ಅಮೆಜಾನ್ ಮೆಷಿನ್ ಲರ್ನಿಂಗ್ ಸಮ್ಮರ್ ಸ್ಕೂಲ್‌ಗೆ 5 ವರ್ಷ: 12,000ಕ್ಕೂ ಹೆಚ್ಚು ವಿದ್ಯಾರ್ಥಿಗಳಿಗೆ ಕೌಶಲ್ಯ ತರಬೇತಿ

ಕನ್ನಡಪ್ರಭವಾರ್ತೆ ಬೆಂಗಳೂರು:

ದೇಶದಲ್ಲಿ ಉದ್ಯಮ-ಆಧಾರಿತ ತಂತ್ರಜ್ಞಾನ ಶಿಕ್ಷಣಕ್ಕೆ ಉತ್ತೇಜನ ನೀಡುತ್ತಿರುವ ಅಮೆಜಾನ್ ಇಂಡಿಯಾ ಸಂಸ್ಥೆಯ ಪ್ರಮುಖ ಮೆಷಿನ್ ಲರ್ನಿಂಗ್ ಸಮ್ಮರ್ ಸ್ಕೂಲ್ (ಎಂಎಲ್ಎಸ್ಎಸ್) ಐದು ವರ್ಷಗಳನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದೆ. 2021 ರಲ್ಲಿ ಆರಂಭವಾದ ಈ ಉಚಿತ ವರ್ಚುವಲ್ ತರಬೇತಿ ಕಾರ್ಯಕ್ರಮದ ಮೂಲಕ ಸಂಸ್ಥೆಯು ಇದುವರೆಗೆ ದೇಶಾದ್ಯಂತ 12,000ಕ್ಕೂ ಹೆಚ್ಚು ಎಂಜಿನಿಯರಿಂಗ್ ವಿದ್ಯಾರ್ಥಿಗಳಿಗೆ ಎಐ ಹಾಗೂ ಮೆಷಿನ್ ಲರ್ನಿಂಗ್ (ಎಂಎಲ್) ಕೌಶಲ್ಯಗಳನ್ನು ಧಾರೆ ಎರೆದಿದೆ.

ಪ್ರತಿ ವರ್ಷ ಸತತ ನಾಲ್ಕು ವಾರಾಂತ್ಯಗಳಲ್ಲಿ ಅಮೆಜಾನ್ ವಿಜ್ಞಾನಿಗಳಿಂದ ನಡೆಸಲ್ಪಡುವ ಈ ಶಿಕ್ಷಣ ಅಭಿಯಾನವು ಒಟ್ಟಾರೆಯಾಗಿ 4 ಲಕ್ಷಕ್ಕೂ ಅಧಿಕ ಅರ್ಜಿಗಳನ್ನು ಸ್ವೀಕರಿಸಿದೆ. ಆರಂಭಿಕ ವರ್ಷದಲ್ಲಿ 3,927 ರಷ್ಟಿದ್ದ ಅರ್ಜಿಗಳ ಸಂಖ್ಯೆಯು, 2026ರ ವೇಳೆಗೆ 1.3 ಲಕ್ಷಕ್ಕೂ ಅಧಿಕಕ್ಕೆ ಏರಿಕೆಯಾಗುವ ಮೂಲಕ 34 ಪಟ್ಟು ಬೃಹತ್ ಬೆಳವಣಿಗೆ ಕಂಡಿದೆ. ಪ್ರಸ್ತುತ ಆರನೇ ವರ್ಷಕ್ಕೆ ಕಾಲಿಡುತ್ತಿರುವ ಈ ಯೋಜನೆಯು, ಕಾಲೇಜು ಪಠ್ಯಕ್ರಮ ಮತ್ತು ಉದ್ಯಮಕ್ಕೆ ಅಗತ್ಯವಿರುವ ತಾಂತ್ರಿಕ ಸಾಮರ್ಥ್ಯದ ನಡುವಿನ ಅಂತರವನ್ನು ಯಶಸ್ವಿಯಾಗಿ ಕಡಿಮೆ ಮಾಡುತ್ತಿದೆ.

