ಪ್ರಜಾಸೇವಾ ಮೂಲಕ ಗ್ರಾಮೀಣ ಜನರ ಸಮಸ್ಯೆಗೆ ಶೀಘ್ರ ಪರಿಹಾರ : ಸಿಎಸ್. ಪೂರ್ಣಿಮ

ಹುಲ್ಲೆಹಳ್ಳಿ ಗ್ರಾಮ ಪಂಚಾಯಿತಿ ಆವರಣದಲ್ಲಿ ನಡೆದ ಹೋಬಳಿ ಮಟ್ಟದ ಪ್ರಜಾಸೇವಾ ಆಂದೋಲನ

ಕನ್ನಡಪ್ರಭ ವಾರ್ತೆ ಬೀರೂರು

ಜನರ ಸಮಸ್ಯೆಗಳನ್ನು ಅವರಿದ್ದಲ್ಲಿಗೇ ತೆರಳಿ ಆಲಿಸಿ ಅವುಗಳನ್ನು ಬಗೆಹರಿಸುವ ಆಶಯ ಪ್ರಜಾಸೇವಾ ಆಂದೋಲನದ ಉದ್ದೇಶ ಎಂದು ತಹಸೀಲ್ದಾರ್ ಪೂರ್ಣಿಮಾ ಹೇಳಿದರು.

ಬೀರೂರು ಹೋಬಳಿ ಹುಲ್ಲೆಹಳ್ಳಿ ಗ್ರಾಪಂ ಆವರಣದಲ್ಲಿ ಶನಿವಾರ ನಡೆದ ಹೋಬಳಿ ಮಟ್ಟದ ಪ್ರಜಾಸೇವಾ ಆಂದೋಲನ ಉದ್ಘಾಟಿಸಿ ಮಾತನಾಡಿದರು. ಪ್ರತಿಯೊಂದು ಇಲಾಖೆ ಅಧಿಕಾರಿಗಳು ಹಾಜರಿದ್ದು ಜನರ ಸಮಸ್ಯೆಯನ್ನು ಸ್ಥಳದಲ್ಲೆ ಆಲಿಸಿ ಪರಿಹರಿಸಬಹುದಾದಂತದ್ದನ್ನು ಇಲ್ಲಿಯೇ ಬಗೆಹರಿಸುವ, ಇಲ್ಲದಿದ್ದರೆ ಸಮಸ್ಯೆಗಳ ಪರಿಹಾರದ ಸಮಯ ತಿಳಿಸಿ ಜನರಿಗೆ ಸಮಸ್ಯೆ ಪರಿಹಾರ ನೀಡುವ ವಿಶಿಷ್ಠ ಕಾರ್ಯಕ್ರಮ ಇದಾಗಿದೆ ಎಂದರು.

ಪ್ರಾಸ್ತಾವಿಕವಾಗಿ ತಾಲೂಕು ಪಂಚಾಯಿತಿ ಇಓ ಸಿಆರ್.ಪ್ರವೀಣ್ ಮಾತನಾಡಿ ಪ್ರಜಾಸೇವಾ ಆಂದೋಲನದ ಜೊತೆ ಗ್ರಾಮೀಣ ಪ್ರದೇಶಗಳಲ್ಲಿ ಹಲವು ವರ್ಷಗಳಿಂದ ವಾಸವಿದ್ದು, ಸೂಕ್ತ ಹಕ್ಕುಪತ್ರ ಅಥವಾ ದಾಖಲೆಗಳಿಲ್ಲದ ಮನೆಗಳಿಗೆ ವಿದ್ಯುತ್ ಬಿಲ್ ಆಧಾರದ ಮೇಲೆ ‘ಈ-ಸ್ವತ್ತು’ (ಇ-ಆಸ್ತಿ) ಒದಗಿಸುವ ‘ಭೂ ಗ್ಯಾರಂಟಿ’ ಯೋಜನೆ ನ. 2ನೇ ವಾರದಿಂದ ಅನುಷ್ಠಾನಗೊಳಿಸಲಾಗುವುದು. ಇದಕ್ಕೆ ಯಾವುದೇ ನೋಂದಣಿ ಅಥವಾ ಇಸಿ ಅಗತ್ಯವಿಲ್ಲ.

