ಕಾಮನ್‌ವೆಲ್ತ್‌ ಗೇಮ್ಸ್‌ನಿಂದ ಬ್ಯಾಡ್ಮಿಂಟನ್‌, ಕುಸ್ತಿ, ಕ್ರಿಕೆಟ್‌, ಟಿಟಿ, ಶೂಟಿಂಗ್‌ಗೂ ಕೊಕ್‌!

ಲಂಡನ್‌: ವೆಚ್ಚ ಕಡಿತಗೊಳಿಸುವ ನಿಟ್ಟಿನಲ್ಲಿ 2026ರ ಗ್ಲಾಸ್ಗೋ ಕಾಮನ್‌ವೆಲ್ತ್‌ ಗೇಮ್ಸ್‌ನಿಂದ ಪ್ರಮುಖ ಕ್ರೀಡೆಗಳನ್ನು ಕೈಬಿಡಲು ಆಯೋಜಕರು ನಿರ್ಧರಿಸಿದ್ದಾರೆ. ಹಾಕಿ ಮಾತ್ರವಲ್ಲದೇ ಕ್ರಿಕೆಟ್‌, ಬ್ಯಾಡ್ಮಿಂಟನ್‌, ಕುಸ್ತಿ, ಶೂಟಿಂಗ್‌, ಟೇಬಲ್‌ ಟೆನಿಸ್‌ ಸೇರಿ 10 ಕ್ರೀಡೆಗಳಿಗೆ ಕೊಕ್‌ ನೀಡಲಾಗಿದ್ದು, ಕೇವಲ 10 ಕ್ರೀಡೆಗಳನ್ನು ಆಡಿಸಲಾಗುತ್ತದೆ ಎಂದು ಆಯೋಜಕರು ಮಂಗಳವಾರ ತಿಳಿಸಿದ್ದಾರೆ. 2026ರ ಜು.23ರಿಂದ ಆ.2ರ ವರೆಗೆ 4 ಕ್ರೀಡಾಂಗಣಗಳಲ್ಲಿ ಗೇಮ್ಸ್‌ ಆಯೋಜನೆಗೊಳ್ಳಲಿದೆ. ಅಥ್ಲೆಟಿಕ್ಸ್‌, ಈಜು, ಜಿಮ್ನಾಸ್ಟಿಕ್‌, ಸೈಕ್ಲಿಂಗ್‌, ನೆಟ್‌ಬಾಲ್‌, ವೇಟ್‌ಲಿಫ್ಟಿಂಗ್‌, ಬಾಕ್ಸಿಂಗ್‌, ಜುಡೊ, ಬೌಲ್ಸ್‌ ಹಾಗೂ 3*3 ಬಾಸ್ಕೆಟ್‌ಬಾಲ್‌ ಕ್ರೀಡೆಗಳನ್ನು ಆಡಿಸಲು ಆಯೋಜಕರು ನಿರ್ಧರಿಸಿದ್ದಾರೆ.ಗೇಮ್ಸ್‌ನಿಂದ ಕೈಬಿಟ್ಟಿರುವ ಬಹುತೇಕ ಕ್ರೀಡೆಗಳಲ್ಲಿ ಭಾರತ ಹೆಚ್ಚಿನ ಪ್ರಾಬಲ್ಯವಿತ್ತು. ಆದರೆ 2026ರ ಗೇಮ್ಸ್‌ನಿಂದ ಈ ಕ್ರೀಡೆಗಳನ್ನು ಕೈಬಿಟ್ಟಿರುವುದು ಭಾರತಕ್ಕೆ ಭಾರಿ ಹಿನ್ನಡೆ ಉಂಟುಮಾಡಲಿದೆ. ಭಾರತ ಶೂಟಿಂಗ್‌ನಲ್ಲಿ ಬರೋಬ್ಬರಿ 135 ಪದಕ ಗೆದ್ದಿದ್ದರೆ, ಕುಸ್ತಿಯಲ್ಲಿ 114, ಬ್ಯಾಡ್ಮಿಂಟನ್‌ನಲ್ಲಿ 31 ಪದಕ ಪಡೆದಿದೆ. ಶೂಟಿಂಗ್‌ ಸ್ಪರ್ಧೆಯನ್ನು ಕಳೆದ ಬಾರಿ ಗೇಮ್ಸ್‌ನಿಂದಲೇ ಹೊರಗಿಡಲಾಗಿತ್ತು. ಆರ್ಚರಿ 2010ರಲ್ಲಿ ಕೊನೆ ಬಾರಿ ಆಡಿಲಾಗಿದ್ದು, ಈ ಬಾರಿ ಮತ್ತೆ ಹೊರಗಿಡಲಾಗಿದೆ.ಉಳಿದಂತೆ ಬ್ಯಾಡ್ಮಿಂಟನ್‌ 1966ರಿಂದಲೂ ಆಡಿಸಲಾಗುತ್ತಿತ್ತು. ಹಾಕಿ ಮತ್ತು ಸ್ವ್ಕಾಶ್‌ 1998ರಲ್ಲಿ ಸೇರ್ಪಡೆಗೊಂಡಿದ್ದರೆ, ಟೇಬಲ್‌ ಟೆನಿಸ್‌ 2002ರಿಂದ ಆಡಿಸಲಾಗುತ್ತಿದೆ. ಕ್ರಿಕೆಟ್‌ 2022ರಲ್ಲಿ ಮರು ಸೇರ್ಪಡೆಗೊಳಿಸಲಾಗಿತ್ತು.ಭಾರತ ಕ್ರೀಡಾ ಸಂಸ್ಥೆ, ಅಥ್ಲೀಟ್ಸ್‌ ಅಸಮಾಧಾನ

