ಚುನಾವಣಾ ಆಯೋಗಕ್ಕೆ ಚುನಾವಣಾ ಬಾಂಡ್‌ ವಿವರ ಸಲ್ಲಿಕೆ

ಪಿಟಿಐ ನವದೆಹಲಿಸುಪ್ರೀಂ ಕೋರ್ಟ್‌ ಆದೇಶಾನುಸಾರ, ಭಾರತೀಯ ಸ್ಟೇಟ್ ಬ್ಯಾಂಕ್ (ಎಸ್‌ಬಿಐ) ಮಂಗಳವಾರ ಸಂಜೆ ಭಾರತೀಯ ಚುನಾವಣಾ ಆಯೋಗಕ್ಕೆ ಚುನಾವಣಾ ಬಾಂಡ್‌ಗಳ ವಿವರಗಳನ್ನು ಸಲ್ಲಿಸಿದೆ.

ಮಾರ್ಚ್ 12ರ ಕರ್ತವ್ಯಾವಧಿ ಮುಕ್ತಾಯದೊಳಗೆ ಚುನಾವಣಾ ಆಯೋಗಕ್ಕೆ ಚುನಾವಣಾ ಬಾಂಡ್‌ಗಳ ವಿವರಗಳನ್ನು ಸಲ್ಲಿಸುವಂತೆ ಸೋಮವಾರ ಎಸ್‌ಬಿಐಗೆ ಸುಪ್ರೀಂ ಕೋರ್ಟ್ ಸೂಚಿಸಿತ್ತು. ಅದರಂತೆ ಎಲ್ಲ ವಿವರಗಳನ್ನು ಸಲ್ಲಿಸಿದೆ. ಆಯೋಗ ಕೂಡ ಎಸ್‌ಬಿಐನಿಂದ ತಾನು ವಿವರ ಪಡೆದಿರುವುದಾಗಿ ಟ್ವೀಟರ್‌ನಲ್ಲಿ ದೃಢೀಕರಿಸಿದೆ.

ಇನ್ನು ಮುಂದೆ ಸುಪ್ರೀಂ ಕೋರ್ಟ್‌ ಆದೇಶದ ಪ್ರಕಾರ, ಚುನಾವಣಾ ಆಯೋಗವು ಮಾರ್ಚ್ 15 ರಂದು ಸಂಜೆ 5 ಗಂಟೆಯೊಳಗೆ ಎಸ್‌ಬಿಐ ಹಂಚಿಕೊಂಡ ವಿವರಗಳನ್ನು ತನ್ನ ಅಧಿಕೃತ ವೆಬ್‌ಸೈಟ್‌ನಲ್ಲಿ ಪ್ರಕಟಿಸಬೇಕು. ಅರ್ಥಾತ್ ಚುನಾವಣಾ ಬಾಂಡ್‌ ಖರೀದಿಸಿದವರ ಹೆಸರು, ಖರೀದಿ ಮೊತ್ತ ಸೇರಿ ಹಲವು ವಿಷಯಗಳು ಅಂದು ಬಹಿರಂಗವಾಗಲಿವೆ.

ಬಾಂಡ್‌ ನಿಷೇಧಿಸಿದ್ದ ಸುಪ್ರೀಂ:

2018 ರಲ್ಲಿ ಚುನಾವಣಾ ಬಾಂಡ್‌ ಮಾರಾಟ ಆರಂಭವಾಗಿತ್ತು. ಎಸ್‌ಬಿಐನಲ್ಲಿ ಮಾತ್ರ ಬಾಂಡ್‌ ವ್ಯವಹಾರ ನಡೆಯತ್ತಿತ್ತು. ವ್ಯಕ್ತಿಯು ಬಾಂಡ್‌ಗಳನ್ನು ಹಣ ಕೊಟ್ಟು ಖರೀದಿಸಬೇಕಿತ್ತು. ಯಾವ ಪಕ್ಷದ ಹೆಸರಿನಲ್ಲಿ ಆತ ಬಾಂಡ್‌ ಖರೀದಿಸಿದ್ದನೋ, ಆ ಪಕ್ಷಕ್ಕೆ ಆತ ನೀಡಿದ್ದ ಬಾಂಡ್‌ ಹಣ ಹೋಗುತ್ತಿತ್ತು. ಆದರೆ ಬಾಂಡ್‌ ಖರೀದಿಸಿದವನ ಹೆಸರು ಗೌಪ್ಯವಾಗಿ ಇಡಲಾಗುತ್ತಿತ್ತು.

ಆದರೆ ಈ ಗೌಪ್ಯತೆಯು ಮಾಹಿತಿ ಹಕ್ಕು ಉಲ್ಲಂಘನೆ ಆಗಿದೆ. ಗೌಪ್ಯತೆಯನ್ನು ದುರ್ಬಳಕೆ ಮಾಡಿಕೊಂಡು ಪಕ್ಷಗಳು ಸಕ್ರಮ ಮಾರ್ಗದ ಮೂಲಕ ಅಕ್ರಮ ಹಣ ಮಾಡಿಕೊಳ್ಳುತ್ತಿವೆ ಎಂಬ ಆರೋಪ ಕೇಳಿಬಂದಿತ್ತು. ಹೀಗಾಗಿ ಕಳೆದ ತಿಂಗಳು ಸುಪ್ರೀಂ ಕೋರ್ಟ್‌ ಚುನಾವಣಾ ಬಾಂಡ್‌ ರದ್ದು ಮಾಡಿತ್ತು ಮತ್ತು ಖರೀದಿದಾರರ ವಿವರಗಳನ್ನು ಮಾ.6ರಂದು ಬಹಿರಂಗಪಡಿಸಲು ಎಸ್‌ಬಿಐಗೆ ಆದೇಶಿಸಿತ್ತು.

ವಿವರಗಳನ್ನು ಬಹಿರಂಗಪಡಿಸಲು ಎಸ್‌ಬಿಐ ಜೂನ್ 30 ರವರೆಗೆ ಸಮಯ ಕೋರಿತ್ತು. ಆದಾಗ್ಯೂ, ಅದರ ಮನವಿಯನ್ನು ಸುಪ್ರೀಂ ಕೋರ್ಟ್ ತಿರಸ್ಕರಿಸಿ ಮಂಗಳವಾರ ಕೆಲಸದ ಸಮಯದ ಮುಕ್ತಾಯದೊಳಗೆ ಎಲ್ಲಾ ವಿವರಗಳನ್ನು ಚುನಾವಣಾ ಆಯೋಗಕ್ಕೆ ಸಲ್ಲಿಸುವಂತೆ ಬ್ಯಾಂಕ್‌ಗೆ ತಿಳಿಸಿತ್ತು.

ಯೋಜನೆ ಪ್ರಾರಂಭವಾದಾಗಿನಿಂದ ಎಸ್‌ಬಿಐ 30 ಹಂತಗಳಲ್ಲಿ 16,518 ಕೋಟಿ ರು. ಮೌಲ್ಯದ ಚುನಾವಣಾ ಬಾಂಡ್‌ಗಳನ್ನು ಬಿಡುಗಡೆ ಮಾಡಿತ್ತು.