ಮುಸುಕುಧಾರಿಗಳ ಗುಂಪೊಂದು ನುಗ್ಗಿ ಹಗಲು ದರೋಡೆ- ತನಿಷ್ಕ್ ಶೋರೂಂನಲ್ಲಿ ₹25 ಕೋಟಿ ಚಿನ್ನ ಲೂಟಿ

ಆರಾ (ಬಿಹಾರ): ಬಿಹಾರದ ಆರಾದ ಗೋಪಾಲಿ ಚೌಕ್‌ನಲ್ಲಿರುವ ತನಿಷ್ಕ್ ಶೋ ರೂಂಗೆ ಸೋಮವಾರ ಮುಸುಕುಧಾರಿಗಳ ಗುಂಪೊಂದು ನುಗ್ಗಿ ಹಗಲು ದರೋಡೆ ನಡೆಸಿದ್ದು, ₹25 ಕೋಟಿ ಮೌಲ್ಯದ ಆಭರಣಗಳನ್ನು ದೋಚಿದ್ದಾರೆ. ನಗದನ್ನು ಕೂಡ ಹೊತ್ತೊಯ್ದಿದ್ದು, ಅದರ ವಿವರ ಲಭಿಸಿಲ್ಲ.

ಸೋಮವಾರ ಬೆಳಿಗ್ಗೆ 10:30 ಕ್ಕೆ ಶೋ ರೂಂ ತೆರೆದ ಸ್ವಲ್ಪ ಸಮಯದ ನಂತರ, 5-6 ಜನರು ಅಂಗಡಿಯೊಳಗೆ ನುಗ್ಗಿ, ಭದ್ರತಾ ಸಿಬ್ಬಂದಿಯನ್ನು ಒತ್ತೆಯಾಳಾಗಿ ಇರಿಸಿಕೊಂಡಿದ್ದಾರೆ. ಅಲ್ಲದೆ ಗ್ರಾಹಕರು ಮತ್ತು ಸಿಬ್ಬಂದಿಗೆ ಕೈ ಎತ್ತುವಂತೆ ಆದೇಶಿಸಿ, ಕದ್ದ ವಸ್ತುಗಳನ್ನು ಕ್ರಮಬದ್ಧವಾಗಿ ಚೀಲಗಳಲ್ಲಿ ಪ್ಯಾಕ್ ಮಾಡಿ ದರೋಡೆ ಮಾಡಿದ್ದಾರೆ. ಸಿಬ್ಬಂದಿ ತಮ್ಮ ಜೀವಗಳನ್ನು ಉಳಿಸಿಕೊಳ್ಳಲು ಕೌಂಟರ್‌ಗಳ ಹಿಂದೆ ಅಡಗಿಕೊಂಡಿದ್ದಾರೆ.

ಈ ನಡುವೆ ಡಕಾಯಿತರನ್ನು ನಂತರ ನಾಕಾಬಂದಿ ನಡೆಸಿ ಬಂಧಿಸಲು ನಡೆಸಿದ ಯತ್ನ ವಿಫಲಗೊಂಡಿದೆ. ಪೊಲೀಸರು ಅವರನ್ನು ಅತಿ ವೇಗದಲ್ಲಿ ಚೇಸ್‌ ಮಾಡಿದಾಗ ಪೊಲೀಸರ ಮೇಲೇ ಅವರು ಗುಂಡು ಹಾರಿಸಿ ಪರಾರಿಯಾಗಿದ್ದಾರೆ.