ವಂದೇ ಗಾಯನ ನಿರಾಕರಣೆ ಶಿಕ್ಷಾರ್ಹವಲ್ಲ: ಸುಪ್ರೀಂಸ್ಪಷ್ಟನೆ- ರಾಷ್ಟ್ರಗೀತೆ ಹಾಡದ ವಿದ್ಯಾರ್ಥಿಗಳ ರಕ್ಷಿಸಿದ್ದ ಕೇರಳದ 1986ರ ತೀರ್ಪು ಉಲ್ಲೇಖಿಸಿದ ಕೋರ್ಟ್‌- ಆತ್ಮಸಾಕ್ಷಿ ಕಾರಣಕ್ಕೆ ಹಾಡದಿದ್ರೆ ಕ್ರಿಮಿನಲ್ ಶಿಕ್ಷೆ ವಿಧಿಸುವಂತಿಲ್ಲ । ಕೇಂದ್ರಕ್ಕೆ ಕೋರ್ಟ್‌ ನಿರ್ದೇಶನ

ವಂದೇಮಾತರಂ ಪೂರ್ಣ ಚರಣ ಹಾಡದಿದ್ದರೆ ಶಿಕ್ಷೆ ಪ್ರಶ್ನಿಸಿ ಸುಪ್ರೀಂಗೆ ಅರ್ಜಿ

ಖ್ಯಾತ ಕರ್ನಾಟಕ ಸಂಗೀತಗಾರ ಟಿ.ಎಂ.ಕೃಷ್ಣ ಅವರಿಂದ ಅರ್ಜಿ ಸಲ್ಲಿಕೆ

ಅರ್ಜಿ ವಿಚಾರಣೆ ವೇಳೆ 1986ರ ಬಿಜೋಯ್‌ ಕೇಸ್‌ ಉಲ್ಲೇಖಿಸಿದ ಕೋರ್ಟ್‌

ಆತ್ಮಸಾಕ್ಷಿಯಿಂದ ಹಾಡದೇ ಇರುವುದು ಶಿಕ್ಷಾರ್ಹವಲ್ಲ ಎಂಬ ತೀರ್ಪು ಪ್ರಸ್ತಾಪ

ಈ ತೀರ್ಪು ವಂದೇ ವಿಷಯದಲ್ಲೂ ಗಮನದಲ್ಲಿಟ್ಟುಕೊಳ್ಳುವಂತೆ ಸೂಚನೆ

6 ಚರಣ ಹಾಡಲು ನಿರಾಕರಿಸದವರ ವಿರುದ್ಧ ಕ್ರಮ ಕೈಗೊಳ್ಳದಂತೆ ಆದೇಶಪಿಟಿಐ ನವದೆಹಲಿ

‘ಆತ್ಮಸಾಕ್ಷಿಯ ಆಧಾರದ ಮೇಲೆ ರಾಷ್ಟ್ರೀಯ ಗೀತೆ ವಂದೇ ಮಾತರಂ ಅನ್ನು ಹಾಡಲು ನಿರಾಕರಿಸುವವರನ್ನು ಶಿಕ್ಷೆಗೆ ಗುರಿಪಡಿಸಬಾರದು’ ಎಂದು ಸುಪ್ರೀಂ ಕೋರ್ಟ್‌ ಮಂಗಳವಾರ ಕೇಂದ್ರ ಸರ್ಕಾರಕ್ಕೆ ಮಹತ್ವದ ನಿರ್ದೇಶನ ನೀಡಿದೆ. 1986ರ ಬಿಜೋಯ್ ಇಮ್ಯಾನ್ಯುಯೆಲ್ ಪ್ರಕರಣದ ತೀರ್ಪಿನಲ್ಲಿ ‘ಆತ್ಮಸಾಕ್ಷಿಯ ಆಧಾರದ ಮೇಲೆ ರಾಷ್ಟ್ರಗೀತೆ ಹಾಡಲು ಗೌರವಯುತವಾಗಿ ನಿರಾಕರಿಸಿದ ಶಾಲಾ ಮಕ್ಕಳ ಮೇಲೆ ಕ್ರಮ ಕೈಗೊಳ್ಳುವಂತಿಲ್ಲ’ ಎಂದು ಉಲ್ಲೇಖಿಸಲಾದ ತತ್ವಗಳನ್ನು ವಂದೇಮಾತರಂ ವಿಚಾರದಲ್ಲೂ ಗಮನದಲ್ಲಿಟ್ಟುಕೊಳ್ಳಬೇಕು ಎಂದು ಪೀಠ ಹೇಳಿದೆ.

‘ವಂದೇ ಮಾತರಂನ ಎಲ್ಲಾ 6 ಚರಣಗಳನ್ನು ಹಾಡುವುದನ್ನು ಕಡ್ಡಾಯಗೊಳಿಸಿರುವ ಕೇಂದ್ರದ ನಿಯಮ ಪ್ರಶ್ನಾರ್ಹ. ಇದರ ಕೊನೆಯ 4 ಚರಣಗಳು ದೇಶದ ಜಾತ್ಯತೀತ ಸ್ವರೂಪಕ್ಕೆ ಧಕ್ಕೆ ತರುತ್ತವೆ’ ಎಂದು ಕರ್ನಾಟಕ ಸಂಗೀತಗಾರ ಹಾಗೂ ಲೇಖಕ ಟಿ.ಎಂ. ಕೃಷ್ಣ ಸಲ್ಲಿಸಿದ್ದ ಅರ್ಜಿಯನ್ನು ಮುಖ್ಯ ನ್ಯಾ. ಸೂರ್ಯಕಾಂತ್‌, ನ್ಯಾ. ಜಯಮಾಲ್ಯ ಬಾಗ್ಚಿ ಹಾಗೂ ನ್ಯಾ. ವಿ. ಮೋಹನ ಅವರಿದ್ದ ಪೀಠ ವಿಚಾರಣೆ ನಡೆಸಿತು.