ಕೃಷಿ ಜಮೀನಿನಲ್ಲಿ ಮನೆ ನಿರ್ಮಿಸಿಕೊಂಡಿರುವವರಿಗೂ ''''''''11ಬಿ ನೀಡಲು ಅವಕಾಶ ಕಲ್ಪಿಸಲಾಗಿದೆ. ಹಿಂದಿನ ನರೇಗಾ ಯೋಜನೆ ಬದಲಾಗಿ ಅನುಷ್ಠಾನಕ್ಕೆ ಬಂದಿರುವ ವಿಬಿಜಿ ರಾಮ್‌ಜಿ ಯೋಜನೆಯಡಿ ದನದ ಕೊಟ್ಟಿಗೆ, ಅಡಕೆ/ತೆಂಗಿನ ತೋಟ, ಕೃಷಿ ಹೊಂಡ ಮುಂತಾದ ವೈಯಕ್ತಿಕ ಸೌಲಭ್ಯ ಹಾಗೂ ಕೂಲಿ ಕಾರ್ಮಿಕರಿಗೆ ಉದ್ಯೋಗಾವಕಾಶ ನೀಡಲಾಗುವುದು . ತಾಲೂಕು ಆಡಳಿತವೇ ಸಾರ್ವಜನಿಕರ ಮನೆಬಾಗಿಲಿಗೆ ಬಂದು ಕುಂದುಕೊರತೆ ಆಲಿಸುತ್ತಿದ್ದು, ಹುಲ್ಲೇಹಳ್ಳಿ ಹಾಗೂ ಸುತ್ತ ಮುತ್ತಲಿನ ಸಾರ್ವಜನಿಕರು ನವೆಂಬರ್‌ನಿಂದ ಆರಂಭವಾಗುವ ಭೂ ಗ್ಯಾರಂಟಿ ಅಭಿಯಾನವನ್ನು ಸದುಪಯೋಗ ಪಡಿಸಿಕೊಳ್ಳಬೇಕು ಎಂದು ಕೋರಿದರು.

ಗ್ರಾಮದ ಕೆಂಚೇಗೌಡ ಮಾತನಾಡಿ, ನಮ್ಮ ಹುಲ್ಲೇಹಳ್ಳಿ ಗ್ರಾಮದ ಸುಮಾರು 40ಕ್ಕು ಹೆಚ್ಚಿನ ಬಡವರ ರೇಷನ್ ಕಾರ್ಡ ಗಳು ರದ್ದಾದ ಪರಿಣಾಮ ಅನೇಕರು ಇಂದು ಬೀದಿಗೆ ಬಂದಿದ್ದಾರೆ. ಅನೇಕ ಎಕರೆಗಟ್ಟಲೆ ಅಡಕೆ ತೋಟಗಳಿರುವ ಸಾಹುಕಾರರು ಬಿಪಿಲ್ ಕಾರ್ಡ ಬಳಸುತ್ತಿದ್ದಾರೆ. ನಮ್ಮಂತ ರೈತ ಬಡಕುಟುಂಬಗಳ ರೇಷನ್ ಕಿತ್ತುಕೊಂಡಿರುವುದು ಯಾಕೆ ಆಹಾರ ಇಲಾಖೆಯ ಅಧಿಕಾರಿಗಳು ಉತ್ತರಿಸುವಂತೆ ಕೋರಿದರು.

ಇದಕ್ಕೆ ಉತ್ತರಿಸಿದ ಆಹಾರ ನಿರೀಕ್ಷಕ ಶ್ರೀನಿವಾಸ್, ಆಹಾರ ಇಲಾಖೆಯ ಕೇಂದ್ರ ಐಟಿ ತಂಡ ರೇಷನ್ ಕಾರ್ಡ ಪಡೆಯುವಾಗ ಸಲ್ಲಿಸಿರುವ ಆಧಾರ್ ಕಾಡ್‌ರ್್ ಅನ್ನು ರೇಷನ್ ಕಾರ್ಡಗೆ ಲಿಂಕ್ ಮಾಡಿರುವ ಪರಿಣಾಮ, ಐಟಿ ಪಾವತಿ ಮತ್ತು ತೆರಿಗೆ ದಾರರು ಸೇರಿದಂತೆ ತಾಲ್ಲೂಕಿನಲ್ಲಿ 3ಸಾವಿರಕ್ಕು ಅಧಿಕ ಬಿಪಿಎಲ್ ಕಾರ್ಡದಾರರು ಅನರ್ಹರಾಗಿದ್ದಾರೆ. ಇದರಲ್ಲಿ ನಮ್ಮ ಪಾತ್ರವಿಲ್ಲ, ಬಿಪಿಎಲ್ ಕಾರ್ಡದಾರರಿಗೆ ಆದಾಯ ಮಿತಿ 1.20ಲಕ್ಷದೊಳಗಿರಬೇಕು ಎಂದು ಮಾಹಿತಿ ನೀಡಿದರು.

