ಕೋವಿಡ್ ಬಳಿಕ ಕಾರು ಖರೀದಿಗೆ ವರ್ಷಗಟ್ಟಲೆ ಕಾಯುವ ಪರಿಸ್ಥಿತಿ : ಮಾರಾಟಕ್ಕೆ ಕಾದಿವೆ ₹73,000 ಕೋಟಿ ಮೌಲ್ಯದ 7 ಲಕ್ಷ ಕಾರು!

ನವದೆಹಲಿ: ಕೋವಿಡ್ ಬಳಿಕ ಕಾರು ಖರೀದಿಗೆ ವರ್ಷಗಟ್ಟಲೆ ಕಾಯುವ  ಪರಿಸ್ಥಿತಿ ನಿರ್ಮಾಣವಾಗಿ ಗ್ರಾಹಕರು ಬೇಸತ್ತಿದ್ದರೆ, ಇದೀಗ ಗ್ರಾಹಕರಿಲ್ಲದೇ ಕಂಪನಿಗಳು ಕಂಗಾಲಾಗುವ ಸ್ಥಿತಿ ನಿರ್ಮಾಣವಾಗಿದೆ. ದೇಶದ ವಿವಿಧ ಭಾಗಗಳ ಶೋರೂಂಗಳಲ್ಲಿ ಹಾಲಿ 73000 ಕೋಟಿ ರು. ಮೌಲ್ಯದ 7.3 ಲಕ್ಷ ಕಾರುಗಳು ಇನ್ನು ಮಾರಾಟಕ್ಕೆ ಕಾದಿವೆ ಫೆಡರೇಷನ್‌ ಆಫ್‌ ಅಟೋಮೊಬೈಲ್‌ ಡೀಲರ್ಸ್‌ ಅಸೋಸಿಯೇಷನ್‌ (ಎಫ್‌ಎಡಿಎ) ಹೇಳಿದೆ. 

ಈ ಬಗ್ಗೆ ಮಾಹಿತಿ ಹಂಚಿಕೊಂಡಿರುವ ಎಫ್‌ಎಡಿಎ, ದೇಶದ ಮೊದಲಾರ್ಧದಲ್ಲಿ ಲೋಕಸಭೆ ಚುನಾವಣೆ, ಹವಾಮಾನ ವೈಪರೀತ್ಯ, ಮಳೆ ಕಾರಣ ಜನತೆ ಕಾರು ಖರೀದಿಯಿಂದ ಹಿಂದೆ ಸರಿದಿದ್ದರು. ಇದರ ಜೊತೆಗೆ ಕಂಪನಿಗಳು ಹೊಸ ಹೊಸ ಮಾದರಿ ಬಿಡುಗಡೆ ಮಾಡುತ್ತಿರುವ ಕಾರಣ ಹಳೆಯ ಕಾರುಗಳು ಮಾರಾಟವಾಗದೇ ಹಾಗೆಯೇ ಉಳಿದುಕೊಂಡಿದೆ.

ಸಾಮಾನ್ಯವಾಗಿ ಸರಾಸರಿ 65-67 ದಿನದವರೆಗೆ ಪೂರೈಕೆಗೆ ಸಾಕಾಗುಷ್ಟಿದ್ದ ಕಾರು ಶೋರೂಂ ಅಥವಾ ಸಗಟು ಮಾರಾಟಗರರ ಬಳಿ ಇರುತ್ತದೆ. ಇದೀಗ ಈ ಪ್ರಮಾಣ 70-75 ದಿನದವರೆಗೆ ಏರಿಕೆ. ಇದೇ ಗತಿ ಮುಂದುವರೆದರೆ ಕಾರು ಉತ್ಪಾದನಾ ಕಂಪನಿಗಳು, ಮಾರಾಟಗಾರರು ಸಂಕಷ್ಟ ಎದುರಿಸಬೇಕಾಗಿ ಬರುತ್ತದೆ ಎಂದು ಎಫ್‌ಎಡಿಎ ಹೇಳಿದೆ.