25ನೇ ಗ್ರ್ಯಾನ್‌ಸ್ಲಾಂನತ್ತ ಜೋಕೋವಿಚ್‌

ಮೆಲ್ಬರ್ನ್‌: ಟೆನಿಸ್‌ ಮಾಂತ್ರಿಕ ಸರ್ಬಿಯಾದ ನೋವಾಕ್‌ ಜೋಕೋವಿಚ್‌ ಐತಿಹಾಸಿಕ 25ನೇ ಗ್ರ್ಯಾನ್‌ ಸ್ಲಾಂ ಪ್ರಶಸ್ತಿ ಗೆಲ್ಲುವ ಆಸೆ ಜೀವಂತವಾಗಿರಿಸಿಕೊಂಡಿದ್ದಾರೆ. ಆಸ್ಟ್ರೇಲಿಯನ್‌ ಓಪನ್‌ನ ಪುರುಷರ ಸಿಂಗಲ್ಸ್‌ನಲ್ಲಿ ಸೆಮಿಫೈನಲ್ ಪ್ರವೇಶಿಸಿರುವ ಜೋಕೋ, ಪ್ರಶಸ್ತಿಗೆ ಇನ್ನೆರಡೇ ಹೆಜ್ಜೆ ದೂರವಿದ್ದಾರೆ.

ಮಂಗಳವಾರ ನಡೆದ ಕ್ವಾರ್ಟರ್‌ ಫೈನಲ್‌ನಲ್ಲಿ ಸ್ಪೇನ್‌ನ ಕಾರ್ಲೋಸ್‌ ಆಲ್ಕರಜ್‌ ವಿರುದ್ಧ 4-6, 6-4, 6-3, 6-4 ಸೆಟ್‌ಗಳಲ್ಲಿ ಗೆದ್ದು ಆಸ್ಟ್ರೇಲಿಯನ್‌ ಓಪನ್‌ನಲ್ಲಿ 12ನೇ, ಒಟ್ಟಾರೆ ಗ್ರ್ಯಾನ್‌ ಸ್ಲಾಂನಲ್ಲಿ 50ನೇ ಸೆಮಿಫೈನಲ್‌ ಪ್ರವೇಶಿಸಿದರು.

ಶುಕ್ರವಾರ ಸೆಮೀಸ್‌ನಲ್ಲಿ ಜೋಕೋಗೆ ಜರ್ಮನಿಯ ಅಲೆಕ್ಸಾಂಡರ್‌ ಜ್ವೆರೆವ್‌ರ ಸವಾಲು ಎದುರಾಗಲಿದೆ. ಜ್ವೆರೆವ್‌ ಕ್ವಾರ್ಟರ್‌ನಲ್ಲಿ ಅಮೆರಿಕದ ಟಾಮಿ ಪಾಲ್‌ ವಿರುದ್ಧ 7-6, 7-6, 2-6, 6-1 ಸೆಟ್‌ಗಳಲ್ಲಿ ಗೆದ್ದರು. ಸೆಮೀಸ್‌ಗೆ ಸಬಲೆಂಕಾ: ಆಸ್ಟ್ರೇಲಿಯನ್‌ ಓಪನ್‌ನಲ್ಲಿ ಹ್ಯಾಟ್ರಿಕ್‌ ಪ್ರಶಸ್ತಿ ಮೇಲೆ ಕಣ್ಣಿಟ್ಟಿರುವ ಬೆಲಾರುಸ್‌ನ ಅರೈನಾ ಸಬಲೆಮಕಾ, ಸೆಮೀಸ್‌ಗೇರಿದ್ದಾರೆ. ಕ್ವಾರ್ಟರಲ್ಲಿ ರಷ್ಯಾದ ಅನಸ್ತಾಸಿಯಾ ಪಾವ್ಲುಚೆಂಕೊ ವಿರುದ್ಧ 6-2, 2-6, 6-3ರಲ್ಲಿ ಗೆದ್ದರು. ಮತ್ತೊಂದು ಕ್ವಾರ್ಟರಲ್ಲಿ ಅಮೆರಿಕದ ಕೊಕೊ ಗಾಫ್‌ರನ್ನು 7-5, 6-4ರಲ್ಲಿ ಸೋಲಿಸಿ ಸ್ಪೇನ್‌ನ ಪೌಲಾ ಬಡೋಸಾ ಸೆಮೀಸ್‌ಗೇರಿದರು. ಫೈನಲ್‌ನಲ್ಲಿ ಸ್ಥಾನಕ್ಕೆ ಸಬಲೆಂಕಾ-ಬಡೋಸಾ ಸೆಣಸಲಿದ್ದಾರೆ.

ಇದೇ ವೇಳೆ ಮಿಶ್ರ ಡಬಲ್ಸ್‌ ಕ್ವಾರ್ಟರ್‌ ಫೈನಲ್‌ನಲ್ಲಿ ರೋಹನ್‌ ಬೋಪಣ್ಣ-ಚೀನಾದ ಶ್ಯುಯಿ ಝಾಂಗ್‌ಗೆ ಸೋಲು ಎದುರಾಯಿತು. ಇದರೊಂದಿಗೆ ಟೂರ್ನಿಯಲ್ಲಿ ಭಾರತದ ಸವಾಲು ಮುಕ್ತಾಯಗೊಂಡಿತು.