ವಿಶೇಷವೆಂದರೆ, ಈ ಉಚಿತ ತರಬೇತಿಯಲ್ಲಿ ಯುವತಿಯರ ಪಾಲ್ಗೊಳ್ಳುವಿಕೆ ಹೆಚ್ಚಾಗಿದೆ. ಮೊದಲ ವರ್ಷದಲ್ಲಿ ಸುಮಾರು 5,000 ರಷ್ಟಿದ್ದ ಯುವತಿಯರ ನೋಂದಣಿ ಸಂಖ್ಯೆಯು 2026 ರಲ್ಲಿ 55,000 ಕ್ಕೂ ಅಧಿಕ ತಲುಪಿದ್ದು, ಶೇ. 40 ಕ್ಕಿಂತ ಹೆಚ್ಚು ಪಾಲು ಹೊಂದಿದ್ದಾರೆ. ಈ ಸಮ್ಮರ್ ಸ್ಕೂಲ್‌ ಗೆ ಆಯ್ಕೆಯಾಗಲು ವಿದ್ಯಾರ್ಥಿಗಳು ಲಿಖಿತ ಪರೀಕ್ಷೆ ಹಾಗೂ ಸುಧಾರಿತ ಕೋಡಿಂಗ್ ಪರೀಕ್ಷೆ ಎಂಬ ಎರಡು ಹಂತಗಳ ಕಠಿಣ ಮೌಲ್ಯಮಾಪನಕ್ಕೆ ಒಳಪಡುತ್ತಾರೆ. ಪ್ರತಿ ವರ್ಷ ಪರೀಕ್ಷೆಯಲ್ಲಿ ಅತ್ಯುತ್ತಮ ಅಂಕ ಗಳಿಸುವ ಪ್ರಮುಖ 3,000 ವಿದ್ಯಾರ್ಥಿಗಳನ್ನು ಮಾತ್ರ ತರಬೇತಿಗೆ ಆಯ್ಕೆ ಮಾಡಲಾಗುತ್ತದೆ. ಆಯ್ಕೆಯಾದ ಅಭ್ಯರ್ಥಿಗಳು ಸೂಪರ್‌ ವೈಸ್ಡ್ ಲರ್ನಿಂಗ್, ಅನ್‌ಸೂಪರ್‌ವೈಸ್ಡ್ ಲರ್ನಿಂಗ್, ಡಿಪ್ ನ್ಯೂರಲ್ ನೆಟ್‌ ವರ್ಕ್ಸ್, ಜನರೇಟಿವ್ ಎಐ ಹಾಗೂ ಲಾರ್ಜ್ ಲ್ಯಾಂಗ್ವೇಜ್ ಮಾಡೆಲ್ಸ್ ಸೇರಿದಂತೆ ಒಟ್ಟು 8 ಪ್ರಮುಖ ಮಾಡ್ಯೂಲ್‌ಗಳನ್ನು ಕಲಿಯುತ್ತಾರೆ. ನೈಜ ಜಗತ್ತಿನಲ್ಲಿ ಎದುರಾಗುವ ಗ್ರಾಹಕರ ತಾಂತ್ರಿಕ ಸವಾಲುಗಳನ್ನು ಬಗೆಹರಿಸಲು ಈ ತರಬೇತಿ ಸಹಕಾರಿಯಾಗಿದೆ.

ತರಬೇತಿ ಅವಧಿಯಲ್ಲಿ ಶ್ರೇಷ್ಠ ಸಾಧನೆ ತೋರುವ ವಿದ್ಯಾರ್ಥಿಗಳಿಗೆ ಅಮೆಜಾನ್‌ ನ ಸೈನ್ಸ್ ಹಾಗೂ ರಿಸರ್ಚ್ ವಿಭಾಗದ ನೇಮಕಾತಿ ವ್ಯವಸ್ಥೆಯಲ್ಲಿ ವಿಶೇಷ ಮುನ್ನಣೆ ಸಿಗಲಿದೆ. ಇದರಿಂದ ಕಲಿಕೆಯಿಂದ ನೇರವಾಗಿ ಉದ್ಯೋಗ ಕಂಡುಕೊಳ್ಳಲು ವಿದ್ಯಾರ್ಥಿಗಳಿಗೆ ಸುಲಭ ಹಾದಿ ನಿರ್ಮಾಣವಾಗಿದೆ.

