ಮಂಗಳೂರಿಗರು ನಕ್ಕರೆ ಹಾಸ್ಯ ತಲುಪಿದೆ ಎಂದರ್ಥ: ಡುಂಡಿರಾಜ್‌

ಮಂಗಳೂರು : ಮಂಗಳೂರಿನ ಜನ ಯಾವುದೇ ಹಾಸ್ಯಕ್ಕೆ ಸುಲಭದಲ್ಲಿ ನಗುವುದಿಲ್ಲ. ಹಾಸ್ಯಕ್ಕೆ ನಕ್ಕರು ಎಂದರೆ ಆ ಹಾಸ್ಯ ಅವರಿಗೆ ತಲುಪಿದೆ ಎಂದರ್ಥ. ಇಲ್ಲಿ ಯಶಸ್ವಿಯಾದರೆ, ಎಲ್ಲಿ ಹೋದರೂ ಯಶಸ್ವಿ ಆಗಬಹುದು ಎಂದುಕೊಳ್ಳಬಹುದು. ನನ್ನ ಹಾಸ್ಯಗಳಿಗೆ ಮಂಗಳೂರಿನ ಜನ ನಗುತ್ತಿದ್ದರು ಎಂದು ಖ್ಯಾತ ಕವಿ, ವಾಗ್ಮಿ ಎಚ್. ಡುಂಡಿರಾಜ್ ಹೇಳಿದರು.

ಕನ್ನಡ ಸಾಹಿತ್ಯ ಪರಿಷತ್ತು ಮಂಗಳೂರು ತಾಲೂಕು ಘಟಕ, ಚೂಂತಾರು ಸರೋಜಿನಿ ಭಟ್ ಪ್ರತಿಷ್ಠಾನ ಮಂಗಳೂರು ಹಾಗೂ ಮಂಗಳೂರು ಹವ್ಯಕ ಸಭಾ ಆಶ್ರಯದಲ್ಲಿ ನಗರದ ನಂತೂರು ಶ್ರೀ ಭಾರತೀ ಕಾಲೇಜು ಸಭಾಂಗಣದಲ್ಲಿ ನಡೆದ ಡುಂಡಿರಾಜ್‌ ಅವರ ಜನಪ್ರಿಯ ಆತ್ಮಕಾದಂಬರಿ ‘ಡುಂಡಿಯಾತ್ರೆ’ ಕೃತಿ ಪರಿಚಯ ಮತ್ತು ‘ಸಾಹಿತ್ಯ ಸಂವಾದ’ ಕಾರ್ಯಕ್ರಮ ‘ಡುಂಡಿರಾಜರ ದಂಡಯಾತ್ರೆ’ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.ಯುವಜನತೆಗೆ ಸ್ಪೂರ್ತಿ ನೀಡುವ ಲೇಖನ ಸಹಿತ ನನ್ನ ‘ಡುಂಡಿರಾಜರ ದಂಡೆಯಾತ್ರೆ’ ಆತ್ಮಕಾದಂಬರಿ ಪ್ರಸ್ತುತ ಪಡಿಸಿದ್ದೇನೆ. ನನ್ನ ಈ ಆತ್ಮಕಾದಂಬರಿಯಲ್ಲಿ ಬಾಲ್ಯದಿಂದ ನಿವೃತ್ತಿವರೆಗಿನ ಒಂಬತ್ತು ನಿಲ್ದಾಣಗಳಂತೆ, ನಡುವೆ ನಿಲುಗಡೆ ಕೊಟ್ಟು ಆತ್ಮಕಾದಂಬರಿ ಬರೆದಿದ್ದೇನೆ ಎಂದು ತಿಳಿಸಿದರು.ಮಂಗಳೂರು ಕರ್ಮಭೂಮಿ:

ನನ್ನ ಜನ್ಮಭೂಮಿ ಉಡುಪಿ. ನನ್ನ ಕರ್ಮಭೂಮಿ ಮಂಗಳೂರು. 36 ವರ್ಷದ ಬ್ಯಾಂಕ್‌ ಉದ್ಯೋಗದಲ್ಲಿ 13 ವರ್ಷ ಮಂಗಳೂರಿನಲ್ಲಿ ಕಳೆದಿದ್ದೇನೆ. ನನ್ನ ಮೊದಲ ಕವನ ಸಂಕಲನ ಪ್ರಕಟವಾಗಿದ್ದು ಮಂಗಳೂರಿನಲ್ಲಿ. ನನ್ನ ಸಾಹಿತ್ಯಕ್ಕೆ ಮಂಗಳೂರಿನ ಸಾಹಿತ್ಯಾಸಕ್ತರ ಪ್ರೋತ್ಸಾಹ ಸಿಕ್ಕಿದೆ ಎಂದರು.

