30,000 ಕೋಟಿ ರು. ಮೌಲ್ಯದ ಕಂಪನಿಗಾಗಿ ಅತ್ತೆ-ಸೊಸೆ ಜಗಳ

- ಕರಿಷ್ಮಾ ಕಪೂರ್‌ ಮಾಜಿ ಪತಿ ಮನೆಯಲ್ಲಿ ಕದನ

ನವದೆಹಲಿ: ನಟಿ ಕರಿಷ್ಮಾ ಕಪೂರ್‌ರ ಮಾಜಿ ಪತಿ, ಉದ್ಯಮಿ ಸಂಜಯ್‌ ಕಪೂರ್‌ ಸಾವಿನ ಬೆನ್ನಲ್ಲೇ ಅವರ ಒಡೆತನದ 30000 ಕೋಟಿ ಕಂಪನಿಯ ಮಾಲೀಕತ್ವದ ವಿಚಾರವಾಗಿ ಇದೀಗ ಕೌಟುಂಬಿಕ ತಿಕ್ಕಾಟ ಶುರುವಾಗಿದೆ. ಕರಿಷ್ಮಾ ಜತೆಗಿನ ವಿಚ್ಛೇದನ ಬಳಿಕ ಸಂಜಯ್‌ ಪ್ರಿಯಾ ಸಚ್‌ದೇವ್‌ರರನ್ನು ಮದುವೆಯಾಗಿದ್ದು, ಇದೀಗ ಈ ಕಂಪನಿ ವಿಚಾರದಲ್ಲಿ ಅತ್ತೆ ಹಾಗೂ ಸೊಸೆ ಸಂಘರ್ಷಕ್ಕೆ ನಿಂತಿದ್ದಾರೆ.

ಆಟೋ ಬಿಡಿಭಾಗಗಳ ಕಂಪನಿಯಾದ ಸೋನಾ ಬಿಎಲ್‌ಡಬ್ಲ್ಯು ಪ್ರಿಸಿಷನ್‌ ಫೋರ್ಜಿಂಗ್‌ ಲಿ.ನ ಮಾಲೀಕ ಸಂಜಯ್‌ ಜೂ.12ರಲ್ಲಿ ಲಂಡನ್‌ನಲ್ಲಿ ಮೃತಪಟ್ಟಿದ್ದರು. ಅದರ ಬೆನ್ನಲ್ಲೇ ಕಂಪನಿ ಕಂಪನಿಯ ಹೆಚ್ಚುವರಿ ನಿರ್ದೇಶಕರಾಗಿ ಪ್ರಿಯಾರನ್ನು ಶುಕ್ರವಾರ ನಡೆದ ವಾರ್ಷಿಕ ಸಭೆಯಲ್ಲಿ ನೇಮಿಸಲಾಗಿದೆ. ಇದಕ್ಕೆ ಸಂಜಯ್‌ ತಾಯಿ ರಾಣಿ ಕಪೂರ್‌ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ತಮ್ಮ ಪತಿಯ ನಿಧನದ ಬಳಿಕ ಪೂರ್ಣ ಆಸ್ತಿಗೆ ತಾನೇ ಮಾಲಕಿಯಾಗಿದ್ದೆ. ಆದರೆ ಪುತ್ರನ ಸಾವಿನ ಶೋಕದ ವೇಳೆ ಕಂಪನಿಯ ಕೆಲ ವ್ಯಕ್ತಿಗಳಿಂದ ನನ್ನ ಸಹಿಪಡೆದು ವಂಚನೆ ಮಾಡಿದ್ದಾರೆ. ಕಂಪನಿಗೆ ಪ್ರಿಯಾ ನೇಮಕ ಕಾನೂನು ಬಾಹಿರ ಎಂದು ರಾಣಿ ಕಪೂರ್‌ ಆರೋಪಿಸಿದ್ದಾರೆ. ಆದರೆ, ರಾಣಿ ಕಪೂರ್‌ ಅವರು ಸಂಸ್ಥೆಯ ಷೇರುದಾರರು ಅಲ್ಲ ಎಂದು ಕಂಪನಿ ಹೇಳಿದೆ.