬೆಂಬಲಿಗ ಹಾಗೂ ಸುಪ್ರೀಂ ಕೋರ್ಟ್‌ನ ಹಿರಿಯ ವಕೀಲ ಪ್ರಶಾಂತ್ ಭೂಷಣ್ ಸಮರ್ಥಿಸಿ, ‘ದೇಶದಲ್ಲಿ ಸರ್ಕಾರ ಬದಲಾವಣೆ (ರೆಜೀಮ್ ಚೇಂಜ್‌) ಆಗಬೇಕು. ಇದು ಪ್ರತಿಯೊಬ್ಬ ನಾಗರಿಕನ ಪ್ರಜಾಸತ್ತಾತ್ಮಕ ಹಕ್ಕು’ ಎಂದು ಹೇಳಿದ್ದಾರೆ.

ಬಿಜೆಪಿ ವಕ್ತಾರ ಸಂಬಿತ್‌ ಪಾತ್ರ ಕಿಡಿ

ಸರ್ಕಾರ ಬದಲಾವಣೆಗೆ ಸಿಜೆಪಿಗರು ನೀಡಿದ ಕರೆಗೆ ಬಿಜೆಪಿ ವಕ್ತಾರ ಸಂಬಿತ್‌ ಪಾತ್ರ ಕಿಡಿಕಾರಿದ್ದು, ‘ಸಿಜೆಪಿಗರು ಕ್ಷಿಪ್ರಕ್ರಾಂತಿ ನಡೆಸಿ ಭಾರತವನ್ನು ಬಾಂಗ್ಲಾದೇಶ ಮಾಡಲು ಯತ್ನಿಸುತ್ತಿದ್ದಾರೆ ಎಂಬುದಕ್ಕೆ ಇದು ಸಾಕ್ಷಿ’ ಎಂದಿದ್ದಾರೆ.

ನೇಹಾ ಹೇಳಿದ್ದೇನು?

‘ಭಾರತದಲ್ಲಿ ಬೆಳೆಯುತ್ತಿರುವ ಜೆನ್‌ ಝೀ (ಯುವಕರ) ಪ್ರತಿಭಟನೆಗಳಿಗೆ ಬಾಂಗ್ಲಾದೇಶದ ಯುವಜನರ ಹೋರಾಟವೇ ಸ್ಪೂರ್ತಿ, ಬಾಂಗ್ಲಾದೇಶದ ಅನುಭವವು ಭಾರತದ ಯುವಕರಿಗೆ ದಾರಿ ತೋರಿಸುತ್ತದೆ’ ಎಂದು ನೇಹಾ ಅವರು ಬಾಂಗ್ಲಾದ ಅತಿದೊಡ್ಡ ಎಡಪಂಥೀಯ ವಿದ್ಯಾರ್ಥಿ ಸಂಘಟನೆಯಾದ ಸಮಾಜವಾದಿ ವಿದ್ಯಾರ್ಥಿ ರಂಗದ (ಎಸ್ಎಸ್‌ಎಸ್‌) ಸಮ್ಮೇಳನವನ್ನು ವರ್ಚುವಲ್ ಆಗಿ ಉದ್ದೇಶಿಸಿ ಮಾತನಾಡುತ್ತಾ ಹೇಳಿದ್ದರು ಎನ್ನಲಾಗಿದೆ. ಬಿಜೆಪಿ ಈ ವಿಡಿಯೋವನ್ನು ಸೋಷಿಯಲ್‌ ಮೀಡಿಯಾದಲ್ಲಿ ಹಂಚಿಕೊಂಡು, ‘ದೇಶದಲ್ಲಿ ಅರಾಜಕತೆ ಸೃಷ್ಟಿಗೆ ನಡೆದ ಹುನ್ನಾರ ಇದು’ ಎಂದಿದೆ.

ದುರ್ಗಾ ಪೆಂಡಾಲ್‌ನಲ್ಲಿ ಭಾರಿ ಕಾಲ್ತುಳಿತ: 17 ಬಲಿ

Sujatha NR — Sun, 18 Oct 2026 06:01:23 +0530

ಕೋಲ್ಕತಾ: ಪಶ್ಚಿಮ ಬಂಗಾಳದ ರಾಜಧಾನಿ ಕೋಲ್ಕತಾದಲ್ಲಿನ ಚೋರ್‌ಬಗನ್‌ ಸರ್ಬೋಜನಿನ್‌ ದುರ್ಗಾ ಪೂಜೆ ಪಂಡಾಲ್‌ನಲ್ಲಿ ಶನಿವಾರ ರಾತ್ರಿ ಸಂಭವಿಸಿದ ಭೀಕರ ಕಾಲ್ತುಳಿತದಲ್ಲಿ ಕನಿಷ್ಠ 17 ಜನರು ಸಾವನ್ನಪ್ಪಿದ ಶಂಕೆ ವ್ಯಕ್ತವಾಗಿದೆ. ಮೃತರಲ್ಲಿ ಒಂದು ಮಗು ಮತ್ತು 12 ಮಹಿಳೆಯರು ಸೇರಿದ್ದಾರೆ. ಜೊತೆಗೆ ಘಟನೆಯಲ್ಲಿ 40ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದು ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಘಟನೆ ಕುರಿತು ಪ್ರಧಾನಿ ನರೇಂದ್ರ ಮೋದಿ ತೀವ್ರ ಆಘಾತ ವ್ಯಕ್ತಪಡಿಸಿದ್ದಾರೆ. ಅಲ್ಲದೆ ಮೃತರ ಕುಟುಂಬಕ್ಕೆ ತಲಾ 2 ಲಕ್ಷ ರು. ಪರಿಹಾರ ಪ್ರಕಟಿಸಿದ್ದಾರೆ. ಈ ನಡುವೆ ಭಾನುವಾರ ಕೋಲ್ಕತಾದ ವಿವಿಧ ದುರ್ಗಾ ಪಂಡಾಲ್‌ಗೆ ಭೇಟಿ ನೀಡಬೇಕಿದ್ದ ಕೇಂದ್ರ ಗೃಹ ಸಚಿವ ಅಮಿತ್‌ ಶಾ, ಪಂಡಾಲ್‌ ಭೇಟಿ ರದ್ದುಪಡಿಸಿ ಗಾಯಾಳುಗಳ ಭೇಟಿಗೆ ನಿರ್ಧರಿಸಿದ್ದಾರೆ.

