ಬ್ಯಾಂಕ್‌ ಆಫ್ ಬರೋಡಾ ಸಿಸ್ಟಂ ಹ್ಯಾಕ್‌ : 1 ಟಿಬಿ ಡೇಟಾ ಲೀಕ್‌!

 ಮುಂಬೈ: ಬ್ಯಾಂಕ್‌ ಆಫ್ ಬರೋಡಾದಲ್ಲಿ ಗಂಭೀರ ಸೈಬರ್‌ ಕಳ್ಳತನವಾಗಿದ್ದು, ಹ್ಯಾಕರ್‌ಗಳು ಬ್ಯಾಂಕ್‌ನ ಸುಮಾರು 1ಟಿಬಿ (ಟೆರಾಬೈಟ್‌) ಸೂಕ್ಷ್ಮ ಡೇಟಾವನ್ನು ಕದ್ದು ಡಾರ್ಕ್ ವೆಬ್‌ನಲ್ಲಿ ಉಚಿತವಾಗಿ ಹಂಚಿಕೊಂಡ ಆತಂಕಕಾರಿ ಬೆಳವಣಿಗೆ ನಡೆದಿದೆ. 

ಈ ಡೇಟಾದಲ್ಲಿ ಗ್ರಾಹಕರ ಖಾತೆ ವಿವರಗಳು, ಆಧಾರ್ ಸಂಖ್ಯೆಗಳು, ಸಾಲದ ದಾಖಲೆಗಳು ಮತ್ತು ಆಂತರಿಕ ವರದಿಗಳು ಸೇರಿವೆ. ಆದರೆ ಬ್ಯಾಂಕ್‌ನ ಮುಖ್ಯ ವ್ಯವಸ್ಥೆ ಸುರಕ್ಷಿತವಾಗಿದೆ ಎಂದು ಬ್ಯಾಂಕ್‌ ತಿಳಿಸಿದೆ. 

ವಂಚನೆ ನಡೆದಿದ್ದು ಹೇಗೆ?:

ಹ್ಯಾಕರ್‌ಗಳು ಮೊದಲು ಬ್ಯಾಂಕ್‌ನ ಉದ್ಯೋಗಿಯೊಬ್ಬರ ಇಮೇಲ್ ಖಾತೆಯನ್ನು ವಶಕ್ಕೆ ಪಡೆದಿದ್ದಾರೆ. ಫಿಷಿಂಗ್ ಇಮೇಲ್ ಅಥವಾ ಮಾಲ್‌ವೇರ್ ಮೂಲಕ ಉದ್ಯೋಗಿಯ ಲಾಗಿನ್ ವಿವರಗಳನ್ನು ಪಡೆದುಕೊಂಡು ಇಮೇಲ್ ಖಾತೆಗೆ ಪ್ರವೇಶ ಪಡೆದಿದ್ದಾರೆ. ನಂತರ ಆ ಉದ್ಯೋಗಿಗೆ ಲಭ್ಯವಿದ್ದ ಅನೇಕ ಸೂಕ್ಷ್ಮ ದಾಖಲೆಗಳನ್ನು ಡೌನ್‌ಲೋಡ್ ಮಾಡಿಕೊಂಡಿದ್ದಾರೆ. ಇದರಲ್ಲಿ ಬ್ಯಾಂಕ್‌ನ ಶಾಖೆಗಳಿಂದ ಕಳಿಸಲಾದ ಆಂತರಿಕ ಇಮೇಲ್‌ಗಳು, ಲೋನ್ ಅಪ್ರೈಸಲ್ ದಾಖಲೆಗಳು, ಆಡಿಟ್ ವರದಿಗಳು, ಗ್ರಾಹಕರ ಅರ್ಜಿ ಫಾರ್ಮ್‌ಗಳು, ವಿಚಕ್ಷಣ ತನಿಖೆ ವಿವರಗಳು ಮತ್ತು ಇತರ ಮುಖ್ಯ ಮಾಹಿತಿಗಳು ಸೇರಿವೆ. ಈ ರೀತಿ ಸುಮಾರು 1 ಟಿಬಿ ಡೇಟಾವನ್ನು ಸಂಗ್ರಹಿಸಿ ಡಾರ್ಕ್ ವೆಬ್‌ನಲ್ಲಿ ಪ್ರಕಟಿಸಿದ್ದಾರೆ ಎಂದು ಬ್ಯಾಂಕ್ ಆಫ್ ಬರೋಡಾದ ಅಧಿಕೃತ ಹೇಳಿಕೆ ತಿಳಿಸಿದೆ. 

