ನವ ವೈದ್ಯರು ವೃತ್ತಿ ಗೌರವ ಹೆಚ್ಚಿಸಲಿ: ಬಸವಂತಪ್ಪ
ಸಾರಾಂಶ
ನಿಸ್ವಾರ್ಥ ಸೇವೆಗೆ ಮತ್ತೊಂದು ಹೆಸರಾದ ವೈದ್ಯಕೀಯ ವೃತ್ತಿಯು ಎಲ್ಲರಿಗೂ ಒಲಿಯದು. ಅಂತಹ ವೃತ್ತಿಯನ್ನು ಕೇವಲ ಹಣ ಸಂಪಾದನೆ ಮಾರ್ಗ ಮಾಡಿಕೊಳ್ಳದೇ, ಸೇವಾ ಮನೋಭಾವದಿಂದ ಬಡವರು, ದುರ್ಬಲರು, ಅಸಹಾಯಕರು, ರೈತರು, ಗ್ರಾಮೀಣರ ಆರೋಗ್ಯದ ಕಾಪಾಡುವ ಮೂಲಕ ಪವಿತ್ರ ವೃತ್ತಿಯಾಗಿಸಬೇಕು ಎಂದು ಮುಜರಾಯಿ, ಮೀನುಗಾರಿಕೆ, ಬಂದರು ಹಾಗೂ ಒಳನಾಡು ಜಲಸಾರಿಗೆ ಸಚಿವ ಕೆ.ಎಸ್. ಬಸವಂತಪ್ಪ ಹೇಳಿದ್ದಾರೆ.
- ಅಶ್ವಿನಿ ಆಯುರ್ವೇದಿಕ್ ಮೆಡಿಕಲ್ ಕಾಲೇಜು, ಪಿಜಿ ಸೆಂಟರ್‌ನಿಂದ 29ನೇ ಪದವಿ ಪ್ರದಾನ ಸಮಾರಂಭ
ಕನ್ನಡಪ್ರಭ ವಾರ್ತೆ ದಾವಣಗೆರೆ
ನಿಸ್ವಾರ್ಥ ಸೇವೆಗೆ ಮತ್ತೊಂದು ಹೆಸರಾದ ವೈದ್ಯಕೀಯ ವೃತ್ತಿಯು ಎಲ್ಲರಿಗೂ ಒಲಿಯದು. ಅಂತಹ ವೃತ್ತಿಯನ್ನು ಕೇವಲ ಹಣ ಸಂಪಾದನೆ ಮಾರ್ಗ ಮಾಡಿಕೊಳ್ಳದೇ, ಸೇವಾ ಮನೋಭಾವದಿಂದ ಬಡವರು, ದುರ್ಬಲರು, ಅಸಹಾಯಕರು, ರೈತರು, ಗ್ರಾಮೀಣರ ಆರೋಗ್ಯದ ಕಾಪಾಡುವ ಮೂಲಕ ಪವಿತ್ರ ವೃತ್ತಿಯಾಗಿಸಬೇಕು ಎಂದು ಮುಜರಾಯಿ, ಮೀನುಗಾರಿಕೆ, ಬಂದರು ಹಾಗೂ ಒಳನಾಡು ಜಲಸಾರಿಗೆ ಸಚಿವ ಕೆ.ಎಸ್. ಬಸವಂತಪ್ಪ ಹೇಳಿದರು.ನಗರದ ಶ್ರೀಮತಿ ಪಾರ್ವತಮ್ಮ ಶಾಮನೂರು ಶಿವಶಂಕರಪ್ಪ ಕಲ್ಯಾಣ ಮಂಟಪದಲ್ಲಿ ಸೋಮವಾರ ಅಶ್ವಿನಿ ಆಯುರ್ವೇದಿಕ್ ಮೆಡಿಕಲ್ ಕಾಲೇಜು ಮತ್ತು ಪಿಜಿ ಸೆಂಟರ್‌ನಿಂದ 29ನೇ ಪದವಿ ಪ್ರದಾನ ಸಮಾರಂಭ ಉದ್ಘಾಟಿಸಿ ಅವರು ಮಾತನಾಡಿದರು. ವೈದ್ಯಕೀಯ ವೃತ್ತಿ ಸೇವಾ ಮನೋಭಾವದಿಂದ ಕೂಡಿರಲಿ. ನವ ವೈದ್ಯರು ಬಡವರು, ರೈತರು, ಕೂಲಿಕಾರರ ನೋವಿಗೆ ಸ್ಪಂದಿಸಲಿ ಎಂದರು.