ಏನಾಯ್ತು?:

ನವರಾತ್ರಿ ಸಪ್ತಮಿ ಅಂಗವಾಗಿ ದುರ್ತಾ ಪಂಡಾಲ್‌ನಲ್ಲಿ ಶನಿವಾರ ಭಾರೀ ಜನಸಂದಣಿ ಸೇರಿತ್ತು. ಈ ನಡುವೆ ರಾತ್ರಿ 7.30ರ ವೇಳೆಗೆ ಭಾರೀ ಮಳೆ ಸುರಿದ ಕಾರಣ ಪಂಡಾಲ್‌ನ ಹೊರಗೆ ಸರದಿಯಲ್ಲಿ ನಿಂತಿದ್ದ ಭಕ್ತರು ಏಕಾಏಕಿ ಮುಂದೆ ನುಗ್ಗಿದ ಕಾರಣ ಕೆಲವರು ಉರುಳಿಬಿದ್ದಿದ್ದಾರೆ. ಈ ವೇಳೆ ಕಾಲ್ತುಳಿತ ಸಂಭವಿಸಿದೆ. ಆಗ ಹಲವರು ಕಾಲ್ತುಳಿತಕ್ಕೆ ಸಿಕ್ಕಿ ಉಸಿರಾಡಲಾಗದೇ ಸ್ಥಳದಲ್ಲೇ ಸಾವನ್ನಪ್ಪಿದರೆ, ಕೆಲವರು ಆಸ್ಪತ್ರೆಗೆ ಸಾಗುವ ವೇಳೆ ಮೃತಪಟ್ಟಿದ್ದಾರೆ.

ನಿರ್ಮಿಸಿದ್ದ ಜಾಗ ಅತ್ಯಂತ ಕಿರಿದಾಗಿತ್ತು

ಪಂಡಾಲ್‌ಗೆ ಪ್ರವೇಶ ಮಾಡುವ ಮತ್ತು ಪಂಡಾಲ್‌ನಿಂದ ಭಕ್ತರು ಹೊರಹೋಗಲು ನಿರ್ಮಿಸಿದ್ದ ಜಾಗ ಅತ್ಯಂತ ಕಿರಿದಾಗಿತ್ತು. ಜೊತೆಗೆ ಸ್ಥಳದಲ್ಲಿ ಸೂಕ್ತ ಬೆಳಕಿನ ವ್ಯವಸ್ಥೆಯೂ ಇರಲಿಲ್ಲ ಎಂದು ಪ್ರತ್ಯಕ್ಷದರ್ಶಿಗಳು ಆರೋಪಿಸಿದ್ದಾರೆ.

ಈ ನಡುವೆ ಘಟನೆ ಬೆನ್ನಲ್ಲೇ ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ಆಸ್ಪತ್ರೆಗೆ ಭೇಟಿ ನೀಡಿ ಮೃತರ ಕುಟುಂಬ ಸದಸ್ಯರಿಗೆ ಸಾಂತ್ವನ ಹೇಳಿದ್ದಾರೆ. ಜೊತೆಗೆ ಗಾಯಾಳುಗಳನ್ನು ಭೇಟಿ ಮಾಡಿ ಧೈರ್ಯ ತುಂಬಿದ್ದಾರೆ.

ದಿಲ್ಲೀಲಿ ದಿಢೀರ್‌ ಪ್ರತಿಭಟನೆ - ಪ್ರತಿಭಟನಾಕಾರರ ಜೊತೆ ರಾಹುಲ್‌ ಚಾಯ್‌ ಪೇ ಚರ್ಚಾ

Sujatha NR — Wed, 14 Oct 2026 06:04:12 +0530

ನವದೆಹಲಿ: ಜಂತರ್‌ಮಂತರ್‌ನಲ್ಲಿ ಪ್ರತಿಭಟನೆಗೆ ನಿಷೇಧ ಹೇರಿದ ಬೆನ್ನಲ್ಲೇ, ಮಂಗಳವಾರ ದೆಹಲಿಯಲ್ಲಿ ಅಘೋಷಿತ ದಿಢೀರ್‌ ಪ್ರತಿಭಟನೆ ನಡೆದು ಪೊಲೀಸರನ್ನು ಅವಕ್ಕಾಗಿಸಿದೆ.

ಕಾಂಗ್ರೆಸ್‌ನ ವಿದ್ಯಾರ್ಥಿ ಘಟಕ ಎನ್‌ಎಸ್‌ಯುಐ ರಾಜೀವ್‌ ಚೌಕ್‌ ಮೆಟ್ರೋ ನಿಲ್ದಾಣದಲ್ಲಿ ಸಂಘಟನೆಯ ರಾಷ್ಟ್ರೀಯ ಅಧ್ಯಕ್ಷ ವಿನೋದ್‌ ಜಖಾರ್‌ ಅ‍ವರ ಅಧ್ಯಕ್ಷತೆಯಲ್ಲಿ ಜ್ಞಾನೇಶ್‌ ಕುಮಾರ್‌ ರಾಜೀನಾಮೆಗೆ ಆಗ್ರಹಿಸಿ ದಿಢೀರ್‌ ಪ್ರತಿಭಟನೆ ನಡೆಸಿದ್ದು, ಕೇಂದ್ರದ ವಿರುದ್ಧ ಘೋಷಣೆಗಳನ್ನೂ ಕೂಗಲಾಯಿತು. ಈ ಸಂದರ್ಭದಲ್ಲಿ ನೂರಾರು ಮಂದಿ ಪ್ರತಿಭಟನಾಕಾರರನ್ನು ಪೊಲೀಸರು ವಶಕ್ಕೆಪಡೆದರು.

ಇನ್ನು ಪ್ರತಿಭಟನಾ ಸ್ಥಳವಾಗಿ ಜಂತರ್‌ ಮಂತರ್‌ ಅನ್ನು ಡಿನೋಟಿಫೈ ಮಾಡುವ ಸರ್ಕಾರದ ನಿರ್ಧಾರ ವಿರೋಧಿಸಿ ಸಿಜೆಪಿ ಮುಖಂಡರಾದ ಸೌರವ್‌ದಾಸ್‌ ಮತ್ತು ಆಶುತೋಷ್‌ ರಾಂಕಾ ಪ್ರತಿಭಟನೆಗೆ ಯತ್ನಿಸಿದ್ದು, ಈ ವೇಳೆ ಪೊಲೀಸ್‌ ಬ್ಯಾರಿಕೇಡ್‌, ಬಿಗಿಭದ್ರತೆ ದಾಟಿ ಜಂತರ್‌ಮಂತರ್‌ ಪ್ರವೇಶಿಸಿದ ಮುಖಂಡರನ್ನು ಪೊಲೀಸರು ವಶಕ್ಕೆ ಪಡೆದರು.

