ಹಗರಿಬೊಮ್ಮನಹಳ್ಳಿ ಪುರಸಭೆ ಅಧ್ಯಕ್ಷರಾಗಿ ನೆಲ್ಲು ಇಸ್ಮಾಯಿಲ್ ಆಯ್ಕೆ ಬಹುತೇಕ ಖಚಿತ
ಸಾರಾಂಶ
ಮುಸ್ಲಿಂ ಜನಾಂಗದ ಪ್ರಶ್ನಾತೀತ ಹಿರಿಯ ನಾಯಕ ನೆಲ್ಲು ಇಸ್ಮಾಯಿಲ್ ತಮ್ಮ ರಾಜಕೀಯ ಜೀವನದುದ್ದಕ್ಕೂ ಕಾಂಗ್ರೆಸ್ ಪಕ್ಷಕ್ಕೆ ಒಲವು ತೋರಿಸಿದ್ದಾರೆ.
ಬಿ.ಲಕ್ಷ್ಮೀಕಾಂತಸಾ
ಸ್ಥಳೀಯ ಕಾಂಗ್ರೆಸ್ ಹೈಕಮಾಂಡ್ ಹಾಗೂ ಮಾಜಿ ಶಾಸಕ ಭೀಮಾನಾಯ್ಕ ಆಪ್ತ ಬಳಗದ ಹಾಗೂ ಮುಸ್ಲಿಂ ಜನಾಂಗದ ಪ್ರಶ್ನಾತೀತ ಹಿರಿಯ ನಾಯಕ ನೆಲ್ಲು ಇಸ್ಮಾಯಿಲ್ ತಮ್ಮ ರಾಜಕೀಯ ಜೀವನದುದ್ದಕ್ಕೂ ಕಾಂಗ್ರೆಸ್ ಪಕ್ಷಕ್ಕೆ ಒಲವು ತೋರಿಸಿದ್ದಾರೆ. ಅದರಲ್ಲೂ ಕಳೆದ ಎಂಟು ವರ್ಷದಿಂದ ಕಾಂಗ್ರೆಸ್ ಪಕ್ಷದ ನಿಷ್ಠಾವಂತ ಮುಖಂಡರಾಗಿಯೇ ಪಕ್ಷದ ವರಿಷ್ಠರ ಗಮನ ಸೆಳೆದಿದ್ದಾರೆ.
ವ್ಯಾಪಾರದ ಮೂಲಕ ತಾಲೂಕಿನ ರೈತರ ವಿಶ್ವಾಸ ಗಳಿಸಿರುವ ನೆಲ್ಲು ಇಸ್ಮಾಯಿಲ್ ಜೀವಪರ ಕಾಳಜಿ ಹೊಂದಿದವರು. ಬಡತನದಿಂದ ಮೇಲೆ ಬಂದು ಸಾಕಷ್ಟು ಪ್ರಗತಿ ಕಂಡವರು. ನಾಲ್ಕು ದಶಕಗಳ ರಾಜಕೀಯ ಜೀವನದಲ್ಲಿ ಕಪ್ಪು ಚುಕ್ಕೆ ಇಲ್ಲದ ಸರಳ ಮತ್ತು ಪರಸ್ಪರ ಸಮನ್ವಯದೊಂದಿಗೆ ತಾಲೂಕಿನ ಬಹುತೇಕ ಸಮಾಜದವರ ವಿಶ್ವಾಸಕ್ಕೆ ಪಾತ್ರರಾಗಿದ್ದಾರೆ.ಪಟ್ಟಣದ ಆಡಳಿತ ಎಂಟು ವರ್ಷದ ಹಿಂದೆ ಪುರಸಭೆ ದರ್ಜೆಗೇರಿದಾಗ ನಡೆದ ಮೊದಲ ಚುನಾವಣೆಯಲ್ಲಿ ಪಕ್ಷೇತರರಾಗಿ ಗೆದ್ದಿದ್ದರು. ಮೂರು ಬಾರಿ ನಡೆದ ಅಧ್ಯಕ್ಷರ ಆಯ್ಕೆಯಲ್ಲಿ ಯಾವುದೇ ರಾಜಕೀಯ ಒತ್ತಡ, ಹಣದ ಆಮಿಷಗಳಿಗೆ ಮಣಿಯದೇ ಕಾಂಗ್ರೆಸ್ ಪಕ್ಷದ ಸದಸ್ಯರಾದ ಜೋಗಿ ಹನಮಂತಪ್ಪ, ತಳವಾರ್ ರಾಘು, ಕವಿತಾ ಹಾಲ್ದಾಳ್ ಅಧ್ಯಕ್ಷರಾಗಿ ಆಯ್ಕೆಯಾಗುವಲ್ಲಿ ಮಹತ್ವದ ಪಾತ್ರ ವಹಿಸಿದ್ದರು.
ಆದರೆ ಪಕ್ಕದ ಮರಿಯಮ್ಮನಹಳ್ಳಿಯ ಪಪಂಗೆ ಅಧ್ಯಕ್ಷರಾಗಿ ಮುಸ್ಲಿಂ ಸದಸ್ಯರು ಆಯ್ಕೆಯಾದ ಹಿನ್ನೆಲೆಯಲ್ಲಿ ನೆಲ್ಲು ಇಸ್ಮಾಯಿಲ್ ಅವರಿಗೆ ಹಿನ್ನಡೆಯಾಯಿತು. ಕುರುಬ ಸಮಾಜದ ಮರಿರಾಮಣ್ಣ ಅಧ್ಯಕ್ಷರಾಗಿ ಆಯ್ಕೆಯಾಗುವ ವೇಳೆ ಪಕ್ಷದ ೮ ಸದಸ್ಯರ ತೀವ್ರ ವಿರೋಧವನ್ನು ಶಮನಗೊಳಿಸಿ ಮರಿರಾಮಣ್ಣನವರ ಸುಗಮ ಆಯ್ಕೆಗೂ ನೆಲ್ಲು ಇಸ್ಮಾಯಿಲ್ ಶ್ರಮಿಸಿದ್ದರು.