ಯುಎಸ್ ಓಪನ್ ಟೆನಿಸ್ನ 3ನೇ ಸುತ್ತಿನಲ್ಲಿ ಸೋಲು : ಜೋಕೋ 25ನೇ ಗ್ರ್ಯಾನ್ಸ್ಲಾಂ ಭಗ್ನ!
ಸಾರಾಂಶ
ಆಲ್ಕರಜ್ ಬಳಿಕ ಜೋಕೋವಿಚ್ಗೂ ಆಘಾತಕಾರಿ ಸೋಲು. 18 ವರ್ಷದ ಬಳಿಕ 3ನೇ ಸುತ್ತಲ್ಲಿ ಸೋಲು. ಈ ವರ್ಷ ಜೋಕೋಗೆ ಒಂದೂ ಗ್ರ್ಯಾನ್ಸ್ಲಾಂ ಇಲ್ಲ. ಬೋಪಣ್ಣ, ಯೂಕಿ ಭಾಂಬ್ರಿ ಜೋಡಿಗಳು 3ನೇ ಸುತ್ತಿಗೆ
ನ್ಯೂಯಾರ್ಕ್: ಈ ಬಾರಿ ಯುಎಸ್ ಓಪನ್ ಗ್ರ್ಯಾನ್ಸ್ಲಾಂ ಟೆನಿಸ್ ಟೂರ್ನಿ ಮತ್ತೊಂದು ಆಘಾತಕಾರಿ ಫಲಿತಾಂಶಕ್ಕೆ ಸಾಕ್ಷಿಯಾಗಿದೆ. ಹಾಲಿ ಹಾಗೂ 4 ಬಾರಿ ಚಾಂಪಿಯನ್ ನೋವಾಕ್ ಜೋಕೋವಿಚ್ 3ನೇ ಸುತ್ತಿನಲ್ಲೇ ಸೋತು ಹೊರಬಿದ್ದಿದ್ದಾರೆ.
ಇದರೊಂದಿಗೆ 25ನೇ ಗ್ರ್ಯಾನ್ಸ್ಲಾಂ ಗೆಲ್ಲುವ ಸರ್ಬಿಯಾದ 37 ವರ್ಷದ ಜೋಕೋ ಕನಸು ಮತ್ತೆ ಭಗ್ನಗೊಂಡಿದೆ. ಕಳೆದ ವರ್ಷ ಯುಎಸ್ ಓಪನ್ ಗೆದ್ದಿದ್ದ ಜೋಕೋ, ಈ ವರ್ಷ ಒಂದೂ ಗ್ರ್ಯಾನ್ಸ್ಲಾಂ ಪ್ರಶಸ್ತಿ ಗೆದ್ದಿಲ್ಲ. 2017ರ ಬಳಿಕ ಇದೇ ಮೊದಲ ಬಾರಿ ವರ್ಷದ 4 ಗ್ರ್ಯಾನ್ಸ್ಲಾಂಗಳ ಪೈಕಿ ಒಂದನ್ನೂ ಗೆಲ್ಲಲು ಜೋಕೋ ವಿಫಲರಾಗಿದ್ದಾರೆ.
ಶುಕ್ರವಾರ ರಾತ್ರಿ ವಿಶ್ವ ನಂ.2 ಜೋಕೋ ಆಸ್ಟ್ರೇಲಿಯಾದ ಅಲೆಕ್ಸೀ ಪೋಪಿರಿನ್ ವಿರುದ್ಧ 6-4, 6-4, 2-6, 6-4 ಸೆಟ್ಗಳಲ್ಲಿ ಪರಾಭವಗೊಂಡರು. 28ನೇ ಶ್ರೇಯಾಂಕಿತ, 25 ವರ್ಷದ ಅಲೆಕ್ಸೀ ವಿರುದ್ಧ 3ನೇ ಸೆಟ್ನಲ್ಲಿ ಜೋಕೋ ಕೊಂಚ ಪ್ರತಿರೋಧ ತೋರಿದರೂ ಸೋಲು ತಪ್ಪಿಸಲಾಗಲಿಲ್ಲ.ಜೋಕೋ ಯುಎಸ್ ಓಪನ್ನ 3ನೇ ಸುತ್ತಿನಲ್ಲಿ ಸೋತಿದ್ದು ಕಳೆದ 18 ವರ್ಷಗಳಲ್ಲೇ ಮೊದಲು.