ಪ್ರತಿಭಟನಾಕಾರರ ಜೊತೆ ರಾಹುಲ್‌ ಚಾಯ್‌ ಪೇ ಚರ್ಚಾ

ನವದೆಹಲಿ: ಲೋಕಸಭೆ ವಿಪಕ್ಷ ನಾಯಕ ರಾಹುಲ್ ಗಾಂಧಿ ಮಂಗಳವಾರ ಇಂಡಿಯಾ ಕೂಟದ ನಾಯಕರು, ಸಂಸದರು ಮತ್ತು ವಿವಿಧ ವಿದ್ಯಾರ್ಥಿ ಸಂಘಟನೆ, ನಾಗರಿಕ ಸಂಘಟನೆಯ ನಾಯಕರಿಗೆ ತಮ್ಮ ನಿವಾಸದಲ್ಲಿ ಚಹಾಕೂಟ ಏರ್ಪಡಿಸಿದ್ದರು. ಈ ವೇಳೆ ರಾಗಾ ‘ಪ್ರತಿಭಟನಾಕಾರರೆಲ್ಲ ಒಂದೇ’ ಎನ್ನುವ ಸಂದೇಶ ಸಾರಿದ್ದಾರೆ.

ಚುನಾವಣಾ ಆಯೋಗದ ವಿರುದ್ಧ ಪ್ರತಿಭಟನೆಗಳ ನಡುವೆಯೇ ಸುನೇಹ್ರಿ ಭಾಗ್ ರಸ್ತೆಯಲ್ಲಿರುವ ರಾಹುಲ್‌ ಅವರ ನಿವಾಸದಲ್ಲಿ ನಡೆದ ಈ ಟೀ ಪಾರ್ಟಿಯಲ್ಲಿ ಲೋಕಸಭೆ ವಿಪಕ್ಷ ನಾಯಕ ರಾಹುಲ್‌ ಗಾಂಧಿ, ಸೋನಿಯಾ ಗಾಂಧಿ, ಕೆ.ಸಿ. ವೇಣುಗೋಪಾಲ್‌, ಶಶಿ ತರೂರ್‌, ತೇಜಸ್ವಿ ಯಾದವ್‌, ಮಹುವಾ ಮೊಯಿತ್ರಾ, ನೇಹಾ ಬೋರಾ ಸೇರಿದಂತೆ ಇಂಡಿಯಾ ಕೂಟದ ಪ್ರಮುಖರು ಭಾಗಿಯಾಗಿದ್ದರು.

ಇಂಡಿಯಾ ಕೂಟ ಹಾಗೂ ಇತರ ಸಂಘಟನೆಗಳು ಒಟ್ಟಾಗಿ ಹೋರಾಡುತ್ತವೆ

ಈ ವೇಳೆ ಮಾತನಾಡಿದ ರಾಹುಲ್‌, ‘ದೇಶದಲ್ಲಿ ಪ್ರಜಾಪ್ರಭುತ್ವವನ್ನು ಪುನಃ ಸ್ಥಾಪಿಸಲು ಇಂಡಿಯಾ ಕೂಟ ಹಾಗೂ ಇತರ ಸಂಘಟನೆಗಳು ಒಟ್ಟಾಗಿ ಹೋರಾಡುತ್ತವೆ. ಭಾರತದ ಸಂವಿಧಾನವನ್ನು ನಾಶಪಡಿಸಿ ಅದರಿಂದ ತಪ್ಪಿಸಿಕೊಳ್ಳಲು ಸಾಧ್ಯವಿಲ್ಲ. ವೋಟ್‌ ಚೋರಿಯ ಶಿಲ್ಪಿ ನರೇಂದ್ರ ಮೋದಿ, ಅನುಷ್ಠಾನಕಾರ ಅಮಿತ್‌ ಶಾ ಮತ್ತು ಜ್ಞಾನೇಶ್‌ ಕುಮಾರ್ ಅವರು ತಮ್ಮ ಸುತ್ತ ಬಲೆ ಮುಚ್ಚುತ್ತಿದೆ ಎಂಬುದನ್ನು ಅರ್ಥ ಮಾಡಿಕೊಳ್ಳಬೇಕು’ ಎಂದು ಹರಿಹಾಯ್ದರು.

ಜಿರಳೆ ಪಕ್ಷದ ತಿರಂಗಾ ರ್‍ಯಾಲಿಗೆ ತಡೆ : ದೀಪ್ಕೆ, ಬೋರಾ ಸೇರಿದಂತೆ 150 ಜನರು ವಶಕ್ಕೆ

Sujatha NR — Sat, 17 Oct 2026 08:22:42 +0530

ನವದೆಹಲಿ : ಪೊಲೀಸರ ಅನುಮತಿ ನಿರಾಕರಣೆ ಹೊರತಾಗಿಯೂ ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್ ರಾಜೀನಾಮೆಗೆ ಆಗ್ರಹಿಸಿ ಶುಕ್ರವಾರ ದೆಹಲಿಯ ಕನಾಟ್‌ ಪ್ಲೇಸ್‌ನಲ್ಲಿ ಜಿರಳೆ ಜನತಾ ಪಕ್ಷ (ಸಿಜೆಪಿ) ಕರೆ ನೀಡಿದ್ದ ತಿರಂಗಾ ಪ್ರತಿಭಟನೆ ವೇಳೆ ಭಾರಿ ನಾಟಕೀಯ ಬೆಳವಣಿಗಳಿಗೆ ಸಾಕ್ಷಿಯಾಯಿತು.

ಪ್ರತಿಭಟನಾ ಸ್ಥಳಕ್ಕೆ ಹೊರಟ ಸಿಜೆಪಿ ನಾಯಕ ಅಭಿಜೀತ್‌ ದೀಪ್ಕೆಯನ್ನು ಪೊಲೀಸರು ಅವರ ಮನೆಯಲ್ಲೇ ವಶಕ್ಕೆ ಪಡೆದರೆ, ಎಐಎಸ್‌ಎ ಅಧ್ಯಕ್ಷೆ ನೇಹಾ ಬೋರಾರನ್ನೂ ಮಂಡಿ ಹೌಸ್‌ ಬಳಿ ವಶಕ್ಕೆ ಪಡೆಯಲಾಯಿತು.

