ಪಾಕ್, ಚೀನಾಕ್ಕೆ ಚಳ್ಳೆಹಣ್ಣು ತಿನ್ನಿಸಿದ್ದು ರಫೇಲ್ನ ಬಾಲ!
ಸಾರಾಂಶ
ಆಪರೇಷನ್ ಸಿಂದೂರ ಕಾರ್ಯಾಚರಣೆ ವೇಳೆ ಭಾರತದ ಹಲವು ರಫೇಲ್ ಯುದ್ಧವಿಮಾನಗಳನ್ನು ಹೊಡೆದುರುಳಿಸಿರುವುದಾಗಿ ಪಾಕಿಸ್ತಾನ ಹೇಳುತ್ತಿರುವುದು ಕೇವಲ ಬಡಾಯಿ ಅಷ್ಟೆ.
- ರಫೇಲ್ಗೆ ಇರುತ್ತೆ ‘ಡಿಯಾಯ್ ಸಿಸ್ಟಂ’ ಬಾಲ । ‘ಆಪರೇಷನ್ ಸಿಂದೂರ’ ವೇಳೆ ಪಾಕ್ ಹೊಡೆದಿದ್ದು ರಫೇಲ್ಗಲ್ಲ, ಎಐ ಆಧರಿತ ಬಾಲಕ್ಕೆ
--
* ಏನಿದು ಡಿಕಾಯ್ ಸಿಸ್ಟಂ?- ರಫೇಲ್ಗೆ ಎಕ್ಸ್-ಗಾರ್ಡ್ ಒಂದು ಅತ್ಯಾಧುನಿಕ ಎಐ ಆಧಾರಿತ ಪೈಬರ್ ಆಪ್ಟಿಕ್ ಬಾಲದ ರೀತಿಯ ವ್ಯವಸ್ಥೆ
- ಇದು ನೈಜ ಯುದ್ಧವಿಮಾನ ರೀತಿ ವರ್ತಿಸಿ ಶತ್ರುಗಳ ವಾಯುರಕ್ಷಣೆ ವ್ಯವಸ್ಥೆ, ಕ್ಷಿಪಣಿಯ ದಿಕ್ಕು ತಪ್ಪಿಸುತ್ತೆ
---
ಪಾಕಿಸ್ತಾನಕ್ಕೆ ರಫೇಲ್ ಯುದ್ಧವಿಮಾನವು ಚಳ್ಳೆಹಣ್ಣು ತಿನ್ನಿಸಿರುವ ವಿಚಾರವನ್ನು ಇದೀಗ ಡಸಾಲ್ಟ್ ಏವಿಯೇಷನ್ನ ಮುಖ್ಯಸ್ಥ ಮತ್ತು ಸಿಇಒ ಎರಿಕ್ ಟ್ರಾಪ್ಪಿಯರ್ ಅವರೇ ಸ್ಪಷ್ಟಪಡಿಸಿದ್ದಾರೆ. ಜೊತೆಗೆ ಹೆಸರಾಂತ ಜನೇಸ್ ಡಿಫೆನ್ಸ್ ವೀಕ್ಲಿ ವರದಿಯಲ್ಲೂ ಹಲವು ರಫೇಲ್ ಯುದ್ಧವಿಮಾನಗಳನ್ನು ಹೊಡೆದುಹಾಕಲಾಗಿದೆ ಎಂಬ ಪಾಕ್ ವಾದ ಈ ಎಕ್ಸ್-ಗಾರ್ಡ್ ಮೇಲಿನ ದಾಳಿಯನ್ನು ಆಧರಿಸಿದೆಯೇ ಹೊರತು ಬೇರೇನೂ ಅಲ್ಲ ಎಂದು ಹೇಳಲಾಗಿದೆ.
ರಫೇಲ್ ಯುದ್ಧವಿಮಾನದ ಎಕ್ಸ್-ಗಾರ್ಡ್ ಒಂದು ಅತ್ಯಾಧುನಿಕ ಎಐ ಆಧಾರಿತ ಪೈಬರ್ ಆಪ್ಟಿಕ್ ಬಾಲದ ರೀತಿಯ ವ್ಯವಸ್ಥೆ (ಡಿಕಾಯ್ ಸಿಸ್ಟಂ)ಯಾಗಿದ್ದು, ಇದು ಯುದ್ಧವಿಮಾನದ ಎಲೆಕ್ಟ್ರಾನಿಕ್ ಯುದ್ಧತಂತ್ರದ ಭಾಗವಾಗಿದೆ. ಎಕ್ಸ್-ಗಾರ್ಡ್ ಅನ್ನು ಮೋನೋ ಪಲ್ಸ್ ಮತ್ತು ಲೋಬ್-ಆನ್-ರಿಸೀವ್-ಓನ್ಲೀ(ಲಾರ್ಡ್) ಟ್ರ್ಯಾಕಿಂಗ್ ಸಿಸ್ಟಂ ಸೇರಿ ಶತ್ರುಗಳ ಅತ್ಯಾಧುನಿಕ ರೆಡಾರ್ ಮತ್ತು ಕ್ಷಿಪಣಿಗಳನ್ನು ವಂಚಿಸಲೆಂದೇ ಅಭಿವೃದ್ಧಿಪಡಿಸಲಾಗಿದೆ.
ಇದು ನೈಜವಾದ ಯುದ್ಧವಿಮಾನದ ರೀತಿ ವರ್ತಿಸಿ ಶತ್ರುಗಳ ವಾಯುರಕ್ಷಣೆ ಮತ್ತು ಕ್ಷಿಪಣಿ ನಿರ್ದೇಶಿತ ವ್ಯವಸ್ಥೆಗೆ ಚಳ್ಳೆಹಣ್ಣು ತಿನ್ನಿಸುತ್ತದೆ. ಈ ಡಿಕಾಯ್ ವ್ಯವಸ್ಥೆಯು ಮಾನವನ ಕಣ್ಣಿಗೆ ಕಾಣುವುದಿಲ್ಲ. ಆದರೆ, ಶತ್ರುಗಳ ಕ್ಷಿಪಣಿಗಳು ದಾಳಿ ನಡೆಸುವ ಅನಿವಾರ್ಯತೆ ಸೃಷ್ಟಿಸುತ್ತದೆ.
2 ಸೆಕೆಂಡ್ ಸಾಕು:
ಈ ರೀತಿಯ ಡಿಕಾಯ್ ಸಿಸ್ಟಂ ಅನ್ನು ಕೇವಲ ಎರಡೇ ಸೆಕೆಂಡುಗಳಲ್ಲಿ ನಿಯೋಜಿಸಬಹುದು ಮತ್ತು ಅದನ್ನು ಮರುಬಳಕೆಗೆ ಹಿಂತೆಗೆದುಕೊಳ್ಳಬಹುದು. ಶತ್ರುಗಳ ಕ್ಷಿಪಣಿಗಳು ವಿಮಾನದ ಬದಲು ಈ ಡಿಕಾಯ್ ಸಿಸ್ಟಂ ಮೇಲೆ ಹೊಡೆಯುವುದರಿಂದ ಯುದ್ಧವಿಮಾನವು ಯಾವುದೇ ತೊಂದರೆಯಿಲ್ಲದೆ ಪಾರಾಗುತ್ತದೆ.