ಮಂಕಿಪಾಕ್ಸ್‌ನ ಹರಡುವಿಕೆಯನ್ನು ನಿಯಂತ್ರಿಸಲು ಲಸಿಕೆ ಉತ್ಪಾದನೆ ಹೆಚ್ಚಳಕ್ಕೆ ಡಬ್ಲ್ಯುಎಚ್‌ಒ ಸಲಹೆ

ಜಿನೆವಾ: ಮಂಕಿಪಾಕ್ಸ್‌ನ ಹರಡುವಿಕೆಯನ್ನು ನಿಯಂತ್ರಿಸಲು ಲಸಿಕೆಗಳ ಉತ್ಪಾದನೆಯನ್ನು ಹೆಚ್ಚಿಸುವಂತೆ ವಿಶ್ವ ಆರೋಗ್ಯ ಸಂಸ್ಥೆ ಲಸಿಕೆ ತಯಾರಿಕಾ ಕಂಪನಿಗಳಿಗೆ ಸೂಚಿಸಿದೆ.

ಆಫ್ರಿಕಾದ ಕಾಂಗೋದಲ್ಲಿ ಕ್ಲೇಡ್‌ 1ಬಿ ಮಂಕಿಪಾಕ್ಸ್ ಪ್ರಕರಣಗಳು ಏರಿಕೆಯಾಗುತ್ತಿರುವ ಬೆನ್ನಲ್ಲೇ ವಿಶ್ವ ಆರೋಗ್ಯ ಸಂಸ್ಥೆ ಈ ಸಲಹೆ ನೀಡಿದೆ. ಇದರ ಜೊತೆಗೆ ಈಗಾಗಲೇ ಮಂಕಿಪಾಕ್ಸ್ ಪ್ರಕರಣಗಳು ಉಲ್ಬಣಗೊಳ್ಳುತ್ತಿರುವ ದೇಶಗಳಿಗೆ, ಲಸಿಕೆ ಸಂಗ್ರಹಗಳಿರುವ ದೇಶಗಳು ದಾನ ಮಾಡುವಂತೆ ಕೇಳಿದೆ.

ಸಾಮಾನ್ಯಾಗಿ ಮಂಕಿಪಾಕ್ಸ್‌ ನಿಯಂತ್ರಣಕ್ಕೆ ಎರಡು ಲಸಿಕೆಗಳನ್ನು ಬಳಸಲಾಗುತ್ತದೆ. ಇತ್ತೀಚಿನ ವರ್ಷಗಳಲ್ಲಿ ಮಂಕಿಪಾಕ್ಸ್‌ ನಿಯಂತ್ರಣಕ್ಕೆ ಎಂವಿಎ- ಬಿಎನ್ ಮತ್ತು ಎಲ್‌ಸಿ16 ಎನ್ನುವ ಎರಡು ಲಸಿಕೆಗಳನ್ನು ಬಳಸಲಾಗುತ್ತಿದೆ. ಇದರಲ್ಲಿ ಎಂವಿಎ- ಬಿಎನ್‌ ಲಸಿಕೆಯನ್ನು 28 ದಿನಗಳ ಅಂತರದಲ್ಲಿ ಎರಡು ಬಾರಿ ನೀಡಲಾಗುತ್ತದೆ. ಇನ್ನು ಎಲ್‌ಸಿ 16 ಲಸಿಕೆ ಜಪಾನ್‌ ಮೂಲದ್ದು.

ಈ ಲಸಿಕೆ ವಿಚಾರಕ್ಕೆ ಸಂಬಂಧಿಸಿದಂತೆ ವಿಶ್ವ ಆರೋಗ್ಯ ಸಂಸ್ಥೆ ವಕ್ತಾರೆ ಮಾರ್ಗರೇಟ್‌ ಹ್ಯಾರಿಸ್‌ ನೀಡಿರುವ ಮಾಹಿತಿ ಪ್ರಕಾರ, ‘ಈಗಾಗಲೇ 5 ಲಕ್ಷ ಎಂವಿಎ- ಬಿನ್ ಲಸಿಕೆ ಸಂಗ್ರಹವಿದೆ. ಒಂದು ವೇಳೆ ಖರೀದಾರರ ಬೇಡಿಕೆಯಿದ್ದರೆ 24 ಲಕ್ಷ ದಷ್ಟು ಲಸಿಕೆ ಉತ್ಪಾದಿಸಬಹುದು. 2025ರ ವೇಳೆಗೆ 1 ಕೋಟಿಯಷ್ಟು ಲಸಿಕೆ ಉತ್ಪಾದಿಸಬಹುದು’ ಎಂದಿದ್ದಾರೆ. ಇನ್ನು ಎಲ್‌ಸಿ16 ವ್ಯಾವಹಾರಿಕ ಉದ್ದೇಶದಿಂದ ಬಳಕೆಯಾಗಿಲ್ಲ. ಬದಲಿಗೆ ಇದು ಜಪಾನ್ ಸರ್ಕಾರ ಉತ್ಪಾದಿಸಿದ್ದು, ಈ ಲಸಿಕೆ ಗಣನೀಯ ಪ್ರಮಾಣದಲ್ಲಿ ಸದ್ಯದ ಮಟ್ಟಿಗೆ ಸಂಗ್ರಹವಿದೆ. ಆದರೂ ಕೂಡ ಮುನ್ನೆಚ್ಚರಿಕೆ ಕ್ರಮವಾಗಿ ಲಸಿಕೆ ಉತ್ಪಾದನೆ ಹೆಚ್ಚಳಕ್ಕೆ ಸೂಚನೆ ನೀಡಿದೆ.

