ಲಿಂಗಾಯತ ಪುಣ್ಯಪುರುಷರಲ್ಲಿ ಹರ್ಡೇಕರ ಮಂಜಪ್ಪ ಅಗ್ರಮಾನ್ಯರು: ಡಾ. ಸಿದ್ಧರಾಮ ಸ್ವಾಮೀಜಿ

ಕನ್ನಡಪ್ರಭ ವಾರ್ತೆ ಗದಗ

ಶಿವಶರಣರ ತತ್ತ್ವ, ಆದರ್ಶ ಹಾಗೂ ಮೌಲ್ಯಗಳನ್ನು ತಮ್ಮ ಬದುಕಿನುದ್ದಕ್ಕೂ ಅಳವಡಿಸಿಕೊಂಡು ಸಮಾಜಕ್ಕೆ ಪಸರಿಸಿದ ಹರ್ಡೇಕರ ಮಂಜಪ್ಪನವರು ಲಿಂಗಾಯತ ಪುಣ್ಯಪುರುಷರಲ್ಲಿ ಅಗ್ರಮಾನ್ಯರಾಗಿದ್ದಾರೆ ಎಂದು ಗದಗ ತೋಂಟದಾರ್ಯ ಮಠದ ಡಾ. ತೋಂಟದ ಸಿದ್ಧರಾಮ ಮಹಾಸ್ವಾಮಿಗಳು ತಿಳಿಸಿದರು.

ಗದಗ ನಗರದ ತೋಂಟದಾರ್ಯ ಮಠದಲ್ಲಿ ಲಿಂಗಾಯತ ಪ್ರಗತಿಶೀಲ ಸಂಘದ ಆಶ್ರಯದಲ್ಲಿ ಆಯೋಜಿಸಲಾಗಿದ್ದ 2820ನೇ ಶಿವಾನುಭವ ಸಮಾರಂಭದ ಸಾನ್ನಿಧ್ಯ ವಹಿಸಿ ಮಾತನಾಡಿದರು. ಬಸವಣ್ಣನವರ ತತ್ತ್ವ ಸಂದೇಶಗಳನ್ನು ಜನಸಾಮಾನ್ಯರಿಗೆ ತಲುಪಿಸುವಲ್ಲಿ ಮಂಜಪ್ಪನವರ ಪಾತ್ರ ಹಿರಿದು ಎಂದರು.

ಬಸವಣ್ಣ ಎಂದರೆ ಕೇವಲ ನಂದಿಯಲ್ಲ, ಅವರೊಬ್ಬ ಚಾರಿತ್ರಿಕ ಯುಗಪುರುಷ. ಅಂತಹ ಮಹಾತ್ಮ ಬಸವಣ್ಣನವರ ಸಂದೇಶಗಳನ್ನು ಮನೆ ಮನಗಳಿಗೆ ಮುಟ್ಟಿಸಿದ ಹರ್ಡೇಕರ ಮಂಜಪ್ಪನವರು 1913 ರಲ್ಲಿ ದಾವಣಗೆರೆಯಲ್ಲಿ ಮೊಟ್ಟಮೊದಲ ಬಾರಿಗೆ ಬಸವ ಜಯಂತಿಯನ್ನು ಆರಂಭಿಸಿದ ಕೀರ್ತಿಗೆ ಭಾಜನರಾಗಿದ್ದಾರೆ. ಉತ್ತಂಗಿ ಚನ್ನಪ್ಪ, ಹರ್ಡೇಕರ ಮಂಜಪ್ಪ ಹಾಗೂ ಫ.ಗು. ಹಳಕಟ್ಟಿಯವರು ಲಿಂಗಾಯತ ಧರ್ಮದ ಮೂರು ಆಧಾರಸ್ತಂಭಗಳಿದ್ದಂತೆ.

ಮಂಜಪ್ಪನವರು ಗಾಂಧೀಜಿಯವರ ಅಪ್ಪಟ ಅನುಯಾಯಿಯಾಗಿ ಖಾದಿ ಪ್ರಚಾರ ಮಾಡಿದರು. 1924ರ ಬೆಳಗಾವಿ ಕಾಂಗ್ರೆಸ್ ಅಧಿವೇಶನದಲ್ಲಿ ಶಿಸ್ತಿನಿಂದ ಕಾರ್ಯನಿರ್ವಹಿಸಿ ಗಮನ ಸೆಳೆದಿದ್ದರು. ಇಂದಿನ ಮಕ್ಕಳೇ ಮುಂದಿನ ಭವಿಷ್ಯ ಎಂಬುದನ್ನು ಅರಿತು ಮಕ್ಕಳಿಗಾಗಿ ನೈತಿಕ ಸಾಹಿತ್ಯ ರಚನೆಗೆ ಒತ್ತು ನೀಡಿದರು. ಆಲಮಟ್ಟಿಯಲ್ಲಿ ಗುರುಕುಲ ಸ್ಥಾಪಿಸಿ, ದಾರಿ ತಪ್ಪಿದ ಮಕ್ಕಳಿಗೆ ಸನ್ನಡತೆ ಹಾಗೂ ಸಂಸ್ಕಾರ ಕಲಿಸಿ ಸಮಾಜದ ಮುಖ್ಯವಾಹಿನಿಗೆ ತಂದರು. ಈ ಮಹನೀಯರ ನೆನಪಿನಲ್ಲಿ ಸಂಸ್ಥಾನ ಮಠದಿಂದ ಆಲಮಟ್ಟಿಯಲ್ಲಿ ಶಾಲೆ-ಕಾಲೇಜುಗಳನ್ನು ಸ್ಥಾಪಿಸಲಾಗಿದೆ ಎಂದು ಸ್ಮರಿಸಿದರು.

