ಇಸ್ರೋ ‘ಸ್ಪೇಡೆಕ್ಸ್’ ಮಹಾಸಾಹಸಕ್ಕೆ ಶ್ರೀಕಾರ : 2 ಉಪಗ್ರಹಗಳ ಯಶಸ್ವಿಯಾಗಿ ಉಡಾವಣೆ

ಶ್ರೀಹರಿಕೋಟ: ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ), ಸೋಮವಾರ ಶ್ರೀಹರಿಕೋಟಾ ಬಾಹ್ಯಾಕಾಶ ಕೇಂದ್ರದಿಂದ ‘ಸ್ಪೇಸ್‌ ಡಾಕಿಂಗ್‌ ಎಕ್ಸ್‌ಪ​ರಿ​ಮೆಂಟ್‌’ (ಸ್ಪೇಡೆಕ್ಸ್‌) ಯೋಜನೆ ಭಾಗವಾಗಿ 2 ಉಪಗ್ರಹಗಳನ್ನು ಯಶಸ್ವಿಯಾಗಿ ಉಡಾವಣೆ ಮಾಡಿದೆ.

ಈ ಮುನ್ನ ಸೋಮವಾರ ರಾತ್ರಿ 9.58ಕ್ಕೆ ಶ್ರೀಹರಿಕೋಟದಿಂದ ರಾಕೆಟ್‌ ಉಡಾವಣೆ ಸಮಯ ನಿಗದಿ ಆಗಿತ್ತು. ಆದರೆ ಕೆಲ ಬದಲಾ​ವಣೆಯಿಂದ 2 ನಿಮಿಷ ಮುಂದೂಡಿಕೆಯಾಗಿ ರಾತ್ರಿ 10ಕ್ಕೆ ಉಡಾವಣೆಗೊಂಡಿತು. ಇದಾದ 16 ನಿಮಿ​ಷಕ್ಕೆ- ಎಂದರೆ 10.15ಕ್ಕೆ ಮಿಶನ್‌ ಯಶ​ಸ್ವಿ​ಯಾ​ಗಿದೆ ಎಂಬ ಘೋಷಣೆ ಆಯಿತು.

‘ಎರಡೂ ಉಪಗ್ರಹಗಳು 476 ಕಿ.ಮೀ. ವೃತ್ತಾಕಾರ ಪರಿ​ಧಿಗೆ ಈಗ ಸೇರಿವೆ. ಇನ್ನು ಜ.7ರ ಸುಮಾ​ರಿ​ಗೆ ಇವುಗಳ ಡಾಕಿಂಗ್‌ (ಜೋಡಣೆ) ಕಸರತ್ತು ನಡೆಯಲಿದೆ’ ಎಂದು ಇಸ್ರೋ ಅಧ್ಯಕ್ಷ ಎಸ್‌. ಸೋಮ​ನಾಥ್‌ ಹೇಳಿ​ದ್ದಾ​ರೆ. ಇವುಗಳ ಡಾಕಿಂಗ್‌ನಲ್ಲಿ ಇಸ್ರೋ ಯಶ ಕಂಡರೆ, ಭಾರತ ಸ್ಪೇಡೆಕ್ಸ್‌ ನಲ್ಲಿ ಸಾಧನೆ ಮಾಡಿದ ವಿಶ್ವದ 4ನೇ ದೇಶ ಎನ್ನಿಸಿ ಕೊಳ್ಳಲಿದೆ. ಸದ್ಯಕ್ಕೆ ಡಾಕಿಂಗ್‌ ತಂತ್ರಜ್ಞಾನವನ್ನು ಅಮೆರಿಕ, ರಷ್ಯಾ, ಚೀನಾ ಹೊಂದಿವೆ.

ಏನಿದು ಇಸ್ರೋ ಪ್ರಯೋಗ?: ಪಿಎಸ್‌ಎಲ್‌ವಿ ರಾಕೆಟ್‌ ಸಹಾಯದಿಂದ ಬಾಹ್ಯಾಕಾಶಕ್ಕೆ ಟಾರ್ಗೆಟ್‌ ಮತ್ತು ಚೇಸರ್‌ಎಂಬ 2 ಉಪಗ್ರಹಗ​ಳನ್ನು ಉಡಾವಣೆ ಮಾಡಲಾಗಿದೆ.

