ಐಪಿಎಲ್‌ಗೂ ಮುನ್ನ ಮತ್ತೆ ಕ್ರಿಕೆಟ್ ಅಂಗಳಕ್ಕೆ ಹಾರ್ದಿಕ್‌ ಪಾಂಡ್ಯ

ನವಿ ಮುಂಬೈ: ಏಕದಿನ ವಿಶ್ವಕಪ್‌ ವೇಳೆ ಗಾಯಗೊಂಡು ಸ್ಪರ್ಧಾತ್ಮಕ ಕ್ರಿಕೆಟ್‌ನಿಂದ ದೂರವುಳಿದಿದ್ದ ಹಾರ್ದಿಕ್‌ ಪಾಂಡ್ಯ ಮತ್ತೆ ಆಟಕ್ಕೆ ಮರಳಿದ್ದಾರೆ.

 ಡಿ.ವೈ.ಪಾಟೀಲ್‌ ಟಿ20 ಕಪ್‌ ಟೂರ್ನಿಯಲ್ಲಿ ರಿಲಯನ್ಸ್‌ ವನ್ಸ್‌ ಪರ ಕಣಕ್ಕಿಳಿದ ಪಾಂಡ್ಯ 3 ಓವರ್‌ ಬೌಲ್‌ ಮಾಡಿ 2 ವಿಕೆಟ್‌ ಪಡೆದಿದ್ದಾರೆ. ಈ ಮೂಲಕ ಐಪಿಎಲ್‌ಗೆ ಸಿದ್ಧತೆ ನಡೆಸುತ್ತಿದ್ದಾರೆ. 2023ರ ಏಕದಿನ ವಿಶ್ವಕಪ್‌ನ ಬಾಂಗ್ಲಾದೇಶ ವಿರುದ್ಧದ ಪಂದ್ಯದಲ್ಲಿ ಹಾರ್ದಿಕ್‌ ಗಾಯಗೊಂಡು ಹೊರಬಿದ್ದಿದ್ದರು.

ಮುಲ್ಲಾನ್ಪುರ ಸ್ಟೇಡಿಯಂನಲ್ಲಿ ಪಂಜಾಬ್‌ ಕಿಂಗ್ಸ್‌ ಪಂದ್ಯಗಳು

ಮೊಹಾಲಿ: ಹೊಸದಾಗಿ ನಿರ್ಮಾಣಗೊಂಡಿರುವ ಮುಲ್ಲಾನ್ಪುರದ ಮಹಾರಾಜ ಯದವೀಂದ್ರ ಸಿಂಗ್‌ ಕ್ರೀಡಾಂಗಣದಲ್ಲಿ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ನ(ಐಪಿಎಲ್‌) ತನ್ನ ತವರಿನ ಪಂದ್ಯಗಳು ನಡೆಯಲಿವೆ ಎಂದು ಪಂಜಾಬ್‌ ಕಿಂಗ್ಸ್‌ ಫ್ರಾಂಚೈಸಿ ತಿಳಿಸಿದೆ. 

2008ರಿಂದಲೂ ಪಂಜಾಬ್‌ ತಂಡ ಮೊಹಾಲಿ ಕ್ರೀಡಾಂಗಣದಲ್ಲಿ ಪಂದ್ಯಗಳನ್ನು ಆಡುತ್ತಿತ್ತು. ಮುಲ್ಲಾನ್ಪುರ ಕ್ರೀಡಾಂಗಣ ಅತ್ಯಾಧುನಿಕ ಸೌಲಭ್ಯಗಳನ್ನು ಹೊಂದಿದ್ದು, 33 ಸಾವಿರ ಪ್ರೇಕ್ಷಕರು ಪಂದ್ಯ ವೀಕ್ಷಿಸಬಹುದಾಗಿದೆ. ಮಾ.23ರಂದು ಡೆಲ್ಲಿ ವಿರುದ್ಧ ಪಂಜಾಬ್‌ ಮೊದಲ ಪಂದ್ಯವಾಡಲಿದೆ.