ಮುಖ್ಯ ಅತಿಥಿಗಳಾಗಿ ಆಗಮಿಸಿದ್ದ ಜಿ.ಬಿ. ಹಳ್ಯಾಳ ಕರ್ನಾಟಕದ ಗಾಂಧಿ ಹರ್ಡೇಕರ ಮಂಜಪ್ಪನವರ ಜೀವನ ಮತ್ತು ಸಂದೇಶ ಕುರಿತು ಉಪನ್ಯಾಸ ನೀಡಿ, ಮಂಜಪ್ಪನವರು ಧೀರ ಹಾಗೂ ದಿಟ್ಟ ಚಿಂತಕರಾಗಿದ್ದರು. ಬಸವತತ್ತ್ವ ಪ್ರಚಾರದ ಜೊತೆಗೆ ಕರ್ನಾಟಕ ಏಕೀಕರಣ ಹೋರಾಟದಲ್ಲಿ ಮುಂಚೂಣಿಯಲ್ಲಿದ್ದು ಜನಜಾಗೃತಿ ಮೂಡಿಸಿದ ಮಹಾನ್ ಚೇತನ ಎಂದು ಬಣ್ಣಿಸಿದರು.

ಇದೇ ಸಂದರ್ಭ ಜಿಪಂ ಮಾಜಿ ಅಧ್ಯಕ್ಷ ಪ್ರಭಣ್ಣ ಹುಣಸಿಕಟ್ಟಿ ಹಾಗೂ ನೀಲಮ್ಮ ಹುಣಸಿಕಟ್ಟಿ ದಂಪತಿಯ ಸಾಮಾಜಿಕ ಸೇವೆ ಮತ್ತು ಆದರ್ಶ ದಾಂಪತ್ಯವನ್ನು ಗೌರವಿಸಿ ಪೂಜ್ಯರು ಸನ್ಮಾನಿಸಿದರು. ಸಮಾರಂಭದಲ್ಲಿ ಲಿಂಗಾಯತ ಪ್ರಗತಿಶೀಲ ಸಂಘದ ಅಧ್ಯಕ್ಷ ಡಾ. ಉಮೇಶ ಪುರದ ಸ್ವಾಗತಿಸಿದರು. ವಚನ ಹಳ್ಯಾಳ ಧರ್ಮಗ್ರಂಥ ಪಠಣ, ಮಹಾಂತೇಶ ಏಳಳ್ಳಿ ವಚನ ಚಿಂತನ ನಡೆಸಿಕೊಟ್ಟರು. ಪ್ರೊ. ಶಿವಬಸವ ಗಡ್ಡದಮಠ ಹಾಗೂ ಡಾ. ಹನುಮಂತ ಹೂಗಾರ ವಚನ ಸಂಗೀತ ಸೇವೆ ಸಲ್ಲಿಸಿದರು.

ದಾಸೋಹ ಸೇವೆಯನ್ನು ರವೀಂದ್ರ ಏಳಳ್ಳಿ ಮತ್ತು ಸಹೋದರರು, ಡಾ. ಪ್ರಸಾದ ರೂಡಗಿ ಹಾಗೂ ಪ್ರಭಣ್ಣ ಹುಣಸಿಕಟ್ಟಿ ನೆರವೇರಿಸಿದರು. ವೇದಿಕೆಯಲ್ಲಿ ಈಶಣ್ಣ ಮುನವಳ್ಳಿ, ಬಾಲಚಂದ್ರ ಭರಮಗೌಡರ, ದಾನಯ್ಯ ಗಣಾಚಾರಿ, ವಿರೂಪಾಕ್ಷಪ್ಪ ಬಳೊಳ್ಳಿ, ಉಮೇಶ ನಾಲ್ವಾಡ, ಡಾ. ಪ್ರಭು ಗಂಜಾಳ, ಡಾ. ಆದೇಶ ಅಂಗಡಿ, ಸೋಮು ಪುರಾಣಿಕ, ಎಸ್.ಐ. ಪಟ್ಟೇದ, ಕೆ.ಎಸ್. ಕೋರಿಮಠ ಸೇರಿದಂತೆ ಹಲವು ಗಣ್ಯರು ಉಪಸ್ಥಿತರಿದ್ದರು.