ಇದರ ಹೊರತಾಗಿಯೂ ನಗರದ ಹಲವು ಸ್ಥಳಗಳಲ್ಲಿ ಸಿಜೆಪಿ ಕಾರ್ಯಕರ್ತರು ದಿಢೀರ್‌ ಪ್ರತಿಭಟನೆ ನಡೆಸಿ ಪೊಲೀಸರಿಗೆ ಸವಾಲು ಒಡ್ಡುವ ಯತ್ನ ನಡೆಸಿದರು. ಅಂತಿಮವಾಗಿ 150ಕ್ಕೂ ಹೆಚ್ಚು ಜನರನ್ನು ಪೊಲೀಸರು ವಶಕ್ಕೆ ಪಡೆದರು.

ವಶ:

ಶುಕ್ರವಾರ ಮಧ್ಯಾಹ್ನವೇ ದೀಪ್ಕೆಯ ಮನೆಗೆ ತೆರಳಿದ್ದ ಪೊಲೀಸರು ಪ್ರತಿಭಟನೆಗೆ ಮುಂದಾಗದಂತೆ ಸೂಚಿಸಿದ್ದರು. ಅನುಮತಿ ನಿರಾಕರಣೆ ಹೊರತಾಗಿಯೂ ಪ್ರತಿಭಟನೆ ನಡೆಸಿದರೆ ಅದು ವಾಹನ ಸಂಚಾರದಲ್ಲಿ ವ್ಯತ್ಯಯಕ್ಕೆ, ಸಾರ್ವಜನಿಕ ಸುವ್ಯವಸ್ಥೆಗೆ ಅಡ್ಡಿಯಾಗುವ ಮತ್ತು ಕಾಲ್ತುಳಿತಕ್ಕೆ ಕಾರಣವಾಗುವ ಸಾಧ್ಯತೆ ಇದೆ ಎಂದು ಪೊಳೀಸರು ಎಚ್ಚರಿಸಿದ್ದರು.

ಆದರೆ ಸಂಜೆ ವೇಳೆ ನಾನು ಏಕಾಂಗಿಯಾಗಿ ಪ್ರತಿಭಟನೆ ನಡೆಸುವೆ ಎಂದು ದೀಪ್ಕೆ ಮನೆಯಿಂದ ಹೊರಗೆ ಕಾಲಿಡುತ್ತಲೇ ಅವರನ್ನು ವಶಕ್ಕೆ ಪಡೆದು ಪೊಲೀಸರು ಕರೆದೊಯ್ದರು.

150ಕ್ಕೂ ಹೆಚ್ಚು ಮಂದಿ ವಶ:

ಮತ್ತೊಂದೆಡೆ ಕನಾಟ್ ಪ್ಲೇಸ್‌ ತಲುಪಿದ್ದ ಪ್ರತಿಭಟನಾಕಾರರನ್ನೂ ಪೊಲೀಸರು ವಶಕ್ಕೆ ಪಡೆಯಲು ಪ್ರಾರಂಭಿಸಿದರು. ‘ಶಾಂತಿ ಮತ್ತು ಕಾನೂನು ಸುವ್ಯವಸ್ಥೆಗೆ ಭಂಗ ತರಲು ಯತ್ನಿಸುತ್ತಿರುವವರನ್ನು ಬಂಧಿಸಲಾಗುತ್ತಿದೆ’ ಎಂದು ತಿಳಿಸಿದ ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು, ಇದುವರೆಗೆ ಸುಮಾರು 150 ಜನರನ್ನು ವಶಕ್ಕೆ ಪಡೆಯಲಾಗಿದೆ ಎಂದು ಸ್ಪಷ್ಟಪಡಿಸಿದ್ದಾರೆ.

ಪ್ರತಿಭಟನೆ:

ಸಿಜೆಪಿ ಪ್ರತಿಭಟನೆಯ ಹಿನ್ನೆಲೆಯಲ್ಲಿ, ರಾಷ್ಟ್ರ ರಾಜಧಾನಿಯಲ್ಲಿ ಭದ್ರತೆಯನ್ನು ತೀವ್ರಗೊಳಿಸಲಾಗಿತ್ತು. ಮುನ್ನೆಚ್ಚರಿಕಾ ಕ್ರಮವಾಗಿ ಕನ್ನಾಟ್ ಪ್ಲೇಸ್‌ನ ಸೆಂಟ್ರಲ್ ಪಾರ್ಕ್ ಸುತ್ತಲೂ ಭದ್ರತಾ ಸಿಬ್ಬಂದಿ ಮಾನವ ಸರಪಳಿ ನಿರ್ಮಿಸಿ ಬಿಗಿ ಭದ್ರತೆ ಒದಗಿಸಿದ್ದರು. ಪೊಲೀಸರು ವಿವಿಧ ಗುಂಪುಗಳಿಗೆ ಘೋಷಣೆಗಳನ್ನು ಕೂಗುತ್ತಾ ಮೆರವಣಿಗೆ ನಡೆಸಲು ಅವಕಾಶ ನೀಡಿದರು. ಸಿಜೆಪಿ ಮತ್ತು ವಿವಿಧ ವಿದ್ಯಾರ್ಥಿ ಸಂಘಟನೆಗಳ ನೂರಾರು ಕಾರ್ಯಕರ್ತರು ಕನ್ನಾಟ್ ಪ್ಲೇಸ್ ಹಾಗೂ ಮಂಡಿ ಹೌಸ್‌ನಲ್ಲಿ ಜಮಾಯಿಸಿ, ಭಾರೀ ಪೊಲೀಸ್ ಬಂದೋಬಸ್ತ್ ನಡುವೆಯೂ ರಾಷ್ಟ್ರಧ್ವಜ ಹಾರಿಸಿ ಸಾಲು ಸಾಲು ಪ್ರತಿಭಟನೆಗಳನ್ನು ನಡೆಸಿದರು.

ಆಪ್‌ನಿಂದಲೂ ತಿರಂಗಾ ರ್‍ಯಾಲಿ:

ಸಿಇಸಿ ಜ್ಞಾನೇಶ್‌ ರಾಜೀನಾಮೆಗೆ ಆಗ್ರಹಿಸಿ, ಆಮ್ ಆದ್ಮಿ ಪಕ್ಷ ಶುಕ್ರವಾರ ರಾಷ್ಟ್ರಪತಿ ಭವನ ಹಾಗೂ ಮಧ್ಯ ದೆಹಲಿಯಲ್ಲಿರುವ ತನ್ನ ಪ್ರಧಾನ ಕಚೇರಿಯ ಬಳಿ ತಿರಂಗಾ ಮೆರವಣಿಗೆ ನಡೆಸಿತು.

