ಮೈಸೂರಲ್ಲಿಂದು ಟಿಲ್ಟೆಡ್‌ ಎಲ್‌ಇಡಿ ತಾರಾಲಯ ಲೋಕಾರ್ಪಣೆ

ಮಹೇಂದ್ರ ದೇವನೂರು

ಕನ್ನಡಪ್ರಭ ವಾರ್ತೆ ಮೈಸೂರು

ಪ್ರಧಾನಿ ನರೇಂದ್ರ ಮೋದಿ ಅವರಿಂದ ಶುಕ್ರವಾರ ಉದ್ಘಾಟನೆಗೊಳ್ಳುತ್ತಿರುವ ‘ಕಾಸ್ಮಾಸ್‌-ಮೈಸೂರು ತಾರಾಲಯ’ವು ಖಗೋಳ ಅಧ್ಯಯನಕ್ಕೆ ಹೊಸ ದಿಕ್ಕು ನೀಡಲಿದ್ದು, ಇದು ಭಾರತದ ಮೊದಲ ಓರೆಯಾದ (ಟಿಲ್ಟೆಡ್‌) ಎಲ್‌ಇಡಿ ತಾರಾಲಯ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.

ಭಾರತೀಯ ಖಗೋಳ ಭೌತವಿಜ್ಞಾನ ಸಂಸ್ಥೆ ನಿರ್ಮಿಸಿರುವ ಈ ತಾರಾಲಯವನ್ನು ಚಾಮುಂಡಿಬೆಟ್ಟದ ತಪ್ಪಲಿನ ಮೈಸೂರು ವಿವಿಗೆ ಸೇರಿದ 3 ಎಕರೆ ಪ್ರದೇಶದಲ್ಲಿ ಸುಮಾರು 115 ಕೋಟಿ ರೂ.ವೆಚ್ಚದಲ್ಲಿ ನಿರ್ಮಿಸಲಾಗಿದೆ.

ದೇಶದಲ್ಲಿಯೇ ಮೊದಲ ಓರೆಯಾದ ಗೋಲಾಕಾರದ ಎಲ್‌ಇಡಿ ತಾರಾಲಯ ಇದಾಗಿದ್ದು, 15 ಮೀ.ವ್ಯಾಸದಿಂದ ಕೂಡಿದೆ. 15 ಡಿಗ್ರಿ ಕೋನದಲ್ಲಿ ಓರೆಯಾಗಿದ್ದು, ಇದು 8ಕೆ ರೆಸಲ್ಯೂಶನ್‌ ಮತ್ತು 42 ಮೆಗಾಪಿಕ್ಸೆಲ್‌ ಪ್ರದರ್ಶನ ನೀಡುತ್ತದೆ. ಉಪನ್ಯಾಸ ಸಭಾಂಗಣ, ಪ್ರಯೋಗಾಲಯ ಸೌಲಭ್ಯವಿರುವ ತರಗತಿಗಳು, ಕಂಪ್ಯೂಟರ್‌ ತರಬೇತಿ, ಪ್ರದರ್ಶನ ಸಭಾಂಗಣ, ವಸ್ತು ಸಂಗ್ರಹಾಲಯ, ಹೊರಾಂಗಣ ಪ್ರದರ್ಶನ ಮತ್ತು ಸಾರ್ವಜನಿಕರಿಗೆ ಅಗತ್ಯ ಸೌಲಭ್ಯಗಳನ್ನು ಇದು ಹೊಂದಿದೆ. ಸ್ಕೈ ಥಿಯೇಟರ್‌ ಮತ್ತು ಉಪನ್ಯಾಸ ಸಭಾಂಗಣ ಎರಡರಲ್ಲೂ ತಲಾ ಸುಮಾರು 160 ಮಂದಿ ಕೂರಬಹುದಾದ ಆಸನ ವ್ಯವಸ್ಥೆ ಇಲ್ಲಿದೆ.

