ಕುಟುಂಬದವರ ತ್ಯಾಗ, ಅಚಲ ನಂಬಿಕೆಗೆ ಫಲ ಸಿಕ್ಕ ಕ್ಷಣ: ಪ್ರಾಂಶುಪಾಲ ಡಾ. ಹರ್ಷ
ಸಾರಾಂಶ
ಕೊಪ್ಪಪದವೀಧರ ವಿದ್ಯಾರ್ಥಿಗಳ ಹೆಮ್ಮೆಯ ಪೋಷಕರು ಮತ್ತು ಕುಟುಂಬ ವರ್ಗದವರ ತ್ಯಾಗ, ಪ್ರಾರ್ಥನೆ ಮತ್ತು ಅಚಲ ನಂಬಿಕೆಗೆ ಫಲ ಸಿಕ್ಕಿರುವ ಕ್ಷಣ ಇದು ಎಂದು ಕಾಲೇಜು ಪ್ರಾಂಶುಪಾಲ ಡಾ. ಹರ್ಷ ಎನ್.ಎಮ್. ಅಭಿಪ್ರಾಯಪಟ್ಟರು.
- ಎ.ಎಲ್.ಎನ್. ರಾವ್ ಮಹಾವಿದ್ಯಾಲಯದಲ್ಲಿ ‘ಸಮಾವರ್ತನ-2026’ ಪದವಿ ಪ್ರದಾನ ಸಮಾರಂಭ
ಪದವೀಧರ ವಿದ್ಯಾರ್ಥಿಗಳ ಹೆಮ್ಮೆಯ ಪೋಷಕರು ಮತ್ತು ಕುಟುಂಬ ವರ್ಗದವರ ತ್ಯಾಗ, ಪ್ರಾರ್ಥನೆ ಮತ್ತು ಅಚಲ ನಂಬಿಕೆಗೆ ಫಲ ಸಿಕ್ಕಿರುವ ಕ್ಷಣ ಇದು ಎಂದು ಕಾಲೇಜು ಪ್ರಾಂಶುಪಾಲ ಡಾ. ಹರ್ಷ ಎನ್.ಎಮ್. ಅಭಿಪ್ರಾಯಪಟ್ಟರು.
ಪಟ್ಟಣದ ಎ.ಎಲ್.ಎನ್. ರಾವ್ ಮೆಮೋರಿಯಲ್ ಆಯುರ್ವೇದ ವೈದ್ಯಕೀಯ ಮಹಾವಿದ್ಯಾಲಯದಲ್ಲಿ ‘ಅಮೇಯ’ (2020-26) ಬ್ಯಾಚ್‌ನ ವಿದ್ಯಾರ್ಥಿಗಳ ‘ಸಮಾವರ್ತನ-2026’ ಪದವಿ ಪ್ರಧಾನ ಸಮಾರಂಭದಲ್ಲಿ ಮಾತಾಡಿದರು.ನಿಮ್ಮ ಮಕ್ಕಳ ಈ ಧೀರ್ಘ ಶೈಕ್ಷಣಿಕ ಪ್ರಯಾಣದಲ್ಲಿ ಬೆನ್ನೆಲುಬಾಗಿ ನಿಂತ ನೀವು ಇಂದು ಅವರು ಸಮಾಜ ಮೆಚ್ಚುವ ವೈದ್ಯ ರಾಗಿ ಹೊರಹೊಮ್ಮುವುದನ್ನು ನೋಡುತ್ತಿರುವ ನಿಮ್ಮ ಕಣ್ಣಿನ ಹರ್ಷ ನಮಗೆ ಅರಿವಾಗುತ್ತದೆ. ನಮ್ಮ ಸಂಸ್ಥೆ ಮೇಲೆ ವಿಶ್ವಾಸ ವಿಟ್ಟು, ನಿಮ್ಮ ಮಕ್ಕಳ ಭವಿಷ್ಯ ರೂಪಿಸುವ ಜವಾಬ್ದಾರಿ ನಮಗೆ ನೀಡಿದ್ದಕ್ಕಾಗಿ ಧನ್ಯ ಎಂದು ಹೇಳಿದರು.
