ದೀಪಾವಳಿ ಹೊತ್ತಲ್ಲಿ ಕೇಸೂರು ಕೂಲಿಕಾರರ ಖಾತೆಗೆ ₹22 ಲಕ್ಷ!

ಪರಶಿವಮೂರ್ತಿ ಮಾಟಲದಿನ್ನಿ

ಕುಷ್ಟಗಿ: ದುಡಿದ ಕೈಗಳಿಗೆ ಸಕಾಲಕ್ಕೆ ಕೂಲಿ ಸಿಗದಿದ್ದರೆ ಆ ಕುಟುಂಬಗಳ ಬದುಕು ಹೇಗಿರಬಹುದು? ಅದರಲ್ಲೂ ದೀಪಾವಳಿ ಹಬ್ಬದ ಸಂದರ್ಭದಲ್ಲಿ ದುಡಿದ ಹಣಕ್ಕಾಗಿ ಎರಡು ತಿಂಗಳು ಕಾಯಬೇಕಾದ ಪರಿಸ್ಥಿತಿ ಎದುರಾದರೆ ಕಾರ್ಮಿಕರ ಸಂಕಷ್ಟ ಹೇಳತೀರದು. ಇಂತಹ ಸಂಕಷ್ಟಕ್ಕೆ ಸಿಲುಕಿದ್ದ ಕುಷ್ಟಗಿ ತಾಲೂಕಿನ ಕೇಸೂರು ಗ್ರಾಮದ ಕೂಲಿಕಾರರ ಮೊಗದಲ್ಲಿ ಇದೀಗ ಮಂದಹಾಸ ಮೂಡಿದೆ. ಎರಡು ತಿಂಗಳಿನಿಂದ ಬಾಕಿ ಉಳಿದಿದ್ದ ಸುಮಾರು ₹22 ಲಕ್ಷ ಕೂಲಿ ಹಣ ಅ. 29ರಂದು ಕಾರ್ಮಿಕರ ಬ್ಯಾಂಕ್ ಖಾತೆಗಳಿಗೆ ಜಮೆಯಾಗಿದೆ.

ವಿಬಿ ಜಿ ರಾಮ್ ಜಿ ಯೋಜನೆಯಡಿ ಆಗಸ್ಟ್ ತಿಂಗಳಲ್ಲಿ ತಾಲೂಕಿನ ವಣಗೇರಿ ಗ್ರಾಮದಲ್ಲಿ ಕೈಗೊಂಡಿದ್ದ ಕೆರೆ ಪುನಶ್ಚೇತನ ಕಾಮಗಾರಿಯಲ್ಲಿ ಕೇಸೂರು ಗ್ರಾಮದ ನೂರಾರು ಕೂಲಿಕಾರರು ಕೆಲಸ ಮಾಡಿದ್ದರು. ಆದರೆ ಅ‍ವರಿಗೆ ಎರಡು ತಿಂಗಳು ಕಳೆದರೂ ಕೂಲಿ ಹಣ ಪಾವತಿಯಾಗಿರಲಿಲ್ಲ. ಈ ಕುರಿತು ''ಕನ್ನಡಪ್ರಭ'' ಅ. 23ರಂದು ''ಎರಡು ತಿಂಗಳಾದರೂ ಬಾರದ ಕೂಲಿ ಹಣ, ಕಾರ್ಮಿಕರಿಗೆ ಸಂಕಷ್ಟ'' ಎಂಬ ಶೀರ್ಷಿಕೆಯಡಿ ವಿಶೇಷ ವರದಿ ಪ್ರಕಟಿಸಿ ಸಂಬಂಧಿಸಿದವರ ಗಮನ ಸೆಳೆದಿತ್ತು. ವರದಿ ಪ್ರಕಟವಾದ ಆರು ದಿನಗಳಲ್ಲೇ ಅ. 29ರಂದು ಕೂಲಿಕಾರರ ಖಾತೆಗಳಿಗೆ ಹಣ ಜಮೆಯಾಗಿದೆ.