ಈ ಯೋಜನೆಗೆ ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರ ರಾಜ್ಯಸಭಾ ಸದಸ್ಯರ ನಿಧಿ, ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆ, ಪರಮಾಣು ಶಕ್ತಿ ಇಲಾಖೆ ಹಾಗೂ ಭಾರತ ಸರ್ಕಾರದ ಮುಖ್ಯ ವೈಜ್ಞಾನಿಕ ಸಲಹೆಗಾರರ ಕಚೇರಿಗಳು ಹಣಕಾಸಿನ ನೆರವು ನೀಡಿವೆ. ಮೈಸೂರು ವಿವಿಯೊಂದಿಗಿನ ಒಪ್ಪಂದದ ಆಧಾರದ ಮೇಲೆ ಭಾರತೀಯ ಖಗೋಳ ಭೌತಶಾಸ್ತ್ರ ಸಂಸ್ಥೆ ಈ ಯೋಜನೆಯನ್ನು ಅನುಷ್ಠಾನಗೊಳಿಸಿದೆ.

ಖಗೋಳಶಾಸ್ತ್ರದ ಪ್ರದರ್ಶನಗಳ ಜೊತೆಗೆ, ಸ್ಕೈ ಥಿಯೇಟರ್, ಪ್ರತಿ ಪ್ರದರ್ಶನದ ಮೊದಲು ಮೈಸೂರಿನ ಇತಿಹಾಸ ಮತ್ತು ಸಾಂಸ್ಕೃತಿಕ ಪರಂಪರೆಯ ಕುರಿತು ಪರಿಚಯಾತ್ಮಕ ಚಿತ್ರ ಪ್ರದರ್ಶಿಸುತ್ತದೆ, ಇದು ವಿಜ್ಞಾನ ಮತ್ತು ಖಗೋಳಶಾಸ್ತ್ರದೊಂದಿಗೆ ನಗರದ ಸಂಪರ್ಕ ತೋರಿಸುತ್ತದೆ.ಸ್ಕೈ ಥಿಯೇಟರ್ ಪ್ರದರ್ಶನಗಳು:

‘ನಮ್ಮ ಮನೆ, ನಮ್ಮ ಕಾಸ್ಮಾಸ್’ ಎಂಬ ವಿಶೇಷ ಪರಿಚಯಾತ್ಮಕ ಪ್ರದರ್ಶನವು ಮೈಸೂರಿನ ಸಾಂಸ್ಕೃತಿಕ ಪರಂಪರೆ ಹಾಗೂ ವಿಜ್ಞಾನ ಮತ್ತು ಖಗೋಳಶಾಸ್ತ್ರದ ಜತೆಗಿನ ಸಂಪರ್ಕ ತಿಳಿಸುತ್ತದೆ. ಇದು ಇಂಗ್ಲಿಷ್, ಕನ್ನಡ ಮತ್ತು ಹಿಂದಿ ಭಾಷೆಗಳಲ್ಲಿ ಸಂಶೋಧನಾ ವಿಷಯ, ನಿರೂಪಣೆ, ಸಂಗೀತ ಮತ್ತು ದೃಶ್ಯಗಳನ್ನು ಒಳಗೊಂಡಿದೆ.ಸಾರ್ವಜನಿಕ ಒಳಗೊಳ್ಳುವಿಕೆ:

2022ರಿಂದ ಮೈಸೂರು ಪ್ರದೇಶದಲ್ಲಿ ನಡೆದಿರುವ ಸಾರ್ವಜನಿಕ ಸಹಭಾಗಿತ್ವದ ಕಾರ್ಯಕ್ರಮಗಳ ಮೇಲೆ ಈ ಯೋಜನೆ ನಿರ್ಮಾಣಗೊಂಡಿದೆ. ಇವುಗಳಲ್ಲಿ (ವಿಶೇಷವಾಗಿ ಗ್ರಾಮೀಣ ಪ್ರದೇಶಗಳಲ್ಲಿ) ಶಾಲಾ-ಕಾಲೇಜು ಜನಜಾಗೃತಿ ಕಾರ್ಯಕ್ರಮ, ದೂರದರ್ಶಕ ಆಧಾರಿತ ರಾತ್ರಿ ಆಕಾಶ ವೀಕ್ಷಣೆ, ಪ್ರಾಯೋಗಿಕ ವಿಜ್ಞಾನ ಚಟುವಟಿಕೆ, ಪ್ರದರ್ಶನ, ನಾಗರಿಕ ವಿಜ್ಞಾನ ಉಪಕ್ರಮ ಮತ್ತು ಶಿಕ್ಷಕರ ತರಬೇತಿ ಕಾರ್ಯಾಗಾರ ಸೇರಿವೆ.