ಮುಖ್ಯ ವ್ಯವಸ್ಥೆ ಸುರಕ್ಷಿತ:‘ 

ಬ್ಯಾಂಕ್‌ನ ಕೋರ್ ಬ್ಯಾಂಕಿಂಗ್ ಸಿಸ್ಟಂಗಳಿಗೆ (ಮುಖ್ಯ ವ್ಯವಹಾರ ವ್ಯವಸ್ಥೆ) ಯಾವುದೇ ಹಾನಿಯಾಗಿಲ್ಲ. ಅವು ಸಂಪೂರ್ಣ ಸುರಕ್ಷಿತವಾಗಿವೆ. ಆದರೆ ಉದ್ಯೋಗಿಯ ಇಮೇಲ್ ಮೂಲಕ ಲಭ್ಯವಾದ ಕೆಲವು ಡೇಟಾ ಮಾತ್ರ ಹ್ಯಾಕ್ ಆಗಿದೆ. ಈ ಘಟನೆಯನ್ನು ಪರಿಶೀಲಿಸಲು ಸಮಗ್ರ ತನಿಖೆ ಪ್ರಾರಂಭಿಸಿದ್ದೇವೆ. ಸಂಬಂಧಿತ ಅಧಿಕಾರಿಗಳೊಂದಿಗೆ ನಿಕಟವಾಗಿ ಕಾರ್ಯನಿರ್ವಹಿಸುತ್ತಿದ್ದೇವೆ’ ಎಂದು ಬ್ಯಾಂಕ್ ಆಫ್ ಬರೋಡಾ ತಿಳಿಸಿದೆ. 

ಟ್ರಿಪಲ್‌ಎಕ್ಸ್ ಕೈಚಳಕ ಶಂಕೆ: 

ಈ ದಾಳಿಯ ಹಿಂದೆ ಟ್ರಿಪಲ್ ಎಕ್ಸ್ ಎಂಬ ಹ್ಯಾಕರ್ ಗುಂಪು ಇರಬಹುದು ಎಂದು ಸೈಬರ್ ತಜ್ಞರು ಅನುಮಾನ ವ್ಯಕ್ತಪಡಿಸಿದ್ದಾರೆ. ‘ಈ ಗುಂಪು ಮೇ ತಿಂಗಳಲ್ಲಿ ಇಂಡೋನೇಷ್ಯಾದ ದೊಡ್ಡ ಬ್ಯಾಂಕ್ ಒಂದರ 2 ಟಿಬಿ ಡೇಟಾವನ್ನು ಕದ್ದ ಆರೋಪವಿದೆ. ಜು.25ರಂದು ಡಾರ್ಕ್ ವೆಬ್ ಮಾನಿಟರಿಂಗ್ ಸೈಟ್‌ಗಳಲ್ಲಿ ಈ ಸೋರಿಕೆ ಮೊದಲು ಕಂಡುಬಂತು. ಹ್ಯಾಕರ್‌ಗಳು ಕೆಲವು ದಾಖಲೆಗಳ ಮಾದರಿಗಳನ್ನು ಸಹ ಪ್ರಕಟಿಸಿದ್ದಾರೆ’ ಎಂದು ಸಾಫ್ಟ್‌ವೇರ್ ಎಂಜಿನಿಯರ್ ಶ್ರೀಕಾಂತ್ ಲಕ್ಷ್ಮಣನ್ ಸಾರ್ವಜನಿಕರಿಗೆ ತಿಳಿಸಿದ್ದಾರೆ.