ಮುಂಬೈನಲ್ಲಿ ವಿಮಾನ ಡಿಕ್ಕಿಯಾಗಿ 40 ಫ್ಲೆಮಿಂಗೋ ಸಾವು: ಆಕ್ರೋಶ

ಮುಂಬೈ: ವಿಮಾನ ಡಿಕ್ಕಿಯಾಗಿ 40 ಫ್ಲೆಮಿಂಗೋ ಹಕ್ಕಿಗಳು ಸಾವನ್ನಪ್ಪಿದ ಆಘಾತಕಾರಿ ಘಟನೆ ಸೋಮವಾರ ಸಂಜೆ ಇಲ್ಲಿನ ಘಾಟ್ಕೋಪರ್‌ ಪ್ರದೇಶದಲ್ಲಿ ನಡೆದಿದೆ. ಘಟನೆ ಕುರಿತು ಅರಣ್ಯ ಇಲಾಖೆ ತನಿಖೆ ಆರಂಭಿಸಿದೆ.

ಪ್ರತಿ ವರ್ಷ ಗುಜರಾತ್‌ನಿಂದ 1 ಲಕ್ಷದಷ್ಟು ಪ್ಲೆಮಿಂಗೋಗಳು ಮುಂಬೈನ ಥಾಣೆ ಸಮೀಪದ ಪ್ಲೆಮಿಂಗೋ ಪಕ್ಷಿ ತಾಣಕ್ಕೆ ಬಂದು ನೆಲೆಸುತ್ತವೆ. ಅಲ್ಲಿಂದ ಮರಳಿ ಗುಜರಾತ್‌ಗೆ ಸಂಚರಿಸುತ್ತವೆ. ಆಗ ಈ ಘಟನೆ ನಡೆದಿದೆ.ಇದೇ ವೇಳೆ ಗೊತ್ತುಗುರಿಯಲ್ಲದ ನಗರೀಕರಣವು, ವಲಸೆ ಹಕ್ಕಿಗಳ ಆವಾಸ ಸ್ಥಾನವನ್ನೇ ಹಾಳು ಮಾಡುತ್ತಿರುವುದಲ್ಲದೇ ಅವುಗಳ ಪ್ರಾಣಕ್ಕೂ ಸಂಚಾರ ತರತೊಡಗಿದೆ ಎಂದು ಪರಿಸರ ತಜ್ಞರು ಮತ್ತು ಪ್ರಾಣಿ ಪ್ರೇಮಿಗಳು ಘಟನೆ ಕುರಿತು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಅಲ್ಲದೆ ನವಿ ಮುಂಬೈನಲ್ಲಿ ನಿರ್ಮಿಸಲು ಉದ್ದೇಶಿಸಲಾಗಿರುವ ಹೊಸ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಕೂಡಾ ಮುಂದಿನ ದಿನಗಳಲ್ಲಿ ಇಂಥದ್ದೇ ಘಟನೆಗಳಿಗೆ ಕಾರಣವಾಗಲಿದೆ ಎಂದು ಎಚ್ಚರಿಸಿದ್ದಾರೆ.ವಿಮಾನ ಡಿಕ್ಕಿ:

ಮುಂಬೈನಿಂದ ಗುಜರಾತ್‌ನತ್ತ ತೆರಳುತ್ತಿದ್ದ ಪ್ಲೆಮಿಂಗೋಗಳ ಗುಂಪಿಗೆ ಸೋಮವಾರ ಸಂಜೆ ಮುಂಬೈ ವಿಮಾನ ನಿಲ್ದಾಣಕ್ಕೆ ಬಂದಿಳಿಯುತ್ತಿದ್ದ ಎಮಿರೇಟ್ಸ್‌ ಸಂಸ್ಥೆಯ ವಿಮಾನವೊಂದು ಡಿಕ್ಕಿ ಹೊಡೆದಿದೆ. ಡಿಕ್ಕಿಯ ಪರಿಣಾಮ ವಿಮಾನಕ್ಕೆ ಯಾವುದೇ ತೊಂದರೆಯಾಗದೇ ಸುರಕ್ಷಿತವಾಗಿ ನಿಲ್ದಾಣದಲ್ಲಿ ಬಂದಿಳಿಯಿತಾದರೂ, ಕನಿಷ್ಠ 40 ಹಕ್ಕಿಗಳು ಡಿಕ್ಕಿಯ ರಭಸಕ್ಕೆ ಸಾವನ್ನಪ್ಪಿ ಕೆಳಗೆ ಉರುಳಿಬಿದ್ದಿವೆ. ಘಾಟ್ಕೋಪರ್‌ನ ಲಕ್ಷ್ಮೀನಗರದ ಸುತ್ತಮುತ್ತಲ ಪ್ರದೇಶಗಳಲ್ಲಿ ರಕ್ತಸಿಕ್ತ ಸ್ಥಿತಿಯಲ್ಲಿ ಹಕ್ಕಿಗಳು ಕೆಳಗೆ ಉರುಳಿ ಬಿದ್ದಿದ್ದನ್ನು ಸ್ಥಳೀಯರು ಪತ್ತೆ ಹಚ್ಚಿದ ಬಳಿಕ ಪ್ರಕರಣ ಬೆಳಕಿಗೆ ಬಂದಿದೆ. ಬಳಿಕ ವಿಮಾನಗಳನ್ನು ಪರಿಶೀಲಿಸಿದಾಗ ಎಮಿರೇಟ್ಸ್‌ ವಿಮಾನ ಡಿಕ್ಕಿ ಹೊಡೆದಿದ್ದು ಪತ್ತೆಯಾಗಿದ್ದು, ಅದನ್ನು ಮುಂದಿನ ಸಂಚಾರ ಮಾಡದಂತೆ ತಡೆಹಿಡಿಯಲಾಗಿದೆ. ಆದರೆ ವಿಮಾನ ಪ್ರಯಾಣಿಕರಿಗೆ ಏನೂ ಆಗಿಲ್ಲ.