ಯುದ್ಧದ ಭೀತಿಯ ನಡುವೆ ದಾಖಲೆ ಮಟ್ಟಕ್ಕೆ ಚಿನ್ನದ ಬೆಲೆ 77, 850ಕ್ಕೆ, ಬೆಳ್ಳಿ ಬೆಲೆ 1 ಲಕ್ಷ ರು.ಗೆ ಏರಿಕೆ

ನವದೆಹಲಿ: ರಷ್ಯಾ- ಉಕ್ರೇನ್‌ ಸಂಘರ್ಷ ಇಸ್ರೇಲ್‌- ಹಿಜ್ಬುಲ್ಲಾ- ಹಮಾಸ್‌ ಉಗ್ರರ ನಡುವೆ ಯುದ್ಧದ ಭೀತಿಯ ನಡುವೆಯೇ ಚಿನ್ನ ಮತ್ತು ಬೆಳ್ಳಿ ಬೆಲೆಗಳು ಬುಧವಾರ ದಾಖಲೆ ಮಟ್ಟಕ್ಕೆ ಏರಿವೆ. ದೆಹಲಿಯಲ್ಲಿ ಚಿನ್ನದ ಬೆಲೆ ಪ್ರತಿ 10 ಗ್ರಾಂಗೆ ಸಾರ್ವಕಾಲಿಕ 77850 ರು.ಗೆ ತಲುಪಿದ್ದರೆ, ಚೆನ್ನೈನಲ್ಲಿ 1 ಕೆಜಿ ಬೆಳ್ಳಿ ಬೆಲೆ ದಾಖಲೆಯ 1,01000 ರು. ಮುಟ್ಟಿದೆ.

ಇನ್ನು ಬೆಂಗಳೂರು ಪೇಟೆಯಲ್ಲಿ ಸ್ಟ್ಯಾಂಡರ್ಡ್‌ ಚಿನ್ನ 10 ಗ್ರಾಂಗೆ 77,550 ರು., ಆಭರಣ ಚಿನ್ನ 1 ಗ್ರಾಂಗೆ 7,173 ರು. ಹಾಗೂ 1 ಕೇಜಿ ಬೆಳ್ಳಿ ಬೆಲೆ 93,200 ರು.ಗೆ ಏರಿದೆ,

ದಿಲ್ಲಿಯಲ್ಲಿ ಭಾರಿ ಏರಿಕೆ:

ದೆಹಲಿ ಚಿನಿವಾರ ಪೇಟೆಯಲ್ಲಿ ಬುಧವಾರ, 24 ಕ್ಯಾರೆಟ್ ಚಿನ್ನದ ಬೆಲೆ ಪ್ರತಿ 10 ಗ್ರಾಂಗೆ 900 ರು. ಏರಿಕೆ ಕಂಡು 77850 ರು.ಗೆ ತಲುಪಿದೆ. ಇನ್ನು 22 ಕ್ಯಾರೆಟ್‌ ಚಿನ್ನದ ಬೆಲೆ 76950 ರು.ಗೆ ತಲುಪಿದೆ. ಬೆಳ್ಳಿ ಬೆಲೆ ಕೆಜಿಗೆ 3000 ರು. ಏರಿಕೆ ಕಂಡು 93000 ರು. ಮುಟ್ಟಿದೆ.

ಇನ್ನು ಚಿನ್ನ ಮತ್ತು ಬೆಳ್ಳಿಯ ಪ್ರಮುಖ ಮಾರುಕಟ್ಟೆಯಾದ ಚೆನ್ನೈನಲ್ಲಿ ಶುದ್ಧ ಚಿನ್ನದ ಬೆಲೆ 77200 ರು.ಗೆ ತಲುಪಿದೆ. ಇನ್ನೊಂದೆಡೆ ಬೆಳ್ಳಿ ಬೆಲೆ ಕೆಜಿಗೆ 3000 ರು. ಏರಿಕೆ ಕಂಡು 1 ಲಕ್ಷದ 1 ಸಾವಿರ ರುಗೆ ತಲುಪಿದೆ.

ಮತ್ತೊಂದೆಡೆ ಮುಂಬೈನಲ್ಲಿ ಶುದ್ಧ ಚಿನ್ನದ ಬೆಲೆ 75248 ರು.ಗೆ ಮತ್ತು ಬೆಳ್ಳಿ ಬೆಲೆ 90730 ರು.ಗೆ ತಲುಪಿದೆ.