ಈ ವೇಳೆ ಪೀಠವು, ‘ನಾವು ಯಾವುದೇ ಔಪಚಾರಿಕ ನೋಟೀಸ್ ಜಾರಿ ಮಾಡಲು ಒಲವು ತೋರುತ್ತಿಲ್ಲ. ಆದರೆ, ಬಿಜೋಯ್ ಇಮ್ಯಾನ್ಯುಯೆಲ್ ಪ್ರಕರಣದಲ್ಲಿನ ಸುಪ್ರೀಂ ಕೋರ್ಟ್‌ ಆದೇಶವು ವಂದೇಮಾತರಂ 6 ಚರಣ ಕಡ್ಡಾಯಗೊಳಿಸಿದ ತಿದ್ದುಪಡಿ ಕಾಯ್ದೆಗೂ ಅನ್ವಯವಾಗುತ್ತದೆ. ರಾಷ್ಟ್ರಗೀತೆ ಯಾವುದು ಎಂಬುದು ವಿವಾದದ ವಿಷಯವಲ್ಲ. ಬಿಜೋಯ್ ಪ್ರಕರಣದಲ್ಲಿ ಕಾನೂನಿನ ವ್ಯಾಖ್ಯಾನವನ್ನು ಇಲ್ಲಿಯವರೆಗೆ ಯಾರೂ ಪ್ರಶ್ನಿಸಿಲ್ಲ’ ಎಂದಿತು.

ಜತೆಗೆ, ‘ರಾಷ್ಟ್ರಗೀತೆ ಯಾವುದು - ಅದು 2 ಚರಣಗಳೋ ಅಥವಾ 4 ಚರಣಗಳೋ ಎಂಬುದನ್ನು ನಿರ್ಧರಿಸುವುದು ಮತ್ತು ರಾಷ್ಟ್ರದ ಆಕಾಂಕ್ಷೆಗಳನ್ನು ರೂಪಿಸುವುದು ಪ್ರಜಾಸತ್ತಾತ್ಮಕ ಸರ್ಕಾರದ ಕೆಲಸ. ಆದಾಗ್ಯೂ, ಸಂವಿಧಾನದ ವಿಧಿ 25 ಮತ್ತು 26ರ ಅಡಿಯಲ್ಲಿ ಸಿಗುವ ತಮ್ಮ ಮೂಲಭೂತ ಹಕ್ಕುಗಳಿಗೆ ಧಕ್ಕೆಯಾಗಿದೆ ಎಂದು ಭಾವಿಸುವ ಅಥವಾ ಆತ್ಮಸಾಕ್ಷಿಯ ಆಧಾರದ ಮೇಲೆ ನಿರಾಕರಿಸುವ ಯಾವುದೇ ವ್ಯಕ್ತಿಯನ್ನು ಕ್ರಿಮಿನಲ್ ಶಿಕ್ಷೆಗೆ ಗುರಿಪಡಿಸುವಂತಿಲ್ಲ’ ಎಂದು ಸ್ಪಷ್ಟಪಡಿಸಿತು.

1986ರ ಬಿಜೋ ಇಮ್ಯಾನುಯೆಲ್ vs ಕೇರಳ ಪ್ರಕರಣದಲ್ಲಿ, ಆತ್ಮಸಾಕ್ಷಿಯ ಕಾರಣದಿಂದ ರಾಷ್ಟ್ರಗೀತೆಯನ್ನು ಹಾಡಲು ಗೌರವಯುತವಾಗಿ ನಿರಾಕರಿಸಿದ ಶಾಲಾ ಮಕ್ಕಳ ಹಕ್ಕುಗಳನ್ನು ಸುಪ್ರೀಂ ಕೋರ್ಟ್‌ ರಕ್ಷಿಸಿತ್ತು. ಆದರೆ ಇತ್ತೀಚೆಗೆ ಜಾರಿಗೆ ತಂದ ಕಾನೂನು ತಿದ್ದುಪಡಿಯ ಪ್ರಕಾರ, ರಾಷ್ಟ್ರಗೀತೆ ಅಥವಾ ರಾಷ್ಟ್ರಗೀತೆಯನ್ನು ಹಾಡುವುದನ್ನು ಉದ್ದೇಶಪೂರ್ವಕವಾಗಿ ತಡೆಯುವ ಅಥವಾ ಅಂತಹ ಗಾಯನದಲ್ಲಿ ತೊಡಗಿರುವ ಸಭೆಗೆ ಅಡ್ಡಿಪಡಿಸುವ ಯಾವುದೇ ವ್ಯಕ್ತಿಗೆ 3 ವರ್ಷಗಳವರೆಗೆ ಜೈಲು ಶಿಕ್ಷೆ, ದಂಡ, ಅಥವಾ ಇವೆರಡನ್ನೂ ವಿಧಿಸಲು ಅವಕಾಶವಿದೆ.