ರಾಜ್ಯದ ಜೈಲಿನ ಕ್ಯಾಂಟೀನ್ಗಳಿನ್ನು ಕ್ಯಾಶ್ಲೆಸ್!
ಸಾರಾಂಶ
ಕರುನಾಡಿನ ಸೆರೆಮನೆಗಳಲ್ಲಿ ಕಾಂಚಾಣ ಕುಣಿತಕ್ಕೆ ನಿರ್ಬಂಧ ಹಾಕಲು ಮುಂದಾಗಿರುವ ರಾಜ್ಯ ಕಾರಾಗೃಹ ಮತ್ತು ಸುಧಾರಣಾ ಇಲಾಖೆ, ಈಗ ಜೈಲಿನ ಕ್ಯಾಂಟೀನ್ಗಳಲ್ಲಿ ಕೈದಿಗಳಿಗೆ ಮಾಸಿಕ 5 ಸಾವಿರ ರು. ಮಿತಿಯಲ್ಲಿ ‘ನಗದು ರಹಿತ (ಕ್ಯಾಶ್ಲೆಸ್)’ ವ್ಯವಸ್ಥೆ ಜಾರಿಗೊಳಿಸಿದೆ.
ಗಿರೀಶ್ ಮಾದೇನಹಳ್ಳಿ
ಕರುನಾಡಿನ ಸೆರೆಮನೆಗಳಲ್ಲಿ ಕಾಂಚಾಣ ಕುಣಿತಕ್ಕೆ ನಿರ್ಬಂಧ ಹಾಕಲು ಮುಂದಾಗಿರುವ ರಾಜ್ಯ ಕಾರಾಗೃಹ ಮತ್ತು ಸುಧಾರಣಾ ಇಲಾಖೆ, ಈಗ ಜೈಲಿನ ಕ್ಯಾಂಟೀನ್ಗಳಲ್ಲಿ ಕೈದಿಗಳಿಗೆ ಮಾಸಿಕ 5 ಸಾವಿರ ರು. ಮಿತಿಯಲ್ಲಿ ‘ನಗದು ರಹಿತ (ಕ್ಯಾಶ್ಲೆಸ್)’ ವ್ಯವಸ್ಥೆ ಜಾರಿಗೊಳಿಸಿದೆ.
ಅಂತೆಯೇ ಜೈಲಿನ ಆವರಣದಲ್ಲಿರುವ ಕ್ಯಾಂಟೀನ್ಗಳಲ್ಲಿ ಬೆರಳು ಮುದ್ರೆ (ಥಂಬಿಂಗ್) ಹಾಗೂ ಮುಖ ಚಹರೆ (ಫೇಶಿಯಲ್) ನೀಡಿ ತಾವು ಬಯಸಿದ ವಸ್ತುಗಳನ್ನು (ನಿಷೇಧಿತ ವಸ್ತುಗಳು ಹೊರತುಪಡಿಸಿ) ಕೈದಿಗಳು ಖರೀದಿಸಬಹುದಾಗಿದೆ. ಇದಕ್ಕಾಗಿ ಹಣ ನೇರವಾಗಿ ಕೈದಿಗಳ ಖಾತೆಯಿಂದ ಕಾರಾಗೃಹ ಇಲಾಖೆಗೆ ವರ್ಗಾವಣೆಯಾಗಲಿದೆ.ಕಾರಾಗೃಹಗಳಲ್ಲಿ ಕಳ್ಳ ಹಾದಿಯಲ್ಲಿ ಹಣ ಹರಿದು ಬಂದು ಕಾನೂನುಬಾಹಿರ ಚಟುವಟಿಕೆಗಳಿಗೆ ಕಾರಣವಾಗುತ್ತಿದೆ ಎಂಬ ಆರೋಪಗಳು ಕೇಳಿ ಬಂದಿದ್ದವು. ಈ ಹಿನ್ನೆಲೆಯಲ್ಲಿ ಈ ಹಣಕಾಸು ಅಕ್ರಮಗಳಿಗೆ ಕಡಿವಾಣ ಹಾಕಲು ಯೋಜಿಸಿದ ಕಾರಾಗೃಹ ಇಲಾಖೆ ಡಿಜಿಪಿ ಅಲೋಕ್ ಕುಮಾರ್ ಅವರು, ಜೈಲುಗಳಲ್ಲಿ ‘ನಗದು ರಹಿತ ವ್ಯವಸ್ಥೆ’ ಅನುಷ್ಠಾನಗೊಳಿಸಲು ಹೆಜ್ಜೆಯಿಟ್ಟಿದ್ದಾರೆ.
ಹೇಗೆ ವ್ಯವಸ್ಥೆ ?:
ಅಂತೆಯೇ ಜೈಲುಗಳ ಕ್ಯಾಂಟೀನ್ಗಳಲ್ಲಿ ನಗದು ರಹಿತ ವ್ಯವಸ್ಥೆ ಜಾರಿಗೊಳಿಸಲಾಗಿದೆ. ಕ್ಯಾಂಟೀನ್ನಲ್ಲಿ ವಸ್ತು ಖರೀದಿಸುವಾಗ ಕೈದಿಗಳು ಥಂಬಿಂಗ್ ಹಾಗೂ ಫೇಶಿಯಲ್ ರೆಕಗ್ನೇಷನ್ ಮೂಲಕ ವ್ಯವಹರಿಸಬಹುದು. ಪ್ರತಿ ತಿಂಗಳು 5 ಸಾವಿರ ರು. ಅನ್ನು ನಿಗದಿಗೊಳಿಸಲಾಗಿದ್ದು. ಇಷ್ಟು ಹಣದಲ್ಲಿ ಅವರು ವಹಿವಾಟು ನಡೆಸಬೇಕು. ಬಳಿಕ ಆ ಹಣವು ಕೈದಿಗಳ ಬ್ಯಾಂಕ್ ಖಾತೆಯಿಂದ ವರ್ಗಾವಣೆಯಾಗಲಿದೆ ಎಂದು ಅಧಿಕಾರಿಗಳು ವಿವರಿಸಿದ್ದಾರೆ.
ಕೈದಿಗಳ ಖಾತೆಗೆ ಹಣ
ಕೈದಿಗಳಿಗೆ ಎಟಿಎಂ ಕಾರ್ಡ್ ಕೊಡುವುದಿಲ್ಲ. ಕಾರಾಗೃಹದ ಅಧಿಕಾರಿಗಳ ಬಳಿ ಅವರ ಬ್ಯಾಂಕ್ ಪಾಸ್ ಬುಕ್ ಇರುತ್ತದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.
ಜೈಲುಗಳ ಕ್ಯಾಂಟೀನ್ಗಳಲ್ಲಿ ಅಕ್ರಮಗಳ ತಡೆಗೆ ‘ನಗದು ರಹಿತ’ ವ್ಯವಸ್ಥೆ ಜಾರಿಗೊಳಿಸಲಾಗಿದೆ. ಈಗ ಕೈದಿಗಳ ಪ್ರತಿ ಪೈಸೆ ಖರ್ಚಿಗೂ ಲೆಕ್ಕ ಸಿಗಲಿದೆ.