ಮಕ್ಕಳನ್ನು ಹ್ಯಾಂಡ್ ಬ್ಯಾಗಿನಂತೆ ಬಳಸುವುದೇ?: ಐಶ್ವರ್ಯಾ ವಿರುದ್ಧ ಮಾಳವಿಕಾ ಗುಡುಗು
ಸಾರಾಂಶ
ತಾಯಿ ವಿಶ್ವ ಸುಂದರಿ ಎಂಬ ಕಾರಣಕ್ಕೆ ಮಗಳನ್ನು ಎಲ್ಲೆಡೆ ಕರೆದೊಯ್ಯುವುದು ಸರಿಯೇ ಎಂದು ನಟಿ ಮಾಳವಿಕಾ ಅವಿನಾಶ್ ಪ್ರಶ್ನಿಸಿದ್ದಾರೆ. ಮಕ್ಕಳ ಬಾಲ್ಯ, ಮುಗ್ಧತೆಯನ್ನು ಕಸಿಯುವ ಪ್ರಯತ್ನ ಇದಲ್ಲವೇ ಎಂದು ಅವರು ಐಶ್ವರ್ಯಾ ರೈ ಅವರನ್ನು ಪರೋಕ್ಷವಾಗಿ ಟೀಕಿಸಿದ್ದಾರೆ.
ಸಿನಿವಾರ್ತೆ‘
ತಾಯಿ ವಿಶ್ವ ಸುಂದರಿ. ಆಕೆ ಹೋದಲೆಲ್ಲಾ ಆ ಹುಡುಗಿ ಬಾಲಂಗೋಚಿಯಂತೆ. ಮಕ್ಕಳನ್ನು ಹ್ಯಾಂಡ್ ಬ್ಯಾಗಿನಂತೆ ಬಳಸುವುದು ಎಂಥಾ ಸಂಸ್ಕೃತಿ’ ಎಂದು ಐಶ್ವರ್ಯಾ ರೈ ವಿರುದ್ಧ ನಟಿ ಮಾಳವಿಕಾ ಅವಿನಾಶ್ ಗುಡುಗಿದ್ದಾರೆ.
ಈ ಕುರಿತು ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಮಾಡಿರುವ ಅವರು, ‘ನಮ್ಮ ಯಾವುದೋ ಇನ್ಸೆಕ್ಯುರಿಟಿಯ ಕಾರಣಕ್ಕೆ ನಾವು ಹೋದಲ್ಲೆಲ್ಲ ಹರೆಯದ ಹುಡುಗಿಯರನ್ನು ಕರೆದುಕೊಂಡು ಹೋಗುವುದು ಆ ಮಕ್ಕಳ ಮೇಲೆ ದುಷ್ಪರಿಣಾಮ ಬೀರುವುದಿಲ್ಲವೇ? ಮಕ್ಕಳ ಬಾಲ್ಯ, ಮುಗ್ಧತೆಯನ್ನು ಕಸಿಯುವ ಪ್ರಯತ್ನ ಇದಲ್ಲವೇ’ ಎಂದು ಪ್ರಶ್ನಿಸಿದ್ದಾರೆ.
‘ವಿಶ್ವ ಸುಂದರಿ ಎಲ್ಲೇ ಹೊರಟರೂ ಆಕೆಯ ಒಂದು ಬದಿಯಲ್ಲಿ ಸ್ಟೈಲಿಸ್ಟ್, ಹೇರ್ ಡ್ರೆಸ್ಸರ್, ಮೇಕಪ್ನವರು, ಮತ್ತೊಂದು ಕಡೆ ಈ ಹುಡುಗಿ. ಇದೆಂತಹ ಅವಸ್ಥೆ. ಆ ಮಗುವಿಗೆ, ಶಾಲೆ, ಓದು ಏನೂ ಇರುವುದಿಲ್ಲವೆ? ಹೀಗೆ ತಾಯಿಯ ಜೊತೆ ಜಗತ್ತೆಲ್ಲ ತಿರುಗಾಡುತ್ತಾಳಲ್ಲಾ? ಸ್ಟೈಲಿಶ್ ಉಡುಗೆ ತೊಟ್ಟು ಪೋಸ್ ಕೊಡುವುದು ತಾಯಿಗಾದರೆ ವೃತ್ತಿ. ಆದರೆ ಈ ಮಗುವಿಗೆ ಅಲ್ಲೇನು ಕೆಲಸ? ಯಾಕೊ ಆ ದೃಶ್ಯವನ್ನು ನೋಡಿ ಬೇಜಾರಾಯಿತು. ನಮ್ಮ ಸ್ವಾರ್ಥಕ್ಕಾಗಿ ಮಕ್ಕಳನ್ನು ನಾವೇ ಬಳಸಿಕೊಂಡು ಬಿಡುತ್ತೇವಾ’ ಎಂದು ಮಾಳವಿಕಾ ಬರೆದಿದ್ದಾರೆ.