ಆಗಸದಲ್ಲಿ ಸುತ್ತಾಡುವ ಬಾಹ್ಯಾಕಾಶ ಯಾನಿಗಳು ಅಥವಾ ಗಗನಯಾತ್ರಿಗಳು ಎಷ್ಟು ವೇತನ ಪಡೆಯಬಹುದು?

ನವದೆಹಲಿ: ದೈಹಿಕವಾಗಿ, ಮಾನಸಿಕವಾಗಿ ಮತ್ತು ತಾಂತ್ರಿಕವಾಗಿ ಭಾರೀ ನೈಪುಣ್ಯ ಬಯಸುವ ಬಾಹ್ಯಾಕಾಶ ಯಾನಿಗಳು ಅಥವಾ ಗಗನಯಾತ್ರಿಗಳು ಎಷ್ಟು ವೇತನ ಪಡೆಯಬಹುದು? ಅಂತಾರಾಷ್ಟ್ರೀಯ ಬಾಹ್ಯಾಕಾಶ ಕೇಂದ್ರಕ್ಕೆ ತೆರಳುವ ವೇಳೆ ಮತ್ತು ಅಲ್ಲಿಂದ ಭೂಮಿಗೆ ಮರಳುವ ವೇಳೆ ಸದಾ ಜೀವ ಭಯದಲ್ಲೇ ಇರುವ ವಿಜ್ಞಾನಿಗಳಿಗೆ ಕೋಟಿ ಕೋಟಿ ರು. ಸಂಬಳ ಇರಬಹುದು ಎಂಬುದು ಎಲ್ಲರ ನಿರೀಕ್ಷೆ.

ಆದರೆ ಹಾಗೇನೂ ಇಲ್ಲ. ಇಲ್ಲಿ ವೇತನದ ಜೊತೆಗೆ ಜೀವಮಾನದ ಸಿಗುವ ಅಪರೂಪದ ಅವಕಾಶ ಕೂಡಾ ಮುಖ್ಯ ಎಂಬುದು ಗಮನಾರ್ಹ. ಏಕೆಂದರೆ ಗಗನಯಾತ್ರಿಗಳಿಗಿಂತ ಹೆಚ್ಚಿನ ವೇತನ ಹಲವು ಕಂಪನಿಗಳ ಸಿಇಒಗಳೇ ಸಂಪಾದಿಸುತ್ತಾರೆ. ಜೊತೆಗೆ ಗಗನಯಾತ್ರಿಗಳ ವೇತನವು ಅವರು ಯಾವ ದೇಶದವರು ಎಂಬುದನ್ನು ಕೂಡಾ ಅವಲಂಬಿಸಿದೆ.

ಯಾರಿಗೆ ಎಷ್ಟು ವೇತನ?:

ಉದಾಹರಣೆಗೆ ಅಂತಾರಾಷ್ಟ್ರೀಯ ಬಾಹ್ಯಾಕಾಶ ಕೇಂದ್ರಕ್ಕೆ ತೆರಳಿ ಅಲ್ಲಿಯೇ ಸಿಕ್ಕಿಬಿದ್ದಿರುವ ಭಾರತೀಯ ಮೂಲದ ಸುನಿತಾ ವಿಲಿಯಮ್ಸ್‌ ಮತ್ತಿತರರಿಗೆ ಕಳೆದ ವರ್ಷದ ವೇತನ ಶ್ರೇಣಿಯ ಅನ್ವಯ ವಾರ್ಷಿಕ 70 ಲಕ್ಷ ರು.ನಿಂದ 1.27 ಕೋಟಿ ರು.ವರೆಗೂ ವೇತನ ನಿಗದಿಪಡಿಸಲಾಗಿದೆ. ಆದರೆ ಈ ವೇತನ ಸೇನೆಯಿಂದ ಆಯ್ಕೆಯಾದ ಗಗನಯಾತ್ರಿಗಳಿಗೆ ಸ್ವಲ್ಪ ಕಡಿಮೆ ಇರುತ್ತದೆ. ಕಾರಣ, ಯಾತ್ರೆ ಬಳಿಕ ಅವರು ಸೇನೆಯ ಹುದ್ದೆಯಲ್ಲಿ ಮುಂದುವರೆಯುತ್ತಾರೆ. ಉದಾಹರಣೆಗೆ ಭಾರತೀಯ ಮೂಲದ ರಾಜಾ ಚಾರಿ ಅವರ ಮಾಸಿಕ ವೇತನ 8.92 ಲಕ್ಷ ರು.ನಷ್ಟಿದೆ.

