ಶಾಪಿಂಗ್‌ ಚೀಲ ಹೊರಲೂ ಈಗ ಫ್ರೆಂಡ್‌ ಲಭ್ಯ!

ನೀವು ಖರೀದಿಸಿ, ನಾವು ಹೊರುತ್ತೇವೆ ಅಂದ ಸ್ಟಾರ್ಟ್‌ಅಪ್‌

ಚೀಲ ಎತ್ತಿಕೊಂಡು ಬೀದಿ-ಬೀದಿ ಸುತ್ತುತ್ತಾರೆ ಸಹಾಯಕರುನವದೆಹಲಿ: ಶಾಪಿಂಗ್‌ ಮಾಡುವಾಗ ಕಂಡದ್ದೆಲ್ಲಾ ಬೇಕೆನಿಸುತ್ತದೆ. ಆದರೆ ಅಸಲಿ ತಲೆನೋವು ಶುರುವಾಗುವುದು ಅವುಗಳನ್ನು ತುಂಬಿದ ಚೀಲವನ್ನೆತ್ತಿಕೊಂಡು ತಿರುಗಬೇಕು ಎಂದು ನೆನಪಾದಾಗ. ರಸ್ತೆ ಬದಿ ಶಾಪಿಂಗ್‌ ವೇಳೆಯಂತೂ ಈ ಸಮಸ್ಯೆ ಇನ್ನೂ ಘೋರ. ಸಿಲ್ಲಿ ಅನ್ನಿಸಿದರೂ ಸೀರಿಯಸ್‌ ಆಗಿರುವ ಈ ಸಮಸ್ಯೆಗೆ ಪರಿಹಾರವಾಗಿ ಹುಟ್ಟಿಕೊಂಡಿರುವ ದೆಹಲಿ ಮೂಲದ ಸ್ಟಾರ್ಟ್‌ಅಪ್ ‘ಕ್ಯಾರಿಮೆನ್‌’, 149 ರು.ಗೆ ಚೀಲ ಹೊರುವವರನ್ನು ಒದಗಿಸುತ್ತಿದೆ!

ಗಂಟೆಗೆ 149 ರು. ಪಾವತಿಸಿದರೆ, ಕ್ಯಾರಿಮೆನ್‌ ತರಬೇತಿ ಪಡೆದ ಸಹಾಯಕರನ್ನು ಕಳಿಸಿಕೊಡುತ್ತದೆ. ಇವರು ಚೀಲಗಳನ್ನು ಹೊರುವುದಷ್ಟೇ ಅಲ್ಲ, ನಿಮ್ಮೊಂದಿಗೆ ಬೀದಿ-ಬೀದಿ ಅಲಿಯುತ್ತಾರೆ. ಇವರು ಜತೆಯಲ್ಲಿದ್ದರೆ ರಸ್ತೆ ಬದಿ ಅಂಗಡಿಗಳಲ್ಲಿ ಚಾಟ್ಸ್‌ ತಿನ್ನಲು ಉದ್ದುದ್ದ ಸಾಲಲ್ಲಿ ನಿಲ್ಲುವ ಪ್ರಮೇಯವೂ ಬರದು. ಕಾರ್‌ ಅಥವಾ ಮೆಟ್ರೋ ಹತ್ತುವ ತನಕವೂ ಈ ಕ್ಯಾರಿಮೆನ್‌ಗಳು ಜತೆಗೆ ಬರುತ್ತಾರೆ. ಅಗತ್ಯವಿದ್ದಲ್ಲಿ ಮಕ್ಕಳನ್ನೆತ್ತಿಕೊಳ್ಳುವುದು ಅಥವಾ ಅವರ ಟ್ರಾಲಿ ತಳ್ಳಿಕೊಂಡು ಬರುವುದು, ಮೊಬೈಲ್‌ ಚಾರ್ಜ್‌ ಮಾಡುವುದು, ಕೊಡೆ ಹಿಡಿಯುವುದು, ಮಡಚಬಹುದಾದ ಆಸನಗಳನ್ನು ಹೊತ್ತು ಬರುವಂತಹ ಸೇವೆಗಳೂ ಲಭ್ಯವಿದ್ದು, ಇವುಗಳಿಗೆ ಹೆಚ್ಚುವರಿ ಶುಲ್ಕ ತಗುಲುತ್ತದೆ. ಇದು ಮಹಿಳೆಯರು ಮತ್ತು ವೃದ್ಧರಿಗೆ ಉಪಯುಕ್ತವಾಗಲಿದೆ.

ಈ ಬಗೆಗಿನ ಪೋಸ್ಟ್‌ಅನ್ನು ಎಕ್ಸ್‌ನಲ್ಲಿ ಕಂಡ ಜನ, ‘ಇನ್ನು ಮಾರ್ಕೆಟ್‌ಗೆ ಬಾ ಅಂತ ಅಮ್ಮ ತಲೆ ತಿನ್ನೋದಿಲ್ಲ’ ಎಂದರೆ, ಇನ್ನೂ ಕೆಲವರು, ‘ಶಾಪಿಂಗ್‌ ವೇಳೆ ಹೆಣ್ಮಕ್ಕಳು ಕೊಡುವ ಟಾರ್ಚರ್‌ ತಡೆಯಲೂ ಇವರಿಗೆ ತರಬೇತಿ ಕೊಡಬೇಕು’ ಎಂದು ಸಲಹೆ ನೀಡಿದ್ದಾರೆ.