ಶಿಕ್ಷಕರು ವಿದ್ಯಾರ್ಥಿಗಳ ಜೀವನ ರೂಪಿಸುವ ಶಿಲ್ಪಿಗಳು: ರಾಘವೇಂದ್ರ ಆನೇಗುಂದಿ

ಕನ್ನಡಪ್ರಭ ವಾರ್ತೆ ನರಗುಂದ

ಹದಿನಾರು ವರ್ಷಗಳ ನಂತರವೂ ಶಿಕ್ಷಕರನ್ನು ನೆನಪಿನಲ್ಲಿಟ್ಟುಕೊಂಡು, ಅವರನ್ನು ಆಹ್ವಾನಿಸಿ ಗೌರವಿಸುತ್ತಿರುವುದು ಹಾಗೂ ಹಳೆಯ ನೆನಪುಗಳನ್ನು ಮೆಲುಕು ಹಾಕುತ್ತಿರುವುದು ನಿಜಕ್ಕೂ ಹೆಮ್ಮೆ ಮತ್ತು ಸಂತಸದ ವಿಷಯ. ಈ ಗುರುವಂದನಾ ಸಂಸ್ಕಾರವು ಇಂದಿನ ಪಿಯುಸಿ ವಿದ್ಯಾರ್ಥಿಗಳಿಗೆ ಮಾದರಿಯಾಗಿದೆ ಎಂದು ಲಯನ್ಸ್ ಶಿಕ್ಷಣ ಸಂಸ್ಥೆಯ ನಿರ್ದೇಶಕ ರಾಘವೇಂದ್ರ ಆನೇಗುಂದಿ ಹೇಳಿದರು.

ಪಟ್ಟಣದ ಲಯನ್ಸ್ ಸ್ವತಂತ್ರ ಪದವಿ ಪೂರ್ವ ಕಾಲೇಜಿನ 2010-11ನೇ ಸಾಲಿನ ವಿದ್ಯಾರ್ಥಿಗಳು ಕಾಲೇಜು ಆವರಣದಲ್ಲಿ ಆಯೋಜಿಸಿದ್ದ ಗುರುವಂದನಾ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು. ವಿದ್ಯಾರ್ಥಿಗಳು ಗುರುವಿಗೆ ಸದಾ ಗೌರವ ನೀಡಬೇಕು. ಬದುಕಿನಲ್ಲಿ ಅಂದುಕೊಂಡ ಗುರಿ ತಲುಪಲು ಸಾಧ್ಯವಾಗದೇ ಯಶಸ್ಸು ಕೈತಪ್ಪಿದರೂ ವಿಚಲಿತರಾಗದೆ, ತೃಪ್ತಿ ಹಾಗೂ ಸಮಾಧಾನದ ಬದುಕು ನಡೆಸಿ ಜೀವನವನ್ನು ಸಾರ್ಥಕಗೊಳಿಸಿಕೊಳ್ಳಬೇಕು. ನಿಮ್ಮಂತೆಯೇ ನಿಮ್ಮ ಮಕ್ಕಳಿಗೂ ಉತ್ತಮ ಸಂಸ್ಕಾರವನ್ನು ಕಲಿಸಬೇಕು ಎಂದರು.

ಪ್ರಾಚಾರ್ಯ ಎಸ್.ಜಿ. ಜಕ್ಕಲಿ ಮಾತನಾಡಿ, ಲಯನ್ಸ್ ಕಾಲೇಜು ವಿದ್ಯಾರ್ಥಿಗಳಿಗೆ ಉತ್ತಮ ಸಂಸ್ಕಾರ ಹಾಗೂ ಗುಣಮಟ್ಟದ ಶಿಕ್ಷಣವನ್ನು ನೀಡಿದೆ. 16 ವರ್ಷಗಳ ನಂತರವೂ ಹಳೆಯ ವಿದ್ಯಾರ್ಥಿಗಳು ಕಾಲೇಜಿಗೆ ಮರಳಿ ಬಂದು ಗುರುವಂದನೆ ಸಲ್ಲಿಸುತ್ತಿರುವುದೇ ಇದಕ್ಕೆ ಸಾಕ್ಷಿ. ಜೀವನದಲ್ಲಿ ಶ್ರದ್ಧೆ ಮತ್ತು ಪ್ರಾಮಾಣಿಕತೆ ಇದ್ದಾಗ ಮಾತ್ರ ಯಶಸ್ಸು ಸಾಧ್ಯ. ಬದುಕಿನಲ್ಲಿ ಎದುರಾಗುವ ಸವಾಲುಗಳನ್ನು ಸಮರ್ಥವಾಗಿ ಎದುರಿಸುವ ಮನೋಭಾವವನ್ನು ಪ್ರತಿಯೊಬ್ಬರೂ ಬೆಳೆಸಿಕೊಳ್ಳಬೇಕು ಎಂದರು.