ಇನ್ನು ಯುರೋಪಿಯನ್‌ ಸ್ಪೇಸ್‌ ಏಜೆನ್ಸಿಯ ಗಗನಯಾತ್ರಿಗಳಲ್ಲಿ, ಆರಂಭಿಕ ಹಂತದಲ್ಲಿ ಮಾಸಿಕ 5.50 ಲಕ್ಷ ರು., ಬ್ರಿಟನ್‌ನಲ್ಲಿ 5.86 ಲಕ್ಷ ರು., ಫ್ರಾನ್ಸ್‌ನಲ್ಲಿ 7.23- 8.43 ಲಕ್ಷ ರು., ರಷ್ಯಾದಲ್ಲಿ 4.58 ಲಕ್ಷ ರು. ವೇತನ ನಿಗದಿ ಮಾಡಲಾಗಿದೆ. ಇದಲ್ಲದೇ ಗಗನಯಾತ್ರಿಗಳಿಗೆ ವಿವಿಧ ದೇಶಗಳು ಪ್ರತಿ ಉಡ್ಡಯನಕ್ಕೂ ಪ್ರತ್ಯೇಕ ಬೋನಸ್‌ ಮತ್ತು ಇತರೆ ಭತ್ಯೆಗಳನ್ನೂ ನೀಡುತ್ತವೆ.

ಇಂದು ಮೊದಲ ಐತಿಹಾಸಿಕ ಖಾಸಗಿ ಅಂತರಿಕ್ಷ ನಡಿಗೆ ಆರಂಭ

ಫ್ಲೋರಿಡಾ: ‘ಮೊದಲ ಖಾಸಗಿ ಅಂತರಿಕ್ಷ ನಡಿಗೆ ಮಿಷನ್‌’ ಎಂದು ಖ್ಯಾತಿ ಪಡೆದಿರುವ ಸ್ಪೇಸ್‌ಎಕ್ಸ್‌ನ ‘ಪೋಲಾರಿಸ್ ಡಾನ್’ ಮಂಗಳವಾರ, ಫ್ಲೋರಿಡಾದ ನಾಸಾದ ಕೆನಡಿ ಬಾಹ್ಯಾಕಾಶ ಕೇಂದ್ರದಿಂದ ನಭಕ್ಕೆ ಹಾರಲಿದೆ. ನಾಲ್ವರು ಗಗನಯಾನಿಗಳು ನಡಿಗೆಯಲ್ಲಿ ಪಾಲ್ಗೊಳ್ಳಲಿದ್ದಾರೆ.ಪೋಲಾರಿಸ್ ಡಾನ್ ಎನ್ನುವುದು ಸ್ಪೇಸ್‌ಎಕ್ಸ್ ಡ್ರ್ಯಾಗನ್ ಕ್ಯಾಪ್ಸುಲ್‌ನಲ್ಲಿ ಕೈಗೊಳ್ಳುವ 5 ದಿನದ ಅಂತರಿಕ್ಷ ನಡಿಗೆಯ ಕಾರ್ಯಾಚರಣೆ ಆಗಿದೆ. ಇದು ಅಂತರಿಕ್ಷ ನಡಿಗೆ ಅಷ್ಟೇ ಅಲ್ಲದೆ ಮಾನವನ ಆರೋಗ್ಯದ ಮೇಲೆ ಬಾಹ್ಯಾಕಾಶ ಯಾನ ಮತ್ತು ಬಾಹ್ಯಾಕಾಶ ವಿಕಿರಣದ ಪರಿಣಾಮಗಳನ್ನು ಅಧ್ಯಯನಕ್ಕೆ 38 ವಿಜ್ಞಾನ ಪ್ರಯೋಗಗಳನ್ನು ನಡೆಸುತ್ತದೆ.