‘ಮಂಗಳೂರಿನವರು ನಗೋದಿಲ್ಲ ಎಂದು ಹೇಳಿದವರು ಯಾರು, ಸದಾ ನಗುವ ಸದಾನಂದ ಗೌಡರು ಎಲ್ಲಿಯವರು? ‘ದಕ್ಷಿಣ ಕನ್ನಡ ಜಿಲ್ಲೆಯವರು. ಸದಾ ತೆರೆದಿರುತ್ತಾರೆ ತಮ್ಮ 32 ಹಲ್ಲು. ನಗು ನಗುತ್ತಾ ಮಾತನಾಡುತ್ತಾರೆ ಶ್ರದ್ಧಾಂಜಲಿ ಸಭೆಯಲ್ಲೂ’ ಮತ್ತಿತರ ಹನಿಗವನ ವಾಚಿಸಿ ರಂಜಿಸಿದರು.ನನ್ನ ಸಾಹಿತ್ಯದ ಬಗ್ಗೆ ತಿಳಿದಿರುವ ಭುವನೇಶ್ವರಿ ಹೆಗಡೆಯವರದು ಗದ್ಯದಲ್ಲಿ ಹಾಸ್ಯ, ನನ್ನದು ಪದ್ಯದಲ್ಲಿ ಹಾಸ್ಯ. ಕೆಲವರದು ‘ಮದ್ಯದಲ್ಲಿ’ (ಮದ್ಯ ಕುಡಿದುಕೊಂಡು) ಹಾಸ್ಯ ಎಂದು ಪ್ರೇಕ್ಷಕರನ್ನು ನಗೆಗಡಲಲ್ಲಿ ತೇಲಿಸಿದರು.

ಹಾಸ್ಯ ಸಾಹಿತಿ ಭುವನೇಶ್ವರಿ ಹೆಗಡೆ ಮಾತನಾಡಿ, ಡುಂಡಿರಾಜರ ಆತ್ಮಕಾದಂಬರಿ ಶ್ರೀಮಂತ ಪುಸ್ತಕ ಇದಾಗಿದೆ. ಒಳಗಡೆ ಇರುವ ಶ್ರೀಮಂತಿಕೆ ಓದಿದ ಬಳಿಕ ತಿಳಿಯಬಹುದು. ಕನ್ನಡದ ಮನಸ್ಸುಗಳು ಅಸ್ವಾದಿಸಬಹುದಾದ ಶುದ್ಧ ಕನ್ನಡದ ಸಾಹಿತ್ಯ ಇದು. ಪದಗಳನ್ನು ಹಾಸ್ಯಮಯವಾಗಿ ಮೂಡಿಸುವಲ್ಲಿ ಡುಂಡಿರಾಜರು ಸಿದ್ದಹಸ್ತರು ಎಂದರು.ಕನ್ನಡ ಸಾಹಿತ್ಯ ಪರಿಷತ್‌ ಮಂಗಳೂರು ಘಟಕದ ಅಧ್ಯಕ್ಷ ಡಾ.ಮಂಜುನಾಥ ರೇವಣ್ಕರ್ ಅಧ್ಯಕ್ಷತೆ ವಹಿಸಿದ್ದರು.

ದ.ಕ. ಕಸಾಪ ನಿಕಟಪೂರ್ವ ಅಧ್ಯಕ್ಷ ಪ್ರದೀಪ ಕುಮಾರ್ ಕಲ್ಕೂರ, ಮಂಗಳೂರು ಹವ್ಯಕ ಸಭಾ ಅಧ್ಯಕ್ಷ ದಿವಾಣ ಗೋವಿಂದ ಭಟ್, ಕಸಾಪ ಕೇರಳ ಗಡಿನಾಡು ಘಟಕದ ಅಧ್ಯಕ್ಷ ಡಾ.ಜಯಪ್ರಕಾಶ್ ತೊಟ್ಟೆತ್ತೋಡಿ, ಕಸಾಪ ಗೌರವ ಕೋಶಾಧಿಕಾರಿ ಸುಬ್ರಾಯ ಭಟ್‌ ಮತ್ತಿತರರು ಇದ್ದರು.ಕಸಾಪ ಕಾರ್ಯದರ್ಶಿ ಗಣೇಶ್‌ ಪ್ರಸಾದ್‌ ಜೀ ಸ್ವಾಗತಿಸಿದರು. ಕಾರ್ಯದರ್ಶಿ ಡಾ.ಮುರಲೀಮೋಹನ ಚೂಂತಾರು ನಿರೂಪಿಸಿದರು.