30000 ಪೊಲೀಸ್ ನಿಯೋಜನೆ:

ತಿರಂಗಾ ಮೆರವಣಿಗೆಯ ಹಿನ್ನೆಲೆಯಲ್ಲಿ, ದೆಹಲಿಯಲ್ಲಿ 6,000ಕ್ಕೂ ಹೆಚ್ಚು ಪೊಲೀಸ್ ಸಿಬ್ಬಂದಿ, ಕೇಂದ್ರ ಸಶಸ್ತ್ರ ಪೊಲೀಸ್ ಪಡೆಗಳ 220 ತುಕಡಿಗಳನ್ನು (22000) ನಿಯೋಜಿಸಲಾಗಿತ್ತು. ಇತರ ಜಿಲ್ಲೆಗಳಿಂದ ಹೆಚ್ಚುವರಿಯಾಗಿ 5,000 ಸಿಬ್ಬಂದಿಯನ್ನು ಕರೆತರಲಾಗಿತ್ತು. ಸೂಕ್ಷ್ಮ ಪ್ರದೇಶಗಳಲ್ಲಿ ನೂರಾರು ಸಿಸಿಟೀವಿ ಕ್ಯಾಮೆರಾಗಳನ್ನು ಅಳವಡಿಸಲಾಗಿತ್ತು.

- ಇತ್ತೀಚೆಗೆ ಜಂತರ್‌ ಮಂತರ್‌ನಲ್ಲಿ ನಿಷೇಧಾಜ್ಞೆ ಉಲ್ಲಂಘಿಸಿ ತಿರಂಗಾ ಹಾರಿಸಿದ್ದ ಜಿರಳೆ ಪಾರ್ಟಿ

- ಈ ವೇಳೆ ಪಕ್ಷದ ನಾಯಕರಾದ ಸೌರವ್‌ ದಾಸ್‌, ಅಭಿಜೀತ್‌ ರಾಂಕಾರನ್ನು ಬಂಧಿಸಿದ್ದ ಪೊಲೀಸ್‌

- ಇದನ್ನು ಪ್ರತಿಭಟಿಸಿ ಪಕ್ಷದಿಂದ ನಿನ್ನೆ ದೆಹಲಿಯ ಕನಾಟ್‌ ಪ್ಲೇಸ್‌ನಲ್ಲಿ ತ್ರಿವರ್ಣಧ್ವಜ ಯಾತ್ರೆ

- ಯಾತ್ರೆ ನಡೆಸದಂತೆ ಪೊಲೀಸರಿಂದ ದೀಪ್ಕೆ ಮನವೊಲಿಕೆ ಯತ್ನ, ಆದರೆ ಇದಕ್ಕೆ ಒಪ್ಪದ ದೀಪ್ಕೆ

- ಸಂಜೆ ಯಾತ್ರೆಗೆ ಹೊರಟ ದೀಪ್ಕೆ, ನೇಹಾ ಬೋರಾ ಸೇರಿ 150 ಜಿರಳೆ ಬೆಂಬಲಿಗರು ವಶಕ್ಕೆ

- ಕೆಲವೆಡೆ ತಳ್ಳಾಟ-ನೂಕಾಟ ನಿರ್ಮಾಣ. ಇದರ ನಡುವೆ ಕೈಯಲ್ಲಿ ತ್ರಿರಂಗಾ ಹಿಡಿದು ಮೆರವಣಿಗೆ

- ತ್ರಿವರ್ಣಧ್ವಜ ಹಾರಿಸುವುದೂ ಅಪರಾಧವೆ?: ಜಿರಳೆ ನಾಯಕರು, ವಿಪಕ್ಷ ನಾಯಕರ ಆಕ್ರೋಶ

ಜ್ಞಾನೇಶ್‌ ಪರ ಮೋದಿಗೆ ಯಾಕಿಷ್ಟು ಕಾಳಜಿ?: ದೀಪ್ಕೆ

Sujatha NR — Fri, 16 Oct 2026 13:13:42 +0530

ನವದೆಹಲಿ: ‘ಸಿಇಸಿ ಜ್ಞಾನೇಶ್ ಕುಮಾರ್‌ ಪ್ರಧಾನಿ ಮೋದಿಯವರಿಗೆ ಏನು ಕೊಡುತ್ತಾರೆ? ಏಕೆ ಅವರ ಪರ ಅಷ್ಟು ಕಾಳಜಿ? ಒಂದು ವೇಳೆ ಅವರು ಚುನಾವಣೆಯಲ್ಲಿ ಗೆಲ್ಲಲು ಸಹಾಯ ಮಾಡುತ್ತಿಲ್ಲ ಎಂದಾದರೆ, ಮೋದಿಯವರು ಜ್ಞಾನೇಶ್‌ಗೆ ಇಷ್ಟೊಂದು ಭದ್ರತೆಯನ್ನು ಏಕೆ ಒದಗಿಸುತ್ತಿದ್ದಾರೆ?’ ಎಂದು ಸಿಜೆಪಿ ಸ್ಥಾಪಕ ಅಭಿಜೀತ್‌ ದೀಪ್ಕೆ ಗುರುವಾರ ಪ್ರಶ್ನಿಸಿದ್ದಾರೆ.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ‘ತ್ರಿವರ್ಣ ಧ್ವಜ ಹಾರಿಸುವುದನ್ನು ಸರ್ಕಾರ ಕಾನೂನು ಉಲ್ಲಂಘನೆ ಎಂದು ಕರೆದಿದೆ. ಅದು ದೆಹಲಿಯನ್ನು ಸ್ತಬ್ಧಗೊಳಿಸಿದೆ. ರೈಲ್ವೆ ಮತ್ತು ಮೆಟ್ರೋ ಸೇವೆಯನ್ನು ನಿಲ್ಲಿಸಿದೆ. ದೆಹಲಿಯನ್ನು ಭಾರತ-ಪಾಕಿಸ್ತಾನ ಗಡಿಯಂತೆ ಒಂದು ಗಡಿಯನ್ನಾಗಿ ಪರಿವರ್ತಿಸಿದೆ. ಎಲ್ಲಾ ಭದ್ರತಾ ಪಡೆಗಳನ್ನು ದೆಹಲಿಗೆ ಕರೆಸಿಕೊಂಡಿದ್ದು, ವಿದ್ಯಾರ್ಥಿ ಸಂಘಟನೆಗಳನ್ನು, ವಿರೋಧ ಪಕ್ಷದವರನ್ನು ಹಾಗೂ ಮಾಜಿ ಮುಖ್ಯಮಂತ್ರಿಗಳನ್ನು ಬೀದಿಗಳಲ್ಲಿ ಎಳೆದಾಡಲಾಗಿದೆ’ ಎಂದು ಕಿಡಿ ಕಾರಿದರು.

