ಅಣ್ಣ-ತಂಗಿಯ ಹಬ್ಬಕ್ಕೆ ಬಾಂಧವ್ಯದ ಬೆಸುಗೆ
ಸಾರಾಂಶ
ಮಹಾರಾಷ್ಟ್ರ ಹಾಗೂ ಕರ್ನಾಟಕ ರಾಜ್ಯದ ಮಧ್ಯದ ಸಹೋರತ್ವವನ್ನು ಗಟ್ಟಿಗೊಳಿಸುವಲ್ಲಿ ತಾಲೂಕಿನ ಯಾದವಾಡ ಗ್ರಾಮದಲ್ಲಿ ಬುಧವಾರ ನಡೆದ ಅಣ್ಣ-ತಂಗಿಯ ಹಬ್ಬ ಅರ್ಥಪೂರ್ಣವಾಗಿ ನಡೆಯಿತು.
ಧಾರವಾಡ:
ಹಿಂದೂ ಸಾಮ್ರಾಟ್ ಛತ್ರಪತಿ ಶಿವಾಜಿ, ವೀರಮಾತೆ ಬೆಳವಡಿ ಮಲ್ಲಮ್ಮ, ಕಿತ್ತೂರು ರಾಣಿಚೆನ್ನಮ್ಮ, ವೀರಮಾತೆ ಕೆಳದಿ ಚೆನ್ನಮ್ಮ ವಂಶಸ್ಥರ ಸಮಾಗಮಕ್ಕೆ ಗ್ರಾಮದ ಸಹಸ್ರರು ಜನರು ಸಾಕ್ಷಿಯಾದರು.
ಶಿವಾಜಿ ಮಹಾರಾಜರ ಸೈನ್ಯ ಹಾಗೂ ಬೆಳವಡಿ ಮಲ್ಲಮ್ಮ ನಡುವೆ 348 ವರ್ಷಗಳ ಹಿಂದೆ ಸೈನಿಕರ ಅಚಾತುರ್ಯದಿಂದ ಯುದ್ಧ ನಡೆದಿತ್ತು. ಆಗ ವೀರಮಾತೆ ಮಲ್ಲಮ್ಮಳ ಹೋರಾಟ ಶಿವಾಜಿಯನ್ನೇ ನಿಬ್ಬೆರಗುಗೊಳಿಸಿತ್ತು. ಮಲ್ಲಮ್ಮಳನ್ನು ಸಹೋದರಿ ಎಂದು ಶಿವಾಜಿ ಒಪ್ಪಿಕೊಂಡಿದ್ದರು. ಈ ಸ್ಮರಣಾರ್ಥ ಶಿವಾಜಿಯ ಸೊಸೆ ತಾರಾಬಾಯಿ ಯಾದವಾಡ ಗ್ರಾಮದಲ್ಲಿ ಶಿಲಾಶಾಸನ ಮತ್ತು ವೀರಗಲ್ಲನ್ನು ಕೆತ್ತಿಸಿದ್ದರು. ಇದರ ನೆನಪಿಗಾಗಿ ನಡೆದ ಈ ಕಾರ್ಯಕ್ರಮ ರಾಜಮನೆತನದವರ ನಡುವೆ ಬಾಂಧವ್ಯ ಬೆಸೆಯಿತು.ಮಹಾರಾಷ್ಟ್ರ, ಬೆಳವಡಿ, ಕಿತ್ತೂರರು ಹಾಗೂ ಕೆಳದಿಯಿಂದ ಬಂದ ರಾಜ ಮನೆತನಗಳ ಪ್ರತಿನಿಧಿಗಳನ್ನು ಗ್ರಾಮಸ್ಥರು ವಾದ್ಯಮೇಳಗಳೊಂದಿಗೆ ಅದ್ಧೂರಿಯಾಗಿ ಸ್ವಾಗತಿಸಿದರು. ನಂತರ ಗ್ರಾಮದಲ್ಲಿ ಶಿವಾಜಿ ಮಹಾರಾಜ ಹಾಗೂ ಬೆಳವಡಿ ಮಲ್ಲಮ್ಮಳ ಭಾವಚಿತ್ರಗಳ ಮೆರವಣಿಗೆ ನಡೆಯಿತು. ಈ ವೇಳೆ ಮಹನೀಯರ ವೇಷಭೂಷಣ ಧರಿಸಿದ ಚಿಣ್ಣರು ಗಮನ ಸೆಳೆದರು. ಆರತಿ, ಕುಂಭದೊಂದಿಗೆ ಬಂದ ಮಹಿಳೆಯರ ಪಾಲ್ಗೊಳ್ಳುವಿಕೆ ಕಾರ್ಯಕ್ರಮಕ್ಕೆ ಮೆರಗು ನೀಡಿತು.