ಅರವಿಂದ ಘೋಷ್ ರಂತೆ ಸವಾಲುಗಳನ್ನು ಧೈರ್ಯದಿಂದ ಎದುರಿಸಿ, ಶಿಕ್ಷಣದ ಮೂಲಕ ‘ದ್ವಿಜ’ರಾಗಿ (ಮರುಜನ್ಮ) ಹೊರ ಹೊಮ್ಮುತ್ತಿರುವ ಆಯುರ್ವೇದ ವೈದ್ಯರು ಕೇವಲ ಔಷಧ ಬರೆಯುವುದಷ್ಟೇ ಅಲ್ಲದೆ ರೋಗಿಗಳನ್ನು ಪ್ರೀತಿ-ಕಾಳಜಿಯಿಂದ ಪರೀಕ್ಷಿಸಿ ಸೇವೆ ನೀಡಬೇಕು ಎಂದು ಕರೆನೀಡಿದರು.
ಆರೂರು ನಮಿತಾ ರಾವ್ ಮಾತನಾಡಿ ಕೋವಿಡ್ ಸವಾಲುಗಳು ಹಾಗೂ ಸಾಂಸ್ಕೃತಿಕ-ಕ್ರೀಡಾ ಪಯಣದ ನಡುವೆ ಪ್ರಬುದ್ಧರಾಗಿ ಹೊರಹೊಮ್ಮಿದ ‘ಅಮೇಯ’ ತಂಡದ ವಿದ್ಯಾರ್ಥಿಗಳನ್ನು ಅಭಿನಂದಿಸಿ, ಸರಳ ಜೀವನ ಮತ್ತು ಜ್ಞಾನಾ ರ್ಜನೆಯೇ ತಮ್ಮ ಅಜ್ಜ ಸ್ಥಾಪಿಸಿದ ಈ ಸಂಸ್ಥೆ ಮೂಲ ಧ್ಯೇಯ ಎಂದರು.
ಇದೇ ಕಾಲೇಜಿನಲ್ಲಿ ವ್ಯಾಸಂಗ ಮಾಡಿ ರಾಜೀವ್ ಗಾಂಧಿ ವಿವಿ ಸ್ನಾತಕ ಪದವಿ ಪರೀಕ್ಷೆಯಲ್ಲಿ ರಾಜ್ಯಕ್ಕೆ ಪ್ರಥಮ ಸ್ಥಾನ ಗಳಿಸಿ ಚಿನ್ನದ ಪದಕ ಪಡೆದ ಡಾ.ಸಂಜನಾ ರಾವ್ ಅವರನ್ನು ಕಾಲೇಜಿನಿಂದ ಸನ್ಮಾನಿಸಲಾಯಿತು. ‘ಅಮೇಯ’ ತಂಡದ ನೂತನ ವೈದ್ಯರಿಗೆ ಪದವಿ ಪ್ರದಾನ ಮಾಡಿ, ವೈದ್ಯಕೀಯ ವೃತ್ತಿ ಪಾವಿತ್ರ್ಯತೆ ಎತ್ತಿಹಿಡಿಯುವ ಪ್ರತಿಜ್ಞಾವಿಧಿ ಬೋಧಿಸಲಾಯಿತು. ಕಾಲೇಜಿನ *ವ್ಯಾಸತರಂಗ ಮಾಸಿಕ ಪತ್ರಿಕೆ* ಸ್ವಾತಂತ್ರ್ಯ ದಿನಾಚರಣೆ ವಿಶೇಷ ಸಂಚಿಕೆಯನ್ನು ಗಣ್ಯರು ಅನಾವರಣಗೊಳಿಸಿದರು.ಸ್ನಾತಕೋತ್ತರ ವಿಭಾಗದ ಉಪ- ಪ್ರಾಂಶುಪಾಲರಾದ ಡಾ: ಡಿ. ಕೆ. ಮಿಶ್ರಾ, ಸ್ನಾತಕ ಪದವಿ ವಿಭಾಗದ ಉಪ- ಪ್ರಾಂಶುಪಾಲರಾದ ಡಾ: ಪ್ರಶಾಂತ್ ಭಟ್, ಪ್ರಶಿಕ್ಷಣ ಸಮನ್ವಯಾಧಿಕಾರಿ ಡಾ: ನಾಗರಾಜ್ ಇತರರು ಹಾಜರಿದ್ದರು.