ಇಂದು ರಾಯ್‌ಬರೇಲೀಲಿ ರಾಹುಲ್‌, ಶರ್ಮಾರಿಂದ ಮತದಾರರಿಗೆ ಕೃತಜ್ಞತೆ

ಅಮೇಠಿ: ರಾಯ್‌ಬರೇಲಿ ಹಾಗೂ ಅಮೇಠಿ ಕ್ಷೇತ್ರದಲ್ಲಿ ಭಾರೀ ಬಹುಮತದಿಂದ ಕಾಂಗ್ರೆಸ್‌ ಅಭ್ಯರ್ಥಿಗಳನ್ನು ಗೆಲ್ಲಿಸಿದ ಮತದಾರರಿಗೆ ನೂತನ ಸಂಸದರಾದ ರಾಹುಲ್‌ ಗಾಂಧಿ ಮತ್ತು ಕಿಶೋರಿ ಲಾಲ್‌ ಶರ್ಮಾ ಮಂಗಳವಾರ ಧನ್ಯವಾದ ಅರ್ಪಿಸಲಿದ್ದಾರೆ.

ರಾಯ್‌ಬರೇಲಿಯ ಭೂಯೆಮಾವ್‌ ಅತಿಥಿ ಗೃಹದಲ್ಲಿ ಕಾರ್ಯಕ್ರಮ ಆಯೋಜನೆಯಾಗಿದ್ದು, ರಾಹುಲ್ ಗಾಂಧಿ ಗೆಲುವಿಗೆ ಶ್ರಮಿಸಿದ ಸೋದರಿ ಪ್ರಿಯಾಂಕಾ ಕೂಡ ಹಾಜರಿರಲಿದ್ದಾರೆ. 18ನೇ ಲೋಕಸಭಾ ಚುನಾವಣೆಯಲ್ಲಿ ಸೋನಿಯಾ ಗಾಂಧಿ ಪ್ರತಿನಿಧಿಸುತ್ತಿದ್ದ ರಾಯ್‌ಬರೇಲಿ ಕ್ಷೇತ್ರದಿಂದ ಪುತ್ರ ರಾಹುಲ್‌ ಸ್ಪರ್ಧಿಸಿ ಬಿಜೆಪಿಯ ದಿನೇಶ್‌ ಪ್ರತಾಪ್‌ ಸಿಂಗ್‌ ವಿರುದ್ಧ 3.9 ಲಕ್ಷಕ್ಕೂ ಅಧಿಕ ಮತಗಳಿಂದ ಗೆಲುವು ಸಾಧಿಸಿದ್ದರು. ಮತ್ತೊಂದೆಡೆ ಅಮೇಠಿಯಿಂದ ಕಾಂಗ್ರೆಸ್‌ ಕಾರ್ಯಕರ್ತ ಕಿಶೋರಿ ಲಾಲ್‌ ಶರ್ಮಾ ಸ್ಪರ್ಧಿಸಿ ಬಿಜೆಪಿಯ ಸ್ಮೃತಿ ಇರಾನಿ ವಿರುದ್ಧ ಅಭೂತಪೂರ್ವ ಗೆಲುವು ಸಾಧಿಸಿದ್ದರು.