ಉತ್ತರಕನ್ನಡ ಜಿಲ್ಲೆಯಾದ್ಯಂತ ಸುಗ್ಗಿಯ ಬೆಡಗು, ಬೇಡರ ವೇಷದ ಬೆರಗು
ಸಾರಾಂಶ
ಉತ್ತರ ಕನ್ನಡ ಜಿಲ್ಲೆಯ ಸಾಂಸ್ಕತಿಕ ವೈಭವದ ಪ್ರತೀಕವಾದ ಸುಗ್ಗಿ ಕುಣಿತ ಈಗ ಜಿಲ್ಲೆಯಾದ್ಯಂತ ಕಳೆಗಟ್ಟಿದೆ.
ವಸಂತಕುಮಾರ್ ಕತಗಾಲ
ಹಾಲಕ್ಕಿ ಒಕ್ಕಲಿಗರು, ನಾಮಧಾರಿಗಳು, ಕೋಮಾರಪಂತರು, ಪರಿಶಿಷ್ಟ ಜಾತಿ, ಜನಾಂಗದವರು, ಗ್ರಾಮ ಒಕ್ಕಲಿಗರು, ಅಗೇರರು ಹೀಗೆ ವಿವಿಧ ಜಾತಿ ಜನಾಂಗದವರು ತಮ್ಮ ಎಲ್ಲ ಬೇಗುದಿಯನ್ನೂ ಬದಿಗೊತ್ತಿ ಮನೆ ಮನೆಗೆ ತಿರುಗುತ್ತ ಸುಗ್ಗಿ ಹಬ್ಬದ ಸಂಭ್ರಮವನ್ನು ಉಣಬಡಿಸುತ್ತಿದ್ದಾರೆ.
ಕೆಲವು ಸುಗ್ಗಿಗಳಿಗೆ ತುರಾಯಿಯ ಅಲಂಕಾರ, ಕೆಲವು ಸುಗ್ಗಿಗಳಿಗೆ ಯಕ್ಷಗಾನದ ವೇಷ, ಮತ್ತೆ ಕೆಲವು ಸುಗ್ಗಿಗಳಿಗೆ ಮುಂಡಾಸಿನ ಸೊಗಸು ಕಳೆಗಟ್ಟುತ್ತಿದೆ. ಕುಮಟಾ, ಹೊನ್ನಾವರ, ಅಂಕೋಲಾ, ಕಾರವಾರ ಮತ್ತಿತರ ಕಡೆಗಳಲ್ಲಿ ಸುಗ್ಗಿಯ ತಂಡಗಳು ಸಂಚರಿಸಿ ಪ್ರದರ್ಶನ ನೀಡುತ್ತಿವೆ.ಉತ್ತರ ಕನ್ನಡ ಜಿಲ್ಲೆಯ ಸಂಪ್ರದಾಯ, ಸಂಸ್ಕೃತಿ ಮೇಳೈಸಿರುವ ಸುಗ್ಗಿಯ ವೈಭವ ಈಗ ಎಲ್ಲೆಲ್ಲೂ ಕಂಡುಬರುತ್ತಿದೆ. ಅದೆಷ್ಟೋ ವರ್ಷಗಳಿಂದ ನಡೆದು ಬಂದ ಸಂಪ್ರದಾಯ ಮುಂದುವರಿಸಿಕೊಂಡು ಬಂದಿದ್ದಾರೆ.
ಉಳಿದೆಡೆ ಸುಗ್ಗಿಯ ಹಿಗ್ಗು ಆದರೆ ಶಿರಸಿಯಲ್ಲಿ ರಾತ್ರಿಯಾಗುತ್ತಿದ್ದಂತೆ ಬೇಡರ ವೇಷದ ರೋಚಕ ಲೋಕ ತಲೆಎತ್ತುತ್ತಿದೆ. ನವಿಲುಗರಿಯಿಂದ ಅಲಂಕೃತವಾದ ವಿಶೇಷ ಮುಖವರ್ಣಿಕೆಯಿಂದ ಕಂಗೊಳಿಸುವ ವೇಷಧಾರಿ ನರ್ತಿಸುತ್ತ, ಅಬ್ಬರಿಸುತ್ತಿದ್ದರೆ ಸಾವಿರಾರು ಜನರು ಇದಕ್ಕೆ ಸಾಕ್ಷಿಯಾಗುತ್ತಾರೆ.
ಹೋಳಿಯ ಬಣ್ಣದೋಕುಳಿ:
ಸುಗ್ಗಿ ಕುಣಿತ, ಬೇಡರ ವೇಷ, ಹೋಳಿಯ ಬಣ್ಣದಾಟ ಇವುಗಳಿಂದ ಜಿಲ್ಲೆಯಾದ್ಯಂತ ಹೊಸ ಲೋಕ ಸೃಷ್ಟಿಯಾಗಿದೆ. ಇವುಗಳನ್ನು ನೋಡುವುದೆ ಕಣ್ಣಿಗೊಂದು ಹಬ್ಬವಾಗಿದೆ ಎನ್ನುತ್ತಾರೆ ಕುಮಟಾ ವಿನಾಯಕ ಭಂಡಾರಿ.