ಸ್ಥಿರ ಮತ್ತು ಚಲನಶೀಲ ಮಾದರಿ ಒಳಗೊಂಡ ಒಳಾಂಗಣ ಮತ್ತು ಹೊರಾಂಗಣ ಪ್ರದರ್ಶನ ಭಾರತೀಯ ಖಗೋಳಶಾಸ್ತ್ರದ ಇತಿಹಾಸ ಹಾಗೂ ಆಧುನಿಕ ಖಗೋಳಶಾಸ್ತ್ರ ಮತ್ತು ಖಭೌತ ವಿಜ್ಞಾನದ ಬೆಳವಣಿಗೆಯನ್ನು ಪರಿಚಯಿಸಲಿದೆ. ನಗರದಲ್ಲಿ ಟೆಲಿಸ್ಕೋಪ್ ಆಧಾರಿತ ರಾತ್ರಿ-ಆಕಾಶ ವೀಕ್ಷಣೆ, ಸಾರ್ವಜನಿಕರಿಗೆ ಪ್ರತ್ಯಕ್ಷ ಅನುಭವದ ಕಾರ್ಯಕ್ರಮ ರೂಪಿಸಲಿದೆ.

ಈ ಚಟುವಟಿಕೆಗಳ ಜೊತೆಗೆ, ಮುಖ್ಯವಾಗಿ ಪ್ರಾಚ್ಯವಿದ್ಯಾ ಸಂಶೋಧನಾಲಯ ವಿಭಾಗದ ಮಧ್ಯಕಾಲೀನ ಖಗೋಳಶಾಸ್ತ್ರದ ಹಸ್ತಪ್ರತಿ ಗುರುತಿಸುವ, ಅನುವಾದಿಸುವ ಮತ್ತು ವಿಶ್ಲೇಷಿಸುವ ಕಾರ್ಯಕ್ರಮ ಸುಮಾರು 50 ಹಸ್ತಪ್ರತಿಯನ್ನು ಗುರುತಿಸಿದೆ. ಇವುಗಳಲ್ಲಿ ನಾಲ್ಕನ್ನು ಮೊದಲ ಬಾರಿಗೆ ವಿವರವಾಗಿ ವಿಶ್ಲೇಷಿಸಲಾಗಿದೆ.

ಭಾರತೀಯ ಖಗೋಳಶಾಸ್ತ್ರದ ಇತಿಹಾಸದಿಂದ ಹಿಡಿದು ಆಧುನಿಕ ಖಗೋಳಶಾಸ್ತ್ರ ಮತ್ತು ಖಗೋಳ ಭೌತಶಾಸ್ತ್ರದ ವಿಷಯ ಒಳಗೊಂಡಿರುವ ಸ್ಥಿರ ಮತ್ತು ಚಲನಶೀಲ ಮಾದರಿ ಪ್ರದರ್ಶಿಸುವ ಮೂಲಕ ತಾರಾಲಯವು ತನ್ನ ಮೀಸಲಾದ ಒಳಾಂಗಣ ಮತ್ತು ಹೊರಾಂಗಣ ಪ್ರದರ್ಶನ ಸ್ಥಳಗಳ ಮೂಲಕ ಸಾರ್ವಜನಿಕರಿಗೆ ಮತ್ತಷ್ಟು ಹತ್ತಿರವಾಗಲಿದೆ.