ರಾಜ್ಯ ಸರ್ಕಾರ ಶಿಕ್ಷಣ, ವೈದ್ಯಕೀಯ ಕ್ಷೇತ್ರಕ್ಕೆ ಹೆಚ್ಚು ಆದ್ಯತೆ ನೀಡುತ್ತಿದೆ. ಕರ್ನಾಟಕದ ವೈದ್ಯಕೀಯ ವಿದ್ಯಾರ್ಥಿಗಳು ದೇಶ-ವಿದೇಶಗಳಲ್ಲಿ ಉನ್ನತ ಸ್ಥಾನ ಅಲಂಕರಿಸುತ್ತಿರುವುದು ಹೆಮ್ಮೆಯ ಸಂಗತಿ. ವಿದ್ಯಾರ್ಥಿಗಳು ತಮಗೆ ದೊರೆತಿರುವ ಅವಕಾಶ ಸದ್ಬಳಕೆ ಮಾಡಿಕೊಂಡು ಉತ್ತಮ ಭವಿಷ್ಯ ರೂಪಿಸಿಕೊಳ್ಳುವ ಜೊತಗೆ ಸಮಾಜಕ್ಕೆ ಕೊಡುಗೆ ನೀಡಬೇಕು. ವೈದ್ಯಕೀಯ ಪದವಿ ಪಡೆದು ವೃತ್ತಿ ಜೀವನಕ್ಕೆ ಕಾಲಿಡುತ್ತಿರುವ ನವ ವೈದ್ಯರು ತಮ್ಮ ತಂದೆ-ತಾಯಿ ತ್ಯಾಗ, ಪರಿಶ್ರಮ ಎಂದಿಗೂ ಮರೆಯಬಾರದು. ಮಕ್ಕಳನ್ನು ವೈದ್ಯರಾಗಿಸಲು ಪೋಷಕರು ಕಷ್ಟ ಎದುರಿಸಿದ್ದು, ಹೆತ್ತವರನ್ನು ಗೌರವದಿಂದ ನೋಡಿಕೊಳ್ಳುವುದೇ ವೈದ್ಯ ವೃತ್ತಿಗೆ ನೀವು ಸಲ್ಲಿಸುವ ಮೊದಲ ಗೌರವವಾಗಿದೆ ಎಂದರು.
