17000 ಕೋಟಿ ಅಕ್ರಮ:ಅನಿಲ್‌ ಅಂಬಾನಿಗೆ10 ಗಂಟೆ ಇ.ಡಿ. ಬಿಸಿ

ನವದೆಹಲಿ: 17,000 ಕೋಟಿ ರು. ಸಾಲ ಅಕ್ರಮಕ್ಕೆ ಸಂಬಂಧಿಸಿದಂತೆ ಮುಕೇಶ್‌ ಅಂಬಾನಿ ಅವರ ಸೋದರ ಅನಿಲ್‌ ಅಂಬಾನಿ ಅವರು ಮಂಗಳವಾರ ಜಾರಿ ನಿರ್ದೇಶನಾಲಯ (ಇ.ಡಿ) ಎದುರು ಹಾಜರಾದರು. ಅವರನ್ನು 10 ಗಂಟೆಗಳ ಕಾಲ ಇ.ಡಿ. ಅಧಿಕಾರಿಗಳು ವಿಚಾರಣೆ ನಡೆಸಿದರು. ಬೆಳಗ್ಗೆ 10:50ಕ್ಕೆ ದೆಹಲಿಯ ಇ.ಡಿ. ಕಚೇರಿಗೆ ಹಾಜರಾದ ಅನಿಲ್‌ ರಾತ್ರಿ 9 ಗಂಟೆಯವರೆಗೂ ಹಾಜರಿದ್ದು ತಮ್ಮ ಹೇಳಿಕೆ ದಾಖಲಿಸಿದರು. ಅನಿಲ್ ಅಂಬಾನಿ ಅವರು ತಮ್ಮ ರಿಲಯನ್ಸ್‌ ಇನ್‌ಫ್ರಾಸ್ಟ್ರಕ್ಚರ್‌ ಸೇರಿದಂತೆ ಹಲವು ಕಂಪನಿಗಳಿಗೆ ಸಾಲ ಪಡೆದು ಅದನ್ನು ಬೇರೆ ಬೇರೆ ಕಂಪನಿಗಳಿಗೆ ಅಕ್ರಮವಾಗಿ ವರ್ಗಾಯಿಸಿದ ಆರೋಪ ಎದುರಿಸುತ್ತಿದ್ದಾರೆ. ಜೊತೆಗೆ ಯಸ್‌ ಬ್ಯಾಂಕ್‌ನಿಂದ ಸಾಲ ಪಡೆಯಲು ಲಂಚ ನೀಡಿದ ಅರೋಪವೂ ಅವರ ಮೇಲಿದೆ. ಅನಿಲ್‌ ವಿರುದ್ಧ ಇತ್ತೀಚೆಗೆ ಇ.ಡಿ. ಲುಕೌಟ್‌ ನೋಟಿಸ್‌ ಜಾರಿ ಮಾಡಿತ್ತು.