ಇಡೀ ಜಗತ್ತಿನಲ್ಲಿ ಪಶ್ಚಿಮ ಘಟ್ಟಗಳ ಶರಾವತಿ ಕಣಿವೆಯ ಹಳ್ಳವೊಂದರಲ್ಲಿ ಮಾತ್ರ ಇರುವ ‘ಕುಂಬಾರ’ ಎಂಬ ವಿಶಿಷ್ಟ ಕಪ್ಪೆ ಪ್ರಭೇದದ ಕುರಿತ ಮ್ಯೂಸಿಕಲ್ ಸಾಕ್ಷ್ಯಚಿತ್ರ ‘ಕಪ್ಪೆರಾಗ’. ಪ್ರಶಾಂತ್ ಎಸ್ ನಾಯಕ ಈ ಸಿನಿಮಾದ ನಿರ್ದೇಶಕ ಹಾಗೂ ಛಾಯಾಗ್ರಾಹಕ. ಬೆಂಗಳೂರಿನ ಪ್ರೆಸ್ಟೀಜ್ ಶ್ರೀಹರಿ ಖೋಡೆ ಸೆಂಟರ್ ಫಾರ್ ಪರ್ಫಾಮಿಂಗ್ ಆರ್ಟ್ಸ್ ಸಭಾಂಗಣದಲ್ಲಿ ಮಾ.16 ಸಂಜೆ 4 ಗಂಟೆಗೆ ನಡೆಯುವ ಕಾರ್ಯಕ್ರಮದಲ್ಲಿ ಈ ಕಿರುಚಿತ್ರ ಬಿಡುಗಡೆಯಾಗಲಿದೆ. ಇತ್ತೀಚೆಗೆ ನಡೆದ ಸುದ್ದಿಗೋಷ್ಠಿಯಲ್ಲಿ ನಿರ್ದೇಶಕ ಪ್ರಶಾಂತ್, ‘ಕಪ್ಪೆರಾಗ’ ಎಂಬ ಆರು ನಿಮಿಷಗಳ ಡಾಕ್ಯುಮೆಂಟರಿ ಹಿಂದಿರುವ ನಾಲ್ಕೈದು ವರ್ಷಗಳ ಪರಿಶ್ರಮದ ಕಥೆ ಹೇಳಿದರು. ನಿರ್ಮಾಪಕ ಹಾಗೂ ಹಾಡು ಬರೆದ ಪ್ರದೀಪ್ ಕೆ ಶಾಸ್ತ್ರಿ, ಸಂಗೀತ ನಿರ್ದೇಶಕ ಅಶ್ವಿನ್ ಪಿ ಕುಮಾರ್, ಈ ಸಾಕ್ಷ್ಯಚಿತ್ರದಲ್ಲಿ ಹಾಡಿದ ಅರುಂಧತಿ ವಸಿಷ್ಠ ಹಾಗೂ ಚಿತ್ರತಂಡದವರು ಸುದ್ದಿಗೋಷ್ಠಿಯಲ್ಲಿದ್ದರು.