ಮೆಜೆಂಟಾ ಮೊಬಿಲಿಟಿಗೆ ಮತ್ತೆ 20 ಟಾಟಾ ಏಸ್ ಇವಿಗಳನ್ನು ವಿತರಿಸಿದ ಟಾಟಾ ಮೋಟಾರ್ಸ್

 ಬೆಂಗಳೂರು :  ಭಾರತದ ಅತಿದೊಡ್ಡ ವಾಣಿಜ್ಯ ವಾಹನ ತಯಾರಕರಾದ ಟಾಟಾ ಮೋಟಾರ್ಸ್ ಇದೀಗ ಮತ್ತೆ 20 ಟಾಟಾ ಏಸ್ ಇವಿಗಳನ್ನು ಮೆಜೆಂಟಾ ಮೊಬಿಲಿಟಿ ಸಂಸ್ಥೆಗೆ ವಿತರಿಸಿದೆ. ಮೆಜೆಂಟಾ ಮೊಬಿಲಿಟಿಗೆ 500 ಏಸ್ ಇವಿಗಳನ್ನು ಒದಗಿಸಲು ಒಪ್ಪಂದ ಆಗಿದ್ದು, ಈ ಒಪ್ಪಂದದ ಭಾಗವಾಗಿ ಹೆಚ್ಚುವರಿ 20 ಟಾಟಾ ಏಸ್ ಇವಿ ಯುನಿಟ್‌ಗಳನ್ನು ವಿತರಿಸಲಾಗಿದೆ.

ಈಗಾಗಲೇ 350 ವಾಹನಗಳನ್ನು ನೀಡಲಾಗಿದೆ. 10 ನಗರಗಳಲ್ಲಿ ನಿಯೋಜನೆಯಾಗಿರುವ ಟಾಟಾ ಏಸ್ ಇವಿಗಳು, ಮೆಜೆಂಟಾ ಮೊಬಿಲಿಟಿಯಿಂದ ನಿರ್ವಹಿಸಲ್ಪಡುತ್ತಿದ್ದು, ಈಗಾಗಲೇ ಒಟ್ಟಾರೆಯಾಗಿ ಸುಮಾರು 50 ಲಕ್ಷ ಕಿಲೋಮೀಟರ್‌ಗಳನ್ನು ಕ್ರಮಿಸಿವೆ. ಇದರಿಂದ ಸುಮಾರು 2,500 ಟನ್‌ ಗಳಷ್ಟು ಇಂಗಾಲದ ಡೈ ಆಕ್ಸೈಡ್ ವಾತಾವರಣ ಸೇರುವುದನ್ನು ತಡೆಗಟ್ಟಲಾಗಿದೆ. 

ದೇಶದ ಅತ್ಯಂತ ಅತ್ಯಾಧುನಿಕ, ಶೂನ್ಯ- ಹೊರಸೂಸುವಿಕೆಯ ಈ ವಾಣಿಜ್ಯ ವಾಹನವು ಇ-ಕಾಮರ್ಸ್, ಪಾರ್ಸೆಲ್ ಮತ್ತು ಕೊರಿಯರ್, ಎಫ್‌ಎಂಸಿಜಿ, ಎಫ್‌ಎಂಸಿಡಿ ಮತ್ತು ಡೈರಿ ಉದ್ಯಮಗಳಲ್ಲಿ ಸಕ್ರಿಯವಾಗಿ ಕಾರ್ಯನಿರ್ವಹಿಸುತ್ತಿದೆ.

ಈ ಕುರಿತು ಮಾತನಾಡಿದ ಮೆಜೆಂಟಾ ಮೊಬಿಲಿಟಿಯ ಸಂಸ್ಥಾಪಕ ಮತ್ತು ಸಿಇಓ ಶ್ರೀ ಮ್ಯಾಕ್ಸನ್ ಲೂಯಿಸ್ ಅವರು , ‘ಟಾಟಾ ಏಸ್ ಇವಿ ನಿರಂತರವಾಗಿ ಅತ್ಯುತ್ತಮ ಕಾರ್ಯಕ್ಷಮತೆ, ಹೆಚ್ಚು ಸಮಯ ಕಾರ್ಯ ನಿರ್ವಹಿಸುವ ಸಾಮರ್ಥ್ಯ, ಅತ್ಯುತ್ತಮ ರೇಂಜ್ ಮತ್ತು ಚಾಲಕರಿಗೆ ಹೆಚ್ಚಿನ ಅನುಕೂಲತೆಯನ್ನು ಒದಗಿಸುತ್ತಾ ಬಂದಿದೆ. ಈಗಾಗಲೇ 350 ವಾಹನಗಳನ್ನು ನಮ್ಮ ಸಮೂಹಕ್ಕೆ ಸೇರಿಸಿಕೊಂಡಿದ್ದು, ಇನ್ನೂ 150 ವಾಹನಗಳು ಬರಲಿವೆ. ಈ ಮೂಲಕ ನಾವು ಭಾರತದಾದ್ಯಂತ ನಮ್ಮ ಹಸಿರು ಸರಕು ಸಾಗಾಣಿಕಾ ವ್ಯವಸ್ಥೆಯನ್ನು ಬಲಪಡಿಸುತ್ತಿದ್ದೇವೆ. 