‘ಇಷ್ಟೆಲ್ಲಾ ಕೇವಲ ಒಬ್ಬ ಜ್ಞಾನೇಶ್ ಕುಮಾರ್‌ಗಾಗಿ ನಡೆಯುತ್ತಿದೆಯೇ?

‘ಇಷ್ಟೆಲ್ಲಾ ಕೇವಲ ಒಬ್ಬ ಜ್ಞಾನೇಶ್ ಕುಮಾರ್‌ಗಾಗಿ ನಡೆಯುತ್ತಿದೆಯೇ? ನರೇಂದ್ರ ಮೋದಿಯವರಿಗೆ ಜ್ಞಾನೇಶ್ ಅಷ್ಟೊಂದು ಮುಖ್ಯ ಏಕೆ? ಜ್ಞಾನೇಶ್ ಅವರು ಮೋದಿಯವರಿಗೆ ಚುನಾವಣೆಗಳಲ್ಲಿ ಗೆಲ್ಲಲು ಸಹಾಯ ಮಾಡುತ್ತಿದ್ದಾರೆ ಎಂದು ನಾವೇಕೆ ನಂಬಬಾರದು? ಒಂದು ವೇಳೆ ಅವರು ಚುನಾವಣೆಯಲ್ಲಿ ಗೆಲ್ಲಲು ಸಹಾಯ ಮಾಡುತ್ತಿಲ್ಲ ಎಂದಾದರೆ, ಮೋದಿಯವರು ಅವರಿಗೆ ಇಷ್ಟೊಂದು ಭದ್ರತೆಯನ್ನು ಏಕೆ ಒದಗಿಸುತ್ತಿದ್ದಾರೆ?’ ಎಂದು ಪ್ರಶ್ನಿಸಿದರು.

ಸಭೆ ಮಧ್ಯೆ ‘ಇಲ್ಲಿಂದ ತೊಗಲಿ’ ಕೂಗು:

ಗುರುವಾರ ನಡೆದ ದೀಪ್ಕೆ ಮತ್ತು ಅಖಿಲ ಭಾರತ ವಿದ್ಯಾರ್ಥಿ ಸಂಘದ ಅಧ್ಯಕ್ಷೆ ನೇಹಾ ಬೋರಾ ಅವರ ಜಂಟಿ ಪತ್ರಿಕಾಗೋಷ್ಠಿಯಲ್ಲಿ ಗೊಂದಲದ ವಾತಾವರಣ ನಿರ್ಮಾಣವಾಯಿತು.

ಪತ್ರಿಕಾಗೋಷ್ಠಿಯಲ್ಲಿದ್ದ ಕೆಲವರು ‘ಬಂದ್ ಕರೋ... ದಫಾ ಹೋ ಜಾವೋ’ (ಇದನ್ನು ನಿಲ್ಲಿಸಿ... ಇಲ್ಲಿಂದ ತೊಲಗಿ) ಎಂದು ಕೂಗಿದರು. ತಕ್ಷಣ ನೇಹಾ ಬೋರಾ, ಗೊಂದಲ ಸೃಷ್ಟಿಸುತ್ತಿದ್ದವರನ್ನು ಹೊರಗೆ ಕರೆದೊಯ್ಯುವಂತೆ ಆಯೋಜಕರನ್ನು ಕೋರಿದರು.

ರಾತ್ರಿಯೇ ಹಗಲನ್ನು ಬಾಡಿಗೆ ಪಡೀರಿ!

Sujatha NR — Sat, 17 Oct 2026 11:21:27 +0530

ವಾಷಿಂಗ್ಟನ್‌: ರಾತ್ರಿ ಹೊತ್ತಿನಲ್ಲೂ ಭೂಮಿಗೆ ಸೂರ್ಯನ ಬೆಳಕನ್ನು ನೀಡುವ ಮಹತ್ವಾಕಾಂಕ್ಷಿ ಯೋಜನೆಯೊಂದನ್ನು ಅಮೆರಿಕ ಮೂಲದ ರಿಫ್ಲೆಕ್ಟ್‌ ಆರ್ಬಿಟಲ್‌ ಕಂಪನಿ ರೂಪಿಸಿದೆ. ಗಂಟೆ, ದಿನದ ಲೆಕ್ಕದಲ್ಲಿ ಸೂರ್ಯನ ಬೆಳಕನ್ನು ಬಾಡಿಗೆ ನೀಡುವ ಈ ಯೋಜನೆಗೆ ಅಗತ್ಯವಾದ ಉಪಗ್ರಹ ಹಾರಿಸುವ ಹಕ್ಕನ್ನು ಅಮೆರಿಕ ಕಂಪನಿ ಹೈದರಾಬಾದ್‌ ಮೂಲದ ಸ್ಕೈರೂಟ್‌ ಕಂಪನಿಗೆ ವಹಿಸಿದೆ.

ಕ್ಯಾಲಿಫೋರ್ನಿಯಾ ಮೂಲದ ರಿಫ್ಲೆಕ್ಟ್‌ ಆರ್ಬಿಟಲ್‌, ಕಂಪನಿಯು ಭೂಕಕ್ಷೆಯಲ್ಲಿ ಹಲವು ಉಪಗ್ರಹಗಳನ್ನು ಹಾರಿಬಿಟ್ಟು ಬೃಹತ್‌ ಪ್ರತಿಫಲಿಸುವ ಫಲಕಗಳ ಮೂಲಕ ಸೂರ್ಯನ ಬೆಳಕನ್ನು ಬಳಸಿಕೊಂಡು ಬೇಡಿಕೆ ಆಧಾರದ ಮೇಲೆ ರಾತ್ರಿ ಹೊತ್ತಲ್ಲೂ ಸೂರ್ಯನ ಬೆಳಕು ಒದಗಿಸಲಿದೆ. ರಾತ್ರಿ ವೇಳೆ ಸಂಭವಿಸುವ ದುರಂತ, ಪ್ರಾಕೃತಿಕ ವಿಕೋಪಗಳಂಥ ಸಂದರ್ಭದಲ್ಲಿ ಹುಡುಕಾಟ ಕಾರ್ಯಾಚರಣೆ ಸೇರಿ ಹಲವು ಉದ್ದೇಶಗಳಿಗೆ ಇದರಿಂದ ಅನುಕೂಲ ಆಗಲಿದೆ ಎಂದು ಕಂಪನಿ ತಿಳಿಸಿದೆ.

