ವರುಣನ ಕೃಪೆ ಕೋರಿ ಕಪ್ಪೆಗಳ ಕಲ್ಯಾಣೋತ್ಸವ

ಕುಷ್ಟಗಿ: ವರುಣ ದೇವರ ಕೃಪೆಗಾಗಿ ತಾಲೂಕಿನ ತಳುವಗೇರಾ ಗ್ರಾಮದಲ್ಲಿ ರೈತರು ಹಾಗೂ ಗ್ರಾಮಸ್ಥರು ಸಂಪ್ರದಾಯಬದ್ಧವಾಗಿ ಕಪ್ಪೆಗಳ ಮದುವೆ ನೆರವೇರಿಸಿ ವಿಶೇಷ ಪ್ರಾರ್ಥನೆ ಸಲ್ಲಿಸಿದರು. ಗ್ರಾಮೀಣ ಜನಪದ ನಂಬಿಕೆ, ಕೃಷಿ ಸಂಸ್ಕೃತಿ ಹಾಗೂ ಪ್ರಕೃತಿಯ ಮೇಲಿನ ಭರವಸೆ ಪ್ರತಿಬಿಂಬಿಸಿದ ಈ ಅಪರೂಪದ ಆಚರಣೆ ಎಲ್ಲರ ಗಮನ ಸೆಳೆಯಿತು.

ಗ್ರಾಮದ ಮುತ್ತಣ್ಣ ಪಟ್ಟೇದ ಕುಟುಂಬ ವಧು ಮನೆಯವರಾಗಿ ಹಾಗೂ ಮುತ್ತಪ್ಪ ಬಿಂಜವಾಡಗಿ ಕುಟುಂಬ ವರನ ಮನೆಯವರಾಗಿ ಜವಾಬ್ದಾರಿ ವಹಿಸಿಕೊಂಡು ಎರಡು ಕಪ್ಪೆಗಳನ್ನು ವಧು-ವರರಂತೆ ಅಲಂಕರಿಸಿದರು. ಅರಿಶಿನ-ಕುಂಕುಮ ಹಚ್ಚಿ, ಹೂವಿನ ಹಾರ ತೊಡಿಸಿ, ಮಂಗಳಸೂತ್ರ ಕಟ್ಟಿ, ಶಾಸ್ತ್ರೋಕ್ತವಾಗಿ ಮಂತ್ರೋಚ್ಚಾರಣೆ ನಡುವೆ ವಿವಾಹ ನೆರವೇರಿಸಲಾಯಿತು. ಸಾಂಪ್ರದಾಯಿಕ ಮದುವೆಯ ಎಲ್ಲ ವಿಧಿವಿಧಾನ ಪಾಲಿಸಿ ಕಪ್ಪೆಗಳ ವಿವಾಹ ನಡೆಸಿದ್ದು ವಿಶೇಷವಾಗಿತ್ತು.

ವಿವಾಹದ ಬಳಿಕ ಕಪ್ಪೆಗಳನ್ನು ಗ್ರಾಮದ ಪ್ರಮುಖ ಬೀದಿಗಳಲ್ಲಿ ಮೆರವಣಿಗೆ ಮೂಲಕ ಕೊಂಡೊಯ್ಯಲಾಯಿತು. ಮೆರವಣಿಗೆಯಲ್ಲಿ ಮಹಿಳೆಯರು ಮಂಗಳಗೀತೆಗಳನ್ನು ಹಾಡಿದರೆ ಗ್ರಾಮಸ್ಥರು ವರುಣ ದೇವರೇ ಕೃಪೆ ತೋರು ಎಂದು ಪ್ರಾರ್ಥಿಸಿದರು. ಉತ್ತಮ ಮಳೆಯಾಗಿ ಕೆರೆ-ಕಟ್ಟೆ ತುಂಬಲಿ, ಹೊಲಗಳಲ್ಲಿ ಹಸಿರು ಚಿಮ್ಮಲಿ ಹಾಗೂ ರೈತರ ಬದುಕಿನಲ್ಲಿ ನೆಮ್ಮದಿ ಮೂಡಲಿ ಎಂದು ಎಲ್ಲರೂ ಒಕ್ಕೊರಲಿನಿಂದ ಬೇಡಿಕೊಂಡರು.

ನಂಬಿಕೆಯ ಹಿಂದಿನ ಆಶಯ:

ಗ್ರಾಮೀಣ ಪ್ರದೇಶಗಳಲ್ಲಿ ಕಪ್ಪೆಗಳ ಕೂಗು ಮಳೆಯ ಆಗಮನದ ಸಂಕೇತ ಎಂಬ ನಂಬಿಕೆ ಪ್ರಚಲಿತದಲ್ಲಿದೆ. ಪ್ರಕೃತಿ ಮತ್ತು ಜೀವಜಾಲದೊಂದಿಗೆ ಮಾನವನ ಸಂಬಂಧ ಪ್ರತಿಬಿಂಬಿಸುವ ಈ ಆಚರಣೆ, ಮಳೆಗಾಗಿ ವರುಣ ದೇವರಲ್ಲಿ ಪ್ರಾರ್ಥಿಸುವ ಜನಪದ ಸಂಪ್ರದಾಯದ ಒಂದು ಭಾಗವಾಗಿದೆ. ವೈಜ್ಞಾನಿಕ ಆಧಾರಗಳಿಗಿಂತ ಹೆಚ್ಚಾಗಿ ಇದು ಗ್ರಾಮೀಣ ಸಮಾಜದ ಭರವಸೆ, ಒಗ್ಗಟ್ಟು ಹಾಗೂ ಪ್ರಕೃತಿಯ ಮೇಲಿನ ಗೌರವ ವ್ಯಕ್ತಪಡಿಸುವ ಸಾಂಸ್ಕೃತಿಕ ಆಚರಣೆಯಾಗಿದೆ.