2005, 2006ರಲ್ಲಿ ಅವರು 3ನೇ ಸುತ್ತಿನಲ್ಲಿ ಸೋತಿದ್ದರು. ಆ ಬಳಿಕ ಪ್ರತಿ ಬಾರಿಯೂ 4ನೇ ಸುತ್ತು ಪ್ರವೇಶಿಸಿದ್ದರು. 10 ಬಾರಿ ಫೈನಲ್ಗೇರಿದ್ದ ಅವರು 4 ಬಾರಿ ಪ್ರಶಸ್ತಿ ಗೆದ್ದಿದ್ದರು. 2006ರ ಬಳಿಕ ಮೊದಲ ಬಾರಿ 3ನೇ ಸುತ್ತಲ್ಲೇ ಪರಾಭವಗೊಂಡಿದ್ದಾರೆ.ಗಾಫ್ 4ನೇ ಸುತ್ತಿಗೆ: ಮಹಿಳಾ ಸಿಂಗಲ್ಸ್ನಲ್ಲಿ ಹಾಲಿ ಚಾಂಪಿಯನ್ ಕೊಕೊ ಗಾಫ್ 4ನೇ ಸುತ್ತು ಪ್ರವೇಶಿಸಿದರು. 2ನೇ ಶ್ರೇಯಾಂಕಿತ ಅರೈನಾ ಸಬಲೆಂಕಾ, ಪುರುಷರ ಸಿಂಗಲ್ಸ್ನಲ್ಲಿ ಅಲೆಕ್ಸಾಂಡರ್ ಜ್ವೆರೆವ್, ಆ್ಯಂಡ್ರೆ ರುಬ್ಲೆವ್ 4ನೇ ಸುತ್ತಿಗೆ ಲಗ್ಗೆ ಇಟ್ಟರು. ಆದರೆ 4ನೇ ಶ್ರೇಯಾಂಕಿತ ಎಲೆನಾ ರಬೈಕೆನಾ 2ನೇ ಸುತ್ತಲ್ಲೇ ಸೋತು ಹೊರಬಿದ್ದರು.
ಬಿಗ್-3ಗಿಲ್ಲ ಗ್ರ್ಯಾನ್ಸ್ಲಾಂ: 22 ವರ್ಷದಲ್ಲೇ ಮೊದಲು
ಟೆನಿಸ್ನ ಬಿಗ್-3 ಎಂದೇ ಕರೆಯಲ್ಪಡುವ ಜೋಕೋವಿಚ್, ರಾಫೆಲ್ ನಡಾಲ್ ಹಾಗೂ ರೋಜರ್ ಫೆಡರರ್ ಈ ವರ್ಷದ 4 ಗ್ರ್ಯಾನ್ಸ್ಲಾಂ ಟೂರ್ನಿಗಳ ಪೈಕಿ ಒಂದನ್ನೂ ಗೆದ್ದಿಲ್ಲ. ಇದು ಕಳೆದ 22 ವರ್ಷಗಳಲ್ಲೇ ಮೊದಲು. 2002ರಿಂದ 2023ರ ವರೆಗೆ ಈ ಮೂವರಲ್ಲಿ ಒಬ್ಬರು ಕನಿಷ್ಠ ಒಂದಾದರೂ ಗ್ರ್ಯಾನ್ಸ್ಲಾಂ ಗೆದ್ದಿದ್ದಾರೆ.
ಬೋಪಣ್ಣ, ಯೂಕಿ ಭಾಂಬ್ರಿ ಜೋಡಿಗಳು 3ನೇ ಸುತ್ತಿಗೆ
ಯುಎಸ್ ಓಪನ್ ಗ್ರ್ಯಾನ್ಸ್ಲಾಂ ಟೆನಿಸ್ ಟೂರ್ನಿಯಲ್ಲಿ ಭಾರತದ ರೋಹನ್ ಬೋಪಣ್ಣ-ಆಸ್ಟ್ರೇಲಿಯಾದ ಮ್ಯಾಥ್ಯೂ ಎಬ್ಡೆನ್ 3ನೇ ಸುತ್ತು ಪ್ರವೇಶಿಸಿದ್ದಾರೆ. ಕಳೆದ ಬಾರಿ ರನ್ನರ್-ಅಪ್ ಇಂಡೋ-ಆಸೀಸ್ ಜೋಡಿ ಶನಿವಾರ ಸ್ಪೇನ್ನ ರಾಬೆರ್ಟೊ ಕ್ಯಾರ್ಬೆಲ್ಲೆಸ್-ಅರ್ಜೆಂಟೀನಾದ ಫೆಡೆರಿಕೊ ಕೊರಿಯಾ ವಿರುದ್ಧ 6-2, 6-4ರಲ್ಲಿ ಗೆಲುವು ಸಾಧಿಸಿತು.
ಮತ್ತೊಂದೆಡೆ ಭಾರತದ ಯೂಕಿ ಭಾಂಬ್ರಿ-ಫ್ರಾನ್ಸ್ನ ಅಲ್ಬಾನೊ ಒಲಿವೆಟ್ಟಿ ಜೋಡಿ ಆಮೆರಿಕದ ಆಸ್ಟಿನ್ ಕ್ರೆಜಿಕೆಕ್-ನೆದರ್ಲೆಂಡ್ಸ್ನ ಜೀನ್ ಜೂಲಿಯನ್ ರೋಜರ್ ವಿರುದ್ಧ 4-6, 6-3, 7-5 ಸೆಟ್ಗಳಲ್ಲಿ ಜಯಭೇರಿ ಬಾರಿಸಿತು. ಈ ಮೂಲಕ ಭಾಂಬ್ರಿ ಗ್ರ್ಯಾನ್ಸ್ಲಾಂ ಟೆನಿಸ್ನಲ್ಲಿ 2ನೇ ಬಾರಿ 3ನೇ ಸುತ್ತು ಪ್ರವೇಶಿಸಿದರು. ಆದರೆ ಶ್ರೀರಾಮ್ ಬಾಲಾಜಿ-ಅರ್ಜೆಂಟೀನಾದ ಗ್ಯುಡೊ ಆ್ಯಂಡ್ರೂಜಿ ಸೋಲನುಭವಿಸಿದರು.