500ಕ್ಕೂ ಅಧಿಕ ಜನರಿಗೆ ಹಣ ಪಾವತಿ: 500ಕ್ಕೂ ಅಧಿಕ ಕೂಲಿಕಾರರ ಬ್ಯಾಂಕ್ ಖಾತೆಗಳಿಗೆ ಒಟ್ಟು ₹22 ಲಕ್ಷ ಕೂಲಿ ಮೊತ್ತ ಪಾವತಿಯಾಗಿದೆ. ಕೆಲ ತಾಂತ್ರಿಕ ದೋಷಗಳಿಂದ ಇನ್ನೂ ಬೆರಳೆಣಿಕೆಯಷ್ಟು ಕಾರ್ಮಿಕರ ಖಾತೆಗಳಿಗೆ ಹಣ ಜಮೆಯಾಗುವುದು ಬಾಕಿ ಉಳಿದಿದೆ. ದೀಪಾವಳಿ ಹಬ್ಬದ ಹೊತ್ತಿನಲ್ಲಿ ದುಡಿದ ಹಣ ಕೈ ಸೇರಿರುವುದು ಕಾರ್ಮಿಕ ಕುಟುಂಬಗಳಿಗೆ ನೆಮ್ಮದಿ ತಂದಿದೆ.

ಕೃತಜ್ಞತೆ: ವಣಗೇರಿ ಗ್ರಾಮದ ಕೆರೆ ಪುನಶ್ಚೇತನ ಕಾಮಗಾರಿಯಲ್ಲಿ ಎರಡು ತಿಂಗಳ ಹಿಂದೆ ಕೆಲಸ ಮಾಡಿದ್ದೆವು. ಆದರೆ ದುಡಿದ ಕೂಲಿ ಹಣ ಖಾತೆಗೆ ಬಾರದೆ ಸಾಕಷ್ಟು ತೊಂದರೆ ಅನುಭವಿಸಿದ್ದೆವು. ''ಕನ್ನಡಪ್ರಭ''ದಲ್ಲಿ ವರದಿ ಪ್ರಕಟವಾದ ಬಳಿಕ ಅ. 29ರಂದು ನಮ್ಮ ಖಾತೆಗಳಿಗೆ ಕೂಲಿ ಹಣ ಜಮೆಯಾಗಿದೆ. ಹಬ್ಬದ ಸಂದರ್ಭದಲ್ಲಿ ಹಣ ಬಂದಿರುವುದು ತುಂಬಾ ಸಂತೋಷ ತಂದಿದೆ. ನಮ್ಮ ಸಮಸ್ಯೆಗೆ ಧ್ವನಿಯಾದ ''ಕನ್ನಡಪ್ರಭ''ಕ್ಕೆ ಕೃತಜ್ಞತೆ ಸಲ್ಲಿಸುತ್ತೇವೆ ಎಂದು ಕೇಸೂರು ಗ್ರಾಮದ ಕೂಲಿಕಾರರು ಹೇಳಿದರು.

ವಿಳಂಬವಾಗದಂತೆ ನೋಡಿಕೊಳ್ಳುತ್ತೇವೆ: ಕೆಲವು ತಾಂತ್ರಿಕ ದೋಷಗಳಿಂದ ಕೂಲಿಕಾರರ ಹಣ ಪಾವತಿಯಾಗುವುದು ವಿಳಂಬವಾಗಿದೆ. ₹22 ಲಕ್ಷ ಕೂಲಿ ಹಣ ಪಾವತಿಯಾಗಿದೆ. ಉಳಿದ ಬೆರಳೆಣಿಕೆಯಷ್ಟು ಕಾರ್ಮಿಕರ ಖಾತೆಗಳಿಗೂ ಹಣ ಜಮೆಯಾಗುವಂತೆ ಕ್ರಮ ಕೈಗೊಳ್ಳಲಾಗುವುದು. ಇನ್ನು ಮುಂದೆ ಈ ರೀತಿಯ ವಿಳಂಬವಾಗದಂತೆ ನೋಡಿಕೊಳ್ಳಲಾಗುವುದು ಎಂದು ಕೇಸೂರು ಗ್ರಾಪಂ ಪಿಡಿಒ ಕೆ. ವಾಗೀಶ್ ಹೇಳಿದರು.