ಶರನ್ನವರಾತ್ರಿ ಉತ್ಸವಕ್ಕೆ ನಗರದಲ್ಲಿ ಸಕಲ ಸಿದ್ಧತೆ

ಹುಬ್ಬಳ್ಳಿ:

ನಗರ ಹಾಗೂ ಗ್ರಾಮೀಣ ಪ್ರದೇಶದಲ್ಲಿ ನವರಾತ್ರಿ ಉತ್ಸವದ ಸಿದ್ಧತೆಗಳು ಭರದಿಂದ ಸಾಗಿದ್ದು, ಪ್ರಮುಖ ದೇವಾಲಯ ಹಾಗೂ ಮನೆಗಳಲ್ಲಿ ಘಟಸ್ಥಾಪನೆ ಹಾಗೂ ವಿಶೇಷ ಪೂಜೆಗಳಿಗೆ ಸಕಲ ಸಿದ್ಧತೆ ಕೈಗೊಳ್ಳಲಾಗಿದೆ.

ಪ್ರಮುಖ ದೇವಸ್ಥಾನ ಹಾಗೂ ಮನೆಗಳಲ್ಲಿ ಹಬ್ಬದ ವಾತಾವರಣ ಮನೆ ಮಾಡಿದೆ. ಸಾಂಪ್ರದಾಯಿಕ ಆಚರಣೆ ಜತೆಗೆ ನಗರದಲ್ಲಿ ಗರ್ಭಾ ಹಾಗೂ ದಾಂಡಿಯಾ ನೈಟ್ಸ್ ಕಾರ್ಯಕ್ರಮಗಳ ಆಯೋಜನೆ ಜೋರಾಗಿದೆ. ಕಲ್ಯಾಣ ನಗರದ ವಿವೇಕಾನಂದ ಆಶ್ರಮ, ದಾಜೀಬಾನ ಪೇಟ ದುರ್ಗಾದೇವಿ, ತುಳಜಾಭವಾನಿ ದೇವಸ್ಥಾನ, ದೇಶಪಾಂಡೆ ನಗರದ ಕಾಮಾಕ್ಷಿ ದೇವಸ್ಥಾನ ಸೇರಿದಂತೆ ಬಹುತೇಕ ಮಂದಿರಗಳಲ್ಲಿ ನವರಾತ್ರಿ ಆಚರಣೆಗೆ ಸಕಲ ಸಿದ್ಧತೆ ನಡೆದಿದೆ.

ದೇವಸ್ಥಾನ ಶುಚಿಗೊಳಿಸಿ ವಿದ್ಯುತ್ ದೀಪ ಹಾಗೂ ಹೂವುಗಳಿಂದ ಅಲಂಕರಿಸಲಾಗಿದೆ. ಒಂಬತ್ತು ದಿನವೂ ದೇವಿಯರಿಗೆ ವಿಶೇಷ ಪೂಜೆ, ಪುನಸ್ಕಾರ, ಹೋಮ, ಹವನ, ಪ್ರವಚನ ಹಾಗೂ ಮಹಾಮಂಗಳಾರತಿ ಹಾಗೂ ಅನ್ನ ಪ್ರಸಾದ ಏರ್ಪಡಿಸಲಾಗಿದೆ. ಇನ್ನು ನವರಾತ್ರಿ ಹಿನ್ನೆಲೆಯಲ್ಲಿ ದುರ್ಗಾದೇವಿ ಬೃಹತ್‌ ಮೂರ್ತಿಗಳ ಮೆರವಣಿಗೆ ಭವ್ಯವಾಗಿ ನಡೆಯಿತು. ಸುಮಂಗಲೆಯರು ಕೋಲಾಟ ಆಡುವ ಮೂಲಕ ಸಂಭ್ರಮಿಸಿದರು. ವಿವಿಧ ಕಲಾಪ್ರಕಾರಗಳು ಮೆರವಣಿಗೆಗೆ ಮೆರಗು ತಂದವು

ಮಾರುಕಟ್ಟೆ ಖರೀದಿ ಜೋರು:

ನವರಾತ್ರಿ ಹಬ್ಬದ ಪ್ರಯುಕ್ತ ನಗರದ ದುರ್ಗದಬೈಲ್, ಹಳೇ ಹುಬ್ಬಳ್ಳಿ ಹಾಗೂ ಜನತಾ ಬಜಾರ ಮಾರುಕಟ್ಟೆಯಲ್ಲಿ ಖರೀದಿ ಭರಾಟೆ ಶನಿವಾರ ಜೋರಾಗಿತ್ತು. ದೇವಿಯ ಅಲಂಕರಿಸಲು ಹೂವು, ವಿದ್ಯುತ್ ದೀಪ ಸೇರಿದಂತೆ ಹಲವಾರು ವಸ್ತುಗಳ ಖರೀದಿಗೆ ಸಾರ್ವಜನಿಕರು ಅಂಗಡಿಗಳಿಗೆ ಮುಗಿ ಬಿದಿದ್ದರು. ಇನ್ನು ಪೂಜೆ ಸಾಮಗ್ರಿಗಳಾದ ಹೂ, ಹಣ್ಣು, ವಿಭೂತಿ, ಕುಂಕುಮ, ಅಗರ ಭತ್ತಿ, ಊಡಿ ತುಂಬುವ ವಸ್ತುಗಳು ಸೇರಿದಂತೆ ಅನೇಕ ವಸ್ತುಗಳನ್ನು ಖರೀದಿಸಿದರು.

ದುರ್ಗಾಮಾತೆ ಆರಾಧನೆ, ಉಪವಾಸ ಹಾಗೂ ವ್ರತಗಳು, ದೇವಿಯ ನವರೂಪಗಳಿಗೆ ಪೂಜೆ, ಬೊಂಬೆ ಕೂರಿಸುವ ಸಂಪ್ರದಾಯ, ಕೋಲಾಟ ಇವೆಲ್ಲವೂ ಹಬ್ಬದ ಸಂಭ್ರಮ ಹೆಚ್ಚಿಸಲಿವೆ. ಮನೆಗಳಲ್ಲಿ ವಿವಿಧ ಬಗೆಯ ಬೊಂಬೆಗಳನ್ನು ಅಲಂಕರಿಸಿ, ಮೆಟ್ಟಿಲುಗಳ ಮೇಲೆ ಸುಂದರವಾಗಿ ಜೋಡಿಸಿ ಪೂಜಿಸಲಾಗುತ್ತದೆ.