ವಿಶ್ವ ಆರೋಗ್ಯ ಸಂಸ್ಥೆಯು 100ಕ್ಕೂ ಹೆಚ್ಚಿನ ದೇಶಗಳಲ್ಲಿ ಮಂಕಿಪಾಕ್ಸ್ ಪ್ರಕರಣಗಳು ಕಾಣಿಸಿಕೊಂಡ ಬೆನ್ನಲ್ಲೇ ಆರೋಗ್ಯ ತುರ್ತು ಪರಿಸ್ಥಿತಿ ಘೋಷಿಸಿತ್ತು.

==

ಮಂಕಿಪಾಕ್ಸ್: ಕೇಂದ್ರ ಸರ್ಕಾರದ ಸಭೆ, ಪರಿಸ್ಥಿತಿ ಪರಾಮರ್ಶೆ

ನವದೆಹಲಿ: ಮಂಕಿಪಾಕ್ಸ್‌ ಸೋಂಕಿನ ಪ್ರಕರಣ ನೆರೆಯ ಪಾಕಿಸ್ತಾನದಲ್ಲಿ ಪತ್ತೆಯಾದ ಬೆನ್ನಲ್ಲೇ ಎಚ್ಚೆತ್ತುಕೊಂಡಿರುವ ಭಾರತ ಸರ್ಕಾರ, ದೇಶದಲ್ಲಿನ ಸದ್ಯದ ಪರಿಸ್ಥಿತಿಯ ಕುರಿತು ಶನಿವಾರ ತುರ್ತು ಸಭೆ ನಡೆಸಿ ಪರಾಮರ್ಶೆ ನಡೆಸಿದೆ.

ಕೇಂದ್ರ ಆರೋಗ್ಯ ಸಚಿವ ಜೆ.ಪಿ ನಡ್ಡಾ ಮತ್ತು ಹಿರಿಯ ಅಧಿಕಾರಿಗಳ ನೇತೃತ್ವದಲ್ಲಿ ಸಭೆ ನಡೆಯಿತು. ಈ ವೇಳೆ ‘ಭಾರತದಲ್ಲಿ ಸದ್ಯ ಮಂಕಿಪಾಕ್ಸ್‌ನ ಯಾವುದೇ ಪ್ರಕರಣ ವರದಿಯಾಗಿಲ್ಲ. ಆದರೂ ರೋಗ ತಡೆಗಟ್ಟಲು ಮತ್ತು ನಿಯಂತ್ರಿಸಲು ಅಗತ್ಯ ಕ್ರಮಗಳನ್ನು ಕೈಗೊಳ್ಳಲಾಗುತ್ತದೆ’ ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ಹೇಳಿದೆ.

ಜೊತೆಗೆ ಭಾರತದಲ್ಲಿಯೂ ಪರಿಸ್ಥಿತಿ ಮಂಕಿಪಾಕ್ಸ್ ಭಾರತದಲ್ಲಿ ಪತ್ತೆಯಾಗುವುದಿಲ್ಲ ಎಂದು ಹೇಳುವುದಕ್ಕೆ ಅಸಾಧ್ಯ. ವಿದೇಶದಿಂದ ಬಂದವರ ಮೂಲಕ ಸೋಂಕು ಕಾಣಿಸಿಕೊಳ್ಳಬಹುದು. ಆದರೆ ಅದು ಸಾಂಕ್ರಾಮಿಕ ರೀತಿಯಲ್ಲಿ ಹರಡುವ ಸಾಧ್ಯತೆ ತೀರಾ ಕಡಿಮೆ ಎಂದು ಸಭೆ ಅಭಿಪ್ರಾಯ ವ್ಯಕ್ತಪಡಿಸಿತು.

ಆದರೂ, ಆದರೆ ಕೇಂದ್ರ ಸರ್ಕಾರ ಕೆಲವು ಮುನ್ನೆಚ್ಚರಿಕೆ ಕ್ರಮಗಳನ್ನು ತೆಗೆದುಕೊಳ್ಳಲು ಮುಂದಾಗಿದ್ದು, ವಿಮಾನ ನಿಲ್ದಾಣಗಳು, ಬಂದರು, ಗಡಿ ಪ್ರದೇಶಗಳಲ್ಲಿ ಆರೋಗ್ಯ ಘಟಕಗಳ ಸ್ಥಾಪನೆಗೆ ಮುಂದಾಗಿದೆ. 32 ಪ್ರಯೋಗಾಲಯಗಳ ಸ್ಥಾಪನೆ, ಪ್ರಕರಣವನ್ನು ಪತ್ತೆಹಚ್ಚಲು ಮತ್ತು ಅದನ್ನು ನಿಭಾಯಿಸಲು ಆರೋಗ್ಯ ಸೌಲಭ್ಯಗಳನ್ನು ಕಲ್ಪಿಸಲು ನಿರ್ಧರಿಸಿತು.