ಮಿಯಾಮಿ ಓಪನ್‌ ಟೆನಿಸ್‌ ಟೂರ್ನಿ: ಬೋಪಣ್ಣ-ಎಬ್ಡೆನ್‌ ಫೈನಲ್‌ಗೆ

ಫ್ಲೋರಿಡಾ(ಅಮೆರಿಕ): ಭಾರತದ ಹಿರಿಯ ಟೆನಿಸಿಗ ರೋಹನ್‌ ಬೋಪಣ್ಣ ಹಾಗೂ ಆಸ್ಟ್ರೇಲಿಯಾದ ಮ್ಯಾಥ್ಯೂ ಎಬ್ಡೆನ್‌ ಮಿಯಾಮಿ ಓಪನ್‌ ಎಟಿಪಿ 1000 ಟೆನಿಸ್‌ ಟೂರ್ನಿಯಲ್ಲಿ ಫೈನಲ್‌ ಪ್ರವೇಶಿಸಿದ್ದಾರೆ. ಈ ಮೂಲಕ ಎಲ್ಲಾ 9 ಎಟಿಪಿ ಮಾಸ್ಟರ್ಸ್‌ ಟೂರ್ನಿಗಳಲ್ಲಿ ಫೈನಲ್‌ಗೇರಿದ 2ನೇ ಭಾರತೀಯ ಎಂಬ ಹೆಗ್ಗಳಿಕೆಗೆ ಬೋಪಣ್ಣ ಪಾತ್ರರಾದರು. ಲಿಯಾಂಡರ್‌ ಪೇಸ್‌ ಈ ಸಾಧನೆ ಮಾಡಿದ ಮೊದಲಿಗರು.ಗುರುವಾರ ರಾತ್ರಿ ನಡೆದ ಪುರುಷರ ಡಬಲ್ಸ್‌ ಸೆಮಿಫೈನಲ್‌ನಲ್ಲಿ ಅಗ್ರ ಶ್ರೇಯಾಂಕಿತ ಇಂಡೋ-ಆಸೀಸ್‌ ಜೋಡಿ, ಸ್ಪೇನ್‌ನ ಗ್ರಾನೊಲೆರ್ಸ್‌ ಹಾಗೂ ಅರ್ಜೆಂಟೀನಾದ ಜೆಬಲ್ಲೊಸ್‌ ವಿರುದ್ಧ 6-1, 6-4 ಅಂತರದಲ್ಲಿ ಗೆಲುವು ಸಾಧಿಸಿತು. ಹಾಲಿ ಆಸ್ಟ್ರೇಲಿಯನ್‌ ಓಪನ್‌ ಗ್ರ್ಯಾನ್‌ಸ್ಲಾಂ ಚಾಂಪಿಯನ್‌ ಬೋಪಣ್ಣ-ಎಬ್ಡೆನ್‌ ಶನಿವಾರ ಫೈನಲ್‌ನಲ್ಲಿ ಕ್ರೊವೇಷಿಯಾದ ಇವಾನ್‌ ಡೊಡಿಗ್‌-ಅಮೆರಿಕದ ಆಸ್ಟಿನ್‌ ಕ್ರಾಜಿಕೆಕ್‌ ವಿರುದ್ಧ ಸೆಣಸಲಿದ್ದಾರೆ. ಬೋಪಣ್ಣಗೆ ಇದು ಮಿಯಾಮಿ ಓಪನ್‌ನಲ್ಲಿ ಮೊದಲ, ಒಟ್ಟಾರೆ 14ನೇ ಎಟಿಪಿ ಮಾಸ್ಟರ್ಸ್‌ 1000 ಫೈನಲ್‌ ಆಗಿದೆ.