ಭಟ್ಕಳ ಪುರಸಭೆ: ₹4.72 ಲಕ್ಷ ಉಳಿತಾಯ ಬಜೆಟ್ ಮಂಡನೆ

ಭಟ್ಕಳ: ಇಲ್ಲಿನ ಪುರಸಭೆಯ 2025-26ನೇ ಸಾಲಿನ ₹4.72 ಲಕ್ಷ ಉಳಿತಾಯ ಮುಂಗಡ ಪತ್ರವನ್ನು ಪ್ರಭಾರ ಅಧ್ಯಕ್ಷ ಮೊಹ್ದೀನ್ ಅಲ್ತಾಫ್‌ ಖರೂರಿ ಮಂಡಿಸಿ ಸಾಮಾನ್ಯ ಸಭೆಯಲ್ಲಿ ಅನುಮೋದನೆ ಪಡೆದರು.

2025-26ನೇ ಸಾಲಿಗೆ ಅಂದಾಜು ಪುರಸಭೆಯ ₹15.16 ಕೋಟಿ ಆದಾಯ ಮತ್ತು ₹15.11 ಕೋಟಿ ಖರ್ಚು ಸೇರಿ ₹4.72 ಲಕ್ಷ ಉಳಿತಾಯ ಮುಂಗಡ ಪತ್ರ ಮಂಡಿಸಲಾಯಿತು. 2025-26ನೇ ಸಾಲಿಗೆ ಆಸ್ತಿ ತೆರಿಗೆಯಿಂದ ₹1.44 ಕೋಟಿ, ನೀರು ಸರಬರಾಜು ಶುಲ್ಕದಿಂದ ₹53 ಲಕ್ಷ, ಪುರಸಭೆ ವಾಣಿಜ್ಯ ಮಳಿಗೆಗಳಿಂದ ₹38.81 ಲಕ್ಷ, ಜಾಹೀರಾತು ಶುಲ್ಕದಿಂದ ₹1.15 ಲಕ್ಷ, ಎಸ್ಎಪ್ಸಿ ಮುಕ್ತ ನಿಧಿ ಅನುದಾನದಡಿ ₹60 ಲಕ್ಷ, 5ನೇ ಹಣಕಾಸು ಅನುದಾನದಿಂದ ₹1.25 ಕೋಟಿ, ಬರಗಾಲ ನಿಧಿಯಡಿ ಕುಡಿಯುವ ನೀರಿನ ಅನುದಾನ ₹15 ಲಕ್ಷ, ಎಸ್‌ಬಿಎಂ ಕೇಂದ್ರ ಸರ್ಕಾರದ ಅನುದಾನ ಸೇರಿ ₹50 ಲಕ್ಷ, ಪೌರಕಾರ್ಮಿಕರ ಗೃಹಭಾಗ್ಯ ಯೋಜನೆಯಡಿ ₹20 ಲಕ್ಷ ಆದಾಯ ನಿರೀಕ್ಷೆ ಮಾಡಲಾಗಿದೆ.

2025-26ನೇ ಸಾಲಿಗೆ ಅಭಿವೃದ್ಧಿಗಾಗಿ ಎಸ್‌ಎಫ್‌ಸಿ ಅನುದಾನ ಮತ್ತು ಪುರಸಭೆ ನಿಧಿಯಿಂದ ₹34 ಲಕ್ಷ, ಪಟ್ಟಣದ ಬಡಜನರ ಅಭಿವೃದ್ಧಿಗಾಗಿ ₹6 ಲಕ್ಷ, ವಿಕಲಚೇತನರ ಕಲ್ಯಾಣಕ್ಕಾಗಿ ₹1.50 ಲಕ್ಷ, ಕ್ರೀಡಾ ಚಟುವಟಿಕೆಗಾಗಿ ₹0.10 ಲಕ್ಷ, ಕಟ್ಟಡ ನಿರ್ಮಾಣಕ್ಕೆ ₹50 ಲಕ್ಷ, ರಸ್ತೆ ನಿರ್ಮಾಣಕ್ಕೆ ₹65 ಲಕ್ಷ, ಚರಂಡಿ ಹಾಗೂ ಕಲ್ವರ್ಟ ನಿರ್ಮಾಣಕ್ಕೆ ₹20 ಲಕ್ಷ, ಬೀದಿ ದೀಪ ನಿರ್ವಹಣೆಗೆ ₹20 ಲಕ್ಷ, ಯಂತ್ರೋಪಕರಣ ಖರೀದಿಗೆ ₹10 ಲಕ್ಷ, ಘನತ್ಯಾಜ್ಯ ಮತ್ತು ಇತರೆ ಸ್ಥಿರಾಸ್ತಿಗಳಿಗೆ ₹62 ಲಕ್ಷ, ನೀರು ವಿತರಣಾ ವ್ಯವಸ್ಥೆಗೆ ₹20 ಲಕ್ಷ, ಕಚೇರಿಗೆ ಅವಶ್ಯವಿರುವ ಉಪಕರಣ ಖರೀದಿಗೆ 11 ಲಕ್ಷ, ಗಾರ್ಡ್‌ ಅಭಿವೃದ್ಧಿಗೆ ₹5 ಲಕ್ಷವನ್ನು ಮುಂಗಡ ಪತ್ರದಲ್ಲಿ ಮೀಸಲಿರಿಸಲಾಗಿದೆ. ಮುಂಗಡಪತ್ರ ಮಂಡಿಸುವ ಸಂದರ್ಭದಲ್ಲಿ ಪುರಸಭೆ ಸ್ಥಾಯಿ ಸಮಿತಿ ಅಧ್ಯಕ್ಷ ಖೈಸರ್ ಮೊಹಿತೆಶ್ಯಾಂ, ಮುಖ್ಯಾಧಿಕಾರಿ ವೆಂಕಟೇಶ ನಾವುಡ ಸೇರಿದಂತೆ ಪುರಸಭೆಯ ಅಧಿಕಾರಿಗಳು, ಪುರಸಭಾ ಸದಸ್ಯರು ಉಪಸ್ಥಿತರಿದ್ದರು.ಭಟ್ಕಳ ಪುರಸಭೆಯ ಮುಂಗಡಪತ್ರವನ್ನು ಪ್ರಭಾರ ಅಧ್ಯಕ್ಷ ಮೊಹ್ದೀನ್ ಅಲ್ತಾಫ್‌ ಖರೂರಿ ಮಂಡಿಸಿದರು.