ಈ ಕುರಿತು ಅಮೆಜಾನ್ ಇಂಡಿಯಾದ ಮೆಷಿನ್ ಲರ್ನಿಂಗ್ ವಿಭಾಗದ ಉಪಾಧ್ಯಕ್ಷ ರಾಜೀವ್ ರಸ್ತೋಗಿ ಅವರು ಮಾತನಾಡಿ, ‘ಅಮೆಜಾನ್‌ ನಲ್ಲಿ ನಾವು ಜಾಗತಿಕ ಮಟ್ಟದ ಎಐ ತಂತ್ರಜ್ಞಾನವನ್ನು ರೂಪಿಸುವುದು ಆರಂಭಿಕ ಹಂತದಲ್ಲೇ ಉದಯೋನ್ಮುಖ ಪ್ರತಿಭೆಗಳಲ್ಲಿ ಹೂಡಿಕೆ ಮಾಡುವುದರಿಂದ ಮಾತ್ರ ಸಾಧ್ಯ ಎಂದು ನಾವು ನಂಬುತ್ತೇವೆ. ಮೆಷಿನ್ ಲರ್ನಿಂಗ್ ಸಮ್ಮರ್ ಸ್ಕೂಲ್ ಈ ನಂಬಿಕೆಯ ನೇರ ಪ್ರತಿರೂಪವಾಗಿದೆ. ಕಳೆದ ಐದು ವರ್ಷಗಳಲ್ಲಿ, ಮೆಷಿನ್ ಲರ್ನಿಂಗ್ ಕ್ಷೇತ್ರದಲ್ಲಿ ವೃತ್ತಿಜೀವನ ರೂಪಿಸಿಕೊಳ್ಳುವ ಆಕಾಂಕ್ಷೆಯು ಕೇವಲ ಪ್ರಮುಖ ತಂತ್ರಜ್ಞಾನ ನಗರಗಳಿಗಷ್ಟೇ ಸೀಮಿತವಾಗಿಲ್ಲ ಎಂಬುದನ್ನು ಈ ಕಾರ್ಯಕ್ರಮ ನಮಗೆ ತೋರಿಸಿಕೊಟ್ಟಿದೆ. ಪ್ರಸ್ತುತ ಶೇ. 80 ರಷ್ಟು ಅರ್ಜಿದಾರರು ಭಾರತದ ಮಹಾನಗರಗಳ ಹೊರತಾದ ಶೈಕ್ಷಣಿಕ ಸಂಸ್ಥೆಗಳಿಂದ ಬರುತ್ತಿದ್ದಾರೆ. ಜೊತೆಗೆ ಮಹಿಳೆಯರ ಭಾಗವಹಿಸುವಿಕೆಯೂ ವರ್ಷದಿಂದ ವರ್ಷಕ್ಕೆ ಏರಿಕೆಯಾಗುತ್ತಿದೆ. ಯುವಜನತೆಗೆ ಸೂಕ್ತ ಅವಕಾಶ ಮತ್ತು ಮಾರ್ಗದರ್ಶನ ಸಿಕ್ಕರೆ ಅವರ ಪ್ರತಿಭೆ ಅನಾವರಣಗೊಳ್ಳುತ್ತದೆ ಎಂಬುದು ಇದರಿಂದ ಸ್ಪಷ್ಟವಾಗುತ್ತದೆ. ವಿದ್ಯಾರ್ಥಿಗಳನ್ನು ನೇರವಾಗಿ ಅಮೆಜಾನ್‌ನ ಅತ್ಯುತ್ತಮ ತಜ್ಞರೊಂದಿಗೆ ಜೋಡಿಸಲು ಮತ್ತು ಕಲಿಕೆಯಿಂದ ನೈಜ ಜಗತ್ತಿನಲ್ಲಿ ಧನಾತ್ಮಕ ಬದಲಾವಣೆ ತರುವ ಸಶಕ್ತ ಪೀಳಿಗೆಯನ್ನು ನಿರ್ಮಿಸಲು ನಾವು ಬದ್ಧರಾಗಿದ್ದೇವೆ’ ಎಂದು ತಿಳಿಸಿದರು.

