2050ರ ವೇಳೆಗೆ 44 ಕೋಟಿ ಭಾರತೀಯರಿಗೆ ಬೊಜ್ಜಿನ ಸಮಸ್ಯೆ: ವರದಿ

ನವದೆಹಲಿ: ಮುಂದಿನ 25 ವರ್ಷಗಳಲ್ಲಿ ಭಾರತದಲ್ಲಿ ಬರೋಬ್ಬರಿ 44 ಕೋಟಿ ಭಾರತೀಯರು ಬೊಜ್ಜಿನ ಸಮಸ್ಯೆಗೆ ತುತ್ತಾಗಬಹುದು.ಈ ಮೂಲಕ ಚೀನಾವನ್ನು ಭಾರತ ಮೀರಿಸಲಿದೆ ಎಂದು ದಿ ಲ್ಯಾನ್ಸೆಟ್‌ ವರದಿಯು ತನ್ನ ಜಾಗತಿಕ ವಿಶ್ಲೇಷಣೆಯಲ್ಲಿ ಬಹಿರಂಗಪಡಿಸಿದೆ.

2050ರ ವೇಳೆಗೆ ಭಾರತದಲ್ಲಿ 21.8 ಕೋಟಿ ಪುರುಷರು ಮತ್ತು 23.1 ಕೋಟಿ ಮಹಿಳೆಯರು ಸೇರಿದಂತೆ ಒಟ್ಟು 44.9 ಕೋಟಿ ಜನರು ಬೊಜ್ಜಿನ ಸಮಸ್ಯೆಗೆ ತುತ್ತಾಗಲಿದ್ದು, ಒಟ್ಟಾರೆ ಜನಸಂಖ್ಯೆಯ ಸುಮಾರು ಮೂರನೇ ಒಂದು ಭಾಗದಷ್ಟು ಜನರು ಅಧಿಕ ತೂಕ ಮತ್ತು ಬೊಜ್ಜಿನ ಸಮಸ್ಯೆ ಎದುರಿಸಲಿದ್ದಾರೆ. ಈ ಮೂಲಕ, ಅತಿ ಹೆಚ್ಚು ಬೊಜ್ಜಿನ ಸಮಸ್ಯೆಯಿಂದ ಬಳಲುತ್ತಿರುವ ಚೀನಾವನ್ನು ಭಾರತ ಹಿಂದಿಕ್ಕಲಿದೆ ಎಂದಿದೆ.

ವರದಿಯ ಪ್ರಕಾರ 2021ರಲ್ಲಿ ಭಾರತದಲ್ಲಿ 15-24 ವರ್ಷ ವಯಸ್ಸಿನವರು ಅತಿ ಹೆಚ್ಚು ತೂಕ ಮತ್ತು ಬೊಜ್ಜು ಸಮಸ್ಯೆಯಿಂದ ಬಳಲುತ್ತಿದ್ದರು. 1.68 ಕೋಟಿ ಯುವಕರು ಮತ್ತು 1.3 ಕೋಟಿ ಯುವತಿಯರು ಈ ಸಮಸ್ಯೆಗೆ ತುತ್ತಾಗಿದ್ದರು. 2021ರಲ್ಲಿ 18 ಕೋಟಿ ಭಾರತೀಯರು ಅಧಿಕ ಮತ್ತು ಬೊಜ್ಜಿನಿಂದ ಬಳಲುವ ಮೂಲಕ ಜಾಗತಿಕವಾಗಿ ಎರಡನೇ ಸ್ಥಾನವನ್ನು ಹೊಂದಿತ್ತು. ಚೀನಾದಲ್ಲಿ 40.2 ಕೋಟಿ ಜನರು ಸಮಸ್ಯೆಯನ್ನು ಎದುರಿಸುವ ಮೂಲಕ ಮೊದಲ ಸ್ಥಾನದಲ್ಲಿತ್ತು. ಆದರೆ 2050ರ ವೇಳೆಗೆ ಭಾರತದಲ್ಲಿ ಈ ಸಮಸ್ಯೆ ಉಲ್ಬಣಗೊಳ್ಳಲಿದ್ದು, ಈ ಪ್ರಮಾಣ ಶೇ.150ರಷ್ಟು ಹೆಚ್ಚಾಗಲಿದೆ. ಎಂದು ವರದಿ ಹೇಳಿದೆ.

ಮಾತ್ರವಲ್ಲದೇ ಜಾಗತಿಕವಾಗಿ ಬೊಜ್ಜು ಪ್ರಮಾಣ ಶೇ.121ರಷ್ಟು ಏರಿಕೆಯಾಗಲಿದ್ದು. 2050ರ ವೇಳೆಗೆ ಬೊಜ್ಜು ಹೊಂದಿರುವ ಮಕ್ಕಳು ಮತ್ತು ಹದಿಹರೆಯದವರ ಪ್ರಕಾರ 36 ಕೋಟಿಗೆ ತಲುಪುವ ನಿರೀಕ್ಷೆಯಿದೆ ಎಂದಿದೆ.

ಕಡಿಮೆ ಮತ್ತು ಮಧ್ಯಮ ಆದಾಯ ದೇಶಗಳಲ್ಲಿ ಈ ಸಮಸ್ಯೆ ಹೆಚ್ಚುತ್ತಿದ್ದು, ಅಪೌಷ್ಟಿಕತೆ, ವ್ಯಾಪಕವಾದ ಸಾಂಕ್ರಾಮಿಕ ರೋಗಗಳು ಇದಕ್ಕೆ ಕಾರಣ ಎನ್ನಲಾಗಿದೆ.