ನಾಳೆ ಭಟ್ಕಳ ತಂಝೀಂ ಸಂಸ್ಥೆಯ ಆಡಳಿತ ಮಂಡಳಿ ಚುನಾವಣೆ

ಕೆಲವು ಕ್ಷೇತ್ರಗಳಲ್ಲಿ ಜಿದ್ದಾಜಿದ್ದಿ ಸ್ಪರ್ಧೆ । 14ರಂದು ಅಧಿಕೃತ ಫಲಿತಾಂಶ ಪ್ರಕಟ

ಕನ್ನಡಪ್ರಭ ವಾರ್ತೆ ಭಟ್ಕಳ

ಇಲ್ಲಿನ ಮುಸ್ಲಿಮರ ಸಾಮಾಜಿಕ-ಧಾರ್ಮಿಕ ಮತ್ತು ಸಮುದಾಯ ಕಲ್ಯಾಣ ಸಂಸ್ಥೆಯಾದ ಮಜ್ಲಿಸೆ ಇಸ್ಲಾಹ ವ ತಂಝೀಂನ ಮುಂದಿನ ಮೂರು ವರ್ಷದ ಆಡಳಿತ ಮಂಡಳಿಗೆ ಮೇ 12ರಂದು ಚುನಾವಣೆ ನಡೆಯಲಿದ್ದು, ಈ ಬಾರಿ ಶೇ. 50ರಷ್ಟು ಹೊಸಮುಖಗಳು ಪ್ರವೇಶಿಸುವ ಸಾಧ್ಯತೆ ಇದೆ.

ತಂಝೀಂ ಒಟ್ಟೂ 132 ಸದಸ್ಯರನ್ನು ಹೊಂದಿದೆ. ಮೇ 12ರಂದು ನಡೆಯಲಿರುವ ಚುನಾವಣೆಯಲ್ಲಿ ಭಟ್ಕಳದ ವಿವಿಧ ವಾರ್ಡ್‌ಗಳಿಂದ 45 ಸದಸ್ಯರು, ಭಾರತದ ವಿವಿಧ ಭಾಗಗಳಿಂದ 17 ಮತ್ತು ವಿದೇಶಿ ಘಟಕಗಳಿಂದ 40 ಸದಸ್ಯರು ಆಯ್ಕೆಯಾಗಲಿದ್ದಾರೆ. ವಾರ್ಡ್ ಸಂಖ್ಯೆ 2 ಅತಿದೊಡ್ಡ ಕ್ಷೇತ್ರವಾಗಿ ಹೊರಹೊಮ್ಮಿದ್ದರೂ, ಸಂಸ್ಥೆಯ ಹಾಲಿ ಅಧ್ಯಕ್ಷರು ಸೇರಿದಂತೆ ಹೆಚ್ಚಿನ ಸಂಖ್ಯೆಯ ಅಭ್ಯರ್ಥಿಗಳು ಕಣದಲ್ಲಿ ಇರುವುದರಿಂದ ವಾರ್ಡ್ ಸಂಖ್ಯೆ 14 ಅತ್ಯಂತ ತೀವ್ರ ಸ್ಪರ್ಧೆ ಏರ್ಪಡುವ ಸಾಧ್ಯತೆ ಇದೆ.

ಖಲೀಫಾ ಬೀದಿ, ಸಿದ್ದೀಕ್ ಬೀದಿ, ಡೊಂಗರ್ ಪಲ್ಲಿ ಮತ್ತು ಡಾರಂಟ ಪ್ರದೇಶಗಳನ್ನು ಒಳಗೊಂಡಿರುವ ವಾರ್ಡ್ ಸಂಖ್ಯೆ 2, ಅತಿ ಹೆಚ್ಚು 246 ಮತದಾರರನ್ನು ಹೊಂದಿದೆ. ವಾರ್ಡ್‌ನಿಂದ ಒಟ್ಟು ಆರು ಅಭ್ಯರ್ಥಿಗಳು ಸ್ಪರ್ಧಿಸುತ್ತಿದ್ದು, ಅವರಲ್ಲಿ ಐದು ಮಂದಿ ಕಾರ್ಯಕಾರಿ ಮಂಡಳಿಗೆ ಆಯ್ಕೆಯಾಗಲಿದ್ದಾರೆ. ಕಾರ್ಗೆದ್ದೆ, ಶಿಫಾ ಕಾಲನಿ, ಹೌಸಿಂಗ್ ಬೋರ್ಡ್, ಗೋಲ್ ಮಸೀದಿ, ಹುರಳಿಸಾಲ್ , ಮರ್ಯಮ್ ಅಲಿ ಕಾಲನಿ, ಮಕ್ಕಾ ಕಾಲನಿ ಮತ್ತು ಮುಖ್ಯ ರಸ್ತೆ ಪ್ರದೇಶಗಳನ್ನು ಒಳಗೊಂಡಿರುವ ವಾರ್ಡ್ ಸಂಖ್ಯೆ 14, 232 ಮತದಾರರನ್ನು ಹೊಂದಿದೆ. ಇಲ್ಲಿ ಐದು ಸ್ಥಾನಗಳಿಗೆ 10 ಅಭ್ಯರ್ಥಿಗಳು ಸ್ಪರ್ಧಿಸುತ್ತಿರುವುದರಿಂದ ವಾರ್ಡ್ ಹೆಚ್ಚಿನ ಗಮನ ಸೆಳೆದಿದೆ,