ಅವುಗಳಲ್ಲಿರುವ ವ್ಯವಸ್ಥೆಯ ಸಹಾಯದಿಂದ ವ್ಯೋಮನೌಕೆಗಳನ್ನು ಪರಸ್ಪರ ಸಂಧಿಸುವಂತೆ ಮಾಡುವುದು, ಸೆನ್ಸರ್‌ಗಳನ್ನು ಬಳಸಿ ಎರಡೂ ಉಪಗ್ರಹಗಳು ಒಂದಕ್ಕೊಂದು ಜೋಡಣೆ (ಡಾಕಿಂಗ್‌) ಆಗುವಂತೆ ಮಾಡುವುದು. ಬಳಿಕ ಪರ​ಸ್ಪರ ಬೇರೆ (ಅನ್‌ಡಾಕಿಂಗ್‌) ಆಗುವಂತೆ ಮಾಡು​ವುದು ಇಸ್ರೋ ನಡೆಸುತ್ತಿರುವ ಪ್ರಯೋಗ. ಹೀಗಾಗಿ ‘ಸ್ಪೇಸ್‌ ಡಾಕಿಂಗ್‌ ಎಕ್ಸ್‌ ಪರಿ​ಮೆಂಟ್‌’ (ಸ್ಪೇಡೆಕ್ಸ್‌) ಎಂಬ ಹೆಸರನ್ನು ಇದಕ್ಕೆ ಇಟ್ಟಿದೆ. ಈ ಉಪಗ್ರಹಗಳು ಹಲವು ಮುಖ್ಯ ಕಾರ್ಯ​ಗಳನ್ನು ನೆರವೇರಿಸಲಿವೆ. ಅವೆರಡು ಉಪ​ಗ್ರಹಗಳು ಪರಸ್ಪರ ಒಂದೇ ಕಕ್ಷೆ ಯಲ್ಲಿ ಅಳ​ವ​ಡಿ​ಕೆಯಾಗಿ, ಕ್ರಮೇಣ ಪರಸ್ಪರ ಸನಿಹಕ್ಕೆ ಚಲಿ​ಸ​ಲಿವೆ. ಅವೆರಡೂ ಸಾಕಷ್ಟುಹತ್ತಿರಕ್ಕೆ ಸಾಗಿದ ಬಳಿಕ, ಅವು ಒಂದಕ್ಕೊಂದು ಜೋಡಣೆಯಾಗಿ, ವಿದ್ಯುತ್‌ ಶಕ್ತಿಯನ್ನು ಹಂಚಿ ಕೊಂಡು, ಬಳಿಕ ಬೇರ್ಪಡಲಿವೆ. ಬೇರ್ಪಟ್ಟಬಳಿಕ, 2 ವರ್ಷ ಕಾಲ ಎರಡೂ ಉಪಗ್ರಹಗಳು ತಮ್ಮ ಪೇಲೋಡ್‌ ಕಾರ್ಯಾಚರಿಸಲಿವೆ.

ಏಕೆ ಈ ಪ್ರಯೋಗ?

ಈ ತಂತ್ರಜ್ಞಾನ, ಇಸ್ರೋದ ಭವಿಷ್ಯದ ಯೋಜನೆಗಳಾದ ಚಂದ್ರಯಾನ-4 ಹಾಗೂ ಭಾರತದ ಸ್ವಂತ ಬಾಹ್ಯಾಕಾಶ ನಿಲ್ದಾಣವಾದ ‘ಭಾರತೀಯ ಅಂತರಿಕ್ಷ ಕೇಂದ್ರ’ ನಿರ್ಮಾಣಕ್ಕೆ ಅತ್ಯವಶ್ಯಕವಾ​ಗಿದೆ. ಅಂತಾರಾಷ್ಟ್ರೀಯ ಬಾಹ್ಯಾಕಾಶ ಕೇಂದ್ರದ ರೀತಿಯಲ್ಲೇ ಇಸ್ರೋ ಕೂಡ ತನ್ನದೇ ಆದ ಸ್ವದೇಶಿ ಭಾರತೀಯ ಅಂತ​ರಿಕ್ಷ ನಿಲ್ದಾಣವನ್ನು ಸ್ಥಾಪಿಸಲು ಪ್ರಾರಂಭಿ​ಸಿದೆ. ಆ ನಿಲ್ದಾಣಕ್ಕೆ ಗಗನಯಾತ್ರಿಗಳು, ಉಪಕ​ರಣಗಳನ್ನು ಕಳುಹಿಸಲು ಡಾಕಿಂಗ್‌, ಅನ್‌ಡಾಕಿಂಗ್‌ ಪರಿಣತಿ ಬೇಕು. ಜೊತೆಗೆ ಮಾನವಸಹಿತ ಅಂತರಿಕ್ಷ​ಯಾನ, ಚಂದ್ರನ ಅಂಗಗಳಿಗೆ ಮನುಷ್ಯ​ರನ್ನು ಕಳುಹಿಸಿ, ವಾಪಸ್‌ ಕರೆತರಲು ಈ ತಂತ್ರಜ್ಞಾನ ಬೇಕು.