ಕಾಮನ್‌ವೆಲ್ತ್‌ ಗೇಮ್ಸ್‌ನಿಂದ ಪ್ರಮುಖ ಕ್ರೀಡೆಗಳನ್ನು ಹೊರಗಿಟ್ಟಿರುವುದಕ್ಕೆ ಭಾರತ ಹಾಕಿ ಸಂಸ್ಥೆ, ಕುಸ್ತಿ ಫೆಡರೇಶನ್‌, ರೈಫಲ್‌ ಸಂಸ್ಥೆ ಅಸಮಾಧಾನ ವ್ಯಕ್ತಪಡಿಸಿದೆ. ಇನ್ನು ಸ್ಕ್ಯಾಶ್‌ ಆಟಗಾರ್ತಿ ದೀಪಿಕಾ ಪಲ್ಲಿಕಲ್‌, ಹಾಕಿ ಆಟಗಾರ ಹರ್ಮನ್‌ಪ್ರೀತ್‌ ಸಿಂಗ್‌, ಟೇಬಲ್‌ ಟೆನಿಸ್‌ ಪಟು ಶರತ್‌ ಕಮಲ್‌, ಜಿ.ಸತ್ಯನ್‌ ಕೂಡಾ ಆಘಾತ ವ್ಯಕ್ತಪಡಿಸಿದ್ದಾರೆ.ತೂಗುಯ್ಯಾಲೆಯಲ್ಲಿ ಕಾಮ್‌ನೆವೆಲ್ತ್‌ ಭವಿಷ್ಯ

1930ರಲ್ಲಿ ಆರಂಭಗೊಂಡಿರುವ ಕಾಮನ್‌ವೆಲ್ತ್‌ ಗೇಮ್ಸ್‌, ಒಲಿಂಪಿಕ್ಸ್‌ನಂತೆಯೇ ಪ್ರತಿಷ್ಠಿತ ಕ್ರೀಡಾಕೂಟ. ಆದರೆ ಸದ್ಯ ಕಾಮನ್‌ವೆಲ್ತ್‌ ಗೇಮ್ಸ್‌ ಭವಿಷ್ಯವೇ ತೂಗುಯ್ಯಾಲೆಯಲ್ಲಿದೆ. ಹಲವು ದೇಶಗಳು ವೆಚ್ಚ ಹೆಚ್ಚಳ ಕಾರಣಕ್ಕೆ ಗೇಮ್ಸ್‌ ಆಯೋಜನೆಗೆ ಮುಂದೆ ಬರುತ್ತಿಲ್ಲ. 2022ರಲ್ಲಿ ದ.ಆಫ್ರಿಕಾದ ಡರ್ಬನ್‌ಗೆ ಗೇಮ್ಸ್‌ನ ಆತಿಥ್ಯ ಹಕ್ಕು ಲಭಿಸಿದ್ದರೂ, ಬಳಿಕ ಹಿಂದೆ ಸರಿದಿತ್ತು. ಹೀಗಾಗಿ ಗೇಮ್ಸ್‌ ಬರ್ಮಿಂಗ್‌ಹ್ಯಾಮ್‌ನಲ್ಲಿ ನಡೆದಿತ್ತು. 2026ರ ಗೇಮ್ಸ್‌ ಆತಿಥ್ಯ ಹಕ್ಕಿನಿಂದ ಇತ್ತೀಚೆಗಷ್ಟೇ ಆಸ್ಟ್ರೇಲಿಯಾ ಹಿಂದೆ ಸರಿದ ಕಾರಣ, ಸ್ಕಾಟ್ಲೆಂಡ್‌ ಗ್ಲಾಸ್ಗೋ ನಗರದಲ್ಲಿ ಮುಂದಿನ ಗೇಮ್ಸ್‌ ನಡೆಯಲಿದೆ. ಆದರೆ ಅರ್ಧಕ್ಕರ್ಧ ಕ್ರೀಡೆಗಳನ್ನೇ ಕೈಬಿಡಲಾಗಿದೆ.