ವಿಕ್ರಂ ರಾಕೆಟ್‌ ಬಳಸಿ 2 ಉಪಗ್ರಹ ಉಡ್ಡಯನ:

ಈ ಸಂಬಂಧ ಭಾರತದಲ್ಲಿ ಮೊದಲ ಬಾರಿ ಖಾಸಗಿ ರಾಕೆಟ್‌ನ ಯಶಸ್ವಿ ಪ್ರಯೋಗ ನಡೆಸಿರುವ ಹೈದರಾಬಾದ್‌ ಮೂಲದ ಸ್ಕೈರೂಟ್‌ ಏರೋಸ್ಪೇಸ್‌ ಜತೆಗೆ ಕಂಪನಿಯು ಒಪ್ಪಂದ ಮಾಡಿಕೊಂಡಿದೆ. ಸ್ಕೈರೂಟ್‌ನ ವಿಕ್ರಂ ರಾಕೆಟ್‌ ಬಳಸಿಕೊಂಡು ಕಂಪನಿಯು ಎರಡು ಉಪಗ್ರಹಗಳನ್ನು ನಭದಲ್ಲಿ ಕೂರಿಸಲಿದೆ.

ಬಾಹ್ಯಾಕಾಶ ತಂತ್ರಜ್ಞಾನವನ್ನು ವಿನೂತನ ರೀತಿಯಲ್ಲಿ ಬಳಸಿಕೊಂಡು ಭೂಮಿಯಲ್ಲಿ ಹೊಸ ಸಾಧ್ಯತೆಗಳಿಗೆ ಮುನ್ನುಡಿ ಬರೆಯುತ್ತಿರುವ ರಿಫ್ಲೆಕ್ಟ್‌ ಆರ್ಬಿಟಲ್‌ ಸಂಸ್ಥೆ ಜತೆ ಒಪ್ಪಂದಕ್ಕೆ ನಾವು ತೀವ್ರ ಉತ್ಸುಕರಾಗಿದ್ದೇವೆ ಎಂದು ಸ್ಕೈರೂಟ್‌ ಏರೋಸ್ಪೇಸ್‌ ಸಿಇಒ ಪವನ್‌ ಚಂದನ್‌ ಅವರು ಸಾಮಾಜಿಕ ಜಾಲತಾಣ ಎಕ್ಸ್‌ನಲ್ಲಿ ಪೋಸ್ಟ್‌ ಮಾಡಿದ್ದಾರೆ.

5 ಕಿ.ಮೀ. ವರೆಗೆ ಬೆಳಕು:

ಐದು ಕಿ.ಮೀ. ವ್ಯಾಪ್ತಿಯಲ್ಲಿ ಯಾವಾಗ ಬೇಕಿದ್ದರೂ ಸೂರ್ಯನ ಬೆಳಕನ್ನು ಎಷ್ಟು ಬೇಕೋ, ಅಷ್ಟು ಪ್ರತಿಫಲಿಸುವ ರೀತಿ ಸೇವೆಯನ್ನು ಕಂಪನಿ ನೀಡಲಿದೆ. ರಕ್ಷಣಾ ಕಾರ್ಯಾಚರಣೆ, ಕೈಗಾರಿಕಾ ವಲಯಗಳಲ್ಲಿನ ಕೆಲಸದ ಅವಧಿ ವಿಸ್ತರಣೆ, ಸಾರ್ವಜನಿಕ ಕಾರ್ಯಕ್ರಮಗಳು, ರಾತ್ರಿ ಹೊತ್ತಲ್ಲೂ ರಕ್ಷಣಾ ಕಾರ್ಯಕ್ಕೆ ನೆರವು, ಸೋಲಾರ್‌ ಪಾರ್ಕ್‌ಗಳಿಂದ ರಾತ್ರಿ ಹೊತ್ತೂ ವಿದ್ಯುತ್‌ ಉತ್ಪಾದನೆಗೆ ಈ ಸೇವೆ ಬಳಸಿಕೊಳ್ಳಬಹುದಾಗಿದೆ ಎಂದು ಸಂಸ್ಥೆ ಹೇಳಿಕೊಂಡಿದೆ.

ಉದ್ದೇಶ ಏನು?

- ಸೂರ್ಯನ ಬೆಳಕು ಪ್ರತಿಫಲಿಸಲು ಹಲವು ವಿಶೇಷ ಉಪಗ್ರಹಗಳ ಉಡಾವಣೆ

- ಸೂರ್ಯನ ಬೆಳಕನ್ನು ಬಳಸಿ ರಾತ್ರಿ ಹೊತ್ತಿನಲ್ಲಿ ಇವುಗಳಿಂದ ಪ್ರಖರ ಪ್ರತಿಫಲನ

- ರಾತ್ರಿ ವೇಳೆ ದುರಂತ, ಪ್ರಾಕೃತಿಕ ವಿಕೋಪಗಳ ಸಂದರ್ಭದಲ್ಲಿ ಬೆಳಕು ಬಳಕೆ

- ಹುಡುಕಾಟ ಕಾರ್ಯಾಚರಣೆ ಸೇರಿ ಹಲವು ಉದ್ದೇಶಗಳಿಗೆ ಇದರಿಂದ ಅನುಕೂಲ

- 5 ಕಿ.ಮೀ. ವ್ಯಾಪ್ತಿಯಲ್ಲಿ ರಾತ್ರಿ ಬೀಳುವ ಬೆಳಕಿನಿಂದ ಶೋಧ ಕಾರ್ಯ ಸರಾಗ

- ಸೌರ ಪಾರ್ಕ್‌ಗಳು ರಾತ್ರಿ ವಿದ್ಯುತ್‌ ಉತ್ಪಾದನೆಗೂ ಇದನ್ನು ಬಳಸಬಹುದು

ಟೋಲ್‌ ಪ್ಲಾಜಾದಲ್ಲಿ ಕೊಳಕು ಶೌಚ ಹುಡುಕಿ ₹1000 ಗೆಲ್ಲಿ!