ಪಿಂಚಣಿ ಸ್ಥಗಿತಗೊಂಡ ಬಗ್ಗೆ ಅನೇಕ ಮಹಿಳೆಯರು ಅರ್ಜಿ ಸಲ್ಲಿಸಿದ್ದರು, ಇದಕ್ಕೆ ಉತ್ತರ ನೀಡಿದ ತಹಸೀಲ್ದಾರ್ ಪೂರ್ಣಿಮ, ಸರ್ಕಾರ ಯಾರಿಗೆ 65ವರ್ಷ ಮೇಲ್ಪಟ್ಟು ವಯಸ್ಸಾಗಿದೆ ಅಂತವರನ್ನು ಗುರುತಿಸಿ ನೀಡುತ್ತಿದೆ. ಅರ್ಹ ಪಿಂಚಣಿದಾರರಿಗೆ ಪಿಂಚಣಿ ಮುಂದುವರೆಯಲಿದೆ ಎಂದರು.

ಇನ್ನು ಕೆಲವು ಅರ್ಜಿದಾರರು ತಮಗೆ ನಿವೇಶನವಿಲ್ಲ, ಗ್ರಾಮಪಂಚಾಯ್ತಿಯಿಂದ ನಿವೇಶನ ನೀಡುವಂತೆ ಕೋರಿದ ಹಿನ್ನಲೆ ಯಲ್ಲಿ ಉತ್ತರಿಸಿದ ಇಒ ಪ್ರವೀಣ್, ಸದ್ಯ ವಸತಿ ರಹಿತರಿಗೆ ಪಂಚಾಯ್ತಿ ಮಟ್ಟದಲ್ಲಿ ನಿವೇಶನ ನೀಡಲು ಪಟ್ಟಿ ತಯಾರಿದ್ದು, ತಹಶೀಲ್ದಾರ್ ಗೆ ಸರ್ಕಾರಿ ಭೂಮಿ ನೀಡುವಂತೆ ಕೋರಲಾಗಿದೆ. ಅದು ಅನುಮೋದನೆಯಾದರೇ ಶೀಘ್ರವೇ ನಿವೇಶನ ನೀಡಲಾಗುವುದು ಎಂದು ಸಭೆಯಲ್ಲಿ ಉತ್ತರಿಸಿದರು.

ಹಂದಿಜೋಗಿ ಹಟ್ಟಿಯಲ್ಲಿ 40 ಕುಟುಂಬಗಳು ಗ್ರಾಮ ಠಾಣಾ ಅಲ್ಲದ ಖಾಸಗಿ ಜಮೀನಿನಲ್ಲಿ ಮನೆ ಕಟ್ಟಿಕೊಂಡು ವಾಸವಿ ದ್ದಾರೆ. ಅವರಿಗೆ ನಿವೇಶನ ಹಕ್ಕುಪತ್ರ ದೊರೆತಿಲ್ಲ ಎಂಬ ಅರ್ಜಿಗೆ ನಿಯಮಾವಳಿ ಪ್ರಕಾರ ಗ್ರಾಮ ಸಭೆ ನಡೆಸಿ ಕ್ರಮ ಕೈಗೊಳ್ಳ ಲಾಗುವುದು ಎಂದು ಸ್ಪಷ್ಟನೆ ನೀಡಿದರು.

ಕುಡಿಯುವ ನೀರಿನ ಸಮಸ್ಯೆ ಯ ಬಗ್ಗೆ, ಪಹಣಿ ತಿದ್ದುಪಡಿ ಸಮಸ್ಯೆ ,ಜಮೀನು ದಾರಿ ಬಗ್ಗೆ, ಅರ್ಜಿಗಳು ಸಲ್ಲಿಕೆಯಾದವು.