ದಕ್ಷಿಣ ಕ್ಷೇತ್ರ ಶಾಸಕ ಸಮಥ೯ ಶಾಮನೂರು ಮಾತನಾಡಿ, ವೈದ್ಯಕೀಯ ಪದವಿ ಬಳಿಕ ವೈದ್ಯರು ಕೇವಲ ಕ್ಲಿನಿಕ್‌, ಆಸ್ಪತ್ರೆಗೆ ಸೀಮಿತರಾಗದೇ, ಸಮುದಾಯದ ಆರೋಗ್ಯ ಸುಧಾರಣೆಗೆ ಹೆಚ್ಚಿನ ಆದ್ಯತೆ ನೀಡಬೇಕು. ದೇಶದ ಆರೋಗ್ಯ ರಕ್ಷಣಾ ವ್ಯವಸ್ಥೆಯಲ್ಲಿ ಸಮುದಾಯ ವೈದ್ಯಕೀಯದ ಪಾತ್ರ ಅತ್ಯಂತ ಮಹತ್ವದ್ದು. ನಗರ, ಗ್ರಾಮೀಣ ಪ್ರದೇಶಗಳಲ್ಲಿ ಜನರು ಅನೇಕ ಕಾಯಿಲೆಗಳನ್ನು ಆರಂಭಿಕ ಹಂತದಲ್ಲೇ ನಿರ್ಲಕ್ಷಿಸುತ್ತಾರೆ. ಗ್ಯಾಂಗ್ರಿನ್, ಎಕ್ಸಿಮಾ ಸೇರಿದಂತೆ ಹಲವು ಕಾಯಿಲೆ ಉಲ್ಬಣಿಸಿ, ಗಂಭೀರ ಹಂತ ತಲುಪಿದ ನಂತರ ವೈದ್ಯರ ಬಳಿ ಬರುವ ಪರಿಸ್ಥಿತಿ ಇದೆ. ಇಂತಹ ಸಮಸ್ಯೆಗೆ ಕಡಿವಾಣ ಹಾಕಲು ವೈದ್ಯರು ಜನರಲ್ಲಿ ಆರೋಗ್ಯದ ಬಗ್ಗೆ ಅರಿವು ಮೂಡಿಸಬೇಕು ಎಂದರು.
ಮಕ್ಕಳ ತಜ್ಞ ಡಾ.ಬಾಣಾಪುರ ಮಠ, ಸುಶ್ರುತ ಆಯುರ್ವೇದ ಕಾಲೇಜಿನ ಕಾರ್ಯದರ್ಶಿ ಡಾ. ಬಿ.ಜಿ.ಸತೀಶ, ಸಿಟಿ ಸೆಂಟ್ರಲ್ ಆಸ್ಪತ್ರೆ ವ್ಯವಸ್ಥಾಪಕ ನಿರ್ದೇಶಕ ಡಾ.ಎಚ್.ಎಲ್.ಸುಬ್ಬರಾವ್, ಡಾ.ಶ್ರೀಶೈಲ ಎಂ.ಬ್ಯಾಡಗಿ, ಕೆಪಿಸಿಸಿ ಸದಸ್ಯ ಬಸವಾಪಟ್ಟಣದ ಬಿ.ಜಿ.ನಾಗರಾಜ, ಅಶ್ವಿನಿ ಕಾಲೇಜಿನ ವೈದ್ಯಕೀಯ ನಿರ್ದೇಶಕ ಡಾ.ಮೃತ್ಯಂಜಯ ಎನ್.ಹಿರೇಮಠ, ಟಿ.ಎಚ್.ಎಂ. ಚನ್ನವೀರ ಸ್ವಾಮಿ, ಡಾ. ಎನ್.ಆರ್. ಶಂಕರ ನಾರಾಯಣ, ಡಾ. ಎಂ.ಎಚ್. ಮುಕ್ತ, ಡಾ.ಮಧು, ಡಾ. ಎಂ.ಎಚ್. ಸುಶ್ರುತ್, ಕಾಲೇಜಿನ ಬೋಧಕ- ಬೋಧಕೇತರ ಸಿಬ್ಬಂದಿ, ವಿದ್ಯಾರ್ಥಿಗಳು, ಪಾಲಕರು ಇದ್ದರು.
(ಕೋಟ್‌)
- ಸಮರ್ಥ ಎಂ.ಶಾಮನೂರು, ಶಾಸಕ.
-5ಕೆಡಿವಿಜಿ1: ದಾವಣಗೆರೆಯಲ್ಲಿ ಸೋಮವಾರ ಅಶ್ವಿನಿ ಆಯುರ್ವೇದಿಕ್ ಮೆಡಿಕಲ್ ಕಾಲೇಜು ಮತ್ತು ಪಿಜಿ ಸೆಂಟರ್‌ನಿಂದ ನಡೆದ 29ನೇ ಪದವಿ ಪ್ರದಾನ ಸಮಾರಂಭವನ್ನು ಸಚಿವ ಕೆ.ಎಸ್.ಬಸವಂತಪ್ಪ ಉದ್ಘಾಟಿಸಿದರು.