Sujatha NR — Sun, 18 Oct 2026 08:18:59 +0530

ನವದೆಹಲಿ: ರಾಷ್ಟ್ರೀಯ ಹೆದ್ದಾರಿ ವ್ಯಾಪ್ತಿಯ ಟೋಲ್‌ ಪ್ಲಾಜಾಗಳಲ್ಲಿ ಶೌಚಾಲಯ ಗಬ್ಬೆದ್ದು ನಾರುತ್ತಿದೆಯೇ? ಶುಚಿತ್ವದ ಕೊರತೆ ಎದುರಿಸುತ್ತಿದೆಯೇ? ಹಾಗಿದ್ರೆ ತಕ್ಷಣ ಅದರ ಫೋಟೋ ತೆಗೆದು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (ಎನ್‌ಎಚ್‌ಎಐ)ಕ್ಕೆ ಕಳುಹಿಸಿಕೊಟ್ಟು 1 ಸಾವಿರ ರು. ಮೌಲ್ಯದ ಉಚಿತ ಫಾಸ್ಟ್ಯಾಗ್‌ ಗೆಲ್ಲಿ!

ಟೋಲ್‌ ಪ್ಲಾಜಾಗಳ ಶೌಚಾಲಯಗಳ ಸುಧಾರಣೆಗಾಗಿ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರವು ಸಾರ್ವಜನಿಕರ ಮುಂದೆ ಇಂಥದ್ದೊಂದು ಆಫರ್‌ ಮುಂದಿಟ್ಟಿದೆ. ಇದಕ್ಕಾಗಿ ರಾಷ್ಟ್ರಾದ್ಯಂತ ‘ಸ್ವಚ್ಛ ಶೌಚಾಲಯ ಫೋಟೋ ಚಾಲೆಂಜ್‌’ ಘೋಷಿಸಿದೆ.

ರಸ್ತೆ ಸಾರಿಗೆ ಮತ್ತು ಹೆದ್ದಾರಿಗಳ ಸಚಿವಾಲಯದ ಪ್ರಕಾರ, ಪ್ರಯಾಣಿಕರು ರಾಜ್‌ಮಾರ್ಗ್ ಯಾತ್ರಾ ಆ್ಯಪ್‌ ಬಳಸಿ ಶೌಚಾಲಯದ ಫೋಟೋಗಳನ್ನು ಜಿಯೋ ಟ್ಯಾಗ್‌ ಮಾಡಿ ಅಪ್ಲೋಡ್‌ ಮಾಡಬೇಕು. ಇದರ ಜತೆಗೆ ಪ್ರಯಾಣಿಕರು ತಮ್ಮ ಹೆಸರು, ಸ್ಥಳ, ವಾಹನ ನೋಂದಣಿ ಸಂಖ್ಯೆ ಮತ್ತು ಮೊಬೈಲ್‌ ಸಂಖ್ಯೆಯನ್ನೂ ದಾಖಲಿಸಬೇಕು.

1 ಸಾವಿರ ರು. ಮೌಲ್ಯದ ಫಾಸ್ಟ್ಯಾಗ್‌ ಅನ್ನು ಉಚಿತವಾಗಿ ರೀಚಾರ್ಜ್‌

ಪ್ರಯಾಣಿಕರ ವರದಿ ನಿಜವಾಗಿದ್ದರೆ ಅವರ ವಾಹನಕ್ಕೆ 1 ಸಾವಿರ ರು. ಮೌಲ್ಯದ ಫಾಸ್ಟ್ಯಾಗ್‌ ಅನ್ನು ಉಚಿತವಾಗಿ ರೀಚಾರ್ಜ್‌ ಮಾಡಲಾಗುತ್ತದೆ. ಈ ಚಾಲೆಂಜ್‌ ಅ.31ರ ವರೆಗೆ ಜಾರಿಯಲ್ಲಿರಲಿದ್ದು, ದೇಶಾದ್ಯಂತ ಎಲ್ಲಾ ರಾಷ್ಟ್ರೀಯ ಹೆದ್ದಾರಿಗಳಿಗೂ ಅನ್ವಯ ಆಗಲಿದೆ.

ಪ್ರತಿ ವಾಹನಕ್ಕೆ ಒಂದು ಬಾರಿ ಅಷ್ಟೇ ರೀಚಾರ್ಜ್‌ ಮತ್ತು ಪ್ರತಿ ದಿನ ನಿರ್ದಿಷ್ಟ ಶೌಚಾಲಯದ ವಿರುದ್ಧದ ಒಂದು ದೂರನ್ನಷ್ಟೇ ಪರಿಗಣಿಸಲಾಗುತ್ತದೆ. ಒಂದು ವೇಳೆ ಒಂದೇ ಶೌಚಾಲಯಗಳ ಕುರಿತು ಹಲವು ದೂರು ಬಂದಿದ್ದರೆ ಮೊದಲ ದೂರನ್ನಷ್ಟೇ ಪರಿಗಣಿಸಲಾಗುತ್ತದೆ. ನಕಲಿ ಹಾಗೂ ಎಡಿಟ್‌ ಮಾಡಲಾದ ಅಥವಾ ಈ ಹಿಂದೆ ಸಲ್ಲಿಸಿದ ಫೋಟೋಗಳನ್ನು ತಿರಸ್ಕರಿಸಲಾಗುತ್ತದೆ. ಎಐ ಆಧಾರಿತ ಸ್ಕ್ರೀನಿಂಗ್‌ ಹಾಗೂ ವೈಯಕ್ತಿಕ ಪರಿಶೀಲನೆ ಯಾವುದು ಸಾಧ್ಯವೋ ಆ ವಿಧಾನದ ಮೂಲಕ ಪರಿಶೀಲಿಸಲಾಗುತ್ತದೆ ಎಂದು ಸಚಿವಾಲಯವು ತಿಳಿಸಿದೆ.

ಏನಿದು ಸ್ಕೀಂ?

- ಟೋಲ್‌ ಪ್ಲಾಜಾಗಳ ಶೌಚಾಲಯ ನಾರುತ್ತಿದ್ದರೆ ಫೋಟೋ ತೆಗೆಯಬೇಕು

- ರಾಜ್‌ಮಾರ್ಗ ಆ್ಯಪ್‌ನಲ್ಲಿ ಜಿಯೋ ಟ್ಯಾಗ್‌ ಮಾಡಿ ಅಪ್‌ಲೋಡ್‌ ಮಾಡಬೇಕು

- ಹೆಸರು, ಸ್ಥಳ, ವಾಹನ ಸಂಖ್ಯೆ, ಮೊಬೈಲ್‌ ಸಂಖ್ಯೆಯನ್ನೂ ನಮೂದಿಸಬೇಕು

- ವರದಿ ನಿಜವಾಗಿದ್ದರೆ 1000 ರು. ಮೌಲ್ಯದ ಫಾಸ್ಟ್ಯಾಗ್‌ ರೀಚಾರ್ಜ್‌ ಉಚಿತ