2023ರ ತರಬೇತಿ ಆವೃತ್ತಿಯಲ್ಲಿ ಪಾಲ್ಗೊಂಡು, ಪ್ರಸ್ತುತ ಅಮೆಜಾನ್‌ನಲ್ಲಿ ಅಪ್ಲೈಡ್ ಸೈಂಟಿಸ್ಟ್ ಆಗಿ ಕಾರ್ಯನಿರ್ವಹಿಸುತ್ತಿರುವ ಖುಷಿ ಗುಪ್ತಾ ತಮ್ಮ ಅನುಭವ ಹಂಚಿಕೊಳ್ಳುತ್ತಾ , ‘ಕೋಟಿಗಟ್ಟಲೆ ಗ್ರಾಹಕರ ನೈಜ ಸಮಸ್ಯೆಗಳನ್ನು ಮೆಷಿನ್ ಲರ್ನಿಂಗ್ ಹೇಗೆ ಪರಿಹರಿಸುತ್ತದೆ ಎಂಬುದನ್ನು ಹತ್ತಿರದಿಂದ ತಿಳಿಯಲು ಎಂಎಲ್ ಸಮ್ಮರ್ ಸ್ಕೂಲ್ ನನಗೆ ಅಪರೂಪದ ಅವಕಾಶ ನೀಡಿತು. ಅಮೆಜಾನ್ ವಿಜ್ಞಾನಿಗಳಿಂದ ನೇರವಾಗಿ ಕಲಿತದ್ದು ಅಪ್ಲೈಡ್ ಸೈನ್ಸ್ ಕ್ಷೇತ್ರದಲ್ಲಿ ನನ್ನ ವೃತ್ತಿಜೀವನಕ್ಕೆ ಗಟ್ಟಿ ಬುನಾದಿ ಹಾಕಿಕೊಟ್ಟಿತು. ಫರೀದಾಬಾದ್‌ ನಲ್ಲಿ ಮೂರನೇ ವರ್ಷದ ಎಂಜಿನಿಯರಿಂಗ್ ವಿದ್ಯಾರ್ಥಿಯಾಗಿದ್ದ ನಾನು, ಇಂದು ಅಮೆಜಾನ್‌ ನಲ್ಲಿ ಪೂರ್ಣಕಾಲಿಕ ಅಪ್ಲೈಡ್ ಸೈಂಟಿಸ್ಟ್ ಆಗಿ ಬೆಳೆದು ನಿಲ್ಲಲು ಈ ಕಾರ್ಯಕ್ರಮವೇ ಕಾರಣ’ ಎಂದರು.

ಅಮೆಜಾನ್ ಎಂಎಲ್ಎಸ್ಎಸ್ ನ ಪ್ರಭಾವವು ಕೇವಲ ತರಗತಿಯ ಕಲಿಕೆಗೆ ಮಾತ್ರ ಸೀಮಿತವಾಗಿಲ್ಲ. ಕಳೆದ ಐದು ವರ್ಷಗಳಲ್ಲಿ, ಈ ಕಾರ್ಯಕ್ರಮದ ನೂರಾರು ಹಳೆಯ ವಿದ್ಯಾರ್ಥಿಗಳು ಅಮೆಜಾನ್‌ ನಲ್ಲಿ ವಿಜ್ಞಾನ ಮತ್ತು ಎಂಜಿನಿಯರಿಂಗ್ ವಿಭಾಗಗಳಲ್ಲಿ ಉದ್ಯೋಗ ಪಡೆದಿದ್ದಾರೆ. ಇನ್ನು ಕೆಲವರು ಪ್ರಮುಖ ತಂತ್ರಜ್ಞಾನ ಸಂಸ್ಥೆಗಳಲ್ಲಿ ಉನ್ನತ ಹುದ್ದೆಗಳನ್ನು ಗಿಟ್ಟಿಸಿಕೊಂಡಿದ್ದಾರೆ, ಡಾಕ್ಟರೇಟ್ ಅಧ್ಯಯನಕ್ಕೆ ಸೇರಿದ್ದಾರೆ ಅಥವಾ ಮೆಷಿನ್ ಲರ್ನಿಂಗ್ ಸಂಶೋಧನೆಯಲ್ಲಿ ವೃತ್ತಿಜೀವನವನ್ನು ಆರಂಭಿಸಿದ್ದಾರೆ. ಈ ಯೋಜನೆಯು ಶೈಕ್ಷಣಿಕ ಜ್ಞಾನವನ್ನು ಯಶಸ್ವಿ ವೃತ್ತಿಜೀವನವನ್ನಾಗಿ ಪರಿವರ್ತಿಸಲು ನೇರ ಸೇತುವೆಯಾಗಿ ಕೆಲಸ ಮಾಡಿದೆ.