ಟಾಟಾ ಮೋಟಾರ್ಸ್‌ ನ ವಿಶ್ವಾಸಾರ್ಹ ಸರ್ವೀಸ್ ವ್ಯವಸ್ಥೆ ಮತ್ತು ಅತ್ಯಾಧುನಿಕ ತಂತ್ರಜ್ಞಾನವು 16 ನಗರಗಳಲ್ಲಿ ನಮ್ಮ ವ್ಯಾಪ್ತಿ ವಿಸ್ತರಿಸುವ ಮತ್ತು ಇಂಗಾಲ- ಮುಕ್ತಗೊಳಿಸುವ ಪ್ರಯಾಣದಲ್ಲಿ ಅವರನ್ನು ನಮ್ಮ ಮುಖ್ಯ ಪಾಲುದಾರರನ್ನಾಗಿಸಿದೆ’ ಎಂದರು.

ಟಾಟಾ ಮೋಟಾರ್ಸ್ ಕಮರ್ಷಿಯಲ್ ವೆಹಿಕಲ್ಸ್‌ ನ ಉಪಾಧ್ಯಕ್ಷ ಮತ್ತು ಬಿಸಿನೆಸ್ ಹೆಡ್ (ಎಸ್‌ಸಿವಿಪಿಯು) ಶ್ರೀ ಪಿನಾಕಿ ಹಲ್ದಾರ್ ಅವರು, ‘ಹೊಸತನ, ಪ್ರಾಯೋಗಿಕತೆ ಮತ್ತು ಸುಸ್ಥಿರ ಸಾರಿಗೆ ಉತ್ಪನ್ನಗಳನ್ನು ಒದಗಿಸುವ ಮೂಲಕ ಭಾರತದ ಇ-ಕಾರ್ಗೋ ವಿಭಾಗವನ್ನು ಪರಿವರ್ತಿಸಲು ನಾವು ಹೆಮ್ಮೆ ಪಡುತ್ತೇವೆ. ಮೆಜೆಂಟಾ ಮೊಬಿಲಿಟಿಯು ಏಸ್ ಇವಿಯ ಮೇಲೆ ತೋರಿಸಿರುವ ನಿರಂತರ ವಿಶ್ವಾಸವು ಈ ವಾಹನದ ಕಾರ್ಯಕ್ಷಮತೆ, ವಿಶ್ವಾಸಾರ್ಹತೆ ಮತ್ತು ಅತ್ಯುತ್ತಮ ಪಾಲುದಾರಿಕೆ ಶಕ್ತಿಗೆ ಸಾಕ್ಷಿಯಾಗಿದೆ. ನಾವು ಕೇವಲ ಎಲೆಕ್ಟ್ರಿಕ್ ವಾಹನಗಳನ್ನು ನಿಯೋಜಿಸುತ್ತಿಲ್ಲ, ಬದಲಿಗೆ ಭಾರತದ ನಗರಗಳಾದ್ಯಂತ ಶುದ್ಧವಾದ, ಸ್ಮಾರ್ಟ್ ಲಾಜಿಸ್ಟಿಕ್ಸ್ ವ್ಯವಸ್ಥೆಯ ಅಡಿಪಾಯ ಹಾಕುತ್ತಿದ್ದೇವೆ. ಪ್ರತಿಯೊಂದು ಏಸ್ ಇವಿ ವಿತರಣೆಯು ಶೂನ್ಯ- ಹೊರಸೂಸುವಿಕೆಯ ಕಾರ್ಗೋ ಸಾರಿಗೆಯನ್ನು ಜನಪ್ರಿಯಗೊಳಿಸುವ ಮತ್ತು ರಾಷ್ಟ್ರದ ಹಸಿರು ಸಾರಿಗೆ ಚಳವಳಿಯನ್ನು ವೇಗವಾಗಿಸುವ ಒಂದು ಮಹತ್ವದ ಹೆಜ್ಜೆಯಾಗಿದೆ’ ಎಂದು ಹೇಳಿದರು.

ಟಾಟಾ ಏಸ್ ಇವಿ 161 ಕಿಮೀ ಪ್ರಮಾಣೀಕೃತ ರೇಂಜ್ ಅನ್ನು ಒದಗಿಸುತ್ತದೆ ಮತ್ತು 1000 ಕೆಜಿ ಭಾರ ಹೊರುವ ಸಾಮರ್ಥ್ಯವನ್ನು ಹೊಂದಿದೆ. ರೀಜನರೇಟಿವ್ ಬ್ರೇಕಿಂಗ್ ಮತ್ತು ಅತ್ಯಾಧುನಿಕ ಬ್ಯಾಟರಿ ಕೂಲಿಂಗ್ ಸಿಸ್ಟಮ್ ಹೊಂದಿರುವ ಈ ವಾಹನವು ಸ್ಥಿರವಾಗಿ, ಅಡೆತಡೆಯಿಲ್ಲದೆ ಕಾರ್ಯಾಚರಣೆ ಮಾಡಲು ಅನುವು ಮಾಡಿಕೊಡುತ್ತದೆ.