ಕನ್ನಡ ಉಪನ್ಯಾಸಕ ಡಾ. ಬಸವರಾಜ ಹಲಕುರ್ಕಿ ಮಾತನಾಡಿ, ಪ್ರೌಢಶಾಲೆ ಹಾಗೂ ಪದವಿ ಹಂತದ ವಿದ್ಯಾರ್ಥಿಗಳು ಗುರುವಂದನೆ ಸಲ್ಲಿಸುವುದು ಸಾಮಾನ್ಯ. ಆದರೆ ಪಿಯುಸಿ ಹಂತದ ವಿದ್ಯಾರ್ಥಿಗಳು ಒಗ್ಗೂಡಿ ಗುರುವಂದನೆ ಕಾರ್ಯಕ್ರಮ ಆಯೋಜಿಸಿರುವುದು ನರಗುಂದ ತಾಲ್ಲೂಕಿನಲ್ಲೇ ವಿಶೇಷವಾಗಿದೆ ಎಂದರು.

ಸಿ. ವಿ. ಜಗಲಿ ಮಾತನಾಡಿ, ಪಿಯುಸಿ ಮುಗಿಸಿ ಒಂದೂವರೆ ದಶಕ ಕಳೆದ ನಂತರ ಗುರು-ಶಿಷ್ಯರು ಒಂದಾಗಿರುವುದು ವಿನೂತನ ಹಾಗೂ ಅರ್ಥಪೂರ್ಣ. ಈ ಮಿಲನ ಎಲ್ಲರಲ್ಲೂ ಹೊಸ ಚೈತನ್ಯ ಮೂಡಿಸಿದೆ ಎಂದರು. ಉಪನ್ಯಾಸಕರು ಹಾಗೂ ಅತಿಥಿಗಳು ಸಮಾರಂಭದ ವೇದಿಕೆಗೆ ಆಗಮಿಸುವ ವೇಳೆ ಹಳೆಯ ವಿದ್ಯಾರ್ಥಿಗಳು ಹೂಮಳೆಗರೆದು ಭವ್ಯ ಹಾಗೂ ಸಂಭ್ರಮದ ಸ್ವಾಗತ ಕೋರಿದರು. ಬಳಿಕ ಶಿಕ್ಷಕರನ್ನು ಸನ್ಮಾನಿಸಿ ಗೌರವಿಸಲಾಯಿತು.

ಈ ಸಂದರ್ಭ ಉಪನ್ಯಾಸಕರಾದ ಎಚ್.ವೈ. ಜೊತೆನ್ನವರ, ಎನ್.ವಿ. ಚಂದ್ರತ್ನವರ, ನೀಲಮ್ಮ, ಇಮಾಮ್ ಕಾಸಿಂ, ವಿ.ಎಸ್. ಗಂಗೂರ, ವಿ.ಎಫ್. ಹದ್ಲಿ, ಸಿ.ವಿ. ಜಗಲಿ, ಪ್ರವೀಣ ದೇವಾಂಗದ, ಎಫ್.ಬಿ. ಆನಿ, ಸಿ.ಪಿ. ನೀಲಗುಂದ, ಸಂಜೀವ ಸತರಡ್ಡಿ, ನಾಗರಾಜ ಬೊಬ್ಬಿ, ಚಂದ್ರಶೇಖರ ಮುಳಗುಂದ, ಪಿ.ಎಸ್. ದಂಡಿನ, ರಾಘವೇಂದ್ರ ಗೆಜ್ಜೆ, ವೆಂಕರಡ್ಡಿಯವರ, ಪಿ.ಎಸ್. ಕವಲೂರ ಹಾಗೂ ರವಿ ಬೋಗಾರ ಉಪಸ್ಥಿತರಿದ್ದರು.