ಆಜಾದ್ ನಗರ ಮತ್ತು ಜಾಲಿ ರಸ್ತೆಯನ್ನು ಒಳಗೊಂಡಿರುವ ವಾರ್ಡ್ ಸಂಖ್ಯೆ 13, 210 ಮತದಾರರನ್ನು ಹೊಂದಿರುವ 3ನೇ ಅತಿದೊಡ್ಡ ಕ್ಷೇತ್ರವಾಗಿದೆ. ಐದು ಸದಸ್ಯರನ್ನು ಆಯ್ಕೆ ಮಾಡಲಾಗುವ ವಾರ್ಡ್‌ನಿಂದ ಆರು ಅಭ್ಯರ್ಥಿಗಳು ಸ್ಪರ್ಧಿಸುತ್ತಿದ್ದಾರೆ. ಭಟ್ಕಳದ 16 ವಾರ್ಡ್‌ಗಳಿಂದ 45 ಸದಸ್ಯರಿಗೆ ಚುನಾವಣೆ ನಡೆಸಲಾಗುತ್ತಿದೆ ಎಂದು ತಂಝೀಂ ಚುನಾವಣಾ ಅಧಿಕಾರಿ ಮೊಹಿದ್ದೀನ್ ಅಲ್ತಾಫ್ ಖರೂರಿ ತಿಳಿಸಿದ್ದಾರೆ. ಮೇ 5ರಂದು ನಾಮಪತ್ರ ಹಿಂಪಡೆಯಲು ಕೊನೆಯ ದಿನಾಂಕವಾಗಿತ್ತು. ನಂತರ ಹಲವು ಅಭ್ಯರ್ಥಿಗಳು ಸ್ಪರ್ಧೆಯಿಂದ ಹಿಂದೆ ಸರಿದರು.

ಪರಿಣಾಮವಾಗಿ, 3, 4, 5, 6, 8, 11 ಮತ್ತು 15 ವಾರ್ಡ್‌ಗಳಿಂದ 15 ಅಭ್ಯರ್ಥಿಗಳು ಅವಿರೋಧವಾಗಿ ಆಯ್ಕೆಯಾದರು. ಈಗ ಮೇ 12ರಂದು ವಾರ್ಡ್ 1, 2, 7, 9, 10, 12, 13, 14 ಮತ್ತು 16ರಲ್ಲಿ ಮತದಾನ ನಡೆಯಲಿದೆ.

ಬೆಳಿಗ್ಗೆ 9ರಿಂದ ಸಂಜೆ 5ರವರೆಗೆ ಮತದಾನ ನಡೆಯಲಿದ್ದು, ನಂತರ ಅದೇ ದಿನ ಮತ ಎಣಿಕೆ ಆರಂಭವಾಗಲಿದೆ. ಮೇ 14ರಂದು ಅಧಿಕೃತ ಫಲಿತಾಂಶಗಳನ್ನು ಪ್ರಕಟಿಸಲಾಗುವುದು.

ಪ್ರಜಾಪ್ರಭುತ್ವ ಪ್ರಕ್ರಿಯೆಯಲ್ಲಿ ಸಕ್ರಿಯವಾಗಿ ಭಾಗವಹಿಸಲು ಮತ್ತು ಸಂಸ್ಥೆಯ ಚುನಾವಣಾ ವ್ಯವಸ್ಥೆಯನ್ನು ಬಲಪಡಿಸಲು ಅಲ್ತಾಪ್ ಖರೂರಿ ಎಲ್ಲಾ ಸದಸ್ಯರಿಗೆ ಮನವಿ ಮಾಡಿದರು. ತಂಝೀಮ್ ಆಡಳಿತದ ಒಟ್ಟು ಸದಸ್ಯರ ಸಂಖ್ಯೆ 132 ಆಗಿದ್ದು, ಅವರಲ್ಲಿ 10 ಸದಸ್ಯರು ಈಗಾಗಲೇ ಹೊರಹೋಗುವ ಆಡಳಿತದಿಂದ ಆಯ್ಕೆಯಾಗಿದ್ದಾರೆ ಎಂದು ಅವರು ಹೇಳಿದರು.