ಆರ್ಥಿಕ ಅಪರಾಧಿ ಮೋನಿಕಾಅಮೆರಿಕದಿಂದ ಗಡೀಪಾರು

ನವದೆಹಲಿ: ಆರ್ಥಿಕ ವಂಚನೆ ಪ್ರಕರಣದಲ್ಲಿ 25 ವರ್ಷಗಳಿಂದ ಅಮೆರಿಕದಲ್ಲಿ ತಲೆಮರೆಸಿಕೊಂಡಿದ್ದ ಉದ್ಯಮಿ ಮೋನಿಕಾ ಕಪೂರ್‌ಳನ್ನು ಕೊನೆಗೂ ಭಾರತಕ್ಕೆ ಗಡೀಪಾರು ಮಾಡಿಸುವಲ್ಲಿ ಸಿಬಿಐ ಯಶಸ್ವಿಯಾಗಿದೆ.

ಇತ್ತೀಚೆಗಷ್ಟೇ ಅಮೆರಿಕದಲ್ಲಿ ತಲೆಮರೆಸಿಕೊಂಡಿದ್ದ ಮತ್ತೊಬ್ಬ ಆರ್ಥಿಕ ಅಪರಾಧಿ, ಉದ್ಯಮಿ ನೇಹಲ್‌ ಮೋದಿಯನ್ನು ಸಿಬಿಐ ಭಾರತಕ್ಕೆ ಗಡೀಪಾರು ಮಾಡಿಸಿತ್ತು. ಇದರ ಬೆನ್ನಲ್ಲೇ ಇದೀಗ ಅಮೆರಿಕ ಕೋರ್ಟ್‌ ಮೂಲಕ ಮೋನಿಕಾ ಕಪೂರ್‌ಳನ್ನು ಭಾರತಕ್ಕೆ ಗಡೀಪಾರು ಮಾಡಿಸುವಲ್ಲಿ ಸಿಬಿಐ ಯಶಸ್ಸು ಕಂಡಿದೆ.

2004ರ ಅಕ್ರಮ ಕೇಸ್‌: ಮೋನಿಕಾ ಓವರ್‌ಸೀಸ್‌ ಸಂಸ್ಥೆಯ ಒಡತಿಯಾಗಿದ್ದ ಮೋನಿಕಾ ಕಪೂರ್‌ ಮೇಲೆ ತಮ್ಮ ಸಹೋದರರಾದ ರಂಜನ್‌ ಖನ್ನಾ ಮತ್ತು ರಾಜೀವ್‌ ಖನ್ನಾ ಜತೆಗೆ ಸೇರಿ ಆಮದು-ರಫ್ತು ವ್ಯವಹಾರದಲ್ಲಿ ಸರ್ಕಾರಕ್ಕೆ ವಂಚಿಸಿದ ಆರೋಪ ಇದೆ. ನಕಲಿ ದಾಖಲೆಗಳು, ನಕಲಿ ಬ್ಯಾಂಕ್‌ ಪ್ರಮಾಣಪತ್ರಗಳನ್ನು ಬಳಸಿಕೊಂಡು ಆಭರಣಗಳ ಉತ್ಪಾದನೆ, ರಫ್ತಿಗಾಗಿ ಸುಂಕರಹಿತವಾಗಿ ಕಚ್ಚಾವಸ್ತುಗಳ ಆಮದು ಮಾಡಿಕೊಳ್ಳುವ 6 ಲೈಸನ್ಸ್‌ ಪಡೆದುಕೊಂಡಿದ್ದರು. ಈ ಲೈಸೆನ್ಸ್‌ಗಳನ್ನು ನಂತರ ದುಬಾರಿ ದರಕ್ಕೆ ಅಹಮದಾಬಾದ್‌ನ ಡೀಪ್ ಎಕ್ಸ್‌ಪೋರ್ಟ್ಸ್‌ಗಳಿಗೆ ಮಾರಾಟ ಮಾಡಲಾಗಿತ್ತು. ಇದರಿಂದ ಸರ್ಕಾರದ ಖಜಾನೆಗೆ ಆಗ 1.44 ಕೋಟಿ ರು. ನಷ್ಟ ಆಗಿತ್ತು.

ಈ ಸಂಬಂಧ ಈಕೆ ಸೋದರರನ್ನು 2017ರಲ್ಲೇ ನ್ಯಾಯಾಲಯ ಅಪರಾಧಿಗಳೆಂದು ಘೋಷಿಸಿತ್ತು. ಆದರೆ, ಮೊನಿಕಾ ಕಪೂರ್‌ 2006ರಿಂದಲೇ ತಲೆಮರೆಸಿಕೊಂಡಿದ್ದರು. ಈಕೆ ಪತ್ತೆಗೆ ಸಿಬಿಐ ರೆಡ್‌ಕಾರ್ನರ್‌ ನೋಟಿಸ್‌ ಕೂಡ ಜಾರಿ ಮಾಡಿತ್ತು.