ಮಹಾರಾಷ್ಟ್ರದಲ್ಲಿರುವ ಶ್ರೀಛತ್ರಪತಿ ಶಿವಾಜಿ ಮಹಾರಾಜರ ವಂಶಸ್ಥರಾಗಿರುವ ಸಂಕೇತರಾವ್ ಸರಕಾರ, ಆದೇಶರಾವ್ ವಿಚಾರಿ, ಸುಧೀರಜೀ ಮೋಹಿತೆ, ಸವರಾಜ ಘೋರ್ಪಡೆ, ಸತೀಶ ಕಾಲವಕರ ವೀರಮಾತೆ ಬೆಳವಡಿ ಮಲ್ಲಮ್ಮನ ವಂಶಸ್ಥರಾದ ನಾಗರಾಜ ದೇಸಾಯಿ ಚಚಡಿ, ಡಾ. ವೈ.ಐ. ಪಾಟೀಲ, ಮಡಿವಾಳಪ್ಪ ನೀಲಪ್ಪ ದೇಸಾಯಿ, ಕಿತ್ತೂರಕರ ದೇಸಾಯಿ, ಕೆಳದಿ ಚೆನ್ನಮ್ಮ ವಂಶಸ್ಥರಾದ ಚಂದ್ರಕಾಂತ ಸಂಘನಾಯಕ, ಗಜೇಂದ್ರಗಡ ಘೋರ್ಪಡೆ, ಕಿತ್ತೂರು ರಾಣಿ ಚೆನ್ನಮ್ಮ ವಂಶಸ್ಥರಾದ ಸೋಮಶೇಖರ ದೇಸಾಯಿ ಈ ಕಾರ್ಯಕ್ರಮಕ್ಕೆ ಸಾಕ್ಷಿಯಾದರು.
ಮಡಿವಾಳಪ್ಪ ದಿಂಡಲಕೊಪ್ಪ ಸ್ವಾಗತಿಸಿದರು. ಮಹಾದೇವಪ್ಪ ನಾಗಣ್ಣವರ ಮತ್ತು ಮಂಜುಳಾ ಯಲಿಗಾರ ನಿರೂಪಿಸಿದರು. ಬಸವರಾಜ ಪಟ್ಟಣದವರ ವಂದಿಸಿದರು.ಸ್ವತಂತ್ರ್ಯ ಭಾರತದಲ್ಲಿ ಕರ್ನಾಟಕ ಮತ್ತು ಮಹಾರಾಷ್ಟ್ರ ನಡುವೆ ಗಡಿ, ಭಾಷಾ ವಿವಾದಗಳಿವೆ. ಆದರೆ, ನಾವೆಲ್ಲರೂ ಭಾರತ ಮಾತೆ ಪುತ್ರರು ಎಂದು ಶಿವಾಜಿ- ಮಲ್ಲಮ್ಮ ಆಗಲೇ ಬಾಂಧವ್ಯ ಬೆಸೆದವರು. ಇದುವೇ ಭಾರತೀಯ ಸಂಸ್ಕೃತಿ. ಶಿವಾಜಿ ಹುಟ್ಟಿದ್ದು ಮಹಾರಾಷ್ಟ್ರವಾದರೂ ಅವರ ರಾಷ್ಟ್ರಸೇವೆಯ ಕರ್ಮಭೂಮಿ ಕುಂದಾಪುರ ಹಾಗೂ ಬೆಳವಡಿ ಸಂಸ್ಥಾನ ಆಗಿತ್ತು. ನಾವೆಲ್ಲರೂ ರಾಷ್ಟ್ರನಿರ್ಮಾಣಕ್ಕೆ ಅಣೆಯಾಗಲು ಯಾದವಾಡ ಗ್ರಾಮದಲ್ಲಿ ನಡೆದ ಈ ಕಾರ್ಯಕ್ರಮ ಪ್ರೇರಣೆ ಆಗಿದೆ.
.