ಬೇರೆ ರಾಜ್ಯಗಳಲ್ಲೂ ಭರತ ನಾಟ್ಯ ಪ್ರದರ್ಶನಕ್ಕೆ ಸಹಕಾರ: ವಿದೂಷಿ ಅಂಕಿತ ಪ್ರಜ್ವಲ್

- ರಾಗ ಮಯೂರಿ ಅಕಾಡೆಮಿಯಿಂದ 7 ನೇ ವರ್ಷದ ಗೆಜ್ಜೆ ಪೂಜೆ। ಗುರು ವಂದನೆ ಕಾರ್ಯಕ್ರಮ

ಕನ್ನಡಪ್ರಭ ವಾರ್ತೆ ನರಸಿಂಹರಾಜಪುರ

ಗಡಿನಾಡು ಕನ್ನಡ ಸಂಸ್ಕೃತಿ ಇಲಾಖೆ ಸಹಕಾರದಲ್ಲಿ ರಾಗ ಮಯೂರಿ ಅಕಾಡೆಮಿ ವಿದ್ಯಾರ್ಥಿನಿಯರು ಬೇರೆ, ಬೇರೆ ರಾಜ್ಯಗಳಲ್ಲೂ ತಿಂಗಳಿಗೆ ಒಂದು ಭರತ ನಾಟ್ಯ ಪ್ರದರ್ಶನ ನಡೆಸುತ್ತಿದ್ದಾರೆ ಎಂದು ರಾಗ ಮಯೂರಿ ಅಕಾಡೆಮಿ ಮುಖ್ಯಸ್ಥೆ ಹಾಗೂ ವಿದೂಷಿ ಅಂಕಿತ ಪ್ರಜ್ವಲ್ ತಿಳಿಸಿದರು.

ಅಗ್ರಹಾರದ ಬ್ರಾಹ್ಮಣ ಮಹಾ ಸಭಾದ ಸಭಾಂಗಣದಲ್ಲಿ ನಡೆದ 7 ನೇ ವರ್ಷದ ಶಾರದಾ ಪೂಜೆ, ಗೆಜ್ಜೆ ಪೂಜೆ, ಹಾಗೂ ಗುರು ವಂದನಾ ಕಾರ್ಯ ಕ್ರಮದ ಅಧ್ಯಕ್ಷತೆ ವಹಿಸಿ ಮಾತನಾಡಿ ರಾಗಮಯೂರಿ ಅಕಾಡೆಮಿಯಲ್ಲಿ 150 ವಿದ್ಯಾರ್ಥಿಗಳು ನೃತ್ಯ ಕಲಿಯುತ್ತಿದ್ದಾರೆ. ಇವರಲ್ಲಿ 47 ವಿದ್ಯಾರ್ಥಿ ಗಳು ಜೂನಿಯರ್ ಪರೀಕ್ಷೆ ಮುಗಿಸಿದ್ದಾರೆ. 30 ವಿದ್ಯಾರ್ಥಿಗಳು ಸಂಗೀತ ಕಲಿಯುತ್ತಿದ್ದು ಇವರಲ್ಲಿ ಈಗಾಗಲೇ 4 ವಿದ್ಯಾರ್ಥಿಗಳು ಜೂನಿಯರ್ ಪರೀಕ್ಷೆ ಮುಗಿಸಿದ್ದಾರೆ. ಈ ವರ್ಷ ರಾಗಮಯೂರಿ ಅಕಾಡೆಮಿ ವಿದ್ಯಾರ್ಥಿಗಳು 50 ಕ್ಕೂ ಹೆಚ್ಚು ಭರತ ನಾಟ್ಯ ಪ್ರದರ್ಶನ ನೀಡಿದ್ದಾರೆ ಎಂದರು.

ಮುಖ್ಯ ಅತಿಥಿಯಾಗಿದ್ದ ತಾಲೂಕು ಬ್ರಾಹ್ಮಣ ಮಹಾ ಸಭಾದ ಕಾರ್ಯದರ್ಶಿ ಸುರೇಶ್ ಮಾತನಾಡಿ ಮಹಿಳೆಯರು ಹಣೆಗೆ ಕುಂಕುಮ ಹಚ್ಚು ವುದರಿಂದ, ಕೈಗೆ ಬಳೆ ಇಡುವುದರಿಂದ ಆರೋಗ್ಯ ವೃದ್ಧಿಸಲಿದೆ. ಹಿಂದೂ ಸಂಸ್ಕೃತಿಯಲ್ಲಿ ಪ್ರತಿಯೊಂದು ಸಂಪ್ರದಾಯಕ್ಕೂ ವೈಜ್ಞಾನಿಕ ಕಾರಣ ಗಳಿವೆ ಎಂದರು. ಸಭೆಯಲ್ಲಿ ರಾಗಮಯೂರಿ ಅಕಾಡೆಮಿ ಕಾರ್ಯದರ್ಶಿ ಪ್ರಜ್ವಲ್, ಸಂಗೀತ ವಿದೂಷಿ ಗಾಯಿತ್ರಿ ನಾಗರಾಜ್ ಇದ್ದರು.

ವಿದ್ಯಾರ್ಥಿಗಳು ದೀಪ ಹಚ್ಚಿ ಪ್ರಾರ್ಥನೆ ಮಾಡಿದರು ನೃತ್ಯ ಹಾಗೂ ಸಂಗೀತದ ಪರಿಕರಗಳಿಗೆ ಪೂಜೆ ಸಲ್ಲಿಸಲಾಯಿತು. ನಂತರ ವಿದ್ಯಾರ್ಥಿನಿ ಯರಿಂದ ಸಂಗೀತ, ನೃತ್ಯ ಕಾರ್ಯಕ್ರಮ ನಡೆಯಿತು.ಸಂಗೀತ ವಿದ್ಯಾರ್ಥಿಗಳು ವಿದೂಷಿ ಗಾಯಿತ್ರಿ ನಾಗರಾಜ್ ಅವರನ್ನು ಗೌರವಿಸಿದರು.ನೃತ್ಯ ವಿದ್ಯಾರ್ಥಿಗಳು ವಿದೂಷಿ ಅಂಕಿತ ಪ್ರಜ್ವಲ್ ಅವರನ್ನು ಗೌರವಿಸಿದರು. ರಾಗ ಮಯೂರಿ ಅಕಾಡೆಮಿ ವತಿಯಿಂದ ತಾಲೂಕು ಬ್ರಾಹ್ಮಣ ಮಹಾ ಸಭಾದ ಕಾರ್ಯದರ್ಶಿ ಸುರೇಶ್ ಅವರನ್ನು ಸನ್ಮಾನಿಸಲಾಯಿತು.