12 ಗಂಟೆಯಾದರು ಸಲ್ಲಿಕೆಯಾಗದ ಅರ್ಜಿಗಳು:

ಹುಲ್ಲೇಹಳ್ಳಿ ನಡೆದ ಪ್ರಜಾಸೇವಾ ಆಂದೋಲನದಲ್ಲಿ ತಹಸೀಲ್ದಾರ್ ಸೇರಿದಂತೆ ತಾಲೂಕಿನ 30ಇಲಾಖೆ ಅಧಿಕಾರಿಗಳು ಬೆ.11ಗಂಟೆಗೆ ಹಾಜರಿದ್ದರು. ತಹಸೀಲ್ದಾರ್ ಪೂರ್ಣಿಮ ಕಂದಾಯ ಅಧಿಕಾರಿಗಳನ್ನು ಎಷ್ಟು ಅರ್ಜಿ ಸಲ್ಲಿಕೆಯಾಗಿವೆ ಎಂದಾಗ ಒಂದು ಅರ್ಜಿ ಬಂದಿಲ್ಲ ಎಂದು ಉತ್ತರ ನೀಡಿದರು. ಇದಕ್ಕೆ ಪ್ರತಿಕ್ರಹಿಸಿದ ತಹಸೀಲ್ದಾರ್ ಈ ಪಂಚಾಯ್ತಿ ವ್ಯಾಪ್ತಿಯಲ್ಲಿ ಯಾವುದೇ ಸಮಸ್ಯೆಗಳಿಲ್ಲ ಆದ್ದರಿಂದ ಯಾವುದೇ ಅರ್ಜಿಗಳು ಬಂದಿಲ್ಲ. ಅಧಿಕಾರಿಗಳ ಕಾರ್ಯವೈಖರಿ ಉತ್ತಮವಾಗಿದೆ ಎಂದು ಹಸನ್ಮುಖರಾಗಿದ್ದು ವಿಶೇಷ.

ಕಾರ್ಯಕ್ರಮದಲ್ಲಿ ಗ್ರಾಮಪಂಚಾಯಿತಿ ಆಡಳಿತಾಧಿಕಾರಿ ಬಿ.ಎಸ್.ಗೌಡರ, ಹಿಂದುಳಿದ ವರ್ಗಗಳ ಇಲಾಖೆಯ ದೇವರಾಜ್, ಸಮಾಜ ಕಲ್ಯಾಣಾಧಿಕಾರಿ P.ನಟರಾಜ್, ಪಶು ವೈದ್ಯಾಧಿಕಾರಿ ಡಾ.ಉಮೇಶ್, ಬೀರೂರು ಉಪತಹಸೀಲ್ದಾರ್ ರವಿ ಕುಮಾರ್, ಆರ್.ಐ ಶ್ರೀನಿವಾಸ್ , ವಿಎ ನವೀನ್, ಹುಲ್ಲೇಹಳ್ಳಿ ಪಿಡಿಓ ಸತೀಶ್ ಎಂ.ಬಿ. ಇದ್ದರು.

7 ಬೀರೂರು 1

ಬೀರೂರು ಹೋಬಳಿ ಹುಲ್ಲೆಹಳ್ಳಿ ಗ್ರಾಪಂ ಆವರಣದಲ್ಲಿ ಶನಿವಾರ ನಡೆದ ಹೋಬಳಿ ಮಟ್ಟದ ಪ್ರಜಾಸೇವಾ ಆಂದೋಲನ ವನ್ನು ತಹಸೀಲ್ದಾರ್ ಪೂರ್ಣಿಮ ಉದ್ಘಾಟಿಸಿದರು. ಇಒ ಸಿ.ಆರ್.ಪ್ರವೀಣ್, ಉಪತಹಸೀಲ್ದಾರ್ ರವಿಕುಮಾರ್, ಆರ್.ಐ ಶ್ರೀನಿವಾಸ್ , ವಿಎ ನವೀನ್, ಹುಲ್ಲೇಹಳ್ಳಿ ಪಿಡಿಓ ಸತೀಶ್ ಎಂ.ಬಿ. ಸೇರಿದಂತೆ ಮತ್ತಿತರಿದ್ದರು.