ಒಂದು ದೇಶ, ಒಂದು ಸಮಯ : ಏಕರೂಪ ಸಮಯಪಾಲನೆ ಮತ್ತು ಪ್ರದರ್ಶನಕ್ಕಾಗಿ ಕೇಂದ್ರದಿಂದ ಕರಡು ಬಿಡುಗಡೆ

ನವದೆಹಲಿ: ದೇಶಾದ್ಯಂತ ಏಕರೂಪ ಸಮಯಪಾಲನೆ ಮತ್ತು ಪ್ರದರ್ಶನಕ್ಕಾಗಿ ಕೇಂದ್ರ ಸರ್ಕಾರ ಕಾನೂನು ಮಾಪನ ವಿಜ್ಞಾನ ಅಧಿನಿಯಮ 2025 ಅನ್ನು ಸಿದ್ಧಪಡಿಸಿದೆ. ಈ ನೀತಿಯು ದೇಶದ ಎಲ್ಲ ಸರ್ಕಾರಿ, ಖಾಸಗಿ, ವಾಣಿಜ್ಯ, ಶೈಕ್ಷಣಿಕ, ಕಾನೂನು ಸಂಸ್ಥೆಗಳಲ್ಲಿ ಒಂದೇ ರೂಪದ ಸಮಯ ಪ್ರದರ್ಶನ ಕಡ್ಡಾಯಗೊಳಿಸಲಿದೆ. ಈ ಕರಡು ನೀತಿಗೆ ಪ್ರತಿಕ್ರಿಯೆ ಕಳಿಸಲು ಫೆ.14ರವರೆಗೆ ಕಾಲಾವಕಾಶವನ್ನು ಕೇಂದ್ರ ಸರ್ಕಾರ ನೀಡಿದೆ.

ದಿನಾಂಕ ಪ್ರದರ್ಶನಕ್ಕೆ ದಿನ, ತಿಂಗಳು, ವರ್ಷ ಮಾದರಿ ಜೊತೆಗೆ ಸಮಯಕ್ಕೆ ಗಂಟೆ, ನಿಮಿಷ, ಸೆಕೆಂಡು ಮಾದರಿಯನ್ನು ನೀತಿಯಲ್ಲಿ ಪ್ರಸ್ತುತಪಡಿಸಲಾಗಿದೆ.

ಬಾಹ್ಯಾಕಾಶ ಸಂಶೋಧನೆ, ಖಗೋಳಶಾಸ್ತ್ರ, ವೈಜ್ಞಾನಿಕ ಸಂಶೋಧನೆ, ನಾವೀಕರು ಮತ್ತು ವಿಮಾನಯಾನ ಕ್ಷೇತ್ರವನ್ನು ಇದರಿಂದ ಹೊರತುಪಡಿಸಲಾಗಿದೆ. ಈ ಸಂಸ್ಥೆಗಳು ದೇಶೀಯ ಜೊತೆಗೆ ವಿದೇಶಿ ಸಮಯವನ್ನು ಬಳಸಬಹುದಾಗಿದೆ.

ಭಾರತವು ಐಎಸ್‌ಟಿ ಸಮಯ ಮಾದರಿಯನ್ನು ಬಳಸುತ್ತಿದ್ದು, +5:30 ಬಳಸುತ್ತಿದೆ. ಭಾರತದಲ್ಲಿ ಸಮಯವನ್ನು ಭಾರತೀಯ ಸಂಶೋಧನೆ ಮತ್ತು ಕೈಗಾರಿಕಾ ಮಂಡಳಿಯ ರಾಷ್ಟ್ರೀಯ ಭೌತಿಕ ಸಂಸ್ಥೆ (ಸಿಎಸ್‌ಐಆರ್‌-ಎನ್‌ಪಿಐ) ನಿರ್ವಹಿಸುತ್ತಿದೆ. ಇದು ಪ್ರತಿ ಸೆಕೆಂಡುಗಳನ್ನು ಅಂತಾರಾಷ್ಟ್ರೀಯ ಮಾಪಕದ ಆಧಾರದ ಮೇಲೆ ಸಮಯ ಪಾಲನೆ ಮಾಡಲಿದೆ.

ಏಕರೂಪ ಸಮಯ ಪಾಲನೆಯಿಂದಾಗಿ ಸೈಬರ್‌ ಅಪರಾಧ ತಡೆಗಟ್ಟುವಿಕೆ, ಪರಿಪೂರ್ಣ ಸಮಯಪಾಲನೆ ಸಾಧ್ಯವಾಗಲಿದೆ.